Kolumbiyaga qarshi o‘yinda jamoa turnir tarixidagi ilk golini nishonladi, ammo bu gol natija uchun yetarli bo‘lmadi.

JCh-2026. K guruhi. 1-tur

O‘zbekiston – Kolumbiya 1:3

Gollar: Fayzullayev 61 – Munios 41, Dias 66, Kampas 90+9.

O‘zbekiston: Yusupov, Karimov, Husanov, Ashurmatov (O‘rozov 77), Abdullayev, Nasrullayev (Sayfiyev 46), Mozgovoy, Shukurov, O‘runov (Hamdamov 46), Fayzullayev (Amonov 77), Shomurodov (Sergeyev 90+3).

Kolumbiya: Vargas, Munyos, Sanches, Lukumi, Moxika, Puerta (Rios 80), Lerma, Rodriges (Kampas 72), Arias (Kastanio 90+3), Dias (Gomes 90+3), Suares (Ernandes 80).

Ogohlantirishlar: Moxika 7, Husanov 34.

Futbol bo‘yicha O‘zbekiston milliy jamoasi jahon chempionatidagi ishtirokini mag‘lubiyat bilan boshladi. Mexiko shahridagi «Atsteka» stadionida Kolumbiyaga qarshi o‘tkazilgan o‘yin 1:3 hisobida yakunlandi.

Birinchi bo‘limda to‘liq tashabbusga egalik qilgan janubiy amerikaliklar 40-daqiqada hisobni ochdi. Angliyaning «Kristal Pelas» klubida o‘ynovchi qanot himoyachisi Daniel Munios «Bavariya» vingeri Luis Diasning uzatmasini golga aylantirdi – 0:1.

Kannavaro tanaffusdayoq tarkibda o‘zgarishlarga qo‘l urdi: chap qanot himoyachisi Sherzod Nasrullayev o‘rniga Farrux Sayfiyev, chap qanot vingeri Oston O‘runov o‘rniga esa Dostonbek Hamdamov maydonga tushirildi.

60-daqiqada Shomurodov xavfli vaziyat yuzaga keltirdi: uning zarbasidan keyin to‘p darvozabon orqali bo‘sh darvoza qarshisida turgan Abbosbek Fayzullayevga yetib keldi va ushbu yarimhimoyachi O‘zbekiston milliy jamoasining jahon chempionatlari tarixidagi ilk goliga mualliflik qildi.

Ammo ko‘p o‘tmay Kolumbiya yana hisobda oldinga chiqib oldi. Shomurodov maydon markazida to‘p oldirdi va tezkor qarshi hujumni Luis Dias gol bilan yakunladi – 1:2.

O‘yinning so‘nggi daqiqalarida Osiyo vakillari to‘liq kuch bilan shturm uyushtirishdi, natijada himoya chizig‘ida katta bo‘shliq yuzaga keldi va uchinchi gol ham o‘tkazib yuborildi. O‘rozov to‘pni uzoqlashtirishni paysalga soldi va to‘pga ega chiqqan Kucho Ernandes to‘pni qanotdan darvozabon hududiga uzatdi, u yerda turgan Haminton Kampas bosh bilan Yusupov qo‘riqlayotgan darvozani ishg‘ol etdi – 1:3.

O‘yinning so‘nggi daqiqasida O‘zbekistonda hisobni qisqartirish uchun imkoniyat bo‘ldi, ammo Behruz Karimovning jarima maydoni tashqarisidan yo‘llagan zarbasidan keyin to‘p darvoza to‘siniga bordi.

Birinchi turdan keyin Kolumbiya 3 ochko bilan guruhda peshqadamlik qilmoqda, O‘zbekiston esa to‘rtinchi o‘rinda qoldi.

O‘zbekiston milliy jamoasi navbatdagi uchrashuvni 23 iyun kuni Portugaliyaga qarshi o‘tkazadi.

Source link

JChdagi birinchi tur o‘yinlari tugay deb qoldi. Oldingi kundaligimizdan keyin yana to‘rtta guruhda o‘yinlar o‘tkazildi. Ispaniya debyutant jamoani yenga olmadi, Eronni o‘yin tugashi bilan quvishdi, Osiyo jamoalarining mag‘lubiyatsiz seriyasi buzildi. Mbappe, Holland va Messi mundialni juda zo‘r boshladi.

