Forum doirasida imzolangan kelishuvlar qatorida A-380 “G‘uzor-Buxoro-Nukus-Beyneu” avtomobil yo‘lining 581-673 km qismini rekonstruksiya qilish, “Bir qishloq — bir mahsulot” loyihasini boshlash, maktablarda suv, sanitariya-gigiyena holatini yaxshilash va O‘zbekistonda “ESKO” bozorini rivojlantirish kabilar bor.

2025 yilning 17-18 sentabr kunlari Namangan shahrida bo‘lib o‘tgan “Kambag‘allikdan farovonlik sari” O‘zbekiston kambag‘allikni qisqartirish III xalqaro forumi o‘z ishini yakunladi.

Foto: Iqtisodiyot va moliya vazirligi

Iqtisodiyot va moliya vazirligi xabariga ko‘ra, forum doirasida qiymati 495 mln dollarlik 10 dan ortiq kelishuv va memorandumlar imzolandi.

Forum doirasida 12 ta panel sessiyalar tashkil etildi. Ularda O‘zbekistonda kambag‘allikni qisqartirish borasida yig‘ilgan tajribalar yuzasidan fikr almashildi hamda aholi farovonligini yanada oshirish, inklyuziv iqtisodiy o‘sishni ta’minlash, barqaror rivojlanish maqsadlariga erishishga qaratilgan istiqboldagi rejalar va yangi tashabbuslarga e’tibor qaratildi.

“O‘zbekiston tajribasi shuni ko‘rsatadiki, kambag‘allik taqdir emas, uni dadil rahbarlik, intizomli ijro va innovatsion hamkorlik bilan yengish mumkin. Islom taraqqiyot banki nomidan O‘zbekiston va barcha a’zo davlatlarimiz bilan birga bu yo‘ldan borishga sodiqligimizni yana bir bor tasdiqlayman”, – deya ta’kidladi Islom taraqqiyot banki guruhi raisi Muhammad Al-Jasser

Foto: Iqtisodiyot va moliya vazirligi

Qanday kelishuvlarga erishildi?

Forum doirasida Iqtisodiyot va moliya vazirligi hamda xalqaro hamkorlar tomonidan quyidagi muhim bitimlar tasdiqlandi:

“A-380 “G‘uzor-Buxoro-Nukus-Beyneu” avtomobil yo‘lining 581-673 km (92 km) qismini rekonstruksiya qilish” loyihasi bo‘yicha bitim;
O‘zbekistonda “Bir qishloq — bir mahsulot” loyihasining dastlabki bosqichini boshlash yuzasidan bayonnoma;
Surxondaryo viloyatida aholini ijtimoiy qo‘llab-quvvatlash va iqtisodiy faoliyatini rivojlantirish loyihasi bo‘yicha grant bayonnomasi;
“Uzbekistan Vision – 2030” Ishonch jamg‘armasi mablag‘lari hisobidan ta’lim sohasida “Maktablarda suv, sanitariya-gigiyena holatini yaxshilash hamda iqlim o‘zgarishiga chidamlilikni oshirish” loyihasi;
O‘zbekiston maktablari va shifoxonalarining energiya samaradorligini oshirish loyihasi yuzasidan hamkorlik bayonnomasi;
Korxonalarning energiya samaradorligini moliyalashtirish loyihasi yuzasidan hamkorlik bayonnomasi;
Demografik barqarorlik, gender tengligi, xotin-qizlar imkoniyatlarini kengaytirish yuzasidan anglashuv memorandumi;
Mahalliy rivojlanishni mustahkamlash va bandlik tashabbuslarini qo‘llab-quvvatlash yuzasidan anglashuv memorandumi;
Mikro, kichik va o‘rta tadbirkorlikni qo‘llab-quvvatlash va rivojlantirish yuzasidan hamkorlik bitimi;
O‘zbekistonda “ESKO” bozorini rivojlantirish loyihasi bo‘yicha hamkorlik aloqalarini rivojlantirish yuzasidan anglashuv memorandumi.

Forumda nimalar muhokama qilindi?

Forumda bozor talablariga mos ko‘nikmalarning kambag‘allikni qisqartirishdagi o‘rni sessiyasi tashkil etildi. Unda “xarajat-daromadlar” tahlilidan kelib chiqib, zamonaviy kasblarning an’anaviy kasblarga nisbatan 2-3 barobarga ko‘proq daromad keltirishi hamda nisbatan kam investitsiya talab etilishini inobatga olib, kambag‘al oila a’zolarini mazkur kasblarga o‘qitish kambag‘allikni qisqartirish sur’atini tezlashtirishi mumkinligi aytib o‘tildi.

Foto: Iqtisodiyot va moliya vazirligi

«Kambag‘allikni qisqartirishda islom moliyasining yangi imkoniyatlari» sessiyasida zakot, vaqf va foizsiz moliyalashtirish kabi islom moliyasi vositalari orqali mamlakatda moliyaviy inklyuzivlikni oshirish, iqtisodiy o‘sishni rag‘batlantirish masalalari muhokama qilindi. Xususan, tadbirkorlik bilan shug‘ullanishni istagan kambag‘al oilalarning o‘z bizneslarini boshlashi uchun qo‘shimcha moliyaviy imkoniyatlar yaratishi haqida fikr almashildi.

O‘tish davrida ijtimoiy himoya tizimi – inklyuzivlikni oshirish bo‘yicha global tajribalar sessiyasida esa “Inson” ijtimoiy xizmatlar markazlarida 110 turdagi yordam va xizmatlar ko‘rsatish yo‘lga qo‘yilgani, 2021–2025-yillarda qariyb 48 trillion so‘m miqdorida yordam ko‘rsatilishi rejalashtirilgani ma’lum qilindi.

Inson kapitaliga sarmoya – demografik dividend imkoniyatlaridan kambag‘allikka qarshi kurashda foydalanish sessiyasida O‘zbekistonda demografik o‘rtacha yillik o‘sish 2 foizni tashkil etgani hamda mamlakat aholisining 54,3 foizi yoshlardan iboratligi aytildi.

Bundan tashqari, forumda mamlakatning 140 ta tuman va shaharlarining iqtisodiy salohiyatidan kelib chiqib, 227 ta urbanizatsiya, turizm, yo‘l bo‘yi infratuzilmasini rivojlantirish hamda hududlarni kompleks iqtisodiy rivojlantirishga qaratilgan master-rejalar ishlab chiqilayotgani ma’lum qilindi.

Source link