Sport
«Meros». Srechko Katanetsga bag‘ishlanadi
Bugun to‘y. Bu marosimning o‘ziga xos tanish xususiyatlaridan biri sizga ham tanish – navbati bilan kimdir so‘zga chiqib, goh uni, goh buni maqtaydi, ko‘klarga ko‘taradi. Bugun shunaqa kun, kimni maqtasak ham yarashaveradi va navbatdagisi Srechko Katanets haqida.
Tariximizda ilk marta jahon chempionatiga chiqqan bo‘lsak-da, boshqa bir an’ana bu safar ham buzilmadi – yana mundial saralashini yagona murabbiy bilan o‘tkaza olmadik. So‘nggi bosqichning 6 turi o‘tgach, Srechko Katanets salomatligi bilan bog‘liq muammolari sabab jamoani tark etishga majbur bo‘ldi, uning o‘rniga kelgan Temur Kapadze esa vazifani uddaladi.
Bilasizmi, yangi murabbiylarga doim qiyin. Chunki iste’fo bekorga yuz bermaydi va jamoaga yangi kelgan murabbiy doim ko‘p narsalarni o‘zgartirishiga to‘g‘ri keladi. Aksariyat hollarda murabbiyni iste’foga olib boradigan ikki sabab bor va futbolda biz doim shunday holatlarni kuzatib o‘rganganmiz.
Birinchisi, jamoa o‘yini va natijalar pasayishi, ichki muhit yomonlashishi, futbolchi va murabbiy o‘rtasida ziddiyatlar paydo bo‘lishi va hokazo. Yangi murabbiyga oson bo‘lmaydi. Ha, bosim nuqtayi nazaridan yengil bo‘lishi mumkin, jamoa qanchalik pasaygan bo‘lsa, yaxshi tomonga o‘zgartirish osonroqdek tuyuladi, lekin ulkan mehnat talab qiladi.
Jamoa muvaffaqiyat qozonmagan, demak avvalgi murabbiy qo‘llagan uslub futbolchilarga mos kelmagan, murabbiy yangisini, eng mosini o‘ylab topishi, sinovdan o‘tkazishi kerak. Yomon natijalar tufayli futbolchilarning ham holati yaxshi emas, jamoada o‘ziga bo‘lgan ishonch kam, ozgina muvaffaqiyatsizlik, ozgina o‘yin qovushmasligi ham jamoani sindirib qo‘yishi mumkin. Ularni katta natijalarga qodir ekaniga, yangi uslub natijalar olib kelishi mumkinligiga ishontirish ham oson emas, murabbiydan tajriba va salohiyat talab qilinadi. Biz ko‘p kuzatadigan, eng ko‘p sodir bo‘ladigan iste’folar aynan mana shu sabab bilan yuz beradi.
Shu paytgacha turnir yarmida jamoani qabul qilib olgan avvalgi murabbiylarimizda aynan shu masala doim turardi. Ayniqsa, Mirjalol Qosimovdan so‘rang, u ikki marta shunday vaziyatga tushgan, mag‘lubiyatga uchragan jamoani olib kurashishiga to‘g‘ri kelgan.
Ikkinchisi, butkul teskari holat. Odatda bir murabbiy jamoa bilan barcha muvaffaqiyatlarga erishadi, sovrinlar yutadi va shartnoma muddati tugagani yoki boshqa kattaroq taklif tufayli jamoani tark etadi.
Uning o‘rniga kelgan murabbiy uchun yanada qiyin holat. Ha, jamoa kuchli, endigina sovrinlar yutdi, muvaffaqiyatli mavsumlar o‘tkazdi, ammo xuddi shu yo‘lni davom ettirish osonmi? Butunlay sobiq murabbiyni takrorlashning iloji yo‘q, o‘z uslub va g‘oyalarni tatbiq qilish yanada qiyin – futbolchilarni bunga ishontirish kerak. Axir ular yaqindagina butunlay boshqa uslub va g‘oyalar bilan muvaffaqiyatga erishdilar-ku?
