Guruhda O‘zbekistonni qoldirib ketgan Kongo DR jamoasi turnir favoritlaridan biri bilan nimchorak final uchun bahs olib boradi.

1 iyul kuni kechqurun va 2 iyulga o‘tar kechasi jahon chempionati 1/16 bosqichi doirasida Angliya – Kongo D, Belgiya – Senegal hamda AQSh – Bosniya va Hersegovina juftliklari ishtirokidagi o‘yinlar bo‘lib o‘tadi.

Angliya – Kongo DR

1 iyul, 21:00. Mercedes-Benz Stadium, Atlanta

Angliya va Kongo DR bunga qadar biror marta o‘zaro o‘ynamagan. Bu ham o‘yinga qo‘shimcha intriga beradi. Inglizlar – ushbu juftlikda favorit ekaniga shubha yo‘q. Ammo kongoliklarni ham yaqqol autsayder deb bo‘lmaydi: guruh bosqichida bu jamoa Portugaliya hujumchilarini to‘xtatgan (1:1). Britanlar esa Afrikaning boshqa bir jamoasi, Gana darvozasiga yo‘l topolmagandi (0:0).

Angliya o‘z guruhida birinchi o‘rinni egalladi, ammo azaliy savolga javob topilmay qoldi: raqib chuqur himoyalanadigan bo‘lsa, qanday yo‘l tutiladi? Gana bilan o‘yindan keyin Tomas Tuxelga savollar paydo bo‘ldi, uning futboli tig‘iz himoyaga qarshi hech narsa qila olmasligi haqida tanqidlar yangradi. Qolaversa, keyingi turda Panama ham quyi blokda himoyalanganida ancha vaqtgacha darvozaga yo‘l topilmadi va faqat Bellinghemning mahorati evaziga himoya devori buzib o‘tildi.

Kongoliklar ham raqibning kamchiliklaridan kelib chiqib, himoyaviy o‘yin uslubini tanlashi tayin. Qolaversa, afrikaliklar guruh bosqichida qarshi hujumlarda qanday o‘ynashini namoyish etgan, tarkibda Yevropa chempionatlarida chiniqqan kuchli futbolchilar yetarlicha.

Inglizlar bu raqib to‘sig‘idan o‘ta olsa, 1/8 finalda turnir mezbonlaridan biri bo‘lgan Meksikaga ro‘baru keladi. Chorakfinaldagi ehtimoliy raqib Braziliya va Norvegiya juftligi g‘olibi bo‘ladi.

Belgiya – Senegal

2 iyul, 01:00. Lumen Field, Sietl

1/16 finaldagi eng intrigali juftlik. Belgiya va Senegal guruh bosqichini juda qiyin boshladi va faqat oxirgi turga kelib ilk g‘alabalariga erishdi. Ikki jamoa ham uchinchi turda beshtadan gol urib, yirik hisoblarda g‘alaba qozondi (raqiblar kamtarona Yangi Zelandiya va Iroq bo‘lgani ham bunga sabab). Va shunday savol tug‘iladi – bu bir lahzalik chaqnashmidi yoki motor endi qizib ishga tushmoqdami?

Rudi Garsiya so‘nggi o‘yinda Lukakuni zaxirada qoldirgan va Trossarga ishonch bildirgan, «Arsenal» hujumchisi bu ishonchni oqlab, dubl rasmiylashtirgandi. Ammo Romelu ham zaxiradan o‘yinga qo‘shilgan va o‘z nomini tabloga yozdirib qo‘ygandi. Shunday ekan, Rudi Garsiya qarshisida qiziq dilemma paydo bo‘ladi, u bu safar hujum markaziga kimni tushiradi. Ammo bu ikkinchi darajali masala, asosiy vazifa esa 35 yoshli De Bryuyne zimmasida, u Tilemans va Onana bilan birgalikda maydon markazida nazoratni ta’minlashi talab etiladi.

