Jamiyat
“O‘zimni xavfsiz his qilmayapman” – urush fonida arab davlatlaridagi o‘zbeklar nima deydi?
Qatar va BAAda vaziyat nisbatan tinchigan. Bu mamlakatlardagi o‘zbeklar mahalliy mudofaa tizimi Eron raketalarini qaytarayotgani, aholi yashash punktlari zararlanmaganini aytmoqda. Shu bilan birga, qisqa muddatli sayohatga borganlar reyslar bekor qilingani sabab ko‘chada qolishdan xavotirda.
AQSh va Isroilning Eronga qarshi boshlagan urushi butun Yaqin Sharqni qamrab olmoqda. Eronning qarshi hujumlari esa nafaqat Isroilni, balki arab davlatlaridagi AQSh harbiy bazalarini ham nishonga olgan. Dunyoda xavfsiz turizm va tinchlik ramzi bo‘lib kelgan Qatar, BAA kabi davlatlar ham bugun raketa va dronlar hujumi ostida qolmoqda. Fors ko‘rfazining yopilgan osmoni esa mintaqa bilan aviaqatnovlarni deyarli butunlay to‘xtatib qo‘ydi.
Xo‘sh, arab davlatlaridagi o‘zbek vatandoshlarning ahvoli qanday? Yurtdoshlarimiz hujumlardan qanday saqlanmoqda va O‘zbekistonga xavfsiz qayta oladimi? Kun.uz — Qatar, Birlashgan Arab Amirliklari hamda Isroildagi o‘zbeklar bilan suhbatlashdi.
“Hech narsa bo‘lmasligiga hech kim kafolat bermaydi” – Qatar
Qatarda vaziyat biroz boshqacharoq. Ayni vaqt shu yerda yashab, ishlab kelayotgan vatandoshlarimiz mudofaa tizimi yaxshi ishlayotgani, uchib kelayotgan har bir raketa yerga qo‘nishidan avval havoda yo‘q qilinayotganini aytmoqda.
Ammo ular vaziyat jiddiylashib ketishidan xavotirda. Xususan, Dohada 8 oydan beri mehmonxona xizmatida ishlab kelayotgan Ahrorbek Ne’matjonov vatanga qaytmoqchi ekanini bildirdi.
“Hozir bu davlatda hech kimga zarari ko‘rinmadi. Shunchaki, men o‘zimni bu yerda xavfsiz his qilmayapman, shuning uchun O‘zbekistonga qaytib ketmoqchiman. Hech narsa bo‘lmasligiga hech kim kafolat bermaydi. Hujum bo‘layotgani, osmonda portlayotganini ko‘zimiz bilan ko‘rdik.
Hozircha bular O‘zbekistonga qaytib ketishimiz haqida hech narsa demadi, lekin biz mehmonxonada ishlayapmiz. Bu yerda ehtiyot choralar ko‘rilgan. Favqulodda vaziyat uchun “podval”dan joy qilib, suvlar, stollarni, har xil dori-vositalarni qo‘yib, tayyorlab qo‘yishgan.
Lekin yotoqxonamizda unaqa narsa bo‘lmadi hali. Bu yerdan O‘zbekiston elchixonasida ishlaydigan tanishlarim bor edi, ularga ham iloji boricha aloqaga chiqishga harakat qilyapman. Ularga aloqaga chiqishim bilanoq vaziyat qanaqaligini bilamiz. Agar O‘zbekistondan samolyot jo‘natib, evakuatsiya qiladigan bo‘lsa, unda yaxshi bo‘lardi”, – deydi u.
Dohada bo‘lib turgan yana bir yurtdoshimiz Ilyosbek Muhiddinovning aytishicha, hukumat aholi va biznes egalariga tez-tez ogohlantirish tusidagi xabarnomalarni jo‘natib turibdi. Unda xavfsizlik choralari ko‘rilishi so‘ralgan. Muhiddinov shahardagi vaziyatni tasvirlashga urindi.
“Mehmonxonadan olib aytadigan bo‘lsak, mehmonlarimiz uchun “parkovka”ning “podval” qismida stol-stul, yosh bolalar o‘ynashi uchun o‘yinchoqlar qo‘yganmiz.
Qatar hukumati tarafidan barcha o‘tkaziladigan tadbirlar bekor qilingan. Shundan ko‘pchilik restoranlar yopilgan. Xususiy bizneslarga keladigan bo‘lsak, ishlash yoki ishlamasligi o‘zlariga bog‘liq. Endi ko‘pchilik mehmonxonalarda buxgalteriya, kadrlar bo‘limi – shunga o‘xshashlar masofaviy ishga o‘tgan. Undan tashqari, men o‘zim telefon operatoriman, mening guruhimda ham shunday. Faqat bir vaqtda bir kishi ishda bo‘ladi xolos. Hozir men ishimni tugatganimda boshqa bir inson keladi.
Guruhda to‘liq ish emas. Qatar mudofaa tizimlari juda yaxshi holatda ishlayapti. Har hujum bo‘lgan paytida o‘zi biror joyda portlash yoki shunaqa narsalar qolgan davlatlarga nisbatan o‘ta kam kuzatilyapti. Elchixona tarafidan Telegram guruhi ochilgan. Shu guruhda ehtimoliy evakuatsiya qilinishini xohlovchilar ro‘yxatga olinishi boshlangan. Evakuatsiya qilinadigan bo‘lsa, qaytaman. Keyinchalik bu yerda ahvol yaxshilanganidan keyin qaytib kelaman”, – deydi Muhiddinov.
