Sport
Londonda derbi, «Siti» va «Liverpul»da qiyin raqiblar. Hafta o‘yinlari anonsi
Italiya va Germaniyada ham grandlar o‘zaro to‘qnashadi.
Bu haftadan Yevropada vaqt bir soatga suriladi va endi biz o‘yinlarni kechroq ko‘rishga, bir soat kamroq uxlashga majburmiz. Buni ilk bor «Liverpul» muxlislari o‘z tanasida sinab ko‘rishadi – «Aston Villa»ga qarshi o‘yin Toshkent vaqti bilan 2 noyabrga o‘tar kechasi soat birda boshlanadi. Shuningdek, bu hafta Angliyada London derbisi, Italiyada Milan va Rim to‘qnashuvi, Turkiyada esa Istanbul derbisi bor. Abduqodir Husanovni esa Angliyaning eng kuchli vingerlaridan biri sinovdan o‘tkazishi mumkin. Yoki Abduqodir uni sinovdan o‘tkazadi.
«TOTTeNHEM» – «CheLSI» (1 noyabr, 22:30)
Ikki jamoa turnir jadvalining turli burchaklarida turgandek tasavvur uyg‘otsa-da, zichlik shu qadar yuqoriki, orani birgina g‘alaba ajratib turibdi. «Chelsi» g‘alaba qozongan taqdirda, «Tottenhem»ga ochkolar bo‘yicha yetib olishi mumkin. Ushbu stadionda o‘tgan so‘nggi uchrashuvni ham eslasangiz kerak – mezbonlarning ikki tezkor goli bilan boshlangan o‘yin yakunda «Chelsi»ning 4:3 hisobidagi g‘alabasi bilan yakunlangandi. Umuman olganda, o‘zaro uchrashuvlarda «Chelsi» yaqqol ustunlikka ega – oxirgi 30 o‘yinning 16 tasida aynan «ko‘klar»ning qo‘li baland kelgan.
Tomas Frank o‘tgan mavsumni juda yomon o‘tkazgan «Tottenhem»ni birdaniga turnir jadvali yuqori qismiga ko‘targan bo‘lsa-da, agar vaziyatga chuqurroq qaralsa, boshqa faktorlar ham rol o‘ynaganini payqash mumkin. Masalan, dastlabki turlarda jamoa ko‘proq turnir jadvalining pastki qismidagi raqiblarga qarshi o‘ynadi. «Tottenhem»ning APLdagi keyingi raqiblari esa «Chelsi», «Manchester Yunayted» va «Arsenal». Bu orada Chempionlar Ligasida «Kopenhagen» va «PSJ»ga qarshi o‘yinlar ham borligi e’tiborga olinsa, jamoa uchun haqiqiy sinov davri boshlanmoqda. Noyabr oyi oxirida, ya’ni mana shu uchrashuvlar natijasiga qarab, bu mavsumdagi «Tottenhem»ning haqiqiy istiqboli haqida aniqroq baho berish mumkin.
«Chelsi» esa mavsum boshida, ayniqsa, yozda klublar o‘rtasidagi jahon chempionatidagi salohiyatdan kelib chiqib, hatto chempionlik uchun «Liverpul» va «Arsenal»ga raqobat ko‘rsatishi mumkin bo‘lgan eng yaqin kuch sifatida tilga olinayotgandi. Ammo ham jarohatlar, ham o‘yindagi beqarorlik tufayli hozircha Enso Mareska shogirdlari kutilgan o‘rinlarda emas. To‘qqizinchi turda liga debyutanti «Sanderlend»ga qarshi o‘yin kutilmaganda so‘nggi daqiqalarda o‘tkazilgan gol tufayli mag‘lubiyat bilan yakunlangani bunga yaqqol misol. Klublar o‘rtasidagi jahon chempionati qahramonlaridan biri bo‘lgan hujumchi Joao Pedru yangi mavsumni ham zo‘r boshlagandi, ammo oxirgi 11 uchrashuvda unda atigi 4 ta aniq zarba bor. Birorta ham gol ura olmagan.
Darvoqe, jarohatlar borasida har ikki jamoada ham ahvol yaxshi emas. «Chelsi»da har bir chiziqda jarohatlar bor – himoyachi Kolluil, yarimhimoyachi Palmer va hujumchi Delap anchadan beri o‘ynay olmapyati. Delap jarohatdan tiklanib, Liga kubogida maydonga tushgandi, ammo qizil kartochka olib maydondan chetlatildi. Endi derbida u diskvalifikatsiya tufayli qatnasha olmaydi. «Tottenhem»da esa Meddison va Kulushevski kabi yetakchi futbolchilar mavsum boshidayoq safdan chiqishgan. Shuningdek, Grey, Devis, Romero, Udoji, Dragushin va Bissuma kabi asosiy tarkib futbolchilari ham sheriklariga yordam bera olishmayapti.
«BAVARIYa» – «BAYYeR» (1 noyabr, 22:30)
Chorshanba kuni «Bavariya» Germaniya kubogida «Kyoln» mehmoni bo‘ldi va 4:1 hisobida g‘alaba qozondi. Bu Kompani shogirdlarining mavsum boshidan buyon qatorasiga 14-g‘alabasi edi. «Bavariya» hali biror marta ham mag‘lubiyatga uchramagan va durang qayd etmagan yagona jamoa bo‘lib turibdi. Mana shu 14 g‘alabaning 9 tasi yirik hisobida qo‘lga kiritilgani, umuman myunxenliklar allaqachon 51 gol urib bo‘lgani ham jamoa naqadar yuqori formada ekanini ko‘rsatadi. Bu ketishda «Bavariya» mavsum yarmidayoq yuzlik dovonni bosib o‘tishi mumkin. Harri Keyn esa Bundesliganing o‘zida 12 gol urishga ulgurda, bu liganing 9 jamoasinikidan ko‘proq.
«Bayyer» esa mavsumni biroz muvaffaqiyatsiz boshlagandi va 3 turdan keyinoq Erik ten Hag iste’foga chiqarildi. Yangi bosh murabbiy Hyulmand davrida ishlar ancha yurishib qoldi – 10 o‘yinda atigi bir mag‘lubiyat. U ham «PSJ»ga qarshi uchrashuvda. Bundesliganing o‘zida esa qatorasiga 4 g‘alaba qayd etildi. Qolaversa, so‘nggi yillarda leverkuzenliklar «Bavariya»ga qarshi muvaffaqiyatli o‘ynab kelmoqda. Bundesliga doirasidagi oxirgi 5 o‘yinda «Bayyer» mag‘lubiyatga uchramagan. Ya’ni agar «Bavariya»ning bu seriyasini kimdir to‘xtatishi kerak bo‘lsa, «Bayyer» eng yaxshi nomzod. To‘g‘ri, boshqa ikki omilni ham e’tiborga olish kerak. Birinchidan, yuqorida aytilgan muvaffaqiyatli o‘yinlar Xabi Alonso bosh murabbiy bo‘lgan paytda edi. Ikkinchidan, jamoalar o‘rtasidagi so‘nggi ikki uchrashuv Chempionlar Ligasi nimchorakfinaliga to‘g‘ri keladi. O‘shanda «Bavariya» umumiy 5:0 hisobida ikkala bahsni ham o‘z foydasiga hal qilgandi.
