Sport
Mundial yilidagi mavsum: kim favorit?
Bugun futbol bo‘yicha Osiyoning eng kuchli ligalaridan biri O‘zbekiston chempionati boshlandi. Bu yil o‘zbek futboli uchun o‘zgacha yil — mundial yili. Shu bois chempionat ham o‘zgacha o‘tadi. Format ham, to‘xtalishlar ham biroz boshqacha bo‘ladi. Bu yil chempionlik uchun kimlar kurashadi? Transfer bozorida kim faol bo‘ldi? «O‘zbekneftgaz» homiylikni to‘xtatsa, «Nasaf» va «Bunyodkor» kabi klublar holi nima kechadi? Quyida shu haqda.
Hamma Turkiya va BAAda shug‘ullandi
Qishda O‘zbekistonda futbol o‘ynashga yaragulik stadion bo‘lmaydi hisob. Chunki bizning iqlimda maysani qishda ham yaxshi saqlash uchun katta pul kerak. Shu uchun imkonini qilgan jamoalar mavsumoldi tayyorgarlikni BAA yoki Turkiyada o‘tkazdi. Avvallari sanoqli jamoalar xorij yig‘ini o‘tkazar va odatda bunday yig‘inda qatnashgan jamoalar natijalari ham yaxshiroq bo‘lardi.
Hozir aksar klublarning moliyaviy holati yaxshi, shu uchun kimni ko‘rsangiz, xorij yig‘inidan qaytdi. Qishki tayyorgarlikni faqat bizning jamoalar emas, qish sovuq keladigan boshqa davlat klublari ham BAA va Turkiyada o‘tkazadi. Shu sabab sparring uchun raqib topish ham qiyin bo‘lmaydi.
«Neftchi» — asosiy favorit
Amalga oshirilgan transferlar va o‘tgan yilgi o‘yindan kelib chiqsak, yangi mavsumda ham chempionlik uchun asosiy da’vogar — «Neftchi». Hozir pul masalasida hech qaysi klub farg‘onaliklarga yaqinlasha olmaydi. Bizning futbolda maoshlar e’lon qilinmaydi, lekin biz futbol jurnalistlari baribir bilib olamiz. Hozir «Neftchi» futbolchilarga taklif qilayotgan maosh Yevropaning o‘rtamiyona klublari darajasida.
O‘tgan mavsum yakunlangach yilning eng yaxshi murabbiyi deb topilgan, «Neftchi»ni chorak asr o‘tib O‘zbekiston chempioni qilgan tojikistonlik Vitaliy Levchenko ishdan ketdi. Bu iste’fo «Neftchi» chempionligining eng asosiy omili iqtisodiy imkoniyat bo‘lganini qaysidir ma’noda isbotlaydi. Bo‘lmasa uzoq kutilgan chempionlikni keltirgan murabbiyni nega ishdan olishsin? Levchenko o‘rniga Yevropadan biror kuchli murabbiy olib kelishsa ham iste’fo sababini yangi bosqichga ko‘tarilish deb izohlasa bo‘lardi.
Yangi mavsumda «Neftchi»ga O‘zbekiston o‘smirlari jamoasini Osiyo chempioni qilgan Islom Ismoilov murabbiylik qiladi. Ko‘ramiz, Ismoilov bunchalik ko‘p yulduzlar to‘plangan jamoani qanday boshqararkin.
Transfer bozorida «Neftchi» faol bo‘ldi. Eng asosiy transfer «Dinamo» yarimhimoyachisi Ratinio bo‘ldi. Maydon markazida hozir bu braziliyalik futbolchiga yetadiganini topish qiyin. Shuningdek, o‘zbek futbolining eng kuchli pleymeykerlaridan biri Xurshid G‘iyosov ham endi Farg‘onada o‘ynaydi. Xurshid Jamshid Iskanderov bilan markazda nimalar qilib tashlashini tasavvur qilavering. Aytgancha, endi Jamshid asosiy penaltichi rolidan ayrilsa kerak, chunki Xurshid bu borada O‘zbekistonda eng yaxshisi. Axir Murod Xolmuhammedov futbol o‘ynamayapti.
«Neftchi» xorvatiyalik hujumchi Stipe Peritsani qo‘shib oldi. O‘z vaqtida «Chelsi», «Uotford», «Udineze» kabi kuchli beshlik chempionatlarida o‘ynagan hujumchi jamoa o‘yinini kuchaytirishi aniq. Hujumchining Italiyadagi faoliyati ayniqsa yorqin kechgan.