Motivatsiya bilan ham muammolar bo‘ladi – sovrinlar yutgan futbolchilarni qaytadan o‘sha sovrinlar uchun kurashishga undash doim ham oson bo‘lmaydi. Nimanidir o‘zgartirish, ishlab turgan mexanizmni buzish, yaxshirog‘ini taklif qilishga to‘g‘ri keladi. Hammasidan ham qiyini, bosim ham katta bo‘ladi. Cho‘qqida turish qiyin, balki eski murabbiy bilan ham pasayish kutilayotgandi, ammo endi pasayish bo‘lsa, hammasi yangi murabbiydan ko‘riladi. Bosim katta.
Bunday sharoitda jamoaga kelish yanada qiyin, o‘z vaqtida «MYu»da Fergyuson o‘rniga kelgan Moyyes, «Inter»da trebl qilgan Mourinioning o‘rniga kelgan Benites, «Bavariya»da Haykenss o‘rniga kelgan Pep Gvardiola qanday tanqidlar ostida qolganini eslang. Umuman, bunday kelish ko‘p hollarda muvaffaqiyatsiz chiqadi, avvalgi yutuqlarni takrorlash imkonsiz bo‘lib qoladi.
Xullas, yangi jamoani boshqarish doim mushkul ish va Timur Kapadze buni uddaladi, vazifani oxirigacha yetkazdi. Unga biroz osonroq bo‘ldi, sababi, unga qoldirilgan meros yuqorida sanab o‘tilgan ikkala vaziyatga ham o‘xshamaydi. Jamoa muvaffaqiyatsizlik girdobida emasdi, yaxshi muhit shakllangan, barcha futbolchilar yagona maqsad uchun yo‘naltirilgan edi. Nimadir o‘ylab topish, yangi uslub topib almashtirish ehtiyoji yo‘q – tayyor, ishlab turgan mexanizmga ba’zi teginishlar qilinsa kifoya.
Ikkinchi holat ham emas. Sovrinlarni yutgan, motivatsion bo‘shliqqa tushib, yangi qonga muhtoj bo‘lgan jamoani qabul qilib olmadi u. Yo‘lga tushib olgan, og‘ishmay oldinga harakatlanayotgan kemada kapitan almashdi, xolos. Biz bilgan ko‘p iste’folardan, jumladan shu paytgacha milliy jamoamizda ro‘y bergan almashishlardan butunlay farqli bo‘lgan hodisa.
Albatta, Timur Kapadze uchun ham bu o‘ziga yarasha sinov, avval ham yozganimdek, bu penalti tepish holatiga o‘xshaydi. Tepuvchida juda katta bosim, u penaltini ishlamagan, agar gol ursa, hamma oddiy qabul qiladi, axir penalti urilishi shart. Ammo adashsa, barcha tanqidlar unga qaratiladi, tayyor yutuqni qo‘ldan boy bergan noshudga aylanadi. Mana shu o‘ta riskli vazifani qabul qilib olgani uchun ham Timurga rahmat aytish kerak, ammo bu maqola Srechko Katanets haqida.
Aynan Katanets ushbu muvaffaqiyatli jamoaning bunyodkori, buni inkor etish qiyin. Aynan Katanets ellikka yaqin nomzodlar ichidan hozir biz uyqudan uyg‘onib ham bemalol sanab beradigan barqaror tarkibni yig‘di. Aynan Katanets juda ko‘p uslublarni sinab ko‘rib, hozircha ish berayotgan va balki bu futbolchilar uchun eng mos va eng ishonchli bo‘lgan sxemani olib kirdi. Aynan Katanets futbolchilarimizga irodani o‘rgatdi, biz kambeklar qila boshladik, hisob qanday bo‘lishidan qat’i nazar muvaffaqiyatli yakun ehtimoli borligiga biz ham ishona boshladik. Eron bilan muhim durang Kapadzening taktik tayyorgarligi bilan sodir bo‘lgandir, inkor etmayman, lekin Eron bilan shunday o‘ynash mumkinligiga ishonch futbolchilarimizda Eron bilan avvalgi uchrashuvlar tufayli paydo bo‘lmaganmi?
