Londonning «Arsenal» klubi 2025/2026-yilgi mavsumda Angliya Premer-ligasi chempioniga aylandi.

Seshanba, 19-may kuni eng yaqin ta’qibchi — «Manchester Siti» «Bornmut» bilan 1:1 hisobida durang o‘ynadi va Mikel Arteta jamoasi mavsum tugashiga bir tur qolganda uzoq kutilgan chempionlikka erishdi.

Mikel Arteta — Pep Gvaridiola («Manchester Siti» bosh murabbiysi)ning shogirdi. Arteta 2019-yilning dekabrida, Unai Emeridan so‘ng, «Arsenal»ni qabul qilib olgan. Uning boshchiligida jamoa uch mavsumda ketma-ket ikkinchi o‘rinni egalladi va joriy mavsumning katta qismida peshqadamlikni o‘z qo‘lida ushlab turdi.

Bu zafar «Arsenal» tarixidagi 14-APL chempionligi bo‘ldi. «Arsenal»ning bundan oldingi chempionligi 2003/2004-yilgi mavsumda, ya’ni roppa-rosa 22 yil avval qo‘lga kiritilgan edi. O‘sha mavsum futbol tarixiga kirgan, chunki Arsen Venger boshchiligidagi o‘sha jamoa chempionat davomida biror marta ham mag‘lubiyatga uchramay (26 g‘alaba va 12 durang bilan) chempion bo‘lgan va «Yengilmas jamoa» nomini olgan.

Source link

«Aston Villa» uning boshqaruvida 1982 yildan buyon ilk bor yevrokubokni qo‘lga kiritdi.

«Frayburg» – «Aston Villa» 0:3

Gollar: Tilemans, 41 (0:1). Buendiya, 45+3 (0:2). Rodjyers, 58 (0:3)

«Frayburg»: Atubolu, Linhart (Rozenfelder, 61), Ginter, Troy, Kyubler (Makengo, 73), Eggeshtayn, Hefler (Heler, 61), Manzambi, Grifo (Sherhant, 73), Beste (Gunter, 86), Matanovich

«Aston Villa»: Martines, Konsa, Pau Torres (Mings, 88), Din (Matsen, 81), Kesh, Lindelyof (Onana, 66), Tilemans (Duglas Luis, 88), Rodjyers, Buendiya (Sancho, 81), Makginn, Uotkins

Ogohlantirishlar: Troy, 5 – Buendiya, 15. Kesh, 21. Makginn, 84

Unai Emeri bungacha besh marta Yevropa Ligasi finallarida qatnashgan. Va shundan to‘rttasida g‘olib chiqqan («Sevilya» bilan uch marta, «Vilyarreal» bilan bir marta. «Arsenal» bilan finalga chiqqanida esa «Chelsi»ga yutqazgan).

«Frayburg»ga qarshi bu safargi finalda ham uning jamoasi favorit edi: finalga chiqqan jamoalarning moliyaviy imkoniyatlari ham, tarkibdagi futbolchilar darajasi ham bir-biridan uzoq edi. «Aston Villa» zaxira o‘rindig‘idagi futbolchilarning ko‘pchiligi «Frayburg»ning asosiy tarkibiga kira olgan bo‘lardi. Nemislar jamoasi boshlang‘ich tarkibidan o‘z tarbiyalanuvchilaridan yetti nafari o‘rin olgandi. O‘yindagi ilk zarbani aynan nemislar jamoasi yetakchilaridan biri Matanovich yo‘lladi. Bu zarba u qadar xavfli chiqmadi. Rodjyersning javob zarbasini qaytarish uchun esa darvozabon Atubolu o‘z mahoratini ishga solishi talab etildi.

Shundan keyin «Frayburg» tashabbusni to‘liq topshirdi. O‘z bu jamoa Bundesligada ham to‘pga egalik qilish bo‘yicha maqtana olmaydi. Yulian Shuster shogirdlari to‘pni jarima maydoniga qanotlardan va standart vaziyatlardan yetkazib berishga urg‘u qaratadi. Aynan shunday uzatmalardan biridan keyin Hefler to‘p uchun kurashda yutib chiqdi va olis burchak tomon xavfli zarba yo‘lladi, ammo zarbaga aniqlik yetishmadi.