Ikki jamoada ham yo‘qotishlar bor. «Bavariya»da Devis ham, Musiala ham, Ito ham hali mavsum boshlanmasdan safdan chiqishgan edi, ya’ni Kompani to‘liq tarkibdan bemalol foydalana oladi. «Bayyer»da yo‘qotishlar ancha ko‘p. Tilman, Tare-Kobrissa, Vaskes, Fernandes va Tella maydonga tusha olishmaydi. Kelasi hafta Chempionlar Ligasida «Benfika»ga qarshi qiyin safar kutib turgani ham e’tiborga olinsa, bu yo‘qotishlar katta ahamiyat kasb etadi. Darvoqe, kelasi hafta «Bavariya»ni ham muhim safar o‘yini kutib turibdi. Kompani shogirdlari Parijda «PSJ»ga qarshi maydonga tushadi. G‘alabali seriya davom etarmikin?
«LIVeRPUL» – «ASTON VILLA» (2 noyabrga o‘tar kechasi, 01:00)
«Liverpul»da inqiroz davom etmoqda. Aslida, jamoa «Manchester Yunayted»ga qarshi juda yaxshi o‘ynagan, agar omad kelganda bemalol g‘alaba qozonishi ham mumkin edi. Ya’ni aslida o‘sha o‘yin «Liverpul» inqirozdan chiqayotganini ko‘rsatgandek edi. Frankfurtda «Ayntraxt» ustidan yirik hisobda g‘alaba qozonilgach, bu faraz tasdiqlandi ham. Lekin «Brentford»ga qarshi «Liverpul» mavsumdagi eng yomon o‘yinlaridan birini o‘tkazdi. Boshqa mag‘lubiyatlarda ko‘p jabhalarda Slot shogirdlari raqibdan yomon ko‘rinmagandi, «Brentford» esa har tomonlama ustunlik qildi va aynan shu o‘yindan keyin Slotning iste’fosi, Kloppning qaytishi mumkinligi gapirila boshlandi.
Buning ustiga «Brentford»ga qarshi o‘yinda «Liverpul» uchun noqulay o‘yin uslubi yaqqol namoyon bo‘ldi. Ya’ni «Chelsi» va «MYu» asosan yuqori saviyali ijrochilar va realizatsiya hisobiga g‘alaba qozongani aytilgan bo‘lsa, «Brentford» aynan ma’lum uslub evaziga ustunlik qildi – uzun paslar, standartlar. Bu endi yanada xavfli, zero endi raqiblar «Liverpul»ga qarshi aynan mana shu uslubga murojaat qilishni boshlashadi va Slot uchun noqulay ssenariylar yanada ko‘payadi. Yaqinda e’lon qilingan statistikaga ko‘ra, bu mavsumda uzun paslar bilan eng ko‘p aynan «Liverpul»ga qarshi o‘ynashmoqda.
Bu safargi raqib ham anoyi emas. Unai Emeri alohida uchrashuvlarga tayyorlanish, raqibning ojiz nuqtalariga zarba berish orqali natijaga erishishga usta hisoblanadi. Qolaversa, «Villa» asta-sekin formasini tiklab oldi. Dastlabki 4 turda birorta ham gol ura olmagan, ilk g‘alabasiga 6-turga kelibgina erishgan birminghemliklar so‘nggi to‘rt o‘yindagi g‘alabali seriya evaziga ochkolar bo‘yicha «Liverpul»ga yetib ham oldi. So‘nggi turda «Manchester Siti» ustidan qozonilgan g‘alaba ham ko‘rsatib turibdi – jamoa ikkinchi raqamda o‘ynashda haliyam xavfli. Umuman, o‘zaro uchrashuvlarni olganda ham, masalan, «Enfild»dagi oxirgi 11 o‘yinning 5 tasida «Aston Villa» kamida 1 ochko olib ketishning uddasidan chiqqan. «Liverpul» mehmonlari uchun juda katta raqam.
Jarohatlarga keladigan bo‘lsak, Alison hali ham qaytgani yo‘q. Arne Slot matbuot anjumanida Isak va Ketrin Jons bu o‘yinda qatnasha olmasligini ma’lum qildi. Shuningdek, Frimpong kamida yana bir oydan keyin maydonga qaytishi mumkin. «Aston Villa» tarkibida esa «Manchester Siti»ga qarshi o‘yinda assist muallifi bo‘lgan, lekin jarohat tufayli almashtirilgan Emiliano Buendiya o‘ynay olmaydi. Yuri Tilemansning qaytishiga ham kamida bir oy vaqt bor. Harvi Elliot esa aynan «Liverpul»dan sotib olish huquqi bilan ijara olingani tufayli, sobiq jamoasiga qarshi o‘ynay olmaydi.
«Liverpul» muvaffaqiyatsiz seriyasini uzish uchun bu uchrashuvda g‘alaba qozonishi shart. Zero, undan keyingi turda «Manchester Siti»ga qarshi safar o‘yini kutmoqda. Orada YeChL doirasida Madridda «Real»ga qarshi o‘yin ham bor.
«MANCheSTeR SITI» – «BORNMUT» (2 noyabr, 21:30)
«Bornmut» APLning yangi mavsumidagi kashfiyotlardan biri. To‘g‘ri, Iraola shogirdlari o‘tgan mavsumda ham yaxshi taassurot qoldirishgan, ammo yozning o‘zida uch nafar asosiy himoyachi (Kerkez, Zabarni, Hausen), shuningdek, yarimhimoyachi Uattara hamda darvozabon Kepani qo‘yib yuborgach, hatto ligani tark etish uchun nomzodlardan biri sifatida ko‘rila boshlangandi. Lekin jamoa ayni paytda turnir jadvalida ikkinchi o‘rinda bormoqda, birinchi turda «Enfild»da mag‘lubiyatga uchraganidan buyon hali biror marta yutqazmadi. Ya’ni ayni paytda APLda eng uzoq mag‘lubiyatsiz seriya ham aynan «Bornmut»ga tegishli – 5 g‘alaba va 3 durang. Endi esa jamoa qatorasiga ikki o‘yinni safarda o‘tkazadi – «Manchester Siti» va «Aston Villa» bilan. Ikkinchi o‘rin deyilgani bilan turnir jadvalining yuqori qismi ancha zich, 11-o‘rindagi «Brentford» bilan farq atigi 5 ochkoni tashkil qilmoqda. Ya’ni ikki mag‘lubiyat ham «Bornmut»ni ancha pastga tushirib yuborish xavfi bor.
