Jamiyat
Muvaffaqiyat va pul… Ular faqat tasavvurdami?
Siz muvaffaqiyatga eltuvchi tamoyillarga qat’iy rioya qilasizmi? Bunga ishonch hosil qilish uchun tez-tez tanqidiy tahlil o‘tkazib turish kerak. Mazkur amaliyot sabog‘i sizga xalaqit berayotgan zaif joylarni aniqlashga yordam beradi.
O‘zingizni, aytaylik, tasavvurdagi shaxs bilan taqqoslashga urinib ko‘ring. Muvaffaqiyatga erishishga qaror qilgan bu xonimni, keling, Meri Smit deb ataylik.
Meri o‘zining hayotiy maqsadini aniq-tiniq belgilagan. Uni qachon amalga oshirishning rejasi mavjud, ya’ni xonim muvaffaqiyat sari eng muhim qadam tashlagan. Siz-chi?
Meri har safar muvaffaqiyatsizlikka uchrasa, tushkunlikka tushib o‘tirmaydi, balki shunga teng keladigan noz-ne’mat belgilarini axtaradi. Uning yordamida voqelikni kerakli va foydali yo‘nalishga burib yuborishga intiladi. Muvaffaqiyatsizlik vaqtincha ekanligini juda yaxshi biladi.
Meri hayotining har bir kunini qiziqish va zavq-shavq bilan o‘tkazadi, ishiga o‘yin lahzalarini kiritadi. U boshqalar bilan kundalik ishidagi noxushliklar to‘g‘risida gapirishdan o‘zini tiyadi, chunki muvaffaqiyat haqidagi gap-so‘zlar muvaffaqiyat uchun zamin hozirlaydi-da!
Buning ustiga Meri yolg‘iz ishlagandan ko‘ra, guruh bo‘lib ishlash ko‘proq muvaffaqiyatga eltishi mumkinligini juda yaxshi tushunadi. U guruhda g‘ayrat bilan ishlaydi, bunday hamkorlik g‘oyalarni erkin almashishga yordam beradi, qobiliyat va kuch-quvvatni katta ehtimol bilan istalgan maqsad sari olib boradi. Qahramonimiz hamisha olganiga nisbatan ko‘proq berishga intiladi.
Meri o‘zining ishlab topganiga qarab kiyinadi. U pullarining hisob-kitobini yaxshi biladi, jamg‘arib boradi va sog‘lig‘i to‘g‘risida qayg‘uradi.
Va, eng asosiysi, Meri doimiy ravishda o‘z ongida ijobiy qurilmalarni qo‘llab-quvvatlaydi. U muvaffaqiyat to‘g‘risidagi Fanning asosiy prinsipi samimiylik, rostgo‘ylikda ekanligiga astoydil ishonadi, aql-tafakkur yordamida hammasiga erishish, hamma narsani anglash, barchasiga ishonish mumkinligiga imoni komil. Bu tamoyildan foydalanib, o‘yin o‘tkazish mumkin, chunki unda yutganlar ham, yutqazganlar ham bo‘lmaydi.
Merini rahbarlari ham, qo‘l ostidagilari ham hurmat qilib, u bilan faxrlanishadi. Chunki Meri Smit aniq-muayyan qarorlar qabul qiladi va ular uchun mas’uliyatni to‘liq o‘z zimmasiga oladi.
Meri do‘stona munosabatlar o‘rnatadi. U doimo shirin so‘zlar hamda maqtovlar yog‘dirish uchun vaqt topa oladi, ammo bu xushomaddan iborat emas. Meri chiroyli so‘zlarni o‘z o‘rnida ishlatadi. Uning davrasida ishtirok etish hamisha yoqimli. Meri hazilni tushunadi, o‘zi ham hazilkash, e’tiborli va shirinso‘z. U hech qachon gaplarida nojo‘ya ifodalarni ishlatmaydi va barcha odamlarni o‘zi bilan teng tutadi.