Ko‘pchilik aytmoqda – shunchaki, o‘rinlar soni 48 taga yetgani uchun bu sodir bo‘ldi, Katanets o‘ynagan raqiblarni avval ham yutib yurganmiz. Balki to‘g‘ridir, balki agar 32 jamoa formati qolganida qiyinroq raqiblar bilan yana eski hikoya takrorlanishi mumkin edi.
Ammo bu aslida biroz noto‘g‘ri yondashuv. Nega qo‘limizda tayyor faktlar turganda «agar»larga urg‘u berishimiz kerak? Yuqorida meros haqida aytildi, Srechko Katanetsga qanday meros qolgandi? Axir avvalgi jahon chempionati saralashida biz 12 ta kuchli jamoa ichiga ham kira olmagandik-ku? Nega kuchli oltitalikka kirib mundial ishtirokchisiga aylanayotganimizni oddiy holat sifatida qabul qilyapmiz?
Ko‘p tanqidlar jamoamizning himoyaga ko‘proq e’tibor qaratib yuborayotgani uchun bo‘lgan, ayniqsa Qatarga qarshi o‘yin Katanetsning eng muvaffaqiyatsiz qarorlari bilan yodda qolgandi.
Endi qarang, nega Qirg‘iziston bilan ikkinchi o‘yinda uzoq vaqt bir kishi ko‘p o‘ynab ham bittadan ortiq gol ura olmadik? BAA bilan ikkinchi o‘yinning oxirlarida biz gol o‘tkazib yuborishimiz ham mumkin emasmidi? Aytmoqchimanki, hozirgi jamoamiz ham aslida Katanets davridagisidan unchalik farq qilmaydi, biz haliyam o‘ta ehtiyotkormiz, ko‘p narsa o‘zgarmadi. Bu shuni isbotlaydiki, katta o‘zgarishlar bilan emas, aynan Srechko Katanets jamoasi, uning uslubi, g‘oyasi, sxemasi bilan mundial yo‘llanmasini qo‘lga kiritdik.
Bu yaxshimi, yomonmi, biz bundan kuchliroq o‘ynashga qodirmidik aslida, bilmadim, buni keyingi murabbiylar namoyish qilib berar, albatta, Timur Kapadzega omad tilaymiz, jamoamiz yuqoriroq marralarni zabt etishiga ishonamiz.
Lekin mundial yo‘llanmasi Srechko Katanets jamoasiniki. Buni inkor etib bo‘lmaydi. Inkor etishga ehtiyojimiz ham yo‘q. Mister Srechko, hammasi uchun rahmat. Umringiz uzoq bo‘lsin.
Qahramon Aslanov
Osiyo futbol konfederatsiyasi (OFK) 2031 va 2035 yilgi Osiyo Kubogi mezbonlarini tanlash jarayonlarini bekor qildi. Musobaqalar FIFA talabiga ko‘ra juft yillarga ko‘chirildi. Endi mezbon tanlash jarayoni qaytadan boshlanadi. Avvalroq, 2031 yilgi turnir mezbonligiga O‘zbekiston, Tojikiston va Qirg‘iziston qo‘shma ariza topshirgan edi.
Foto: REUTERS/Ibraheem Al Omari
Osiyo futbol konfederatsiyasi (OFK) 2031 va 2035 yilgi Osiyo Kubogi mezbonlarini tanlash jarayonlari bekor qilingani haqida milliy federatsiyalarni rasman xabardor etdi, deb yozdi Reuters.
Turnir mezbonligiga O‘zbekiston, Tojikiston va Qirg‘izistonning qo‘shma arizasi ham da’vogarlik qilayotgan edi.
Bekor qilinishiga sabab FIFA tashabbusi bo‘lib, u qit’a turnirlari jadvalini o‘zgartirish va ularni juft yillarga ko‘chirishni taklif qilgan. Muhokamalardan so‘ng OFK bu taklifga rozi bo‘ldi.
Nima o‘zgaradi?