Maydonda raqiblar bir-birini ayamay yakkakurashlarga kirishdi va 20-daqiqagacha bosh hakam cho‘ntagidan uch marta sariq kartochkasini chiqarishiga to‘g‘ri keldi. Bu kartochkalardan biri qizil bo‘lishi ham mumkin edi, ammo Metti Kesh Grifoga qarshi o‘ta qo‘pol harakat qilganida og‘ir jazodan qutulib qoldi.

Umuman, 40-daqiqagacha jamoalar ancha ehtiyotkorlik bilan harakat qildi va riskka bormadi. «Villa»ning bu vaqt oralig‘idagi to‘rtta zarbasidan ikkitasi himoyachilar tomonidan to‘sildi.

41-daqiqada esa inglizlar burchak zarbasini a’lo darajada ijro etishdi. Bu uyda tayyorlangan vazifa edi: to‘p yerdan o‘ynaldi, Rodjyers to‘pni jarima maydoni tashqarisida bo‘sh turgan Tilemansga oshirdi va belgiyalik yarimhimoyachi to‘pni to‘xtatmasdan kuchli zarba yo‘lladi.

Va «Aston Villa» bu bilan to‘xtamadi. Birinchi bo‘limga qo‘shib berilgan daqiqalarda Buendiya hech qanday qarshilikka uchramasdan raqib jarima maydoniga yaqinlashib bordi va chap oyog‘ida aylanma zarbasi bilan olis to‘qqizlikni aniq nishonga oldi.

Birminghemliklar bu mavsumda yigirmata golini jarima maydoni tashqarisidan urishdi va Angliyaning ulardan boshqa hech bir jamoasi bunday ko‘rsatkich bilan maqtana olmaydi.

Ikkinchi bo‘lim boshida esa «Frayburg» to‘liq kuch bilan oldinga o‘tganida qarshi hujumda navbatdagi golni o‘tkazib yubordi. Din, Buendiya ishtirokidagi ushbu hujumni himoyachilardan ildamroq harakat qilgan Rodjyers gol bilan yakunladi. 3:0 – bu endi nokaut edi.

O‘yinning qolgan qismida Yulian Shusterning yangi kuchlarni maydonga tashlashi hech narsani o‘zgartira olmadi. Buyog‘iga «Villa» saviyadagi yaqqol farqni namoyish etib, yirik hisobdagi g‘alabani ushlab qoldi.

Emeri yana bir bor Yevropa Ligasida kim xo‘jayin ekanini namoyish etdi. «Villa» esa uning boshqaruvida 1996 yildan buyon ilk sovrinini (Angliya ligasi kubogi) qo‘lga kiritdi. Shuningdek, ushbu sovrin birminghemliklar uchun 1982 yildan buyon qo‘lga kiritilgan ilk yevrokubok bo‘ldi, o‘shanda inglizlar jamoasi Yevropa chempionlari kubogi (hozirgi YeChL) g‘olibi bo‘lishgandi.

Klub muxlisi bo‘lgan shahzoda Uilyam o‘yinni tribunadan turib kuzatdi va g‘alabani nishonladi

Bundan tashqari, endi jamoa APLda nechanchi o‘rinni egallashidan qat’i nazar keyingi mavsumda YeChLda ishtirok etadi. «Frayburg» esa asosiy Konferensiyalar ligasida imkoniyatini sinab ko‘radi.

Source link

Angliyaning “Aston Villa” klubi UYeFA Yevropa ligasi finalida Germaniyaning “Frayburg” jamoasini 3:0 hisobida mag‘lub etib, musobaqa g‘olibiga aylandi. Birminhemliklar shu tariqa klub tarixida ilk bor mazkur turnir kubogini qo‘lga kiritdi.

Final uchrashuvi Turkiyaning Istanbul shahridagi “Tuprash” stadionida bo‘lib o‘tdi. Hisob 41-daqiqada ochildi — “Aston Villa” yarim himoyachisi Yuri Tilemans burchak to‘pidan keyin raqib darvozasini ishg‘ol qildi.

Birinchi bo‘limga qo‘shib berilgan vaqtda hujumchi Emiliano Buendiya ingliz klubining ustunligini ikki baravarga oshirdi. Uchrashuvning 58-daqiqasida esa Morgan Rojyers jamoasining uchinchi golini kiritib, yakuniy hisobni o‘rnatdi.