Smit xonim hamisha malakasini oshirishga urinadi. U kutubxonalarda yaxshi kitoblar topish, teatrda yaxshi spektakllar ko‘rish, muzeylarda san’atning eng sara asarlarini qiziqib ko‘rish muminligini biladi. O‘zining dunyoqarashini kengaytirish uchun hech qachon imkoniyatni boy bermaydi.
Meri aytilgan ishni o‘z vaqtida bajaradigan shaxs. U doimiy ravishda so‘zining ustidan chiqadi. Bank hisobidagi pullari hamisha joyida, chunki Meri ko‘p pul xuddi tosh kabi pastga qarab yumalashini va muvaffaqiyat pillapoyasidan yuqoriga harakat qilishga xalaqit berishini biladi.
Xo‘sh, siz o‘zingizni Meri bilan solishtira olasizmi?
(Napoleon Xill kitobidan)
O‘zbekistonda moda va dizayn sohasi uchun malakali mutaxassislar tayyorlashga ixtisoslashgan yangi davlat oliy ta’lim muassasasi tashkil etiladi.
Prezidentning 2026-yil 16-oktyabrdagi PQ–378-son qaroriga muvofiq, Toshkent xalqaro moda akademiyasi tashkil etiladi. Akademiya Yengil sanoatni rivojlantirish agentligi tizimida faoliyat yuritadi.
Yangi oliygoh Toshkent to‘qimachilik va yengil sanoat instituti hamda Parij xalqaro moda akademiyasining qo‘shma ta’lim dasturi negizida tashkil etiladi.
Mazkur dasturda tahsil olayotgan barcha talabalar o‘qishini yangi akademiyada davom ettiradi. Bitiruvchilarga Toshkent xalqaro moda akademiyasining diplomi beriladi.
O‘quv jarayoni 2026/2027 o‘quv yilidan boshlanadi. Akademiyada xalqaro qo‘shma dasturlar bilan bir qatorda, mustaqil ta’lim dasturlari asosida bakalavr va magistrlar tayyorlashga ham ruxsat etiladi.
2027/2028 o‘quv yilidan boshlab to‘qimachilik, tikuvchilik, trikotaj va charm-poyabzal sohalarida korxonalar buyurtmasi asosida dual ta’lim joriy qilinadi. Bunda talabalar nazariy bilim olish bilan birga ishlab chiqarish jarayonlarida ham ishtirok etadi.
Shuningdek, yengil sanoat yo‘nalishidagi texnikumlarni muvaffaqiyatli tamomlagan, o‘rtacha bahosi akademiya belgilagan talabga javob beradigan bitiruvchilarga bakalavriatning uchinchi bosqichidan to‘lov-kontrakt asosida o‘qishni davom ettirish imkoniyati yaratiladi.
Akademiya bazasida davlat buyurtmasi asosida turli tashkilotlar uchun kiyim-bosh dizaynini ishlab chiqish va milliy brendlarni shakllantirish ham yo‘lga qo‘yiladi.
Qarorda xorijiy mutaxassislar va talabalarni jalb qilish uchun ko‘p martalik vizalar rasmiylashtirish tartibi ham nazarda tutilgan.
Bundan tashqari, 2028-yil yakuniga qadar davlat-xususiy sheriklik asosida 400 o‘rinli talabalar turar joyi quriladi. Ungacha akademiyaga o‘tkazilgan talabalar Toshkent to‘qimachilik va yengil sanoat instituti yotoqxonasidan belgilangan tartibda foydalanishi mumkin.
Xorijda o‘zbek milliy taomlariga ixtisoslashgan restoran yoki oshxona tashkil etgan mahalliy tadbirkorlar ayrim xarajatlarining 50 foizigacha bo‘lgan qismini subsidiya sifatida qaytarib olishi mumkin.
