Sport
«MYu» «Tottenhem»ga qarshi, Italiyada derbi, «Barselona»da yana qiyin safar. Kun o‘yinlari anonsi
Bu yil hisobidan terma jamoalarga ajratilgan so‘nggi tanaffus oldidan klublar o‘rtasidagi chempionatlarda muhim tur o‘yinlari bo‘lib o‘tadi. Angliyada so‘nggi yillarning eng muvaffaqiyatli va eng muvaffaqiyatsiz top-klublari o‘zaro bahslashsa, Italiyada Spaletti Turin derbisida sinovdan o‘tadi. Fransiyada ham juda qiziqarli o‘yin bor. Xullas bu safar ham zerikmaymiz.
TOTTeNHEM – MANCheSTeR YuNAYTeD (8 noyabr, 17:30)
Turnir jadvalida qo‘shni bo‘lib turgan bu ikki jamoada qiziq o‘xshash jihati bor. “Tottenhem” oxirgi paytlarda o‘z maydonida juda yomon natijalar qayd etayotgan bo‘lsa, “Manchester Yunayted”ning safar o‘yinlari shunaqa. Londonliklar so‘nggi bir yilda APL doirasida o‘tkazgan 20 uy uchrashuvining atigi 3 tasini o‘z foydasiga hal qilgan xolos. Ushbu mavsumni “Byornli” ustidan 3:0 hisobidagi ishonchli g‘alaba bilan boshlagan Tomas Frank jamoasi keyingi o‘yinlarda yuta olmadi. Hatto autsayder “Vulverhempton” ham Londondan ochko olib ketishga muvaffaq bo‘ldi. “Manchester Yunayted”ning bir yildagi safar o‘yinlari ham deyarli shunaqa ko‘rsatkich – atigi 4 g‘alaba. Ya’ni kim yutishidan qat’i nazar qonuniyatga ters nimadir bo‘ladi.
Boshqa seriya ham bor – “Tottenhem” so‘nggi yillarda “Manchester Yunayted”ga qarshi o‘zaro o‘yinlarda ancha muvaffaqiyatli. 2022/2023 mavsumida boshida Erik ten Xag boshchiligida “MYu” “Old Trafford”da 2:0 hisobida ustun kelgan va bu hozircha “qizil iblislarning” oxirgi g‘alabasi bo‘lib turibdi. Ayniqsa o‘tgan mavsumda “Tottenhem” chin ma’noda “MYu”ning kriptonitiga aylanib oldi. APL doirasida har ikki o‘yinni o‘z foydasiga hal qilgan “Tottenhem” ham Liga kubogida raqibini musobaqadan chiqarib yubordi, ham Yevropa Ligasi finalida 1:0 hisobida yutib, Amorim jamoasini ham sovrinsiz, ham Chempionlar Ligasisiz qoldirdi.
Darvoqe, Chempionlar Ligasidagi ishtirok bu o‘yinda mezbonlarga halaqit berishi mumkin. Chunki yevrokuboklarsiz qolgan “Manchester Yunayted” haftada bir rejimida jismoniy tomondan yaxshiroq ko‘rinishini mumkin. “Tottenhem” garchi yirik g‘alabaga erishgan bo‘lsa-da, hafta o‘rtasida “Kopangagen” bilan o‘ynagani mazkur uchrashuv uchun tayyorgarlik muddatini qisqartirgani tabiiy.
Albatta, o‘yinlarning ko‘proq ekani jarohatlarga ham o‘z ta’sirini o‘tkazmay qolmaydi. “Tottenhem” mavsumni Kulushevski, Meddison kabi yetakchilarsiz boshlagan bo‘lsa, endi bugungi liderlarni ham boy bermoqda. Xususan Muhammad Kudusning maydonga tushishi so‘roq ostida qolmoqda. Undan tashqari, Bissuma, Solanke, Bergval kabi asosiy tarkib futbolchilarida ham jarohatlar bor. Lekin Romeroning qaytgani yaxshi xabar, zero uning van der Veyn bilan juftligi ancha ishonchli sanaladi. O‘tgan mavsumning muvaffaqiyatli tugashida ham, “MYu”ga qarshi kechgan uch bahsda “Tottenhem” o‘z darvozasini daxlsiz saqlashida ham bu juftlikning mehnati katta. Mehmonlar safida esa Kobi Maynu maydonga tusha olmaydi. U mashg‘ulotlarda kichik jarohat olgani aytilmoqda. Mashg‘ulotlarga qaytgan Lisandro Martines esa katta ehtimol bilan terma jamoalar bilan bog‘liq tanaffusdan so‘ng o‘yinlarda ishtirok etishni boshlasa kerak.
YuVeNTUS – TORINO (8 noyabr, 22:00)
“Yuventus” Tudorni iste’foga chiqargach, vaqtinchalik murabbiy yordamida “Udineze”ni, keyin esa Spaletti bilan “Kremoneze”ni mag‘lubiyatga uchratdi. “Sporting”ga qarshi durang biroz aldamchi bo‘lishi mumkin, zero bu o‘yinda “Yuventus” 18 dan oshiq zarba bergan va 9 marta to‘p darvozaga aniq yetib bordi ham. Rui Sulvining ishonchli o‘yini va turinlik hujumchilarning omadsizligi evaziga 1:1 hisobi saqlanib qolindi. Shunday bo‘lsa-da, jamoa o‘yinida muammolar hali to‘liq hal bo‘lmaganini ham ta’kidlash lozim. Shunchaki murabbiy almashishi orqali keladigan pozitiv kayfiyat saqlanib turibdi va futbolchilar avvalgiga nisbatan ko‘proq harakat qilayotgandek tuyulmoqda. Odatda, bunday vaziyatlarda muvaffaqiyatli seriya yordamida turnir jadvalida jiddiy ko‘tarilish yaxshi turtki bo‘ladi. Aks holda jamoa yana eski kayfiyatga qaytib qolishi hech gap emas.
“Torino”ga qarshi o‘yin mana shunday ijobiy seriyani davom ettirish uchun yaxshi. Ham derbi, demak futbolchi va muxlislarni alohida chog‘lantirish ehtiyoji yo‘q. Ham o‘yin “Yuventus”ning uy stadionida bo‘lib o‘tadi.
