Siyosat
O‘zbekiston uchun nimalar muhim? (video)
Bugungi dunyoda xalqaro siyosat shiddat bilan o‘zgarmoqda. Bir tomonda geosiyosiy raqobat kuchaysa, ikkinchi tomonda esa yangi iqtisodiy va xavfsizlik masalalari kun tartibiga chiqmoqda. 2025-2026 yillar xalqaro munosabatlar uchun alohida ahamiyatga ega bo‘lmoqda.
Jumladan, bu yil Amerika Qo‘shma Shtatlari mustaqilligining 250 yilligini nishonlaydi, bu nafaqat tarixiy sana, balki AQShning kelajakdagi global maqsadlarini belgilab berish nuqtai nazaridan ham muhim voqea hisoblanadi.
Shuningdek, bugun har bir uchrashuv, sammitlarda xavfsizlik, mudofaa xarajatlari va yangi tahdidlarga qarshi kurash masalalari muhokama qilinyapti.
Bunday jarayonlar fonida O‘zbekistonning tashqi siyosati, AQSh va Yevropa Ittifoqi bilan munosabatlari, Markaziy Osiyoning xalqaro maydondagi o‘rni haqida ham ko‘plab savollar paydo bo‘lmoqda.
Ana shu dolzarb mavzular yuzasidan siyosatshunos olim, ekspert Sayfiddin Jo‘rayev bilan suhbatlar davom etadi.
Ekspertdan:
– Amerika Qo‘shma Shtatlari mustaqilligining 250 yilligi yubileyi, AQSh tashqi siyosatining asosiy ustuvor yo‘nalishlari nimalardan iborat ekanligi, Markaziy Osiyo, jumladan O‘zbekiston bu siyosatda qanday o‘rin tutishi haqida fikrlarini so‘radik.
Bundan tashqari keyingi yillarda O‘zbekiston-AQSh munosabatlari yangi bosqichga ko‘tarilayotgani hamkorlikning eng istiqbolli sohalari, Yevropa Ittifoqi qanday asosiy sinovlar oldida turgani, iqtisodiy raqobat, migratsiya, xavfsizlik va energetika kabi masalalar bo‘yicha vaziyatni qanday baholashi bilan qiziqdik.
Suhbat davomida yangi siyosiy fikrlar qarama-qarshiligi bo‘layotgan bir paytda O‘zbekiston qanday tashqi siyosiy yondashuvni saqlab qolishi muhimligi haqida ham fikrlar bildirildi.
Xalqaro siyosatda kechayotgan jarayonlar endi faqat yirik davlatlar taqdiriga emas, balki har bir mamlakatning taraqqiyoti va xavfsizligiga ham bevosita ta’sir ko‘rsatmoqda. AQShning 250 yilligi, NATO va Yevropa Ittifoqi doirasida qabul qilinayotgan qarorlar, xalqaro munosabatlardagi yangi tendensiyalar – bularning barchasi kelajak dunyo tartibotini shakllantiruvchi muhim omillardir.
Eng muhimi, O‘zbekiston ham bu jarayonlarni kuzatuvchi emas, balki xalqaro maydonda o‘z o‘rniga ega bo‘lgan faol ishtirokchi sifatida harakat qilmoqda.
Bugun, 25-sentyabr kuni O‘zbekiston Prezidenti Shavkat Mirziyoyev Xitoy Xalqaro madaniy kommunikatsiya markazi raisi Long Yuysyan va Gonkongning «JDB Group» kompaniyasi asoschisi Chan Xuntoni qabul qildi. Bu haqda Prezident matbuot xizmati xabar berdi.
Qayd etilishicha, O‘zbekiston bilan Xitoy o‘rtasidagi barcha sharoitlarda har tomonlama strategik sheriklik munosabatlarini yanada chuqurlashtirish va madaniy-gumanitar aloqalarni mustahkamlash masalalari ko‘rib chiqildi.
Markaz O‘zbekistonning Xitoy bilan ko‘p qirrali hamkorligini mustahkamlashga katta hissa qo‘shib kelayotgani qayd etildi. Birgalikda infratuzilmani rivojlantirish, investitsiyalar va «yashil» sanoat sohalarida qator loyihalar amalga oshirildi.
«JDB Group» kompaniyasining O‘zbekistondagi faoliyatining ustuvor yo‘nalishlari sifatida zamonaviy shahar, transport va sanoat infratuzilmasini rivojlantirish hamda geologiya sohasi belgilandi.
Uchrashuv yakunida mazkur kompaniya ishtirokida amalga oshirilayotgan va yangi loyihalarni jadallashtirish yuzasidan kelishuvga erishildi.
