Boshlang‘ich ta’lim o‘qituvchilariga milliy sertifikat berish bo‘yicha imtihonlarni o‘tkazish tartibi belgilandi. 

Hukumat qarori (411-son, 29.07.2026-y.) bilan «Boshlang‘ich ta’lim o‘qituvchilariga milliy sertifikat berish bo‘yicha malaka imtihonlarini o‘tkazish tartibi to‘g‘risida»gi nizom tasdiqlandi.

Qarorga ko‘ra, 2026/2027 o‘quv yilidan boshlab V+ va undan yuqori darajadagi milliy sertifikatga ega bo‘lgan, boshlang‘ich sinflarda dars beruvchi boshlang‘ich ta’lim mutaxassisligiga ega o‘qituvchilarga:

Davlat budjeti mablag‘lari  hisobidan, sertifikatning amal qilish muddati davomida, tegishli ta’lim tiliga mos ravishda barcha fanlar bo‘yicha lavozim maoshiga har oyda 15 foiz miqdorida qo‘shimcha ustama to‘lab boriladi.

Nizomga ko‘ra, Bilim va malakalarni baholash agentligi mazkur sohada vakolatli organ hisoblanadi.

Malaka imtihonida ishtirok etishi uchun talabgordan ro‘yxatdan o‘tishda, ariza berilgan kundagi BHMning 1,5 baravari miqdorida to‘lov undiriladi.

Malaka imtihoni natijalari xalqaro metodika – Rash modeli asosida hisoblanadi. Unga ko‘ra:

– 70 balldan yuqori ball olgan talabgorga A+ darajali;

– 65 – 69,9 ball olgan talabgorga A darajali;

– 60 – 64,9 ball olgan talabgorga B+ darajali;

– 55 – 59,9 ball olgan talabgorga B darajali;

– 50 – 54,9 ball olgan talabgorga C+ darajali;

– 46 – 49,9 ball olgan talabgorga C darajali sertifikat beriladi.

Talabgorning boshlang‘ich sinflardagi tegishli fanlar mazmuni doirasidagi bilim darajasi, o‘qitish metodikasi va pedagogik mahorati test sinovlari orqali baholanadi.

Talabgor sertifikat olish maqsadida malaka imtihonida qatnashish uchun YaIDXP (my.gov.uz) orqali elektron shaklda ariza berib, ro‘yxatdan o‘tadi.

Malaka imtihonidan muvaffaqiyatli o‘tgan talabgorlarga 1 ish kuni ichida QR-kodli sertifikatning elektron shakli YaIDXP (my.gov.uz) orqali yuboriladi.

 Talabgor malaka imtihoni natijalari e’lon qilingan kundan boshlab 3 kun ichida YaIDXP (my.gov.uz) orqali vakolatli organga apellyasiya shikoyati berish huquqiga ega.

Shuningdek, 2026/2027 o‘quv yilidan boshlab huquqshunoslik fanini bilish darajasini aniqlash va milliy sertifikat berish tartibi joriy etilishi belgilandi.

Source link

Qashqadaryo viloyatining Nishon tumanida yashovchi 63 yoshli Gulsum Xurramova Qarshi davlat universitetini muvaffaqiyatli tamomlab, bakalavr diplomini qo‘lga kiritdi.

U universitetning Tarix fakulteti Ijtimoiy ish yo‘nalishida tahsil olgan. Gulsum Xurramova 2020 yilda, 58 yoshida talabalikka qabul qilingan.

Uning aytishicha, oliy ma’lumot olish bolalikdan orzusi bo‘lgan. Shu sababdan mahalla tizimi xodimlariga yaratilgan imtiyozlardan foydalanib, o‘qishga kirishga muvaffaq bo‘lgan.

«Eng quvonarlisi shundaki, men universitetga farzandim bilan emas, nevaram bilan birga talabalikka qabul qilinganman», — deydi Gulsum Xurramova.

Qahramonimiz uzoq yillar mahalla tizimida faoliyat yuritgan. U 2004 yildan mazkur Abdulla Qodiriy mahallasi raisi sifatida ishlagan, keyinchalik Kimyogar mahallasiga rahbarlik qilgan. Hozirda esa Abdulla Qodiriy mahallasida ijtimoiy xodim sifatida faoliyat olib bormoqda.