Ispaniya oqsadi

Musobaqaning asosiy favoriti deb qaralayotgan Ispaniya musobaqani Afrika vakili bo‘lgan debyutant Kabo-Verde bilan durang o‘ynab boshladi. Butun o‘yin hujum qilgan ispanlar bororta gol ura olmadi. Musobaqadan oldin ispanlarning kuchsiz tomoni deb qaralgan hujum chizig‘i chindan pand berdi.

Hujumda kimlar o‘ynaganini qarang: Mikel Oyarsabal, Ferran Torres, Gavi. Bu futbolchilarni kamsitish adolatdan bo‘lmaydi, lekin Ferran «Barsa»da vaziyatlar kushandasi ekani, Gavi hujumchi emasligi, Oyarsabal o‘rtamiyona hujumchilar sirasiga kirishini hamma biladi. Mikel Yevro finalida Ispaniyaga sovrin olib kelgan g‘alaba golini urgan, Ferranning ham o‘yini chiqib qolsa, ko‘p gol uradi, lekin aynan Kabo-Verde bilan o‘yinda Ispaniya hujum chizig‘i o‘zini ko‘rsata olmadi.

Ispaniya uchun hujumchisiz o‘ynash yangilik emas. Masalan, Yevro-2012 finalida ispanlarda hujumchi sifatida Fabregas, David Silva hamda Iniyesta o‘ynagan. Ya’ni, «Qizil furiya» hujumchisiz o‘ynab ham, bemalol to‘rtta gol urib, chempion bo‘lgan. O‘zi Ispaniyada Torres va Vilyadan keyin yorqin hujumchi chiqmay ham qo‘ydi-da. Yarimhimoya doim kuchli bo‘lgani uchun bu kamchilik bilinmay kelgan.

Ispaniyadek kuchli jamoaga birgina o‘yin bilan baho berish adolatdan emas. Ular 2010 yil ham JChni mag‘lubiyat bilan boshlagan. Yamal yaxshiroq formaga kirsa, Ferran to‘purar bo‘lib ketsa ham, ajablanmang.

Guruhdagi ikkinchi to‘qnashvda Saudiya Arabistoni Urugvay bilan o‘yinda g‘alabani saqlab qola olmadi, lekin osiyoliklarning mag‘lubiyatsiz seriyasini davom ettirdi. Shu kuni «G» guruhidagi ikki o‘yinda ham durang natija qayd etildi. Belgiya va Misr, to‘g‘risi, o‘rtacha o‘yin ko‘rsatdi. Belgiya oltin avlodining qolgan a’zolari oldingi kabi yorqin o‘yin ko‘rsata olmadi, Misrda ham asosiy yulduz Saloh o‘z darajasida emas. O‘yinni ko‘rgach, bu jamoalar musobaqada uzoqqa borishiga shaxsan men ishonmadim.

Qaytanga guruhning ikkinchi o‘yini qiziq kechdi. Katta qiyinchilik bilan Amerikaga yetib borgan Eron Yangi Zelandiya bilan durang o‘ynadi. Zelandiyadan Jast degan yigit ikkita gol urdi. Har ikki golda APL yulduzi Kris Vud assistent bo‘ldi. Eronda o‘zbekistonlik muxlislarga yaxshi tanish «Istiqlol» himoyachisi Ramin Rizoyan qahramon bo‘ldi. U avval o‘zi gol urdi, keyin Mohibining chiroyli goliga pas berdi va o‘yinning eng yaxshi futbolchisi deb topildi.

Bu o‘yinda Eronning g‘alabasini kutgandim, chunki forslar Yangi Zelandiyadan ancha baland darajada. Lekin urush sabab futbolchilar o‘yin amaliyotisiz qolgani, murakkab tayyorgarlik jarayoni, Amerikadagi bosimlar, ruhiy muammo sabab eronliklar o‘z uslublarida agressiv o‘yin ko‘rsata olishmadi. Shuningdek, Eronda ham biz kabi chempionatdan keyin avlodlar almashinuvi boshlanib ketsa kerak. O‘yin tempi avvalgidek emasligiga futbolchilar yosh emasligi ham ta’sir ko‘rsatadi.