Uning qo‘shimcha qilishicha, Qatarda ta’lim muassasalari ham masofaviy ishlashga o‘tgan. Muzeylar yopilgan. Faqatgina oziq-ovqat do‘konlari 24 soat rejimda ishlab turibdi.
Internetga video joylaganlik uchun 30 ming dollarlik jarima va qamoq – Dubay
Dubay ham deyarli Dohadan farq qilmaydi. AQSh elchixonasiga qilingan hujum aytilmasa, raketalar aholi yashash maskanlarini nishonga olmagan. Azizbek Ochilov vaziyat ancha tinchlanganini bildirdi.
“Urush boshlanganida birinchi-ikkinchi kunlari ancha vahima bor edi. Hozir ko‘chalarda bemalol odamlar ishlariga boryapti. Boshlanganidan keyin Birlashgan Arab Amirliklari ishlarni onlayn formatga o‘tkazdi. Bugundan oflayn formatga o‘tyapti.
Dubayda to‘g‘risini aytsam, havo mudofaa tizimi [hujumlarni] zo‘r qaytaryapti. Menimcha, aniq bir tushgan raketa yoki dronning o‘zi yo‘q. Shunchaki uning qoldiqlari tushyapti. Endi mening tushunishim bo‘yicha Eron davlati Birlashgan Arab Amirliklari bilan jiddiy bir dushmanlik kayfiyatida emas. Shunchaki bu Amerikaning qanaqadir hamkori bo‘lgani, rasmiyatchilik uchun yuborib qo‘yyapti deb tushunyapman. Shuning uchun men umuman xavotirlanmayapman.
Lekin uydagilarim, O‘zbekistondagi tanishlarim internetda tarqalgan videolarni ko‘rib, ko‘proq xavotir olishyapti. Ishdagi tanishlarim unchalik ham xavotir olishmayapti. Hozir ko‘chaga chiqib, aylanib keldim, masalan. Mashinalar, odamlar ham to‘la. Boshida bunaqa vaziyatga umuman tushib ko‘rmaganimiz uchun qanaqadir kattaroq narsalarga aylanib ketadi, deb o‘ylagandik, lekin hozir ancha xotirjammiz”, – deydi suhbatdosh.
4 martdan boshlab Toshkent–Dubay–Toshkent yo‘nalishlari bo‘yicha UzAirways, Centrum Air hamda Qanot Sharq aviakompaniyalari reyslari bosqichma-bosqich tiklanishi ma’lum qilingandi. Muhiddinov hozirda bekor qilinayotgan va kechiktirilayotgan bir qancha reyslar bo‘lib turgani, ammo yuqorida aytilganidek, ayrimlari parvozni boshlaganini aytdi.
Ancha yildan beri Dubayda yashayotgan Husanboy Kimsanboyev esa tarmoqlarda hujumga oid deepface, ya’ni sun’iy intellekt orqali tayyorlangan yolg‘on xabarlar sizib yurgani, shu sabab BAA hukumati ma’lumot tarqatishga oid cheklov o‘rnatganiga to‘xtaldi.
“Birinchi kundan keyin juda ko‘p videolar chiqdi. Bahrayndagi o‘zbekistonlik yurtdoshlarimiz ham video qo‘ygandi, shuni Dubay deyishdi, Isroilda deyishdi. Shunaqa yolg‘on, juda bir odamni chalkashtiradigan darajada yangiliklar aytishdi. Unaqa narsa bo‘lgani yo‘q. Shu 28-kundan keyin hamma videoga olib, vahima qilib yuborganidan keyin, 29-kuni Dubay rasman videoga, rasmga olishni taqiqladi. Agar kimda-kim internetga video olib joylaydigan bo‘lsa, katta jarima va bir yillik qamoq jazosi belgilanadi. Lekin rasman kimdir chiqib, shunaqa-shunaqa demadi, rasmiy saytlarida aytildi. Rasmga olish, tarqatishni bilib qolsa, bir yil qamoq jazosi va adashmasam, 30 ming dollar atrofida jarima yoziladi, dedi. Shu kundan keyin o‘z-o‘zidan videolar kamayib ketdi, ko‘pchilik qo‘ymay qo‘ydi. AQShning elchixonasini urganda, hindlarning 2 ta videosi chiqdi. Bo‘ldi. Shuni ko‘rdik”, – dedi Kimsanboyev.
Qayd etilishicha, Dubayda ochiq joydagi ishxonalar, katta fabrikalarda zarurat bo‘lmasa, ishga bormaslik tavsiya qilingan.
“Lekin biz bordik, shaxsan men bordim, ishladim. O‘zim ham bitta portlashni eshitdim, lekin qayerda bo‘ldi, nima bo‘ldi, unisidan ma’lumotim yo‘q. Lekin ishlayotgan joyimda o‘zim bitta portlashni eshitdim. Samolyotlar uchib, nima qilganini ko‘rdim. Yurgani, tovushi eshitildi, u yoqdan-bu yoqqa uchib yurishdi.
