Jamiyat
“Opam ona sog‘inchini o‘zi bilan olib ketdi” – Angrendagi dahshatli YTHda opasi va otasidan ayrilgan o‘g‘il
2025 yil 7 sentabr. Farg‘ona viloyatining Buvayda tumanidan bo‘lgan Vohidjon Qo‘rg‘onov o‘zining Spark mashinasida 15 yoshli qizi va ToshMIda tahsil olayotgan qarindoshi bilan Toshkentga ketayotgandi. Mashina temiryo‘l kesishmasiga kelib to‘xtadi. Shu vaqtda boshqaruvni yo‘qotgan sement tashuvchi yuk mashinasi mashinalarga kelib urildi. YTHda 11 kishi, jumladan, Vohidjon Qo‘rg‘onov boshqaruvidagi Spark mashinasida bo‘lganlarning barchasi halok bo‘ldi. Kun.uz muxbiri marhumlarning yaqinlari bilan suhbatlashdi.
{Yii::t(}
O’tkazib yuborish 6s
O’tkazib yuborish
Joriy yil 7 sentabr kuni soat 12:20 atrofida Toshkent viloyati Angren shahri hududidan o‘tgan A-373 «Toshkent-O‘sh» xalqaro avtomobil yo‘lida A.R. boshqaruvidagi sement tashuvchi Shacman yuk mashinasi boshqaruvni yo‘qotib, temiryo‘l kesishmasida to‘xtab turgan bir nechta avtotransport vositalari bilan to‘qnashgan holda yo‘l transport hodisasini sodir etgandi. Mudhish hodisada Spark haydovchisi, mashinada bo‘lgan qizi va qarindoshi voqea joyida halok bo‘lgan.
Manzilga yeta olmagan sog‘inch
4 farzandning otasi bo‘lgan 47 yoshli Vohidjon Qo‘rg‘onov asli Farg‘ona viloyatining Buvayda tumani Xonobod qishlog‘idan bo‘lgan. To‘ng‘ich qizi poytaxtdagi oliygohlardan biriga talabalikka qabul qilingandan keyin oila a’zolari maslahatlashib, Toshkentda yashashga qaror qilishadi. Ular Sergeli tumanining Choshtepa mahallasidan ijaraga uy olishadi.
Vohidjon taksichilik, turmush o‘rtog‘i esa chevarchilik bilan shug‘ullana boshlaydi. O‘zlari bilan birga ikki qizi va o‘g‘lini ham poytaxtga olib ketishadi. Qishloqda faqat 15 yoshli qizi Mashhura qoladi. O‘sha mash’um kunda marhum Vohidjon Qo‘rg‘onov onasini sog‘ingan kenja qizi va uylanganiga endigina bir oy bo‘lgan Toshkent tibbiyot akademiyasining magistratura bosqichiga qabul qilingan qarindoshi A’zamjon Ibrohimovni olib ketayotgan bo‘lgan.
Tohirjon Qo‘rg‘onov va Rahmatillo Odiljonov, marhum Vohidjon Qo‘rg‘onovning akasi va o‘g‘li
“Angrendagi fojiada ukam, jiyanim va qarindoshimdan ayrildim. Ukamning qizlari poytaxtda o‘qishardi. Kelinoyim chevarlik, Vohidjon taksichilik qilib tirikchilik o‘tkazishardi. O‘sha kuni mashinada ukamdan tashqari kichkina jiyanim 15 yoshli Mashhuraxon, bojasining ToshMIda o‘qiydigan o‘g‘li A’zamjon bo‘lgan. A’zamjon ham o‘qishni bitirib, magistraturaga kirgan edi. O‘qishga ketayotgan bo‘lgan sho‘rlik.
Marhum Vohidjonning to‘rtta farzandi bor edi. Uch qiz, bir o‘g‘il. YTHda uchinchi farzandi, Mashhuraxon vafot etdi. Avval kenja o‘g‘il Rahmatillo ham Mashhuraxon bilan birga qishloqda yashardi. Keyin o‘g‘lining o‘qishini Toshkentga ko‘chirishgandi. Marhuma Mashhuraxon esa qishloqdagi maktabda o‘qiyotgandi. Uning bir o‘zi qishloqda qolib ota-onasi, opalarini sog‘inaverganidan tez-tez uni poytaxtga olib borib aylantirib kelardi. Bir yildan keyin uning ham o‘qishini Toshkentga ko‘chiraman deb niyat qilgandi Vohidjon. Nasib qilmadi.