«Paxtakor» ham kuchaydi
Toshkentning «Paxtakor» klubi o‘tgan mavsum yakunini juda kuchli o‘tkazdi. Mavsum boshidagi o‘yinlarini ko‘rib ko‘pchilik o‘zbek futboli bayroqdori bu yil medallar uchun kurashmasa kerak deb o‘ylagandi, lekin rahbariyat xorijlik murabbiy olib kelish xato bo‘lganini anglab, Kamoliddin Tojiyevni bosh murabbiy qilgandiki, barchasi joyiga tushishni boshladi. Yakunda jamoa O‘zbekiston kubogini yutdi, chempionatda ikkinchi o‘rinni oldi.
Klub zo‘r transferlar qildi: «Nasaf» yetakchilari Oybek Bozorov va Sherzod Nasrullayev nihoyat «Paxtakor»ga o‘tdi, milliy jamoaning asosiy futbolchilaridan biri Akmal Mozgovoy ham legionerlikdan qaytib «Paxtakor»ga o‘tdi.
Jamoa Igor Sergeyev ortidan Eronga yo‘l olishiga sal qolgan Hojiakbar Alijonovni saqlab qoldi. «Persepolis»ga ketgan Sergeyev o‘rnini to‘ldirish uchun Rustam Turdimurodov ijaradan qaytarildi. Shuningdek, yaqindagina Yevropa konferensiyalar ligasida «Kristal Pelas»ga gol urgan polshalik hujumchi Pyotr Parijshek ham endi «Paxtakor»da o‘ynaydi. Levandovski uslubidagi bu hujumchi shubhasiz O‘zbekiston chempionati darajasi uchun kuchli yulduz. Xullas, «Paxtakor» yaxshi transferlar qildi va shubhasiz chempionlik uchun kurashadi.
Vodiy derbilari «yonadi»
O‘tgan mavsumda chempionat g‘olibligi chorak asr o‘tib yana vodiyga qaytdi. Bu mavsumda vodiyning uch jamoasi ham chempionlik uchun kurashmoqchi. «Navbahor» milliy jamoani jahon chempionatiga olib chiqqan Temur Kapadzeni, «Andijon» milliy jamoa sobiq murabbiyi Samvel Babayanni murabbiylikka olib keldi. Hozir O‘zbekistonda eng katta budjetga ega uch klub aynan vodiy jamoalari bo‘lsa kerak. Vodiyda futbol tepasida shaxsan viloyat hokimlari turadi. Uch hokim futbol orqali o‘ziga xos raqobatlashishi ham sir emas. Shu sabab bu yilgi vodiy derbilari juda qiziqarli kechadi.
«Andijon» murabbiylikka Samvel Babayanni olib keldi. Milliy jamoa sobiq murabbiyi tashkilotchilikni boplaydi, shu sabab Andijon hokimi bu yil jamoadan medallar kutishini aytdi. «Andijon» ham yomon transferlar qilmadi: Dragan Cheran, Aziz Turg‘unboyev, Imedi Ashortia, Islom To‘xtaxo‘jayev kabi futbolchilar tarkibni kuchaytirishi aniq. Katta ehtimol yangi mavsumda oldingi yillar o‘ynagan jamoa o‘zagi keskin o‘zgaradi.
«Navbahor»ga Temur Kapadze keldi. Milliy jamoani mundialga olib chiqqan murabbiyda variantlar juda ko‘p edi, hatto boshqa davlat milliy jamoalaridan taklif bo‘lgan, lekin murabbiy «Navbahor»ni tanladi. Namangan klubi ham yaxshi transferlar qildi, transfer oynasi yakunida Husayn Norchayevni qo‘shib oldi. Birinchi turda «Navbahor» Samarqandda mehmon bo‘ladi.
«Dinamo»da nima gap?
O‘tgan mavsumning eng yorqin o‘yin ko‘rsatgan jamoasi ko‘pchilikning fikricha «Dinamo» bo‘ldi. Abramov o‘zi yaxshi ko‘radigan to‘p nazoratiga asoslangan futbolni Samarqanddagi uchinchi mavsumida nihoyat yo‘lga qo‘ya oldi. Jamoa oxirgi turgacha ikkinchi o‘rin uchun kurashdi, lekin yakunda to‘rtinchi bo‘lib klub tarixidagi eng yaxshi natijani takrorladi. O‘tgan mavsumni Samarqand jamoasi moliyaviy qiyinchiliklar bilan o‘tkazdi, oddiy mashg‘ulot maydoni bilan bog‘liq muammo ko‘plab jarohatlarga olib keldi. Oqibatda mavsum yakunida bir qator muhim futbolchilar safdan chiqdi. Shunga qaramay, Abramov jamoasining o‘yini yo‘qolib qolmadi.
