O‘zbekistonda qayta tiklanuvchi energiya manbalari quvvati 8 gigavattga yetdi. Bu haqda «O‘zbekiston 24» telekanalida efirga uzatilgan tahliliy ko‘rsatuvda ma’lum qilindi.

Qayd etilishicha, hozirgi kunda mamlakatda umumiy quvvati 8 gigavatt bo‘lgan yirik «yashil» energiya manbalari faoliyat yuritmoqda.

Shundan 5,6 gigavatti quyosh va shamol elektr stansiyalari hamda 2,4 gigavatti esa gidroelektr stansiyalari hissasiga to‘g‘ri keladi.

Ma’lumotlarga ko‘ra, 2026-yil boshidan buyon quyosh va shamol elektr stansiyalari tomonidan 4,7 mlrd kilovatt-soatdan ortiq elektr energiyasi ishlab chiqarilgan.

Gidroelektr stansiyalari ko‘rsatkichlari bilan birgalikda hisoblaganda, umumiy ishlab chiqarish hajmi 7,6 mlrd kilovatt-soatdan oshgan.

Ko‘rsatuvda «yashil» energetikaning mamlakat iqtisodiyoti va ekologik barqarorlik uchun ahamiyati, sohada amalga oshirilayotgan islohotlar hamda istiqboldagi rejalar haqida ham so‘z yuritiladi.

Mutaxassislar fikricha, qayta tiklanuvchi energiya manbalarini kengaytirish elektr energiyasiga bo‘lgan o‘sib borayotgan talabni qoplash, tabiiy resurslardan samarali foydalanish va atmosferaga chiqariladigan zararli chiqindilarni kamaytirishda muhim ahamiyat kasb etmoqda.

Source link

Yirik brendlardan biri bo‘lgan “Rotana Hotel Management Corporation PJSC” kompaniyasi O‘zbekiston bozoriga kirishga qiziqish bildirmoqda.

Turizm qo‘mitasi raisi A.Aqqulov hamda “Rotana Hotel Management Corporation PJSC” kompaniyasining Strategiya bo‘yicha direktori Amna al-Novays o‘rtasida uchrashuv bo‘lib o‘tdi. Muzokaralar davomida tomonlar O‘zbekistonda turizm sohasida amalga oshirilayotgan keng ko‘lamli islohotlar, mehmonxonalar infratuzilmasining jadal rivojlanishi va xorijiy investorlar uchun yaratilgan qulay shart-sharoitlar xususida fikr almashdilar.

Kompaniya vakillariga mamlakatimizda mehmonxonalarga bo‘lgan talabning o‘sishi, yangi turistik yo‘nalishlar va ziyorat turizmi imkoniyatlari haqida ma’lumot berildi. Shuningdek, Samarqand viloyatida barpo etilgan Imom al-Buxoriy majmuasi hamda uning atrofida shakllantirilayotgan zamonaviy turistik infratuzilma taqdimoti o‘tkazildi.

Uchrashuv davomida Amna al-Novays O‘zbekistonda turizm sohasida erishilayotgan natijalarni yuqori baholab, kompaniya mamlakat bozoriga bir nechta nufuzli brendlar orqali kirish imkoniyatini ko‘rib chiqayotganini ma’lum qildi. Jumladan, turli toifadagi mehmonlar talablarini qondirish maqsadida yuqori toifali mehmonlar uchun mo‘ljallangan 5 yulduzli “Rotana Hotels & Resorts”, 4 yulduzli “Edge by Rotana”” hamda zamonaviy va qulay formatdagi 3 yulduzli “Centro Hotels by Rotana” brendlari bilan O‘zbekistonda faoliyat boshlashi maqsadga muvofiqligi qayd etildi.

Bu tashabbus mamlakatimiz turizm infratuzilmasini yanada takomillashtirish, xizmatlar sifatini xalqaro standartlarga muvofiq oshirish hamda xorijiy sayyohlar oqimini ko‘paytirishga xizmat qilishi kutilmoqda.