Aholiga hech qanaqa yordam, hech narsa tavsiya qilinmadi. Shu faqat o‘zingni xavfsiz joyingda bo‘lishingni ta’minla, deyapti xolos. Kuni kecha ham Dubay rahbarining o‘zi shu “Dubay Moll”ga kelib, aylanib, shu yerdagi restoranlarda ovqatlanib, chiqib ketdi. Unaqa vahima yo‘q. Hamma o‘zining hayotini bir xil tarzda kechiryapti, hamma yoq o‘z o‘rnida ketyapti. Munisa Rizayevani ham ko‘rdim. O‘sha bitta yolg‘on ma’lumotni berib qo‘yib, yo‘q bo‘lib qoldi. Shu adashmasam, undan keyin o‘chirib ham yubordi. Unaqa vahima bo‘lgani yo‘q. Shunaqa vahimaga solib qo‘yishdi”, – deydi u.
Kimsanboyev jamoat transportlari ham o‘z vaqtida ishlayotganini, odamlar undan foydalanayotganini aytdi.
“O‘zimizni qutqarish uchun bir kunimizni o‘sha temir xonaning ichida o‘tkazdik” – Isroil
Turkiya oliygohida tahsil olayotgan 2 nafar farzandi uchun o‘tgan yilning oktyabrida Isroilning Bersheba shahriga kelgan E’tibor Ahmedova 28 fevral sanasida yuzaga kelgan ziddiyat fonida oddiy aholi bilan nimalar sodir bo‘lganini gapirib berdi.
“28 fevral kuni ertalab 8:15 da boshlandi, telefonlarga signal keldi. Hech kim hech narsa bilmagan edi. Birdan signal bo‘lib, hammaning temir xonaga o‘tishi haqida ogohlantirishlar keldi va osmonda raketalarning portlashi boshlandi, bular ularga otdi, ular bularga otdi. Endi ko‘rsangiz, juda ham vahima. Biz ichkarida bo‘lganimiz uchun hech narsani eshitmadik. Temir xonada tashqarida bo‘layotgan hech narsa eshitilmaydi, faqat televizordan ko‘rib turamiz. O‘zimizni qutqarish uchun, masalan, bir kunimizni o‘sha temir xonaning ichida o‘tkazdik. Bu yerda yangi qurilgan uylarning hammasida temir xonalar bor, shu bomba portlasa [kirib o‘tiradigan], bombaga chidamli.
Ba’zi eski uylarda yo‘q. Biz ko‘pincha shu joyda o‘z jonimizni saqlab qolamiz. Telefon avtomatik signal berishni boshlaydi. “Tahlikali, tahlikali vaziyat. O‘zingizni qutqaring, tahlikali vaziyat”, deb dunyoda nechta til bo‘lsa, hamma tilda SMS kelishni boshlaydi. Shu vaqt mobaynida uch daqiqa vaqtingiz bor. Bomba portlashdan uch daqiqa oldin keladi. Shu vaqt ichida uyingizda temir xona bo‘lmasa, uyingizga yaqin bo‘lgan joylardagi temir xonalarga boring, deb keladi. Chunki ba’zi joylarda, ko‘chalarda, yerning tagida temir xonalar bor. Ko‘chada yurgan bo‘lsangiz o‘sha yerning tagiga kirishni aytishadi”, – deydi Ahmedova.
Uning ta’kidlashicha, hujumlar oqibatida qurbon bo‘lganlar bor, jarohatlanganlar yetarlicha. Ko‘plab o‘zbek ayollari vahimaga tushib qolishgan.
“Kelganiga 15 kun, bir oy bo‘lgan ayollarimiz juda ham qo‘rqib, ba’zilari qandli diabet kasalligini orttirdi, ba’zilari depressiyaga kirdi, titrab qoldi. Ularga telefon qilib: “qo‘rqmanglar, temir xonaga kiringlar, bu narsa o‘tib ketadi”, deb tajribasi kattaroq bo‘lganlar WhatsAppʼdan bir-birlariga dalda berib turibdi.
Birinchi kun “svet” o‘chgan edi, elektrlar kesilgandi. U ham ma’lum bir soat, ya’ni shu bomba portlagan payti bir-ikki soatga kesildi, keyin yana yoqdi. Ya’ni hamma texnologiyalar, ijtimoiy tarmoqlar ishlab turibdi. Televizorda hamma narsani ko‘rib turibmiz. To‘rt kun “uydan tashqariga chiqmaysiz” degan rasmiy ta’til e’lon qilingan edi. Bugun to‘rtinchi kun, yana necha kun davom etadi, uni ochiqlashadi. Undan keyin yana qaror berishadi. To‘rt kungacha shifoxonalar, maktablar, rasmiy idoralar, hamma joy yopilgan”, – deydi u.
E’tibor Ahmedova so‘zining so‘ngida vatandoshlarga yuzlanib, Isroilga ketgan o‘zbeklarni qarg‘amaslik, o‘lim tilamaslik, aksincha, vafot etganlar haqlariga duo qilish, urush tugashi va qolganlarga salomatlik berishini so‘rashga chaqirdi.