Himoya chizig‘i esa u qadar ishonchli ko‘rinmayapti, Teat, Mele, De Kyuyper, Kastan kabi futbolchilar Mane, Jyekson, Sarr, Ndiay kabi yulduzlardan iborat hujum chizig‘ini to‘xtatishi kerak. Afrikaliklar – bu safargi jahon chempionatining eng vertikal va tezkor jamoalaridan biridir, bu esa «oltin» avlodi bilan so‘nggi yirik turnirga kelgan belgiyaliklar uchun jiddiy muammolar keltirib chiqarishi mumkin.

Bu juftlik g‘olibi keyingi bosqichda AQSh – Bosniya va Hersegovina juftligi g‘olibiga qarshi maydonga tushadi, chorakfinaldagi ehtimoliy raqiblar Ispaniya yoki Portugaliyadan biri bo‘ladi, u yerda Belgiya ham, Senegal ham favorit sanalmaydi.

AQSh – Bosniya va Hersegovina

2 iyul, 05:00. Levi’s Stadium, Santa-Klara

Ushbu o‘yin atrofidagi intrigani amerikalik jurnalist, ABC7 telekanali boshlovchisi Ebigeyl Veles qizdirib berdi: u efirda Bosniyani xaritadan topa olmasligi, ushbu mamlakat haqida hech narsa bilmasligi va bilishni ham istamasligini aytdi. Ijtimoiy tarmoq foydalanuvchilari uni geografiyani bilmaslik va kalondimog‘likda ayblashmoqda, bosniyalik futbolchilar esa bundan xabardorligi va maydonga o‘z mamlakati dong‘ini dunyoga yoyish ishtiyoqida tushishi tayin.

Albatta, AQSh – ushbu juftlikda favorit va guruh bosqichining so‘nggi turida Turkiyadan uchralgan mag‘lubiyat chalkashtirmasligi kerak, chunki o‘shanda Pochettino maydonga ikkinchi tarkibni tushirgandi. Shunday ekan, jamoaning asosiy futbolchilari 1/16 final o‘yiniga tetik holda yetib kelishadi. Amerikaliklar o‘z hujumlarini qanotlar orqali uyushtirishga, maydon markazida to‘pni olib qo‘yib, tezkor qarshi hujumlarga o‘tishga hamda oldingi chiziqdagi Pulishich va Balogunni tezkor to‘p bilan ta’minlashga harakat qilishi aniq.

O‘z navbatida, Bosniya standart vaziyatlarga va Maxmich hamda Alaybegovich kabi yosh vingerlarining individual mahoratiga tayanadi. Umuman, bolqonliklar jamoasi guruh bosqichini kuchli o‘tkaza olmadi va faqat autsayder Qatar bilan o‘yinda o‘zini ko‘rsatdi. Shunday ekan, Sergey Barbarez shogirdlari kuchli hujum chizig‘iga ega raqibga qarshi himoyaviy o‘yin uslubi tanlashi va qarshi hujumlardan omadini izlashi tayin. AQSh uchun bu o‘yin yetuklik sinoviga aylanishi mumkin, Bosniyaning esa yo‘qotadigan narsasi yo‘q, ushbu jamoa uchun pley-offda ishtirok etishning o‘zi katta natija. Turnir mezbonlaridan esa muxlislar ko‘p narsa kutishmoqda.

Ushbu juftlik g‘olibiga keyingi bosqichda Belgiya va Senegaldan biri raqib bo‘ladi. Shunday ekan, agar AQSh Bosniya to‘sig‘idan o‘ta olsa, chorakfinalga borish uchun imkoniyat yuzaga keladi, bu esa jamoa uchun katta muvaffaqiyat hisoblanadi.

Source link

Yana bir o‘yin ob-havo tufayli o‘z vaqtida boshlanmadi, yana bir futbolchiga og‘zini qo‘li bilan to‘sgani uchun qizil ko‘rsatildi, turnirda muvaffaqiyatsizlikka uchragan yana bir jamoada bosh murabbiy iste’foga chiqarildi.