Uchrashuv yakunida kompaniya rahbariyatining Toshkent xalqaro investitsiya forumida ishtirok etishi hamda O‘zbekistonga tashrif doirasida mamlakatimizdagi mehmonxona obyektlari bilan yaqindan tanishishi bo‘yicha kelishuvga erishildi.

Source link

Fitch Ratings O‘zbekistonning suveren kredit reytingini yana “BB” darajasida tasdiqladi, ammo bu safar prognozni “barqaror”dan “ijobiy”ga yaxshiladi. Agentlik bu qarorni iqtisodiy siyosat samarasi, makroiqtisodiy barqarorlikning mustahkamlanishi, budjet taqchilligining rejadan past bo‘lishi va xalqaro zaxiralarning sezilarli o‘sishi bilan izohladi.

Fitch Ratings xalqaro reyting agentligi O‘zbekistonning uzoq muddatli suveren kredit reytingi bo‘yicha prognozini “barqaror”dan “ijobiy”ga o‘zgartirdi va reytingni “BB” darajasida tasdiqladi.

Agentlikka ko‘ra, prognozning yaxshilanishi mamlakatda islohotlar izchil davom etayotgani va makroiqtisodiy barqarorlikni saqlashga qaratilgan siyosat natijasida o‘rta muddatli istiqbolda iqtisodiy o‘sish yuqori darajada saqlanishi kutilayotgani bilan bog‘liq.

Fitch’ning qayd etishicha, davlat qarzining yalpi ichki mahsulotga nisbatan past darajada ekani, katta tashqi zaxiralar va yuqori o‘sish salohiyati kabi omillar O‘zbekistonning “BB” reytingiga asos bo‘lgan.

Shu bilan birga, aholi jon boshiga to‘g‘ri keladigan daromadning nisbatan pastligi, iqtisodiyotning xomashyo tovarlariga qaramligi va inflatsiyaning hali ham yuqori ekani reytingni cheklab turibdi.

Agentlik izohiga ko‘ra, hukumatning davlat korxonalarini xususiylashtirish, pul-kredit siyosati samaradorligini oshirish va budjet boshqaruvini takomillashtirishga qaratilgan islohotlari davom etmoqda. 2021–2025 yillarda davlat aktivlarini xususiylashtirishdan taxminan 5,1 mlrd dollar tushum olingan bo‘lib, shundan 1,6 mlrd dollari 2025 yilga to‘g‘ri keladi.

Fitch hisob-kitoblariga ko‘ra, iqtisodiy o‘sish 2026 yilda 6 foizgacha sekinlashadi, ammo 2027–2028 yillarda o‘rtacha 6,4 foizlik o‘sish kutilmoqda. O‘rta muddatli istiqbolda esa o‘sish sur’ati taxminan 6,3 foiz darajasida bo‘lishi prognoz qilingan.

Agentlik Eron atrofidagi mojaro tashqi xavflardan biri bo‘lib qolayotganini qayd etgan. O‘zbekistonning Eron bilan to‘g‘ridan to‘g‘ri savdo aloqalari cheklangan bo‘lsa-da, importning taxminan 8 foizi va eksportning 4 foizi Eron portlari orqali amalga oshiriladi.

Shuningdek, Rossiya ham iqtisodiyot uchun muhim ahamiyatga ega bo‘lib qolmoqda: 2025 yilda eksportning 12,8 foizi ushbu mamlakat hissasiga to‘g‘ri kelgan, pul o‘tkazmalarining esa qariyb 70 foizi Rossiyadan kelgan.

Shu bilan birga, 2025 yilda konsolidatsiyalashgan budjet taqchilligi YaIMga nisbatan 2,1 foizni tashkil etib, belgilangan 3 foizlik chegaradan past bo‘lgan. Bunga asosan soliq va boshqa budjet tushumlarining rejadan yuqori bo‘lgani, jumladan oltin narxlarining o‘sishi hissa qo‘shgan.

