Yevropa futbol uyushmalari ittifoqi (UYeFA) AQSh terma jamoasi hujumchisi Folarin Balogunga nisbatan qabul qilingan qaror yuzasidan FIFAni keskin tanqid qildi.

Gap shundaki, FIFA intizom qo‘mitasi Balogunning qizil kartochkadan keyin avtomatik ravishda qo‘llanilishi kerak bo‘lgan bir o‘yinlik diskvalifikatsiyasini bir yillik sinov muddati bilan almashtirdi. Bu qaror esa futbolchiga Jahon chempionati 1/8 finalida Belgiyaga qarshi bahsda maydonga tushish imkonini berdi.

UYeFA tarqatgan bayonotda mazkur qaror «misli ko‘rilmagan, tushuntirib bo‘lmaydigan va asossiz» deb baholandi.

«Qizil kartochkadan keyin kamida bir o‘yinlik avtomatik diskvalifikatsiya qoidasi istisnosiz qo‘llanilishi kerak. Turnir davomida bu kabi qoidalarni o‘zgartirish musobaqa adolatini shubha ostiga qo‘yadi», – deyiladi UYeFA bayonotida.

Tashkilot FIFAning qarori «qizil chiziqdan o‘tganini» ta’kidlab, bunday yondashuv futbol qoidalariga bo‘lgan ishonch va musobaqa nufuziga salbiy ta’sir ko‘rsatishini bildirdi.

Folarin Balogun Bosniya va Gersegovinaga qarshi uchrashuvda qizil kartochka olgani uchun Belgiya bilan o‘yinni o‘tkazib yuborishi kerak edi. Biroq FIFA Intizom qo‘mitasi FIFA Intizom kodeksining 27-moddasiga tayanib, diskvalifikatsiya ijrosini bir yillik sinov muddatiga almashtirdi.

Bu qaror Belgiya futbol federatsiyasi tomonidan ham tanqid qilinib, rasmiy tarzda shikoyat kiritilgan. Shuningdek, xorij OAVlari AQSh prezidenti Donald Tramp Balogun masalasini qayta ko‘rib chiqish yuzasidan FIFA rahbariyatiga murojaat qilgani haqida xabar bergan.

Source link

Jordan Henderson Meksikaga qarshi o‘yinda maydonga tushmadi, ammo o‘yindan keyin shifokorlar uni zambilida olib ketishdi.

Futbol bo‘yicha jahon chempionatida Angliya milliy jamoasi yarimhimoyachisi Jordan Henderson bilan bir vaqtning o‘zida ham kulgili va ham ayanchli holati ro‘y berdi. Turnir 1/8 final bosqichida Meksikaga qarshi kechgan o‘yindan (3:2) keyin inglizlar jamoasi futbolchilari g‘alabani nishonlash uchun muxlislar o‘tirgan tribunalar qarshisiga borishdi, ortga qaytishda esa 36 yoshli futbolchi reklama to‘sig‘idan sakrab o‘tishga urinib, yiqilib tushdi va keyin o‘rnidan tura olmadi.

0 daqiqa, 1 sariq va jarohat

Janubiy Amerika jamoasiga qarshi o‘yinni Jordan uzoq vaqt yodda saqlab qolishi tayin. Ushbu tajribali futbolchi 90 daqiqa davomida zaxira o‘rindig‘ida qolgan bo‘lsa-da, uning familiyasi baribir protokolda aks etdi: o‘yin oxirlarida Henderson bosh hakam bilan bahslashgani uchun sariq kartochka oldi.

O‘yin yakunlanganidan keyin esa u yana bir omadsizlikka uchradi. Butun jamoa chorakfinal yo‘llanmasini birga nishonlash uchun muxlislar qarshisiga borishdi. Ortga qaytishda esa Jordan reklama to‘sig‘i ustidan oshib o‘tmoqchi bo‘lib, muvozanatni yo‘qotdi va o‘z qo‘lining ustiga yiqildi. Uning yonida turgan Den Bern darhol tibbiyot xodimlarini yordamga chaqirdi.