Oxirgi marta ukamni juma kuni ko‘rgandim. Yakshanba kuni uyga kelganimda mash’um xabarni aytishdi. Keyin Angrenga yetib bordim. Borsam dahshatli holat. Akam, jiyanim, qarindoshi voqea joyida vafot etgan ekan. Akamning Sparkʼiga katta yuk mashinasi orqadan kelib urgan. Mashina yo‘q bo‘lib ketgan.
Voqea joyida andijonliklarni ko‘rdim. Bir oiladan besh kishi opa-ukalar, bitta mashinada bo‘lgan, ularning bittasi ham tirik qolmagan. Avariya bo‘lgan joyda oldin ham YTH bo‘lib, ko‘p odam o‘lgan ekan. Ikki qiz, bitta o‘g‘illari yetim qoldi. Allohdan sabr so‘rab o‘tiribmiz, endi nima qilamiz boshqa? Mutasaddilardan so‘raymiz, holatni sinchkovlik bilan o‘rganishsin. Javobgarlarga qonuniy choralar ko‘rishsin”, deydi marhum Vohidjon Qo‘rg‘onovning akasi Tohirjon Qo‘rg‘onov.
Opam ona sog‘inchini o‘zi bilan birga olib ketdi…
“Otamni oxirgi marta 1 sentabr kuni ko‘rgan edim. O‘shanda u o‘g‘lim yaxshi o‘qi, o‘qimishli odam bo‘lishing kerak, deb uqtirdi. Keyin qishloqqa ketdi. Toshkentda onam va ikki opam bilan qoldim. Kichik opam Mashhura qishloqda qolgan edi.
7 sentabr kuni otam opam va qarindoshimni olib, Toshkentga yo‘lga chiqqan edi. Telefon qilsak ko‘tarishmadi. Xavotir ola boshladik. Keyin Ravshan tog‘am qo‘ng‘iroq qilib Angrenda avariya bo‘libdi, yo‘l yopiq ekan, otangiz “probka”da qolgan bo‘lsa kerak, deb bizni tinchlantirishdi. Surishtirsak otam Toshkentga soat 9:30 larda yo‘lga chiqqan ekan. Xavotirimiz yana kuchaydi. Hammamiz Angrenga bordik. Borsak….
Qishloqda qolgan Mashhura opam onamni sog‘inib doim yig‘lardi. Opam ona sog‘inchini o‘zi bilan birga olib ketdi”, deydi marhum Vohidjon Qo‘rg‘onovning o‘g‘li Rahmatillo Odiljonov.
Uylanganiga bir oy bo‘lgandi
“Jiyanim A’zamjon Ibrohimov olti yil Toshkentda o‘qidi. Uylanganiga bir oy bo‘lgan edi. ToshMIga magistraturaga beshinchi o‘rinda o‘tgandi. 24 yoshda edi. Endi Xudoning marhamati ekan.
Hasanboy Odilov, marhum A’zamjon Ibrohimovning qarindoshi
Alloh jonini oldi. Shunaqa ishlar bor ekan-da boshimizda. Oxirgi marta shanba kuni ko‘rishgan edik. Yakshanba kuni aka o‘qishga ketyapman, deb xursand bo‘lgandi. Oilaning to‘ng‘ich farzandi edi. Bir uka va singlisi qoldi”, deydi marhum A’zamjon Ibrohimovning qarindoshi Hasanboy Odilov.
Bir manzildagi ikki fojia
2021 yil 24 may kuni ham A-373 avtomobil yo‘lining taxminan shu qismida fojiali yo‘l-transport hodisasi sodir bo‘lgandi. O‘shanda Namangan-Toshkent yo‘nalishi bo‘yicha harakatlangan MAN rusumli tirkamali yuk avtomobili boshqaruvni yo‘qotib, yettita mashinani urib ketgan va to‘qnashuv oqibatida yengil avtomobillardan biri yonib ketgandi. YTH oqibatida 7 kishi voqea joyida vafot etgan, yana 14 kishi turli darajada tan jarohati olgandi.
