O‘zbekiston Prezidentining yana bir global tashabbusi BMTda keng e’tirof etildi va qabul qilindi 

Nyu-York shahridagi BMT Bosh Assambleyasi tomonidan «Ijtimoiy rivojlanishni jadallashtirishda parlamentlarning rolini kuchaytirish to‘g‘risida»gi muhim rezolyusiya a’zo davlatlarning mutlaq ko‘pchilik ovozi bilan qabul qilindi. 

Ushbu tashabbus ilk bor O‘zbekiston Respublikasi Prezidenti Shavkat Mirziyoyev tomonidan 2020 yil sentyabr oyida BMT Bosh Assambleyasining 75-sessiyasidagi nutqida ilgari surilgan edi. Oradan o‘tgan davr mobaynida o‘zbek diplomatiyasining faol va izchil sa’y-harakatlari natijasida mazkur g‘oya xalqaro miqyosda yagona hujjat shakliga keltirildi va jahon hamjamiyati tomonidan to‘liq qo‘llab-quvvatlandi. 

Rezolyusiyada nimalar aks etgan va u nima uchun muhim? 

O‘zbekiston tajribasi. Hujjatda Toshkent shahrida Parlamentlararo Ittifoqning 150-Assambleyasi muvaffaqiyatli o‘tkazilgani va unda qabul qilingan Toshkent deklaratsiyasi alohida e’tirof etildi. 

Ijtimoiy tenglik va yoshlar. Hujjat parlamentlar faoliyatida ayollar va yoshlar ishtirokini kengaytirish, rivojlanayotgan davlatlarni qo‘llab-quvvatlash hamda ijtimoiy sohada xalqaro hamkorlikni kuchaytirishga qaratilgan. 

Dunyo mamlakatlarining yakdil qo‘llab-quvvatlashi. Rezolyusiyani qabul qilish uchun o‘tkazilgan ovoz berish jarayonida 167 ta davlat uni yoqlab ovoz berdi. Dunyoning 61 ta davlati, jumladan Avstriya, Germaniya, Xitoy, Yaponiya, Janubiy Koreya, Braziliya va Ispaniya kabi mamlakatlar O‘zbekiston tashabbusiga hammuallif sifatida maydonga chiqdi. 

Aytish mumkinki, BMT Bosh Assambleyasi tomonidan ushbu rezolyusiyaning qabul qilinishi Yangi O‘zbekiston tomonidan yuritilayotgan ochiq, konstruktiv va inson manfaatlariga qaratilgan tashqi siyosatning, shuningdek, Davlatimiz rahbarining global tashabbuslari xalqaro maydonda yuksak e’tirof etilayotganining yaqqol isbotidir.

Source link

Xitoylarga nisbat beriladigan mashhur naql bor: «O‘tish davrida yashashdan Xudo saqlasin». Bu iboraning aniq manbasi bahsli bo‘lsa-da, uning mazmuni bugungi dunyo voqeligini juda aniq ifodalaydi. XXI asr xalqaro munosabatlari shunchalik murakkablashdiki, ertaga nima sodir bo‘lishini bashorat qilish tobora qiyinlashmoqda. Bir tomonda yirik davlatlar raqobati kuchaymoqda, boshqa tomonda yangi iqtisodiy va texnologik markazlar shakllanmoqda. Urushlar, sanksiyalar, savdo mojarolari va xavfsizlikka oid yangi tahdidlar xalqaro tizimni o‘zgartirib yubormoqda.

O‘zbekiston mustaqillikka erishganiga 35 yil bo‘ldi. Mamlakatning iqtisodiy yuksalish va tashqi ochiqlik yo‘li murakkab va ziddiyatli davrga to‘g‘ri kelmoqda. Bir qarashda atrofda xavf-xatarlar kam emas: shimolda geosiyosiy raqobat, janubda Afg‘oniston omili, sharq va g‘arbda esa turli iqtisodiy va siyosiy manfaatlar to‘qnashuvi mavjud. O‘zbekiston mana shunday murakkab muhitda muvozanatni saqlab qola olmoqda. Xo‘sh, bunga qanday erishmoqdamiz?

