Jamiyat
Olmaliqda pikap bir bolani o‘ldirdi, biri komada
Maktabdan qaytayotgan ikki nafar 8 yoshli o‘quvchini piyodalar o‘tish yo‘lagida OKMKga tegishli xizmat avtomobili urib yubordi. Bolalardan biri voqea joyida vafot etgan, ikkinchisi esa og‘ir ahvolda reanimatsiyada. Guvohlar va marhum bolaning yaqinlari hududda yo‘l harakati xavfsizligi ta’minlanmaganini ta’kidladi. Kun.uz Olmaliqda bo‘lib, hodisa tafsilotlarini o‘rgandi.
Joriy yil 12 may kuni Olmaliqda ikki nafar maktab o‘quvchisi ishtirokida og‘ir yo‘l-transport hodisasi sodir bo‘ldi. 8 yoshli Abdusamadjon va Islombek darsdan qaytayotib piyodalar o‘tish yo‘lagidan o‘tayotganda oq “Toyota” urib yubordi. Bolalardan biri voqea joyida vafot etgan. Guvohlarning aytishicha mashina katta tezlikda kelgan.
“Toyota” qattiq keldi…
O‘tkir Otaxonov, voqea guvohi:
“Mashinalar ikki qator turgan edi. “Toyota” qattiq keldi, tormoz ovozi podvaldagi bolalargacha eshitilibdi. Bu bolalar shu payt o‘tib qolishgan, bittasini urgandi, ancha naryoqqa borib tushdi. Bittasi mashinaning tagida qolib ketdi. Men bu yoqda baqirdim. Bolani ko‘targan edim, qulog‘idan qon oqayotgan ekan. O‘zim 30 yil tez yordamda ishlaganman. Ahvoli yomonligini tushundim. Keyin haydovchiga eshikni ochishni, bolalarni ortib shifoxonaga olib borishni aytdim, olib ketdi. Borib bolalardan birining bobosiga xabar berdim. Birga shifoxonaga borsak, bola vafot etgan ekan. Yeta olmagan shifoxonaga, ikkinchisi komada yotgan ekan haliyam”.
Marhum Abdusamadjonning yaqinlariga ko‘ra, bu hududda bolalar ishtirokidagi YTHlar birinchi marta emas. Har kuni yuzlab o‘quvchilar katta avtomobil yo‘lini kesib o‘tishadi, ammo xavfsizlik choralari deyarli yo‘q. Piyodalar o‘tish yo‘lagi bor, lekin aksariyat haydovchilar tezlikni pasaytirmaydi. Gavjum va bolalar ko‘p qatnaydigan chorrahada svetofor ham yo‘qligi sabab navbatdagi fojia yana bir bolaning qurbon bo‘lishi bilan tugadi.
Nazokat Shomurodova, marhumning buvisi:
“Turmush o‘rtog‘im nevaramizdan ayrilib qolganimizni aytdi, dod-faryod boshlanib ketdi. Qarindosh kelinlarimiz guvoh bo‘lishgan, lekin mening nevaramni tanimagan. Mashina juda katta tezlikda kelgan, ikkita liniyadagi mashinalar to‘xtagan, bu mashina uchinchi yo‘nalishdagi liniyada kelib, qoidalarga rioya qilib o‘tayotgan ikki bolani koptokday uchirib yuborgan. Nevaram bordyurga borib urilgan. Yonidagi o‘rtog‘ini kombinat mashinasi tagidan olishgan. Yosh bolalar mashinaning tagida yotsa…
Ko‘rganlar aytishicha, u mashinaning ichida faqat haydovchi bo‘lmagan, yana ikkita kombinat ishchisi ham bo‘lgan – boshliqmi kimdir. Menimcha ular tushlikka chiqqan bo‘lishgan.
Yonimizdagi mahallalar: Shanxay, Olmaliqsoydan bamisoli chumoliday o‘quvchilar uchib kelishadi 18-maktabga. Hamma ota-onalarning sharoiti bo‘lmaydi bolalarini o‘zlari kuzatishga. Bu yerda qaysidir mashina to‘xtaydi, qaysidir mashina to‘xtamaydi. Mana, 2 kun avval mototsiklda yana bir qizning oyog‘ini uzib ketibdi. Bunga bee’tibor bo‘lishi kerak emas. Juda ko‘p bo‘lyapti bizning shaharda avariyalar”.