Ushbu xizmat Turizm qo‘mitasi tomonidan my.gov.uz Yagona interaktiv davlat xizmatlari portali orqali bepul ko‘rsatiladi.
Subsidiya O‘zbekistonda davlat ro‘yxatidan o‘tgan va xorijda milliy restoran tashkil etgan tadbirkorlik subyektlariga ajratiladi.
Ariza topshirishda restoranning xorijiy davlatda ro‘yxatdan o‘tganini va binodan foydalanish huquqini tasdiqlovchi hujjatlar, sanitariya va yong‘in xavfsizligi talablariga muvofiqlik bo‘yicha ma’lumotlar taqdim etilishi kerak.
Shuningdek, restoranni tashkil etish bilan bog‘liq amalga oshirilgan xarajatlarni tasdiqlovchi hujjatlar, zaruratga qarab O‘zbekistondan mahsulot yetkazib berilganini tasdiqlovchi ma’lumotlar va ularning rasmiy tarjimasi so‘ralishi mumkin.
Restoranning ichki va tashqi ko‘rinishini aks ettiruvchi fotosuratlar ham arizaga ilova qilinadi.
Ariza my.gov.uz portali orqali elektron shaklda yuboriladi va 18 ish kuni ichida ko‘rib chiqiladi. Ijobiy qaror qabul qilinsa, subsidiya mablag‘lari 7 ish kuni ichida tadbirkorning bank hisobvarag‘iga o‘tkaziladi.
Arizada kamchiliklar aniqlangan taqdirda, tadbirkorga ularni bartaraf etib, hujjatlarni qayta taqdim qilish imkoniyati beriladi.
Qoraqalpog‘iston Respublikasidagi Ekologiya va iqlim o‘zgarishi milliy qo‘mitasi huzuridagi «Sayg‘ochiy» kompleks landshaft buyurtma qo‘riqxonasida yovvoyi hayvonlarni suv bilan ta’minlash maqsadida beshta avtonom suv ichish tizimi o‘rnatildi.
Tashabbus Ekologiya qo‘mitasi tomonidan BMT Taraqqiyot dasturi (BMTTD) va Global ekologik jamg‘arma (GEF) bilan hamkorlikda «Aral Sea Wetlands» loyihasi doirasida amalga oshirildi.
Suv resurslari cheklangan Ustyurt cho‘li sharoitida qo‘shimcha suv manbalarining mavjudligi sayg‘oqlar va mahalliy faunaning boshqa vakillarini saqlab qolishda muhim ahamiyatga ega.
Avtonom tizimlar quyosh energiyasida ishlaydi va to‘liq avtomatlashtirilgan. Ularning har biri 3 kub metr sig‘imga ega suv havzalari, nasoslar, datchiklar va hisoblagichlar bilan jihozlangan. Bu markazlashgan elektr energiyasi va suv ta’minoti manbalariga doimiy ulanish zaruratisiz suvni barqaror yetkazib berish imkonini beradi.
Suv ichish tizimlari bilan bir qatorda hududga 10 ta kamera va 10 ta fototuzoq ham o‘rnatildi. Ular hayvonlarni sutka davomida kuzatish, harakatlanishi va suv ichish joylaridan foydalanishini qayd etish, shuningdek, populyasiyalar holatini keyingi monitoring qilish uchun ma’lumot to‘plash imkonini beradi.
Ustyurtning og‘ir tabiiy sharoitida yashaydigan sayg‘oqlar uchun qo‘shimcha suv manbalarining yaratilishi yovvoyi hayvonlar populyasiyalarini saqlash va tiklashda muhim ahamiyat kasb etadi.
Avtonom suv ichish tizimlarining o‘rnatilishi Ustyurtda bioxilma-xillikni asrash bo‘yicha amalga oshirilayotgan chora-tadbirlardan biri bo‘lib, zamonaviy kuzatuv vositalari orqali hayvonlar holatini monitoring qilish va zarur ma’lumotlarni to‘plash imkonini ham beradi.