O‘zbekistonning geosiyosiy ahamiyati

Bugungi kunda Markaziy Osiyo muhim geosiyosiy hududlardan biri sifatida qaralmoqda. Mintaqa Sharq va G‘arbni, Shimol va Janubni bog‘lovchi strategik makonda joylashgan bo‘lib, tabiiyki, yirik davlatlar va iqtisodiy markazlarning diqqat markazida turibdi. O‘zbekiston mana shunday makonning markazida joylashgan davlatdir.

O‘zbekiston Markaziy Osiyoda barcha qo‘shni davlatlar bilan chegaradosh bo‘lgan yagona mamlakat bo‘lib, bu holat unga mintaqaviy integratsiya jarayonlarida muhim o‘rin tutish imkonini beradi. Shu bilan birga, aholi soni, iqtisodiy salohiyat va transport kommunikatsiyalari nuqtai nazaridan ham mamlakat mintaqaning asosiy davlatlaridan biri hisoblanadi.

O‘zbekistonning geografik joylashuvi uni Rossiya, Xitoy, Yevropa Ittifoqi, Turkiya, AQSh va Yaqin Sharq davlatlari manfaatlari kesishgan nuqtaga aylantirgan. Shu sababli mamlakat tashqi siyosatda biror kuch markaziga ortiqcha bog‘lanib qolmasdan, barcha hamkorlar bilan o‘zaro manfaatli munosabatlarni rivojlantirishga intilmoqda.

Geosiyosiy muvozanat siyosati

So‘nggi yillarda O‘zbekiston tashqi siyosatida ochiqlik va amaliy hamkorlik tamoyillari ustuvor ahamiyat kasb etdi. Mamlakat Rossiya bilan an’anaviy iqtisodiy va xavfsizlik sohalaridagi aloqalarni saqlab qolgan holda, Xitoy bilan investitsiya va infratuzilma loyihalarini kengaytirmoqda. Shu bilan birga, Yevropa davlatlari, Turkiya, Janubiy Koreya, Yaponiya hamda AQSh bilan ham munosabatlarni mustahkamlashga intilayotgani ko‘rinadi.

Bu yondashuvning asosiy maqsadi tashqi siyosiy manyovr imkoniyatlarini kengaytirish va milliy manfaatlarni himoya qilishdan iborat. Geosiyosiy muvozanat siyosati O‘zbekistonga xalqaro maydonda mustaqil qarorlar qabul qilish imkonini bermoqda.

Yangi mintaqaviy voqelik

Markaziy Osiyoda keyingi yillarda kuzatilayotgan muhim o‘zgarishlardan biri – mintaqa davlatlari o‘rtasidagi hamkorlikning kuchayishidir. Ilgari mavjud bo‘lgan ayrim siyosiy va iqtisodiy kelishmovchiliklar o‘rnini muloqot va o‘zaro ishonch egallamoqda.

O‘zbekiston ushbu jarayonning asosiy tashabbuskorlaridan biri sifatida namoyon bo‘ldi. Qo‘shni davlatlar bilan chegara masalalarining hal etilishi, savdo hajmining o‘sishi, transport yo‘laklarining rivojlanishi va suv-energetika sohasidagi hamkorlik mintaqada yangi voqelikni shakllantirmoqda.

Shu bilan birga, Afg‘onistondagi vaziyat, global iqtisodiy beqarorlik, oziq-ovqat va energetika xavfsizligi kabi muammolar Markaziy Osiyo davlatlaridan yanada yaqin hamkorlikni talab qilmoqda. Bu jarayonda O‘zbekiston mintaqaviy barqarorlik va iqtisodiy integratsiyani qo‘llab-quvvatlovchi muhim aktor sifatida ishtirok etmoqda.

Iqtisodiy diplomatiyaning ahamiyati

Hozirgi davrda geosiyosiy raqobat nafaqat harbiy va siyosiy sohada, balki iqtisodiy maydonda ham kechmoqda. Shu nuqtai nazardan, O‘zbekiston tashqi siyosatining muhim yo‘nalishlaridan biri iqtisodiy diplomatiya hisoblanadi.