Sayohatga borganlarning taqdiri nima bo‘ldi?
Kun.uzʼga BAAning Fujayra, Saudiya Arabistonining Jidda shaharlariga qisqa safarga borib, urush sabab qolib ketgan vatandoshlardan ham murojaatlar kelib tushdi. Ular reyslar bekor bo‘lgani sabab turfirmalari qo‘shimcha kunlarni qoplab bermayotganidan, vaqtincha qolishga joy topolmayotganidan shikoyat qilishgan.
Qolaversa, Fors ko‘rfazi bo‘ylab, port bo‘ylab sayohatga chiqqan “Celestyal” kruizi 28 fevral sanasida Qatarga yetganda to‘xtatilgan. U yerda 100 ga yaqin o‘zbek borligi, ammo elchixonaning yordamisiz ketolmayotganini aytishmoqda.
AQSh va Isroil harbiylari 28 fevral kuni boshlagan urush — beshinchi kundirki davom etmoqda. Yuqorida aytganimizdek, Eronning javob tariqasida bergan zarbalari mojaroni arab davlatlari hududiga ham kengaytirdi. Qurbonlar soni allaqachon mingdan oshgan. Hozircha mojaro yakuni ko‘rinmayapti.
Jamiyat
«UZBEKENERGOTAMIR» AJ Toshkent elektr ta’minoti tizimini keng ko‘lamli yangilash doirasida yana to‘rtta elektr tarmoq obyektini qurish va modernizatsiya qilish ishlarini yakunladi
O‘zbekiston Respublikasi Vazirlar Mahkamasining 22 yil 2025 sentyabrdagi qaroriga muvofiq poytaxtda elektr ta’minoti ishonchliligini oshirish, qo‘shimcha energiya quvvatlarini yaratish va Toshkent shahrining barqaror rivojlanishini ta’minlashga qaratilgan elektr tarmoqlarini modernizatsiya qilish bo‘yicha keng ko‘lamli dastur amalga oshirilmoqda.
Dastur doirasida 75 ta energetika obyektlarini qurish va modernizatsiya qilish ko‘zda tutilgan. Loyihaning bosh pudratchisi «O‘ZBEKENERGOTA’MIR» AJ bo‘lib, u bir vaqtning o‘zida loyihalash, uskunalar bilan ta’minlash va qurilish-montaj ishlarini ta’minlaydigan zamonaviy fast-track yondashuvini qo‘llaydi. Jarayonlarning bunday tashkil etilishi loyihani amalga oshirish vaqtini sezilarli darajada qisqartirish va obyektlarni ishga tushirishni tezlashtirish imkonini beradi.
Bugungi kunga qadar dasturda ko‘zda tutilgan 45 obyektdan 75 tasida qurilish-montaj ishlari to‘liq yakunlandi. Qolgan obyektlarda ish yuqori darajadagi tayyorlik holatida belgilangan tartibda davom etmoqda.
Jumladan, Yangihayot tumanida yangi «Yangi Avlod» va «Do‘stlik» podstansiyalari qurilib, foydalanishga topshirildi. Bundan tashqari, Yunusobod tumanida joylashgan «Ikarus» va «ODO» podstansiyalarini modernizatsiya qilish muvaffaqiyatli yakunlanib, iste’molchilarga elektr energiyasini yetkazib berish ishonchliligini oshirishga xizmat qilmoqda.
Ushbu loyihalarning amalga oshirilishi «O‘ZBEKENERGOTA’MIR» AJning mavjud muhandislik salohiyatining, kompaniyaning energetika sanoatining keng ko‘lamli vazifalarini samarali hal etish va poytaxtning zamonaviy energetika infratuzilmasini rivojlantirishga salmoqli hissa qo‘shish qobiliyatining yana bir tasdig‘iga aylandi.
Ko‘rsatilgan to‘rtta podstansiya «O‘ZBEKENERGOTA’MIR» AJ tomonidan amalga oshirilayotgan loyihalar orasida alohida o‘rin tutadi. Ushbu obyektlar kompaniyaning yuqori muhandislik salohiyati, zamonaviy qurilish texnologiyalaridan samarali foydalanish va qisqa vaqt ichida murakkab energetika loyihalarini muvaffaqiyatli amalga oshirish qobiliyatining yorqin namunasidir.
Xususan, «Do‘stlik» va «Yangi Avlod» podstansiyalari zamonaviy muhandislik-texnik yechimlarga mos ravishda barpo etildi. Ushbu obyektlarning ishga tushirilishi qo‘shimcha energiya quvvatlarini qayta taqsimlash va Toshkent shahrining faol rivojlanayotgan hududlarini ishonchli elektr energiyasi bilan ta’minlash imkonini berdi.
Shu bilan birga, ODO va Ikarus podstansiyalarida mavjud elektr taqsimlash uskunalarini modernizatsiya qilish bo‘yicha keng ko‘lamli ishlar amalga oshirildi. Ushbu loyihalarning amalga oshirilishi zamonaviy muhandislik yechimlarini joriy etish orqali obyektlarning quvvatini sezilarli darajada oshirdi va iste’molchilarni elektr energiyasi bilan ta’minlash ishonchliligini oshirdi.