Bu safar yana o‘sha manzilda sodir bo‘lgan dahshatli YTHda 11 kishi vafot etdi.
Sarvar Ziyoyev,
Sardor Mamirov,
Kun.uz
Prezident Shavkat Mirziyoyev mahalla bankirlari ish tizimi tubdan o‘zgarishini ma’lum qildi. Endi bir bankirga ko‘pi bilan uchta mahalla biriktirilib, biznes faolligi, yangi ish o‘rinlari va aholi daromadini oshirish bo‘yicha KPI belgilanadi. Shuningdek, banklarga har bir mahallaning “o‘sish nuqtasi”ni aniqlash va daromadli loyihalarni ko‘paytirishni buyurdi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Yig‘ilishda mahalla bankirlarining ish uslubi ham tubdan o‘zgarishi belgilandi. Ta’kidlanishicha, joylarda yaxshi tajribalar bor. Masalan, Angor tumani Yangiobod mahallasidagi 2 kilometr zovur usti yopilib, 110 ta servis obekti ishga tushirildi. Natijada mahalla atrofida yashaydigan 1 ming 225 nafar odam ishli va daromadli bo‘ldi.
Arnasoy tumanidagi Baxtli mahallasining bankiri 20 ta xonadonga 50 million so‘mdan kredit ajratib, mehmon uylarini ishga tushirdi. Har bir xonadon bir mavsumda 100 million so‘mgacha daromad olmoqda. Ish yurishib ketgani uchun yana 80 ta oila shunday mehmon uylari tashkil qilishga kirishdi.
Endi banklar har bir mahallaning “o‘sish nuqtasi”ni aniqlab, tashabbuskorlarni topishi va daromadli loyihalarni ko‘paytirishi zarur. Bundan buyon bitta mahalla bankiriga ko‘pi bilan uchta mahalla biriktiriladi.
Ikki haftada tashabbuskor, zamonaviy fikrlaydigan oliygoh bitiruvchilari va yosh mutaxassislar orasidan 400 nafar yangi mahalla bankiri tanlab olinadi. Ular bir oy davomida namunali mahallalarga olib borilib, tajriba o‘rganadi.
Joriy yil oilaviy tadbirkorlik loyihalari uchun qo‘shimcha 2 trillion so‘m imtiyozli resurs berildi. “Og‘ir” mahallalar uchun kredit stavkasi 17,5 foizdan 12 foizga tushirildi.
Endi mahalla bankirlari o‘zi topgan loyihasi uchun ushbu resursdan foydalanishi mumkin bo‘ladi. Bu tizimni 1 avgustdan amaliyotga joriy etish vazifasi qo‘yildi.
Mahalla bankirlariga biznes faollikni oshirish, tadbirkorlik, ish o‘rni va aholi daromadini ko‘paytirish bo‘yicha KPI belgilanadi. Tuman va shahar hokimlari mahalla raislari bilan birga har bir mahalla bankiriga yil yakunigacha aniq buyurtma shakllantirib beradi.
Davlat banklari bu yil 100 tadan mahallani ixtisoslashtirish tashabbusi bilan chiqqan. O‘tgan yili 9 ta davlat banki ishtirokida mahallalarda agrosanoatni rivojlantirish uchun “Agrostar” kompaniyalari tashkil qilingan edi.
Endi banklar mahallani ixtisoslashtirish bilan cheklanib qolmasdan, “Agrostar”larni jalb qilgan holda “yetishtirish – qayta ishlash – saqlash – qadoqlash – sotish” zanjirini yaratadi. Bir oyda dastur qilib, 1 mingta mahallada ish boshlash topshirildi.
Prezident Shavkat Mirziyoyev mahalla raislariga yangi vakolatlar berilishini ma’lum qildi. Endi ular hududda xususiy bog‘cha, maktab, klinika va sport inshootlari qurish uchun yerlarni auksionga chiqarish, shuningdek, “mahalla yettiligi” ishini muvofiqlashtirish huquqiga ega bo‘ladi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Mahallalarda soliq tushumlari, jinoyatchilikni jilovlash va aholi muammolarini hal etish bo‘yicha mas’ullarga savollar qo‘yildi. Davlat rahbari mahalla odamlar uchun chinakam “ishonch, tayanch va imkoniyatlar markazi” bo‘lishi zarurligini ta’kidladi.