Mamlakat xalqaro transport koridorlarini rivojlantirish, xorijiy investitsiyalarni jalb qilish va tashqi savdoni diversifikatsiya qilishga katta e’tibor qaratmoqda. Trans-Afg‘on temir yo‘li, «Sharq-G‘arb» va «Shimol-Janub» transport yo‘laklari kabi loyihalar O‘zbekistonning tranzit salohiyatini oshirishga xizmat qilishi kutilmoqda. Garchi mazkur tashabbuslar turli geosiyosiy, moliyaviy va boshqa omillar tufayli kutilgan sur’atlarda rivojlanmayotgan bo‘lsa-da, ularning strategik ahamiyati kamaygani yo‘q. Aksincha, global iqtisodiy aloqalar qayta shakllanayotgan bir paytda ushbu transport yo‘laklari nafaqat O‘zbekiston, balki butun Markaziy Osiyoning jahon bozorlari bilan bog‘lanishida muhim o‘rin tutishi mumkin.

Mazkur loyihalarning to‘liq amalga oshirilishi nafaqat iqtisodiy, balki geosiyosiy nuqtai nazardan ham muhim ahamiyat kasb etadi. Demak, ularning ro‘yobga chiqishi faqat vaqt masalasi bilan bog‘liq, deb ayta olamiz.

Xulosa

Tarix shuni ko‘rsatadiki, o‘tish davrlari davlatlar uchun ham sinov, ham imkoniyat hisoblanadi. Kimdir o‘zgarishlar qurboniga aylansa, kimdir aynan shu o‘zgarishlar orqali yangi taraqqiyot bosqichiga ko‘tariladi.

Bugun O‘zbekiston ana shunday tarixiy chorrahada turibdi. Mamlakatning ko‘p vektorli diplomatiyasi, qo‘shnichilik munosabatlariga tayangan mintaqaviy siyosati va iqtisodiy ochiqlik strategiyasi unga turli geosiyosiy kuchlar o‘rtasida muvozanat saqlash imkonini bermoqda. O‘zbekistonda amalga oshirilayotgan islohotlar samarasi ayniqsa tashqi siyosatda yaqqol ko‘rinyapti.

Yangi mintaqaviy voqelik sharoitida O‘zbekiston nafaqat Markaziy Osiyoning muhim davlatlaridan biri, balki Yevroosiyo makonida turli manfaatlarni uyg‘unlashtirishga qodir strategik ko‘prik sifatida ham shakllanmoqda. Demak, mamlakatning kelajakdagi muvaffaqiyati aynan shu nozik geosiyosiy muvozanatni qay darajada saqlab qola olishiga ham bog‘liq bo‘ladi.

Zafar QOSIMOV

Source link

O‘zbekiston Respublikasining Birinchi xonimi Ziroat Mirziyoyeva Qirg‘iz Respublikasi Birinchi xonimi Aygul Japarova hamda Ozarbayjon Respublikasi Birinchi xonimi Mehribon Aliyeva bilan birgalikda Qirg‘izistondagi mashhur “Altin balalik” reabilitatsiya markaziga tashrif buyurdilar. Mazkur oliy darajadagi tashrif uch qardosh mamlakat o‘rtasidagi ijtimoiy-gumanitar hamkorlik naqadar mustahkam ekanini yana bir bor namoyon etdi.

Tashrif davomida oliy martabali mehmonlar markazning faoliyati, bu yerda tarbiyalanuvchilar uchun yaratilgan zamonaviy shart-sharoitlar hamda tashkil etilgan mahorat darslari bilan yaqindan tanishdilar. Mehmonlar bolalar bilan samimiy muloqot qilib, ularning iste’dodiga yuqori baho berdilar. Tashrif davomida tashkil etilgan madaniy dastur barchaga o‘zgacha kayfiyat ulashdi: “Shattik” milliy raqs ansambli va yosh komuzchilar ijrosidagi chiqishlar mehmonlarda katta taassurot qoldirdi. Shuningdek, “Aqilman” iqtidorli bolalar prezident litseyi tarbiyalanuvchilari tomonidan loy va kigizdan tayyorlangan o‘ziga xos hunarmandchilik buyumlari ko‘rgazmasi namoyish etildi.

Shundan so‘ng oliy martabali mehmonlar markazning go‘zal sohil hududi va zamonaviy san’at galereyasini ko‘zdan kechirdilar. Mazkur galereyada Qirg‘izistonda o‘tkaziladigan bolalar ijodiyoti bo‘yicha xalqaro tanlovlar g‘oliblari, jumladan, o‘zbekistonlik yosh rassomlarning ham ijod namunalari taqdim etildi. Bu yosh iste’dodlarni qo‘llab-quvvatlash yo‘lidagi xalqaro hamkorlikning yorqin namunasidir.