Bu mavsumda ham «Dinamo» iqtisodiy jihatdan yuqorida nomi tilga olingan jamoalar bilan raqobat qilishi qiyin, lekin klub baribir yaxshi transferlar qildi. O‘tgan mavsum yakunida «Dinamo»ni Ratinio, Kucherenko, Pletnyov va Stanoyevich kabi yaxshi legionerlar tark etdi. O‘tgan mavsumdagi kabi zaxira bo‘shab qolishidan xavotirlangan ko‘rinadi, Abramov jamoasi mavsumlar oralig‘ida juda ko‘p transfer qildi. Transferlar orasida Azizbek Amonov, Bektemir Abdumannonov, Kingsli Sarfo, Til Mavretich va Mahamadu Dembeleni alohida ta’kidlash mumkin.
«Dinamo» mavsumlar oralig‘idagi yig‘inni ham yorqin o‘tkazdi. BAAdagi yig‘in doirasida Rossiyaning eng kuchli jamoalari bilan o‘ynadi, TsSKAni yengdi, «Zenit» bilan tengma-teng kurashdi, Armaniston futboli bayroqdori «Pyunik»ni yirik hisobda yengdi. Rossiya chempioni «Krasnodar» ham o‘yinlarni ko‘rgach «Dinamo» bilan o‘rtoqlik o‘yini o‘tkazishni juda istagan, lekin samarqandliklar qaytish rejasi hal qilib bo‘lingach berilgan taklifni chempionat startiga oz fursat qolgani uchun qabul qila olmagan. Samarqandda «Dinamo»dan yangi mavsumda chempionlik kutishmoqda.
«Nasaf» va «Bunyodkor» nima bo‘ladi?
Oxirgi vaqtlarda «O‘zbekneftgaz» davlat korxonasi futbolga homiylikni to‘xtatishi muxlislar orasida keng muhokama qilinmoqda. Bu tashkilot uzoq yillardan buyon «Nasaf» va «Bunyodkor» kabi kuchli klublarni moliyalashtirib keladi. Lekin chindan yangi mavsumdan tashkilot bu ikki jamoaga, shuningdek, «Buxoro»ga homiylik qilmasligi aniq bo‘libdi.
Bu xabar chiqqanidan keyin chindan ikki jamoa ham transfer bozorida faol bo‘lmadi. Ayniqsa «Nasaf» Bozorov, Nasrullayev va Cheran kabi yetakchilari o‘rnini to‘ldirmadi. Faqat Bobir Abduxoliqov ortga qaytdi. Hatto jamoada eng maoshi katta futbolchilardan bo‘lgan Abduvohid Ne’matov transfer oynasi yopilishi arafasida boshqa klublarga o‘tishi mumkin bo‘lgani haqida xabarlar chiqdi. Milliy jamoaning ayni damdagi asosiy darvozaboni ikkinchi davrada boshqa jamoaga o‘tishi ehtimoli oshgan.
Lekin bu omillar «Nasaf»ni chempionlik uchun kurashdan chiqarmaydi. Berdiyev yana bir qator yoshlarni topib qo‘ygan, ular allaqachon Chempionlar Ligasida gol urib yuribdi. Qarshi jamoasini shubhasiz chempionlik uchun favoritlar sirasiga qo‘shamiz. «Bunyodkor» ham yuqori o‘rinlar uchun kurashadi. Ilyos Zeytullayev o‘tgan mavsumda kuchli murabbiy ekanini ko‘rsatdi. Asosiy yulduzi murabbiy bo‘lgan jamoalardan ko‘p narsa kutish mumkin.
Biroz o‘zgacha taqvim
Bu yil jahon chempionati o‘tishi sabab Superliga taqvimi ham boshqacha bo‘ladi. Chempionat aynan shu sabab biroz avvalroq, fevralda boshlanyapti. Maqsad may oyigacha ko‘proq o‘yin o‘tkazib olish. Chunki mayda milliy jamoa jahon chempionatiga tayyorgarlikni boshlaydi. Chempionat startidan mundialgacha ikkita FIFA kunlari bor, bu vaqtda klublar futbolchilarini milliy jamoaga qo‘yib yuborishga majbur.
Jahon chempionati boshlangach, tabiiyki chempionat to‘xtatiladi va orada uch oyga yaqin katta to‘xtalish yuzaga keladi. Mana shu to‘xtalish klublar murabbiylari uchun muammo tug‘diradi. Axir hamma ham mundialga bormaydi, milliy jamoa asosini legionerlar tashkil qiladi. Qolgan futbolchilar sport formasini saqlab qolish eng asosiy vazifa bo‘ladi. PFL shuni inobatga olib kubok o‘yinlarini may oyi oxirigacha o‘tkazmoqchi.