2026 yilgi jahon chempionatida pley-off uchrashuvlari davom etmoqda. 30 iyun kuni kechqurun va 1 iyulga o‘tar kechasi yana uchta uchrashuv o‘tkazildi – Norvegiya Kot-d’Ivuar to‘sig‘idan o‘tdi (2:1), Fransiya Shvetsiyani tor-mor etdi (3:0), Meksika esa Ekvadorni (2:0) mag‘lub etdi.

Norveglar eshkak eshishda davom etmoqda

Kot-d`Ivuar – Norvegiya 1:2

Gollar: Nusa, 39 (0:1). Diallo, 74 (1:1). Holand, 86 (1:2)

Kot-d`Ivuar: Fofana, Kossunu, Agbadu, Konan (Gessan, 90+3), Due, Sangare, Kesse, Oulai (Vai, 60), Diomande (Ture, 90+3), Pepe (Diakite, 87), Bonni (Diallo, 60)

Norvegiya: Nyulann, Ayyer, Heggem, Volfe, Pedersen (Eursnes, 83), Berge, Berg, Edegor, Nusa (Bobb, 71), Syorlot (Shelderup, 71), Holand

Ogohlantirish: Nusa, 45

1/16 finalda Kot-d’Ivuar bilan o‘ynashdan oldin Norvegiya guruh bosqichining 3-turida Fransiyaga yirik hisobda yutqazgandi (1:4). Lekin skandinavlarning bu muvaffaqiyatsizligiga murabbiy o‘yinga to‘liq ikkinchi tarkibni tushirgani sabab bo‘ldi, u endi bu qarori to‘g‘ri bo‘lganini isbotlashi talab etilardi.

Qaysidir ma’noda bu qurbonlik o‘zini oqladi – tanaffus arafasida Antonio Nusa Martin Edegorning uzatmasini golga aylantirib, Norvegiyani hisobda oldinga olib chiqdi. Ammo ikkinchi bo‘lim o‘rtalarida afrikaliklar muvozanatni tiklashdi – Amad Diallo o‘ng qanotdan reyd uyushtirib, himoyachilar va darvozabonni dog‘da qoldirdi.

O‘yin ssenariysi yana qo‘shimcha bo‘limlar va penaltilar seriyasi (pley-offda allaqachon ikkita o‘yinda shunday bo‘lgandi) va’da qilayotgandi. Ammo Erling Holand ortiqcha yarim soat o‘ynashni istamadi va o‘yin yakunlanishiga oz vaqt qolganida norveglarga g‘alaba keltiruvchi golni urdi.

Uning goli oldingi ikki gol kabi chiroyli chiqmadi, chunki u bo‘sh darvoza qarshisida to‘pga shunchaki teginib qo‘yishi yetarli bo‘ldi, lekin aynan shu gol skandinavlar tarixda ilk bor jahon chempionati 1/8 finalida o‘ynashini ta’minladi, keyingi bosqichda jamoani Braziliyaga qarshi o‘yin kutmoqda.

«Men o‘ziga xos birdamlikni his qilyapman, bu odamga qattiq ta’sir qiladi. Biz bu sayohatdan zavq olyapmiz», – deya xursandchiligini jurnalistlar bilan bo‘lishgan Holand.

Mbappe va jamoasi uchun yengil sayr

Fransiya – Shvetsiya 3:0

Gollar: Mbappe, 45 (1:0). Barkolya, 53 (2:0). Mbappe, 74 (3:0)

Fransiya: Menyan, Upamekano, Saliba, Din (Ernandez, 78), Kunde (Gyusto, 75), Tchuameni, Rabio, Olise (Sherki, 85), Barkolya, Dembele (Due, 75), Mbappe (Mateta, 85)

Shvetsiya: Setterstrem, Lagerbilke, Lindelef, Gudmundsson, Svensson (Svanberg, 82), Bergvall (Zeneli, 65), Ayyari (Nyugren, 82), Stroud (Ali, 65), Elanga, Isak (Nilsson, 89), Yokeresh

Fransuzlar guruh bosqichi birinchi turida Senegalga qarshi kechgan o‘yinning (3:1) birinchi bo‘limini hisobga olmasa, turnirda umuman raqobat his qilmayapti. 1/16 finalda Shvetsiyaga qarshi o‘yin ham shunday bo‘ldi.

