O‘zbekiston Respublikasi Ekologiya va iqlim o‘zgarishi milliy qo‘mitasi huzuridagi Markaziy Osiyo atrof-muhit va iqlim o‘zgarishini o‘rganish universitetida (“Green University”) ” Eco Expo Central Asia 2026″ xalqaro ekologik ko‘rgazmasi, Global ekologik jamg‘armaning (GEF) VIII Assambleyasi, shuningdek, “Green University” va “yashil” texnikumlar faoliyatiga bag‘ishlangan matbuot anjumani tashkil etildi.

Tadbirda Ekologiya vaziri o‘rinbosari Jusipbek Kazbekov, Ekologiya qo‘mitasi bo‘lim boshlig‘i Javohir Abduxoliqov, qo‘mita departament rahbari Bahrom Xolxo‘jayev, “Green University” rektori, professor Baxtiyor Pulatov, qo‘mita va tizim tashkilotlari xodimlari, hududiy boshqarmalar hamda ommaviy axborot vositalari vakillari ishtirok etdi.

Tadbirda so‘zga chiqqan Jusipbek Kazbekov O‘zbekiston yana muhim xalqaro ekologik tadbirlar o‘tkaziladigan maydonga aylanayotganini ta’kidladi. Ushbu tadbirlar doirasida atrof-muhitni muhofaza qilishning dolzarb masalalariga alohida e’tibor qaratilishi qayd etildi. Jumladan, iqlim o‘zgarishi va uning oqibatlariga bardoshlilikni oshirish, bioxilma-xillikni saqlash, yer degradatsiyasi va cho‘llanishga qarshi kurash, suv resurslarini boshqarish hamda atrof-muhit ifloslanishini kamaytirish masalalari muhokama qilinadi. Shuningdek, u Markaziy Osiyodagi yagona ixtisoslashgan ekologik universitet — “Green University” hamda uning huzurida tashkil etilayotgan «yashil» texnikumlar faoliyatiga alohida to‘xtaldi. Ushbu texnikumlarda ekologiya sohasida yuqori malakali mutaxassislar tayyorlanishi, bu esa nafaqat O‘zbekistonda, balki butun mintaqada ekologik barqarorlikni ta’minlashda muhim ahamiyat kasb etishi ta’kidlandi.

O‘z navbatida, Javohir Abduxoliqov Global ekologik jamg‘armaning (GEF) VIII Assambleyasi haqida ma’lumot berdi. Assambleya doirasida yuqori darajadagi 9 ta davra suhbati, 50 dan ortiq sayd-iventlar o‘tkazilishi, qator xalqaro tashabbuslar e’lon qilinishi va yangi ekologik loyihalar ishga tushirilishi rejalashtirilgan. Assambleya yakunlari bo‘yicha «yashil» loyihalarga grant va investitsiyalar jalb etilishi, xalqaro moliyaviy institutlar bilan hamkorlik kengaytirilishi, iqlim o‘zgarishiga moslashuv loyihalari qo‘llab-quvvatlanishi, Orolbo‘yi ekotizimini tiklash dasturlari ilgari surilishi, bioxilma-xillikni saqlash, qayta tiklanuvchi energetika va barqaror qishloq xo‘jaligi loyihalari rivojlantirilishi, shuningdek, qo‘shma transchegaraviy tashabbuslar yo‘lga qo‘yilishi kutilmoqda. Bundan tashqari, tadbir xorijiy delegatsiyalar va ekspertlar oqimini oshirish, biznes turizmini rivojlantirish hamda xizmat ko‘rsatish va logistika sohalarida qo‘shimcha ish o‘rinlari yaratishga xizmat qilishi qayd etildi.

Tadbirda so‘zga chiqqan Bahrom Xolxo‘jayev ” Eco Expo Central Asia 2026″ xalqaro ekologik ko‘rgazmasiga alohida to‘xtaldi. Uning ta’kidlashicha, mazkur tadbir dunyoning 100 dan ortiq davlatidan vakillar, xalqaro tashkilotlar rahbarlari, diplomatik korpus, investorlar, ekologik mahsulot ishlab chiqaruvchilar, ekoinnovatorlar, davlat organlari va ekspertlar hamjamiyatini birlashtiradi. Ko‘rgazma doirasida ekologik mahsulot va xizmatlarga bag‘ishlangan 68 dan ortiq pavilon tashkil etiladi.