O‘yin tugashi bilan tashkilotchilar eronlik futbolchilardan Amerikadan chiqib ketishni talab qilgan. Murabbiyning aytishicha, futbolchilarga hech bo‘lmasa mehmonxonada uxlab olishga ham imkon berishmagan. O‘yin tugashi bilan darhol samolyotga chiqib ketish futbolchilar tiklanish jarayoniga salbiy ta’sir ko‘rsatishini bilish uchun fizioterapevt bo‘lish shart emas. Maydonda terlab-pishib yugurgan odam uchun eng kerak narsa yuvinib, ovqatlanish va yaxshigina uxlash. Busiz inson tanasi uch kunda tiklanishi juda qiyin. Qit’adoshlarimiz Amerikadagi mundialni ana shunday bosimlar bilan o‘tkazishga majbur.

Mbappe va Holandda dubl, Messi esa…

Kecha tunda va bugun tongda o‘tkazilgan o‘yinlar juda yorqin o‘tdi, birorta durang bo‘lmadi, Osiyo jamolarining mag‘lubiyatsiz seriyasi buzildi. Fransiya Senegalni ishonchli tarzda yengdi – 3:1. Bu o‘yin, afsuski, 2002 yildagi afsonaviy uchrashuv kabi esda qolarli bo‘lmadi. Faranglar birinchi bo‘limda qiynaldi, lekin Desham tanaffusdan keyin shogirdlariga ular oxirgi ikki mundial finalchisi ekanini eslatib qo‘ygan ko‘rinadi. Avvaliga haddan tashqari ko‘p yulduzlar sabab jamoada tushunmovchilik bordek ko‘ringandi, lekin doim yulduzli tarkibga ega bo‘lgan Fransiya o‘yinni iziga tushirib oldi.

Senegalning himoyasini 66-daqiqada Olise zargarona uzatmasi bilan yorib o‘tdi. Uning himoyachilar orasidan turib bergan uzatmasini Kilian Mbappe birtepar usulida olis burchakka joylab qo‘ydi. Keyinroq Rabioning Olisecha uzatmasini Barkolya golga aylantirdi. Bu vaziyatlardan oldin Mane jarima maydonchasi ichida Mbappeni qo‘pollik bilan to‘xtatib qolgandi. Lekin o‘zbekistonliklar yaxshi taniydigan Alirizo Fig‘oniy negadir yaqqol fol bo‘lgan holat uchun penalti bermadi.

Hakam tomonidan qo‘shib berilgan 90+4-daqiqada Senegal bitta gol urib, intrigani kuchaytirdi, lekin oxirgi soniyalarda Mbappe o‘z uslubida juda kuchli zarbasi bilan o‘yinga yakuniy nuqtani qo‘ydi – 3:1. Killianning bu goli uning kumiri Ronalduning YeChLda «Portu»ga urgan golini yodga soldi.

O‘yinning eng yaxshi futbolchisi deb Mayl Olise topildi, lekin bu o‘yinda Mbappe hamon dunyoning eng kuchli futbolchisi ekanini isbotladi. To‘g‘risi, dunyo futbolida hozir unga teng keladigan futbolchi bor deb o‘ylamayman. Bunaqa texnika, bunaqa tezlik, bunaqa zarba, bunday joy tanlash… Biroz injiqligini hisobga olmasa, Mbappeda hech qanday kamchilik, nuqson yo‘q. Haqiqiy jahon darajasidagi daho futbolchi.

Kunning ikki o‘yinida Osiyo jamoalari mag‘lub bo‘ldi. Shu kungacha qit’adoshlarimiz mag‘lubiyatsiz kelayotgandi. Iroq Norvegiya bilan kurashib ko‘rdi, biroq Holand o‘z darajasini isbotlab ikkita gol urdi va bitta assist berib, o‘yin taqdirini hal qildi. Bunaqa gol mashinasi bor jamoa oxirida chempion bo‘lib ketsa ham, ajablanmang. Kunning oxirgi o‘yinida Marko Arnautovich boshchilik Avstriya Iordaniyani yengib, pley-off tomon katta qadam tashladi.

Kunning eng jo‘shqin o‘yini haqida esa boya gaplashgandik. Argentina Messining benifisiga aylangan o‘yinda Jazoirga imkon qoldirmadi. Bu o‘yinda hamma Messining gollariga e’tibor qaratmoqda, vaholanki, Argentinaning boshqa chiziqlari ham raqibga imkon qoldirmadi. Ko‘pchilik favorit sifatida Yevropa jamoalarini tilga olyapti, lekin amaldagi chempion Argentina g‘oliblikni himoya qilsa ham, ajablanmang.