Amalga oshirilgan ishlarning natijalari «O‘ZBEKENERGOTA’MIR» AJning yangi energetika obyektlarini qurishda ham, strategik ahamiyatga ega mavjud energetika infratuzilmasini modernizatsiya qilishda ham katta tajribaga ega bo‘lgan O‘zbekistonning energetika sohasidagi yetakchi muhandislik-qurilish kompaniyalaridan biri ekanligini tasdiqlaydi.
«Yangi Avlod» podstansiyasi: Yangihayot tumanida joylashgan 2×80, 000 MVA podstansiyasi
«Yangi Avlod» podstansiyasi Toshkent shahar energetika infratuzilmasini modernizatsiya qilish dasturi doirasida «O‘ZBEKENERGOTA’MIR» AJ tomonidan amalga oshirilayotgan eng yirik va eng muhim obyektlardan biridir. Obyektni noldan qurilishi uy-joy va sanoat qurilishi faol olib borilayotgan poytaxt hududlarini ishonchli elektr energiyasi bilan ta’minlash uchun mo‘ljallangan zamonaviy 110 kV elektr ta’minoti markazi sifatida amalga oshirildi.
Podstansiyada har biri 80 000 kVa quvvatga ega ikkita zamonaviy quvvat transformatori o‘rnatilgan. Obyektning umumiy o‘rnatilgan quvvati 160 MVAni tashkil etadi, bu esa “Yangi Avlod” podstansiyasini davom etayotgan dastur doirasida qurilgan eng kuchli quvvat obyektlaridan biriga aylantiradi.
Loyihani amalga oshirish jarayonida «O‘ZBEKENERGOTA’MIR» AJ mutaxassislari tomonidan 110 kV xavo uzatish tarmog‘i, 10 kV tashqi o‘rnatiluvchi komplekt taqsimlash qurilmasi (KTQ) hamda umumpodstansiya boshqaruv punkti (UBP) o‘rnatildi. Barcha qurilish-montaj va ishga tushirish ishlari to‘liq yakunlandi.
Hozirgi vaqtda ishchi komissiya dalolatnomasini rasmiylashtirish ishlari olib borilmoqda, undan so‘ng obyektni ekspluatatsiyaga rasmiy ravishda topshirish amalga oshiriladi, shundan keyin u poytaxt energetika tizimining muhim elementlaridan biriga aylanib, qo‘shimcha quvvat zaxirasini ta’minlaydi hamda shaharning yangi hududlarini elektr energiyasi bilan ta’minlash ishonchliligini oshiradi.
«Do‘stlik» podstansiyasi: Yunusobod tumanida joylashgan quvvati 2×63 000 MVA bo‘lgan podstansiya.
«Do‘stlik» podstansiyasi poytaxt energetika infratuzilmasini keng ko‘lamda modernizatsiya qilish dasturi doirasida «O‘ZBEKENERGOTA’MIR» AJ tomonidan noldan qurilgan ikkinchi yangi energetik obyekt bo‘ldi. 110 kV kuchlanishga ega zamonaviy podstansiya sanoat zonasini ishonchli elektr energiyasi bilan ta’minlash hamda korxonalarning o‘sib borayotgan elektr energiyasiga bo‘lgan ehtiyojini qoplash uchun mo‘ljallangan.
Obyektda har biri 63 000 kVA quvvatga ega bo‘lgan ikkita zamonaviy kuch transformatori o‘rnatilgan. Podstansiyaning umumiy o‘rnatilgan quvvati 126 MVA ni tashkil etadi, bu hududning kelgusi sanoat rivoji uchun sezilarli quvvat zaxirasini yaratadi.
Loyihani amalga oshirish doirasida kompaniya mutaxassislari tomonidan to‘liq qurilish-montaj ishlari kompleksi bajarilgan, jumladan 10 kV kuchlanishli tashqi komplekt taqsimlash qurilmasi (KTQ) va umumpodstansiya boshqaruv punkti (UBP) montaj qilingan. Barcha qurilish-montaj va ishga tushirish-sozlash ishlari to‘liq hajmda muvaffaqiyatli yakunlangan va zamonaviy ishonchlilik hamda xavfsizlik talablariga javob beradi.
Hozirgi vaqtda obyektni ekspluatatsiyaga topshirish uchun ishchi komissiya dalolatnomasini rasmiylashtirish ishlari olib borilmoqda. Ushbu loyihaning amalga oshirilishi sanoat korxonalarini barqaror va uzluksiz elektr energiyasi bilan ta’minlash, tuman energetika tizimi ishonchliligini oshirish hamda Toshkent shahrining ishlab chiqarish salohiyatini yanada rivojlantirish uchun qo‘shimcha imkoniyatlar yaratadi.
Yunusobod tumanida joylashgan «Ikarus» podstansiyasida elektr jihozlarini modernizatsiya qilish ishlari.
«Ikarus» podstansiyasi Toshkent shahri energetika infratuzilmasini modernizatsiya qilish dasturining muhim obyektlaridan biri hisoblanadi. Loyiha doirasida «O‘ZBEKENERGOTA’MIR» AJ mutaxassislari tomonidan podstansiyaning ishonchliligi va samaradorligini oshirishga qaratilgan keng ko‘lamli ishlar amalga oshirildi.
