Hokim–fermer nizolari tez-tez uchrab turadi, ko‘plab fermerlar oxirigacha borib o‘tirmay, qo‘l siltab qo‘ya qoladi. Lekin Qashqadaryoning Nishon tumanidagi “Bobur” fermer xo‘jaligi rahbari Bahodir Qo‘ldoshev haqida bunday deb bo‘lmaydi. U tortib olingan yerini qaytarish uchun 2019 yildan beri sudma-sud yuguryapti.

O‘tgan oyda Human Righs Watch xalqaro nodavlat tashkiloti O‘zbekiston qishloq xo‘jaligidagi holat haqida “Fermerlarda erkinlik yo‘q” nomli hisobot e’lon qilgan edi. Hisobotda, jumladan, shunday deyiladi:

“Hokimlik tomonidan yerining tortib olinishiga qarshi sudga da’vo arizasi bilan murojaat qilgan fermerlar O‘zbekiston sudlarida kamdan kam hollarda adolat topa oladi. Topgan taqdirda ham, mahalliy amaldorlar yerni fermerga qaytarish to‘g‘risidagi qarorlarni deyarli ijro etmaydi”.

Qashqadaryo viloyati Nishon tumanidan Kun.uz’ga murojaat qilgan “Bobur” fermer xo‘jaligi rahbari Bahodir Qo‘ldoshev – ana shu real vaziyatning yana bir misoli.

U qariyb 7 yildirki adolat izlab sudma-sud yuguradi.

2019 yilda 106 gektar yerini Nishon tumanining o‘sha paytdagi hokimi Muxtor Hayitmurodov noqonuniy ravishda tortib olgan.

Fermer keyinchalik sud orqali huquqlarini tiklashga erishgan, lekin uni oldinda hali yangi sinovlar kutayotgan edi.

Sudma-sud sarguzashtlar. 1-qism

Nishon tumani hokimining 2019 yil 23 yanvardagi qarori bilan, “Bobur” fermer xo‘jaligiga paxta va g‘allachilik uchun qariyb 106 gektar yer ajratilgan. Oradan 4 oy o‘tib, tuman hokimining 2019 yil 24 may kungi qarori bilan bu yerlar yana tuman zaxirasiga qaytarilgan.

2019 yil iyun oyida hokim bu yerlarni boshqa ikkita yuridik shaxsga ajratib bergan. Ulardan biri – “Nishan Chicken’s” MChJ XKga 36 gektar yer berilgan.

“Bobur” fermer xo‘jaligi rahbari Bahodir Qo‘ldoshev bu qarorlardan norozi bo‘lib, sudga arz qilgan. Nishon tuman ma’muriy sudining 2019 yil 20 noyabr kungi hal qiluv qarori bilan, tuman hokimining 105 gektarni zaxiraga qaytarish va bu yerlarni boshqa ikkita yuridik shaxsga ajratib berish haqidagi qarorlari haqiqiy emas deb topilgan.

Nishon tumani hokimligi sud qaroridan norozi bo‘lib, shikoyat kiritgan, lekin 2020 yil 13 fevral kuni Qashqadaryo viloyati ma’muriy sudi kassatsiya instansiyasi qarorni o‘zgarishsiz qoldirgan.

Ko‘rinib turganidek, fermerdan yerini olib qo‘ygan olgan hokim Muxtor Hayitmurodov birinchi va ikkinchi instansiya sudlarida yutqazgan, Oliy sudga esa shikoyat kiritmagan. Natijada fermerning 106 gektar yerga nisbatan huquqi tiklanishi kerak edi.

Lekin amalda unday bo‘lmagan. Hokim Hayitmurodov o‘z harakatlarini davom ettirib, 2020 yil 20 mart kungi qarori bilan “Bobur” fermer xo‘jaligiga tegishli yerning yuqorida tilga olingan 36 gektarlik qismini yana “Nishan Chicken’s” MChJ XKga ajratib bergan. Vaholanki, bu vaqtda mazkur yer maydoni “Bobur” fermer xo‘jaligiga tegishli edi – hokim yerni zaxiraga olish to‘g‘risida yangi qaror chiqarmagan (zaxiraga olish to‘g‘risida 2019 yil 24 maydagi hokim qarori sudlar tomonidan haqiqiy emas deb topilgani haqida yuqorida to‘xtalib o‘tildi).