Xullas, mundial yilidagi O‘zbekiston chempionatida katta ehtimol oxirgi yillardagi eng qiziqarli mavsum boshlanmoqda. Yaqqol favorit yo‘q, ko‘p klublar kuchaygan, intriga avjida. Eng asosiysi hozir milliy chempionat o‘yinlarini avvalgi kabi «Mash’al» radiosidan eshitib o‘tirish shart emas, deyarli hamma o‘yin jonli efirda olib berilyapti.
Ligada infratuzilma rivojlangan, maydonlar holati yaxshilandi. Hamma stadionda VAR bor, o‘yinlardagi shubhali harakatlar, kelishilgan o‘yinlar yo‘q hisob. Bir so‘z bilan aytganda futbolimiz rivojlanish barobarida ancha tozalangan. Shu bois stadionlarga tushing, o‘yinlarni zavqlanib tomosha qiling, jonli futbol ko‘rishga nima yetsin…
«Inter» ikki mavsumdan so‘ng, yangi bosh murabbiy Kristian Kivu qo‘l ostida chempionlik unvonini qaytarib oldi.
«Inter» A Seriyaning 35-turida «Parma»ni 2:0 hisobida mag‘lub etib, muddatidan oldin Italiya chempioni bo‘ldi.
Bu g‘alabadan so‘ng, bosh murabbiy Kristian Kivu shogirdlari musobaqa yakuniga 3 tur qolganida 82 ochko to‘pladi, eng yaqin ta’qibchi «Napoli» hisobida 70 ochko bor.
Shu tariqa, «Inter» ikki mavsumdan so‘ng chempionlik unvonini qaytarib oldi. Milanliklar oxirgi marta 2023/24-yilgi mavsumda g‘olib bo‘lgan edi.
2025 yil iyun oyida «Inter» bosh murabbiyi bo‘lgan ruminiyalik mutaxassis Kristian Kivu murabbiylik faoliyatidagi ilk sovrinini qo‘lga kiritdi. U Joze Mourinodan keyin (2008/09 va 2009/10-yilgi mavsumlar) A Seriyada g‘alaba qozongan birinchi xorijlik murabbiy bo‘ldi. O‘sha yillarda Kivuning o‘zi portugaliyalik murabbiy qo‘l ostida «Inter» himoyasida o‘ynagan. Shundan beri Italiya chempionatida faqat italiyalik murabbiylar g‘alaba qozongan edi: Massimiliano Allegri, Antonio Konte, Mauritsio Sarri, Stefano Pioli, Luchano Spalletti va Simone Inzagi.
Italiyada skudettolar soni bo‘yicha «Inter» ikkinchi o‘rinda turadi: 21 ta unvon. Rekordchi — «Yuventus» (36 ta sovrin). «Milan»da — 19 ta unvon.
Kivu jamoasida mavsumni oltin dubl bilan yakunlash uchun ajoyib imkoniyat bor. 13 may kuni «neradzurri» Italiya kubogi finalida «Latsio» bilan o‘ynaydi.
Angliya chempionatining 35-turi uchrashuvi oldidan stadionda bo‘lgan Fergyuson o‘zini yomon his qilganidan so‘ng shifoxonaga olib ketilgan. Xabar qilinishicha, gap ehtiyot chorasi haqida bormoqda.
«Manchester Yunayted»ning sobiq murabbiyi ser Aleks Fergyuson jamoaning «Liverpul»ga qarshi bahsi oldidan o‘zini yomon his qildi va shifoxonaga olib ketildi, deb xabar berdi Daily Mail.
Nashr xabariga ko‘ra, 84 yoshli Fergyuson o‘yin boshlanishidan bir soat oldin shifoxonaga yotqizilgan. Unga ehtiyot chorasi sifatida tibbiy kuzatuv tayinlangan. Fergyusonga tez vaqt ichida uyiga javob berilishi kutilmoqda.
Aleks Fergyuson — «Manchester Yunayted» tarixidagi eng sovrindor murabbiy hisoblanadi. U klubni 1986 yildan 2013 yilgacha boshqargan. «Manchester Yunayted» Fergyuson boshqaruvida 13 marta Angliya chempioni bo‘lgan. Shotlandiyalik murabbiy klubdagi 26 yillik faoliyati davomida jami 38ta sovrinni qo‘lga kiritgan.
Murabbiylikdan ketganidan so‘ng Fergyuson «Manchester Yunayted» elchisi va klub direktorlar kengashi a’zosi sifatida faoliyat yuritdi. 2024 yil oktyabrda klubning yangi egasi Jim Retkliff va INEOS kompaniyasi unga elchilik faoliyati uchun yiliga 2,16 mln funt sterlingga teng maosh to‘lashni to‘xtatdi.