O‘zbekiston boshlamoqda

Bugungi «match day» biz uchun hayajonli bo‘ladi. Guruh bosqichining birinchi turi aynan bizning Kolumbiyaga qarshi o‘yinimiz bilan yakunlanadi. O‘yin Toshkent vaqti bilan 07:00 da boshlanadi va ertaga O‘zbekistondagi barcha tashkilotlarda ish vaqti soat 10:00 dan deb belgilandi. Davlat odamlar futbolni bemalol ko‘rib olsin deb shunday sharoit yaratib berdi.

Kunning markaziy o‘yini Angliya va Xorvatiya o‘rtasida kechadi. Lekin bu o‘yinni ko‘rishni, to‘g‘risi, tavsiya qilmayman, yaxshisi O‘zbekistonning o‘yinigacha uxlab oling. Men esa do‘stim Harri Keyn uchun bahsni albatta tomosha qilaman.

Bugun 22:00 da musobaqa favoritlaridan yana biri, guruhdoshimiz Portugaliya Kongoga qarshi o‘ynaydi. Boya aytganimizdek, Kongo posboniga oson bo‘lmaydi. Biz uchun bu o‘yinda nima bo‘lishi esa ikkinchi darajali. Eng asosiysi tarixiy o‘yinda O‘zbekiston milliy jamoasiga kuch-quvvat tilaymiz. Eldor boshchilik yigitlarimiz butun millatimiz uchun maydonda munosib kurashishlariga ishonaman. Olg‘a, yigitlar, butun millat siz bilan. Natija qanday bo‘lishidan qati nazar siz biz uchun eng yaxshisiz. JChga chiqish, unda birinchi o‘yin hayajonini his qilishning o‘zi takrorlanmas katta natija. Futbolchilarimizni duo qiling, ilohim yuzlari yorug‘ bo‘lsin.

Source link

Agrobank’ning “Qahramonlar” hujjatli loyihasining navbatdagi soni O‘zbekiston milliy terma jamoasi futbolchisi Otabek Shukurovga bag‘ishlandi. Filmda futbolchining bolalikdagi orzulari, akademiyadagi sinovlari, legionerlik bosimi, maydon ortidagi mehnati va professional futbolgacha bo‘lgan mashaqqatli yo‘li xaqida.

Agrobank Jahon chempionati translatsiyasining bosh homiysi sifatida futbol muxlislariga nafaqat muhim sport voqeligini, balki uning ortida turgan insoniy hikoyalarni ham yoritib bermoqda. “Qahramonlar” loyihasining ushbu soni Otabek Shukurov misolida futbolchilik kasbi qanday fidoyilik, intizom va sabr talab qilishini ko‘rsatadi.

“Qahramonlar” — o‘z sohasida mehnati, mas’uliyati va fidoyiligi bilan ajralib turgan insonlarning real hikoyalarini hujjatli formatda taqdim etuvchi loyiha. Unda qahramonlarga o‘z yo‘li, sinovlari, qarorlari va hayotiy tajribasi haqida bevosita so‘zlash imkoniyati beriladi. Avvalgi sonlarda turli soha vakillari hikoya qilingan bo‘lsa, bu gal loyiha markazida futbol va milliy terma jamoa vakili — Otabek Shukurov mehmon bo‘ldi.

Filmda Otabek Shukurov futbolga oddiy qiziqish emas, hayot tarzidek qarash kerakligini aytadi. Uning fikricha, professional futbolchi bo‘lish uchun futbol insonning har bir kunida, har bir qarorida va hatto har bir nafasida bo‘lishi kerak. Aks holda, bu yo‘l u uchun muvaffaqiyatli bo‘lmasligi mumkin.

Otabek Shukurov bolalik va akademiya davridagi qiyinchiliklarni eslar ekan, futbolchining ilk sinovlari maydondagi katta o‘yinlardan ancha oldin boshlanishini ta’kidlaydi. U akademiyada qishin-yozin tonggi soat 5 da turib, kun davomida tanaffussiz mashg‘ulotlarda qatnashgan davrlarini eslaydi. Ba’zan kunlar faqat mashg‘ulot, ovqatlanish, uyqu va yana mashg‘ulot bilan o‘tgan. Hatto kulmasdan, ortiqcha gaplashmasdan, bor e’tiborini faqat futbolga qaratgan vaqtlari ham ko‘p bo‘lgan.