“Hokim meni aldagan ekan”

Fermer Bahodir Qo‘ldoshevning aytishicha, u 2019-2020 yillardagi sudlarda yutib chiqqach, tuman hokimining iltimosi bilan “Bobur” fermer xo‘jaligiga tegishli 86-konturdagi 36 gektar yerni “Nishan Chicken’s” MChJga 1 yil foydalanish uchun norasmiy tarzda, og‘zaki kelishuv asosida berib turgan, lekin kelishilgan muddat o‘tganidan keyin yerini qaytarib ololmagan. U, o‘zining aytishicha, tuman hokimi 2020 yil 20 martdagi qarori bilan ushbu 36 gektar yerni mazkur MChJga ikkinchi marta berib yuborganidan 2022 yilga kelibgina xabar topgan.

“[2019-2020 yillardagi] sudlarda yutganim uchun yerim o‘zimga qaytgan edi, faqat 36 gektar yerni hokim “keyinroq olasan” degan edi. Keyin bilsam, ular meni aldagan ekan”, – deydi Bahodir Qo‘ldoshev.

Qayd etish lozim, uning “tuman kengashi qaroridan bexabar edim”, “hokim meni aldagan ekan” mazmunidagi vajini hozirga qadar sudlar bir nechta asoslarga ko‘ra rad etib kelmoqda.

Sudma-sud sarguzashtlar. 2-qism

Fermer suddagi sarguzashtlarining ikkinchi seriyasida tuman hokimining 36 gektar yerni “Nishan Chicken’s”ga ajratib berish haqidagi 2020 yil 20 mart kungi qarorini bekor qilmoqchi bo‘ladi.

Lekin endi u yangi muammoga duch keladi: xalq deputatlari Nishon tuman kengashining 2019 yil 18 maydagi qarori hamon qonuniy kuchida edi. Biz yuqorida to‘xtalib o‘tgan, 106 gektar yerni olib qo‘yish haqidagi hokim qarori – formal jihatdan ana shu kengash qarori asosida qabul qilingan bo‘lgan. Eslatib o‘tamiz, u paytlarda tuman kengashlariga hokimlarning o‘zi rais edi; fermerlardan yerni olishda avvaliga kengash qarori qabul qilinib, shundan keyin hokim qarori bilan u ijro qilinardi.

Bahodir Qo‘ldoshevning xatosi shunda ediki, u avvalgi sud jarayonlarida faqat hokim qarorini bekor qilishga erishgan, lekin unga asos bo‘lgan tuman kengashining qarori bo‘yicha nizolashmagan.

Bundan tashqari, kadastr organi uning 106 gektar yerdan faqat 40 gektariga nisbatan huquqini davlat ro‘yxatidan o‘tkazgan. Yer kodeksiga binoan esa, yerga bo‘lgan huquqlar davlat ro‘yxatidan o‘tkazilganidan keyin vujudga keladi, ya’ni hokimning yer ajratish haqidagi qarorining o‘zi yetarli emas.

Qolaversa, Bahodir Qo‘ldoshev hokimning 2020 yil 20 mart kungi qarori ustidan sudga arz qilish bo‘yicha qonunda belgilangan muddatni (huquqi buzilganidan xabar topganidan keyin uzog‘i bilan 3 oy) uzrsiz sabablarga ko‘ra o‘tkazib yuborgan, deb hisoblanmoqda.

Ushbu vajlar tufayli fermer avvaliga Qarshi tumanlararo ma’muriy sudida, keyinroq viloyat sudining apellyatsiya instansiyasida, undan keyin Oliy sudda ham yutqazgan.

Sudma-sud sarguzashtlar. 3-qism

Fermer endi tuman kengashining 2019 yil 18 maydagi qarorini bekor qilishni so‘rab, Qarshi tumanlararo ma’muriy sudiga da’vo kiritgan. Sud 2024 yil 21 oktyabrdagi hal qiluv qarori bilan da’voni qanoatlantirib, xalq deputatlari Nishon tumani kengashining 2019 yil 18 maydagi qarorini haqiqiy emas, deb topgan.

Lekin shu kunning o‘zida Qashqadaryo viloyat prokuraturasi “Nishan Chicken’s” MChJning manfaatida protest kiritgan va 2025 yil 22 aprel kuni kassatsiya instansiyasi prokuratura protestini qanoatlantirgan.

“Bobur” fermer xo‘jaligini qo‘llab-quvvatlayotgan Qashqadaryo viloyati Fermerlar kengashi prokuraturaning protesti va kassatsiya qarorini “asossiz” deb hisoblamoqda. Kengash 2026 yil 2 mart kuni Qashqadaryo viloyati ma’muriy sudi taftish instansiyasiga shikoyat kiritib, Qarshi tumanlararo sudining 2024 yil 21 oktyabrdagi hal qiluv qarorini o‘z kuchida qoldirishni so‘radi.