Asosiy oqibat – turnirlarning to‘liq ko‘chirilishi: Osiyo kubogi-2031 endi 2032 yilga rejalashtirilgan, Osiyo kubogi-2035 esa 2036 yilga ko‘chirilgan. Shunday qilib, turnirni o‘tkazishning an’anaviy tizimi buziladi va musobaqalar boshqa vaqt oralig‘ida o‘tkaziladi. Shu bilan birga, Osiyo Kubogi-2027 reja bo‘yicha o‘z muddatida bo‘lib o‘tadi.
Osiyo Kubogining juft yillarga ko‘chirilishi yana bir muammoni keltirib chiqarmoqda – boshqa konfederatsiyalarning eng yirik turnirlari bilan bir vaqtga to‘g‘ri kelmoqda. Endi bir yil davomida quyidagi musobaqalar o‘tkazilishi mumkin: Yevropa chempionati (UYeFA Yevro), Amerika Kubogi (Copa America), Osiyo Kubogi.
FIFA nega tizimni o‘zgartirmoqda?
O‘zgarishlar xalqaro taqvimni markazlashgan holda boshqarish bilan bog‘liq. FIFA allaqachon 2030 yilgacha bo‘lgan global musobaqalar rejasini tasdiqlagan bo‘lib, unda milliy jamoalar o‘yinlari uchun oynalar, saralash turnirlari, final bosqichlari va o‘rtoqlik o‘yinlari aniq ko‘rsatilgan. Ushbu tizimda har bir konfederatsiya umumiy jadvalga moslashishi kerak. Osiyo Kubogi qarori – mana shu katta islohotning bir qismi.
Mezbonlikka nomzodlar bilan vaziyat qanday?
Turnirlar sanasining o‘zgarishi mezbonlikka da’vogarlarning barcha arizalarini avtomatik ravishda bekor qiladi. Bu shuni anglatadiki, mezbonlarni tanlash jarayoni qaytadan boshlanadi, hamma yangi tartibni kutishiga to‘g‘ri keladi. OFK amalda ikki turnirga tayyorgarlik siklini qaytadan boshlaydi.
2031 yilgi Osiyo Kubogi mezbonligiga Avstraliya, Hindiston, Indoneziya, Kuvayt, Janubiy Koreya, shuningdek, O‘zbekiston, Qirg‘iziston va Tojikiston qo‘shma ariza topshirgan edi. Endi O‘zbekistonning yangi turnirlar mezbonligi uchun ariza topshirishi masalasi noma’lum. Hozircha, O‘zbekiston futbol assotsiatsiyasi (O‘FA) vaziyatga munosabat bildirmadi.
Fudbol bo‘yicha O‘zbekiston milliy jamoasi Toshkentda bo‘lib o‘tadigan FIFA Series xalqaro o‘rtoqlik turnirida qatnashadi. Musobaqa 27–30 mart kunlari tashkil etiladi va unda Gabon, Trinidad va Tobago hamda Venesuela jamoalari ishtirok etadi.
Mart oyining oxirida Toshkent shahri FIFA Series xalqaro o‘rtoqlik turniriga mezbonlik qiladi. Milliy terma jamoa bosh murabbiyi Fabio Kannavaro maskur yig‘in uchun jalb etilgan futbolchilar ro‘yxatini e’lon qildi.
Darvozabonlar: O‘tkir Yusupov («Navbahor»), Abduvohid Ne’matov («Nasaf»), Botirali Ergashev («Neftchi»).
Himoyachilar: Rustamjon Ashurmatov («Istiqlol», Eron), Umarbek Eshmurodov («Nasaf»), Abduqodir Husanov («Manchester Siti», Angliya), Muhammadrasul Abdumajidov, Hojiakbar Alijonov, Sherzod Nasrullayev, Muhammadqodir Hamraliyev («Paxtakor»), Behruz Karimov («Surxon»), Jahongir O‘rozov («Dinamo»), Farruh Sayfiyev («Neftchi»).
Yarim himoyachilar: Umarali Rahmonaliyev («Sabah», Ozarbayjon), Ibrohim Ibragimov, Dostonbek Hamdamov, Akmal Mozgovoy («Paxtakor»), Alisher Odilov, Jamshid Iskanderov («Neftchi»), Otabek Shukurov («Baniyas», BAA), Azizjon G‘aniyev («Al Bataeh», BAA), Oston O‘runov («Persepolis», Eron).
