O‘zgidromet ma’lumotlariga ko‘ra, bugun kunduzi yog‘ingarchilik kutilmaydi. Shamol 7-12 m/s tezlikda esadi, janubda va cho‘l hududlarda 13-18 m/s gacha kuchayishi, ayrim joylarda chang-to‘zonlar bilan kuzatilishi mumkin. Harorat 34-39 daraja, shimolda, janubda va cho‘l hududlarda ba’zi joylarda 40-42 darajagacha bo‘ladi.
 
Toshkentda yog‘ingarchilik kutilmaydi. Shamol 3-8 m/s tezlikda esadi. Harorat 37-39 daraja bo‘ladi.
 
Tog‘li hududlarda yog‘ingarchilik kutilmaydi. Shamol 7-12 m/s tezlikda esadi, ba’zi joylarda 13-18 m/s gacha kuchayishi mumkin. Harorat 25-30 daraja bo‘ladi.

Source link

Hazorasp tumanida gaz xodimlarining firibgarligi fosh etildi. 

Bosh prokuratura huzuridagi Departamentning Hazorasp tumani bo‘limi tomonidan tergovga qadar tekshiruv o‘tkazilgan.

Unda «Hazorasptumangaz» gaz ta’minoti bo‘limi xodimlari M.M va E.B. (muqaddam sudlangan) o‘zaro til biriktirib, 2 500 AQSh dollari evaziga  fuqaro O.I.ga nisbatan tabiiy gazdan noqonuniy foydalanganlik holati yuzasidan hisoblangan 309 mln so‘mlik zararni kamaytirib berishlarini va’da qilib, kelishilgan puldan 1 400 AQSh dollarini firibgarlik yo‘li bilan olganliklari aniqlangan. Ushbu pullar hisobidan 4,8 mln so‘mning qaytarilishi protsessual tartibda rasmiylashtirilgan.

Mazkur holat yuzasidan Jinoyat kodeksining 168-moddasi (firibgarlik) va 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Source link

Qurilish va uy-joy kommunal xo‘jaligi vaziri o‘rinbosari Ozoda Jo‘rayeva Yaponiyaning bir qator kompaniyalari vakillari bilan uchrashuv o‘tkazdi. Unda ko‘p qavatli uylarni boshqarish tizimini rivojlantirish, xorijiy investitsiyalarni jalb qilish va zamonaviy servis xizmatlarini joriy etish masalalari muhokama qilindi.

Qayd etilishicha, yapon investorlari hozirning o‘zida Xorazm viloyatidagi qariyb 50 ta boshqaruvsiz ko‘p qavatli uyda kompleks ta’mirlash va zamonaviy boshqaruv xizmatlarini yo‘lga qo‘yish bo‘yicha ish olib bormoqda.

Shuningdek, Yaponiya kompaniyalari Toshkent shahridagi boshqaruvsiz ko‘p qavatli uylarni boshqaruvga olish, uy-joy fondini boshqarishda yapon tajribasi va zamonaviy texnologiyalarni joriy etish bo‘yicha ham o‘z takliflarini bildirdi.

Tomonlar sohada uzoq muddatli hamkorlikni rivojlantirish, yangi investitsiya loyihalarini amalga oshirish va aholiga ko‘rsatilayotgan xizmatlar sifatini xalqaro standartlar asosida oshirishga tayyor ekanini ma’lum qildi.

Source link

Oliy Majlis Qonunchilik palatasida «O‘zbekiston Respublikasining Ma’muriy javobgarlik to‘g‘risidagi kodeksiga davlat tuzilmalari xodimlarining formali kiyim-boshidan qonunga xilof ravishda foydalanish holatlarining oldini olishga qaratilgan o‘zgartirish va qo‘shimcha kiritish haqida»gi qonun loyihasi birinchi o‘qishda qabul qilindi.

Qonun tashabbuskorlarining ta’kidlashicha, davlat organlari, vazirlik va idoralar xodimlari uchun tasdiqlangan formali kiyim-bosh muayyan davlat organi vakili ekanini anglatadi, fuqarolarda ishonch uyg‘otadi hamda uni kiygan shaxs qonun bilan belgilangan vakolat va mas’uliyatga ega ekanini bildiradi. Shu bois bunday forma davlat xizmatining muhim ramzlaridan biri hisoblanadi.

