O‘zbekistonda bozorlar va savdo komplekslari faoliyatini raqamlashtirish doirasida avtotransportlarni vaqtincha saqlash joylari uchun to‘lovlarni yagona QR-kod orqali amalga oshirish imkoniyati yaratiladi. Shuningdek, E-bozor yagona raqamli platformasi bosqichma-bosqich ishga tushiriladi.

Sun’iy intellekt yaratgan surat

Hukumatning «Bozorlar va savdo komplekslarida raqamlashtirish ishlarini samarali tashkil etish hamda maishiy korrupsiyaning oldini olishga doir chora-tadbirlar to‘g‘risida»gi qaroriga muvofiq, 2026 yil 1 oktyabrga qadar E-bozor yagona raqamli bozor platformasi sinov tariqasida, 2027 yil 1 martga qadar esa to‘liq joriy etiladi.

Platforma orqali bozorlar va savdo komplekslarining pasporti, manzili, bo‘sh savdo shoxobchalari hamda savdo o‘rinlari haqidagi ma’lumotlar ochiq e’lon qilib boriladi. Shuningdek, fuqarolar bozorlar faoliyatiga oid ma’lumotlar bilan tanishish, bozor ma’muriyatiga elektron murojaat yuborish va unga javob olish imkoniyatiga ega bo‘ladi.

E-bozor platformasi «Soliq» axborot tizimlari kompleksi tarkibida ishlaydi. Har bir bozor va savdo kompleksiga soliq organlari xodimlari biriktirilib, ularning faoliyati samaradorligi kunlik tahlil qilib boriladi.

Qarorga ko‘ra, bozorlar hududida va ularga tutash avtotransportlarni vaqtincha saqlash joylarida to‘lovlar yagona QR-kod orqali qabul qilinadi.

Bundan tashqari, 2026 yil 1 avgustdan boshlab transport vositalarini jarima maydonchasidan chiqarishga ruxsatnoma faqat ma’muriy ishni ko‘rib chiquvchi organ va ijro organi tomonidan «Jarima maydonchasi» axborot tizimi orqali QR-kod bilan tasdiqlangan elektron shaklda rasmiylashtiriladi.

Source link

Muntazam ravishda kofe iste’mol qilish sirroz, jigar saratoni va jigar bilan bog‘liq o‘lim xavfini kamaytirishi mumkin. Bu o‘z tadqiqot natijalarini Clinical Gastroenterology and Hepatology (CGH) jurnalida nashr etgan olimlar tomonidan chiqarilgan xulosadir.

Tadqiqotchilar Buyuk Britaniya Biobank loyihasining o‘rtacha 13 yil davomida kuzatilgan 354 957 ishtirokchisining ma’lumotlarini tahlil qilishdi. Kofe ichmaydiganlarga nisbatan, kuniga besh yoki undan ko‘p stakan ichganlarda sirroz xavfi 32 foizga, jigar saratoni xavfi 47 foizga va jigar kasalligidan o‘lim xavfi 42 foizga pastroq edi. Ijobiy bog‘liqlik kuniga atigi bir-ikki stakan bilan kuzatildi va uch-to‘rt stakan bilan aniq ko‘rindi.

Bundan tashqari, MRT tekshiruvlari kofe ichuvchilarda jigarda yog‘, yallig‘lanish, fibroz va temir to‘planishi kamroq ekanligini ko‘rsatdi. Qon tahlillari shuningdek, sog‘lom jigar faoliyati bilan bog‘liq oqsillarning yuqori darajasini va yallig‘lanish va to‘qima chandiqlarida ishtirok etadigan oqsillarning past darajasini aniqladi.

Bu topilmalar birinchi marta kofening himoya ta’sirining mumkin bo‘lgan biologik mexanizmlarini tushuntirishga yordam beradi.

Mualliflar ushbu tadqiqot sabab-oqibat bog‘liqligini isbotlamasligini va hamma jigarini himoya qilish uchun kofe ichishni boshlashi kerak degani emasligini ta’kidlaydilar. Ularning ta’kidlashicha, kofe ushbu xususiyatini asosiy profilaktika choralari – vaznni saqlash, spirtli ichimliklar iste’molini cheklash, jismoniy faol bo‘lish va qon shakarini, qon bosimini va xolesterinni nazorat qilish bilan to‘ldirishi mumkin, ammo ularning o‘rnini bosa olmaydi.