Hujumchilar: Eldor Shomurodov («Istanbul Bashakshehir»), Igor Sergeyev («Persepolis», Eron), Sherzod Temirov («Erbil», Iroq).
Musobaqa 27-30 mart kunlari o‘tkaziladi.
27 mart
15:00 Venesuela – Trinidad va Tobago («Paxtakor» stadioni);
19:00 O‘zbekiston – Gabon («Bunyodkor» stadioni).
30 mart
15:00 Gabon – Trinidad va Tobago («Paxtakor» stadioni);
19:00 O‘zbekiston – Venesuela («Bunyodkor» stadioni).
Ma’lumot uchun, FIFA Series 2026 turnirlari o‘rtoqlik o‘yinlari o‘rnini bosishi nazarda tutilgan va butun dunyo bo‘ylab o‘tkaziladi. Erkaklar o‘rtasidagi bahslarga Avstraliya, Ozarboyjon, Indoneziya, Qozog‘iston, Yangi Zelandiya, Puerto-Riko, Ruanda va O‘zbekiston mezbonlik qiladi. Ayollar o‘rtasidagi musobaqalar Braziliya, Kot-d’Ivuar va Tailandda bo‘lib o‘tadi.
Turnirda ishtirok etayotgan beshta erkaklar milliy jamoasi – Avstraliya, Kabo-Verde, Kyurasao, Yangi Zelandiya va O‘zbekiston 2026 yilgi jahon chempionati ishtirokchisi sanaladi.
O‘zbekiston Superligasida 4-tur o‘yinlari o‘tkazildi. «Neftchi» mavsumda birinchi marta gol o‘tkazdi, ammo g‘alabali qadamini davom ettirdi. «Navbahor» va «Nasaf» so‘nggi daqiqalarda gol o‘tkazib, mag‘lubiyatga uchradi. Jizzaxda 6 ta gol urilgan o‘yinda «Paxtakor» uch ochkoni qo‘lga kiritdi. OKMK birinchi marta g‘alaba qozondi, bosh murabbiy Mirjalol Qosimov mobil o‘yinlar tufayli futbolchilarda ishtiyoq pasayib ketganini aytdi.
18-20 mart kunlari futbol bo‘yicha O‘zbekiston Superligasida 4-tur o‘yinlari o‘tkazildi.
QIZILQUM 0:1 OKMK
Gol: Abror Karimov, 34 (0:1)
OKMK mavsumdagi birinchi g‘alabasini Navoiyda qo‘lga kiritdi. Yagona gol «Qizilqum»ni mag‘lub etish uchun yetarli bo‘ldi. Olmaliqliklar ushbu g‘alabadan keyin musobaqa jadvalida 10-o‘ringa ko‘tarilib oldi.
«Qizilqum» bosh murabbiyi Akmal Rustamov jamoa yagona xato tufayli yutqazganini aytdi. OKMK ustozi Mirjalol Qosimov futbolchilarning ishtiyoqini telefondagi o‘yinlar olib qo‘yayotganidan shikoyat qildi. «Hozir telefon chiqib ko‘plarning xayolini olyapti, telefondagi o‘yinlar maydondagi futboldan ko‘proq azart beryapti. Qaniydi maydonda ham shunday kurash kechsa. Telefondagi o‘yinlar yoshlarning miyasini buzyapti», dedi u.
QO‘QON-1912 2:1 NAVBAHOR
Gollar: Anri Chichinadze, 14 (0:1), Javohir Husanov, pen 28 (1:1), Muhammadanas Hasanov, 90+4 (2:1)
Qo‘qonda kutilmagan natija qayd etildi. G‘alaba nimaligini bilmay kelayotgan mezbonlar «Navbahor»ni irodali tarzda mag‘lub etishga erishdi. G‘alaba keltiruvchi gol so‘nggi daqiqalarda urildi.
