Jamiyat
O‘zbekistondagi yagona ovchi ayol yoki Buxoro cho‘lidagi «dunyo»
Buxoroda hali qish uyquga ketmay turib, har yili turistik mavsum erta boshlanishi ko‘pchilikka ayon. Aprel oyi kirmasdanoq, Buxoro shahrining eski shahar ko‘chalari xorijlik sayohlar bilan gavjumlashib qoladi. Xizmat ko‘rsatish infratuzilmasi har jihatdan izchil rivojlangan, sharoitlar kengaygan.
Buxoroning boy tarixiy-madaniy merosi sayyohlarning asosiy e’tibor markazida, ayniqsa, qadim tarixiy obidalaru, buyuk shaxslar tomonidan bino bo‘lgan inshootlarga talab yuqori.
Bugun esa shahar markazidagi bunyodkorlik va obodonlashtirish ishlarining hayratlanarli darajada bo‘y ko‘rsatayotganiga emas, turizm salohiyatiga o‘z ta’sirini o‘tkazayotgan G‘ijduvon tumanining Qizilqum bag‘irlariga yondosh «Oltinsoy» maskani haqida so‘z yuritsak. Eslatib o‘tamiz, cho‘l bag‘rida barpo etilgan bu yashil maskan dam olish manzili emas, balki, yangi turizm o‘chog‘idir.
Tuman markazidan, qariyb, 20 kilometrcha uzoqlikda joylashgan «Baraka» cho‘l massivida joylashgan bu maskanning umumiy maydoni 28 gektardan iborat. Bir qarashda, «cho‘l», deganda, ko‘z o‘ngingizda quruq va sukutga cho‘mgan manzara paydo bo‘ladi. Ushbu manzil esa bu tasavvuriningizni mutlaqo o‘zgartiradi.
Cho‘lning ushbu ko‘ngilochar maskanida ov qilish, kamondan va miltiqdan otish, otda sayr, gastronomik turizm yuqori. Ovul hayotiga oid milliy namunada qurilgan o‘tovlar va ulardagi tuya suti, hududda tuyaqush parvarishi yo‘lga qo‘yilgani kishini befarq qoldirmaydi.
Ayniqsa, cho‘l hududidagi 5 gektar maydonda suv havzasining bunyod etilayotgani, unda baliq ovlash, xushmanzara joylarni tomosha qilish, ot va tuyalarda sayr etish mumkinligi odamni shoshirib qo‘yadi.
Cho‘l bag‘ridagi yashil olamning had-hududsizligi ko‘zlaringiz qirida qoladi. «Kimning mehnati ekan?»-deysiz beixtiyor.
– O‘zbekistondagi yagona ovchi ayol haqida eshitganmisiz?
– Ha, albatta, Iqlima Jo‘rayeva-da!-deymiz o‘ylab turmay, qiziqishimiz ortib.
– Yashang!-deydi hamkasb suhbatdoshimiz Ramazon Bekmurodov. So‘ng yana so‘zida davom etib: – bu manzil shu ovchi ayolning amalga oshirgan loyihasi mevasi. Bundan bir necha yil ilgari qiymati 1 milliard so‘m va USAID homiyligida ajratilgan 31 ming AQSh dollari evaziga boshlangan ushbu loyihani opa yillar davomida izchil rivojlantirdi. Uzoq cho‘l massividagi haqiqiy ekoturizm markazi – «Oltinsoy»ning barpo etilishida shu ovchi ayol bosh-qosh bo‘ldi. Milliy va zamonaviy turizm imkoniyatlari bilan uyg‘unlashtirdi. Xullas, opa halol peshona teri evaziga mehnat qildi.
Mazkur cho‘l zonasida 40 mingga yaqin turli-tuman ko‘chatlar o‘tqazilgan. Ko‘chatlar ham vodiyning eng serhosil viloyatlaridan keltirilgan ekan. Shu yashil olam orasida yurtalarning o‘rnatilgani xuddi sizni ertaklar olamiga boshlaydi.