«Arsenal» turnir jadvalida «Siti» bilan oradagi farqni 6 ochkoga yetkazdi, Ispaniyada esa bugun «Real» Kataloniyaning «Espanyol» jamoasiga qarshi o‘yinda ochko yo‘qotadigan bo‘lsa, bu turda navbatdagi g‘alabaga erishgan «Barselona» muddatidan oldin chempionlikni nishonlashi mumkin.
Angliya: Tiago Holand bilan poygalashmoqda
«Brentford» – «Vest Hem» 3:0
Gollar: Mavropanos, 15 – avtogol (1:0). Tiago, 54 – penalti (2:0). Damsgor, 82 (3:0)
«Brentford»: Kelleher, van der Berg, Kollinz, Lyuis-Potter (Hiki, 90+1), Kayode, Yyensen, Yarmolyuk, Damsgor (Dasilva, 90+1), Shade (Ayyer, 80), Uattara (Furo, 90), Tiago
«Vest Hem»: Hermansen, Disasi, Mavropanos, Diuf (Traore, 74), Uoker-Piters (Van-Bissaka, 65), Fernandesh, Souchek, Sammervill (Skarlz, 88), Bouen (Magassa, 88), Pablo, Kastelyanos (Uilson, 65)
Ogohlantirishlar: Kayode, 73 – Kastelyanos, 59. Sammervill, 62. Skarlz, 90
Bu mavsumda APLda qolish uchun kurash chempionlik tituli uchun kurashdagi kabi qizg‘in kechmayapti. «Vulverhempton» va «Byornli» chempionshipga tushib ketishi allaqachon aniq bo‘lgan, mavsumning uchinchi omadsiz jamoasi esa katta ehtimol bilan «Vest Hem» klubi bo‘ladi. Shanba kuni ushbu jamoa «Brentford» maydonida ilojsiz ahvolda qoldi va hozirda 18-o‘rinda turgan «Tottenhem»da turnir jadvalining quyi qismini tark etish uchun yaxshi imkoniyat hosil bo‘ldi. «Bolg‘achilar» darvozasiga uchta javobsiz gol urgan «asalarilar» yevrokuboklar yo‘llanmasi uchun kurash olib bormoqda, jamoa to‘purari Igor Tiago mavsumdagi sakkizinchi penaltini aniq ijro etib, to‘purarlar poygasida Holandni quyishda ta’qib etmoqda. Hozircha bu poygada norvegiyalik hujumchi ikkita gol oldinda (24:22), ammo braziliyalik hujumchi hozir pik formasida – u gollarining yarmini 2026 yilda urgan va bu borada hech bir hujumchi unga teng kelolmaydi.
«Arsenal» – «Fulhem» 3:0
Gollar: Yokeresh, 9 (1:0). Saka, 40 (2:0). Yokeresh, 45+4 (3:0)
«Arsenal»: Rayya, Saliba, Gabriel Magalyayns, Kalafiori, Uayt (Moskera, 83), Rays (Subimendi, 64), Lyuis-Skelli, Eze (Douman, 78), Trossar, Saka (Madueke, 46), Yokeresh (Gabriel Jyezus, 64)
«Fulhem»: Leno, Bassi, Andersen, Robinson, Kastan, Rid (Kerni, 63), Lukich, Smit-Rou (Kusi-Asare, 78), Chukvueze (King, 64), Uilson (Bobb, 64), Ximenes (Rodrigu Munis, 73)
Ogohlantirish: Lukich, 23
Chempionlik poygasida qatnashayotgan «Arsenal» esa bu oqshom raqibni yirik hisobda mag‘lub etish uchun maydonga tushgandi va buni birinchi bo‘limdayoq uddaladi. Arteta shu kuni boshlang‘ich tarkibdagi tanlovlari bilan ko‘pchilikni ajablantirdi. Birinchidan, so‘nggi vaqtlarda muntazam ravishda ilk daqiqalardan o‘ynab kelgan Inkapiye zaxirada qoldirildi va uning o‘rnini hujumkorligi bilan farq qiladigan Kalafiori egalladi. Ikkinchidan, bu mavsumda top-5 ligalarda eng ko‘p o‘ynagan yarimhimoyachi bo‘lib turgan Martin Subimendiga dam berildi. Uchinchidan, uning o‘rniga tayanch yarimhimoyasiga Rays o‘tkazildi, Deklanning o‘rniga esa chap qanot himoyachisi Lyuis-Skelli tushirildi. Shu bilan birga, hujumning o‘ng qanotida ancha vaqtdan buyon jarohatini davolagan Saka paydo bo‘ldi. Aynan Saka va Skellining harakatlari o‘yin taqdirini hal qildi. Bukayo o‘z qanotida istagan ishini qildi va uning uzatmasidan keyin Yokeresh tezkor gol bilan hisobni ochdi.