Source link

O‘zbekistonda 2026-yil boshidan buyon quyosh va shamol elektr stansiyalari tomonidan ishlab chiqarilgan elektr energiyasi hajmi 4 milliard kVt/soatga yetdi. Bu o‘tgan yilning mos davriga nisbatan 29 foizga ko‘pdir.

Energetika vazirligi ma’lumotiga ko‘ra, 14-may kuni soat 18:00 holatiga:

quyosh fotoelektr stansiyalari 2 mlrd 315 mln kVt/soat;
shamol elektr stansiyalari 1 mlrd 685 mln kVt/soat elektr energiyasi ishlab chiqargan.

Ma’lum qilinishicha, bundan 24 kun avval — 20-aprel kuni mazkur ko‘rsatkich 3 milliard kVt/soatni tashkil etgan edi.

Hisob-kitoblarga ko‘ra, yil boshidan qayta tiklanuvchi energiya manbalari orqali 1 mlrd 66 mln kub metr tabiiy gaz tejalgan. Atmosferaga 2,3 mln tonna zararli moddalar chiqarilishining oldi olingan.

Shuningdek, gidroelektr stansiyalar ham qo‘shilganda, O‘zbekistonda yil boshidan buyon «yashil» energiya ishlab chiqarish hajmi 6 mlrd 160 mln kVt/soatga yetgan.

Bu orqali 1,6 mlrd kub metr tabiiy gaz tejalgan hamda atmosferaga 3,4 mln tonnadan ortiq zararli moddalar chiqarilishining oldi olingan.

Mutaxassislar ta’kidlashicha, mazkur hajmdagi elektr energiyasi o‘rtacha 4,4 mln xonadonning 4,5 oylik yoki 1,6 mln xonadonning bir yillik ehtiyojini qoplashga yetadi. 

Source link

Jizzax viloyatining G‘allaorol tumanida yosh kelinning vafoti bilan bog‘liq holat yuzasidan Sog‘liqni saqlash vazirligi rasmiy ma’lumot berdi.

Vazirlikka ko‘ra, ijtimoiy tarmoqlarda tarqalgan «shifokor xatosi tufayli kelin vafot etgani» haqidagi xabarlar yuzasidan tekshiruv o‘tkazilmoqda.

Ma’lum qilinishicha, 2002-yilda tug‘ilgan fuqaro M.J. 2026-yil 30-aprel kuni G‘allaorol tumanlararo perinatal markaziga tug‘uruq uchun qabul qilingan. 1-may kuni u sog‘lom qiz farzandni dunyoga keltirgan.

Shifokorlar ma’lumotiga ko‘ra, tug‘uruqdan keyin ona va bola doimiy kuzatuvda bo‘lgan hamda 4-may kuni ahvoli qoniqarli deb topilib, uyiga javob berilgan.

Bildirilishicha, fuqaro uyiga qaytgach, internetdagi ma’lumotlarga asoslanib, shifokor tavsiyasisiz ona sutini ko‘paytiruvchi dori vositasini qabul qilgan. Shundan keyin unda allergik reaksiya kuzatilgan.

6-may kuni u G‘allaorol tuman markaziy shifoxonasiga olib kelingan va shoshilinch tibbiy yordam ko‘rsatilgan. Shifokorlar bemorni statsionarda davolash zarurligini aytgan, ammo yaqinlari uni uyiga olib ketgani ma’lum qilindi.

Oradan bir necha soat o‘tib, bemorning ahvoli yana og‘irlashgan va u qayta shifoxonaga olib kelingan. Reanimatsiya choralariga qaramasdan, 6-may kuni soat 15:30 da bemor vafot etgan.

Holat yuzasidan sud-tibbiy ekspertizasi tayinlangan. Ayni paytda G‘allaorol tuman prokuraturasi tomonidan tergovga qadar tekshiruv harakatlari olib borilmoqda.

Source link

Hukumatning o‘tgan yilgi qarorida har yili 1 maydan elektr va tabiiy gaz narxlari 10 foizdan yuqori bo‘lmagan miqdorda indeksatsiya qilib borilishi belgilangan edi.
Vazirlar Mahkamasining «Yoqilg‘i-energetika resurslari narxlarini belgilash to‘g‘risida»gi qarori bilan 2026 yil 1 iyundan elektr energiyasi va tabiiy gazning yangi tariflari tasdiqlandi.