Yangi Quva mahallasi misolida aholini ish bilan ta’minlash va daromadini oshirish bo‘yicha yangi tartib ko‘rsatib o‘tildi. Ushbu mahallada 51 nafar ishsiz fuqaro bor, ularning 4 nafari agrotexnikumni bitirgan va xonadonida 10 sotixdan tomorqasi mavjud.
Mahalla raisi tomorqada gul ko‘chatiga ixtisoslashgan yengil konstruksiyali issiqxona qurish uchun mahalla bankiriga buyurtma beradi. Qolgan ishsiz aholi bo‘yicha ham mahalla raisi kim tadbirkor bo‘lmoqchi, qaysi oila daromadini oshirmoqchi, kimga kredit, uskuna yoki yer kerakligini aniqlab, bankirga aniq vazifa qo‘yadi.
Yangi Quva mahallasida bog‘cha yetishmasligi sabab 50 nafar bola qo‘shni mahallaga qatnayapti, hududda esa 70 sotix bo‘sh yer bor. Shu munosabat mahallalarda xususiy bog‘cha, maktab, klinika va sport inshootlari qurish uchun yerni auksionga chiqarish vakolati ham mahalla raisiga beriladi.
Davlat rahbari mahalla raisi ijtimoiy muammolarni hal qilish, tozalikni ta’minlash va daromadni ko‘paytirishga xizmat qiladigan loyihalarda tashabbuskor bo‘lishi zarurligini ta’kidladi.
Bunday loyihalar uchun “mahalla yettiligi”ga 10 million so‘mdan grant ajratiladi. Agar 8 ming 992 ta mahallaning har birida bittadan shunday loyiha amalga oshirilsa, hududlardagi muhit sezilarli o‘zgaradi. Ushbu maqsadlar uchun jami 240 milliard so‘m resurs shakllantiriladi.
Mahalla raisi o‘z hududining haqiqiy boshqaruvchisi bo‘lishi shart. Buning uchun u hokim yordamchisi, xotin-qizlar faoli, yoshlar yetakchisi, ijtimoiy xodim, profilaktika inspektori, soliqchi va mahalla bankirining haftalik hamda oylik ish rejasini tasdiqlab beradi. Rais “yettilik” a’zolariga aniq vazifa qo‘yib, ulardan so‘rov qilib boradi.
Shuningdek, “yettilik” faoliyatini metodik qo‘llab-quvvatlash va hududdagi muammolarga ilmiy yondashish uchun Mahallani rivojlantirish milliy instituti tashkil etiladi. U “yettilik”ni o‘qitadi, mahallalardagi dolzarb masalalarga ilmiy yechimlar ishlab chiqadi.
Prezident Shavkat Mirziyoyev mahallalar moliyaviy mustaqilligini oshirishga qaratilgan yangi choralarni e’lon qildi. Ularga qo‘shimcha soliq tushumlari va boshqa manbalar hisobidan bu yil 1,6 trillion so‘m, kelasi yildan esa 2 trillion so‘mgacha mablag‘ qoldirilishi rejalashtirilmoqda.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Mahallalar budjetini mustahkamlash bo‘yicha yangi tashabbuslar ilgari surildi. Joriy yil mahallalar budjetiga 600 milliard so‘m mablag‘ qolishi reja qilingan edi.
Iyun oyidagi Prezident farmoni bilan mahallada qoladigan yer va mol-mulk solig‘ining ulushi 10 foizdan 15 foizga oshirildi. Sanitariya qoidalarini buzganlik va noqonuniy qurilish uchun jarimalarning 10 foizi mahallaga tushadigan bo‘ldi.
Shuningdek, 5 ming kvadrat metrgacha bo‘sh binolarni mahallaning o‘zi sotuvga chiqarishiga ruxsat berildi. Buning hisobidan mahallalar budjetiga yana 405 milliard so‘m tushadi.
Endi mahalladagi noturar obektlardan tushgan yer va mulk solig‘ining 5 foizi ham mahallaning o‘ziga beriladi. Bu orqali mahallalar ixtiyorida yiliga yana 400 milliard so‘m mablag‘ qoladi.