Dide Desham shogirdlari birinchi bo‘limda to‘liq ustunlikka erishdi: Kilian Mbappe ofsayddan gol urdi, Olise istalgan nuqtadan turib zarba berdi va bir marta «qaychi» uslubidagi zarbasi bilan to‘pni ustunga tekkizdi. Bo‘lim oxiriga kelib «Real» forvardi jarima maydoni burchagida to‘pni qabul qilib oldi va bir necha raqibni aldab o‘tib, darvozani ishg‘ol etdi. Shundan keyin yaqinda onasini yo‘qotgan murabbiyining oldiga chopdi.

Tanaffusdan keyin o‘yin kartinasi o‘zgarmadi. Ikkinchi bo‘lim boshidayoq Bredli Barkolya hisobdagi ustunlikni oshirdi, Mbappe esa dublni rasmiylashtirdi va turnir to‘purarlari ro‘yxatida birinchi o‘ringa yetib oldi: endi Kilianda ham bu bosqich o‘yinini hali o‘tkazmagan Lionel Messiniki kabi oltita gol bor. Bundan tashqari, u barcha jahon chempionatlarida urilgan gollar soni (18) bo‘yicha ham argentinalik hujumchini (19) ta’qib etmoqda.

1/8 finalda Fransiya Paragvayga qarshi o‘ynaydi. Shvetsiya esa F guruhining qolgan vakillari ortidan turnirdagi ishtirokini erta yakunladi: bungacha Yaponiya Braziliyaga (1:2), Niderlandiya Marokashga yutqazgandi (1:1, penaltilar seriyasida 2:3).

Meksika 40 yillik tavqi la’natni bekor qildi

Meksika – Ekvador 2:0

Gollar: Kiniones, 22 (1:0). R. Ximenes, 31 (2:0)

Meksika: Ranhel, Montes, Vaskes, Galyardo, Sanches, Lira, Romo (Vargas, 73), Mora (Guterres, 58), Kiniones (Reyyes, 80), Alvarado (Pineda, 80), R. Ximenes (S. Ximenes, 74)

Ekvador: Galindes, Ordones (Presiado, 46), Pacho, Inkapiye, Franko (Medina, 46), Vite, Moy. Kaysedo, Angulo (Paes, 79), Yyeboa (X. Kaysedo, 79), Valensiya (Rodriges, 59), Plata

Ogohlantirishlar: Franko, 45. Paes, 90. Moy. Kaysedo, 90

Chetlatish: Inkapiye, 90

Meksika mezbonlik imtiyozidan a’lo tarzda foydalanmoqda. Jamoa guruh bosqichida o‘z fanatlari qarshisida kechgan o‘yinlarda uchta g‘alabaga erishgan va bu o‘yinlarda birorta gol o‘tkazib yubormagandi. 1/16 finalda guruh bosqichining so‘nggi turida qahramonlik ko‘rsatib, Germaniyani mag‘lub etgan va pley-offga chiqqan Ekvador kutayotgandi.

O‘yin boshlanishi noqulay ob-havo tufayli bir soatga kechikdi. Ammo shunday havo tufayli o‘yinda suv ichish uchun tanaffus va to‘xtalish ham bo‘lmadi. O‘yin boshlanganida janubiy amerikaliklar Germaniya bilan o‘sha o‘yinda katta kuch sarflab yuborgani oydinlashdi. Meksika 30-daqiqaga kelib ikki gol farqi bilan oldinga chiqib olgandi: Hulian Kiniones va Raul Himenes bir-biridan chiroyli gollar muallifiga aylanishdi.