Modernizatsiya jarayonida 110 kV kuchlanishli havo elektr uzatish tarmog‘i qurildi, 10 kV kuchlanishli KTQning zamonaviy rele himoyasi shkaflari hamda umumpodstansiya boshqaruv punkti (UBP) o‘rnatildi. Shuningdek, mavjud 10 kV kabel tarmoqlari ko‘chirilib, yangi elektr ta’minoti tizimiga ulandi.
Loyihaning eng murakkab va mas’uliyatli bosqichlaridan biri kabel ishlari bo‘ldi. Modernizatsiya doirasida taxminan 4 200 metr kabel tarmoqlari qayta ulandi. Barcha ishlar amaldagi iste’molchilarni elektr energiyasi bilan uzluksiz ta’minlash, elektr ta’minotini o‘chirmasdan, yuklamalarni qayta taqsimlash va mavjud infratuzilma faoliyatiga xalal bermasdan tashkil etildi.
Bugungi kunda barcha qurilish-montaj va ishga tushirish-sozlash ishlari to‘liq yakunlangan. Uskunalar shtat rejimida ishlamoqda va ekspluatatsiya jarayonida o‘zining yuqori ishonchliligini tasdiqlamoqda. Ayni paytda obyektda hududni obodonlashtirish ishlari hamda podstansiyani rasmiy qabul qilish va ekspluatatsiyaga topshirishga tayyorlash ishlari yakunlanmoqda.
«ODO» podstansiyasida elektr jihozlarini modernizatsiya qilish.
Yunusobod tumanida joylashgan «ODO» podstansiyasi «O‘ZBEKENERGOTA’MIR» AJ tomonidan amalga oshirilayotgan Toshkent shahri energetika infratuzilmasini modernizatsiya qilish dasturining muhim obyektlaridan biri hisoblanadi. Loyiha doirasida obyektda asosiy taqsimlash uskunalari to‘liq almashtirilgan holda kompleks modernizatsiya ishlari amalga oshirildi. Bu esa podstansiyaning ishonchliligi va ish samaradorligini sezilarli darajada oshirish imkonini beradi.
Kompaniya mutaxassislari tomonidan 35 kV kuchlanishli zamonaviy yopiq taqsimlash qurilmasi (YoTQ), 10 kV KTQ rele himoyasi shkaflari, shuningdek, umumpodstansiya boshqaruv punkti (UBP)ni o‘rnatish bo‘yicha qurilish-montaj ishlarining to‘liq majmuasi bajarildi. Amalga oshirilgan texnik yechimlar energetika obyektlarining ishonchliligi, xavfsizligi va avtomatlashtirish bo‘yicha zamonaviy talablarga to‘liq javob beradi.
Bugungi kunda qurilish-montaj ishlari to‘liq yakunlandi. Hozirgi vaqtda amaldagi elektr tarmoqlarini yangi uskunalarga o‘tkazish ishlari olib borilmoqda hamda obyektni foydalanishga topshirishga tayyorlash ishlari yakunlanmoqda.
Mazkur loyihaning amalga oshirilishi natijasida podstansiyaning ishonchliligi sezilarli darajada oshadi, 35 va 10 kV kuchlanishli taqsimlash tarmoqlarining barqaror ishlashi ta’minlanadi, avariyaviy o‘chishlar xavfi minimallashtiriladi hamda iste’molchilarning uzluksiz elektr ta’minoti ta’minlanadi.
Xulosa
«Yangi Avlod» va «Do‘stlik» podstansiyalarini qurish, shuningdek «Ikarus» va «ODO» podstansiyalarini kompleks modernizatsiya qilish loyihalarining muvaffaqiyatli amalga oshirilishi «O‘ZBEKENERGOTA’MIR» AJning yuksak professionalligi, muhandislik salohiyati hamda ishlab chiqarish imkoniyatlarining yana bir yorqin isboti bo‘ldi. Ushbu loyihalarning muvaffaqiyatli bajarilishi kompaniyaning yirik infratuzilmaviy loyihalarni samarali amalga oshirish va energetika sohasida zamonaviy texnologik yechimlarni joriy etish salohiyatini namoyon etadi.
Barpo etilgan yangi elektr ta’minoti markazlari hamda modernizatsiya qilingan energetika obyektlari Toshkent shahri energetika tizimini rivojlantirishda muhim ahamiyatga ega. Amalga oshirilgan loyihalar elektr tarmoqlarining o‘tkazuvchanlik qobiliyatini oshirish, elektr ta’minotining ishonchliligi va barqarorligini mustahkamlash, shuningdek poytaxtning kelgusidagi ijtimoiy-iqtisodiy rivojlanishi uchun zarur quvvat zaxirasini yaratishga xizmat qiladi.
Obyektlarni foydalanishga topshirish natijasida iste’molchilar sifatli va uzluksiz elektr energiyasi bilan ta’minlanadi, shaharning energetik xavfsizligi darajasi yanada yuksaladi hamda yangi investitsiya va infratuzilmaviy loyihalarni amalga oshirish uchun mustahkam zamin yaratiladi.