How Jordan Henderson broke his leg 😂😂😂😂😂 pic.twitter.com/CnX386om03

— mighty_hog (@mighty_hog) July 6, 2026

Jamoa a’zolari faxriy futbolchiga tibbiy yordam ko‘rsatilayotganida atrofni o‘rab turishdi: shifokorlar uni zambilga joylashtirishdi va yuziga kislorod niqobi taqishdi.

Jamoadagilar nima demoqda?

Bu voqeadan keyin jamoaga Meksika ustidan qozonilgan g‘alaba ham unchalik tatimadi. Futbolchilarning hech biri Henderson tushib qolgan holat ustidan kulgani yo‘q, aksincha, barcha qayg‘uga tushdi.

«Men xafaman, chunki Jordan bilagidan jarohatlandi. Bu ancha jiddiy. U shifoxonada. Ro‘y bergan voqea oqshomning umumiy manzarasiga mos kelmaydi. Uyog‘iga nima bo‘lishini bilmayman», – dedi Tomas Tuxel o‘yindan keyingi matbuot anjumanida.

Jamoa yarimhimoyachisi Jud Bellinghem «tafsilotlarga berilmaslik»ni taklif qilgan.

«Unda biroz muammolar bor, lekin tibbiy guruh hammasini nazorat qilmoqda. Tafsilotlarga berilmaganim ma’qul, nima bo‘lganini o‘zim ham to‘liq bilmayman. Hammamiz uning yonida edik va qo‘llab-quvvatladik», – deya uning so‘zlarini keltiradi The Mirror.

Aftidan, turnir Hendersona uchun yakunlandi. Ammo ushbu faxriy futbolchi bazaga qaytib, jamoadagi ichki muhit uchun javob berishda davom etishi mumkin: bu safargi chempionatda u faqat Panamaga qarshi o‘yin (2:0) oxirida bir necha daqiqa harakat qildi. Shu bilan birga, Jordan Angliyaning to‘rtta jahon chempionatida qatnashgan ilk futbolchisiga aylandi. U jahon birinchiliklarida jami 12 o‘yinda maydonga tushib, bir gol muallifi bo‘lgan.

Ammo uning kolleksiyasida hozircha JCh medallari yo‘q: eng yaxshi natijasi 2018 yilgi to‘rtinchi o‘rin bo‘lgan. Lekin u jamoa bilan 2020 yilgi Yevropa chempionatida kumush medallarni qo‘lga kiritgan: o‘shanda inglizlar hal qiluvchi bahsda Italiyaga penaltilar seriyasida yutqazib qo‘ygandi.

Source link

Balogun kechirib yuborilgani barcha qit’alardagi futbol mulozimlarida FIFA rahbariga nisbatan norozilik uyg‘otgan.

UYeFA FIFAning JCh-2026 1/8 finalida Belgiya bilan o‘yin oldidan AQSh milliy jamoasi forvardi Folarin Balogunga nisbatan diskvalifikatsiyani kechiktirish to‘g‘risdagi qaroriga munosabat bildirdi. Ittifoq bu borada rasmiy bayonot berdi, insayderlar esa tashkilotning Janni Infantinoni xalqaro futbol federatsiyasi rahbarligidan ketkazish rejalari haqida xabar bermoqda.

Muqobilsiz saylovdan keyingi muqobil nomzod

UYeFAdagilar, katta ehtimol bilan, Janni Infantinoning FIFAdagi boshqaruvidan charchagan. The Guardian jurnalisti Roman Molinaning aytishicha, tashkilot Xalqaro futbol federatsiyasi prezidentligi uchun navbatdagi saylovlarga o‘z nomzodini tayyorlamoqda.

Infantinoga raqobatchi tayyorlanayotgani haqidagi xabarini jurnalist AQSh milliy jamoasi futbolchisi Folarin Balogunning diskvalifikatsiyasi kechiktirilishi to‘g‘risidagi qaror futbol jamoatchiligida katta norozilik uyg‘otishi fonida e’lon qildi. Ushbu futbolchi 1/16 finalda Bosniya va Hersegovinaga qarshi o‘yinda qizil kartochka olgan bo‘lsa-da, keyingi bosqichda Belgiya bilan o‘tadigan o‘yinda maydonga tushishi mumkin.