Serialning bu qismi hozircha shu nuqtada turibdi.

“Bunaqa sharoitda soha rivojlanmaydi”

Bahodir Qo‘ldoshev 1998 yildan beri fermerchilik bilan shug‘ullanadi. Lekin 2019 yildan beri xalovati yo‘qligini aytadi, chunki o‘ziga qonuniy tarzda ajratib berilgan yerning 36 gektaridan foydalana olmayapti.

“Mana, 7 yildan buyon faqat sud bilan shug‘ullanamiz, boshqa ish qilolmayapmiz. Faqat biz emas, 2019 yilda Nishon tumanida juda ko‘p fermerlar ana shunday adolatsizlikka uchradi. Bunaqa sharoitda soha rivojlanmaydi.

Nohaqliklar bo‘laversa, tuman hokimlari fermerlarning ustidan bosim o‘tkazib, yerni olib qo‘yaversa, u qo‘rqqanidan bir ish qilolmaydi, katta-katta rejalarni amalga oshirolmaydi”, – deydi u.

Maqola sarlavhasida tilga olingan “Santa-Barbara” seriali haqida eshitgan bo‘lsangiz kerak. Bu serial 2137 seriyadan iborat bo‘lib, AQShda 1984 yildan 1993 yilgacha efirga uzatilgan. Biz yuqorida yoritganimiz holat ham bir necha yuzlab bo‘lmasa-da, o‘nlab qismlardan iborat serial bo‘lishga arzigulik…

Badiiy bo‘yoqlar bilan boyitilgan serial, bosh qahramon dehqonning farzandli bo‘lganidan quvonayotgani aks etgan kadrlardan boshlanadi, so‘nggi qismlarida esa o‘sha farzandi maktabning 1-sinfiga qadam qo‘yganida ham u o‘sha eski muammolar bilan o‘ralashib yurgan bo‘ladi. Oraliq qismlarda esa ayrim hokimlarning shaxsiy portreti va fermerchilikdagi achchiq reallikni ochib berish mumkin.

Serial xulosasi esa quyidagicha bo‘ladi: qonunlarda ozod va erkin ekani yozib qo‘yilgan dehqonning yeri g‘irt qaroqchilarcha, noqonuniy tarzda tortib olmaganida edi, u shuncha yillik tashvishlarga giriftor qilinmagan bo‘lardi.

Source link

Olimjon Umarov raqamli texnologiyalar vazirining birinchi o‘rinbosari lavozimini tark etdi. Gazeta`ning hukumatdagi manbasi bergan ma’lumotga ko‘ra, u faoliyatini Vazirlar Mahkamasida — Bosh vazir kotibiyati rahbarining o‘rinbosari sifatida davom ettiradi.

U mazkur lavozimda 2024 yil iyun oyidan buyon ishlab kelayotgandi. Umarov faoliyatini Vazirlar Mahkamasida Bosh vazir kotibiyati rahbarining o‘rinbosari sifatida davom ettiradi.

Olimjon Umarov (1985 yilda tug‘ilgan, 2007 yilda Milliy universitet va 2017 yilda Janubiy Koreyaning Songyungvan universiteti bitiruvchisi) 2020 yil may oyidan 2021 yil noyabr oyigacha bosh vazirning axborot texnologiyalari va kommunikatsiyalarini rivojlantirish masalalari bo‘yicha maslahatchisi bo‘lgan.

Bundan oldin — 2017 yil iyun oyidan 2020 yil may oyigacha u Axborot texnologiyalari va kommunikatsiyalarini rivojlantirish vazirining birinchi o‘rinbosari bo‘lib ishlagan.

2006−2012 yillarda O‘zbekiston aloqa va axborotlashtirish agentligining (keyinchalik Davlat aloqa qo‘mitasi, so‘ngra Axborot texnologiyalari vazirligi, hozirda Raqamli texnologiyalar vazirligiga aylantirilgan) UZINFOCOM kompyuter va axborot texnologiyalarini rivojlantirish va joriy etish markazida turli lavozimlarda ishlagan.

2012 yilda O‘zAAAning axborot tizimlari va axborot resurslari bo‘limiga rahbarlik qilgan. 2012−2017 yillarda vazirlikning AKT boshqarmasini boshqargan.

Source link

U Malibu mashinasida harakatlanib, megafon orqali boshqa haydovchilardan yo‘lni bo‘shatishni talab qilgan. Bu harakat yo‘l bezoriligi sifatida baholangan va huquqbuzar 1,5 yilga haydovchilik huquqidan mahrum etilgan.