Source link

Prezident Shavkat Mirziyoyev 6 iyul kuni neft-gaz tarmog‘ida navbatdagi kuz-qish mavsumiga tayyorgarlik ishlarining borishi yuzasidan axborot bilan tanishdi.

Foto: Prezident matbuot xizmati

Yig‘ilishda 2026-2027 yillar kuz-qish mavsumida aholi, ijtimoiy soha obektlari va iqtisodiyot tarmoqlarini energiya resurslari bilan barqaror ta’minlash maqsadida ishlab chiqilgan kompleks chora-tadbirlar ko‘rib chiqildi. Tabiiy va suyultirilgan gaz yetkazib berish, magistral va hududiy gaz tarmoqlarini ta’mirlash, yoqilg‘i zaxiralarini shakllantirish hamda avariya-tiklash brigadalarining shayligini ta’minlash bo‘yicha aniq vazifalar qo‘yildi.

Tabiiy gaz ta’minoti tizimini mavsumga tayyorlash ishlariga alohida e’tibor qaratildi. Jumladan, mavsumgacha magistral gaz quvurlarining 53,7 kilometr nuqsonli qismini almashtirish, kompressor stansiyalaridagi 77 ta gaz haydash agregatini mukammal ta’mirlash rejalashtirilgan.

Shuningdek, 881 ta mahalladagi 220 ming xonadonning gaz ta’minotini yaxshilash va texnologik yo‘qotishlarni qisqartirish maqsadida uch bosqichli taqsimlash tizimidan ikki bosqichli tizimga o‘tkazish ko‘zda tutilgan. 711,9 kilometr gaz tarmog‘i va 400 ta gaz taqsimlash punkti mukammal ta’mirlanadi hamda rekonstruksiya qilinadi.

Aholi va ijtimoiy soha obektlarini suyultirilgan gaz bilan ta’minlash masalasi ham ko‘rib chiqildi. Kuz-qish mavsumida 325,7 ming tonna suyultirilgan gaz yetkazib berish, shu jumladan, borish qiyin bo‘lgan 229 ta qishloqdagi 104,7 ming iste’molchiga 8,2 ming tonna suyultirilgan gaz yetkazish belgilangan.

Qish davri uchun yoqilg‘i zaxiralarini shakllantirish bo‘yicha ham choralar ko‘rilmoqda. Jumladan, dekabr-yanvar oylari uchun 120 ming tonna avtobenzin zaxirasini yaratish rejalashtirilgan. Issiqlik elektr stansiyalariga mavsum davomida 4 million 161 ming tonna ko‘mir yetkazib berish prognoz qilinmoqda.

“O‘zbekneftgaz” tizimidagi korxonalarda texnologik barqarorlikni ta’minlash maqsadida 90 ta texnologik qurilmada ta’mirlash ishlari amalga oshiriladi.

Tayyorgarlik ishlari faqat neft-gaz tizimi bilan cheklanmay, umumiy energetika va kommunal sohalar bilan uzviy bog‘liq holda olib borish zarurligi ko‘rsatib o‘tildi. Shu maqsadda respublika va hududiy komissiyalar faoliyatini yo‘lga qo‘yib, mavsumga tayyorgarlik ishlarini muvofiqlashtirish va doimiy nazorat qilib borish topshirildi.

Mutasaddilarga belgilangan chora-tadbirlar ijrosini qat’iy nazorat qilish, mavsumga tayyorgarlik ishlarini muddatida va sifatli yakunlash, aholi hamda ijtimoiy soha obektlariga tabiiy va suyultirilgan gaz, shuningdek, boshqa yoqilg‘i resurslarini barqaror yetkazib berish bo‘yicha tegishli topshiriqlar berildi.

Source link

Chaqaloqlarning uch nafari qiz, ikki nafari o‘g‘il.

Foto: Sog‘liqni saqlash vazirligi

Bugun, 6 iyul kuni Andijon shahrida joylashgan 2-sonli tug‘uruq majmuasida 5 nafar egizak dunyoga keldi.

SSV matbuot xizmatiga ko‘ra, Andijon shahridagi Qayrag‘ochtosh mahalla fuqarolar yig‘inida istiqomat qiluvchi Nargiza Bekjonova shu kuni ko‘p homilalik tashxisi bilan mazkur muassasaga qabul qilindi.