“Frayburg” yarim finalda Portugaliyaning “Braga” klubini ikki o‘yin natijasiga ko‘ra 4:3 hisobida mag‘lub etgan edi. “Aston Villa” esa ushbu bosqichda “Nottinhem Forest”dan 4:1 hisobida ustun kelgan.

“Aston Villa” uchun bu so‘nggi 44 yil ichidagi ilk yirik Yevropa trofei bo‘ldi. Klub bundan avval 1982 yilda Yevropa chempionlar kubogini qo‘lga kiritgan va finalda Germaniyaning “Bavariya” jamoasini 1:0 hisobida mag‘lub etgan edi.

“Frayburg” esa o‘z tarixida birinchi marta Yevropa klub musobaqasi finalida ishtirok etdi.

UYeFA Yevropa ligasi 1971 yildan buyon o‘tkazib kelinadigan musobaqa bo‘lib, Yevropa chempionlar ligasidan keyingi nufuzi bo‘yicha ikkinchi yirik klub turniri hisoblanadi.

Source link

Tarixiy voqea – futbol bo‘yicha O‘zbekiston milliy terma jamoasining FIFA 2026 Jahon chempionatiga yo‘llanma olganiga bag‘ishlangan ushbu rolik O‘zbekiston futbol assotsiatsiyasi bilan hamkorlikda tayyorlangan.

Kompaniyaning boshlanishi Coca-Cola kompaniyasining O‘zbekistondagi faoliyatida bir nechta muhim “ilk” qadamlar bilan yodda qoldi:

Coca-Cola O‘zbekiston ilk bor to‘laligicha mamlakatimizda suratga olingan, futbolga bag‘ishlangan televizion rolikni (TVC) tayyorladi. Unda asosiy e’tibor milliy jamoamiz va muxlislarning samimiy hissiyotlariga qaratilgan.

Coca-Cola ilk marta O‘zbekiston futbol assotsiatsiyasining (O‘FA) rasmiy uzoq muddatli hamkoriga aylandi. Bu hamkorlik kompaniyaning mamlakatda futbol rivojini qo‘llab-quvvatlashga intilishini aks ettiradi va bir musobaqa doirasidan ancha kengdir.

Shu bois reklama kampaniyasi uchun “Ilk lahzalar Coca-Cola bilan birga” shiori tanlandi. “…Ilk bor afsonalarimiz boshlab bergan yo‘l bizni jahon sahnasiga olib chiqdi; ilk bor maydonga faqat 11 nafar o‘yinchi emas, 38 million kishi chiqmoqda; ilk bor har bir o‘yin bizni katta bayram kabi bir joyga jamlamoqda…” — degan so‘zlar kadr ortidan yangraydi.

Reklama roligida jamoa murabbiyi Fabio Kannavaro boshchiligidagi milliy terma jamoa o‘yinchilari ishtirok etishdi. Kampaniya uchun musiqiy hamrohlikni Sevara Nazarxon ijro etdi va uning ishtiroki sport, madaniyat va milliy iftixor uyg‘unligining ramziga aylandi.

Yangi kampaniya bugun butun mamlakat bo‘ylab millionlab muxlislar o‘zaro baham ko‘rayotgan milliy g‘urur, hamjihatlik va hayajon timsoliga aylandi. Rolik ushalgan orzu hamda butun O‘zbekistonni dunyoning eng muhim futbol musobaqasi atrofida birlashtirgan lahza haqida hikoya qiladi. Unda futbol uchrashuvi chinakam shodlik, birdamlik va umumiy iftixor bayramiga aylanadi. Kampaniya ko‘pchilik uchun bu tarixiy lahza yirik milliy futbol tadbiridagi ilk tajriba bo‘lishi mumkinligini va Coca-Cola aynan shunday muhim “ilk” onlar ishtirokchisi bo‘lishga intilishini ta’kidlaydi.

Rolik allaqachon milliy telekanallarda namoyish etilmoqda va raqamli medialarda mavjud: Instagram

FIFA 2026 Jahon chempionati arafasida Coca-Cola, shuningdek, O‘zbekiston milliy terma jamoasini kuzatishga bag‘ishlangan keng ko‘lamli marosimning asosiy hamkorlaridan biri sifatida ishtirok etadi va jahon birinchiligidagi tarixiy ishtiroki oldidan jamoani qo‘llab-quvvatlash uchun minglab muxlislarni birlashtiradi.

 Reklama huquqi asosida

Source link

Bu ro‘y berishi kerak edi.