Biroq keyingi yillarda ayrim tashkilotlar va shaxslar tomonidan davlat organlarining tasdiqlangan formasiga adashtirib yuborish darajasida o‘xshash kiyimlardan foydalanish yoki shunday formalarni joriy etish holatlari kuzatilayotgani qayd etildi. Bu esa fuqarolarni chalg‘itishi, davlat idoralari obro‘siga salbiy ta’sir ko‘rsatishi va ayrim shaxslarga o‘zini davlat xodimi sifatida tanishtirib, odamlar ishonchini suiiste’mol qilish imkonini berishi mumkin.

Qonun loyihasi bilan Ma’muriy javobgarlik to‘g‘risidagi kodeksga davlat organlarining tasdiqlangan harbiy yoki idoraviy formali kiyim-boshiga adashtirib yuborish darajasida o‘xshash hamda unga xos farqlovchi belgilar va yoki ramzlarga ega formali kiyim-boshni joriy etganlik yoki undan foydalanganlik uchun ma’muriy javobgarlik belgilash taklif etilmoqda.

Qayd etilishicha, mazkur normalar, avvalo, fuqarolarning huquq va manfaatlarini himoya qilish, davlat organlariga bo‘lgan ishonchni mustahkamlash hamda davlat xizmati obro‘sini muhofaza qilishga xizmat qiladi.

Source link

O‘zbekiston bo‘ylab Sanepidqo‘mita tizimida korrupsiya holatlari fosh etildi. 

Bosh prokuratura huzuridagi Departamentning Sirdaryo viloyati boshqarmasi tomonidan tezkor tadbir o‘tkazilgan.

Unda Guliston shahar Sanitariya-epidemiologik osoyishtalik va jamoat salomatligi bo‘limi shifokor yordamchisi M.A. go‘yoki yuqori lavozimlarda ishlovchi tanishlari orqali “M.M.” MChJ tomonidan tayyorlanadigan tayyor ovqat mahsulotiga ijobiy xulosa olib berishi evaziga 300 AQSh dollari va 1,2 mln so‘mni olgan vaqtida ashyoviy dalillar bilan ushlangan.

Departamentning Toyloq tumani bo‘limi va boshqa huquqni muhofaza qiluvchi organ xodimlari hamkorligida tezkor tadbir o‘tkazildi. Unda Sanitariya-Epidemiologik osoyishtalik va jamoat salomatligi qo‘mitasining Toyloq tuman bo‘limi sanitar vrachi F.B. 9 mln so‘m evaziga go‘yoki yuqori lavozimlarda ishlovchi tanishlari orqali YaTT “S.E.”ning non mahsulotlari ishlab chiqarish sexiga sanitar gigiyenik xulosasini rasmiylashtirib berishini aytib, kelishilgan puldan 400 AQSh dollarini olgan vaqtida ashyoviy dalillar bilan ushlanib, tekshiruvda muqaddam 100 AQSh dollari va 500 ming so‘mni firibgarlik yo‘li bilan qo‘lga kiritganligi aniqlangan.

Departamentning Xorazm viloyati boshqarmasi xodimlari va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda Urganch shahar sanitariya-epidemiologik osoyishtalik va jamoatchilik salomatligi bo‘limi xodimi G‘.A. fuqaro B.D.ga go‘yoki yuqori lavozimlarda ishlovchi tanishlari orqali Urganch shahrida umumiy ovqatlanish shoxobchasi ochish uchun ruxsatnoma rasmiylashtirib berishi va 6 oy davomida jarima qo‘llamaslikni va’da qilib, 2,4 mln so‘mni firibgarlik yo‘li bilan olgan vaqtida ashyoviy dalillar bilan ushlangan.

Departamentning Namangan viloyati boshqarmasi tomonidan o‘tkazilgan tezkor tadbirda Namangan shahar sanitariya-epidemiologik osoyishtalik va jamoatchilik salomatligi bo‘limi shifokor yordamchisi A.S. (muqaddam sudlangan) fuqaro M.O.ning nomiga shahar hududida nodavlat maktabgacha ta’lim muassasasini ochish uchun ijobiy xulosa olib berish evaziga 1,2 mln so‘m olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 25, 168-moddasi (firibgarlik) va 25, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

Source link