Yil davomida eng ko‘p tadbirkorlarni ro‘yxatga olgan, eng ko‘p yangi ish o‘rni yaratgan, tushum darajasi eng yuqori bo‘lgan va eng ko‘p qo‘shimcha soliq bazasi topgan 200 ta mahallaga 2 milliard so‘mdan mukofot beriladi.
Umuman, yangi tashabbuslar hisobiga mahallalar budjetiga tushum bu yil 1 trillion 600 milliard so‘mga, kelasi yildan esa 2 trillion so‘mga yetadi.
Prezident Shavkat Mirziyoyev mahallalarda obodonlashtirish ishlarini umummilliy harakatga aylantirish va eng namunali mahallalarni soliq imtiyozlari bilan rag‘batlantirishni taklif etdi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Ta’kidlanishicha, har bir viloyat hokimi, uning o‘rinbosarlari va viloyat tashkilotlari rahbarlari bittadan tumanni, tumanlardagi mas’ullar esa bittadan mahallani olib, bir oy davomida ozodalik va obodonlashtirish bo‘yicha keng ko‘lamli ishlarni tashkil etadi.
Mahallada obodonchilik ishlarini tashkil etish bo‘yicha Bosh vazir boshchiligida respublika shtabi tuziladi. Hududiy shtablarga hokimlar rahbarlik qiladi. Bu ishlar bir oylik aksiya emas, balki yil bo‘yi ishlaydigan umummilliy harakatga aylantirilishi zarurligi ta’kidlandi.
Mehnatga yarasha rag‘bat bo‘lishi kerakligi ta’kidlandi. Shu bois, yil yakuni bilan ko‘p qavatli uylardagi “Eng orasta xonadon”, mahalladagi “Eng fayzli hovli”, hududdagi “Eng obod ko‘cha”, tuman va viloyatdagi “Eng namunali mahalla” nominatsiyalari joriy etiladi.
Tanlov g‘oliblari bo‘lgan ko‘p qavatli uylardagi kvartiralar uchun mol-mulk solig‘idan, hovli-joylar uchun esa yer solig‘idan imtiyoz beriladi.
Yaxshi tajriba yaratgan “mahalla yettiligi” mukofotlanadi, ularning ish uslubi boshqa hududlarga namuna qilib ko‘rsatiladi. Mahallalardagi ilg‘or tajribalarni keng yoritish zarurligi ham qayd etildi.
Hududlarda temir yo‘l atrofini obodonlashtirish ishlari boshlangan. Birgina Toshkent – Xiva yo‘nalishidagi temir yo‘l bo‘yida 285 ta mahalla bor, ushbu yo‘nalish 45 ta tumandan o‘tadi.
Qolgan viloyat hokimlariga ham bir haftada hududidan o‘tgan magistral yo‘llar va temir yo‘l bo‘ylari, ular atrofidagi uy-joy va tijorat obektlarini to‘liq xatlovdan o‘tkazish vazifasi qo‘yildi.
Ikki haftada ushbu hududlarni namunali qiyofaga keltirish bo‘yicha katta dastur ishlab chiqib, amaliy natijaga erishish topshirildi.
“Mahalla – xalqqa eng yaqin boshqaruv bo‘g‘ini. Odamlarning kundalik masalalari shu yerning o‘zida, ortiqcha ovoragarchiliksiz hal bo‘lishi kerak”, dedi prezident.
Hozir “yettilik” orqali 100 ga yaqin xizmat ko‘rsatilmoqda. Endi barcha davlat xizmatlari bosqichma-bosqich mahallaga tushiriladi.
Namangan viloyatiga tashrif chog‘ida Norin tumanidagi Yangi Namangan mahallasi misolida samarali tajriba yo‘lga qo‘yilgan. Bu yerda Axborot va xizmat markazi tashkil etilib, 8 ta olis mahalla aholisi uchun bir joyda 980 ta davlat xizmati ko‘rsatilmoqda.
Xovos tumanidagi Qahramon mahallasida ham Vengriyaning “aqlli qishloq” tajribasi asosida shunday markaz tashkil etilmoqda.