Jurnalist Ben Jyeykobs xabariga ko‘ra, Oq uydagilar ushbu futbolchiga qo‘llangan jazoni qayta ko‘rib chiqishni so‘rab, to‘g‘ridan to‘g‘ri FIFA prezidentiga murojaat qilgan. Molinadagi ma’lumotlarga ko‘ra, bunday mojaroli qarordan keyin nafaqat Yevropadagi futbol federatsiyalari, balki boshqa qit’alar vakillari ham tashkilotga Infantino o‘rniga boshqa nomzod topilishini xohlashmoqda.

«Donald Trampga yoqish uchun qabul qilingan qarordan keyin (mohiyatan, gap aynan shu haqda ketmoqda) jahon futbolining boshqa rahbarlari – nafaqat Yevropadagilar – muqobil nomzod topish imkoniyatini muhokama qila boshlashdi, chunki ular «ortiq bunday davom etishi mumkin emas» deb hisoblaydi. Ammo gapirish – boshqa, harakatga kirishish – butunlay boshqa ish. Buning uchun jasorat kerak bo‘ladi, lekin futbol rahbarlarining ko‘pchiligida bunday jasorat yo‘q», – deya xabar qilgan jurnalist.

Infantino 2016 yilgi saylovlarning ikkinchi turida Osiyo futbol konfederatsiyasining o‘sha vaqtdagi prezidenti Salmon ibn Ibrohim Al-Xalifa ustidan g‘alabaga erishib (88 ga qarshi 115 ovoz bilan), FIFA rahbarligiga kelgandi. 2019 va 2023 yillardagi saylovlarda esa Infantinoga hech kim raqobat ko‘rsatmadi va u lavozimga qayta saylandi. Katta ehtimol bilan, endi jahon futbolidagilar undan charchagan.

«Yaxlitlik xavf ostida»

Dushanba kuni UYeFA o‘z press-relizida Balogun atrofidagi vaziyatdan noroziligini ochiqchasiga bildirdi.

«Kecha futbolchi Folarin Balogunga ko‘rsatilgan qizil kartochkadan keyingi avtomatik bir o‘yinlik diskvalifikatsiya qo‘llanishini bir yilga to‘xtatish to‘g‘risida qabul qilingan orqali qizil chiziq kesib o‘tildi», – deya boshlanadi tashkilot bayonoti.

Bundan tashqari, Yevropa futbol assotsiatsiyalari ittifoqi chetlatishdan keyingi majburiy diskvalifikatsiya haqidagi qoida turlicha talqin qilinmasligi kerakligini qayd etgan.

«Qoidalarning aniqligi ularning saqlovchilari tomonidan kafolatlanmay qo‘ysa, o‘yinning yaxlitligi xavf ostida qoladi, musobaqaga bo‘lgan ishonch esa susayadi… Bunday bemisl, aqlga sig‘maydigan va o‘zini oqlamaydigan qarorga ishonchsizlik bildiramiz», – deyiladi bayonotda.

FIFA sobiq prezident Yozef Blatter o‘z vorisini tanqid qilgan.

«Agar AQSh prezidenti tashkilot rahbari ishlariga aralashsa va futbolchining diskvalifikatsiyasi jahon chempionati pley-off o‘yini oldidan birdan bekor qilinadigan bo‘lsa, shunday savol tug‘ilishi muqarrar: «Sen qayerga ketyapsan, FIFA?» – deya yozgan funksioner ijtimoiy tarmoqlarda.

«Liverpul» sobiq bosh murabbiyi, shu kunlarda Germaniya milliy jamoasi boshqaruviga tayinlanishi kutilayotgan Yurgen Klopp ham bu borada keskin fikr bildirdi.

Yurgen Klopp. Foto: Alexander Hassenstein,

«Keling shunday deymiz: futbol – bu ularning emas, bizning o‘yin. Futbolda hech narsani tushunmaydigan bu ikki odam umuman bunday masalalarni hal qilmasligi kerak. Bu aniq qizil kartochka edi. Bu borada ikki xil fikr bo‘lishi mumkin emas. Balogunga achinamiz, chunki u bu harakatni ataylab qilmagan. Ammo qoida – bu qoida», – deya germaniyalik mutaxassis so‘zlarini keltiradi Bayern&Germany portali.