Agentlik davlat qarzining YaIMga nisbati 2025 yildagi 32 foizdan 2027–2028 yillarda taxminan 28 foizgacha pasayishini prognoz qilmoqda. Bu ko‘rsatkich davlat qarzi uchun belgilangan 60 foizlik limitdan ancha past bo‘lib qoladi.

Inflatsiya bo‘yicha, Fitch Markaziy bankning qat’iy pul-kredit siyosati davom etayotganini ta’kidlagan. Asosiy stavka 2025 yil mart oyidan beri 14 foiz darajasida saqlanmoqda. 2026 yil aprelida yillik inflatsiya 7 foizni tashkil etgan bo‘lib, bu bir yil avvalgi 10,1 foizdan past, ammo Markaziy bankning 5 foizlik maqsadli ko‘rsatkichidan yuqori.

Agentlik O‘zbekistonning xalqaro valuta zaxiralari o‘sishda davom etishini ham qayd etgan. Fitch prognoziga ko‘ra, zaxiralar hajmi 2025 yildagi 66 mlrd dollardan 2026 yilda 71 mlrd dollargacha oshadi. Zaxiralarning katta qismi oltin hissasiga to‘g‘ri keladi.

Xalqaro agentlikning ta’kidlashicha, O‘zbekistonning reytingi kelgusida makroiqtisodiy barqarorlikni ta’minlaydigan islohotlarning izchil davom etishi, davlat moliyasi boshqaruvining yaxshilanishi va boshqaruv sifati ko‘rsatkichlarining o‘sishi natijasida oshirilishi mumkin.

Aksincha, islohotlar sur’atining sekinlashishi, tashqi moliyaviy vaziyatning yomonlashishi yoki davlat qarzining sezilarli o‘sishi reytingga bosim o‘tkazishi mumkin.

Eslatib o‘tamiz, Fitch O‘zbekistonning suveren reytingini bundan oldin 2025 yil iyun oyida qayta ko‘rib chiqqan va mamlakatning uzoq muddatli kredit reytingini “BB-“dan “BB”ga oshirib, prognozni “barqaror” deb belgilagan edi.

Source link

AQShning “McKim and Company” kompaniyasi boshchiligidagi moliyaviy investorlar va sohaviy texnologik hamkor “JVR Enterprises LLC” ishtirokidagi konsorsium O‘zbekistondagi Mobiuz aloqa operatorining 100 foiz ulushini 351 mln dollarga sotib oldi. Ular telekommunikatsiya infratuzilmasiga 500 mln dollargacha investitsiya kiritishi ham ko‘zda tutilgan.

“Universal Mobile Systems” MChJ (Mobiuz) ustav kapitalidagi 100 foiz davlat ulushi xususiylashtirildi.

Davlat aktivlarini boshqarish agentligi xabariga ko‘ra, AQShning “McKim and Company” kompaniyasi boshchiligidagi moliyaviy investorlar va sohaviy texnologik hamkor “JVR Enterprises LLC” (DBA – “JVR Capital Group”) ishtirokidagi konsorsium taklifi g‘olib deb topilgan.

Ushbu taklifga muvofiq, MobiUz kompaniyasi 351 mln dollarga baholangan. Shuningdek, telekommunikatsiya infratuzilmasini rivojlantirishga 500 mln dollargacha investitsiya kiritish rejalashtirilgan.

“Mazkur taklifning sotish samaradorligini ko‘rsatuvchi EV/EBITDA multiplikatori 7,4x ni tashkil etib, bitimning yuqori samaradorligini aks ettiradi. Mazkur ko‘rsatkich qiyosiy bitimlar bilan solishtirganda biznesning raqobatbardosh baholanganini kshrsatadi hamda mustaqil baholovchi tomonidan aniqlangan qiymatdan sezilarli darajada yuqoridir”, – deyiladi Davaktiv bayonotida.