Filmning eng ta’sirli epizodlaridan biri — Otabek Shukurovning butsalar bilan bog‘liq xotiralari. Uning aytishicha, futbolda futbolchining butsasi yirtilishi ham bir ma’noda baxt: “Butsasi yirtilmagan futbolchi futbolchi emas”, degan qarash unda erta shakllangan. U akademiyada nafaqat o‘zining, balki safdoshlarining ham yirtilgan butsalarini tikib, ta’mirlab bergan. Bu ish orqali oz bo‘lsa-da pul ishlab, kam-ko‘stini to‘ldirgan.

Shukurovning aytishicha, butsani ta’mirlash uchun shahar markaziga borish mashg‘ulotlardan vaqt olish bilan birga, moliyaviy tomondan ham cho‘ntakka zarar bo‘lgan. Shu sababli u buni o‘zi o‘rganib olgan. Avvaliga bu alohida maqsad bilan boshlanmagan, biroq bir ishni qayta-qayta bajarish natijasida u bu borada ham tajriba orttirgan. Hatto butsa tikish uchun kerak bo‘ladigan charm yoki yamoq matolarni ko‘rib qolsa, yig‘ib yuradigan darajaga yetgan.

U nafaqat butsalarni, balki eskirgan to‘plarni ham ta’mirlagan. Bir necha mavsum o‘ynalib, charchagan, eskirgan to‘plarni tiklab bergan va buning evaziga ba’zan o‘ziga to‘p olgan. Shu tariqa uning xonasida butsa va to‘plar ko‘payib borgan. Bu tafsilotlar filmda futbolchining katta maydonga chiqishidan oldingi oddiy, lekin nihoyatda muhim mehnat maktabini ochib beradi.

Otabek Shukurov filmda futbolchining pozitsiyasi haqida ham alohida fikr bildiradi. Uning aytishicha, futbolda qaysi pozitsiyada o‘ynashni har doim ham futbolchining o‘zi tanlamaydi — aksincha, pozitsiya futbolchini tanlaydi. Futbolchi turli pozitsiyalarda o‘zini sinab ko‘radi, qayerda kuchliroq ekanini anglaydi va oxir-oqibat aynan o‘sha joyda qoladi. Bu esa futbolchilik yo‘lida moslashuvchanlik, sabr va o‘zini doimiy sinash muhimligini ko‘rsatadi.

Hujjatli filmda legionerlik mavzusi ham ochib beriladi. Shukurovning ta’kidlashicha, legioner bo‘lish oson emas. Chet el jamoasiga taklif qilingan futbolchidan mahalliy o‘yinchilardan ko‘proq natija, kuchliroq o‘yin va barqaror statistika kutiladi. Chunki legioner sifatida yuqoriroq maosh va yaxshiroq sharoit bilan olib kelingan futbolchidan klub kubok, natija va yetakchilik kutadi. Bu bosimga chiday olgan futbolchigina legionerlikda o‘z o‘rnini topa oladi.

Otabek Shukurov o‘z hikoyasida otasi haqida ham alohida to‘xtaladi. Uning aytishicha, otasi bolaligida futbolchi bo‘lishni xohlagan, ammo bunga imkon bo‘lmagan. Shu sababli u o‘g‘lining futbolchi bo‘lishini istagan va doim uning birinchi muxlisi, birinchi qo‘llab-quvvatlovchisi bo‘lgan. Shukurovning futbolga kirib kelishida otasining ishonchi va mashg‘ulotlardagi qo‘llovi katta rol o‘ynagan.

Filmda futbolchining bolalikdagi moddiy qiyinchiliklari ham ochiq aytiladi. Ba’zan mashg‘ulotlar sabab to‘yib ovqatlanishga vaqt bo‘lmagan, ba’zan esa bunga imkoniyat yetmagan. Otabek Shukurovning eslashicha, non sotib olishga imkon topilgan kunlar ular uchun bayramdek bo‘lgan. Bu epizodlar futbolchilik yo‘li faqat stadion, muxlis va g‘alabalardan iborat emasligini, uning ortida ko‘rinmaydigan sinovlar borligini ko‘rsatadi.