FIFA rahbarini Angliya milliy jamoasi sobiq forvardi Ueyn Runi ham tanqid qilgan. «Infantino bunday qaror uchun uyalishi kerak. Bu yerda sport prinsipi shubha ostida qoladi. Agar men AQSh jamoasi raqibi bo‘lganimda, juda g‘azablangan bo‘lardim. Bu har jihatdan noto‘g‘ri», – degan u BBC efirida.

FIFA prezidentligi uchun keyingi saylovlar 2027 yilda bo‘lib o‘tadi.

Source link

Unga baribir jahon chempioni bo‘lish nasib qilmadi.

Foto: Bahho Kara / IMAGO / Scanpix / LETA

Braziliya milliy jamoasining jahon chempionatidagi yo‘li 1/8 finalda Norvegiyadan uchralgan mag‘lubiyat (1:2) bilan yakunlandi. O‘yindan keyin 34 yoshli Neymar skandinavlarga qarshi kechgan o‘yin uning milliy jamoa safidagi so‘nggi o‘yini bo‘lib qolishini ma’lum qildi.

So‘nggi gol va ko‘z yoshlar

Norvegiya bilan o‘yinda Neymar 67-daqiqada zaxiradan maydonga tushirildi. Ko‘p o‘tmay uning jamoasi Erling Holanddan ketma-ket gollar o‘tkazib yubordi, ammo o‘yinga so‘nggi nuqtani qo‘shimcha daqiqalarda penaltini aniq ijro etgan braziliyalik hujumchi qo‘ydi. Karlo Anchelotti shogirdlarida hisobni tenglashtirish uchun vaqt qolmagandi va pentakampeonlar 1990 yildan buyon ilk bor jahon chempionatida chorakfinalga ham yetib bora olmadi.

O‘yin yakunlangani haqidagi hushtak chalinganidan keyin Neymar gazonga o‘tirdi va yig‘lab yubordi. Uning oldiga Rafinya yetib keldi va yupata boshladi.

U nega bu qadar qattiq xafa bo‘lgani sababi tezda ma’lum bo‘ldi. Jurnalistlar bilan muloqotda u Braziliya milliy jamoasi safidagi faoliyatini yakunlaganini e’lon qildi.

«Men qayta va qayta harakat qildim. Ammo endi barchasi tugadi. Men shu yerda boshlagandim, shu yerda yakunlayman», – deya uning so‘zlarini keltirgan Globo.

Yirik sovrinlarsiz

Neymarning milliy jamoadagi karerasi 2010 yil JAR maydonlarida bo‘lib o‘tgan jahon chempionatida boshlanishi mumkin edi: o‘shanda Pele ham o‘sha vaqtda milliy jamoa bosh murabbiyi bo‘lgan Dungadan 18 yoshli ushbu futbolchini asosiy jamoaga chaqirishni talab qilgan, ammo futbolchi yakuniy qaydnomadan o‘rin olmagandi. Murabbiy buni futbolchi hali juda yoshligi bilan izohlagandi.

U faqat o‘sha yil avgustida AQShga qarshi o‘yinda (2:0) milliy jamoa safida debyut qiladi va darhol o‘z gollari hisobini ochadi. Braziliyadagi jahon chempionatiga esa u superyulduz maqomida yetib keladi. Qolaversa, 2013 yil Neymar Braziliya bilan Konfederatsiyalar kubogini qo‘lga kiritadi.

Ammo uydagi mundial pentakampeonlar uchun yarimfinalda Germaniyadan uchralgan dahshatli mag‘lubiyat (1:7) bilan yakunlanadi. Neymar o‘sha o‘yinni jarohat tufayli o‘tkazib yuborgandi. Chorakfinalda Kolumbiyaga qarshi kechgan o‘yinda (2:1) Xuan Suniga bilan to‘qnashuvdan keyin Neymarga bel umurtqasi sinishi tashxisi qo‘yilgandi

2018 yilda ham, 2022 yilda ham Braziliya jahon chempionatidagi ishtirokini chorakfinalda to‘xtatadi. Rossiyadagi mundialda brazillar Belgiyaga (2:1), Qatarda – Xorvatiyaga (1:1, penaltilar seriyasida 2:4) yutqazgan.