Xuddi shunday xavf «Manchester Siti»ga ham taalluqli. «Liverpul»ning pasayishidan so‘ng, «Arsenal»ga chempionlik poygasida asosiy raqib kim, degan savolga aynan «shaharliklar»ni ko‘rsata boshlashgandi. Ammo «Aston Villa»dan mag‘lubiyat muammolarni ochib berdi. Aniqrog‘i, bitta katta muammo – Holandga bo‘lgan bog‘liqlik. «Manchester Siti» APL o‘yinlarida 17 gol urgan bo‘lsa, 11 tasi Erling Holandga tegishli. Yana bir necha futbolchi bittadan gol urgan, xolos. Ya’ni raqiblar hujumda asosiy xavf kimdan ekanini yaqqol bilishadi, kerakli paytda sermahsullikni o‘ziga olishi mumkin bo‘lgan futbolchilar ko‘rinmayapti.
Ikkinchi hujumchi Omar Marmush esa orada jarohat ham oldi, qolaversa, u Holand bilan bir vaqtda maydonda harakat qilganda u qadar foydali bo‘lmayapti. O‘tgan mavsumda ham Marmush ko‘p gollarini Holand jarohat olgan paytda, uning o‘rnida maydonga tushib urganini ham unutmaslik kerak. Umuman, Pep Gvardiola jamoasida gollar bu qadar bir futbolchiga bog‘lanib qolishi uning faoliyatida birinchi marta bo‘lsa kerak.
Yaxshi xabar – Abduqodir Husanov jarohatdan tiklandi va Liga kubogi nimchorakfinalida «Suonsi»ga qarshi o‘yinda asosiy tarkibda harakat qildi ham. Pep Gvardiola uni ilk daqiqalardan maydonga tushirib, keyin zaxiraga ham olganining o‘z sababi bo‘lishi mumkin. Ma’lumki, «Bornmut»ning eng xavfli hujumchisi Antuan Semenyo hisoblanadi va u mavsum boshida chempionatning eng yaxshilaridan biri bo‘lib turibdi. O‘tgan yili «Bornmut» boshqa ijrochilarga ham ko‘proq tayangan bo‘lsa, hozir aksariyat hujumlar aynan Semenyo orqali amalga oshirilmoqda. Shu tufayli unda allaqachon 6 gol va 3 assist bor – ligada Holandnikidan keyingi ko‘rsatkich. U asosan chap qanotda harakat qiladi va juda tezkor. Gvardiola himoyaning o‘ng qanotiga ancha hujumkor bo‘lgan Nunez yoki Lyuisni emas, aynan Abduqodirni tushirish ehtimoli kattaroq. Xullas, o‘zbekistonlik himoyachini yana bir yaxshi imtihon kutyapti, deyish mumkin.
O‘zaro o‘yinlarga qaralsa, «Manchester Siti» azaldan «Bormunt»ga qarshi muvaffaqiyatli to‘p suradi. APL doirasidagi oxirgi 8 uy uchrashuvining barchasida g‘alaba qozongan. Jami 16 o‘yindan atigi bir marta mag‘lub bo‘lgan, u ham o‘tgan mavsum jamoa inqirozga uchrab, hammaga yutqazayotgan davrga to‘g‘ri keladi.
«MILAN» – «ROMA» (3 noyabrga o‘tar kechasi, 00:45)
«Milan» bir muddat chempionlik uchun yaqqol favorit sifatida ko‘rilgandi. Tarkib jihatidan balki raqiblardan kuchsiz ko‘rinishi mumkin, ammo birinchidan, bu mavsum jamoa yevrokuboklarda qatnashmaydi. Bu faktor esa qanchalik muhim ekanini o‘tgan mavsum chempioni «Napoli» tasdiqlashi mumkin. Ikkinchidan, Luka Modrich – tajribali futbolchi mavsumda kutilgandan ham yaxshi boshladi, o‘tgan oy A Seriyaning eng zo‘r futbolchisi deb topildi. Shuningdek, «Napoli»ga qarshi ancha ishonchli o‘yin ham «Milan»ning salohiyati ko‘pchilik o‘ylaganidan ancha yuqori bo‘lishi mumkinligini namoyon qilgandi.
Lekin so‘nggi to‘rt turdagi uch durang juda yaxshi farqni yuzaga keltirish bo‘lgan tig‘iz davrda pand berdi. «Yuventus» va «Atalanta»ga qarshi safar uchrashuvlardagi durangni aslida Allegri shogirdlarining aktiviga yozish ham mumkin, lekin hammasini «Piza»ga qarshi uy uchrashuvidagi durang buzib turibdi. Ha, har qanday top-klubda ham shunday kunlar bo‘lib turadi, lekin «Milan» arang so‘nggi daqiqalarda mag‘lubiyatdan qutulib qolgani, vaziyatlar bo‘yicha «Piza» ham bo‘sh kelmagani e’tiborga olinsa, «Milan»da bunday yomon kunlar kelajakda yana ko‘proq bo‘lishi mumkinligidan dalolat qilmoqda. «Roma»ga qarshi o‘yin ortidan shu oyning o‘zida «Milan»ni «Inter» va «Latsio»ga qarshi bahslar ham kutib turibdi.
«Roma» ham o‘ziga xos jamoa. Gasperinining kelishi bilan rimliklar butunlay boshqacha o‘yin namoyish etishi kutilgandi, lekin natijalar ko‘proq Raniyerini eslatib yubormoqda. «Bo‘rilar» nafaqat A Seriya, balki kuchli beshlikda ham eng kam gol o‘tkazgan jamoalardan biri bo‘lib turibdi. Bu borada faqat «Arsenal» yaxshiroq, xolos. Jamoa ishtirokidagi juda ko‘p o‘yinlar 1:0 yoki boshqa minimal hisoblarda yakunlanmoqda. Shunday bo‘lsa-da, «Roma» ayni damda turnir jadvalini «Napoli» bilan birga boshqarmoqda va g‘alaba qozonsa, yagona peshqadamga aylanib olishi ham mumkin.
Aslida Milanda munosib qarshilik qilish «Roma» uchun u qadar katta syurpriz ham emas, so‘nggi 15 o‘zaro o‘yindan 6 marta mag‘lubiyatga uchrashgan. Shu bilan birga, «Roma»ning A Seriya doirasida «San Siro»dagi so‘nggi g‘alabasi 2017 yilga to‘g‘ri keladi. Bir yil oldingi 1:0 hisobidagi g‘alaba esa Yevropa Ligasida sodir bo‘lgandi.
Jarohatlarga kelsak, «Milan»ning durangli davri ikki yetakchi futbolchi – Pulishich va Rabioning safdan chiqishi bilan boshlangandi. Bu futbolchilar «Roma»ga qarshi o‘yinni ham o‘tkazib yuborishadi. Shuningdek, Fikayo Tomorining maydonga tushishi so‘roq ostida ekani aytilmoqda. Mehmonlar safida esa Evan Fergyuson va Anxelino sheriklariga yordam bera olishmaydi.