Qarorga muvofiq, I va II guruh iste’molchilari uchun elektr energiyasining 1 kVt soati 1 100 so‘m etib belgilandi. IV guruh iste’molchilari uchun ham elektr energiyasining 1 kVt soati 1 100 so‘mni tashkil etadi.

III guruh, shu jumladan aholi uchun tabaqalashtirilgan tariflar saqlab qolindi.

Xususan, ovqat tayyorlash uchun markazlashgan holda elektr plitalar bilan jihozlangan ko‘p kvartirali uylar va yotoqxonalarda yashovchi aholi uchun:

— oyiga 200 kVt soatgacha — 325 so‘m;
— 201 kVt soatdan 500 kVt soatgacha — 450 so‘m;
— 501 kVt soatdan 1 000 kVt soatgacha — 550 so‘m etib belgilandi.

Qolgan maishiy iste’molchilar uchun esa:

— oyiga 200 kVt soatgacha — 650 so‘m;
— 201 kVt soatdan 500 kVt soatgacha — 900 so‘m;
— 501 kVt soatdan 1 000 kVt soatgacha — 1 100 so‘m bo‘ladi.

Yuqori hajmdagi iste’mol uchun oshirilgan koeffitsiyentli tariflar saqlanib qoladi.

Tabiiy gaz bo‘yicha barcha iste’molchilar uchun (alohida toifalardan tashqari) 1 kub metr gaz narxi 2 000 so‘m etib belgilandi. Avtomobillarga gaz to‘ldirish kompressor shoxobchalari uchun tarif 1 kub metr uchun 2 750 so‘mni tashkil etadi.

Aholi uchun tabiiy gaz tariflari ham tabaqalashtirilgan tartibda saqlanib, isitish mavsumida oyiga 500 kub metrgacha, boshqa mavsumlarda esa 100 kub metrgacha iste’mol uchun 1 kub metr gaz 1 100 so‘mdan hisoblanadi.

Qaror bilan energiya resurslarini yetkazib berishdagi yo‘qotishlarni qisqartirish, energiya samaradorligini oshirish va xizmatlar sifatini yaxshilash bo‘yicha qo‘shimcha vazifalar ham belgilandi.

Eslatib o‘tamiz, Hukumatning 2025 yil 31 martdagi qaroriga muvofiq, elektr energiyasi va tabiiy gaz narxlari har yili 1 maydan bir marotaba 10 foizdan yuqori bo‘lmagan miqdorda indeksatsiya qilib boriladi.

Source link

Qashqadaryo va Jizzax viloyatlarida pul evaziga Koreyaga ishga jo‘natishni va’da qilgan shaxslar tezkor tadbirda ushlandi. Ishchi viza rasmiylashtirib berish va ishga jo‘natish uchun ularning biri 8 ming dollar, ikkinchisi esa 2 kishi uchun 165 mln so‘m so‘ragan.

Hududlarda Koreya davlatiga ishga jo‘natish bilan bog‘liq firibgarlik holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Jizzax viloyati. Fuqaro Q.Z. 8 ming dollar evaziga Koreyaga yuborish uchun ishchi vizasi rasmiylashtirib berish va ushbu davlatda ishga joylashtirib qo‘yishni va’da qilgan. U bu ishni go‘yoki Migratsiya agentligida yuqori lavozimlarda ishlovchi tanishlari orqali amalga oshirishini bildirgan. Q.Z. aytilgan puldan oldindan 3 ming dollar olganda departament xodimlari o‘tkazgan tezkor tadbirda ushlangan.

Qashqadaryo viloyati. Fuqaro X.S. 165 mln so‘m evaziga 2 nafar fuqaroni Koreyaga yuborish uchun ishchi vizasini rasmiylashtirib berishini va’da qilgan. U ushbu pullar hisobidan 7 ming dollar olgan vaqtida ashyoviy dalillar bilan qo‘lga olingan.

Hozirda har ikki holat bo‘yicha Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq O‘zbekistonda Koreyaga ishga yuborish bilan bog‘liq korrupsion sxema fosh etilgandi.

Source link