O‘z navbatida “Torino” ham anoyi raqib emas. Ayni Baroni shogirdlarining mag‘lubiyatsiz seriyasi besh uchrashuvga yetdi. Raqiblar orasida “Latsio”, “Napoli”, “Bolonya” kabi kuchli raqiblar bo‘lgani, “Torino” hatto amaldagi chempion ustidan g‘alaba qozongani ham mezbonlarga oson bo‘lmasligini ko‘rsatadi. Shu bilan birga, garchi “Torino” ayniqsa o‘z maydonidagi bahslarda “Yuventus”ga munosib qarshilik ko‘rsatib kelsa-da, odatda mehmon sifatida natijalar yoxshi emas. Xususan “Yuventus” mezbon bo‘lgan oxirgi 15 derbining 12 tasini o‘z foydasiga hal qilgan. Uch uchrashuv esa durang bilan yakunlangan.
“Yuventus” tarkibidagi yo‘qotishlarga kelsak, Gleyson Bremer uzoq muddatga safdan chiqqani ma’lum. Shuningdek, Kabay “Vilyareal”ga qarshi Chempionlar Ligasi o‘yinida jarohat olgandi. U endi terma jamoalar bilan bog‘liq tanaffusdan so‘ng maydonga qaytsa kerak. Mehmonlar safida deyarli yo‘qotishlar yo‘q. Faqat bosh murabbiy Marko Baroni qizil kartochka olgani sababli derbida maydon chetida bo‘lmaydi.
MANCheSTeR SITI – LIVeRPUL (9 noyabr, 21:30)
“Liverpul” bir necha mag‘lubiyatlar bilan davom etgan inqirozdan so‘ng chiqib olgandek. So‘nggi turda “Aston Villa”, Chempionlar Ligasida esa “Real” mag‘lub etildi. Har ikki g‘alaba ham juda ishonchli va yirik hisobda yakunlanishi mumkinligini ham e’tirof etish kerak. Ammo boshqa tarafdan, bu o‘yinlarda raqiblar “Liverpul” uchun aslida qulay bo‘lgan uslubda to‘p surganini ham unutmaslik kerak. “Liverpul”ning qator mag‘lubiyatlariga asosiy sabablardan biri raqiblarning uzun paslar bilan o‘ynagani, ko‘proq ikkinchi to‘plar, o‘tish lahzalari muhim darajaga chiqqanini ham unutmaslik kerak. Balkim bir paytlar Yurgen Klopp uchun bu ayni muddao bo‘lardi, ammo Arne Slot o‘yinlarni nazorat qilishga intiladi. O‘tgan mavsumdagi chempionlikning asosiy poydevori aynan mana shu qadriyat bo‘lgandi.
“Manchester Siti” esa avvalgi Pep jamoalaridan farq qiladi. Aynan moslashuvchanligi bilan. Masalan Manchester derbisida jamoa qarshi hujumda o‘ynab yirik g‘alabaga erishdi. “Arsenal”ga qarshi o‘yinda butun vaqtni himoyalanib o‘tkazdi. Ba’zi o‘yinlarda esa aksincha, ko‘proq to‘pni nazorat qiladigan va chiziqlar orasida o‘ynaydigan jamoani, ya’ni eski “Manchester Siti”ni ko‘ryapmiz. Xo‘sh, o‘z maydonida, g‘alaba uchun o‘ynashidan kelib chiqsak, Pep Gvardiola birinchi raqamda o‘ynashni tanlaydimi yoki qo‘shnilari kabi uslubni tanlaydimi? Xoland bilan ikkinchi uslub ham ancha samarali bo‘lishi mumkinligini sezgandirsiz? “Liverpul” va “Manchester Siti” o‘yinida manchesterliklar vertikalroq o‘yinni tanlaydi, desak, bir necha yil oldin ishonish juda qiyin bo‘lardi. Buning ustiga murabbiy “Liverpul”da almashgan, “Manchester Siti”da emas.
Chempionlar Ligasida har ikki jamoa ham maydonga tushdi, ammo “Liverpul” o‘z o‘yinini bir kun oldin o‘tkazgani qo‘shimcha ustunlik bersa kerak. Ammo boshqa tarafdan “Real”ga qarshi o‘yin ham jismonan, ham emotsional jihatdan ancha ko‘p kuch talab qilganini ham unutmaslik lozim. “Manchester Siti” “Borussiya”ga qarshi o‘yin taqdirini deyarli birinchi taymdayoq hal qilib bo‘lgandi. Buning ustiga ayni damda manchesterliklar safida maydonga tushishi mumkin bo‘lgan futbolchilar ko‘proq ekani, “Liverpul”da esa aksincha, ko‘p futbolchilar yaxshi sport formasida emas, ham jarohatlanganlar ko‘proq ekanini ta’kidlash kerak.
Aniq o‘ynay olmaydiganlar ichida mezbonlardan Rodri va Kovachich xolos. “Liverpul” esa Frimpong, Alison Beker hamda Aleksandr Isaklarning yordamidan foydalana olmaydi.
Jamoalar tur oldidan ikkinchi va uchinchi o‘rinlarni egallab turganidan kelib chiqsak, bu o‘yin g‘olibi 2-o‘rinni va “Arsenal”ning asosiy ta’qibchisi rolini naqd qilib oladi.
LION – PSJ (10 noyabrga o‘tar kechasi, 00:45)
Parijliklar yozda klublar o‘rtasidagi jahon chempionati finaligacha borgach, mavsumoldi tayyorgarliklar ko‘ngildagidek bo‘lmasligi tabiiy edi, ammo Fransiya chempionati “PSJ” uchun shunaqaki, bemalol mavsum davomida tayyorgarlik va rasmiy o‘yinlarni birlashtirishi mumkin, zero Enrike jamoasi uchun haqiqiy mavsum bahordan boshlanadi.
Rostan ham shunday bo‘lyapti. Ayni paytda “PSJ” peshqadam bo‘lsa-da, juda ko‘p jamoalar yaqindan ta’qibda ekani, aksariyat o‘yinlarda jamoa qiynalayotgani sizni aldab qo‘ymasin – “PSJ”da hammasi joyida. Shunchaki, Enrike bir qator eksperimentlar qilyapti va bu muhim pallalarda qo‘l kelishi mumkin. Esingizda bo‘lsa, Enrikening xudi shundan munosabati o‘tgan mavsumda ham kuzatilgan. Bir nechta vingerlar va ularning o‘zaro almashinuvi yordamida samarali uslubni murabbiy sinay boshlagan, ilk o‘yinlarda, ayniqsa, Chempionlar Ligasida u pand berib, jamoa qiyin holatga tushib qolgandi ham. Lekin keyinchalik reja ishlay boshlagach, “PSJ” Yevropaning eng kuchli jamoasiga aylandi.
Hozir ham Enrike ba’zi g‘oyalarni sinab ko‘rmoqda. Hatto bir paytda 6 nafar hujumkor futbolchi bilan asosiy tarkibni tuzgan paytlari bo‘ldi. Ha, hozircha bu tushunarsiz, lekin o‘tgan yilga nisbatan farq bor. Enrikega bo‘lgan ishonch kuchli va bosim kamaygan. Murabbiy nimanidir biladi va albatta o‘xshaydi degan fikr ustivor.