– Buxoroni ko‘pincha huu-uv, dunyoning chekkasidan kelganlar ham «cho‘l va issiq, tuprog‘i sho‘r», deyishadi. Yo‘q. Men Buxoroning farzandi sifatida o‘sha cho‘lda yam-yashil dunyo yaratdim. Kuch-quvvatim bilan harakat qildim. Toki, Buxoroni dunyo bilsin va tanisin: bu yurt tomirlari yashil olamga tutashligini,-deydi ekomaskanga tikilib Iqlima Jo‘rayeva.
O‘z hayotini tabiat qo‘ynida, tog‘ va cho‘llar bag‘rida o‘tkazgan yagona mohir ovchi ayol, tadbirkor va «Shuhrat» medali sohibasi Iqlima Jo‘rayeva bilan qisqa suhbatda bo‘ldik.
– Cho‘l bag‘ridagi yashil olam kishini befarq qoldirmaydi. Bu loyihani boshlash g‘oyasi qanday paydo bo‘lgan?
– Bolaligimdan tabiatga mehrim baland edi. Quruq, jim-jit cho‘lga qarab: «nega bu yerda hayot qaynamasligi kerak?» degan savol ko‘nglimda ko‘p bor uyg‘ongan. Keyinchalik tushundimki, tabiatga mehr bilan yondashsangiz, u sizga, albatta, javob qaytaradi. Shu fikr menga kuch berdi. Bu loyihani o‘zimning orzu va sabrlarimning natijasi, desam ham bo‘ladi. Bundan tashqari, ko‘pchilik odamlar cho‘lga qarab, «cho‘lda hech narsa bo‘lmaydi», deyishadi. Men esa aksincha, imkoniyatni ko‘rdim. Tabiatni asrab, shu bilan birga odamlarga uni his qilish imkonini berishni istadim.
– Eng katta qiyinchilik nimada bo‘ldi?
– Bilasizmi, eng katta qiyinchilik nimada? Avvalo, odamlarni «Cho‘lni yashnataman», degan shijoatingizga ularning ishonmasligida. Keyinchalik qiyinchilik esa suv masalasi va iqlim. Daraxt ekish, uni parvarishlash masalasi bu yerda juda katta mehnat talab qiladi. Lekin, o‘ziga ishongan inson uchun esa to‘siq yo‘q. Men hammasini qiyinchilik emas, sinov, deb qabul qilganman.
– Siz O‘zbekistondagi yagona ovchi ayolsiz! Ovchilik sizning-cha, bu tanlovmi yoki taqdir yo‘limi?
– Men tutgan yo‘l ham taqdir, ham tanlov yo‘li. Tanlov deganim, har kim ham bunday yo‘lni tanlamaydi. Lekin, shu bilan birga, taqdir ham bor. Agar qalbingizda tabiatga yaqinlik, jasorat va sabr bo‘lmasa, bu yo‘lda yura olmaysiz. Men o‘zimni shu sohada topdim, shuning uchun bu men uchun ham tanlov, ham taqdir.
Iqlima Jo‘rayevaning aytishicha, so‘nggi yillarda tabiatdagi muvozanat sezilarli darajada o‘zgargan. Qishlar yumshoqlashgan, yozlar esa yanada issiq va quruq bo‘lib bormoqda. Bu esa hayvonot dunyosiga ham, o‘simliklarga ham ta’sir ko‘rsatmoqda.
– Iqlim o‘zgarishiga qarshi kurash har bir insonning kundalik hayotidan boshlanishi kerak. «Hech narsa bo‘lmaydi», degan joyda hayot qaynaydi,- deydi u.
Tabiat bilan hamnafas, yashil olam bilan o‘zini egiz bilgan tadbirkor tashabbusi bilan tashkil etilgan ushbu ekomaskan bugun minglab sayyohlarni bag‘riga chorlab, mahalliy aholi uchun ham daromad manbai bo‘lmoqda. Ayni paytda bunda 20 nafarga yaqin ishchi doimiy bandlikka ega.