O‘yinning qolgan qismida mezbonlar ekvadorliklarga oldingi chiziqda hech qanday imkoniyat berishmadi va jahon chempionati pley-off bosqichlarida so‘nggi 40 yil ichida ilk g‘alabasiga erishdi. «Atsteka» o‘yingohini to‘ldirib o‘tirgan muxlislar 80-daqiqadayoq g‘alabani nishonlay boshlashdi.

O‘yinga qo‘shib berilgan daqiqalarda esa ekvadorliklar himoyachisi Piyero Inkapiye ham futbolga kiritilgan yangi qoidadan jabrlandi – u meksikaliklar hujumchisi Santiyago Himenes bilan gaplashayotganida og‘zini qo‘li bilan to‘sdi va raqib darhol hakamlarni bunga e’tibor qaratishga chaqirdi. Bosh hakam Slavko Vinchich esa monitor qarshisiga borib, vaziyatni ko‘rib chiqdi va «Arsenal» futbolchisini maydondan chetlatdi.

Bu turnirda shu kabi holat uchun berilgan ikkinchi qizil kartochka bo‘ldi – guruh bosqichida Paragvay hujumchisi Migel Almiron ham Turkiya bilan o‘yinda xuddi shunday harakat uchun jazolangandi.

1/8 finalda Meksika 5 iyul kuni Mexikoda Angliya – Kongo DR juftligi g‘olibiga qarshi maydonga chiqadi.

Kuman iste’foga chiqdi

Niderlandlar jahon chempionatida yana muvaffaqiyatsizlikka uchradi – jamoa 1/16 finaldayoq Marokashga yutqazdi (1:1, penaltilar seriyasida 2:3). «To‘qsariqranglilar» jamoasi fanatlari orasida o‘yindan keyin darhol Ronald Kuman iste’fosi haqida xabarlar paydo bo‘lgandi. Mutaxassisning o‘zi avvaliga kelajagi borasida xotirjam ekanini aytgandi, ammo yakunda iste’foga chiqdi.

«Kecha tunda Niderlandiya milliy jamoasi bosh murabbiyi lavozimidagi faoliyatimni yakunlashga qaror qildim. Ishim shunday yakunlangani alamli. Hammamiz tarixga kirishimiz mumkin bo‘lgan jahon chempionatini orzu qilardik. Afsuski, bunday bo‘lmadi. Bu natijadan mendan ko‘ra ko‘proq hafsalasi pir bo‘lgan odam yo‘q. Bosh murabbiy sifatida natija uchun men javobgarman. Men har doim bu mas’uliyatni his qilganman va doimo his qilaman», – deya yozdi 63 yoshli mutaxassis bayonotida.

Bu jahon chempionatida qatnashgan jamoalarda beshinchi iste’fo bo‘ldi: Tunis guruh bosqichining birinchi turidan keyinoq Sabri Lyamushiga javob bergandi. Guruh bosqichi yakunlanganidan keyin Hen Men Bo (Janubiy Koreya), Stiv Klark (Shotlandiya) va Miroslav Koubek (Chexiya) ham iste’foga chiqdi. Bundan tashqari, Urugvay bilan jiddiy muvaffaqiyatsizlikka uchragan Marselo Biyelsaning ham kursisi qimirlab qolgan. Shuningdek, Saudiya Arabistoni futbol federatsiyasi prezidenti Yosir Al-Mishal qoniqarsiz natija tufayli (guruhda 2 ochko bilan oxirgi o‘rin) iste’fo bergan.

Amerikaliklar Eron chiqib ketganidan xursand

AQSh ichki ishlar vaziri Markveyn Mallin Eron turnirni tark etganidan xursand ekanini yashirmadi. Ushbu mulozim bu natijadan keyin hissiyotlariga erk berganini aytgan.