Albatta, Fransiyada “PSJ”dan boshqa qiziqarli jamoalar ko‘p va ulardan biri “Lion” hisoblanadi. Jamoa aslida o‘tgan yili Yevropa Ligasi kashfiyoti bo‘lishi mumkin edi, ammo “Old Trafford”dagi drama lionliklarni yarim yo‘lda to‘xtatib qolganini eslaysiz. Keyin esa jamoaning bankrotligi bilan bog‘liq xabarlar ko‘paydi, xayriyatki, hammasi “Lion” va muxlislari uchun ko‘ngildagidek yakunlandi. Ayni paytda “Lion” Fransiya chempionatida “PSJ”dan atigi 4 ochko kam jamg‘argan holda kuchli oltilikdan joy olgan. Yevropa Ligasida ham ishlar yomon emas, so‘nggi turda Betisdagi mag‘lubiyatdan oldingi uch o‘yinni o‘z foydasiga hal qilgandi. Jamoa tarkibidagi Taliafiko, Xatebur, Tolisso, Gezzal kabi tajribali futbolchilarni har qanday raqib bilan cho‘chitish qiyin.
Afsuski, “PSJ”ga qarshi o‘yinda bir qator asosiy futbolchilar “Lion”ga yordam bera olishmaydi. Ayniqsa Malik Fofana. 20 yoshli belgiyalik hujumchi o‘tgan mavsum kashfiyotlaridan biri bo‘lgan va bir qator ingliz top klublari nazariga tushgandi. Hatto “Liverpul” qiziqish bildirib, muzokaralar olib borgan. “Strasbur”ga qarshi o‘yinda Malik jarohat olgan va yana kamida ikki oy sheriklariga yordam bera olmaydi. Undan tashqari mezbonlar safida Mangalya va Nuamada ham jarohatlar bor. Shuningdek, “Lion”ning birato‘la ikki futbolchisi avvalgi o‘yinlardagi qizil kartochkalar tufayli diskvalifikatsiyaga ega – Abner va Xatebur.
“PSJ”da ham yo‘qotishlar bor. “Bavariya”ga (1:2) qarshi o‘yinda parijliklarning uch futbolchisi jarohat oldi – Dembele, Xakimi va Mendesh. Shuningdek Dezeri Due ham avvalgi uchrashuvda shikastlangandi.
SeLTA – BARSeLONA (10 noyabrga o‘tar kechasi, 01:00)
Yaqinda “Selta”ning ijtimoiy tarmoqlardagi akkaunti qiziq post qo‘ydi. Qachonki jamoa beshta qatorasiga g‘alaba qozonsagina sochini oldirishni va’da berib mashhur bo‘lib ketgan “Manchester Yunayted” muxlisining kal holatdagi rasmini qo‘yib – “agar “Selta” muxlisi bo‘lganingda” deb yozishdi. Sababi, payshanba oqshomida Zagrebdagi g‘alaba vigoliklar uchun qatorasiga beshinchisi edi.
Ammo bu bilan “Selta”ning La Ligadagi holati zo‘r bo‘lib ketdi, deyishdan yiroqmiz. Chunki aslida jamoa mavsumni juda yomon boshlagan, yuqorida eslangan g‘alabali seriyadan oldingi 11 o‘yinda atigi bitta g‘alaba bor edi xolos. Shuningdek, besh g‘alabaning atigi ikkitasi La Liga uchrashuvi, qolgani Yevropa Ligasi va Ispaniya kubogidagi o‘yinlarga to‘g‘ri keladi. Shunday bo‘lsa ham aytish kerakki, “Selta” doim kurashadigan, osonlikcha ochko bermaydigan jamoa – Ispaniya chempionatidagi 7 o‘yin natijasi 1:1 bilan tugaganining o‘ziyoq “Selta”ning ancha noqulay raqib ekanini ko‘rsatadi.
Jumladan “Barselona” uchun ham. Vigoda o‘tgan oxirgi to‘rt safarining atigi bittasida “Barselona” minimal g‘alabaga erishgan bo‘lsa, ikki marta jangovor durang qayd etilgan. Kataloniyadagi oxirgi bahs ham esingizda bo‘lsa kerak – mehmonlar 3:1 hisobida oldinga chiqib olgan, yakunda mezbonlar 90+8 daqiqada penaltidan urilgan gol evaziga 4:3 hisobida g‘alabani ilib ketgan edi.
Umuman olganda barcha musobaqalardagi oxirgi uch safar o‘yinida g‘alaba qozona olmayotgan, hatto “Bryugge” maydonida arang mag‘lubiyatdan qutulib qolgan “Barselona” uchun “Selta” ancha og‘ir safar bo‘lishi kutilmoqda.”Real” bilan oradagi farq 5 ochkoni tashkil qilyapti, demak Flik shogirdlari bu o‘yinda g‘alaba qozonishi shart. Aks holda nafaqat “Real” o‘zib ketadi, ortdan kelayotgan “Vilyareal” va “Atletiko” yetib olishi mumkin.
Buning ustiga “Barselona” jarohatlardan aziyat chekishda davom etmoqda. Gavi, Pedri, Rafinyadan tashqari Erik Garsiyaning ham ushbu uchrashuvda qatnashishi so‘roq ostida. Olmo, Levandovski kabi futbolchilarning tiklanganiga ham yetarli vaqt o‘tgan bo‘lsa-da, hali yaxshi sport formasida emas va Flik yana oldinda Reshford – Ferran – Yamal uchligiga suyansa kerak. Mezbonlar tarkibida Radu, Alvares va Ruyedalar o‘ynay olishmaydi.
Har ikki jamoa ham hafta o‘rtasida yevrokuboklarda safar o‘yinlarini o‘tkazishdi. Faqat “Barselona” chorshanba oqshomida, “Selta” esa payshanba kuni maydonga tushdi. “Selta” bu o‘yinni uyda o‘tkazishini ham e’tiborga olsak, bu borada imkoniyatlar deyarli teng.