Kelgusidagi rejalarida cho‘l hududini xalqaro darajadagi ekoturizm nuqtasiga aylantirishni, O‘zbek cho‘lining go‘zalligini dunyo ahli ko‘rishini istagan ovchi ayol bilan qizg‘in suhbatni keyinga qoldirdik.
Bilganimiz shu: cho‘l, deb atalgan makon faqat quruqlik emas, sabr va mehnat bilan yashillikka aylanishi mumkin bo‘lgan had-hududsiz manzil ekan. «Oltinsoy» esa ana shu ishonchning tirik isboti, inson irodasi tabiat bilan uyg‘unlashsa, mo‘’jiza yaratish mumkinligining yorqin namunasidir.
Mavzuga qaytamiz.
Prezident Shavkat Mirziyoyev madaniyat va san’atni rivojlantirish hamda milliy merosni xalqaro miqyosda targ‘ib qilishga qaratilgan loyihalar taqdimoti bilan tanishdi. Unga ko‘ra, O‘zbekistonning noyob arxeologik va amaliy san’at namunalari jahonning yetakchi muzeylarida namoyish etiladi, «Tamerlano» operasi 2027 yilda Nyu-Yorkdagi Karnegi-xoll sahnasida qo‘yiladi, shuningdek, mamlakatda yirik xalqaro madaniy tadbirlarni tashkil etishning yangi tizimi joriy etiladi.
Prezident Shavkat Mirziyoyev 17 iyul kuni madaniyat va san’atni rivojlantirish, milliy merosimizni asrab-avaylash hamda xalqaro miqyosda keng targ‘ib qilishga qaratilgan loyiha va tadbirlar taqdimoti bilan tanishdi.
Dastlab nufuzli xorijiy muzey va ko‘rgazma maydonlarida O‘zbekistonning arxeologik va ilmiy merosi, shuningdek, amaliy san’at asarlarini namoyish etish bo‘yicha rejalar ko‘rib chiqildi.
Jumladan, 2026 yil sentabr oyida Dohadagi Islom san’ati muzeyida “Uzbekistan: Heritage in Motion” ko‘rgazmasini, noyabr oyida esa Milandagi Prada fondida O‘zbekistonning noyob eksponatlari ishtirokida “Global Antiquity” xalqaro arxeologiya ko‘rgazmasini tashkil etish rejalashtirilgan. 2027 yilda Venetsiyadagi Palatsso Grimani va Yaponiyaning Nara milliy muzeyida O‘zbekistonning bronza davridan ilk o‘rta asrlargacha bo‘lgan tarixini aks ettiruvchi 200 dan ziyod arxeologik topilmalar namoyish etiladi. Milandagi Palatsso Realeda oltin kashtachilik, so‘zana, ikat, zargarlik buyumlari va amaliy san’at asarlaridan iborat 150 dan ortiq eksponat taqdim etiladi.
Florensiyada Abu Ali ibn Sinoning hayoti va ilmiy merosiga bag‘ishlangan ko‘rgazma o‘tkazish, shuningdek, Yaponiya, Buyuk Britaniya, Xitoy, Saudiya Arabistoni va boshqa davlatlardagi yetakchi madaniy muassasalar bilan qo‘shma loyihalarni amalga oshirish rejalari bayon qilindi.
Madaniy meros obektlarini restavratsiya qilish masalalariga alohida e’tibor qaratildi. Knyaz Nikolay Romanov saroyida O‘zbekiston davlat san’at muzeyi filialini tashkil etish ko‘zda tutilgan. Bunda majmuaning tarixiy qiyofasi saqlab qolinib, 300 ga yaqin eksponatdan iborat doimiy ekspozitsiya shakllantiriladi.
Muxtor Ashrafiy uy-muzeyida binoning fasadi va tarixiy intererlari restavratsiya qilinib, ekspozitsiya yangilanmoqda. Muzey zamonaviy muhandislik tizimlari, xavfsizlik va iqlim nazorati vositalari, multimedia uskunalari, shuningdek, ovoz yozish studiyasi bilan jihozlanadi.