Source link

2026/2027-o‘quv yili uchun oliy va kasbiy ta’lim muassasalariga qabul doirasidagi test sinovlari Buxoro viloyatida belgilangan tartib asosida davom etmoqda. Joriy yilda viloyat bo‘yicha 30 269 nafar abituriyent test sinovlarida ishtirok etishi rejalashtirilgan bo‘lib, jarayonlar Bilim va malakalarni baholash agentligi Buxoro viloyati bo‘limi (1 200 o‘rin) hamda Buxoro shahridagi «Semurg‘» sport majmuasida (330 o‘rin) tashkil etilgan.

Bilim va malakalarni baholash agentligi viloyat bo‘limi bosh mutaxassisi Izzatulla Rahmonovning «Xabar.uz»ga bildirishicha, 14-23-iyul kunlarida mo‘ljallangan test sinovlari davomida Buxorodan 16 937 nafar abituriyent hujjat topshirgan. Test sinovlariga 1 423 nafar abituriyent belgilangan vaqtda yetib kelmagan. Viloyat bo‘yicha har bir smenada 1 530 nafar, bir kunda 3 060 nafar abituriyent test sinovlarini topshirish imkoniyatiga ega.

Ta’kidlanishicha, jarayonlarni Bilim va malakalarni baholash agentligi xodimlari hamda 118 nafar guruh nazoratchisi nazorat qilib bormoqda.

Test kitobini yirtishga uringan abituriyent chetlatildi

Mazkur test jarayonlarida nizom talablarini buzish bilan bog‘liq bitta holat qayd etilgan. Ma’lum bo‘lishicha, bir nafar abituriyent test topshiriqlari kitobini yirtib, uni tashqariga olib chiqishga uringan. Bu harakat test sinovlari tartibini qo‘pol ravishda buzish sifatida baholanib, amaldagi nizom talablariga muvofiq, abituriyent test sinovlaridan chetlashtirilgan.

«Barcha abituriyentlar uchun bir xil talablar amal qiladi va qoidalarni buzishga nisbatan murosasiz yondashuv saqlanadi. Shaffoflik — asosiy tamoyil», — deydi Izzatulla Rahmonov.

Test o‘tkazilayotgan binolar shaxsni identifikatsiya qilish kameralari, 360 darajali videokuzatuv tizimi hamda statsionar kuzatuv kameralari bilan jihozlangan. Shu sababli abituriyentlarning ota-onalari va yaqinlari test jarayonlarini test2026.uz sayti orqali onlayn kuzatish imkoniyatiga ega. Shuningdek, test maydonlari yaqinida tashkil etilgan maxsus kutish hududlaridagi katta monitorlar orqali ham imtihonlar real vaqt rejimida namoyish etilmoqda. Test sinovlarining xavfsiz va tartibli o‘tishini ta’minlash maqsadida viloyat hokimligi ishchi guruhi, Ichki ishlar organlari, Milliy gvardiya, Favqulodda vaziyatlar vazirligi hamda sog‘liqni saqlash tizimi xodimlari doimiy navbatchilik asosida xizmat olib bormoqda.

«Anomal issiqqa qaramay, abituriyentlar uchun barcha sharoitlar yaratildi. Bu yilgi test sinovlari havoning o‘ta issiq kelgan kunlariga to‘g‘ri kelgan bo‘lsa-da, test maydonlarida salqin muhit yaratish uchun barcha zarur choralar ko‘rildi. Shu kunga qadar test jarayonlari davomida abituriyentlarning sog‘lig‘i bilan bog‘liq jiddiy holatlar kuzatilmadi», — deydi bosh mutaxassis.

Abituriyentlar nima deydi?

Testdan chiqqan buxorolik abituriyent Dilshod Komilovning aytishicha, tashkil etilgan sharoitlar imtihonni xotirjam topshirishga yordam bergan.

«Avvaliga  jazirama issiqlardan xavotirlangan edim.  Lekin, zalda salqin muhit ta’minlangan, nazorat ham yaxshi tashkil qilingan», — deydi u.