Bitimni yakunlash uchun tegishli tartibga soluvchi organlarning zarur ruxsatnomalarini olish, shuningdek belgilangan korporativ va huquqiy tartib-taomillarni bajarish talab etiladi.

Mobiuz’ni sotish bo‘yicha xalqaro savdo jarayoni 2025 yil iyun oyida boshlangan edi. Rasmiy axborotga ko‘ra, bu jarayonda AQSh, Yaponiya, Fors ko‘rfazi mamlakatlari, Yevropa hamda Kavkazorti mintaqalaridan 15 dan ziyod (aksariyati xorijiy) investor ishtirok etgan.

10 nafar ishtirokchi dastlabki narx taklifini bergan, ulardan faqat 6 tasi majburiyatga ega takliflar bilan chiqqan. 2026 yil yanvariga kelib, hukumat qat’iy taklif bildirgan 6 ta talabgor orasidan eng jozibali deb topilgan 3 tasiga o‘z taklifini yaxshilash uchun 23 yanvargacha muddat berilganini ma’lum qilgandi.

Xususiylashtirish jarayonida Rothschild & Co xalqaro investitsiya banki strategik konsultant, katta to‘rtlikka kiruvchi “KPMG moliyaviy konsultant hamda Deloitte mustaqil baholovchi sifatida ishtirok etdi.

Source link

Transport vaziri Ilhom Mahkamov bir qator yangi temiryo‘l qatnovlari yo‘lga qo‘yilishini ma’lum qildi, Xususan, Buxoro–Urganch–Xiva yo‘nalishida elektropezd qatnovi joriy yilda ishga tushadi. Toshkent–Samarqand yo‘nalishida alohida yuqori tezlikdagi temiryo‘l liniyasi loyihasi 2030 yilga qadar yakunlanadi. Yana 4 ta “Jaloddin Manguberdi” tezyurar poyezdlari olib kelinadi. Chexiyaning Skoda kompaniyasidan 10 ta zamonaviy elektropoyezd xarid qilinadi.

Foto: Qonunchilik palatasi

3 iyun kuni transport vaziri Ilhom Mahkamov Qonunchilik palatasida temiryo‘l transporti sohasi bo‘yicha hisobot berdi.

Vazirning ma’lum qilishicha, Toshkent–Samarqand yo‘nalishida alohida yuqori tezlikdagi temiryo‘l liniyasi loyihasining texnik-iqtisodiy asoslari yakuniy tahriri ishlab chiqilgan. 2030 yilga qadar loyihani yakunlab, mazkur yo‘nalishda poyezdlar harakatini yo‘lga tushirish bo‘yicha ishlar amalga oshirilyapti.

“Bundan tashqari, Urganch xalqaro aeroportidan Urganch shahriga yo‘nalishda bo‘lgan temiryo‘l liniyasiga tutashtiruvchi 10,8 kilometr uzunlikdagi temiryo‘l liniyasi qurish ishlari jadal sur’atlarda olib borilmoqda. Joriy yil 1 avgust kuniga qadar mazkur Urganch–Xiva temiryo‘l liniyasi elektrlashtirilgan temiryo‘l bo‘lib qurib bitkaziladi va zamonaviy elektropoyezdlar qatnovi yo‘lga qo‘yiladi”, – dedi vazir.

Uning qayd etishicha, joriy yil yakuniga qadar Buxoro–Urganch–Xiva yo‘nalishida zamonaviy elektropoyezdlar qatnovi ham yo‘lga qo‘yiladi.

Bundan tashqari, joriy yil yakuniga qadar Toshkent aglomeratsiyasiga poyezdlardan kirib keladigan elektropoyezdlarni jamoat transporti bilan integratsiya qiluvchi transport bog‘lamalari yaratiladi. Xususan, “Choshtepa”, “Shahriston” va “Turon” metro bekatlari yaqinida temiryo‘l to‘xtash punktlari quriladi. “To‘xtash punktlari qurilishi natijasida yo‘lovchilarga jamoat transportidan foydalanish xavfsiz, qulay va tezkor amalga oshiriladi”, – dedi vazir.