Keyin esa Sakaning o‘zi shvetsiyalik hujumchining uzatmasini golga aylantirdi. Arteta uni seshanba oqshomida YeChL yarimfinalida «Atletiko»ga qarshi kechadigan javob o‘yini uchun asrashga qaror qilib, tanaffusda zaxiraga oldi. Ammo u unga 45 daqiqa ham uchta yubiley natijaga erishish uchun yetarli bo‘ldi – 80 gol, 70 assist va 150 ball. Uning maydonga tushishi Yokereshning ham o‘yinini ochib yubordi, u bo‘lim oxirlarida Trossarning uzatmasi orqali dubl qayd etdi. Bu uning uchun «Arsenal» safida ilk bor bir o‘yinda 2+1 ko‘rsatkich qayd etishi bo‘ldi. Shuningdek, Viktor Aleksis Sanches davridan buyon «Arsenal»dagi ilk mavsumida yigirmadan ortiq gol urgan (21) ilk futbolchiga aylandi.
Bu o‘yin mezbonlarning to‘liq ustunligida o‘tgani quyidagi suratda yaqqol aks etgan: «Arsenal» himoya chizig‘i shu qadar yuqori joylashganki, darvozabon David Rayya maydonning ikkinchi qismiga kelib podkat amalga oshirmoqda.
Bu o‘yindagi yirik hisobdagi g‘alaba chempionlik poygasida qo‘l kelishi mumkin, agar mavsum yakunida «Arsenal» va «Manchester Siti»ning ochkolari teng kelib qolsa, birinchi navbatda to‘plar nisbatiga qaraladi. Hozirda «kanonirlar» +4 ko‘rsatkichiga ega va keyingi raqiblar ham nisbatan osonroq: «Vest Hem» (18-o‘rin), «Byornli» (19-o‘rin) va «Kristal Pelas» (14-o‘rin). «Siti»ning qolgan 5 raqibidan 3 tasi yevrokuboklar uchun kurashmoqda: «Everton» (11-o‘rin), «Brentford» (6-o‘rin), «Bornmut» (8-o‘rin), «Kristal Pelas» (14-o‘rin) va «Aston Villa» (5-o‘rin).
Ispaniya: Simeonening 1000-o‘yini va YeChLga chiqqan «Vilyarreal»
«Vilyarreal» – «Levante» 2:1
Gol: Mikautadze, 38 (1:0). Espi, 51 (1:1). Moleyro, 62 (2:1). Mikautadze, 68 (3:1). Byukenen, 87 (4:1). Pepe, 90 (5:1)
«Vilyarreal»: Tenas, Veyga, Navarro (Kambvala, 81), Pedrasa (Kardona, 74), Frimen, Parexo (Parti, 74), Komesanya, Moleyro, Pepe, J. Moreno (Byukenen, 84), Mikautadze, Peres
«Levante»: Rayan, M. Moreno, Matturro, Pampin, Tolyan, Arriaga (Ragube, 68), Olasagasti, Pablo Martines (Bruge, 77), Romero (Tunde, 46, Etta Eyong, 68), Alvares (Losada, 30), Espi
Ogohlantirishlar: Parexo, 45. Veyga, 55 – Arriaga, 45
Mavsumning katta qismida uchinchi o‘rinni o‘zida saqlab turgan «Vilyarreal» bu turda «Levante»ni yirik hisobda tor-mor etib, valensiyaliklarning ligada qolish imkoniyatlarini amalda nolga tenglashtirdi. O‘z navbatida, «submarinalar» bu g‘alaba orqali qatorasiga ikkinchi mavsumda Chempionlar ligasi umumiy guruh bosqichida ishtirok etishini kafolatladi. Marselino shogirdlarida yevrokubokning bu mavsumidagi muvaffaqiyatsizlikni to‘g‘rilash imkoni bo‘ladi. Shanba oqshomidagi o‘yinni Mikautadzening dubli hal qildi, u avvaliga raqib himoyasidagi qo‘pol xatodan foydalandi, keyin esa Pepening qanotdan uzatmasini darvoza to‘riga to‘g‘rilab yubordi. O‘tgan yozda «Lion»dan Ispaniyaga ko‘chib o‘tgan ushbu gurjistonlik hujumchi ilk mavsumida barcha turnirlar doirasida 13 gol urishga erishdi.