«Ular uchib ketganidan va qaytib kelmasligidan mamnunman. Ularning vizalarini qaytarib olib, AQSh hududini tark etishlari mumkinligini aytganimizda xursand bo‘ldim. Bir-ikkita qo‘shiq aytib, quvonchdan raqsga tushgan bo‘lsam ham kerak… Bu turnirda ulardan ko‘ra ko‘proq muammoli bo‘lgan birorta jamoa yo‘q edi», – deya qayd etgan Mallin.

AQSh va Eron bir necha oydan buyon urush holatida, shu tufayli tomonlarning futbol sohasidagi munosabatlari ham keskinlikni saqlab qolayotgandi.

Navbatdagi o‘yinlar

Jahon chempionati pley-off bosqichi davom etmoqda — 1 iyul kuni kechqurun va 2 iyulga o‘tar kechasi quyidagi uchrashuvlar o‘tkaziladi:

21.00. Angliya – Kongo DR

01.00. Belgiya – Senegal

05.00. AQSh – Bosniya va Hersegovina

Source link

FIFA saytida JCh-2026 guruh bosqichi davomida urilgan 12 ta gol orasidan eng chiroylisini aniqlash uchun ovoz berish jarayoni yakunlandi.

O‘zbekiston milliy jamoasi sardori Eldor Shomurodovning Kongo DR darvozasiga urgan goli eng chiroyli deb topildi.

Hujumchi o‘yinning 10-daqiqasida jarima maydoniga oshirilgan to‘pga yetib borib, o‘tkir burchak ostida turganiga qaramay, to‘pni parashyut uslubida raqib darvozaboni ustidan oshirib tashlagan va hisobni ochgan edi.

FIFA bu vaziyatga shunday baho berdi: «Santimetrigacha aniq hisoblangan va mukammal ijro etilgan bu gol O‘zbekistonning jahon chempionatidagi debyutining eng yorqin lahzasi bo‘ldi».

Shomurodovning goli Lionel Messi, Kilian Mbappe va Vinisius Junior kabi yulduzlar gollaridan o‘zib ketdi.

Source link

30 iyun kuni kechqurun va 1 iyul tongida jahon chempionati 1/16 bosqichi doirasida Kot-d’Ivuar – Norvegiya, Fransiya – Shvetsiya hamda Meksika – Ekvador juftliklari ishtirokidagi o‘yinlar bo‘lib o‘tadi.

Kot-d’Ivuar – Norvegiya

30 iyun, 22:00. AT&T Stadium, Arlington

Bu jamoalar o‘yinida kurash, hujumlar va gollar ko‘p bo‘lishini taxmin qilish mumkin. Skandinavlar jamoasi ustozi Stole Solbakken Kot-d’Ivuar – bu safargi jahon chempionatining jismoniy jihatdan eng kuchli jamoalaridan biri ekanini e’tirof etdi. U bilan bahslashish qiyin, afrikaliklarda kuchli himoya chizig‘i, Pepe, Diallo va Diomande qiyofasida kuchl qanotlar mavjud. Fil suyagi qirg‘og‘i jamoasi guruh bosqichida Ekvador va Germaniya bilan o‘yinlarda teng kurash taklif etib, bu o‘yinlarda 4 ochko oldi, Kyurasaoga qarshi o‘yinda esa ortiqcha kuch sarflamasdan g‘alaba qozondi va o‘z tarixida ilk bor pley-offga chiqdi. Aynan ushbu jamoa turnir kashfiyotiga aylanishi mumkin.