Barcha 2026 yilgi turnir Neymar uchun jahon futbolidagi asosiy kubokni bosh uzra ko‘tarish uchun so‘nggi imkon bo‘lishini tushunib turardi. Futbolchi ushbu turnirga tayyor bo‘lish uchun «Santos»ning safar o‘yinlariga borishni ham to‘xtatdi. Ammo baribir chempionat arafasida jarohat oldi. Shunga qaramay, Karlo Anchelotti uni yakuniy tarkibga kiritdi, lekin futbolchi jarohatidan to‘liq tiklanmagani tufayli guruh bosqichida Marokash (1:1) va Haiti (3:0)ga qarshi kechgan o‘yinlarga tusha olmadi, so‘nggi turda Shotlandiyaga (3:0) qarshi o‘yinda esa zaxiradan tushib, atigi 14 daqiqa o‘ynadi.

Lekin Norvegiya bilan o‘yin oxirida o‘z nomiga gol yozib qo‘yishga muvaffaq bo‘ldi. Bu Neymar uchun milliy jamoa libosidagi 130 o‘yinda urilgan 80-golga aylandi. U jamoa tarixidagi eng yaxshi to‘purarlar reytingida Pele (77) va Ronaldo (62) kabi afsonalarni ortda qoldirgan holda yetakchi bo‘lib olgan. Faoliyatini davom ettirayotgan futbolchilar orasida esa unga eng yaqin natija Vinisius Junior va Lukas Paketada (ikkisida ham 13 tadan gol).

Neymar asosiy sovrinlarni qo‘lga kirita olmagan bo‘lsa-da, unda baribir milliy jamoa bilan qo‘lga kiritilgan titullar bor: Konfederatsiyalar kubogidan tashqari, Neymar Olimpiada oltin medali (2016)ga ega. Ammo Amerika kubogida ham g‘olib chiqolmagan, bu turnirdagi eng yaxshi natija 2021 yilgi kumush medal bo‘lgan.

Source link

Tunda va tongda jahon chempionatida chorakfinalning yana ikki ishtirokchisi aniqlanadi.

7 iyulga o‘tar kechasi va tongda futbol bo‘yicha jahon chempionatida nimchorakfinal doirasida yana ikki uchrashuv o‘tkaziladi: dastlab Lamin Yamal boshchiligidagi ispan yulduzlari Krishtianu Ronaldu boshchiligidagi portugal yulduzlariga qarshi maydonga chiqadi. Tongda esa turnir mezbonlaridan so‘nggisi AQSh chorakfinal yo‘llanmasi uchun Belgiyaga qarshi to‘p suradi.

Portugaliya – Ispaniya

6 iyul, 00:00. AT&T Stadium, Arlington

Ishonch bilan aytish mumkinki, Iberiya derbisi 1/8 finaldagi eng yorqin afisha. Ko‘pchilik futbol muxlislari bu o‘yinga o‘tmish va kelajak to‘qnashuvi sifatida qarashi mumkin: faoliyatidagi so‘nggi yirik turnirni o‘tkazayotgan Krishtianu Ronaldu (u o‘yin arafasida jahon chempionatidan keyin milliy jamoa bilan xayrlashishini rasman tasdiqladi) hali katta turnirlari oldinda turgan Lamin Yamalga qarshi maydonga chiqadi. Lekin hozircha bu ikki futbolchi turnirni kuchli o‘tkazmayapti. 41 yoshli portugaliyalik uchta gol urdi, ammo shundan ikkitasi ancha kuchsiz raqib darvozasiga, uchinchisini – penaltidan. 18 yoshli ispaniyalik esa birgina gol bilan cheklandi – u turnir arafasida jarohat olgandi va hali eng yaxshi formasiga qaytmagan.