Unda muddatidan ilgari tug‘uruq tashxisi bilan kesarcha kesish amaliyoti bajarildi.

Tug‘uruq jarayoni malakali akusher-ginekolog, neonatolog va reanimatologlar tomonidan muvaffaqiyatli o‘tkazilgan.

– birinchi chaqaloq: qiz, vazni 1450 gr,

– ikkinchi chaqaloq: o‘g‘il, vazni 1605 gr,

– uchinchi chaqaloq: qiz, vazni 1495 gr,

– to‘rtinchi chaqaloq: o‘g‘il, vazni 1585 gr,

– beshinchi chaqaloq: qiz, vazni 1205 gr.

Ixtisoslashtirilgan tibbiy xizmat ko‘rsatish maqsadida ona va chaqaloqlar Respublika ixtisoslashtirilgan ona va bola salomatligi ilmiy-amaliy tibbiyot markazi Andijon viloyati filialiga o‘tkazildi.

«Ayni paytda 5 nafar egizak va ularning onasi malakali tibbiyot xodimlari nazoratida o‘zlarini yaxshi his etmoqda», deyiladi vazirlik matbuot xizmati xabarida.

Iyun oyida ham Respublika ixtisoslashtirilgan ona va bola salomatligi ilmiy-amaliy tibbiyot markazi Andijon viloyati filialida 4 nafar egizak dunyoga kelgandi.

Source link

Global Initiative Against Transnational Organized Crime (GI-TOC) tomonidan tayyorlangan Global Organized Crime Index 2025 yangi hisobotida O‘zbekiston uyushgan jinoyatchilik darajasi bo‘yicha 4,93 ball oldi (193 davlat orasida 108-o‘rin). Bu global o‘rtacha 5,08 balldan past. Ammo, shu bilan birga jinoiy tahdidlarga chidamlilik past darajada ekani qayd etilgan – 3,83 ball (140-o‘rin).

Ekspertlar O‘zbekistonda odam savdosi muammosiga alohida e’tibor qaratgan (taxminan 8,0 ball). Markaziy Osiyoda mehnat migratsiyasi, kontrabanda va transchegaraviy tarmoqlar bilan bog‘liq xatarlar saqlanib qolmoqda. Shu bilan birga, O‘zbekistonda jinoyatchilikning umumiy darajasi ko‘plab qo‘shnilar bilan solishtirganda mo‘’tadilroq ko‘rinadi.

Reyting yetakchilari va autsayderlari

Eng yuqori ko‘rsatkichlar (eng ko‘p kriminallashgan mamlakatlar):

Myanma – 8,08 ball

Kolumbiya – 7,82

Meksika – 7,68

Ekvador – 7,48

Paragvay – 7,48.

Afrika va Lotin Amerikasi davlatlarida ham ballar yuqori.

Eng farovon mamlakatlar (uyushgan jinoyatchilikning past darajasi) an’anaviy ravishda G‘arbiy va Shimoliy Yevropada, shuningdek, kuchli institutlarga ega bo‘lgan Osiyo-Tinch okeani mintaqasidagi ayrim hududlarda joylashgan.

2025 yilgi global tendensiyalar bo‘yicha tahlilda qayd qilinishicha, dunyo «chorrahada» turibdi. Jinoiy tarmoqlar geosiyosiy o‘zgarishlar, texnologiyalar va iqtisodiy inqirozlarga faol moslashmoqda. Asosiy o‘zgarishlar:

Geroinning roli pasaygan holda kokain va sintetik giyohvand moddalarning ko‘payishi.

Moliyaviy va kiberjinoyatlarning keskin o‘sishi («ko‘rinmas» jinoyatchilik).

Xorijiy ishtirokchilar va xususiy sektorning ta’sirining oshishi.

Indeks metodologiyasi: Bu 15 ta jinoiy bozor (giyohvand moddalar, odam savdosi, moliyaviy jinoyatlar va boshqalar) va 12 ta barqarorlik ko‘rsatkichlari (adolat, xalqaro hamkorlik, shaffoflik va boshqalar) bo‘yicha ekspert baholari, ma’lumotlari va tahliliga asoslangan kompozit vositadir.

Indeks 193 mamlakatni qamrab oladi va 2021 yildan beri dinamikani kuzatish imkonini beradi. U rasmiy statistika emas, balki siyosatchilar va ekspertlar uchun tahliliy vosita bo‘lib xizmat qiladi.

Source link