Taqdimotda “Tamerlano” operasini jahonning nufuzli sahnalarida namoyish etish natijalari va kelgusi rejalar ko‘rib chiqildi.
Joriy yilda ushbu asar Dubay operasi, Venadagi “Muzikferayn”, Sankt-Peterburgdagi Mariinskiy teatri hamda Versal saroyi Qirollik operasi sahnalarida namoyish etildi. Stefano Poda sahnalashtirgan operada Georg Fridrix Gendel musiqasi Kirill Rixter talqinida, o‘zbek milliy cholg‘u asboblaridan foydalanilgan holda ijro etildi. Loyihada O‘zbekiston Milliy simfonik orkestri, xor, xalq cholg‘ulari orkestri va taniqli solistlar ishtirok etdi.
2027 yil mart oyida “Tamerlano” operasini Nyu-Yorkdagi mashhur “Karnegi-xoll” konsert zali sahnasida namoyish etish rejalashtirilgan. Bu o‘zbek opera san’ati va milliy ijrochilik maktabining yuksak salohiyatini xorijiy auditoriyaga keng namoyish etish imkonini beradi.
Yirik konsertlar, festivallar, tanlov va ko‘rgazmalarni tashkil etishning yagona tizimini shakllantirish masalasi ham ko‘rib chiqildi. Madaniyat vazirligi huzuridagi “Xalqaro festivallar direksiyasi” davlat muassasasi negizida Madaniyat va san’atni rivojlantirish jamg‘armasi huzurida Madaniy loyihalar milliy operatorini tashkil etish taklif qilindi.
Milliy operator yirik xalqaro tadbirlarni tashkil etish va ularni xorijda targ‘ib qilish, taniqli ijrochilar ishtirokidagi konsertlarga buyurtmachi sifatida ish olib borish, shuningdek, “Sharq taronalari” xalqaro musiqa festivalini tayyorlash uchun mas’ul bo‘ladi.
Joriy yil 8 iyun kuni Samarqanddagi Registon maydonida mashhur xonanda Jon Lejyendning konserti o‘tkazildi. Avgust oyida Pekindagi Buyuk Xitoy devorida, sentabr oyida esa Registon maydonida taniqli pianinochi Lang Langning konsertini o‘tkazish rejalashtirilgan. Oktabr oyida Toshkentdagi “O‘zbekiston” xalqaro anjumanlar saroyida bastakor Maks Rixterning konserti bo‘lib o‘tadi.
Joriy yilda Venetsiya va Milan shaharlarida o‘tkazilayotgan yirik xalqaro madaniy tadbirlarda O‘zbekistonning ishtiroki natijalari ham taqdim etildi.
Venetsiyadagi 61-xalqaro san’at biyennalesida O‘zbekiston “The Aural Sea” loyihasi bilan milliy pavilonda ishtirok etmoqda. Loyiha Orol dengizi va Qoraqalpog‘iston mavzusini xotira, afsona va hikoyalar orqali ochib beradi. Pavilonga hozirga qadar 60 mingdan ziyod kishi tashrif buyurgan. Loyihaga bag‘ishlangan materiallarning umumiy media qamrovi 145 milliondan oshgan.
Biyennale doirasida Palatsso Kavalli-Frankettida o‘zbekistonlik rassom Vyacheslav Axunovning “Instrumens of the Mind” shaxsiy ko‘rgazmasi ham tashkil etildi. Unda rassomning 1970 yillardan bugungi kunga qadar yaratilgan 200 dan ortiq asari namoyish etilmoqda. Ko‘rgazmaga 30 dan ziyod mamlakatdan 12 mingdan ortiq kishi tashrif buyurgan.
“Milan Design Week 2026” doirasida tashkil etilgan “O‘rik gullaganda” milliy pavilonida 12 nafar xalqaro dizayner hamda O‘zbekiston va Qoraqalpog‘istondan 12 nafar hunarmandning hamkorlikdagi ishlari namoyish qilindi. O‘zbekiston paviloni “Fuorisalone Award 2026” mukofoti hakamlar hay’atining maxsus e’tirofiga sazovor bo‘ldi. Uni 18 mingdan ziyod kishi ko‘rdi, loyihaning xalqaro axborot qamrovi 171 millionga yetdi.