Agrobank’ning Jahon chempionati translatsiyasi bosh homiysi sifatidagi ishtiroki aynan shunday hikoyalar orqali yanada asosli ko‘rinadi. Bank ushbu loyiha orqali futbolni faqat tomosha qilinadigan o‘yin emas, balki mehnat, orzu, iroda va milliy g‘urur bilan bog‘liq katta ijtimoiy hodisa sifatida talqin qilmoqda.

“Jahon chempionati millionlab muxlislarni birlashtiradigan katta futbol bayrami. Agrobank bosh homiy sifatida ushbu bayramni tomoshabinlarga yanada yaqinlashtirish bilan birga, futbol ortida turgan real insoniy hikoyalarni ham ko‘rsatishni muhim deb biladi. Otabek Shukurov haqidagi film — mehnat, ishonch va imkoniyatdan foydalanish haqidagi ijtimoiy loyiha.

Otabek Shukurovning hikoyasi yoshlar uchun: “Inson o‘zi tanlagan yo‘lda hatto 1 foiz imkoniyat ko‘rsa ham, undan foydalanishga harakat qilishi kerak. Chunki ba’zan katta o‘zgarishlar aynan kichik imkoniyatlardan boshlanadi”, degan xabarni yetkazishga xizmat qiladi.

“Qahramonlar” loyihasining Otabek Shukurovga bag‘ishlangan sonini Agrobank’ning rasmiy YouTube kanalida tomosha qilish mumkin.

 Reklama huquqi asosida

Source link

Amerika mundiali hayratlantirishda davom etmoqda. Ikki kun avval hech kim tanimaydigan Kabo-Verde darvozaboni Vozinya bir kunda dunyo futboli yulduziga aylangandi. Bugun tongda yana bir daho hamon cho‘qqida ekanini barchaga eslatdi. Tunda Mbappening ajoyib o‘yini va Holandning dublidan keyin shahzodalar kurashga kirishdi degan mazmunda chiqish qilishga tayyorlangandim, lekin tongda «changalzor qiroli» kelib bir latifada aytilganidek «hammani haydab yubordi».

Messi Klozega yetib oldi

Kecha tunda Senegal darvozasiga ikki ajoyib gol urgan Kilian Mbappe mundiallarda urgan gollari sonini 14 taga yetkazib, bu borada Messini ortda qoldirgan va uchinchi o‘ringa ko‘tarilib olgandi. Oltinchi JChni o‘tkazayotgan Messi esa tongda Jazoir darvozasiga naq uchta gol urdi.

Messi va Ronaldu shunaqa ko‘p gol urganki, ularning har bir nechta golidan keyin qanaqadir rekordlar yangilanaveradi. Bugungi gollaridan keyin Messi JChlari tarixidagi eng yaxshi to‘purar Miroslav Klozega yetib oldi. Men bu rekordni keyinchalik Mbappe uzoq vaqt yangilab bo‘lmaydigan holatga keltirib qo‘yishiga ishonaman. Chunki fransuz hali yana 2-3 mundialda qatnashsa kerak, buning ustiga keyingi o‘yin Iroq bilan. Lekin 39 yoshga kirayotgan Messi hamon eng zo‘rlar bilan kurashib yurgani tahsinga sazovor.

Leo shu kuni Argentina milliy jamoasi safidagi 200-o‘yinida maydonga tushdi. Dahshat, 200 ta o‘yin-a! U Jazoirga qarshi o‘yinda Argentinani 20-marta JCh o‘yinida sardor sifatida boshlab tushdi. Bu mutlaq rekord. Hujumchi 2006 yil Serbiya va Chernogoriya darvozasiga gol urib Argentinaning mundiallarda gol urgan eng yosh futbolchisiga aylandi. 20 yil o‘tib endi Argentinaning JChlarida gol urgan eng yoshi katta futbolchisiga aylandi. 20 yil sport formasini bu qadar yaxshi ushlab turish mo‘jizaning o‘zi.