«Qo‘qon-1912» ustozi Andrey Shipilov bugun omad kulib boqqanini tan oldi. «Navbahor» bosh murabbiyi Temur Kapadze mag‘lubiyatni boshqa narsalar qatori maydon holati bilan ham bog‘ladi. «Maydon ham og‘ir, o‘t baland ekan, bu esa raqibga qo‘l keldi. Maydonda to‘p sekin yurdi, bizga og‘irlik qildi, maydon holati bilan kurash olib bordik», dedi u.
XORAZM 1:2 BUNYoDKOR
Gollar: Nosirjon Abdusalomov, 16 (0:1), Matiya Krivokapich, 43 pen (0:2), Temur Ismailov, 54 (1:2)
Chetlatish: Sardor Rahmonov, 62 (Bunyodkor)
«Bunyodkor» Urganchdagi qiyin o‘yinda 3 ochkoni qo‘lga kiritdi. Toshkentliklar so‘nggi yarim soatni raqibga nisbatan kamchilikda o‘tkazdi, ammo g‘alabani ushlab qolishga erishdi.
«Xorazm» bosh murabbiyi Sergey Tokov ikkita gol o‘tkazib yuborilgan birinchi bo‘lim haqida «uyalishimiz kerak» dedi. «Bunyodkor» ustozi Ilyos Zeytullayev g‘alabadan xursandligini yashirmadi va o‘zini «o‘zbek Spalettisi» deb atalishiga xotirjam munosabatda ekanini ta’kidladi. «Men o‘zimni o‘zbek spagettisi deyman (kulib). Menga Spaletti murabbiy sifatida yoqadi, lekin men angrenlikman», dedi u.
BUXORO 3:1 DINAMO
Gollar: Ravshan Xayrullayev, 45, avtogol (0:1), Temur Mamasidiqov, 48 (1:1), Shahzodbek Ubaydullayev, 54 (2:1), Ravshan Xayrullayev, 63 (3:1)
Yana bir kutilmagan natija Buxoroda qayd etildi. Aleksandr Xomyakov qo‘l ostidagi «Buxoro» Samarqandning «Dinamo» klubini irodali tarzda mag‘lub etdi. Bu natijadan so‘ng, buxoroliklar musobaqa jadvalida ikkinchi o‘ringa ko‘tarilib oldi va chempionat startidagi asosiy kashfiyot bo‘lib turibdi.
«Buxoro» bosh murabbiyi o‘yindan keyin «dastlab uyatli gol o‘tkazdik va tezkor gol urdik. Ikkinchi golda omadimiz keldi, uchinchi golimiz esa o‘yinga yakun yasab berdi», dedi. «Dinamo» ustozi Vadim Abramov maydon sifatiga e’tiroz bildirdi. «O‘ylashimcha, bu maydonda futbol o‘ynashga boshqa ruxsat berishmasa kerak», dedi u.
ANDIJON 2:0 MASh’AL
Gollar: Martin Boake, 18 (1:0), Doniyor Abdumannopov, 76 (2:0)
Chetlatish: Ibrohim G‘anixonov, 12 (Mash’al)
«Andijon» autsayder ustidan ishonchli tarzda g‘alaba qozondi. «Mash’al» o‘yin boshidayoq bir futbolchi kam bo‘lib qoldi. Ibrohim G‘anixonov «Andijon» himoyachisi Igor Golbanga tirsagi bilan zarba bergan deb topildi va maydondan chetlatildi. Vaziyat ijtimoiy tarmoqlarda faol muhokama qilindi, qoidabuzarlik yaqqol emasdek ko‘rindi. O‘yindan keyin Futbol hakamlari markazi Igor Golbanning yorilgan qoshi fotosuratini e’lon qildi. Mezbonlar tarkibdagi ustunlikni g‘alabaga aylantira oldi. «Mash’al» hali birorta gol urmadi va jadval tubiga «o‘rnashib» qoldi.
«Andijon» bosh murabbiyi Samvel Babayan o‘yindan keyin tanqidiy fikr bildirdi: «Jamoam o‘yinidan to‘liq qoniqmadim. Qoniqdim degan murabbiy faoliyatini tugatib qo‘yavergani yaxshi deb o‘ylayman», dedi. «Mash’al» ustozi Igor Surov «agar bir kishi kam bo‘lib qolmaganimizda, umuman boshqacha futbol namoyish etgan bo‘lardik», dedi.