BOShQA O‘YINLAR
1 noyabr. Nottingem Forest – MANCheSTeR YuNAYTeD (20:00), Byornli – ARSeNAL (20:00), ATLeTIKO – Sevilya (20:15), PSJ – Nitssa (21:00), NAPOLI – Komo (22:00) Kramoneze – YuVeNTUS (2 noyabrga o‘tar kechasi, 00:45), ReAL – Valensiya (2 noyabrga o‘tar kechasi, 01:00)
2 noyabr. Verona – INTeR (16:30), Vest Hem – NYuKASL (19:00), BeShIKTOSh – FANeRBAHChe (22:00), BARSeLONA – Elche (22:30)
Litvalik murabbiy Kotrina Kulbite qo‘l ostidagi jamoa hal qiuvchi bahsda Filippinga yutqazdi.
Futbol bo‘yicha O‘zbekiston ayollar milliy jamoasi Avstraliyada bo‘lib o‘tayotgan Osiyo kubogidagi ishtirokini yakunladi.
Litvalik murabbiy Kotrina Kulbite qo‘l ostidagi jamoa kuchli sakkiztalikka kirdi.
Futbolchilar Bangladeshni 4:0 hisobida mag‘lub etdi. Ammo KXDR (0:3), Xitoy (0:3) va Janubiy Koreyaga (0:6) yutqazdi.
Jahon chempionati yo‘llanmasi uchun hal qiluvchi kurashda Filippin milliy jamoasiga 0:2 hisobida yutqazdi.
Endi O‘zbekiston ayollar milliy jamoasi qit’alararo saralash musobaqasida ishtirok etadi. Birinchi bosqich noyabr-dekabr oylarida markazlashgan formatda bo‘lib o‘tadi. Ikkinchi bosqich 2027 yil fevral oyiga belgilangan.
O‘zbekiston ayollar milliy jamoasi tarixda biror marta jahon chempionatida ishtirok etmagan.
Sport
«Real» «Bavariya»ga qarshi, «Barsa» yana «Atletiko» bilan o‘ynaydi. YeChLda chorakfinal juftliklari
Turnirda 8 jamoa qoldi.
Chorshanba oqshomida Chempionlar ligasi 2025/26 yillar mavsumi 1/8 finali doirasida yana to‘rt uchrashuv o‘tkazildi: «Arsenal», «Real», «PSJ» va «Sporting» ortidan «Barselona», «Atletiko», «Bavariya» va «Liverpul» jamoalari ham keyingi bosqichga yo‘llanma olishdi.
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
«Arsenal» va «Bavariya» – asosiy favoritlar
Har bir bosqichdan keyin Opta superkompyuteri Chempionlar ligasida kim g‘olib bo‘lishi bo‘yicha prognozlarini yangilab bormoqda. Turnir startidan oldin «Liverpul»ning imkoniyatlari eng yuqori baholangandi, o‘tgan mavsum Angliya chempioni bo‘lgan va yozgi transferlarda eng faol bo‘lgan jamoaga 20,6 foiz berilgandi, ammo vaqt o‘tib bu jamoaning imkoniyatlari uch baravar pasaytirildi – 7 foizgacha.
Turnir avvalida ikkinchi asosiy da’vogar «Arsenal» bo‘lib turgandi (15,3 foiz), ammo londonliklarning imkoniyatlari vaqt sayin o‘sib bordi va endi ikki baravar yuqori baholanmoqda.
Setkaning ikkinchi tomonidagi asosiy favorit – «Bavariya». Opta Angliya va Germaniya grandlari Budapeshtdagi finalga yetib kelishini bashorat qilmoqda. «Barselona» va «PSJ»da ham yarimfinalga chiqish imkoniyati yuqori baholangan.
Opta versiyasiga ko‘ra, jamoalarning Chempionlar ligasi g‘olibligi uchun imkoniyatlari:
«Arsenal»da startdan oldin 15,3 foiz, chorakfinal arafasida 30 foiz;
«Bavariya»da startdan oldin 4,5 foiz, chorakfinal arafasida 18 foiz;
«Barselona»da startdan oldin 8,8 foiz, chorakfinal arafasida 14,7 foiz;
«PSJ»da startdan oldin 12 foiz, chorakfinal arafasida 12,1 foiz;
«Real»da startdan oldin 5,8 foiz, chorakfinal arafasida 7 foiz;
«Liverpul»da startdan oldin 20,6 foiz, chorakfinal arafasida 30 foiz;
«Atletiko»da startdan oldin 0,8 foiz, chorakfinal arafasida 4,7 foiz;
«Sporting»da startdan oldin 0,8 foiz, chorakfinal arafasida 3,3 foiz.
1993 yil, aprel. Milliy basketbol assotsiatsiyasi muntazam ligasidagi navbatdagi o‘yini bo‘lib o‘tmoqda. Tanaffus paytida qiziqarli tanlov o‘tkazadi. Unga ko‘ra, xohlovchilar maydon chetidan to‘p irg‘itib, narigi tomondagi savatchaga tushirishi kerak edi. Bir yigit shu ishni uddalaydi. Biroq yutuqni to‘lashi lozim bo‘lgan sug‘urta kompaniyasi g‘irromlik qiladi va pullarini berishdan bosh tortadi. Oxir oqibat yigitga yutuqni “Chicago bulls” jamoasi to‘lab beradi.
Bugun AQSh sportini basketbol o‘yinisiz tasavvur qilib bo‘lmaydi. Bu sport turi muxlislar tashrifi bo‘yicha Amerika futboli va beysboldan so‘ng uchinchi o‘rinda turadi.
Basketbol AQShda eng ko‘p o‘ynaladigan o‘yin hisoblanadi va bilan mamlakatda 26 milliondan ortiq odam shug‘ullanadi.
Shuningdek, AQSh va Kanada jamoalari ishtirok etadian Milliy basketbol assotsiatsiyasi ligasi dunyo miqyosida eng ko‘p tomosha qilinadigan turnir hisoblanadi.
Jamoaviy o‘ynaladigan boshqa sport turlarida bo‘lgani kabi AQShda bo‘lib o‘tadigan basketbol o‘yinlari juda qiziqarli va keskin kurashlar ostida kechadi.
Shu bilan birga tanaffus paytlarida zaldagi muxlislar uchun turli tanlovlar o‘tkaziladi va o‘yinlar qiziqarli shouga aylanadi.
1993 yilda ana shunday tanlovlarning biri mojaro bilan yakun topadi. “Chicago bulls” jamoasiga homiylik qiluvchi kompaniya mukofot uchun va’da qilingan 1 mln dollarni g‘olib yigit Don Kelhunga to‘lab berishdan bosh tortadi.
Foto: spors.qq.com
Million dollarlik aniq zarba
1993 yil 14 aprel. Chikago shahridagi arenada MBA muntazam ligasida ishtirok etuvchi “Chicago bulls” va “Miami Heat” jamoalari bellashmoqda.