BOShQA O‘YINLAR
8 noyabr. Union – BAVARIYa (19:30), Hamburg – BORUSSIYa D (19:30), MARSeL – Brest (21:00), ATLeTIKO – Levante (22:30), Parma – MILAN (9 noyabrga o‘tar kechasi, 00:45), CheLSI – Vulverhempton (9 noyabrga o‘tar kechasi, 01:00)
9 noyabr. ASTON VILLA – Bornmut (19:00), Rayo Valekano – ReAL (20:15), ROMA – Udineze (22:00)
1993 yil, aprel. Milliy basketbol assotsiatsiyasi muntazam ligasidagi navbatdagi o‘yini bo‘lib o‘tmoqda. Tanaffus paytida qiziqarli tanlov o‘tkazadi. Unga ko‘ra, xohlovchilar maydon chetidan to‘p irg‘itib, narigi tomondagi savatchaga tushirishi kerak edi. Bir yigit shu ishni uddalaydi. Biroq yutuqni to‘lashi lozim bo‘lgan sug‘urta kompaniyasi g‘irromlik qiladi va pullarini berishdan bosh tortadi. Oxir oqibat yigitga yutuqni “Chicago bulls” jamoasi to‘lab beradi.
Bugun AQSh sportini basketbol o‘yinisiz tasavvur qilib bo‘lmaydi. Bu sport turi muxlislar tashrifi bo‘yicha Amerika futboli va beysboldan so‘ng uchinchi o‘rinda turadi.
Basketbol AQShda eng ko‘p o‘ynaladigan o‘yin hisoblanadi va bilan mamlakatda 26 milliondan ortiq odam shug‘ullanadi.
Shuningdek, AQSh va Kanada jamoalari ishtirok etadian Milliy basketbol assotsiatsiyasi ligasi dunyo miqyosida eng ko‘p tomosha qilinadigan turnir hisoblanadi.
Jamoaviy o‘ynaladigan boshqa sport turlarida bo‘lgani kabi AQShda bo‘lib o‘tadigan basketbol o‘yinlari juda qiziqarli va keskin kurashlar ostida kechadi.
Shu bilan birga tanaffus paytlarida zaldagi muxlislar uchun turli tanlovlar o‘tkaziladi va o‘yinlar qiziqarli shouga aylanadi.
1993 yilda ana shunday tanlovlarning biri mojaro bilan yakun topadi. “Chicago bulls” jamoasiga homiylik qiluvchi kompaniya mukofot uchun va’da qilingan 1 mln dollarni g‘olib yigit Don Kelhunga to‘lab berishdan bosh tortadi.
Foto: spors.qq.com
Million dollarlik aniq zarba
1993 yil 14 aprel. Chikago shahridagi arenada MBA muntazam ligasida ishtirok etuvchi “Chicago bulls” va “Miami Heat” jamoalari bellashmoqda.
O‘sha paytda AQShlik jahonga mashhur basketbolchi Maykl Jordan “Chicago bulls” jamoasi sharafini himoya qilar va u ham maydonda edi.
O‘yinga tanaffus berilgan paytda “Chicago bulls” jamoasi, “Koka-kola” kompaniyasi Lettuce Entertain You restoranlar tarmog‘idan iborat tashkilotchilar yutuqli tanlov o‘tkazadi.
Tanlovga ko‘ra, avval muxlislar orasidan tasodifiy yo‘l bilan bir necha kishi tanlab olinadi. So‘ng ular navbati bilan basketbol maydonining bir chetidan, ikkinchi chetidagi savatchaga to‘pni uloqtirishi kerak edi.
Qoida aniq: 23 metr uzoqlikdan savatchaga to‘pni aniq tushirgan qatnashchi g‘olib bo‘ladi va u 1 mln dollarga ega chiqadi. Agar bu ishni bir necha kishi bajarsa mukofot puli ular orasida teng taqsimlanadi.
Yutuqni “Chicago bulls” jamoasiga homiylik qilayotgan “American Hole ‘N One” sug‘urta kompanisi to‘lab berishi lozim edi.
Tanlov boshlangach bir necha kishi to‘pni uloqtiradi, biroq savatchaga tushira olmaydi. Aslida bu ish juda qiyin bo‘lib, shu sababli ham tashkilotchilar tanlovga yutuq sifatida katta mablag‘ qo‘ygandi.
Navbat kanselariya do‘koni sotuvchisi bo‘lib ishlovchi Don Kelhunga keladi. Yigit uloqtirgan to‘p to‘g‘ri borib savatchaga tushadi. Shunda arenada o‘tirgan muxlislar yigitni olqishlay boshlaydi.
Foto: Videodan kadr
O‘sha paytda tanaffus olgan basketbolchilar tanlovni kuzatishayotgandi. Ular ham navbati bilan yigitni quchoqlab, tabriklashadi. Jumladan, maydonda bo‘lgan Maykl Jordan ham.
Don Kelhunning qo‘liga 1 dollarlik yutuqqa ega chiqqani haqidagi banner-sertifikat topshiriladi. Yigit o‘sha kuni xursand holda sevimli jamoasining arenasidan chiqib ketadi. Ertasi kuni esa muammo boshlanadi…
G‘irromlik
Don Kelhun ancha-muncha basketbolchilar ham amalga oshirolmaydigan ishni uddalab, mukofot puliga ega chiqqandi. Biroq 23 metrdan to‘pni savatchaga hech kim tushira olmasligiga ishonib pul tikkan sug‘urta kompaniyasi yutuqni to‘lashga kelganda g‘irromlik qilardi.
Kompaniya Don Kelhunga mukofot puli berilmasligini e’lon qilib, buning ikkita sababini keltiradi. Birinchi sababga ko‘ra Don Kelhun to‘pni uloqtirayotganda chiziqni bosgan.
Ikkinchisi, u avvalroq bir muddat kollejdagi jamoa safida basketbol o‘ynagan. Kompaniya tanlov oddiy muxlislar o‘rtasida o‘tkazilganini va unda Donning ishtiroki xato bo‘lganini aytadi.
Ya’ni, sug‘urta kopaniyasi tanlov ishtirokchilari so‘ngi 5 yilda basketbol bilan muntazam shug‘ullanmagan bo‘lishi kerak edi, deb turib oladi.
Foto: Videodan kadr
Shundan so‘ng sug‘urta kopaniyasining vajlari bo‘yicha tekshiruv o‘tkaziladi. Eng avval Don Kelhun to‘pni uloqtirayotgan paytda chiziqni bosganmi yoki yo‘q, shu tekshiriladi.
Jarayon tasvirga tushirilgandi. Video sinchiklab ko‘rilganda Donning chiziqni bosmagani ma’lum bo‘ladi. Ikkinchi sabab bo‘yicha ham komissiya yigitni haq deb topadi.
Chunki shartga ko‘ra, tanlovda professional sportchi, hatto faoliyatini tugatgan bo‘lsa ham qatnashishi mumkin emasdi. Don Kelhun esa hech qachon basketbol bilan professional tarzda shug‘ullanmagan, shunchaki kollejdagi havaskor jamoada o‘ynagandi.
