Sport
«Inter Mayami» Messining shedevri bilan kambek qildi, «PSJ»da sensatsion mag‘lubiyat
Klublar o‘rtasidagi jahon chempionatida 2-tur o‘yinlari boshlandi. O‘yinlardagi gollar va guruhlardagi vaziyat.
A guruhi
«Inter Mayami» (AQSh) – «Portu» (Portugaliya) 2:1
Gollar: Segoviya (47), Lionel Messi (54) – Samu (pen, 8)
«Inter Mayami»: Oskar Ustari, Maksimiliano Falkon, Noa Allen, Yyen Frey (Fafa, 79), Marselo (Tomas Aviles, 63), Tadeo Allende (Alba, 79), Serxio Buskets, Benjamin Kremashi, Telasko Segoviya (Redondo, 55), Lionel Messi, Luis Suares.
«Portu»: Ramush, Fernandesh (Borges, 70), Pedro, Markano (Deniz, 87), Mariu, Varela (Gomes, 7), Veyga (Stefan, 59), Moura (Otavio, 87), Viyeyra, Mora, Samu.
«Inter Mayami» yana muammoga duch keldi va ikkinchi o‘yinda ham darvozasiga penalti belgilandi. «Al-Ahli»ga qarshi o‘yinda qutqargan 38 yoshli Ustari yana qahramonlik ko‘rsatishga yaqin edi, ammo u Samu Agexovaning zarbasi yo‘nalishini topgan bo‘lsa-da, to‘p uning qo‘liga tegib o‘tib ketdi. Tezkor goldan keyin «Portu» raqib oldinga o‘tishidan foydalanib, xavfli qarshi hujumlar uyushtirishda davom etdi.
Ayniqsa portugaliyalik 18 yoshli Rodrigu Mora maydonda yaqqol ajralib turdi. U tovoni bilan paslar berdi, chiroyli driblinglar ishlatdi, Varelani qulay vaziyatga chiqardi (to‘p ustunga bordi), o‘zi ham xavfli zarba yo‘lladi (to‘pni darvoza chizig‘i ustida Falkon to‘xtatib qoldi). U o‘yinni personal benefisiga aylantirib, Messini soyada qoldira boshladi. Lekin Leo javob goli urilishi uchun qattiq ter to‘kdi: maydon markazida to‘pni egallab olib, jarima maydoni ichidagi Suaresga ajoyib uzatma berdi, ammo hujumchi «Portu» darvozaboni Klaudiu Ramush bilan yakkama-yakka vaziyatdan foydalana olmadi.
Ikkinchi bo‘limni esa Xaviyer Maskerano jamoasi ideal boshladi. Hujum Busketsning maydon markazidan qanotga to‘p uzatishi bilan boshlandi, hujumga qo‘shilgan Veygandt qanotdan jarima maydoni markazidagi Segoviyani topdi, venesuelalik havbek to‘pni to‘xtatmasdan darvoza to‘riga yo‘naltirdi. «Inter» o‘yinni kuchaytirishda davom etdi, raqib futbolchilari esa bu daqiqalarni juda ishonchsiz o‘tkazdi. Messini faqat qo‘pollik bilan to‘xtatishdi. Bu esa jarima zarbalariga olib keldi. Leoning avvaliga 30 metrdan yo‘llagan zarbasi biroz xato ketdi, jarima maydoni chizig‘i yaqinidagi fol esa uning yuqori burchakka yo‘llagan aniq zarbasi bilan yakunlandi. Argentinalik futbolchining Florida jamoasidagi 50-goli oddiy gol bo‘lmasligi ham kerak edi.
«Portu» nokdaundan o‘ziga kela olmadi, zarbalar bo‘yicha 14:6 hisobidagi ustunlik portugallarga bitta ham ochko keltira olmadi.
Shu bilan birga, okean orti vakillari hisobdagi ustunlikni saqlab qolish uchun so‘nggi daqiqalarda matonat ko‘rsatishiga to‘g‘ri keldi. Jumladan, jarohatdan endi qaytgan Jordi Albani maydonga tashlash orqali. Uning tajribasi va Messi bilan o‘zaro tushunishi — guruh bosqichi finishida jamoaga asqatishi tayin. Ikki o‘yinda to‘rt ochko jamg‘argan «Inter Mayami»ni endi 24 iyun kuni so‘nggi turda guruh peshqadami «Palmeyras»ga qarshi o‘yinda durang ham qoniqtiradi. Bu holda «Portu»ning «Al-Ahli» bilan o‘yini quruq rasmiyatchilikka aylanadi.
«Palmeyras» (Braziliya) – «Al Ahli» (Misr) 2:0
Gollar: Ali (avtogol, 49), Lopes (59)
«Palmeyras»: Veverton, Jiay, Gomes, Murilo, Pikeres, Rios, Moreno (Martines, 67), Eshtevan (Vanderlan, 76), Rafa Veyga (Maurisio, 46), Torres (Paulinyu, 76), Roke (Lopes, 46).