«Valensiya» – Atletiko» 0:2
Gollar: Luke, 74 (0:1). Kubo, 82 (0:2)
«Valensiya»: Dimitriyevski, Tarrega, Pepelu, Xose Gayya (Vaskes, 73), Saraviya (Raba, 82), Rodriges, Gerra, Ugrinich (Duro, 59), Rioxa (Diyego Lopes, 59), Sodiq, Ramazani (Gruneveld, 73)
«Atletiko»: Musso, Langle, Le Norman, Dias, Bonyar (Purich, 90+7), Mendosa (Koke, 73), Vargas, Morsilio (Luke, 63), Almada (Grizmann, 73), Molina, Belaid (Kubo, 63)
Ogohlantirishlar: Tarrega, 67 – Almada, 29. Mendosa, 52. Vargas, 61
«Atletiko» «Valensiya» uchun noqulay raqib sifatidagi maqomini mustahkamlab, qatorasiga beshinchi o‘zaro o‘yinda g‘alaba qozondi. Qolaversa, «matraschilar» o‘yinning birinchi bo‘limida mezbonlarga darvoza sohasi tomon birorta zarba berishga imkon qoldirmadi, ikkinchi bo‘lim oxirida esa shu kuni la ligada debyut qilgan ikki yosh futbolchi «ko‘rshapalaklar» jamoasini nokautga uchratdi. Diyego Simeone YeChL yarimfinali doirasida Londonga safar oldidan asosiy tarkib futbolchilariga dam bergandi va yosh futbolchilar taqdim etilgan imkoniyatdan foydalanishdi.
Avvaliga 20 yoshli forvard Luke o‘z debyutini gol bilan nishonladi, keyin esa 18 yoshli Migel Kubo bu darajadagi ilk o‘yinini madridliklar afsonasi Grizmanning uzatmasi orqali urgan goli bilan eslab qoladigan bo‘ldi. Fransuz hujumchi klublar darajasidagi 800-o‘yinida navbatdagi golli harakatini amalga oshirdi. Bu o‘yin Simeone uchun ham yubiley edi, argentinalik mutaxassis shu kuni murabbiylik faoliyatidagi 1000-o‘yinini o‘tkazdi. Shunday o‘yinda jamoa tarixida 1984 yildan buyon kuzatilmagan holat qayd etildi: 42 yildan buyon «Atletiko» ikki debyutantning ikki goli bilan g‘alaba qozonmagandi.
«Osasuna» – «Barselona» 1:2
Gollar: Levandovski, 81 (0:1). Torres, 86 (0:2). Raul Garsiya, 88 (1:2)
«Osasuna»: Errera, Boyomo, Katena, Galan, Roze, Torro (Osambela, 85), Monkayola (Barxa, 85), Moyses Gomes (Oros, 70), Moro, R. Garsiya (Bretones, 86), Budimir (Raul Garsiya, 70)
«Barselona»: X. Garsiya, Kubarsi, Martin, Joau Kanselu, E. Garsiya (Arauxo, 82), Gavi (de Yong, 62), Pedri (Bernal, 88), Olmo (Torres, 62), Fermin Lopes, Barji (Reshford, 62), Levandovski
Ogohlantirishlar: Monkayola, 74. Krus, 90 – Gavi, 24. E. Garsiya, 60
«Barselona»ning vaziyati juda oddiy – kataloniyaliklar shu turdayoq maydondan tashqarida turib chempion bo‘lishi mumkin. Buning uchun «Real» yakshanba kuni «Espanyol»ga qarshi o‘yinda ochko yo‘qotishi talab etiladi.
Ammo jamoa birinchi navbatda shanba kuni Pamplonada kechadigan o‘yinda g‘alaba qozonishi talab etilardi va bu har qanday raqib uchun oson ish emas. O‘yinning birinchi bo‘limi «Osasuna» nafaqat peshqadamning hujumlarini qaytarib turdi, balki o‘zi ham xavfli qarshi hujumlar uyushtirdi.
O‘yin kartinasi ikkinchi bo‘limda o‘zgara boshladi va Rafinya va Yamal kabi yetakchilar yo‘q sharoitda Reshford ko‘p ishni o‘z gardaniga oldi. Zaxiradan o‘yinga qo‘shilgan ingliz hujumchisi avvaliga o‘zi xavfli zarba berdi, keyinroq qanotdan Levandovskining boshiga ajoyib uzatma berdi. O‘tkazib yuborilgan goldan keyin mezbonlar to‘liq kuch bilan oldinga o‘tib ketishdi va ikkinchi golni o‘tkazib yuborishdi – Fermin Lopes chiziqlar orasidan o‘tkazilgan pas bilan Ferran Torresning goliga assistentlik qildi.