Sug‘urta kopaniyasining ikkita vaji ham o‘rinli emas, deb topiladi. Biroq ular baribir 1 mln dollarni to‘lashni xohlamaydi.
O‘sha paytda Don Kelhun bilan sodir bo‘lgan hodisa va sug‘urta kompaniyasining g‘irromliq qilayotgani AQSh OAV lari e’tiboriga tushadi va ular birin ketin hodisa haqida yoza boshlaydi. Ammo bu ham sug‘urta kopaniyasining fikrini o‘zgartira olmaydi.
Hodisaga “Chicago bulls” jamoasining aralashuvi
Don Kelhunga qilingan g‘irromlik ommaga oshkor bo‘lgach muxlislar “Chicago bulls” jamoasini ham ayblay boshlaydi. Chunki tanlov jamoaning uy arenasida, uning o‘yini paytida tashkillashtirilgandi.
Qolaversa gazetalar va turli telekanallar har kuni Don Kelhunga qilingan g‘irromlik haqida maqola hamda ko‘rsatuvlar berib, muxlislarni yanada junbushga keltiradi.
Foto: alamy.com
Bu orada bir yilcha vaqt o‘tib ketadi va Don Kelhun sug‘urta kompaniyasidan o‘z yutug‘ini ololmaydi. Kunlarning birida “Chicago bulls” jamoasi rahbariyati 1 mln dollarlik yutuq bo‘yicha matbuot anjuani o‘tkazishi haqida e’lon beradi.
Matbuot anjumanida jamoa rahbariyati sug‘urta kompaniyasidan farqli ravishda Don Kelhun 1 mln dollarni haqqoniy yutganini tan oladi. So‘ng sug‘urta kompaniyasi to‘lashdan bosh tortgan pullarni jamoa to‘lab berishini ma’lum qiladi.
Faqat jamoa rahbariyati Donga pullarni birdaniga emas, har yili 50 ming dollardan 20 yil davomida to‘lab borilishini aytadi. Yigitning bunga ko‘nishdan o‘zga chorasi qolmaydi.
O‘shandan keyin Don Kelhun 2013 yilgacha 20 yil davomida har yili “Chicago bulls” jamoasidan 38 ming dollardan olib turadi. Qolgan 12 ming dollar daromad solig‘i uchun ushlab qolinadi. Shu tariqa yigit o‘zi yutgan mukofot pullarini to‘liq oladi.
Garchi bir urinishda million dollarni yutgan bo‘lsa-da Don Kelhun millionerga aylana olmaydi – u kanselariya mahsulotlari sotiladigan magazindagi ishini davom ettiradi.
Mashmashaga Maykl Jordanning aralashuvi
Don Kelhun to‘pni savatchaga tushirgan kuni afsonaviy basketbolchi Maykl Jordan ham maydonda edi. Boshqalar kabi u ham g‘olibni tabriklaydi.
Foto: Videodan kadr
O‘yin so‘ngida “Chicago bulls” jamoasining barcha o‘yinchilari Don Kelhun savatchaga tushirgan to‘pga dastxat qo‘yib berishlari lozim edi. O‘shanda faqat bir kishi – Maykl Jordan bu ishni qilmaydi. Jamoadoshlari dastxat qo‘yayotganda u indamay kiyinish xonasiga kirib ketadi.
Mayklning dastxat qo‘ymagani sababi bor edi. 1992 yilda u Upper Deck kompaniyasi bilan shartnoma imzolagandi.
Ushbu kelishuvga ko‘ra, Upper Deck Jordanning dastxati tushirilgan turli mahsulotlarni ishlab chiqaruvchi yagona kompaniya hisoblanardi.
Sportchi va kompaniya o‘rtasida tuzilgan shartnomada Jordanning futbolka, to‘plar va boshqa narsalarga dastxat qo‘yishi cheklangandi. Jordan faqat xayriya tadbirida yoki kasal bolalar uchun dastxat qo‘yishi mumkin edi.
Don Kelhun nima qilib bo‘lsa ham Jordanning dastxatini olishni maqsad qiladi va “Chicago bulls” jamoasining o‘yinlariga muntazam tusha boshlaydi. Biroq mashhur o‘yinchining dastxatini ololmaydi.
Oradan bir yilcha vaqt o‘tadi. Sug‘urta kompaniyasi hamon mukofot pulini to‘lab berishni kechiktirib kelar, Don esa da’vogar sifatida yurgandi. Bir kuni yigit Maykl Jordan o‘g‘lining o‘yinlarini ko‘rish uchun u o‘qiydigan maktabga borib turishini eshitadi va o‘sha yoqqa otlanadi.
Foto: memedeportes.com
Biroq tan soqchilar uni Mayklning oldiga qo‘ymaydi. Ular sportchi baribir dastxat bermasligini ta’kidlaydi. Don u yerdan chiqib ketayotganida tan soqchilardan biri uni quvib yetadi va Maykl chaqirayotganini aytadi.
Yigit Jordan bilan uchrashganda sportchi Donni taniydi va “Pulingizni oldingizmi?” deb so‘raydi. Yigit olmaganini bildiradi.
Shundan so‘ng Jordan “Chicago bulls” rahbariyatiga bosim o‘tkazadi va yigitga yutuqni to‘lab berishni talab qiladi. Avvaliga jamoa rahbariyati ko‘nmaydi.
Biroq bir muddat o‘tgach klub rahbariyati o‘zining eng yaxshi o‘yinchisi qo‘ygan talabga ko‘nishga majbur bo‘ladi.
Angliyaning olti jamoasidan to‘rttasi turnirni tark etdi. Chorakfinalning barcha juftliklari aniq bo‘ldi.