SO‘G‘DIYoNA 2:4 PAXTAKOR
Gollar: Filip Ivanovich, 2 (1:0), Flamarion, 36 (1:1), Rustam Turdimurodov, 50 (1:2), Rustam Turdimurodov, 57 pen (1:3), Hojimat Erkinov, 74 pen (1:4), Feysal Mulich, 90+5 pen (2:4)
Turning eng «quvnoq» o‘yini Jizzaxda o‘tkazildi. 6 ta gol urilgan bahsda «Paxtakor» ishonchli g‘alabani qo‘lga kiritdi va uchinchi o‘ringa ko‘tarilib oldi. Mehmonlar tarkibida Rustam Turdimurodov ikkita gol urdi. «So‘g‘diyona» uchun mavsum starti muvaffaqiyatsiz kechdi – jamoa 1 ochko bilan so‘nggi o‘rinlardan birini egallab turibdi.
«So‘g‘diyona» bosh murabbiyi Ivan Boshkovich dastlabki to‘rtta o‘yinda atigi bir ochko to‘plangani haqida gapirar ekan, buni inqiroz ekanini qisman tan oldi, lekin jamoa yanada yaxshiroq harakat qilishiga ishontirdi. Moliyaviy muammolar haqidagi savolni esa javobsiz qoldirdi.
NASAF 0:1 SURXON
Gol: Tornike Dzebniauri, 90+2 (0:1)
Yana bir kutilmagan natija Samarqandda qayd etildi. «Nasaf» so‘nggi daqiqalarda gol o‘tkazib, «Surxon»ga yutqazdi. Termizliklar bundan oldin bosh murabbiy Stanislav Kudryashov bilan xayrlashib, o‘rniga Anvar G‘ofurovni tayinlagan edi. Uning debyuti muvaffaqiyatli chiqdi. «Nasaf» bosh murabbiyi Ro‘ziqul Berdiyev mag‘lubiyatni «hujumlarda yetarlicha faol bo‘lmagani» bilan izohladi. Anvar G‘ofurov g‘alabani omad bilan izohladi.
NeFTChI 3:1 LOKOMOTIV
Gollar: Ibrohimhalil Yo‘ldoshev, 11 (1:0), Temurxo‘ja Abduxoliqov, 36 pen (1:1), Stipe Peritsa, 65 (2:1), Alisher Odilov, 89 (3:1)
«Neftchi» navbatdagi g‘alabani qo‘lga kiritdi. Farg‘onaliklar 15 yilda ilk marotaba «Lokomotiv»ni o‘z maydonida yengishga muvaffaq bo‘ldi va chempionatda yo‘qotishsiz bormoqda. Bu o‘yinda ular mavsumdagi ilk golini o‘tkazdi (penaltidan), ammo yana uchta gol urishga muvaffaq bo‘ldi. «Neftchi» bosh murabbiyi Islombek Ismoilov dastlabki o‘tkazib yuborilgan goldan ranjiganini tan oldi: «gol o‘tkazmaslik seriyasini uzoq davom ettirishni maqsad qilgandik», dedi. «Lokomotiv» ustozi Mirko Yyelichich: «Hozircha darajamiz «Neftchi» bilan bir xil emas va buni to‘g‘ri tushunish kerak», dedi.
4-tur o‘yinlaridan keyin Superliga jadvali
Superliga to‘purarlari
Falastin assotsiatsiyasining shikoyatidan so‘ng, Isroil futbol assotsiatsiyasi taxminan 164 ming yevro miqdorida jarima to‘lashi va yaqinda bo‘lib o‘tadigan o‘z maydonidagi o‘yinlarda banner ilib qo‘yishi kerak, deb qaror qildi FIFA.
Xalqaro futbol federatsiyasi (FIFA, FIFA) Falastin futbol assotsiatsiyasi (PFA) tomonidan bildirilgan ayblovlardan so‘ng Isroil futbol assotsiatsiyasiga (IFA) nisbatan 150 000 shveysariya franki (taxminan 164 300 yevro) miqdorida jarima qo‘lladi. Tegishli qaror futbol federatsiyasi tomonidan 19 mart, payshanba kuni o‘z saytida e’lon qilindi.