Namangan shahrida mashina boshqarib borayotib, megafondan foydalangan haydovchiga chora ko‘rildi. Bu haqda YHXX axborot xizmati xabar berdi.

Ma’lum bo‘lishicha, Namangan shahrida “qonuniy qoidabuzarlik” qilishini aytgan yigit Malibu mashinasida harakatlanib, megafon orqali boshqa haydovchilardan yo‘lni bo‘shatishni talab qilgan. U bu harakatini tasvirga olib, ijtimoiy tarmoqlarda tarqatgan.

Holat yuzasidan o‘tkazilgan surishtiruv ishlarida bu shaxs Abbos Yusupov ekani, u jamoat joyida yurish-turish qoidalarini buzgani aniqlangan. Uning harakati boshqa haydovchilarning e’tiroziga sabab bo‘lgan.

Abbos Yusupov qilgan ishidan pushaymonligini bildirgan. U agar ovoz kuchaytirgich qurilmasi mashinaga o‘rnatilmagan bo‘lsa, bu qoidabuzarlik hisoblanmaydi deb o‘ylaganini aytgan.

Huquqbuzar boshqaruvida bo‘lgan Malibu jarima maydoniga qo‘yilgan. U foydalangan megafon esa daliliy ashyo sifatida olingan.

Shuningdek, Abbos Yusupov JIB Namangan shahar sudining qarori bilan yo‘l bezoriligi huquqbuzarligini sodir etgan deb topilib, 1,5 yilga haydovchilik huquqidan mahrum etilgan.

Ma’lumot uchun, Ma’muriy javobgarlik to‘g‘risidagi kodeksning 128-10-moddasiga ko‘ra yo‘l bezoriligi, ya’ni yo‘l harakati ishtirokchilarining xavfsiz harakatlanishiga tahdid soluvchi yoxud transport vositasida yo‘l harakatining boshqa ishtirokchilariga nisbatan hurmatsizlikda ifodalangan boshqa xatti-harakatlarni namoyishkorona sodir etishi transport vositalarini boshqarish huquqidan 1 yildan 2 yilgacha mahrum qilib, BHMning 25 baravari miqdorida jarima solishga sabab bo‘ladi. 

Source link

11-mart kuni AQShdan O‘zbekistonga maxsus reys orqali 72 nafar O‘zbekiston fuqarosi qaytarildi. Bu haqda AQShning O‘zbekistondagi elchixonasi xabar berdi.

Ma’lum qilinishicha, mazkur shaxslar AQSh hududida qonuniy yashash huquqiga ega bo‘lmagani sabab deportatsiya qilingan.

Elchixona ma’lumotiga ko‘ra, bu reys AQSh tomonidan noqonuniy migratsiyaga qarshi olib borilayotgan choralar doirasida amalga oshirilgan navbatdagi tadbir hisoblanadi.

AQSh prezidenti Donald Tramp lavozimga kirishganidan buyon mamlakatdan 1000 nafardan ortiq O‘zbekiston fuqarosi deportatsiya qilingani aytilmoqda.

Bayonotda ta’kidlanishicha, AQShga noqonuniy kirgan shaxslar qamoq jazosi va deportatsiyaga duch kelishi mumkin. Shuningdek, AQSh hukumati deportatsiya jarayonlarini amalga oshirishda hamkorlik qilgani uchun O‘zbekiston hukumatiga minnatdorlik bildirgan.

Source link

Intervaldan tashqari, bir vaqtning o‘zida avtobuslarning ketma-ket bekatga yetib kelish holati ham kuzatilmoqda. Poytaxt transport bosh boshqarmasi boshlig‘i Mirakbar Ikromov buni Brutto shartnoma tizimi bilan bog‘ladi. Uning aytishicha, transportlar belgilangan grafikdan chiqib ketmasligi uchun ketma-ket yuradi. “Bu ko‘rsatib turibdiki, bizda avtobusga bo‘lgan ehtiyoj juda ham katta”, – deydi u. Bunday muammolarning oldini olish uchun bu yil 240 ta yangi avtobus olib kelinishi aytildi.

12 mart kuni Toshkent shahar hokimiyati binosida o‘tgan matbuot anjumanida poytaxt transport bosh boshqarmasi boshlig‘i Mirakbar Ikromov avtobuslar bekatlarga kechikib kelayotganiga izoh berdi. Rasmiy vakil muammo borligini tan oldi.