«Kamp Nou»da rekordlar va antirekord
«Barselona» – «Nyukasl» 7:2
Gollar: Rafinya, 6 (1:0). Elanga, 15 (1:1). Bernal, 18 (2:1). Elanga, 28 (2:2). Yamal, 45+7 – penalti (3:2). Fermin Lopes, 51 (4:2). Levandovski, 56 (5:2). Levandovski, 61 (6:2). Rafinya, 72 (7:2)
«Barselona»: X. Garsiya (Shchensni, 82), Kubarsi, Martin, Joau Kanselu (Espart, 66), E. Garsiya (Arauxo, 21), Pedri, Bernal, Fermin Lopes (Olmo, 66), Rafinya, Yamal, Levandovski (Torres, 66)
«Nyukasl Yunayted»: Ramsdeyl, Tiau, Byorn, Holl, Trippiyer (Livramento, 46), Joelinton (Botman, 64), Tonali (Uillok, 55), Remsi, Barns, Elanga (Myorfi, 64), Gordon (Osula, 81)
Ogohlantirishlar: Kubarsi, 44 – Joelinton, 17. Trippiyer, 45. Uillok, 60
Birinchi o‘yin: 1:1
«Kamp Nou»dagi o‘yin turli-tuman rekordlar jamlanmasiga aylandi. Birinchidan, Angliyaning hech bir klubi bungacha Chempionlar ligasi pley-offidagi bir o‘yinda 7 gol o‘tkazib yubormagandi. «Nyukasl» esa shunday imkonsiz ko‘ringan ishni uddaladi. O‘z maydonida to‘liq ustunlik qilgan va so‘nggi daqiqalarda penalti tufayli g‘alabani qo‘ldan chiqargan APL vakili javob o‘yinining birinchi bo‘limida ham munosib qarshilik ko‘rsatdi. Mehmonlar uchta gol o‘tkazib yuborgan bo‘lsa-da, o‘zi ham raqib mudofaasidagi qo‘pol xatolardan foydalanib, ikkita gol urdi.
Ammo Kiran Trippiyer birinchi bo‘limga qo‘shib berilgan daqiqalarda penaltiga sababchi bo‘ldi va Lamin Yamal uchinchi bor jamoasini hisobda oldinga olib chiqdi. Tanaffusdan keyin esa «Nyukasl»ni tanib bo‘lmay qoldi. Eddi Hau jamoasi shunchaki sochilib ketdi va 10 daqiqa ichida uchta gol qo‘yib yubordi. Bunday himoya chizig‘i bilan ko‘p narsadan umid qilib bo‘lmasdi. Ayniqsa Jyeykob Remsining xatosi yilning eng kulgili holatlari kolleksiyasidan o‘rin olishi tayin. Uning qo‘pol xatosi yettinchi gol o‘tkazilishiga olib keldi.
Rafinya bu o‘yinda «gol+pas» tizimida 4 (2+2) ochko ishladi, Robert Levandovski dublni rasmiylashtirdi. Polyak hujumchisi birdaniga bir necha rekordni urdi. U Chempionlar ligasida urgan gollari sonini 41 taga yetkazib, bu borada Lionel Messining rekordini yangiladi. Bundan tashqari, Robert endi Chempionlar ligasida dubl qayd etgan eng katta yoshli futbolchi hisoblanadi – u hozir 37 yoshda. «Barsa» uchun yagona minus – darvozabon Joan Garsiya jarohat olishi bo‘ldi. Chorakfinalda jamoa usiz qiynalishi mumkin.
Salohning benefisi
«Liverpul» – «Galatasaroy»
Gollar: Soboslai, 25 (1:0). Ekitike, 51 (2:0). Gravenberh, 53 (3:0). Saloh, 62 (4:0)
Aniq ijro etilmagan penalti: Saloh, 45+4’
«Liverpul»: Alisson, van Deyk, Konate, Kerkez, Frimpong (Jons, 67), Gravenberh (Nioni, 89), Virs (Kiyeza, 89), Soboslai, Makallister, Saloh (Gakpo, 74), Ekitike (Ngumoha, 89)
«Galatasaroy»: Ugurjan Chaqir, Abdulkarim Bardakchi (Eren Elmali, 73), Singo, Yakobs, Boe (Sane, 46), Torreyra (Yunus Oqgun, 60), Lemina, Sara, Barish Yilmaz, Sholloi, Osimhen (Lang, 46, Ikardi, 80)
Birinchi o‘yin: 0:1
Chorshanba kungi o‘yinlarda chinakamiga intriga saqlanib qolgan yagona o‘yin «Enfild»da edi, bu yerda mezbonlar minimal farqni yo‘qqa chiqarishi talab etilardi. Mezbonlar birinchi bo‘lim o‘rtalaridayoq bu vazifani uddalashdi. Mak Allister burchak zarbasini ijro etishda raqiblarni dog‘da qoldirib, to‘pni yerlatib jarima maydoni chizig‘i hududiga yetkazib berdi, u yerda ortdan kelgan Soboslaini esa hech kim kutib olmadi.
«Liverpul»ning bu mavsumdagi eng yaxshi futbolchisi bo‘lib turgan vengriyalik yarimhimoyachi jamoasi tanaffusga ikki gol farqi bilan chiqib ketishi uchun barcha ishni qildi. Ammo u ishlagan penaltini Saloh aniq ijro eta olmadi.
Misrlik hujumchi o‘z vaziyatlaridan foydalana olmagan bo‘lsa-da, ikkinchi bo‘lim boshida ikki daqiqa ichida urilgan ikki golda ham ishtirok etdi. Avvaliga tezkor qarshi hujumda u Ekitikega ideal uzatma berdi, biroz o‘tib uning zarbasidan keyin darvozabondan qaytgan to‘pni Gravenberh darvozaga kiritib yubordi va «Galatasaroy» amalda chorakfinalga chiqishdan umid uzdi. Salohning o‘zi ham yakunda o‘z nomini tabloga yozdirib qo‘ydi – Virs tovonida uzatgan pasdan keyin o‘zining eng yaxshi yillarida bo‘lgani kabi aylanma zarba yo‘lladi.
Biroz o‘tib «Enfild»da yig‘ilganlar zaxiraga olinayotgan o‘z kumirini olqishlar ostida kuzatib qo‘ydi. Bu oqshomdagi gol uning uchun YeChLdagi 50-goli edi. U shundan 47 tasini «Liverpul» safida urgan («Bazel»da 2 va «Chelsi»da 1). Saloh – bunday ko‘rsatkichga erishgan ilk afrikalik futbolchi bo‘ldi. Oldinda esa Arne Slot jamoasini chorakfinalda «PSJ»ga qarshi o‘yinlar kutmoqda. Mersisaydliklar uchun bu o‘tgan mavsumdagi mag‘lubiyat uchun revansh olish imkoniyatidir.