O‘sha paytda AQShlik jahonga mashhur basketbolchi Maykl Jordan “Chicago bulls” jamoasi sharafini himoya qilar va u ham maydonda edi.
O‘yinga tanaffus berilgan paytda “Chicago bulls” jamoasi, “Koka-kola” kompaniyasi Lettuce Entertain You restoranlar tarmog‘idan iborat tashkilotchilar yutuqli tanlov o‘tkazadi.
Tanlovga ko‘ra, avval muxlislar orasidan tasodifiy yo‘l bilan bir necha kishi tanlab olinadi. So‘ng ular navbati bilan basketbol maydonining bir chetidan, ikkinchi chetidagi savatchaga to‘pni uloqtirishi kerak edi.
Qoida aniq: 23 metr uzoqlikdan savatchaga to‘pni aniq tushirgan qatnashchi g‘olib bo‘ladi va u 1 mln dollarga ega chiqadi. Agar bu ishni bir necha kishi bajarsa mukofot puli ular orasida teng taqsimlanadi.
Yutuqni “Chicago bulls” jamoasiga homiylik qilayotgan “American Hole ‘N One” sug‘urta kompanisi to‘lab berishi lozim edi.
Tanlov boshlangach bir necha kishi to‘pni uloqtiradi, biroq savatchaga tushira olmaydi. Aslida bu ish juda qiyin bo‘lib, shu sababli ham tashkilotchilar tanlovga yutuq sifatida katta mablag‘ qo‘ygandi.
Navbat kanselariya do‘koni sotuvchisi bo‘lib ishlovchi Don Kelhunga keladi. Yigit uloqtirgan to‘p to‘g‘ri borib savatchaga tushadi. Shunda arenada o‘tirgan muxlislar yigitni olqishlay boshlaydi.
Foto: Videodan kadr
O‘sha paytda tanaffus olgan basketbolchilar tanlovni kuzatishayotgandi. Ular ham navbati bilan yigitni quchoqlab, tabriklashadi. Jumladan, maydonda bo‘lgan Maykl Jordan ham.
Don Kelhunning qo‘liga 1 dollarlik yutuqqa ega chiqqani haqidagi banner-sertifikat topshiriladi. Yigit o‘sha kuni xursand holda sevimli jamoasining arenasidan chiqib ketadi. Ertasi kuni esa muammo boshlanadi…
G‘irromlik
Don Kelhun ancha-muncha basketbolchilar ham amalga oshirolmaydigan ishni uddalab, mukofot puliga ega chiqqandi. Biroq 23 metrdan to‘pni savatchaga hech kim tushira olmasligiga ishonib pul tikkan sug‘urta kompaniyasi yutuqni to‘lashga kelganda g‘irromlik qilardi.
Kompaniya Don Kelhunga mukofot puli berilmasligini e’lon qilib, buning ikkita sababini keltiradi. Birinchi sababga ko‘ra Don Kelhun to‘pni uloqtirayotganda chiziqni bosgan.
Ikkinchisi, u avvalroq bir muddat kollejdagi jamoa safida basketbol o‘ynagan. Kompaniya tanlov oddiy muxlislar o‘rtasida o‘tkazilganini va unda Donning ishtiroki xato bo‘lganini aytadi.
Ya’ni, sug‘urta kopaniyasi tanlov ishtirokchilari so‘ngi 5 yilda basketbol bilan muntazam shug‘ullanmagan bo‘lishi kerak edi, deb turib oladi.
Foto: Videodan kadr
Shundan so‘ng sug‘urta kopaniyasining vajlari bo‘yicha tekshiruv o‘tkaziladi. Eng avval Don Kelhun to‘pni uloqtirayotgan paytda chiziqni bosganmi yoki yo‘q, shu tekshiriladi.
Jarayon tasvirga tushirilgandi. Video sinchiklab ko‘rilganda Donning chiziqni bosmagani ma’lum bo‘ladi. Ikkinchi sabab bo‘yicha ham komissiya yigitni haq deb topadi.
Chunki shartga ko‘ra, tanlovda professional sportchi, hatto faoliyatini tugatgan bo‘lsa ham qatnashishi mumkin emasdi. Don Kelhun esa hech qachon basketbol bilan professional tarzda shug‘ullanmagan, shunchaki kollejdagi havaskor jamoada o‘ynagandi.
Sug‘urta kopaniyasining ikkita vaji ham o‘rinli emas, deb topiladi. Biroq ular baribir 1 mln dollarni to‘lashni xohlamaydi.
O‘sha paytda Don Kelhun bilan sodir bo‘lgan hodisa va sug‘urta kompaniyasining g‘irromliq qilayotgani AQSh OAV lari e’tiboriga tushadi va ular birin ketin hodisa haqida yoza boshlaydi. Ammo bu ham sug‘urta kopaniyasining fikrini o‘zgartira olmaydi.
Hodisaga “Chicago bulls” jamoasining aralashuvi
Don Kelhunga qilingan g‘irromlik ommaga oshkor bo‘lgach muxlislar “Chicago bulls” jamoasini ham ayblay boshlaydi. Chunki tanlov jamoaning uy arenasida, uning o‘yini paytida tashkillashtirilgandi.
Qolaversa gazetalar va turli telekanallar har kuni Don Kelhunga qilingan g‘irromlik haqida maqola hamda ko‘rsatuvlar berib, muxlislarni yanada junbushga keltiradi.
Foto: alamy.com
Bu orada bir yilcha vaqt o‘tib ketadi va Don Kelhun sug‘urta kompaniyasidan o‘z yutug‘ini ololmaydi. Kunlarning birida “Chicago bulls” jamoasi rahbariyati 1 mln dollarlik yutuq bo‘yicha matbuot anjuani o‘tkazishi haqida e’lon beradi.
Matbuot anjumanida jamoa rahbariyati sug‘urta kompaniyasidan farqli ravishda Don Kelhun 1 mln dollarni haqqoniy yutganini tan oladi. So‘ng sug‘urta kompaniyasi to‘lashdan bosh tortgan pullarni jamoa to‘lab berishini ma’lum qiladi.
Faqat jamoa rahbariyati Donga pullarni birdaniga emas, har yili 50 ming dollardan 20 yil davomida to‘lab borilishini aytadi. Yigitning bunga ko‘nishdan o‘zga chorasi qolmaydi.
O‘shandan keyin Don Kelhun 2013 yilgacha 20 yil davomida har yili “Chicago bulls” jamoasidan 38 ming dollardan olib turadi. Qolgan 12 ming dollar daromad solig‘i uchun ushlab qolinadi. Shu tariqa yigit o‘zi yutgan mukofot pullarini to‘liq oladi.
Garchi bir urinishda million dollarni yutgan bo‘lsa-da Don Kelhun millionerga aylana olmaydi – u kanselariya mahsulotlari sotiladigan magazindagi ishini davom ettiradi.
Mashmashaga Maykl Jordanning aralashuvi
Don Kelhun to‘pni savatchaga tushirgan kuni afsonaviy basketbolchi Maykl Jordan ham maydonda edi. Boshqalar kabi u ham g‘olibni tabriklaydi.