«Al Ahli»: Al Shenaviy, Yaxyo (Husayn Shahat, 87), Ibrohim, Dari (Ahmad Ramazon, 62), Heni, Muhammad Ali, Attiya, Hamdi Faziy (Muhammad Magdi, 62), Trezege (Bencharki, 62), Abu Ali (Gradishar, 62), Zizo.
Ogohlantirishlar: Veyga (39), Faziy (42), Jiay (43), Yaxyo (45+3), Pikeres (73), Attiya (79), Rios (90+5)
O‘yinning 37-daqiqasidagi epizod barchasini o‘zgartirib yuborishi mumkin edi, brazillar jamoasi yarimhimoyachisi Veyga raqibga qarshi xavfli o‘ynadi va hakam unga qizil kartochka ko‘rsatdi. Ammo videotakrordan keyin qarorini o‘zgartirib, kartochka rangini sariqqa o‘zgartirdi. «Palmeyras» bosh murabbiyi Abel Ferreyra ushbu futbolchisini tanaffusda zaxiraga oldi. Ikkinchi bo‘lim boshida Moreno standart vaziyat ijro etdi, arablar jamoasi himoyachisi Abu Ali esa to‘pni o‘z jamoasi darvozasiga kiritib yubordi. Biroz o‘tib tanaffusda Veyganing o‘rniga tushgan Maurisio murabbiy ishonchini oqladi va tanaffusda o‘yinga qo‘shilgan yana bir futbolchi Lopesni darvozabon bilan yakkama-yakka vaziyatga chiqardi, hujumchi aniq zarba berdi va amalda o‘yin taqdirini hal qildi.
Keyin Ist-Ratefordda kuchli yomg‘ir boshlandi va o‘yin favqulodda holat tufayli 40 daqiqaga to‘xtab qoldi: tomoshabinlarga stadionni tark etish va boshpana topish tavsiya etildi. Bu klublar o‘rtasidagi jahon chempionati boshlanganidan buyon uchinchi bor tabiat hodisasi tufayli o‘yin to‘xtatilishi bo‘lmoqda. O‘yin davom ettirilganida futbolchilarda o‘ynash uchun xohish ham qolmagandi va tribunalarga qaytgan muxlislar boshqa gol ko‘rishmadi.
KChJ. B guruhi. 2-tur. 19 iyun
«PSJ» — «Botafogo» 0:1
Gol: Igor Jyezus (36).
«PSJ» — Donnarumma, Hakimi, Pacho, Beraldo, Ernandes (Mendesh, 55), Mayulu (Ruis, 55), Vitinya, Zair-Emeri (Nevesh, 56), Due (Li Kan In, 79), Kvaratsxeliya, Ramush (Barkolya, 55).
«Botafago» — Viktor, Jair, Barboza, Telles (Kuyabano, 68), Gregore, Freytas, Artur (Montoro, 77), Savarino (Serxio, 68), Allan (Nyuton, 86), Igor Jyesus.
Ogohlantirishlar: Gregore (57), Kuyabano (89).
«PSJ» 2-turda «Botafogo» bilan uchrashdi. Chempionlar ligasi g‘olibi g‘alaba qozonganida 1/8 final yo‘llanmasini hal qilgan bo‘lardi. Ammo o‘yin kutilmagan ssenariyda o‘tdi.
Parijliklar ustozi Luis Enrike «Atletiko» bilan o‘yindagiga qaraganda to‘rt almashtirish amalga oshirdi. «Botafogo»ga qarshi o‘yinda Lukas Beraldo, Lukas Ernandes, Uorren Zair-Emeri va Senni Mayulu ilk daqiqalardan harakat qildi. Ammo jamoa o‘zagi o‘zgarmagandi. Va bu «PSJ» o‘yin uslubi saqlanib qolishini ta’minlardi. Ammo birinchi bo‘limda aql bovar qilmas voqealar sodir bo‘ldi. «PSJ» 2023/2024 yillar mavsumidagi o‘yinlarini yodga solib yubordi: jamoa to‘pga egalik qilish bo‘yicha ulkan ustunlikka erishdi (75 foizga 25 foiz), ammo hujumda keskinlik yuzaga keltirilmadi. O‘shanda jamoani bunday o‘yin uchun beayov tanqid qilishardi. Bu o‘yinning ilk 45 daqiqasi davomida fransuzlar atigi bir marta darvoza sohasiga to‘g‘ri borgan zarba yo‘llashdi.