Inglizlarning yana bir jamoasini ispanlar chiqarib yubordi
«Tottenhem» – «Atletiko» 3:2
Gollar: Kolo Muani, 30 (1:0). Alvares, 47 (1:1). Simons, 52 (2:1). Gansko, 75 (2:2). Simons, 90+1 – penalti (3:2)
«Tottenhem Hotspur»: Vikario, Romero (Danso, 81), van de Ven, Spens, Dregushin (Udoji, 66), Grey (Gallaher, 81), Sarr, Simons, Tel (Olusesi, 81), Porro (Bergvall, 74), Kolo Muani
«Atletiko»: Musso, Gansko, Le Norman, Rudjyeri, Molina (Koke, 64), Kardozo, Liorente, Lukman (Syorlot, 64), Simeone (Ximenes, 87), Grizmann (Baena, 84), Alvares (Gonsales, 84)
Ogohlantirishlar: Porro, 57. Vikario, 58. Romero, 70. Udoji, 72 – Rudjyeri, 28. Lukman, 56. Syorlot, 90
Birinchi o‘yin: 2:5
Yaqinda «Atletiko» Ispaniya kubogi yarimfinalida «Barselona»ga qarshi birinchi uchrashuvda yirik g‘alabaga (4:0) erishgach, «Kamp Nou»dagi javob o‘yinida bu ustunlikni saqlab qolish uchun to‘liq himoyaviy o‘yin uslubini tanlagandi. Londonda esa barchasi butunlay boshqacha kechdi va dastlabki 45 daqiqalikda mehmonlar sakkizta zarba berishdi, Lukman esa darvozani ishg‘ol etishga ham muvaffaq bo‘ldi. Ammo – ofsayddan. Yana bir necha xavfli hujumlar uyushtirildi, ammo yakunda Diyego Simeone jamoasi yo‘q joydan «Tottenhem»ga o‘yinga qaytish imkonini berdi. Autdan to‘p tashlanishi, Telning jarima maydoni markaziga uzatmasi, u yerda esa yolg‘iz qoldirilgan Kolo Muani.
Mezbonlar ikkinchi golni ham urishganida ispanlar og‘ir vaziyatga tushib qolgan bo‘lardi, faqat darvozabon Musso jamoa joniga ora kirdi. Argentinalik posbon Telning burchakka yo‘naltirilgan zarbasini oyoqlari bilan to‘sib qoldi. Birinchi bo‘limdan keyin baribir intriga saqlanib qoldi va buning uchun mezbonlar Vikarioga minnatdorchilik bildirishi kerak bo‘ladi. Juliano Simeone uzoq masofadan zarba yo‘llaganida to‘p Romeroga tekkan holda o‘z trayektoriyasini o‘zgartirdi, ammo allaqachon to‘p yo‘liga yotgan italiyalik darvozabon o‘rnidan turib, xavfni bartaraf etishga ulgurdi.
Ammo ikkinchi bo‘lim boshida «Atletiko» baribir intrigani o‘ldirdi. Avvaliga Xulian Alvares Simons gol urishiga to‘sqinlik qildi (mezbonlar uning harakatini fol deb e’tiroz bildirishdi) va qarshi hujumni o‘zi gol bilan yakunlandi. U jarima maydonida Lukmandan pas qabul qilib oldi va to‘pni yuqori burchakka aniq yo‘lladi.
Hakamdan va raqiblardan ranjigan Simons bir necha daqiqa o‘tib baribir o‘z maqsadiga erishdi va jamoasini yana oldinga olib chiqdi. Bir necha daqiqa o‘tib Musso yana madridliklarni qutqarib qoldi – u Porroning shvedka uslubida olis burchakka yo‘llagan zarbasiga qo‘llarining uchi bilan yetib bordi. «Matraschilar» muxlislari Alvaresning burchakdan oshirgan to‘pi Hansko tomonidan darvozaga kiritilganidan keyingina yengil tin olishdi. O‘yin oxirida Simons o‘zi ishlagan penaltini aniq ijro etishi esa umumiy natijani o‘zgartirmadi.
Madriddagi birinchi o‘yinda londonliklar bosh murabbiyi Igor Tyudor darvozabon bo‘yicha muvaffaqiyatsiz tajriba o‘tkazmaganida «Tottenhem» «Atletiko» bilan tengma-teng kurashishi mumkin edi, ammo murabbiyning o‘sha qarori birinchi o‘yinda «shporlar»ning imkoniyatlarini keskin pasaytirib yuborgandi. Natijada ikki o‘yinda xuddi «Chelsi» kabi sakkiz gol o‘tkazib yuborgan «Tottenhem» turnirni tark etdi, «Atletiko» esa «Barselona» bilan o‘yinlarga tayyorgarlikni boshlaydi.
«Atalanta» tarixga kirdi
«Bavariya» – «Atalanta» 4:1
Gollar: Keyn, 25 – penalti (1:0). Keyn, 54 (2:0). Karl, 56 (3:0). Dias, 70 (4:0). Samarjich, 85 (4:1)
«Bavariya»: Urbig, Kim Min Je, Ta, Bishof (Pavich, 72), Stanishich (Gnabri, 72), Goretska, Pavlovich (Ofli, 55), Rafael Gerreyru (Ito, 83), Dias, Karl, Keyn (Jyekson, 72)
«Atalanta»: Sportello, Hin, Skalvini (Axanor, 83), Kossunu, Pashalich, Ederson (Samarjich, 57), Bernaskoni, Bellanova, Sulemana (Raspadori, 71), De Ketelare (de Ron, 57), Skamakka (Krstovich, 71)
Birinchi o‘yin: 6:1
Bergamodagi tennischa hisobdan (6:1) keyin ham «Bavariya» muxlislarida darvozabon pozitsiyasi tufayli xavotir saqlanib qolgandi. Zayavkadagi to‘rt darvozabon – Noyyer, Ulrayh, Klanats va Urbig – barchasi jarohat tufayli safdan chiqqandi. Faqat ularning to‘rtinchisi so‘nggi kunlarda safga qaytdi va Vensan Kompani darvozaga o‘smirlardan birini qo‘yishiga to‘g‘ri kelmadi.
Umuman olganda, xavotirlar o‘rinsiz edi. Baribir darvozabonga amalda ish topilmadi. Bergamoliklar ham bu o‘yinda darvozabonni almashtirgandi va bu mavsumda deyarli o‘ynamagan 33 yoshli Sportello Keyn ijrosidagi penaltini qaytardi. Ammo u darvoza chizig‘idan ertaroq oldinga chiqib ketgani ma’lum bo‘ldi, Harri esa takroriy zarbada adashmadi.
Ikkinchi bo‘limda esa myunxenliklarni to‘xtatib bo‘lmadi. Avvaliga Keyn o‘yindan ham gol urdi, keyin esa Dias va Karl tandemi bittadan gol urdi (ular bir-biriga golli uzatma berishdi). Bergamoliklar esa bu o‘yinda ham bitta javob goli urishga erishdi, ammo Italiyaning yevrokuboklar pley-off bosqichida ikki o‘yinda 10 gol o‘tkazgan ilk jamoasi sifatida tarixga kirdi. «Bavariya»ni esa navbatdagi bosqichda «Real»ga qarshi janglar kutmoqda.