Marhumning onasi bu yerda svetofor va YHXX xodimlarining muntazam kuzatuvi zarurligini aytdi:
“Svetofor qo‘yilsin shu yerga, svetoforgayam qaramayapti ayrim mashinalar. O‘zimiz necha marta ko‘ryapmiz, svetoforda ba’zi mashinalar kutmaydi piyodalarni. Hozir qo‘shnilarimiz ham xavotirda, hammasi bolasini o‘zlari yetaklab olib borib kelyapti maktabga. Ertalab yoki tushda hech bo‘lmaganda 2 soat shu yerda YHXX xodimlari tursa bo‘lardi”.
Ikkinchi jabrlanuvchi – Islombek ayni paytda Olmaliq shahar markaziy shifoxonasining jonlantirish bo‘limida koma holatida qolmoqda. Ayrim sabablarga ko‘ra, bolaning yaqinlaridan intervyu olishning imkoni bo‘lmadi.
Olmaliq shahar markaziy shifoxonasi travmatologi A’zam Normatov:
“12 may kuni 13:30 da bizga ikkita bolani olib kelishdi. Ko‘rikdan o‘tkazganimizda, afsuski, bolalardan birida biologik o‘lim qayd etilgan edi. Ikkinchisi og‘ir ahvolda bo‘lgani uchun reanimatsiya bo‘limiga yotqizdik. Unga bosh miya ochiq og‘ir jarohati, og‘ir darajali bosh miya lat yeyishi, miya o‘zagi lat yeyishi, chap taraflama chakka sohalarda miya ichi gematomalari, peshona chakka tepa suyaklari ensaga o‘tib sinishi va botishi, teri osti gematomasi, ko‘krak qafasi, qorin sohalari jarohatlari, tromatik shok, koma holati tashxisi qo‘yildi. Sun’iy nafas apparatiga olingan”.
Kun.uz manbalarining ma’lum qilishlariga qaraganda, ushbu hodisani sodir etgan avtomobil Olmaliq kon-metallurgiya kombinatiga (OKMK) tegishli xizmat avtomobili bo‘lgan.
Toshkent viloyati IIBB YHXB axborot xizmati holat yuzasidan Olmaliq shahar IIB xodimlari tomonidan surishtiruv ishlari olib borilayotganini ma’lum qilgan edi. Kun.uz holat yuzasidan kuzatuvlarni davom ettiradi.
Buxoro viloyati hokimiga birinchi o‘rinbosar tayinlandi.
Jamshid Sharopov Buxoro viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari – viloyat iqtisodiyot va moliya boshqarmasi boshlig‘i lavozimiga tayinlandi.
Jamshid Sharopov 1984-yil 27-yanvarda G‘ijduvon tumanida tug‘ilgan. 2005-yilda Buxoro davlat universiteti, 2009 yilda Toshkent davlat iqtisodiyot universitetini tamomlagan. Ma’lumoti bo‘yicha mutaxassisligi-iqtisodchi.
Mehnat faoliyatini 2002-yilda AT “Paxta Bank”ning Buxoro viloyati boshqarmasi bank jarayonlari bo‘limi iqtisodiy bo‘linmasi mutaxassisi sifatida boshlab, ATB “Agrobank” Buxoro viloyati boshqarmasi boshlig‘i (2014-2020), O‘zbekiston Respublikasi Markaziy banki Buxoro viloyati bosh boshqarmasi boshlig‘i (2020-2021), Shofirkon tumani hokimi (2021-2023), ATB “Agrobank” agrosanoat majmuasi korxonalarini moliyalashtirish departamenti direktori o‘rinbosari (2023-2026) lavozimlarida faoliyat yuritgan.
Ayni paytga qadar u ATB “Agrobank” muammoli kreditlar bilan ishlash departamenti direktori vazifasida ishlab kelayotgan edi.
«O‘zbekiston Respublikasi mustaqilligining o‘ttiz besh yilligi munosabati bilan chet el fuqarolari va xorijda istiqomat qilayotgan vatandoshlarimizni mukofotlash to‘g‘risida»gi Prezident farmoni e’lon qilindi.