“Toshkent shahrida hozirgi kunda 169 ta avtobus yo‘nalishlari mavjud. Ushbu avtobus yo‘nalishlarining o‘rtacha intervali 10-15 daqiqani tashkil qiladi. Lekin xabaringiz bor, tirbandlik paytida bizda ma’lum bir vaqtda intervallarimiz 30 daqiqadan 40 – 45 daqiqaga yetishi kuzatilgan. Buning asosiy sabablari tirbandlik”, – deydi u.

Shuningdek, Ikromov tarmoqlarda ko‘p e’tirozlarni keltirib chiqarayotgan yana bir masala – avtobuslarning ketma-ket bekatga yetib kelishiga ham to‘xtaldi.

“Endi bitta narsa bor-da, 169 ta yo‘nalishimizning hammasi Brutto tizimi asosida faoliyat yuritadi. Brutto tizimi bilasizlar, har bir kilometr uchun har bir yo‘nalishga ma’lum bir narxi belgilangan. Birinchi kelayotgan avtobusimizning vaqti bor, A nuqtadan B nuqtaga yetib borishi [kerak]. Ikkinchisining ham grafik bo‘yicha yetib borish vaqti bor. Shuning uchun bular grafikdan chiqib ketmasligi uchun ketma-ket yuradi”, – dedi bosh boshqarma boshlig‘i.

Ma’lumotlarga ko‘ra, transport tizimini rivojlantirish uchun 2030 yilgacha konsepsiya qilingan. Unga ko‘ra, 169 ta yo‘nalish 280 taga yetkazilishi kerak.

“O‘rganish natijasida ba’zi bir yo‘nalishlarimizda oltita yoki bo‘lmasa sakkizta avtobus bilan 15 daqiqalik intervalni ushlashga harakat qilayotgan edik. Biz [endi] ikki tomondan keldik, ya’ni jamoat transportini ko‘paytirish hisobiga hamda uning ustuvorligini berish, jozibadorligini oshirish maqsadida infratuzilmaviy muammolarni yechish masalasi ustida bir qator ishlar amalga oshirilyapti. To‘g‘ri, hozirgi kunda endi ochilgan yangi tashkilot (Yo‘l harakatini tashkil etish markazi) bo‘lgani uchun ishi balki ko‘rinmayotgandir. Lekin biz bilamiz, 2023 yilda prezidentimiz qarorlaridan keyin loyiha ofisi ochilgan hamda bizning qo‘limizda shahar makromodeli bor. Ya’ni har bir ko‘chada yurayotgan avtotransport vositalarining soni, uning turlari, o‘rtacha hisob-kitoblari bor.

Hozir asosiy maqsad — ushbu markazning birinchi bo‘lib master-rejasini ishlab chiqish. Ya’ni o‘sha berilgan ko‘rsatkichlardan, shaharning o‘sishidan kelib chiqib, master-reja ishlab chiqiladi hamda shunga qarab turib yana yo‘nalishlar qaytadan tashkil etiladi. Qaytadan tashkil etilgandan keyin uning jozibadorligi ham [oshiriladi]. Bizda shunaqa ko‘rsatkich borki, har bir kilometrda tashilayotgan yo‘lovchilar soni bor. Hozirgi kunda Toshkent shahrida buning soni 3,6 ni tashkil qiladi, ya’ni bir kilometrda 3,5 tadan ko‘proq odam tashilyapti. MDH davlatlarining ichida birinchi o‘rinda turamiz. Bu ko‘rsatib turibdiki, bizda avtobusga bo‘lgan ehtiyoj juda ham katta”, – deydi rasmiy.

Qo‘shimcha qilinishicha, 2026 yilda 16 ta yangi avtobus yo‘nalishi ochiladi, 240 ta avtobus olib kelinadi. Uning 200 tasi elektrobus, 40 tasi tabiiy gazda yuradi. Eskirgan yo‘nalishlar yangilanib, intervallar qisqartirilishi kutilmoqda.

Mirakbar Ikromovning ma’lumotiga ko‘ra, hozirda Toshkent shahrida 2000 dan ortiq avtobus mavjud. Shuning 1 050 tasi siqilgan tabiiy gazda, 526 tasi elektrda harakatlanadi. Qolgani dizel yoqilg‘isida ishlaydigan avtotransport vositalari hisoblanadi. Ularning 204 tasi “Mercedes” rusumidagilardir.

Bu avtobuslar 2012-2013 yillarda ishlab chiqarilgan. Ya’ni tashuvda foydalanish yoshi 15 yilni tashkil qiladi. Ikromov keyingi yilda bunday transport vositalaridan foydalanib bo‘lmasligini aytdi.

Source link