YeChLda 8 jamoa qoldi
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
Stadion suriluvchi tom va maydonga ega bo‘ladi. Uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. 45000 tomoshabinga mo‘ljallangan arena “Al Hilol” va “Al Nassr” klublari uchun uy maydoni bo‘lishi kutilmoqda.
Saudiya Arabistonida qurilayotgan shahzoda Muhammad bin Salmon nomidagi ko‘p funksiyali stadionning yangi suratlari e’lon qilindi. U 2034 yilgi futbol bo‘yicha jahon chempionatini o‘tkazish uchun ehtimoliy arenalardan biri sifatida ko‘rilmoqda.
Qurilish ishlari Ar-Riyod shahri g‘arbidagi Qiddiya ko‘ngilochar hududida olib borilmoqda.
Foto: SaudiProject
Stadion suriluvchi tom va maydonga ega bo‘ladi, uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. Devor ochilganida, maydon atrofidagi tribunalar va Tuvayk qoyasi manzarasi namoyon bo‘ladi. Bu dunyodagi birinchi to‘liq integratsiyalashgan majmua bo‘lib, stadionni bir necha soat ichida turli tadbirlar uchun moslashtirish imkonini beradi.
Geometrik shakldagi binolarning tashqi qismi raqamli ekranlar bilan qoplanadi va ular qoyadan o‘sib chiqqandek ko‘rinadi.
Foto: SaudiProject
Stadion atrofida sport va ko‘ngilochar hududlarga ega bo‘lgan baland binolar quriladi. Ular ichki ko‘chalar orqali bog‘lanadi va bu ko‘chalar ham LED ekranlar bilan qoplanadi. Ushbu yo‘laklar tashrif buyuruvchilarni qoya chetidagi kuzatuv maydonchalariga olib boradi.
Loyihasi Populous arxitektura byurosi tomonidan ishlab chiqilgan ushbu arena 45000 tomoshabinga mo‘ljallangan.
Foto: SaudiProject
Stadion Saudiya Arabistoni professional ligasining “Al Hilol” va “Al Nassr” klublari uchun uy maydoni bo‘ladi. Shu bilan birga, bu yerda boks, kibersport, konsertlar va teatr tomoshalari kabi turli sport va madaniy tadbirlar ham o‘tkaziladi.
O‘zbekistonlik futbolchi Abduqodir Husanov The Atlantic nashrining dunyoning eng kam qadrlangan futbolchilari ro‘yxatiga kiritildi.
Mualliflar o‘zbek himoyachisi bu mavsumda yanada yaxshilanganini ta’kidladilar.
Angliyaning «Manchester Siti» klubining o‘zbek himoyachisi Abduqodir Xusanov The Atlantic nashrining dunyoning eng kam baholangan futbolchilari ro‘yxatiga kiritildi. Husanov bu mavsumda yanada yaxshilangani ta’kidlanmoqda.
Uning tezligi, o‘yinni himoyada o‘qish va to‘pni agressiv ravishda ta’qib qilish qobiliyati ham ta’sirchan. U ba’zan biroz haddan tashqari tajovuzkor bo‘lishi mumkin, ammo bular bartaraf etish mumkin bo‘lgan qo‘polliklar sanaladi. U shuningdek, to‘p bilan yaxshi harakat qiladi. Maqolada Xusanov chindan ham juda istiqbolli o‘yinchi ekanligi aytiladi.
Ro‘yxatga shuningdek, Federiko Valverde (Real Madrid), Harri Maguayr (Manchester Yunayted), Bernardo Silva (Manchester Siti) va boshqa o‘yinchilar ham kiritilgan.
Bugun oqshom Yevropa Chempionlar ligasi 1/8 finalida to‘rtta javob uchrashuvi yakuniga yetib, ilk chorak finalchilar nomi ma’lum bo‘ldi.
Portugaliyaning «Sporting» klubi superkambek evaziga «Budyo-Glimt» «ertagi»ga nuqta qo‘ydi. «Real» safarda Vinisiusning dubli hisobiga «Manchester Siti»dan ustun keldi (Abduqodir Husanov bu o‘yinda to‘liq harakat qildi). «PSJ» Londonda ham yirik hisobli g‘alabaga erishib, «Chelsi»ni turnirdan chiqarib yubordi. «Arsenal» «Bayer» ustidan ishonchli g‘alaba qozondi.
Chorak finalda «Sporting» «Arsenal»ga qarshi to‘p sursa, «Real»ning raqibi katta ehtimol bilan «Bavariya» bo‘ladi.
YChL. 1/8 final
Sporting — Budyo-Glimt 5:0 (umumiy hisob 5:3)
Gollar: Inasiu 34, Gonsalvesh 61, Suares 78 penalti, Arauxo 92, Nel 120+1
Chelsi — PSJ 0:3 (umumiy hisob 2:8)
Gollar: Xvaratsxeliya 6, Barkolya 14, Mayulu 62
Arsenal — Bayer 2:0 (umumiy hisob 3:1)
Gollar: Eze 36, Rays 63
Manchester Siti — Real 1:2 (umumiy hisob 1:5)
Gollar: Holand 41 — Vinisius 22 (pen.), 90+3
Chetlatish: Silva (20)
Ogohlantirishlar: Gvardiola 25, Husanov 45+4
G‘irromchi sug‘urta kompaniyasi va basketbol afsonasining mardligi
Bugun O‘zbekistondagi Islom sivilizatsiyasi markazining rasmiy ochilish marosimi bo‘lib o‘tadi
Jahon gigantlari energiyani qaysi manbalardan oladi?
-
Jamiyat5 days agoadolat izlagan dehqonning 7 yillik sarguzashtlari
-
Iqtisodiyot3 days ago«Yomg‘ir va qorda ham foydalanishga tayyor bo‘ladi» – Toshkent-Andijon pulli yo‘li haqida nimalar ma’lum?
-
Sport5 days agoFutbol bo‘yicha O‘zbekiston ayollar terma jamoasi Osiyo kubogi chorak finalida yirik hisobda mag‘lub bo‘ldi
-
Dunyodan4 days ago
Iroq g‘arbida AQShning yonilg‘i quyuvchi samolyoti urib tushirildi
-
Jamiyat5 days agoorzularni umringiz evaziga sotib olasiz / 5 daqiqa
-
Turk dunyosi3 days agoTurkiyaning Baykal K2 bir tomonlama hujumga uchragan uchuvchisiz samolyotining toʻda harakatini sinovdan oʻtkazdi
-
Iqtisodiyot5 days ago2026 yilda paxtani mashinada terish ulushi 70 foizga yetkaziladi
-
Jamiyat5 days agoSirdaryoda baliq ovlaganlar tabiatga qariyb 520 million so‘mlik zarar yetkazdi