Siyosat
Saida Mirziyoyeva Diyene Keyta bilan demografik barqarorlik va inson kapitali bo‘yicha hamkorlikni muhokama qildi
O‘zbekiston Respublikasi Prezidenti Administratsiyasi rahbari Saida Mirziyoyeva BMT Bosh kotibi o‘rinbosari, BMT Aholishunoslik jamg‘armasi (UNFPA) ijrochi direktori Diyene Keyta bilan uchrashdi.
Muloqotda demografik barqarorlik, inson kapitali va aholi farovonligini ta’minlash bo‘yicha hamkorlikni yanada rivojlantirish masalalari muhokama qilindi.
Saida Mirziyoyeva O‘zbekistonning asosiy kapitali yosh avlod ekanini ta’kidladi. U demografik salohiyatni kelgusida dividend manbaiga aylantirish uchun inson, ayniqsa, ayollar va bolalarning salomatligi, ta’limi hamda xavfsizligiga investitsiya kiritish zarurligini bildirdi.
Saida Mirziyoyeva o‘zining Telegram kanalida demografik prognozlash tizimini yo‘lga qo‘yilayotganini ma’lum qildi. Shuningdek, «Demografik dividend — 2050» strategiyasini ishlab chiqish rejalashtirilayotganini aytdi.
Tomonlar demografik barqarorlikni faqat aholi soni bilan bog‘liq masala sifatida emas, balki ta’lim, sog‘liqni saqlash, bandlik, ijtimoiy himoya va oilalarni qo‘llab-quvvatlashni qamrab oladigan uzoq muddatli taraqqiyot masalasi sifatida ko‘rish zarurligini ta’kidladi.
Shuningdek, demografik ma’lumotlar va tahliliy prognozlar asosida qarorlar qabul qilish hamda inson kapitali va ijtimoiy xizmatlarga investitsiyalarni kuchaytirish bo‘yicha xalqaro hamkorlikni rivojlantirish masalalari muhokama qilindi.
Muloqotda aholining farovonligini oshirish va demografik jarayonlarni samarali boshqarishda ma’lumotlar hamda prognozlarning ahamiyatiga e’tibor qaratildi.
Prezident administratsiyasi rahbari Saida Mirziyoyeva Nyu-Yorkda «BlackRock» rahbariyati bilan uchrashdi.
Unda kompaniya prezidenti Robert Kapito, vitse-rais Tomas Donilon, «Global Infrastructure Partners» raisi va bosh ijrochi direktori Adebayo Ogunlesi, Moliyaviy va strategik investorlar guruhi global rahbari hamda kompaniyaning Yaqin Sharq mintaqasi bo‘yicha rahbari Charlz Hatami qatnashdi.
Muloqot davomida 2027-yilda Toshkent xalqaro moliya markazi faoliyatini yo‘lga qo‘yish masalasini muhokama qilindi. «BlackRock» ushbu Markaz konsepsiyasi va tuzilmasini ishlab chiqishda ko‘maklashmoqda.
AQSh ishbilarmon doiralari vakillari ishtirokidagi qo‘shma davra suhbatida O‘zbekiston hamda mintaqamizning yaqin o‘n yilliklarga mo‘ljallangan rivojlanish istiqbollari yuzasidan fikr almashildi.
O‘zbekiston yirik, samarali, sifatli sarmoyalar uchun yangi imkoniyatlar maydoniga aylanmoqda, dedi Saida Mirziyoyeva.
Mudofaa vaziriga ikki o‘rinbosar tayinlandi. Bu haqda vazirlik matbuot xizmati xabar berdi.
Jumladan, Prezidentning tegishli qaroriga muvofiq, polkovnik Zoidov Qahramonjon Obidjonovich O‘zbekiston mudofaa vazirining qurollanish va qurollantirish bo‘yicha o‘rinbosari lavozimiga tayinlandi.
Adliya polkovnigi Muratov Jahongir Dilshatovich vazirning komplayens va korrupsiyaga qarshi ichki nazorat bo‘yicha o‘rinbosari lavozimiga tayinlandi.
Prezident Shavkat Mirziyoyev Andijon viloyatiga tashrif buyuradi.
Ikki kunlik safar dasturidan hududning sanoat va investitsiya salohiyati, energetika, qishloq xo‘jaligi, transport, turizm va boshqa sohalardagi loyihalar bilan tanishish o‘rin olgan. Davlatimiz rahbari mahallalardagi bunyodkorlik ishlarini ham ko‘zdan kechiradi. Qator yangi quvvatlarni ishga tushirish va istiqbolli loyihalar qurilishini boshlash ko‘zda tutilgan.
Shuningdek, Andijon viloyatini yanada rivojlantirishning ustuvor yo‘nalishlari muhokamasiga bag‘ishlangan yig‘ilish bo‘lib o‘tadi.