Dasturning eng ta’sirli va ramziy voqealaridan biri O‘zbekiston, Qirg‘iziston va Ozarbayjon xalqlari o‘rtasidagi mustahkam do‘stlik ramzi bo‘lgan “Do‘stlik daraxti” nomli kigiz pannosiga yakuniy bezak elementini tushirish marosimi bo‘ldi. Ushbu hamkorlikdagi ijodiy ish uch mamlakat o‘rtasidagi madaniy yaqinlik va birodarlikni aks ettiradi. Tashrif yakunida Qirg‘iz Respublikasi Birinchi xonimi tomonidan O‘zbekiston Respublikasining Birinchi xonimiga qirg‘iz xalqining azaliy an’anaviy milliy musiqa asbobi — changqoʻbiz hurmat va ehtirom ramzi sifatida tuhfa qilindi.

Ushbu tashrif O‘zbekiston, Qirg‘iziston va Ozarbayjon o‘rtasidagi do‘stona aloqalar nafaqat siyosiy va iqtisodiy darajada, balki insonparvarlik, madaniyat va yosh avlod kelajagi yo‘lida ham izchil rivojlanib borayotganining yana bir yorqin isbotiga aylandi.

Source link

Markaziy Osiyo va Ozarbayjon davlat rahbarlarining norasmiy Maslahat uchrashuvi doirasida Issiqko‘l sohilida qurilgan yangi besh yulduzli «Boku» mehmonxonasining tantanali ochilish marosimi bo‘lib o‘tdi.

Marosimda davlat rahbarlari zamonaviy mehmonxona majmuasi bilan tanishib, mehmonlar dam olishi va xalqaro tadbirlarni yuqori saviyada o‘tkazish uchun yaratilgan infratuzilmani ko‘zdan kechirdilar.

Yangi mehmonxona majmuasi 17,2 gektar maydonda barpo etilgan. Uning asosini umumiy maydoni qariyb 30 ming kvadrat metr bo‘lgan yetti qavatli bino tashkil etadi.

Majmuada 120 dan ortiq xona, zamonaviy basseynlar, akvapark, sport maydonlari va turli ko‘ngilochar obyektlar joylashgan.

Source link

1997 yilda amerikalik mashhur siyosatshunos, AQSh prezidenti Jimmi Karter ma’muriyatida milliy xavfsizlik bo‘yicha maslahatchi bo‘lgan Zbignev Bjezinski o‘zining dunyo siyosiy tafakkuriga katta ta’sir ko‘rsatgan «Buyuk shaxmat taxtasi» kitobini yozdi.

Ushbu asarda muallif XXI asrdagi asosiy geosiyosiy raqobat Yevrosiyo hududida kechishini ta’kidlab, Markaziy Osiyoni ham ana shu katta o‘yinning muhim qismi sifatida baholagan edi.

Bjezinskiy Sovet Ittifoqi parchalanganidan keyin paydo bo‘lgan yangi mustaqil davlatlarning kelajagi haqida fikr yuritar ekan, mintaqadagi siyosiy beqarorlik, chegara muammolari, resurslar uchun raqobat va tashqi kuchlarning ta’siri kuchayishi mumkinligidan xavotir bildirgan.

Uning tahlillarida Markaziy Osiyo ikki tomonlama xavf ostida ko‘rilgan: bir tomondan, Rossiya, Xitoy va AQSh kabi yirik kuchlar manfaatlari to‘qnashadigan hudud sifatida; ikkinchi tomondan esa yangi mustaqil davlatlar o‘rtasida ichki ziddiyatlar kelib chiqishi mumkin bo‘lgan mintaqa sifatida.

Ammo oradan 25 yildan ortiq vaqt o‘tib, bugungi voqelik Bjezinskiy tasavvur qilgan ssenariydan ancha farq qilayotganini ko‘rsatmoqda.

Markaziy Osiyo tashqi kuchlar raqobati maydoni bo‘lib qolish o‘rniga, o‘z manfaatlari va umumiy taraqqiyotini belgilay oladigan mustaqil mintaqaviy makonga aylanib bormoqda. Xo‘sh, bunga nima sabab bo‘ldi? Axir darhaqiqat o‘z vaqtida Markaziy Osiyo davlatlari o‘rtasida kelishmovchiliklar bo‘lib o‘tgan va hatto chegaralar minalashtirilgan ediku. Qanday qilib mintaqa o‘zaro raqobatchi davlatlardan integratsiya sari dadil ketayotgan hududga aylandi?