Mukofotlanganlar ro‘yxati:
“Do‘stlik” ordeni bilan
Ivan Sao – “BYD Auto” kompaniyasining Yevropa sotuv bo‘limi bosh direktori o‘rinbosari
Klod Imoven – Fransiyaning “MEDEF International” harakatining O‘zbekiston-Fransiya ishbilarmonlar kengashi raisi
Masayoshi Fujimoto – “Sojitz” kompaniyasi direktori
Sabine Maxl – BMTning O‘zbekistondagi doimiy koordinatori
Turaman Sinan – Shayxontohur tumanidagi “Outdoor Factory Toshkent” mas’uliyati cheklangan jamiyati kuzatuv kengashi raisi, Toshkent shahri
II darajali “Salomatlik” ordeni bilan
Qahorova Nilufar Hamroyevna – AQShning Garvard universiteti huzuridagi Boston bolalar shifoxonasi loyiha menejeri
Yuldasheva Nodira Muxamedovna – Kanadaning Toronto shahridagi Kanadadagi o‘zbekistonliklar uyushmasi asoschisi, “Sog‘lom yo‘l” tibbiy va diagnostik markazi rahbari
“Shuhrat” medali bilan
Abdullayeva Shahlo Abdirashidovna – Koreya Respublikasining Kvangju shahridagi Migrant ayollar huquqlarini himoya qilish va ta’lim berish markazi rahbari.
Podpolkovnik Baxtiyor Inoqov Surxondaryo viloyati ichki ishlar boshqarmasi boshlig‘i etib tayinlandi. U bunga qadar Ichki ishlar vazirligi Akademiyasi magistratura bosqichida tahsil olgan.
Tayinlov Xalq deputatlari Surxondaryo viloyati Kengashining jamoat xavfsizligi va kriminogen vaziyatga bag‘ishlangan navbatdan tashqari sessiyasida ma’lum qilindi.
Sessiyada viloyatdagi jinoyatchilik holati ham tahlil qilindi. Joriy yilning hisobot davrida hududdagi 723 ta mahallaning 528 tasida (73 foiz) bironta ham jinoyat sodir etilmagan. Ichki ishlar xodimlarining tashabbusi bilan aniqlanadigan jinoyatlar soni 40 foizga yaxshilangan.
Shu bilan birga, 28 ta mahalla «qizil» toifada qolayotgani qayd etildi.
Yangi IIB boshlig‘iga jinoyatchilikka qarshi kurashish samaradorligini oshirish, har bir mahallada xavfsizlikni ta’minlash, aholi bilan yaqin muloqotni yo‘lga qo‘yish va fuqarolarning ichki ishlar organlariga ishonchini mustahkamlash vazifalari yuklatildi.
Yangi o‘quv yili arafasida O‘zbekiston hududidagi umumta’lim maktablari, dehqon bozorlari va savdo majmualarida mavsumiy «Maktab bozorlari» tashkil etilmoqda.
Raqobat qo‘mitasi mavsumiy savdo jarayonlarida iste’molchilarning huquq va manfaatlarini himoya qilish, raqobat muhitini ta’minlash hamda aholini sifatli va hamyonbop mahsulotlar bilan ta’minlash muhimligini ta’kidladi.
Qo‘mita ota-onalar va o‘quvchilarga xarid vaqtida mahsulotning sifati, ishlab chiqaruvchisi, narxi va boshqa muhim ma’lumotlarga e’tibor qaratishni tavsiya qildi.
Tadbirkorlarga esa «Maktab bozorlari»da sotilayotgan mahsulotlar sifati va narxlarining asosliligini ta’minlash, iste’molchilarga zarur axborotlarni taqdim etish hamda ularning huquqlariga rioya qilish majburiyati eslatildi.
Raqobat qo‘mitasi maktab bozorlarida faoliyat yuritayotgan tadbirkorlarni darsliklar, maktab formalari, o‘quv-yozuv qurollari va boshqa anjomlar narxlarini asossiz oshirmaslikka hamda qonunchilik talablariga qat’iy amal qilishga chaqirdi.