Bir muddat oldin Raqobat qo‘mitasi SSV huzuridagi Xaridlar markazining boshlang‘ich narxi 14 mlrd so‘m bo‘lgan davlat xaridi «Raqobat to‘g‘risida»gi qonun talablariga nomuvofiq deb topilgani sababli bekor qilingani aytilgan edi.
Markaz ushbu holat yuzasidan bergan rasmiy tushuntirish berib, respublika tibbiyot muassasalari uchun 4 ta MSKT uskunasini xarid qilish bo‘yicha o‘tkazilgan tender natijalari bekor qilinganini tasdiqladi.
Markaz ma’lumotiga ko‘ra, maxsus axborot portalida 497870-sonli lot bo‘yicha o‘tkazilgan tender yakunlaridan so‘ng “SKYMED Technologies” MChJ tomonidan e’tiroz xati kelib tushgan.
Murojaat Xarid komissiyasi tomonidan o‘rganilganda, ishtirokchilarning texnik takliflarini baholash jarayonida tibbiyot muassasalari ekspert guruhi tomonidan ayrim texnik xatolarga yo‘l qo‘yilgani aniqlangan.
Xususan, servis xizmati ko‘rsatish bo‘yicha belgilangan mezon asosida g‘olib ishtirokchiga asossiz ravishda qo‘shimcha 1 ball berilgan.
Shundan so‘ng Xarid komissiyasining 2026-yil 18-sentyabrdagi qarori bilan mazkur lot bo‘yicha tender natijalari bekor qilingan.
Shuningdek, Raqobatni rivojlantirish va iste’molchilar huquqlarini himoya qilish qo‘mitasi 21-sentyabr kuni tender yuzasidan o‘rganish o‘tkazish maqsadida ishtirokchilar taqdim etgan hujjatlarni so‘ragan.
Xaridlar markazi 22-sentyabr kuni qo‘mitaga javob yo‘llab, tender natijalari bekor qilingani va bunga sabab bo‘lgan holatlar haqida ma’lumot bergan.
Markazning ta’kidlashicha, tender natijalarining bekor qilinishi texnik baholash jarayonida aniqlangan xatolar bilan bog‘liq bo‘lib, qaror Xarid komissiyasi tomonidan o‘rganish yakunlariga ko‘ra qabul qilingan.
O‘zbekistonda Maktabgacha va maktab ta’limi vazirligi hamda Oliy ta’lim, fan va innovatsiyalar vazirligi yagona Ta’lim va ilm-fan vazirligi sifatida qayta tashkil etildi.
Bu Prezident farmonida belgilandi.
Yangi vazirlik maktabgacha ta’limdan boshlab oliy ta’lim va ilmiy faoliyatgacha bo‘lgan yo‘nalishlarni yagona boshqaruv tizimiga birlashtiradi.
Islohotdan asosiy maqsad mamlakatda ta’lim, tarbiya va ilm-fanning yaxlit tizimini zamon talablari asosida tashkil etish, ta’lim sifati va samaradorligini oshirish hamda inson kapitalini rivojlantirish bo‘yicha ishlarni yangi bosqichga olib chiqishdan iborat.
Shuningdek, ta’limning barcha bosqichlari o‘rtasida uzviylik va davomiylikni ta’minlash ko‘zda tutilgan. Ya’ni maktabgacha ta’lim, maktab ta’limi, oliy ta’lim va ilmiy faoliyat yagona tizim doirasida muvofiqlashtiriladi.
Farmonda sohada samarali boshqaruv tizimini joriy qilish, turli ta’lim bosqichlari o‘rtasidagi hamkorlikni kuchaytirish va vazirlikning jamoatchilik oldidagi hisobdorligini oshirish ham nazarda tutilgan.
Yangi tuzilma orqali ta’lim va ilm-fan sohasida davlat siyosatini yagona yondashuv asosida amalga oshirish maqsad qilingan.