Hammasi haqida bir boshdan.

«Shaxmat taxtasi» yozilgan davr: xavotirlar uchun asos bor edi

Bjezinskiy o‘z kitobini yozgan davrda Markaziy Osiyodagi siyosiy vaziyat haqiqatan ham murakkab edi. 1990-yillarda yangi mustaqil davlatlar davlatchilik institutlarini shakllantirayotgan, iqtisodiy islohotlarni amalga oshirayotgan va tashqi siyosatda o‘z o‘rnini belgilayotgan edi. Ularda sobiq ittifoqdan qolgan bir qator muammolar mavjud bo‘lgan.

Eng avvalo, bu – chegara masalalari edi. Sovet davrida respublikalar o‘rtasidagi ma’muriy chegaralar mustaqillikdan keyin xalqaro davlat chegaralariga aylandi. Aholi aralash yashaydigan hududlar, anklavlar va tarixiy bog‘liqliklar bu masalalarni murakkablashtirdi.

Ikkinchi omil – suv va energetika masalasi edi. Yuqori oqimdagi Tojikiston va Qirg‘iziston bilan quyi oqimdagi O‘zbekiston, Qozog‘iston va Turkmaniston o‘rtasida suv resurslaridan foydalanish bo‘yicha turli qarashlar mavjud edi.

Uchinchi omil – xavfsizlik muhiti edi. Afg‘onistondagi beqarorlik, terrorizm va ekstremizm tahdidi mintaqadagi xavflarni oshirardi.

Shu sababli ayrim tahlilchilar Markaziy Osiyoda nafaqat tashqi kuchlar raqobati, balki davlatlar o‘rtasida jiddiy qarama-qarshiliklar ham yuzaga kelishi mumkinligini taxmin qilgan. Ta’kidlash kerakki, Bjezinskiy xavotirlari asossiz emas edi. Haqiqatdan ham mustaqillikning dastlabki yillarida Markaziy Osiyo davlatlari o‘rtasida muammolar bo‘ldi.

O‘zbekiston, Qirg‘iziston va Tojikiston munosabatlarida chegaralar, transport, suv va xavfsizlik masalalari bo‘yicha jiddiy kelishmovchiliklar kuzatildi. Davlatlar o‘rtasidagi munosabatlar sovuqlashdi, chegaralar yopildi, aholi harakati cheklandi.

Ammo mintaqada Bjezinskiy yetarlicha baholay olmagan muhim omil mavjud edi – Markaziy Osiyo xalqlarining tarixiy yaqinligi va davlatlarning o‘zaro manfaatdorligidir. Mana shu jihatlar 2016 yildan boshlab bo‘y ko‘rsata boshladi.

O‘zbekiston omili: mintaqada yangi siyosiy muhit

Markaziy Osiyodagi o‘zgarishlar haqida gapirar ekanmiz, unda O‘zbekistonning o‘rnini alohida ta’kidlab o‘tishimiz lozim bo‘ladi. 2016 yilda Shavkat Mirziyoyev O‘zbekiston Prezidenti etib saylanganidan so‘ng mamlakat tashqi siyosatida yangi bosqich boshlandi.

Yangi rahbariyatning asosiy ustuvor yo‘nalishlaridan biri – qo‘shni davlatlar bilan munosabatlarni yaxshilash, ishonchni tiklash va yaxshi qo‘shnichilik muhitini yaratish bo‘ldi.

Bu yondashuvning asosiy g‘oyasi shundan iborat ediki – Markaziy Osiyodagi barqarorlik har bir davlatning alohida muvaffaqiyati emas, balki barcha mamlakatlarning umumiy manfaatidir. O‘zbekiston mintaqa markazida joylashgani va iqtisodiy hamda demografik salohiyati yuqori bo‘lgani sababli uning tashqi siyosati butun mintaqadagi muhitga katta ta’sir ko‘rsatdi.

Tojikiston va Qirg‘iziston bilan munosabatlarda burilish

Shavkat Mirziyoyev siyosati natijasida O‘zbekistonning Tojikiston va Qirg‘iziston bilan munosabatlarida sezilarli o‘zgarishlar yuz berdi. Ilgari murakkab bo‘lgan masalalar muzokara va o‘zaro manfaat asosida hal etila boshladi.