Shuning uchun bu o‘yin ikki superyulduz qarama-qarshiligidan kattaroq o‘lchamga ega. Ispaniya 1/8 finalga juda yaxshi holatda yetib keldi – asosiy futbolchilar sog‘ (faqat Niko Uilyams istisno), hujum chizig‘i vakillari o‘yindan o‘yinga ochilmoqda, qolaversa, 1/16 finalda Avstriyaga qarshi o‘yinda kuch tejash imkoni bo‘ldi – raqib jiddiy qarshilik ko‘rsatmadi va «Qizil furiya» o‘z imkoniyatlarining taxminan 70 foizi darajasida o‘ynadi. Endi esa jamoadan to‘liq kuchini ishga solish talab etiladi.

Portugaliya esa o‘zi istamagan holda turnir boshidan buyon o‘z imkoniyatlari darajasida o‘ynay olmayapti. Roberto Martines boshqaruvidagi jamoada barqarorlik yo‘q – portugallar goh dominant o‘yin qo‘yishmoqda, goh o‘yin tizginini qo‘ldan chiqarishmoqda va raqibga ko‘p imkon berib yubormoqda. Millatlar ligasi finalida Ispaniya va Portugaliya o‘rtasida teng kurash kechgandi – bu safar kuchlar nisbati qanday bo‘lishiga yaqin soatlar ichida javob topiladi. Ikki jamoa markazi ham o‘z avlodining eng kuchli vakillaridan tarkib topgani o‘yindagi intrigani oshiradi. Hozircha Rodri va Pedri bog‘lami Nevesh – Vitinya juftligidan yaxshiroq ko‘rinmoqda, ammo alohida o‘yinda barchasi o‘zgarib ketishi mumkin.

AQSh – Belgiya

7 iyul, 05:00. Lumen Field, Sietl

Turnir mezbonlaridan biri bo‘lgan AQSh milliy jamoasi guruh bosqichida betaraf muxlislarda yaxshi taassurot qoldirgan, Paragvay (4:1) hamda Avstraliya (2:0) bilan o‘yinlarda to‘liq ustunlikka erishib, guruh bosqichi masalasini muddatidan oldin hal etgandi. Pley-offda esa Bosniya va Hersogovina to‘sig‘idan o‘tildi (2:0).

Va Belgiya bilan hal qiluvchi o‘yindan oldin aynan bosniyaliklarga qarshi o‘yindagi epizod muhokamalar markaziga chiqdi. Amerika tomoni so‘rovi bilan FIFA o‘sha o‘yinda qizil kartochka olgan va Belgiyaga qarshi o‘ynamasligi kerak bo‘lgan Folarin Balogunning diskvalifikatsiyasi kechiktirildi.

Jamoalarning shu yil bahorida bo‘lib o‘tgan o‘rtoqlik uchrashuvida Yevropa vakillari 5:2 hisobida g‘alaba qozongan, lekin bunday uchrashuvga yondashuv rasmiy o‘yinlardagidan tubdan farq qilishi hisobga olinsa, bu natija amalda hech narsani anglatmaydi.

Mundial davomida Maurisio Pochettino jamoasi o‘yinning B va S rejalarga ham o‘ta oladigan taktik hameleon ekanini namoyish etdi; Belgiya o‘yini esa De Bryuyne, Trossar, Doku yoki Lukaku kabi futbolchilarining o‘yini chiqishiga bog‘liq.

Lekin mezbonlar jamoasi atrofidagi so‘nggi voqealar ichki muhitga ta’sir qilishi, futbolchilar bosim ostida qolishi mumkin, Belgiya esa endi butun dunyo bo‘ylab muxlislar qo‘lloviga ega bo‘lishi tayin.

Bu Belgiyaning «oltin avlodi» uchun so‘nggi turnirni munosib o‘tkazish yo‘lidagi navbatdagi imkon, AQSh esa maydon tashqarida bo‘layotgan turli gaplarga maydonda munosabat bildirishi talab etiladi. Ushbu juftlik g‘olibi chorakfinalda Ispaniya va Portugaliyadan biriga ro‘baru keladi.

Source link