«PSJ» raqibni mensimay maydonga tushgani ayon bo‘ldi. Bu esa katta xato edi. Axir «Botafogo» – Braziliyaning amaldagi chempioni va Libertadores kubogi sohibi hisoblanadi. Jamoa tarkibidagi futbolchilar ham katta tajribaga ega: Allan («Napoli»ning sobiq futbolchisi), Aleks Telles («MYu»ning sobiq futbolchisi), Igor Jyezus («Nottinghem»ning bo‘lajak futbolchisi). «Atletiko»ni osonlik bilan tor-mor etgan «PSJ» futbolchilari «Botafogo»dan bunday qarshilik kutishmagandi.
Zerikarli kechayotgan birinchi bo‘limda «Botafogo»ning goli muxlislarni uyg‘otib yubordi. Vaziyat yo‘q joydan paydo bo‘ldi: 36-daqiqada Jyefferson Savarino jarima maydoni markazidagi Igor Jyezusni to‘p bilan ta’minladi, uning zarbasi ko‘ngildagidek chiqmagandi, ammo to‘p parijliklar himoyachisi Vilyam Pachoning oyog‘iga tegib, darvoza to‘riga yo‘l oldi. Braziliyalik muxlislar golni futbolchilar bilan birga nishonlashdi.
«PSJ» futbolchilarini tanaffusda kiyim almashtirish xonasida og‘ir suhbat kutayotgandi. Jamoa 2024/2025 yillar mavsumining o‘zida to‘rtta sovrin yutdi, o‘z tarixtida ilk bor Chempionlar ligasida g‘olib chiqdi. Ammo raqibga nisbatan bunday yengil qarashga yo‘l qo‘yib bo‘lmaydi. Va parijliklar ikkinchi bo‘limga tetik holda chiqib kelishdi. Enrike kerakli so‘zlarni topa olgani ko‘rinib turardi. «PSJ» darhol oldinga tashlandi, ammo «Botafogo» bunga tayyor bo‘lib chiqdi: jamoa himoyada tartibli harakatlandi va qarshi hujumlarga tayandi.
Vaqt o‘tgan sari «PSJ» futbolchilariga bosim oshib bordi. 77-daqiqada futbolchilar suv ichib olishi uchun qisqa tanaffus berildi, bu vaqtda translatsiyada Luis Enrikeni ko‘rsatishdi. «PSJ» ustozi tashvishli ko‘rinishda har bir futbolchisining oldiga borar va kichik ko‘rsatmalar berardi.
Tanaffusdan keyin fransuzlar yana katta kuch bilan oldinga tashlandi va darvozani ishg‘ol etdi ham. Ammo gol muallifi Bredli Barkolya ofsaydda qolib ketgani ma’lum bo‘ldi. «Botafogo» futbolchilari qolgan daqiqalarda himoyada matonat bilan turishdi va g‘alabali hisobni saqlab qolishdi.
«Sietl Saunders» — «Atletiko» 1:3
Gollar: Rusnak (50) — Barrios (11, 55), Vitsel (47).
«Sietl» — Fray, Kalani (Minongu, 79), Bell, Ragen, Baker-Vayting, Roldan, Vargas, de la Vega (Kent, 60), Rusnak (Paulo, 79), Rotrok (A.Roldan, 66), Musovski (Ferreyra, 60).
«Atletiko» — Oblak, Lorente, Ximenes (Vitsel, 65), Le Norman, Galan, Simeone, Barrios, Koke (Korrea, 70), de Paul (Gallaher, 65), Syorlot (Grizmann, 65), Alvares (Molina, 82).
Ogohlantirishlar: de Paul (42), Rotrok (63), Gallaher (77).
«Atletiko» esa birinchi turdagi yirik mag‘lubiyatdan keyin tezda o‘ziga keldi va Barrios hamda Vitselning gollari evaziga mezbonlar vakilini mag‘lub etdi. Shu bilan birga, MLS vakili ochiq va hujumkor o‘yini bilan hayron qoldirib, o‘yin davomida madridliklarga qaraganda ko‘proq zarba berdi (15 ga qarshi 16).
So‘nggi tur arafasida «Botafogo» – «PSJ» va «Atletiko» bilan bir guruhda yaqqol yetakchi. Brazillar turnirdagi ilk sensatsiya muallifiga aylanishdi. 1/8 finalga chiqish uchun Rio-de-Janeyro jamoasiga endi 3-turda madridliklarga yutqazmaslik yetarli bo‘ladi, jamoani mag‘lubiyat ham keyingi bosqichga olib chiqishi mumkin.
Agar so‘nggi turda «Botafogo» «Atletiko»ga yutqazsa, «PSJ» esa «Sietl»dan ustun kelsa, uchala jamoada ham 6 tadan ochko bo‘ladi. Reglamentga ko‘ra, birinchi mezon o‘zaro o‘yinlardagi ochkolar soni bo‘ladi, keyin to‘plar nisbatiga qaraladi.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