Shuningdek, Madaniyat va san’atni rivojlantirish jamg‘armasining 2026-2027 yillarga mo‘ljallangan tadbir va loyihalari muhokama qilindi.
11-13 sentabr kunlari Nukus shahrida Orol madaniyati sammiti o‘tkaziladi. Madaniyat, ilm-fan, me’morlik, dizayn va ekologiya sohalari vakillari Orolbo‘yini barqaror rivojlantirish masalalarini muhokama qiladi. 2027 yil yanvar oyida “Aral School” xalqaro dasturining Orol dengizi havzasi iqlimi va landshaftiga bag‘ishlangan yangi mavsumi boshlanadi.
Alisher Navoiy nomidagi O‘zbekiston davlat akademik katta teatri repertuarini yangilash doirasida Jakomo Puchchinining “Turandot” operasi va Pyotr Chaykovskiyning “Shelkunchik” baletini yangicha talqinda sahnalashtirish rejalari ko‘rib chiqildi. Loyihalarni amalga oshirishga yetakchi mahalliy va xorijiy rejissyorlar, dirijyorlar, xoreograflar va sahnalashtirish bo‘yicha mutaxassislarni jalb etish rejalashtirilgan.
2027 yilgi Buxoro biyennalesi doirasida madaniy meros obektlarini restavratsiya qilish, tarixiy hududlar va jamoat makonlarini obodonlashtirish, shuningdek, ko‘rgazma maydonlarini tayyorlash rejalashtirilgan. Biyennalega 50 dan ziyod xorijiy rassom va dizayner hamda mamlakatimiz kreativ industriyalarining 300 dan ortiq vakili jalb etiladi.
Bundan tashqari, “Milan Design Week” va “Art Basel” tadbirlarida ishtirok etish, “Art for Tomorrow” xalqaro anjumanini o‘tkazish, Qatar muzeylari bilan hunarmandchilik va dizayn sohasida hamkorlikni rivojlantirish, shuningdek, Buxoroda badiiy rezidensiya va xalqaro zargarlik maktabini tashkil etish bo‘yicha takliflar ko‘rib chiqildi.
Davlat rahbari loyihalarni puxta tayyorlash, restavratsiya ishlari sifatini qat’iy nazorat qilish, milliy mazmunni zamonaviy yondashuvlar bilan uyg‘unlashtirish hamda xalqaro madaniy hamkorlikning amaliy natijadorligini oshirish bo‘yicha ko‘rsatmalar berdi.
Samarqand viloyatining Urgut tumanida Isroilga ishga jo‘natishni va’da qilib, buning evaziga 16 ming AQSh dollari talab qilgan shaxs tezkor tadbir davomida qo‘lga olindi. U kelishilgan pulning bir qismini olgan vaqtida ashyoviy dalillar bilan ushlangan.
Foto: Prokuratura departamenti
Bosh prokuratura huzuridagi departamentning Urgut tumani bo‘limi hamda boshqa huquqni muhofaza qiluvchi organlar xodimlari hamkorligida o‘tkazilgan tezkor tadbirda xorijga ishga yuborish bilan bog‘liq firibgarlik holatiga chek qo‘yildi.
Ma’lum qilinishicha, fuqaro R.B. fuqaro R.M.ni Isroilga ishlash uchun yuborishini aytib, bu xizmat evaziga 16 ming AQSh dollari talab qilgan.
Tezkor tadbir davomida gumonlanuvchi kelishilgan mablag‘ning 2 ming AQSh dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 25 va 168-moddalari bilan jinoyat ishi qo‘zg‘atilgan. Hozirda ushbu ish bo‘yicha tergov harakatlari olib borilmoqda.