Foto: Videodan kadr
O‘yin so‘ngida “Chicago bulls” jamoasining barcha o‘yinchilari Don Kelhun savatchaga tushirgan to‘pga dastxat qo‘yib berishlari lozim edi. O‘shanda faqat bir kishi – Maykl Jordan bu ishni qilmaydi. Jamoadoshlari dastxat qo‘yayotganda u indamay kiyinish xonasiga kirib ketadi.
Mayklning dastxat qo‘ymagani sababi bor edi. 1992 yilda u Upper Deck kompaniyasi bilan shartnoma imzolagandi.
Ushbu kelishuvga ko‘ra, Upper Deck Jordanning dastxati tushirilgan turli mahsulotlarni ishlab chiqaruvchi yagona kompaniya hisoblanardi.
Sportchi va kompaniya o‘rtasida tuzilgan shartnomada Jordanning futbolka, to‘plar va boshqa narsalarga dastxat qo‘yishi cheklangandi. Jordan faqat xayriya tadbirida yoki kasal bolalar uchun dastxat qo‘yishi mumkin edi.
Don Kelhun nima qilib bo‘lsa ham Jordanning dastxatini olishni maqsad qiladi va “Chicago bulls” jamoasining o‘yinlariga muntazam tusha boshlaydi. Biroq mashhur o‘yinchining dastxatini ololmaydi.
Oradan bir yilcha vaqt o‘tadi. Sug‘urta kompaniyasi hamon mukofot pulini to‘lab berishni kechiktirib kelar, Don esa da’vogar sifatida yurgandi. Bir kuni yigit Maykl Jordan o‘g‘lining o‘yinlarini ko‘rish uchun u o‘qiydigan maktabga borib turishini eshitadi va o‘sha yoqqa otlanadi.
Foto: memedeportes.com
Biroq tan soqchilar uni Mayklning oldiga qo‘ymaydi. Ular sportchi baribir dastxat bermasligini ta’kidlaydi. Don u yerdan chiqib ketayotganida tan soqchilardan biri uni quvib yetadi va Maykl chaqirayotganini aytadi.
Yigit Jordan bilan uchrashganda sportchi Donni taniydi va “Pulingizni oldingizmi?” deb so‘raydi. Yigit olmaganini bildiradi.
Shundan so‘ng Jordan “Chicago bulls” rahbariyatiga bosim o‘tkazadi va yigitga yutuqni to‘lab berishni talab qiladi. Avvaliga jamoa rahbariyati ko‘nmaydi.
Biroq bir muddat o‘tgach klub rahbariyati o‘zining eng yaxshi o‘yinchisi qo‘ygan talabga ko‘nishga majbur bo‘ladi.
Angliyaning olti jamoasidan to‘rttasi turnirni tark etdi. Chorakfinalning barcha juftliklari aniq bo‘ldi.
«Kamp Nou»da rekordlar va antirekord
«Barselona» – «Nyukasl» 7:2
Gollar: Rafinya, 6 (1:0). Elanga, 15 (1:1). Bernal, 18 (2:1). Elanga, 28 (2:2). Yamal, 45+7 – penalti (3:2). Fermin Lopes, 51 (4:2). Levandovski, 56 (5:2). Levandovski, 61 (6:2). Rafinya, 72 (7:2)
«Barselona»: X. Garsiya (Shchensni, 82), Kubarsi, Martin, Joau Kanselu (Espart, 66), E. Garsiya (Arauxo, 21), Pedri, Bernal, Fermin Lopes (Olmo, 66), Rafinya, Yamal, Levandovski (Torres, 66)
«Nyukasl Yunayted»: Ramsdeyl, Tiau, Byorn, Holl, Trippiyer (Livramento, 46), Joelinton (Botman, 64), Tonali (Uillok, 55), Remsi, Barns, Elanga (Myorfi, 64), Gordon (Osula, 81)
Ogohlantirishlar: Kubarsi, 44 – Joelinton, 17. Trippiyer, 45. Uillok, 60
Birinchi o‘yin: 1:1
«Kamp Nou»dagi o‘yin turli-tuman rekordlar jamlanmasiga aylandi. Birinchidan, Angliyaning hech bir klubi bungacha Chempionlar ligasi pley-offidagi bir o‘yinda 7 gol o‘tkazib yubormagandi. «Nyukasl» esa shunday imkonsiz ko‘ringan ishni uddaladi. O‘z maydonida to‘liq ustunlik qilgan va so‘nggi daqiqalarda penalti tufayli g‘alabani qo‘ldan chiqargan APL vakili javob o‘yinining birinchi bo‘limida ham munosib qarshilik ko‘rsatdi. Mehmonlar uchta gol o‘tkazib yuborgan bo‘lsa-da, o‘zi ham raqib mudofaasidagi qo‘pol xatolardan foydalanib, ikkita gol urdi.
Ammo Kiran Trippiyer birinchi bo‘limga qo‘shib berilgan daqiqalarda penaltiga sababchi bo‘ldi va Lamin Yamal uchinchi bor jamoasini hisobda oldinga olib chiqdi. Tanaffusdan keyin esa «Nyukasl»ni tanib bo‘lmay qoldi. Eddi Hau jamoasi shunchaki sochilib ketdi va 10 daqiqa ichida uchta gol qo‘yib yubordi. Bunday himoya chizig‘i bilan ko‘p narsadan umid qilib bo‘lmasdi. Ayniqsa Jyeykob Remsining xatosi yilning eng kulgili holatlari kolleksiyasidan o‘rin olishi tayin. Uning qo‘pol xatosi yettinchi gol o‘tkazilishiga olib keldi.
Rafinya bu o‘yinda «gol+pas» tizimida 4 (2+2) ochko ishladi, Robert Levandovski dublni rasmiylashtirdi. Polyak hujumchisi birdaniga bir necha rekordni urdi. U Chempionlar ligasida urgan gollari sonini 41 taga yetkazib, bu borada Lionel Messining rekordini yangiladi. Bundan tashqari, Robert endi Chempionlar ligasida dubl qayd etgan eng katta yoshli futbolchi hisoblanadi – u hozir 37 yoshda. «Barsa» uchun yagona minus – darvozabon Joan Garsiya jarohat olishi bo‘ldi. Chorakfinalda jamoa usiz qiynalishi mumkin.