Mahkamovning eslatishicha, 2024 yilda Rossiya Federatsiyasining ikkita EP3D rusumli shahar atrofi yo‘nalishida harakatlanuvchi zamonaviy elektropoyezdi olib kelinib, Toshkent–Hojikent–Chirchiq yo‘nalishida yo‘lga qo‘yilgandi. Joriy yilda xorijiy hamkorlar bilan birgalikda ikkita zamonaviy elektropoyezd ishlab chiqarilgan. Ulardan biri joriy yil 30 aprelidan boshlab Farg‘ona vodiysida aylana halqa yo‘nalishida harakatlanishni boshlagan. Joriy yil iyul oyidan boshlab Toshkent–G‘azalkent–Xo‘jakent va yangi qurib bitkazilgan Toshkent–Parkent yo‘nalishlarida zamonaviy elektropoyezdning ikkinchi qatnovlari yo‘lga qo‘yiladi.

Shu bilan bir qatorda, joriy yilning o‘tgan davrida ikkita yuqori tezlikda harakatlanuvchi “Jaloliddin Manguberdi” elektropoyezdi olib kelingandi. Soha rahbari bu poyezdlardan yana 4 ta olib kelinishini ma’lum qildi.

“Bugungi kunda Toshkent–Xiva–Toshkent yo‘nalishida elektropoyezdlarning sinov jarayonlari amalga oshirilayotgan bo‘lib, sinovlar muvaffaqiyatli yakunlangach, muntazam qatnovlar yo‘lga qo‘yiladi. Shu bilan bir qatorda, hozirgi Toshkent–Andijon hamda Toshkent–Termiz yo‘nalishlaridagi temiryo‘l liniyalarini qayta modernizatsiya qilish va bu yo‘nalishlarga Xitoyning CRRC kompaniyasi tomonidan ishlab chiqarilgan sakkizta tezyurar elektropoyezdlarni qatnovga yo‘lga qo‘yish masalasi ko‘rib chiqilmoqda. Ya’ni Toshkent–Andijon va Toshkent–Termizda, xabaringlar bor, tog‘li hududlardan perevallardan harakatlanadigan maxsus agregat tarkiblari olib kelinadi va Jaloliddin Manguberdi yuqori tezlikda harakatlanadigan poyezdlarining yana qo‘shimcha to‘rttasi olib kelinadi”, – dedi vazir.

Shuningdek, Chexiyaning Skoda Transportation kompaniyasidan 10 ta zamonaviy elektropoyezd xarid qilish hamda talab yuqori bo‘lgan yo‘nalishlarda harakatini yo‘lga qo‘yish orqali yiliga qo‘shimcha 5,2 million nafar yo‘lovchi tashish imkoniyati yaratiladi.

“Skoda Transportation bilan elektropoyezdlarni ishlab chiqarishni boshlash to‘g‘risida memorandum imzolangan. 2027 yildan boshlab elektropoyezdlar yurtimizga olib kelinib boshlanadi va quyidagi yo‘nalishlarda bosqichma-bosqich qatnovlar tashkil etiladi: Termiz–Samarqand, Urganch–Nukus, Toshkent–Angren, Toshkent–Bekobod, Toshkent–Boysun–Qo‘rg‘on, Samarqand–Qarshi–Shahrisabz, Toshkent–Angren, Toshkent–Hojikent–Chirchiq kabi, ya’ni viloyat markazlari aglomeratsiyalar bilan yo‘lovchi tashish xizmatlari bilan bog‘lanadi. Bunga qo‘shimcha yana 10 ta zamonaviy elektropoyezd xarid qilish masalasida boshqa Yevropaning kompaniyalari bilan muzokaralar olib borilmoqda”, – dedi Ilhom Mahkamov

Source link