Yigirma ikki yillik kutish, olti yillik tayyorgarlik: nihoyat Premiyer-liga g‘olibligi yana «Arsenal»ga qaytdi. «Sport-Ekspress» jurnalisti Ruslan Nepushkin «Arsenal» bosh murabbiyi Mikel Arteta nihoyat chempionlikka erishish uchun nimalarga e’tibor qaratgani haqida yozdi.

Zerikarli, quruq, avtobus, haramfutbol – «Arsenal» o‘yinlari haqida boshqa klub muxlislari shunday so‘zlar aytib kelishdi. Ha, Mikel Arteta oltin medallar uchun chiroyli o‘yindan voz kechdi. U romantik futbolni bir chetga surib, surbetlik, hisob-kitob va shafqatsizlikni targ‘ib qildi. Chunki Mikel shuni tushunib yetgandi: luzer qolipini buzish va doimo kulgi bo‘ladigan jamoa bilan muvaffaqiyatga erishish uchun hammaga yoqishni bas qilish va mayda detallarga e’tibor qaratish kerak.

Temir intizom

Hissiy beqarorlik ancha vaqt davomida «Arsenal»ning tashrif qog‘ozi bo‘lib kelgandi. Ahmoqona chetlatilishlar, hakamlar bilan bahslashuvlar, tajovuzkor harakatlar – bularning barchasi o‘tgan yillarda jamoani muhim ochkolardan quruq qoldirgan. Bu mavsumda esa muxlislar o‘ta tartibli jamoaga guvoh bo‘lishdi: hech kim jahl qilib to‘pni tepib yubormadi, futbolchilar maydonda raqiblarning provokatsiyalariga uchmadi va qo‘pol podkatlardan o‘zini tiydi. Buni raqamlarda ham ko‘rish mumkin – futbolchilarga 37 tur davomida birorta qizil kartochka ko‘rsatilmadi, jamoa sariq kartochkalar soni kamligi bo‘yicha ham eng yaxshi ko‘rsatkichlardan birini qayd etgan. O‘ta shafqatsiz bosim ostida futbolchilar o‘zini o‘zi nazorat qilish bo‘yicha namuna ko‘rsatdi. Atrofdagi hamma o‘yin uslubini qattiq tanqid ostiga olib, nafratini sochayotganida ular his-tuyg‘ularini jilovlay olish orqali yetuklikka erishganini namoyish etishdi.

Standartlar inqilobi

Arteta Angliya futbolida standart vaziyatlar inqilobi boshlanayotganini o‘z vaqtida his qildi va shu bo‘yicha ixtisoslashgan murabbiyni klubiga taklif etdi – Nikolya Jover Mikelning g‘oyalariga ishondi va «Manchester Siti»dan ashaddiy raqib safiga ko‘chib o‘tdi. Jover standart vaziyatlar bo‘yicha ishlashda to‘liq erkinlikka ega bo‘ldi va bu mavsumda jamoa bu borada ideal holatga keldi. «Arsenal» Yevropada burchak zarbalaridan eng ko‘p gol urgan jamoaga aylandi, raqiblar bu uslubga moslashganida esa standart vaziyatlarni yangicha ijro etishga o‘tdi. Va bu ham natija keltirdi. Artetaning murabbiylar shtabi ishni shunday bajardiki, raqiblar burchak zarbalaridan xuddi penaltidan qo‘rqqandek qo‘rqib qolishdi. Ko‘pchilik futbol muxlislariga bunday o‘yin yoqmasligi mumkin, ammo yodda tutish kerakki, «Arsenal» APLda o‘ynaydi, bu yerda esa klassik inglizcha uslubda kerakli natijaga ega bo‘lish hech qanday ayb emas.