Ammo Solbakken aynan pley-offning birinchi o‘yiniga kuch tejash uchun guruh bosqichining so‘nggi turida  Fransiyaga qarshi kechgan bahs uchun ikkinchi tarkibni tashladi va Norvegiyaning asosiy tarkibi a’zolari jismoniy tayyorgarlik borasida raqibdan ortda qolmasligi tayin. Jamoa hujum chizig‘i vakillari – Holand va Nusa tezkor qarshi hujumlarda foydalanishga tayyor turadi. Qolaversa, norveglar jamoasida bir-birini tushunib o‘ynashda muammo yo‘q, jamoa sardori Edegorning nostandart qarorlari esa o‘yin taqdirini hal qilishi mumkin. Bundan tashqari, skandinavlar turnir davomida o‘zini juda kamtarona tutmoqda – Senegal bilan o‘yinda pley-off masalasi muddatidan oldin hal qilinganidan keyin Holand futbolchilar o‘zidan favorit yasab olmasligi kerakligini aytgandi.

Umuman, bu oqshom ikki jamoadan birining g‘alabasi sensatsiya sifatida baholanmaydi, bu jamoalardan biri keyingi bosqichda Braziliya bilan o‘yinda sensatsiya qilishi mumkin.

Fransiya – Shvetsiya

02 iyul, 02:00. New York/New Jersey Stadium, Nyu York

Shvetsiya guruhni barqaror o‘tkaza olmadi va ikkinchi turda Niderlandiya bilan o‘yinda og‘riqli mag‘lubiyatni qabul qilib oldi (1:5). Grem Potter ushbu o‘yinda niderlandlarning qanotlariga bo‘sh hududlar taqdim etib, taktik jihatdan muvaffaqiyatsizlikka uchradi. Kuchli vingerlarga ega bo‘lgan Fransiya bilan bunday xatoni takrorlash halokatli tus olishi tayin. Qolaversa, jamoaning asosiy himoyachilaridan biri Xiyen jiddiy jarohat oldi va bu skandinavlar jamoasi uchun juda yomon xabar. Boshqa tomondan, shvedlar himoya chizig‘ini yuqori o‘rnatadigan fransuzlarni qarshi hujumlarda jazolashi mumkin, buni guruhning birinchi turida Senegal ko‘rsatib bergandi. Shvetsiyaning hujumdagi asosiy qurollari Yokeresh, Elanga va Isak tezkor futbolchilar bo‘lib, himoyachilar ortiga ochilishni juda yaxshi uddalashadi.

Shuning uchun Fransiya bosh murabbiyi Dide Desham Saliba tezroq tiklanishini, Rabio, Kone va Tchuameni (ulardan ikki nafari boshlang‘ich tarkibga kirishi aniq) kabi yarimhimoyachilar maydon markazida ishonchli o‘ynashidan umid qiladi. Uning asosiy kuziri esa – hujum chizig‘idir. Mbappe va Dembele ajoyib sport formasida, Olise ham o‘yindan o‘yinga ochilib bormoqda. Uch ranglilar jamoasida gol urishda muammo bo‘lmasligi tayin, ammo himoya chizig‘iga savollar saqlanib qolmoqda.

Fransuzlar qiyin setkaga tushgandi, lekin bu tomondagi Germaniya va Niderlandiya allaqachon turnirni tark etdi, endi jamoa nimchorakfinalga chiqsa, Paragvay bilan o‘ynaydi, chorakfinaldagi ehtimoliy raqib Marokash va Kanadadan biri bo‘ladi, agar yarimfinalgacha yetib borilsa – Portugaliya, Ispaniya yoki Belgiyadan biri to‘g‘ri kelishi mumkin.

Meksika – Ekvador

1 iyul, 06:00. Estadio Azteca, Mexiko

Meksikaliklar A guruhini ideal ko‘rsatkichlar bilan yakunlashdi: 3 o‘yinda 9 ochko va birorta gol o‘tkazib yuborilmadi. Ammo jamoa bosh murabbiyi Haviyer Agirre shunday muvaffaqiyatli startdan keyin ham o‘yin sifatidan norozi va kuchni 90 daqiqaga taqsimlashda muammolar kuzatilayotganini aytmoqda. Shu bilan birga, turnir mezbonlari pley-offning ilk o‘yinini Mexikodagi «Atsteka» stadionida o‘tkazadi.