Qashqadaryo viloyatining Qarshi tumanida sobiq mahalla raisi va uning o‘g‘li olti nafar fuqaroning shaxsiy ma’lumotlaridan qonuniy asoslarsiz foydalanib, ular nomidan rasmiylashtirilgan 187,4 mln so‘mni o‘z ehtiyojlari uchun ishlatib yuborganlikda gumon qilinmoqda. Holat yuzasidan jinoyat ishi qo‘zg‘atilib, tergov harakatlari olib borilmoqda.
Bosh prokuratura huzuridagi departamentning Qarshi tumani bo‘limi tomonidan o‘tkazilgan tergovga qadar tekshiruvda Qarshi tumanidagi «Yangi Xonobod» mahalla fuqarolar yig‘inining sobiq raisi K.R. va uning o‘g‘li I.N.ning qonunga zid harakatlari aniqlangan.
Tekshiruv ma’lumotlariga ko‘ra, ular mahallaga turli masalalar bilan murojaat qilgan olti nafar fuqaroning pasport ma’lumotlaridan foydalangan. Shuningdek, ularning imzolarini soxtalashtirib, onlayn savdo platformasi orqali turli maishiy texnika vositalarini rasmiylashtirgan.
Tergov talqiniga ko‘ra, xarid qilingan maishiy texnikalar keyinchalik naqd pulga sotilgan va olingan 187,4 mln so‘m o‘z ehtiyojlari uchun sarflab yuborilgan.
Mazkur holat yuzasidan gumonlanuvchilarga nisbatan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan.
Hozirda ushbu ish bo‘yicha tergov harakatlari davom etmoqda.
Prezident raisligida o‘tgan yig‘ilishda mahallalarda ijtimoiy yordam tizimini yanada takomillashtirish, ehtiyojmand oilalarni ijtimoiy reyestrga kiritishdagi qonunbuzilishlarga barham berish va aholiga ko‘rsatiladigan ijtimoiy xizmatlar ko‘lamini kengaytirish masalalari muhokama qilindi. Shuningdek, yil yakunigacha mahallalarda nogironligi bo‘lgan shaxslar, keksalar va og‘ir hayotiy vaziyatga tushgan bolalar uchun qator yangi xizmatlar yo‘lga qo‘yilishi belgilandi.
Foto: Prezident matbuot xizmati
Yig‘ilishda mahallalarda ijtimoiy reyestrni yuritishda yo‘l qo‘yilayotgan kamchiliklar tanqid qilindi. Qayd etilishicha, ayrim hududlarda fuqarolarni ijtimoiy reyestrga kiritish asossiz rad etilmoqda yoki ular sun’iy ravishda reyestrdan chiqarilmoqda.
Buning oqibatida ehtiyojmand oilalar ijtimoiy nafaqalar va boshqa yordam turlarini olish, farzandlarini davlat bog‘chalari hamda to‘garaklarga joylashtirish kabi qonun bilan kafolatlangan xizmatlardan foydalana olmayapti.
Ma’lum qilinishicha, 184 ta mahallada bir oy davomida kelib tushgan 2 mingta arizaning barchasiga asossiz ravishda rad javobi berilgan.
Bunday holatlar ayniqsa Bo‘ston, Oltinko‘l, Xovos, Toshloq, Sharof Rashidov, Uchquduq va Dehqonobod tumanlarida ko‘p uchrayotgani qayd etildi.
Shu sababli ijtimoiy reyestrga kiritish masalasida Prezident virtual qabulxonasiga kelib tushayotgan murojaatlar soni yil boshidan buyon 1,5 barobarga oshib, 30 mingdan 46 mingtaga yetgan.
Yig‘ilishda Bosh prokuraturaga ijtimoiy reyestrning qonuniy va to‘g‘ri yuritilishi ustidan qat’iy nazorat o‘rnatish topshirildi. Shuningdek, Ijtimoiy himoya milliy agentligi direktorining birinchi o‘rinbosari Shahnoza Mirziyoyevaga reyestrning haqqoniyligi yuzasidan prezidentga muntazam axborot berib borish vazifasi yuklatildi.