«O‘ZBEKENERGOTA’MIR» AJ mamlakat energetika infratuzilmasini modernizatsiya qilish bo‘yicha vazifalarni izchil amalga oshirishda davom etmoqda hamda elektr energetikasi tarmog‘ini rivojlantirish, shuningdek O‘zbekistonning zamonaviy, ishonchli va samarali energetika tizimini shakllantirishga munosib hissa qo‘shmoqda.
Toshkent viloyatining Bo‘stonliq tumanida Bo‘zsuv kanaliga tushib ketgan ikki nafar voyaga yetmagan boladan birining jasadi qidiruv-qutqaruv ishlari davomida topildi. Ayni paytda ikkinchi bolani izlash ishlari davom ettirilmoqda.
Favqulodda vaziyatlar xizmati ma’lumotiga ko‘ra, joriy yilning 17 iyun kuni Bo‘stonliq tumanidagi Obod mahallasida yashovchi 2016 yilda tug‘ilgan K.Y. va 2018 yilda tug‘ilgan K.B. ismli ikki nafar bola yashash uyining pastki qismidan oqib o‘tuvchi Bo‘zsuv kanaliga ehtiyotsizlik oqibatida tushib ketgan.
Hodisa haqida xabar kelib tushgach, qidiruv-qutqaruv ishlari tashkil etilgan. Olib borilgan qidiruv tadbirlari natijasida 21 iyun kuni g‘avvos-qutqaruvchilar tomonidan bolalardan birining jasadi suvdan topib olingan.
Hozirda ikkinchi bolani qidirish ishlari davom ettirilmoqda. Qutqaruvchilar kanal bo‘ylab uzluksiz ravishda qidiruv-qutqaruv tadbirlarini olib bormoqda.
Mutasaddilar fuqarolarni, ayniqsa, yosh bolalarni suv havzalari va kanallar atrofida nazoratsiz qoldirmaslikka chaqirmoqda.
Toshkent viloyatining Piskent tumanida joylashgan avtomobil ehtiyot qismlari do‘konida yong‘in sodir bo‘ldi. Hodisa oqibatida jabrlanganlar qayd etilmagan, yong‘in esa qisqa vaqt ichida bartaraf etilgan.
Foto: Telegram / MCHSUzbek
Toshkent viloyati Favqulodda vaziyatlar bosh boshqarmasi ma’lumotiga ko‘ra, 22 iyun kuni soat 09:35 da «112» tizimi orqali Piskent tumanidagi Oybek mahallasi hududida joylashgan avtomobil ehtiyot qismlari do‘konida yong‘in yuz berayotgani haqida xabar kelib tushgan.
Shundan so‘ng voqea joyiga qutqaruv bo‘linmalari jalb qilinib, ular soat 09:45 da hududga yetib borgan. Yong‘in soat 09:48 da qurshab olingan va soat 10:14 da to‘liq o‘chirilgan.
Qutqaruvchilarning tezkor harakatlari natijasida binoning 300 kvadrat metr maydonini yong‘indan saqlab qolishga erishilgan.
Favqulodda vaziyatlar xizmati ma’lum qilishicha, hodisa oqibatida tan jarohati olganlar yo‘q.
Ayni paytda yong‘inning kelib chiqish sabablari hamda yetkazilgan moddiy zarar miqdori aniqlanmoqda.
Yoz faslida kuzatiladigan issiq harorat inson tanasida ba’zi muammolarni keltirib chiqarishi mumkin. Shu bois har bir odam shaxsiy gigiyena qoidalariga amal qilishi zarur.
Quyida yoz faslida salomatlikni asrash bo‘yicha bir nechta muhim tavsiyalar bilan tanishish mumkin.
Bilamizki, issiq havoda ayrim oziq-ovqat mahsulotlari juda tez ayniydi. Shu sababli doim toza va ozoda joylarda taomlanish, sifati tez buziladigan mahsulotlardan saqlanish zarur.
Bozorlar, ko‘chalar va yo‘l yoqalarida sotiladigan uy sharoitida tayyorlangan yeguliklar hamda ayron, o‘rik sharbati kabi qo‘lbola ichimliklarni iste’mol qilmang. Shuningdek, meva va sabzavotlarni yaxshilab yuvib, so‘ng tanovul qiling. Go‘sht va sut mahsulotlarini faqat sovutgichda saqlang.
Cho‘milish havzalaridagi ifloslangan suv o‘tkir virusli ichak infeksiyalari, gepatit (A, E), ichburug‘, ichterlama, lyamblioz kabi xavfli kasalliklarni keltirib chiqaradi. Shuningdek, ochiq suv havzalarida suzish turli teri xastaliklari, burun, og‘iz va quloq shilliq qavatlari yallig‘lanishiga ham olib kelishi mumkin.
Shu bois doim faqat toza va dezinfeksiyalangan sun’iy suzish havzalarida cho‘milish lozim. Shaxsiy sochiq va suzish vositalarini ishlatish, ularni begona odamlarniki bilan almashtirmaslik zarur.
Yoz faslida sovun va antiseptik gellar yordamida tez-tez qo‘llarni yuvib turish terini ozoda saqlab, zararli bakteriya va viruslardan xalos etadi. Ayniqsa, taomlanishdan oldin va keyin hamda tashqaridan uyga kelganda bu odatni kanda qilmaslik lozim.