Fuqarolar «Maktab bozorlari»da narxlarni asossiz oshirish holatlariga duch kelsa, Raqobat qo‘mitasining 1159 ishonch telefoni orqali murojaat qilishi mumkin.
Qo‘mita tomonidan maktab bozorlarida narxlar barqarorligini ta’minlash maqsadida monitoring ishlari olib borilishi ma’lum qilindi.
Prezidentning 2026-yil 14-avgustdagi PQ–294-son qarori bilan 2027-yil 1-yanvardan muddatli to‘lov xizmati operatorlari faoliyati tartibga solinadi.
Ma’lum qilinishicha, muddatli to‘lov xizmatini ko‘rsatuvchi yuridik shaxslar operator hisoblanadi. Ular iste’molchiga tovar yoki xizmatni muddatli to‘lov asosida olish imkoniyatini vositachi sifatida taqdim etadi.
Qarorning 3-bandi «d» kichik bandiga ko‘ra, ko‘chmas mulk operator ko‘rsatadigan muddatli to‘lov xizmatining obyekti bo‘la olmaydi. Shu sababli vositachi operator orqali uy-joyni «rassrochka»ga olish imkoniyati nazarda tutilmagan.
Biroq bu qoida uy-joyni bo‘lib-bo‘lib to‘lash asosida sotishni umumiy tarzda taqiqlamaydi.
Qarorning 3-bandi «a» kichik bandida sotuvchi tomonidan iste’molchiga tovarni to‘g‘ridan-to‘g‘ri sotish holatlari muddatli to‘lov xizmati tushunchasidan mustasno qilingan.
Shunga ko‘ra, quruvchi o‘zining qurgan uy-joyini xaridorga bevosita bo‘lib-bo‘lib to‘lash sharti bilan sotishi mumkin. Ya’ni yangi tartib quruvchi va xaridor o‘rtasidagi to‘g‘ridan-to‘g‘ri savdoni taqiqlamayapti.
Demak, ijtimoiy tarmoqlarda tarqalayotgan «endi uyni rassrochkaga olib bo‘lmaydi» degan talqin to‘liq to‘g‘ri emas. Cheklov aynan muddatli to‘lov operatorlari orqali ko‘chmas mulkni moliyalashtirishga taalluqli.
Yangi tartibga ko‘ra, muddatli to‘lov operatorlari maxsus reyestrga kiritiladi va ularning faoliyati Markaziy bank nazorati ostida bo‘ladi. Shuningdek, operatorlar bilan tuziladigan shartnomalar, ustama va komissiyalarga nisbatan aniq talablar belgilanadi.
Shunday qilib, 2027-yildan operator orqali uy-joyni «rassrochka»ga olish cheklanadi, ammo quruvchining xaridorga uyni bevosita bo‘lib-bo‘lib to‘lash sharti bilan sotishi saqlanib qoladi.
Oziq-ovqat ishlab chiqarishda qaysi hududlar yetakchi?
Prezident ishtirokida umumiy qiymati 50 trln so‘mlik loyihalar ishga tushirildi
«Milliy manfaatlarni himoya qilish dunyodan yopilish degani emas» — Sherzod Asadov
-
Siyosat5 days ago
Илҳом Алиев Тошкентда тантанали кутиб олинди
-
Siyosat4 days ago
Ўзбекистон ва Озарбайжон раҳбарлари Бухоронинг машҳур обидаларини зиёрат қилдилар (фото)
-
Siyosat3 days ago
«Milliy manfaatlarni himoya qilish dunyodan yopilish degani emas» — Sherzod Asadov
-
Siyosat4 days ago
Shavkat Mirziyoyev AQSh kongressmenlari delegatsiyasini qabul qildi
-
Sport4 days ago
Rossiyalik shaxmatchilar O‘zbekistonda o‘tkaziladigan Olimpiadada qatnashmaydi
-
Iqtisodiyot2 days ago
Oziq-ovqat ishlab chiqarishda qaysi hududlar yetakchi?
-
Jamiyat5 days ago
Buxoro viloyati hokimiga birinchi o‘rinbosar tayinlandi
-
Iqtisodiyot4 days ago
O‘zbekiston kartoshkani asosan qaysi davlatlardan sotib oldi?