Mutasaddilar oldiga yil yakuniga qadar nogironlikni erta aniqlash, turar joylarni moslashtirish, ijtimoiy uylarga joylashtirish kabi 25 turdagi ijtimoiy xizmatni mahallalar darajasiga tushirish vazifasi qo‘yildi.
Shuningdek, uch oy ichida demensiya va aqliy zaifligi bo‘lgan shaxslar uchun 250 ta mahallada kunduzgi va uyda parvarish xizmati, «Madad» uylari tashkil etiladi. Yana 75 ta mahallada o‘zgalar parvarishiga muhtoj keksalar uchun «Faol hayot» dasturi yo‘lga qo‘yiladi. Bundan tashqari, qarovsiz qolgan va zo‘ravonlikka uchragan bolalarni qo‘llab-quvvatlash maqsadida maxsus «Qo‘llab-quvvatlash markaz»lari tashkil etilishi belgilandi.
Andijon va Sirdaryo viloyatlarida hokim yordamchilarining imtiyozli kredit mablag‘larini o‘zlashtirganlik holatlari fosh etildi.
Bosh prokuratura huzuridagi Departamentning Oltinko‘l tumani bo‘limi tomonidan tergovga qadar tekshiruv o‘tkazilgan. Unda “U.T.” va “Q.A.” MChJlarning mas’ul shaxslari, “Qayirma” MFY hokim yordamchisi va boshqalar o‘zaro til biriktirib, fuqarolarga issiqxona faoliyatini kengaytirish maqsadida ajratilgan imtiyozli kredit mablag‘larini xizmat ko‘rsatuvchi korxonalar tomonidan amalda bajarilmagan ishlarni hujjatlarda bajarildi deb ko‘rsatib, 442,3 mln so‘mlik imtiyozli kredit mablag‘larini firibgarlik yo‘li bilan qo‘lga kiritganliklari aniqlangan.
Departamentning Mirzaobod tumani bo‘limi tomonidan o‘tkazilgan tergovga qadar tekshiruvda “Toshkent” MFY sobiq hokim yordamchisi va boshqalar o‘zaro til biriktirib, mazkur MFYda yashovchi 8 nafar fuqaroga ajratilgan 248 mln so‘mlik imtiyozli kredit mablag‘larini ta’minotchi korxonalar orqali talon-toroj qilganliklari aniqlangan.
Departamentning Andijon shahri bo‘limi tomonidan o‘tkazilgan tergovga qadar tekshiruvda “L.A.” MChJ rahbari A.K. va “Forobiy” MFY sobiq hokim yordamchisi o‘zaro til biriktirib, fuqarolarga ajratilgan 163 mln so‘mlik imtiyozli kredit mablag‘larini firibgarlik yo‘li bilan qo‘lga kiritganliklari aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Apple yana dunyoning eng qimmat kompaniyasiga aylandi
Jahon chempionati finaliga sloveniyalik hakamlar tayinlandi
Prezident O‘zbekiston madaniyatini jahonda targ‘ib qilish rejalari bilan tanishdi
-
Siyosat4 days ago
Prezident Shavkat Mirziyoyev Qatar amiriga ta’ziya bildirdi
-
Jamiyat4 days agoToshkent metrosiga yana 3 ta zamonaviy poyezd qo‘shildi
-
Dunyodan3 days agoMahmud Ahmadinejod atrofidagi sirli o’yin: “Mossad bilan hamkorlik”
-
Dunyodan4 days ago
Anqarada NATO sammiti boshlandi
-
Iqtisodiyot3 days agotadbirkor va davlat organlari o‘rtasida huquqiy bahs yuzaga keldi
-
Iqtisodiyot2 days agoMarkaziy bank huzurida Islomiy moliya kengashi tashkil etildi
-
Sport4 days agoIspaniyada Fransiya milliy jamoasi haqidagi bayonot ortidan siyosiy mojaro avj oldi
-
Iqtisodiyot4 days ago
Andijonda Belarus texnologiyasi asosida qishloq xo‘jaligi texnikalari ishlab chiqariladi