Salohning benefisi
«Liverpul» – «Galatasaroy»
Gollar: Soboslai, 25 (1:0). Ekitike, 51 (2:0). Gravenberh, 53 (3:0). Saloh, 62 (4:0)
Aniq ijro etilmagan penalti: Saloh, 45+4’
«Liverpul»: Alisson, van Deyk, Konate, Kerkez, Frimpong (Jons, 67), Gravenberh (Nioni, 89), Virs (Kiyeza, 89), Soboslai, Makallister, Saloh (Gakpo, 74), Ekitike (Ngumoha, 89)
«Galatasaroy»: Ugurjan Chaqir, Abdulkarim Bardakchi (Eren Elmali, 73), Singo, Yakobs, Boe (Sane, 46), Torreyra (Yunus Oqgun, 60), Lemina, Sara, Barish Yilmaz, Sholloi, Osimhen (Lang, 46, Ikardi, 80)
Birinchi o‘yin: 0:1
Chorshanba kungi o‘yinlarda chinakamiga intriga saqlanib qolgan yagona o‘yin «Enfild»da edi, bu yerda mezbonlar minimal farqni yo‘qqa chiqarishi talab etilardi. Mezbonlar birinchi bo‘lim o‘rtalaridayoq bu vazifani uddalashdi. Mak Allister burchak zarbasini ijro etishda raqiblarni dog‘da qoldirib, to‘pni yerlatib jarima maydoni chizig‘i hududiga yetkazib berdi, u yerda ortdan kelgan Soboslaini esa hech kim kutib olmadi.
«Liverpul»ning bu mavsumdagi eng yaxshi futbolchisi bo‘lib turgan vengriyalik yarimhimoyachi jamoasi tanaffusga ikki gol farqi bilan chiqib ketishi uchun barcha ishni qildi. Ammo u ishlagan penaltini Saloh aniq ijro eta olmadi.
Misrlik hujumchi o‘z vaziyatlaridan foydalana olmagan bo‘lsa-da, ikkinchi bo‘lim boshida ikki daqiqa ichida urilgan ikki golda ham ishtirok etdi. Avvaliga tezkor qarshi hujumda u Ekitikega ideal uzatma berdi, biroz o‘tib uning zarbasidan keyin darvozabondan qaytgan to‘pni Gravenberh darvozaga kiritib yubordi va «Galatasaroy» amalda chorakfinalga chiqishdan umid uzdi. Salohning o‘zi ham yakunda o‘z nomini tabloga yozdirib qo‘ydi – Virs tovonida uzatgan pasdan keyin o‘zining eng yaxshi yillarida bo‘lgani kabi aylanma zarba yo‘lladi.
Biroz o‘tib «Enfild»da yig‘ilganlar zaxiraga olinayotgan o‘z kumirini olqishlar ostida kuzatib qo‘ydi. Bu oqshomdagi gol uning uchun YeChLdagi 50-goli edi. U shundan 47 tasini «Liverpul» safida urgan («Bazel»da 2 va «Chelsi»da 1). Saloh – bunday ko‘rsatkichga erishgan ilk afrikalik futbolchi bo‘ldi. Oldinda esa Arne Slot jamoasini chorakfinalda «PSJ»ga qarshi o‘yinlar kutmoqda. Mersisaydliklar uchun bu o‘tgan mavsumdagi mag‘lubiyat uchun revansh olish imkoniyatidir.
Inglizlarning yana bir jamoasini ispanlar chiqarib yubordi
«Tottenhem» – «Atletiko» 3:2
Gollar: Kolo Muani, 30 (1:0). Alvares, 47 (1:1). Simons, 52 (2:1). Gansko, 75 (2:2). Simons, 90+1 – penalti (3:2)
«Tottenhem Hotspur»: Vikario, Romero (Danso, 81), van de Ven, Spens, Dregushin (Udoji, 66), Grey (Gallaher, 81), Sarr, Simons, Tel (Olusesi, 81), Porro (Bergvall, 74), Kolo Muani
«Atletiko»: Musso, Gansko, Le Norman, Rudjyeri, Molina (Koke, 64), Kardozo, Liorente, Lukman (Syorlot, 64), Simeone (Ximenes, 87), Grizmann (Baena, 84), Alvares (Gonsales, 84)
Ogohlantirishlar: Porro, 57. Vikario, 58. Romero, 70. Udoji, 72 – Rudjyeri, 28. Lukman, 56. Syorlot, 90
Birinchi o‘yin: 2:5
Yaqinda «Atletiko» Ispaniya kubogi yarimfinalida «Barselona»ga qarshi birinchi uchrashuvda yirik g‘alabaga (4:0) erishgach, «Kamp Nou»dagi javob o‘yinida bu ustunlikni saqlab qolish uchun to‘liq himoyaviy o‘yin uslubini tanlagandi. Londonda esa barchasi butunlay boshqacha kechdi va dastlabki 45 daqiqalikda mehmonlar sakkizta zarba berishdi, Lukman esa darvozani ishg‘ol etishga ham muvaffaq bo‘ldi. Ammo – ofsayddan. Yana bir necha xavfli hujumlar uyushtirildi, ammo yakunda Diyego Simeone jamoasi yo‘q joydan «Tottenhem»ga o‘yinga qaytish imkonini berdi. Autdan to‘p tashlanishi, Telning jarima maydoni markaziga uzatmasi, u yerda esa yolg‘iz qoldirilgan Kolo Muani.
Mezbonlar ikkinchi golni ham urishganida ispanlar og‘ir vaziyatga tushib qolgan bo‘lardi, faqat darvozabon Musso jamoa joniga ora kirdi. Argentinalik posbon Telning burchakka yo‘naltirilgan zarbasini oyoqlari bilan to‘sib qoldi. Birinchi bo‘limdan keyin baribir intriga saqlanib qoldi va buning uchun mezbonlar Vikarioga minnatdorchilik bildirishi kerak bo‘ladi. Juliano Simeone uzoq masofadan zarba yo‘llaganida to‘p Romeroga tekkan holda o‘z trayektoriyasini o‘zgartirdi, ammo allaqachon to‘p yo‘liga yotgan italiyalik darvozabon o‘rnidan turib, xavfni bartaraf etishga ulgurdi.
Ammo ikkinchi bo‘lim boshida «Atletiko» baribir intrigani o‘ldirdi. Avvaliga Xulian Alvares Simons gol urishiga to‘sqinlik qildi (mezbonlar uning harakatini fol deb e’tiroz bildirishdi) va qarshi hujumni o‘zi gol bilan yakunlandi. U jarima maydonida Lukmandan pas qabul qilib oldi va to‘pni yuqori burchakka aniq yo‘lladi.
Hakamdan va raqiblardan ranjigan Simons bir necha daqiqa o‘tib baribir o‘z maqsadiga erishdi va jamoasini yana oldinga olib chiqdi. Bir necha daqiqa o‘tib Musso yana madridliklarni qutqarib qoldi – u Porroning shvedka uslubida olis burchakka yo‘llagan zarbasiga qo‘llarining uchi bilan yetib bordi. «Matraschilar» muxlislari Alvaresning burchakdan oshirgan to‘pi Hansko tomonidan darvozaga kiritilganidan keyingina yengil tin olishdi. O‘yin oxirida Simons o‘zi ishlagan penaltini aniq ijro etishi esa umumiy natijani o‘zgartirmadi.