Chegara punktlari ochildi, savdo-iqtisodiy aloqalar kengaydi, xalqlar o‘rtasidagi munosabatlar tiklandi. Bu jarayon nafaqat ikki tomonlama aloqalarni yaxshiladi, balki butun Markaziy Osiyoda yangi siyosiy ishonch muhitini shakllantirdi.

Eng muhimi – davlatlar bir-birini xavf yoki raqib sifatida emas, balki taraqqiyot sherigi sifatida ko‘ra boshladi.

Hamkorlik – tashqi kuchlar o‘yiniga qarshi eng muhim kafolat

Bjezinskiyning asosiy tahlilida Markaziy Osiyo ko‘p jihatdan tashqi kuchlar manfaatlari kesishadigan hudud sifatida ko‘rilgan edi. Darhaqiqat, mintaqa Rossiya, Xitoy, AQSh, Yevropa Ittifoqi va boshqa kuchlar uchun strategik ahamiyatga ega.

Ammo bugungi tajriba shuni ko‘rsatmoqdaki, tashqi kuchlar raqobatiga qarshi turishda eng muhim omil – mintaqaning ichki birligi va davlatlar o‘rtasidagi hamkorlikdir. Agar Markaziy Osiyo davlatlari o‘zaro kelisha olmasa, tashqi kuchlarga mintaqadagi ta’sir uchun raqobat qilish osonlashadi.

Aksincha, davlatlar umumiy manfaatlar asosida harakat qilsa, mintaqa tashqi raqobat obyekti emas, mustaqil siyosiy subyektga aylanadi. Shu ma’noda, Markaziy Osiyo davlatlari o‘rtasidagi hamkorlik nafaqat iqtisodiy taraqqiyot, balki geosiyosiy mustaqillikning ham muhim omilidir.

Yangi Markaziy Osiyo modeli

So‘nggi yillarda shakllangan yangi mintaqaviy model aynan shu tamoyilga asoslanmoqda.

Uning asosiy xususiyatlari:

– yaxshi qo‘shnichilik;
– o‘zaro ishonch;
– umumiy muammolarni birgalikda hal qilish;
– tashqi kuchlar o‘rtasidagi raqobatda mustaqil pozitsiyani saqlash.

Bu jarayon Markaziy Osiyo davlatlari rahbarlarining Maslahat uchrashuvlari shakllanishiga olib keldi. Ushbu format davlatlarga o‘z muammolarini o‘zlari muhokama qilish va umumiy qarorlar ishlab chiqish imkonini berdi. Keyinchalik bu hamkorlik Ozarbayjon bilan munosabatlar orqali yanada kengaydi. Markaziy Osiyo va Ozarbayjon o‘rtasidagi yaqinlashuv transport, savdo, energetika va strategik hamkorlik sohalarida yangi imkoniyatlar yaratmoqda.

Xulosa: Bjezinskiyning shaxmat taxtasi o‘zgardi

Bjezinskiy o‘z davri uchun muhim va chuqur tahlil bergan edi. U Markaziy Osiyoning strategik ahamiyatini to‘g‘ri baholadi. Ammo u mintaqaning eng muhim kuchini – davlatlarning o‘zaro yaqinlashish va hamkorlik qilish salohiyatini to‘liq hisobga olmadi.

Bugun Markaziy Osiyo urush va raqobat ehtimoli yuqori bo‘lgan hudud emas, balki hamkorlik va umumiy taraqqiyot g‘oyasi kuchayib borayotgan mintaqadir. Bu o‘zgarishda O‘zbekistonning yangi tashqi siyosati, ayniqsa Shavkat Mirziyoyevning yaxshi qo‘shnichilik va ochiq muloqotga asoslangan yondashuvi ham muhim o‘rin tutdi. Shuningdek, Mirziyoyevning tashabbusini qo‘llab quvvatlagan qo‘shni davlatlar yetakchilarini ham alohida e’tirof etish lozim.

Bjezinskiyning «shaxmat taxtasi»dagi Markaziy Osiyo katta kuchlar o‘yinining maydoni edi. Bugun esa u tobora ko‘proq o‘z taqdirini o‘zi belgilayotgan, hamkorlikka asoslangan mustaqil mintaqaviy markazga aylanmoqda.

Zafar QOSIMOV

Source link