Jazirama havo inson terisida bakteriyalarni ko‘paytiradi. Shu sababli issiq kunlarda tez-tez iliq dush qabul qilish salomatlik uchun foydali. Jamoat hojatxonalaridan foydalangach, albatta, qo‘llarni sovunlab yuvish kerak. Yoxud antiseptik vositalarni ishlatish tavsiya etiladi. Shuningdek, jamoat joylarida eshik tutqichlari va umumiy foydalaniladigan buyumlarni ushlagandan keyin ham qo‘llarni sovunlab yuvish maqsadga muvofiq.
Issiq kunlari organizm juda ko‘p suyuqlik talab qiladi. Bunday paytda, albatta, toza va xavfsiz ichimliklar iste’mol qilish kerak. Ayniqsa, qaynatilgan yoki filtrlangan toza suv ichish tanada suyuqlik balansini ushlashga yordam beradi.
Yoz fasli quruq bo‘lgani uchun chang va g‘uborlar havoga tez ko‘tariladi. Shu bois uylarni ozoda saqlash, namlikni nazorat qilish va havoni almashtirib turish juda muhim. Eshik tutqichlari, stol-stul va boshqa tez ifloslanadigan joylarni dezinfeksiya vositalari bilan tozalash turli kasalliklarga chalinishning oldini oladi.
Bundan tashqari, ish joyida shaxsiy ozodalikka rioya qilish, xona havosini tez-tez almashtirib turish, konditsioner va ventilyatorlardan to‘g‘ri foydalanish salomatlikni saqlashda juda muhim.
Manba
Toshkent shahrida jamoat transporti harakati samaradorligini oshirish maqsadida avtobuslar uchun ajratilgan maxsus yo‘laklarga deliniatorlar o‘rnatish ishlari boshlandi. Yangi yechim avtobuslar harakatini tezlashtirish, kechikishlarni kamaytirish va yo‘lovchilar uchun qulaylik yaratishga xizmat qilishi kutilmoqda.
Ma’lum qilinishicha, poytaxtda avtobuslar harakati uchun mo‘ljallangan «A» toifasidagi alohida yo‘laklarni bosqichma-bosqich joriy etish ishlari davom etmoqda. Xususan, Magic City hududidagi Furqat ko‘chasidan Xalqlar do‘stligi saroyi atrofidagi Islom Karimov ko‘chasigacha bo‘lgan yo‘l qismida maxsus yo‘l chiziqlari chizilib, deliniatorlar o‘rnatilmoqda.
Mutasaddilarning ta’kidlashicha, deliniatorlar avtobus yo‘lagini umumiy transport oqimidan ajratib, boshqa transport vositalarining ushbu yo‘lakka kirib ketishini cheklaydi. Bu esa jamoat transporti harakati tezligi va barqarorligini ta’minlashga yordam beradi.
Jahon tajribasida AQSh, Ispaniya, Buyuk Britaniya, Singapur, Avstraliya va Ozarboyjon poytaxti Bokuda bunday alohida yo‘laklar jamoat transporti samaradorligini oshirishning muhim vositalaridan biri sifatida qo‘llab kelinmoqda.
Qayd etilishicha, 2026 yil davomida Toshkentning 30 dan ortiq ko‘chasida «A» toifasidagi maxsus avtobus yo‘laklarini tashkil etish rejalashtirilgan. Ushbu yo‘nalishlarda deliniatorlar va boshqa infratuzilma yechimlari ham bosqichma-bosqich joriy etiladi.
Loyihaning asosiy maqsadi avtobuslar harakatini tezkor, barqaror va oldindan rejalashtirish mumkin bo‘lgan tizimga aylantirish, shu orqali jamoat transporti jozibadorligini oshirishdan iborat.
O‘zbekiston va Xitoy hamkorligidagi yangi texnologik loyihalar muhokama qilindi
«UZBEKENERGOTAMIR» AJ Toshkent elektr ta’minoti tizimini keng ko‘lamli yangilash doirasida yana to‘rtta elektr tarmoq obyektini qurish va modernizatsiya qilish ishlarini yakunladi
Bo‘stonliqda kanalga tushib ketgan ikki boladan birining jasadi topildi
-
Jamiyat3 days agoAbdulla Qodiriy ko‘chasida haydovchilar uchun yangi qayrilish joyi tashkil etildi
-
Iqtisodiyot4 days ago
Toshkentda YIBning mintaqaviy vakolatxonasi ochildi
-
Iqtisodiyot3 days agoUch karra yer solig‘ining bekor qilinishi: pullar qanday qaytariladi?
-
Dunyodan4 days agoEron yadro quroliga ega boʻlmaslikka rozi: Prezident Tramp
-
Siyosat4 days ago
O‘zbekistonda AQSh bilan yirik investitsiya loyihalari amaliy bosqichga o‘tadi
-
Dunyodan2 days agoEron Hormuz boʻgʻozi yopilganini eʼlon qildi
-
Siyosat5 days ago
O‘zbekiston va Albaniya birinchi xonimlari uchrashdi
-
Siyosat5 days ago
Prezident Ozarbayjon va Belarus bosh vazirlarini qabul qildi