FIFA Intizom qo‘mitasi IFA “FIFAga a’zo assotsiatsiya sifatidagi majburiyatlarini bir necha bor buzgan”, deb topdi va unga FIFA intizom kodeksining 13-moddasi (“Haqoratli xatti-harakat va halol o‘yin tamoyillarini buzish”) hamda 15-moddasi (“Kamsitish va irqiy bayonotlar”)ni buzgani uchun sanksiyalar qo‘lladi.
Qarorga muvofiq, IFA jarimani to‘lashi, keyingi uchta o‘z maydonidagi o‘yinda futbol assotsiatsiyasi logotipi yonida “Futbol dunyoni birlashtiradi — Kamsitishga yo‘q” degan yozuvli “katta va yaxshi ko‘rinadigan banner”ni joylashtirishi, shuningdek jarimaning uchdan bir qismini “kamsitishga qarshi choralarni ta’minlash va takroriy hodisalarning oldini olish bo‘yicha kompleks rejani amalga oshirish”ga yo‘naltirishi kerak bo‘ladi. Xabarda aytilishicha, ushbu qaror FIFAning apellyatsiya qo‘mitasida shikoyat qilinishi mumkin.
Litvalik murabbiy Kotrina Kulbite qo‘l ostidagi jamoa hal qiuvchi bahsda Filippinga yutqazdi.
Futbol bo‘yicha O‘zbekiston ayollar milliy jamoasi Avstraliyada bo‘lib o‘tayotgan Osiyo kubogidagi ishtirokini yakunladi.
Litvalik murabbiy Kotrina Kulbite qo‘l ostidagi jamoa kuchli sakkiztalikka kirdi.
Futbolchilar Bangladeshni 4:0 hisobida mag‘lub etdi. Ammo KXDR (0:3), Xitoy (0:3) va Janubiy Koreyaga (0:6) yutqazdi.
Jahon chempionati yo‘llanmasi uchun hal qiluvchi kurashda Filippin milliy jamoasiga 0:2 hisobida yutqazdi.
Endi O‘zbekiston ayollar milliy jamoasi qit’alararo saralash musobaqasida ishtirok etadi. Birinchi bosqich noyabr-dekabr oylarida markazlashgan formatda bo‘lib o‘tadi. Ikkinchi bosqich 2027 yil fevral oyiga belgilangan.
O‘zbekiston ayollar milliy jamoasi tarixda biror marta jahon chempionatida ishtirok etmagan.
Imom Buxoriy masjid-majmuasida ilk hayit namozi o‘qildi (foto)
Global moliyaviy inqiroz 2008: sabablar va oqibatlar
Osiyo Kubogi-2031 ko‘chirildi – O‘zbekiston uni o‘tkazishga da’vogar edi
-
Dunyodan3 days ago
Eron Hormuz boʻgʻozi orqali cheklangan oʻtishga ruxsat beradi
-
Jamiyat3 days ago
Tadbirkor boshpanasiz bo‘lgan 5 ta oilani uy-joy bilan ta’minladi
-
Siyosat2 days agoSoʻnggi savdo maʼlumotlariga koʻra, Oʻzbekiston temir yoʻllari importi eksportdan 2,5 barobar koʻp
-
Iqtisodiyot3 days agopayme Tez QR orqali to‘lovni 3% keshbek bilan ishga tushirmoqda
-
Iqtisodiyot5 days ago«Yomg‘ir va qorda ham foydalanishga tayyor bo‘ladi» – Toshkent-Andijon pulli yo‘li haqida nimalar ma’lum?
-
Jamiyat5 days ago
Ichki ishlar xodimlarining qo‘pol muomalasi va tergov sifatidan norozilik ko‘paygan – Prezident
-
Iqtisodiyot4 days ago“Markaziy Osiyo umumiy investitsiya makonini yaratishi zarur” – Alisher Umirdinov
-
Iqtisodiyot4 days agoMetandan go‘shtgacha. Narxi keskin oshgan mahsulot va xizmatlar