Intrigani o‘ldirish

«Arsenal» bu mavsumda 19 ta o‘yinda darvozasi daxlsizligini saqlab qoldi. O‘tgan mavsumlarda jamoa ko‘p o‘yinlarda hisobda ortda bora turib, natijani qo‘ldan boy bergandi. Bu mavsumda esa londonliklar aksar o‘yinlarda hisobni ochib olganidan keyin amalda o‘yin taqdiri hal bo‘ldi. «Arsenal» APLning bu mavsumida sakkiz marta 1:0 hisobida g‘alaba qozondi. Fanatlar minimal farq tufayli xavotirda o‘tirgan bo‘lishsa-da, maydonda barchasi nazorat ostida edi. Jamoa maksimal xavfsiz rejimni yoqdi: tempni bir maromda ushlash uchun to‘pga egalik qilish, raqib qarshi hujum boshlayotganida kichik taktik follar ishlatish, autlar ijro etish vaqtida tanaffuslar bilan nafas rostlash. «Arsenal» o‘yinni qismlarga ajratib, so‘nggi daqiqalarni zerikarli, ammo maksimal darajada foydali tomoshaga aylantirdi. Shu bilan birga, jamoa avtobus qo‘yib o‘ynamadi: ha, jamoa o‘yinni «o‘ldirish» bilan shug‘ullandi, lekin o‘z jarima maydoniga qamalib olgani yo‘q.

Tarkib kengligi

Arteta bir necha yildan buyon APLda birinchi o‘rin uchun kurashib kelayotgandi. Jamoaning oldingi mavsumlardagi muvaffaqiyatsizliklari ko‘p jihatdan zaxira o‘rindig‘i qisqaligi bilan bog‘lanardi – bir-ikki asosiy ijrochi safdan chiqsa, o‘yin sifati tushib ketardi. Ketma-ket muvaffaqiyatsizliklardan keyin Mikel bunday tig‘iz taqvimda ikkita teng kuchli tarkibsiz titul uchun kurashib bo‘lmasligini tushunib yetdi. Mavsumlar oralig‘ida jamoada yangi sport direktori paydo bo‘ldi – Andrea Berta Londonda chempionlik jamoasini qurishni yakunlash uchun «Atletiko»ni tashlab keldi. «Arsenal» katta pul sarfladi, ammo kerakli bo‘shliqlarni yopa oldi. Natijada mavsum davomidagi muntazam jarohatlar jamoa o‘yiniga jiddiy ta’sir ko‘rsatmadi, Artetaning ixtiyorida amalda ham ikkita teng kuchli tarkib hosil bo‘lgandi.

Chempion «Arsenal» safida yagona asosiy qahramonni ajratib ko‘rsatib bo‘lmaydi. Subimendi mavsumning birinchi yarmida yuqori saviyadagi o‘yin ko‘rsatdi, ammo mavsum oxiriga kelib toliqib qoldi va uning o‘rnini Lyuis-Skelli yopa oldi. Saka vaqti-vaqti bilan yorqin o‘yin ko‘rsatdi, u formada emasligida Madueke uning o‘rnini bilintirmadi. Inkapiye Kalafiori jarohat olib safdan chiqqanida xuddi uning darajasida o‘ynab berdi. Yokeresh alohida o‘yinlarda o‘zini ko‘rsatdi va kerakli ochkolar to‘planishini ta’minladi, Havers esa deyarli butun mavsumni jarohat tufayli o‘tkazib yuborganiga qaramay, mavsum oxirida hal qiluvchi gollarni urdi. Butun mavsum davomida barqaror o‘ynaganlar ham bor: Rays, Rayya, Saliba va Gabriel bog‘lami. Bu futbolchilar jiddiy jarohatlardan qutulib qolishdi va butun chempionatni yuqori darajada o‘tkazishdi. «Arsenal» chempionlik poygasida individual shaxsiyatlar hisobiga emas, balki jamoaviy ish orqali g‘olib chiqdi.

Artetaga endi «Emireyts» atrofida haykal qo‘ysa ham bo‘ladi. U «cho‘kayotgan» klubga kelgandi. Ilk mavsumlarini jamoa kiyim almashtirish xonasini toksik va «quloqsiz» futbolchilardan tozalashga sarfladi, keyin esa o‘z orzusidagi jamoani qurishga kirishdi. So‘nggi yillarda «Arsenal» kuchli oltilik jamoalariga qarshi mag‘lubiyatsiz seriya qayd etdi, jami to‘plangan ochkolar soni bo‘yicha birinchi edi, ammo buyuklikni isbotlash uchun oxirgi qadam qolayotgandi. Endi bu qadam tashlandi va boshqa jamoalar muxlislari uni e’tirof etishi qiyin bo‘lsa-da, Shimoliy Londondagi muxlislar undan norozi emasligi aniq. Ko‘pchilikda shunday hissiyot borki, uzoq kutilgan tituldan keyin «Arsenal» yelkasidan tog‘ ag‘darildi va endi keyingi mavsumda biz butunlay boshqa jamoani ko‘ramiz.

Source link