G‘ijduvonlik abituriyent Shahnoza Hamidova ham jarayonlar haqida ijobiy fikr bildirdi:

«Kirish va tekshirish jarayonlari tartibli, to‘g‘rirog‘i, juda qat’iy bo‘ldi. Shunga qaramay, hech qanday tushunmovchilik kuzatilmadi. Imtihonni xotirjam topshirib chiqdim».

Vobkentlik abituriyent Bekzod Qodirov esa qoidalarga qat’iy amal qilish muhimligini ta’kidladi.

«Yashirmayman, 3 yil test sinovlariga kiryapman. Birinchi yili o‘z bilimimga suyanganimda edi, hozir 3-kursda o‘qib yurgan bo‘lardim. Ammo, o‘shanda tartibni buzganman. To‘g‘rirog‘i, «shpargalkam» bilan pand yeganman. Shuning uchun kimdir qoidani buzsa, bu boshqalarga nisbatan adolatsizlik bo‘lar ekan», — deydi.

Source link

2026/2027 o‘quv yili uchun oliy ta’lim muassasalarida davlat stipendiyalarini ajratish kvotalari tasdiqlandi.

Oliy ta’lim, fan va innovatsiyalar vazirligining 2026-yil 15-iyuldagi tegishli xatiga muvofiq, respublikadagi oliy ta’lim tashkilotlari va ta’lim yo‘nalishlari kesimida jami 776 ta davlat stipendiyasi ajratiladi.

Stipendiyalar quyidagicha taqsimlangan:

Prezident stipendiyasi — 187 ta;
Islom Karimov stipendiyasi — 194 ta;
Navoiy stipendiyasi — 175 ta;
Bobur stipendiyasi — 51 ta;
Imom al-Buxoriy stipendiyasi — 44 ta;
Beruniy stipendiyasi — 38 ta;
Ibn Sino stipendiyasi — 33 ta;
Abdulla Avloniy stipendiyasi — 16 ta;
Ulug‘bek stipendiyasi — 13 ta;
To‘lepbergen Qayipbergenov stipendiyasi — 11 ta;
Ibroyim Yusupov stipendiyasi — 11 ta;
Pahlavon Mahmud stipendiyasi — 3 ta.

Ushbu stipendiyalar respublika bo‘yicha 335 ming 471 nafar yuqori bosqich talabalari orasidan eng munosib nomzodlarga beriladi.

Source link

Prezidentning «Respublikada xalqaro ta’lim standartlari asosida o‘rta maxsus, kasbiy va oliy ta’lim dasturlarini joriy etishga doir qo‘shimcha chora-tadbirlar to‘g‘risida»gi PQ–269-son qarori qabul qilindi.

Qarorga muvofiq, Buyuk Britaniyaning ilg‘or tajribasi asosida integratsiyalashgan ta’lim dasturlarini kengaytirish maqsadida tajriba-sinov tariqasida Toshkent arxitektura-qurilish universiteti huzurida Integratsiyalashgan dasturlar oliy maktabi tashkil etiladi.

Ma’lumot uchun, O‘zbekistonda integratsiyalashgan ta’lim dasturlarini joriy etish maqsadida Buyuk Britaniyaning «IQF – Integrated Qualifications Framework» ta’lim tashkiloti bilan hamkorlikda Xalqaro malakalar va baholash markazi faoliyat yuritmoqda.

Qaror bilan mazkur markazga qator qo‘shimcha vazifalar yuklatildi. Jumladan, ishlab chiqilgan dasturlarni «QS» yoki «THE» xalqaro reytinglarining top-100 taligiga kiruvchi oliy ta’lim muassasalari akademik talablariga muvofiqlashtirish belgilandi.

Shuningdek, bakalavriatda «1+3» va «2+2», magistraturada esa «1+1» ta’lim modellarini ishlab chiqish vazifasi ham yuklatildi.

Hujjatga muvofiq, O‘zbekistonda yetakchi xorijiy universitetlar diplomini berishga qaratilgan kampus, filial, franshiza va ta’lim dasturlarini amalga oshirish markazlarini tashkil etish bo‘yicha kelishuvlarga erishish ham rejalashtirilgan.

Source link