Leoni «nafaqaga kuzatishgandi»

Lionel Messi, shubhasiz, futbol tarixidagi eng yaxshi atletlardan biri. U «Barselona»dan klub rahbariyati sabab ketib, PSJga o‘tdi. Fransiyada ham juda ko‘p gol urdi, assistlat berdi, sovrinlar yutdi, lekin undan ChLda g‘oliblik kutishgandi, shu sabab faoliyati muvaffaqiyatsiz deb baholandi. Futbolchining o‘zi ham Parijda baxtli bo‘lmaganini tan oldi. Axir «Barselona» ramziga aylangan futbolchi qanday qilib Yevropaning boshqa jamoasiga moslashib ketsin?

Keyin unga Saudiyadan aql bovar qilmas maosh taklif qilishdi. Arablar o‘z chempioatlarida Messi – Ronaldu to‘qnashuvini ko‘rishni istagandi. Lekin Leo ancha kam maoshga Amerika jamoasiga o‘tib ketdi. U azaldan Amerikani yaxshi ko‘rgani, oilasi bilan birga qaror qabul qilganini aytdi. Shu-shu ko‘zdan panada, olis Amerikada futbol o‘ynab yurdi.

Ko‘pchilik Messi endi JChda o‘ynamasa ham bo‘ladi, kubokni yutdi, holati avvalgidek emas, dedi. Lekin uning sezgilari o‘lmagan ekan. Leo Jazoirga qarshi o‘yinda «Qatarda Messini FIFA va qatarliklar chempion qildi», deydigan heyterlarni «xot-dokka yuborib», barcha savollarni yopdi. Uchta golidan ikkitasini «Barsa»dagi eng yaxshi damlaridagi kabi mukammal zarba bilan urdi. Birinchisi 2022 yil Meksikaga urilgan golni eslatdi. Uchinchi gol esa La Ligadagi deyarli har turda urib yurgan gollarini.

Messining muxlislari xursand bo‘lishgani aniq. 15 yil uning faqat yuqori darajadagi takrorlanmas o‘yinini ko‘rib yurgan «Barselona» muxlislari rahbariyatdagi intrigalar sabab Messining jamoadan ketishini og‘ir qarshiladi. Keyin Laporta uni olib kelaman deb saylovni yutdi, lekin aynan Laporte har qanday shart bilan qaytishga rozi bo‘lgan Messi uchun eshiklarni yopdi. «Barselona» klub ramziga aylangan futbolchi bilan eplab xayrlashmadi ham, unga yetarlicha hurmat ko‘rsatmadi.

Leo to‘polon qiladigan, hamma gapni to‘kib soladigan yigit emas, u juda kamgap yigit, indamay hammasini maydonda isbotlaydi. Hamma ko‘rdi, u hamon top darajada ekan. Kerak bo‘lsa, «Barselona»dagi istalgan hujum vakilidan kuchli ekan, kamida ushbu mundialda. «Barsa»chilar Kabo Verdega birorta gol ura olmadi, Messi esa bir soat ichida Zidanning o‘g‘liga uchta golni qadab qo‘ydi.

Kecha Senegalga qarshi o‘yinda Killian Mbappe dunyo futbolining ayni damda tengsiz futbolchisi ekanini, Olise «Oltin to‘p»ga da’vogar ekanini, Holand JChdagi ham gol mashina bo‘la olishini isbotladi. Messi esa eng yaxshi bo‘lishga da’vo qilmasa ham, hamon kuch-quvvatga to‘la yigitlar bilan kurasha olishini ko‘rsatdi. Aytgancha, Holand het-trikdan keyin Messini «aqldan ozdiradigan futbolchi» deb post yozdi.

Inglizlarning menga yoqmaydigan bir maqoli bor. So‘zimizni o‘sha maqolni sal o‘zgartirib yakunlamoqchiman: qirol qaytdi, yashasin qirol! Leo, sen dahosan, do‘stim. Sen bilan zamondosh ekanimdan faxrlanaman. Aytgancha, bugun tunda Kongo darvozaboniga juda qiyin bo‘ladi, sababini bilasiz…

Source link

Futbol bo‘yicha O‘zbekiston milliy jamoasi bosh murabbiyi Fabio Kannavaro hamda jamoa sardori Eldor Shomurodov 18 iyun kuni Kolumbiyaga qarshi kechadigan o‘yin oldidan matbuot anjumanida ishtirok etdi.

U tarkibdagi barcha futbolchilar o‘yinga tayyor holatda ekanini aytgan, shuningdek, guruhdagi raqiblar haqidagi fikrlarini bildirib o‘tgan.