Yil yakunigacha Norin va Xovos tajribalarini Qo‘ng‘irot, Konimex, Boysun, Qamashi, Qo‘shrabot, Tuproqqal’a, G‘ijduvon, Forish, Beshariq, Jalaquduq va Ohangaron tumanlarida joriy etish topshirildi. Urganch shahridagi Olimpiya mahallasida yo‘lga qo‘yilgan “aqlli mahalla” tajribasi esa har bir viloyatning 10 tadan mahallasida tatbiq qilinadi.
Jamiyat
Prezident ijtimoiy yordam so‘rayotgan odamlarning arizasi asossiz rad etilayotganini tanqid qildi
Prezident Shavkat Mirziyoyev ijtimoiy reyestrga muhtoj oilalarni asossiz kiritmaslik holatlarini keskin tanqid qildi. Yig‘ilishda yil yakunigacha 25 turdagi ijtimoiy xizmatni mahallalarga tushirish va reyestr yuritilishi ustidan nazoratni kuchaytirish topshirildi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Mahallalarda ijtimoiy yordamlar ko‘lamini kengaytirish masalasi muhokama qilindi. Joylarda ijtimoiy reyestrga kiritishni asossiz rad etish yoki sun’iy ravishda reyestrdan chiqarish holatlari uchrayotgani tanqid qilindi.
Oqibatda ehtiyojmand oilalar ijtimoiy yordam olish, farzandini bog‘cha va to‘garakka berish kabi kafolatlangan xizmatlardan foydalana olmayapti. 184 ta mahallada bir oy ichida kelgan 2 ming arizaning barchasi asossiz rad qilingan.
Bunday holatlar Bo‘ston, Oltinko‘l, Xovos, Toshloq, Sharof Rashidov, Uchquduq va Dehqonobod tumanlarida ko‘pligi qayd etildi. Shu sababli reyestrga kirish masalasida prezidentga murojaatlar yil boshidan 1,5 barobar oshib, 30 mingdan 46 mingga ko‘paygan.
Bosh prokuraturaga ijtimoiy reyestr to‘g‘ri yuritilishini qat’iy nazorat qilish, Ijtimoiy himoya milliy agentligi direktorining birinchi o‘rinbosari Shahnoza Mirziyoyevaga reyestr haqqoniyligi yuzasidan prezidentga muntazam axborot berib borish topshirildi.
Mutasaddilar oldiga yil yakunigacha nogironlikni erta aniqlash, xonadonlarni moslashtirish, ijtimoiy uyga joylashtirish kabi 25 turdagi xizmatni mahallaga tushirish vazifasi qo‘yildi.
Uch oyda demensiya va aqliy zaifligi bo‘lgan shaxslar uchun 250 ta mahallada kunduzgi va uyda parvarish xizmati hamda “Madad” uylari, 75 ta mahallada o‘zgalar parvarishiga muhtoj keksalar uchun “Faol hayot” dasturi, shuningdek, qarovsiz qolgan va zo‘ravonlikka uchragan bolalar uchun “Qo‘llab-quvvatlash markaz”lari tashkil etiladi.
Prezident banklarga har bir mahallada daromadli loyihalarni ko‘paytirishni buyurdi
Mahalla raisiga bog‘cha va maktab qurish uchun yerni auksionga chiqarish vakolati beriladi
Mahallalar budjetiga tushadigan mablag‘lar ko‘paytiriladi
-
Jamiyat5 days agoBektemir tumanida «zakladchik»lar qo‘lga olindi
-
Dunyodan5 days ago
Frantsiyada ko’pchilik qo’rqqan narsa yuz berdi.
-
Siyosat3 days ago
Prezident Shavkat Mirziyoyev Qatar amiriga ta’ziya bildirdi
-
Sport5 days agoAngliya Norvegiyani turnirdan chiqarib yubordi
-
Sport4 days agoInfantino yana JCh ishtirokchilari sonini oshirish g‘oyasi haqida gapirdi
-
Dunyodan5 days ago
NATO 2026-yilda Ukrainaga 70 milliard yevro miqdorida yordam ajratmoqchi
-
Jamiyat4 days agoToshkent metrosiga yana 3 ta zamonaviy poyezd qo‘shildi
-
Sport4 days agoSinner ikkinchi marta ketma-ket Uimbldon chempioni bo‘ldi