Ikki gol ustunligidan keyin «Barsa» futbolchilari biroz bo‘shashdi va 88-daqiqada jarima maydonida yolg‘iz qoldirilgan Raul Garsiya mezbonlarning hisobni qisqartiruvchi golini urdi.
Shunga qaramay, «Barselona» la ligada qatorasiga 10-g‘alabasini nishonladi va endi bugun «Real» va «Osasuna» o‘yini qanday natijada yakunlanishini kutmoqda. Madridliklar bugun safardan g‘alaba bilan qaytadigan bo‘lsa, «Barselona» keyingi haftada bo‘lib o‘tadigan klasikoda chempionlikni rasmiylashtirishi mumkin.
U ko‘p yillar Farg‘onaning «Neftchi» klubi safida to‘p surgan, O‘zbekiston milliy jamoasi bilan 1994 yilgi Osiyo o‘yinlarida chempion bo‘lgandi.
O‘zbekiston milliy jamoasi sobiq futbolchisi, O‘zbekistonda xizmat ko‘rsatgan sportchi va murabbiy, futbol faxriysi Abdusamad Do‘rmonov 60 yoshda vafot etdi.
Abdusamad Do‘rmonov 1965 yil Termiz shahrida tug‘ilgan. Futbolchilik faoliyati davomida «Paxtakor» (1987-1989), «Surxon» (1990-1991) va «Neftchi» (1992-2002) kabi klublarda to‘p surgan, Farg‘ona klubi jamoasi bilan besh marta O‘zbekiston chempioni bo‘lgan.
Shuningdek, 1992-1994 yillarda O‘zbekiston milliy jamoasiga chaqirilgan, 1994 yil Yaponiyada o‘tkazilgan Osiyo o‘yinlarida g‘olib bo‘lgan.
U futbolchilar oilasi vakili bo‘lib, ukasi Rustam Do‘rmonov ham u bilan birga «Neftchi» klubi sharafini himoya qilgan, yana bir ukasi Ravshan Do‘rmonov esa Termizning «Surxon» klubida o‘ynagan.
Abdusamad Do‘rmonov 2002 yilda futbolchilik faoliyatini yakunlagach, «Neftchi», «Yozyovon lochinlari» va «Istiqlol» kabi klublarda murabbiy sifatida ishlagan, hozirga qadar «Neftchi» klubi murabbiylar shtabida ishlayotgandi.
«Barselona» hujumchisi Robert Levandovski faoliyatini «Yuventus»da davom ettirishi mumkin deb xabar berdi Tuttosport.
Turinliklar va polshalik forvardning agenti muzokara o‘tkazgan.
Xabarga ko‘ra, «Yuventus» kelasi mavsum uchun YChL yo‘llanmasini qo‘lga kiritsa, 37 yoshli futbolchi klubga o‘tish taklifini ko‘rib chiqishga tayyor.
Levandovskining «Barselona» bilan amaldagi shartnomasi 2026-yil yozigacha mo‘ljallangan. Kataloniyaliklar futbolchiga yangi shartnoma taklif qilgan, ammo unda maosh keskin kamaytirilishi ko‘zda tutilgan va bu hujumchiga ma’qul kelmagan.
Prezident Mirziyoyev Samarqand shahridagi Imom Buxoriy majmuasini ziyorat qildi
Chet el valutasida obligatsiya chiqarishga ruxsat berildi
«Inter» muddatidan oldin Italiya chempioni bo‘ldi
-
Siyosat5 days agoOʻzbekistonda yashirin forumda davlat xizmatchilariga oid maʼlumotlarning sizib chiqib ketishini tekshirmoqda
-
Siyosat5 days agoOʻzbekiston Davlat investitsiya jamgʻarmasi Toshkent va Londonda ikki tomonlama IPO oʻtkazdi
-
Siyosat4 days agoPrezident Mirziyoyev energiya tejash vositasi sifatida kommunal xizmatlarni oʻchirishni taqiqlovchi farmonni imzoladi
-
Jamiyat5 days agoMashina olib berish va’dasida yuzlab odamni chuv tushirgan “Umid avto”chilarga hukm o‘qildi
-
Dunyodan5 days ago
Ukraina va Yevropa Ittifoqi Isroilga qarshi sanksiyalar kiritmoqchi
-
Dunyodan5 days ago
Jarrohlar Apple Vision Pro foydasiga monitorlardan voz kechishmoqda
-
Iqtisodiyot5 days ago«Kursga sun’iy ta’sir o‘tkazish tarafdori emasmiz»
-
Turk dunyosi4 days agoKurd jangari rasmiysining aytishicha, Turkiya islohotlarning yoʻqligi tufayli tinchlik muzokaralarini toʻxtatib qoʻymoqda