Madriddagi birinchi o‘yinda londonliklar bosh murabbiyi Igor Tyudor darvozabon bo‘yicha muvaffaqiyatsiz tajriba o‘tkazmaganida «Tottenhem» «Atletiko» bilan tengma-teng kurashishi mumkin edi, ammo murabbiyning o‘sha qarori birinchi o‘yinda «shporlar»ning imkoniyatlarini keskin pasaytirib yuborgandi. Natijada ikki o‘yinda xuddi «Chelsi» kabi sakkiz gol o‘tkazib yuborgan «Tottenhem» turnirni tark etdi, «Atletiko» esa «Barselona» bilan o‘yinlarga tayyorgarlikni boshlaydi.
«Atalanta» tarixga kirdi
«Bavariya» – «Atalanta» 4:1
Gollar: Keyn, 25 – penalti (1:0). Keyn, 54 (2:0). Karl, 56 (3:0). Dias, 70 (4:0). Samarjich, 85 (4:1)
«Bavariya»: Urbig, Kim Min Je, Ta, Bishof (Pavich, 72), Stanishich (Gnabri, 72), Goretska, Pavlovich (Ofli, 55), Rafael Gerreyru (Ito, 83), Dias, Karl, Keyn (Jyekson, 72)
«Atalanta»: Sportello, Hin, Skalvini (Axanor, 83), Kossunu, Pashalich, Ederson (Samarjich, 57), Bernaskoni, Bellanova, Sulemana (Raspadori, 71), De Ketelare (de Ron, 57), Skamakka (Krstovich, 71)
Birinchi o‘yin: 6:1
Bergamodagi tennischa hisobdan (6:1) keyin ham «Bavariya» muxlislarida darvozabon pozitsiyasi tufayli xavotir saqlanib qolgandi. Zayavkadagi to‘rt darvozabon – Noyyer, Ulrayh, Klanats va Urbig – barchasi jarohat tufayli safdan chiqqandi. Faqat ularning to‘rtinchisi so‘nggi kunlarda safga qaytdi va Vensan Kompani darvozaga o‘smirlardan birini qo‘yishiga to‘g‘ri kelmadi.
Umuman olganda, xavotirlar o‘rinsiz edi. Baribir darvozabonga amalda ish topilmadi. Bergamoliklar ham bu o‘yinda darvozabonni almashtirgandi va bu mavsumda deyarli o‘ynamagan 33 yoshli Sportello Keyn ijrosidagi penaltini qaytardi. Ammo u darvoza chizig‘idan ertaroq oldinga chiqib ketgani ma’lum bo‘ldi, Harri esa takroriy zarbada adashmadi.
Ikkinchi bo‘limda esa myunxenliklarni to‘xtatib bo‘lmadi. Avvaliga Keyn o‘yindan ham gol urdi, keyin esa Dias va Karl tandemi bittadan gol urdi (ular bir-biriga golli uzatma berishdi). Bergamoliklar esa bu o‘yinda ham bitta javob goli urishga erishdi, ammo Italiyaning yevrokuboklar pley-off bosqichida ikki o‘yinda 10 gol o‘tkazgan ilk jamoasi sifatida tarixga kirdi. «Bavariya»ni esa navbatdagi bosqichda «Real»ga qarshi janglar kutmoqda.
YeChLda 8 jamoa qoldi
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
Stadion suriluvchi tom va maydonga ega bo‘ladi. Uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. 45000 tomoshabinga mo‘ljallangan arena “Al Hilol” va “Al Nassr” klublari uchun uy maydoni bo‘lishi kutilmoqda.
Saudiya Arabistonida qurilayotgan shahzoda Muhammad bin Salmon nomidagi ko‘p funksiyali stadionning yangi suratlari e’lon qilindi. U 2034 yilgi futbol bo‘yicha jahon chempionatini o‘tkazish uchun ehtimoliy arenalardan biri sifatida ko‘rilmoqda.
Qurilish ishlari Ar-Riyod shahri g‘arbidagi Qiddiya ko‘ngilochar hududida olib borilmoqda.
Foto: SaudiProject
Stadion suriluvchi tom va maydonga ega bo‘ladi, uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. Devor ochilganida, maydon atrofidagi tribunalar va Tuvayk qoyasi manzarasi namoyon bo‘ladi. Bu dunyodagi birinchi to‘liq integratsiyalashgan majmua bo‘lib, stadionni bir necha soat ichida turli tadbirlar uchun moslashtirish imkonini beradi.
Geometrik shakldagi binolarning tashqi qismi raqamli ekranlar bilan qoplanadi va ular qoyadan o‘sib chiqqandek ko‘rinadi.
Foto: SaudiProject
Stadion atrofida sport va ko‘ngilochar hududlarga ega bo‘lgan baland binolar quriladi. Ular ichki ko‘chalar orqali bog‘lanadi va bu ko‘chalar ham LED ekranlar bilan qoplanadi. Ushbu yo‘laklar tashrif buyuruvchilarni qoya chetidagi kuzatuv maydonchalariga olib boradi.
Loyihasi Populous arxitektura byurosi tomonidan ishlab chiqilgan ushbu arena 45000 tomoshabinga mo‘ljallangan.
Foto: SaudiProject
Stadion Saudiya Arabistoni professional ligasining “Al Hilol” va “Al Nassr” klublari uchun uy maydoni bo‘ladi. Shu bilan birga, bu yerda boks, kibersport, konsertlar va teatr tomoshalari kabi turli sport va madaniy tadbirlar ham o‘tkaziladi.
O‘zbekistonda yanvar oyida qog‘oz sanoatida sezilarli o‘sish kuzatildi
O‘zbekistonda 2025 yilda 48 nafar erkak 70 yoshdan keyin ota bo‘ldi
Isroil Livan janubida quruqlikdan operatsiya boshladi
-
Turk dunyosi4 days agoTurkiyaning Baykal K2 bir tomonlama hujumga uchragan uchuvchisiz samolyotining toʻda harakatini sinovdan oʻtkazdi
-
Jamiyat1 day ago
Tadbirkor boshpanasiz bo‘lgan 5 ta oilani uy-joy bilan ta’minladi
-
Jamiyat3 days ago
Ichki ishlar xodimlarining qo‘pol muomalasi va tergov sifatidan norozilik ko‘paygan – Prezident
-
Iqtisodiyot4 days ago«Yomg‘ir va qorda ham foydalanishga tayyor bo‘ladi» – Toshkent-Andijon pulli yo‘li haqida nimalar ma’lum?
-
Dunyodan1 day ago
Eron Hormuz boʻgʻozi orqali cheklangan oʻtishga ruxsat beradi
-
Iqtisodiyot1 day agopayme Tez QR orqali to‘lovni 3% keshbek bilan ishga tushirmoqda
-
Iqtisodiyot3 days agoMetandan go‘shtgacha. Narxi keskin oshgan mahsulot va xizmatlar
-
Siyosat17 hours agoSoʻnggi savdo maʼlumotlariga koʻra, Oʻzbekiston temir yoʻllari importi eksportdan 2,5 barobar koʻp