«Husanov albatta muhim himoyachilarimizdan bittasi, unda hali yanada yuqori darajaga chiqish imkoniyati bor. U ayni paytda ham yuqori darajada o‘yinlar ko‘rsatib kelmoqda. 

O‘ylaymanki, bu yerda eng yaxshi fazilatlarimizni, o‘zbeklarning mentalitetini namoyish qilishga kelganmiz. Men jamoa bilan ishlaganimda o‘z tajribamni ulashishga harakat qildim. Chunki men ham qachonlardir ilk bor Jahon chempionatida debyut qilganman va o‘z tajribalarimni yetkazib boryapman. 

Kolumbiya va Portugaliya kabi jamoalar yuqori darajadagi o‘yin namoyish etishadi. Ularning tarkibida kuchli futbolchilar bor. Ularga qarshi o‘yinda ehtiyotkorlik bilan o‘ynaymiz. Kolumbiyada nafaqat Hames, balki ko‘plab yaxshi darajadagi futbolchilari bor. 

Kolumbiyani tahlil qildik, oxiriga qadar o‘ynaydi. Biz ham o‘z imkoniyatimizni namoyish etib, maydonga tushamiz», deya Kannavaroning so‘zlarini keltiradi O‘FA matbuot xizmati.

Bosh murabbiydan birinchi tur arafasida Jaloliddin Masharipov tarkibdan chetlatilgani haqida ham so‘ralgan. Italiyalik mutaxassis ushbu futbolchi so‘nggi 8 oyda atigi 20 daqiqa o‘ynagani va tarkibdan chetlatish qarori tizzasidagi muammo tufayli emas, balki boshqa jarohat sababli qabul qilinganini aytdi. «Biz katta tavakkal qilmaslikka qaror qildik. Afsuski, ajoyib bir o‘yinchimizni yo‘qotdik», – deya uning so‘zlarini keltiradi Gazeta muxbiri.

Shuningdek, jamoa yarimhimoyachisi Abbosbek Fayzullayevning jahon chempionatiga tayyorgarlik mashg‘ulotlarining yuklamasi og‘irligi ekani haqidagi so‘zlariga izoh berar ekan, Fabio Kannavaro shunday deydi: «Agar nimagadir erishmoqchi bo‘lsangiz, qiyinchiliklardan o‘tishingiz va buni hammaga isbotlashingiz kerak. Mashg‘ulotlarda qiyinchiliklar bo‘lishi tabiiy hol».

Jamoa sardori Eldor Shomurodov ham matbuot anjumanidagi savollarga javob qaytardi.

«Hammaning kayfiyati a’lo darajada, ilk bor jahon chempionatida qatnashyapmiz. Hayajon bor, lekin hech qanday bosim yo‘q. Barcha futbolchilarimiz ushbu o‘yinni intiqlik bilan kutyapti», – degan u jamoa ichidagi muhit haqida.

Sardor futbolchilarda bosim yo‘qligini ta’kidlagan.

«Albatta uzoq kutilgan Jahon chempionati jamoa sardori sifatida qatnashish — men uchun katta g‘urur. Ertaga ijobiy natija qayd etishimizga umid qilaman. Xalqimizdan esa bizni qo‘llab-quvvatlashini so‘rab qolaman. Bizda bosim yo‘q, ertaga biz jamoamiz bilan birgalikda to‘liq tayyor bo‘lamiz», – deya qo‘shimcha qilgan Shomurodov.

Kannavaro jahon chempionatlarida ishtirok etish tajribasi haqida ham to‘xtalgan.

«Men futbolchi sifatida Jahon chempionatida ishtirok etganman, biroq murabbiy sifatida ishtirok etish baribir boshqacha. Futbolchi sifatida va murabbiy sifatida tayyorgarlik boshqa boshqa narsa. Chunki siz barcha futbolchilaringiz bilan gaplashishingiz kerak.

Bizni juda ham qiziq va shiddatli o‘yinlar kutib turibdi. Raqiblarimiz ham yuqori darajadagi jamoalar. Biz ilk bor bu musobaqada ishtirok etyapmiz, ushbu musobaqaning har bir uchrashuvidan zavqlanishimiz va tajriba olishimiz kerak», – deydi u.

Source link