Tarkibdagi ijrochilar bo‘yicha meksikaliklar Ekvadordan ortda qoladi, lekin Janubiy Amerika jamoasi guruh bosqichini barqaror o‘tkaza olmagani va pley-offga katta qiyinchilik bilan chiqqanini inobatga olib, jamoalarning imkoniyatlarini teng baholash mumkin. Ekvadorliklar himoyada yaxshi, ammo oldingi chiziqda sifat yetishmayapti. Jamoa dastlabki ikki turda Kot-d’Ivuar va Kyurasao darvozasi tomon o‘nlab zarbalar yo‘llab, birorta gol urolmagandi. Germaniya bilan o‘yinda esa ekvadorliklar oxirigacha harakat qilishdi va iroda ko‘rsatib, g‘alabani ilib ketishdi.

Ushbu juftlik g‘olibi, 1/8 finalda katta ehtimol bilan Angliyaga to‘qnash keladi. Keyingi bosqichga kim chiqsa ham, favoritga qarshi ikkinchi raqam ostida harakatlanishni biladi. Undan oldin esa Meksika ham, Ekvador ham o‘zaro uchrashuvda barcha kuchini maydonga tashlashiga to‘g‘ri keladi. Bu jamoalar ham ikki teng kuchli raqiblardir.

Source link

Prezident futbolchilar muhim tajriba orttirgani, aybdorlarni qidirish va ortiqcha his-tuyg‘ular bilan e’tiroz bildirish esa «xalqimizga xos ish emas»ligini ta’kidlagan. Davlat rahbari katta g‘alabalar hali oldinda ekanini aytgan.

Foto: Prezident matbuot xizmati

Prezident Shavkat Mirziyoyev yoshlar bilan uchrashuvda O‘zbekiston milliy jamoasining futbol bo‘yicha jahon chempionatidagi ishtirokiga to‘xtalib o‘tdi.

«Milliy jamoamizning AQSh va Meksika maydonlaridagi o‘yinlarini butun xalqimiz bilan bir tan-u, bir jon bo‘lib, katta his-hayajon bilan kuzatib bordik. Futbolchilarimiz FIFA reytingida 5-o‘rinda turgan Portugaliya, 13-o‘rindagi Kolumbiya hamda ko‘plab futbolchilari Yevropaning yetakchi klublarida to‘p suradigan Kongo jamoalari bilan o‘tkazilgan o‘yinlar orqali o‘ziga tajriba orttirdi, mundial nafasini his qildi desak, to‘g‘ri bo‘ladi. Abbos Fayzullayev va Eldor Shomurodov jahon chempionatidagi ilk gollarini kiritib, xalqimizga xursandchilik bag‘ishladi.

Milliy terma jamoamizning jahon chempionatidagi ishtiroki to‘g‘risida turli fikrlar bildirilmoqda.

Lekin vatanimiz sharafini himoya qilgan terma jamoamiz a’zolariga ortiqcha his-tuyg‘u bilan e’tiroz bildirish, ulardan ayb qidirish xalqimizga xos ish emas. Aksincha, bugun ularni qo‘llab-quvvatlash, ruhini ko‘tarish har qachongidan ham muhim», – dedi prezident.

Katta g‘alabalar hali oldinda ekani, buning uchun futbolni rivojlantirishga yanada keng sharoitlar yaratilishi, bu sohaga investitsiya ko‘paytirilishi ta’kidlandi. Eng avvalo, bolalar futboliga e’tibor kuchaytirilib, mazkur sport umummilliy harakatga aylantiriladi.

Kelasi yilning yanvarida Saudiya Arabistoni maydonlarida o‘tkaziladigan futbol bo‘yicha Osiyo kubogiga tayyorgarlik hozirdan boshlanadi.

«Biz jamoamizga ishonamiz va ushbu musobaqada ham butun xalqimiz bilan qo‘llab-quvvatlaymiz!» – dedi prezident.

Source link