Sport
Har bir futbol klubiga 35 milliard pul. Nega?
Endilikda futbol bo‘yicha O‘zbekiston chempionati yuqori divizionida o‘ynaydigan har bir klubga davlat tomonidan 35 milliard so‘mdan pul beriladi. Ikkinchi divizion jamoalari ham davlat tomonidan moliyalashtiriladi. Xo‘sh, davlat nega ularga pul berishi kerak? Har bir klubga 35 milliard so‘m – ko‘pmi yo kam?
Qiymat emas taqsimot o‘zgaradi
Avvalo 35 milliard so‘m O‘zbekiston sharoitida juda katta pul ekanini aytish kerak. To‘g‘ri, dollarga «chaqsa», bu 2,9 million dollar atrofida pul bo‘ladi, Yevropada bir futbolchiga yiliga taxminan shuncha maosh to‘lashadi, o‘racha. Lekin O‘zbekistonda 1 milliard so‘mni Open budget’da yutish uchun butun qishloq haftalab harakat qiladi. 1 milliardga qancha yo‘llar asfalt bo‘lib ketganini ko‘ryapsiz, 35 milliardga 35 ta qishloqni ancha obod qilish mumkin. Masalan, bizning qishloqda Open budget sharofati bilan oxirgi 3-4 yilda asfalt bo‘lmagan ko‘cha qolmadi hisob. Shunday ekan 35 milliard so‘m futbol uchun kam pul degan gaplarga qo‘shilmayman.
Endi bu yangilikdagi eng muhim jihatga to‘xtalsak. O‘zbek futbolini kuzatmaydigan vatandoshlar davlat endi Open budget va boshqa foydali ishlarga ketayotgan pullarni futbolga yo‘naltiryapti deb o‘ylashi mumkin, lekin bunday emas. Hukumat shundog‘am davlat korxonalari futbolga ajratayotgan pullarni klublarga teng taqsimlashga qaror qildi.
Klublar shundog‘am davlat korxonalaridan katta pul olardi, endi davlat bu pullar adolatli taqsimlanishi kerak degan qarorga keldi. Masalan, 35 milliard amaldagi O‘zbekiston chempioni «Neftchi» bir yilda oladigan pulning 20-25 foiziga teng. Katta klublar davlat korxonalaridan qanchalik katta pul olib yurganini tasavvur qilavering.
Endi futbolga pul berib yurgan davlat korxonalari pulni bir yerga tashlaydi va bu pul klublarga teng taqsimlanadi, xuddi arab davlatlarida bo‘lgani kabi. Shuningdek, klublar eplasa xususiy korxonalar bilan hamkorlik o‘rnatishi mumkin. Kim ko‘proq homiy jalb qilsa, o‘shaning puli ko‘proq bo‘ladi.
Bu qarorni davlat futbolga katta pul sarflaydi deb talqin qilish kerak emas. Aksincha, endi davlat futbolga avvalgidan kamroq pul ajratadi. Yuqori divizion jamoalari bu yil 35 milliard, kelasi yil 30 milliard va 2028 yil 25 milliarddan oladi. Keyinchalik katta ehtimol to‘lov butkul to‘xtatiladi. Klublar shu uch yil ichida xususiylashib olishi kerak.
Muammo nimada?
Shu o‘rinda savol paydo bo‘ladi: klublar xususiylashishiga nima xalaqit beryapti, Yevropada klublar xususiy qo‘llarda va ular qaytaga juda boy-ku?! Bizda uzoq yil klublar mahalliy hokimliklar qoshida bo‘lib keldi. Qaysi hokim futbolga qiziqsa, o‘sha viloyat jamoasi zo‘r bo‘ladi. Xayrulla Bozorov Namanganda hokim bo‘lganida «Navbahor» kuchli edi, Bozorov Farg‘onaga keldi va «Neftchi» chempion bo‘ldi. Ishoning, bu hokim Qoraqalpog‘istonga borsa, «Orol»ni ham chempion qiladi, chunki futbol uchun pul topib berishni biladi.
Lekin futbol bunaqa hokimiyatga, davlat puliga bog‘liq bo‘lib qolmasligi kerak, bunaqada rivojlanish bo‘lmaydi. Hokim kayfiyati yaxshiligida qopda pul ko‘tarib keladi, kayfiyati bo‘lmasa – pul yo‘q! Bunaqasi ketmaydi. Klublar hokimliklarga aloqador bo‘lmasligi, o‘z kunini ko‘rishga imkon berilishi kerak.
Masalan, bizning shahar bosh jamoasi «Dinamo» uzoq yillardan buyon xususiy tadbirkor tomonidan moliyalashtiriladi, lekin klub rasman hokimlikka tegishli. Stadion ham o‘ziga tegishli emas. Samarqanddagi o‘yinlarga minglab odamlar chipta sotib olib kiradi, lekin klub chipta savdosidan bir so‘m ham olmaydi. O‘zining nomidagi stadionda futbol o‘ynash, mashg‘ulot o‘tkazish uchun ijara puli to‘laydi. Pul ishlash uchun hech qanday imkon bo‘lmagan klubga qaysi tadbirkor pul tikkisi keladi?
Menimcha, xususiylashtirish jarayonida stadionlar klublarga qoldirilishi kerak. Faqat stadion sifatida foydalanish sharti bilan, albatta. Klublar xususiylashishi uchun sharoit, infratuzilma bo‘lishi kerak. Hech narsasi yo‘q klubga birov homiylik qilmaydi.
Futbolimiz to‘liq xususiylashgan, davlat puliga qarab qolmagan kunlarni juda ko‘rgim keladi. Ishoning, futbolimiz darajasi ko‘pchilik o‘ylaganidan ancha baland, tadbirkorlar ham futbolga pul tikishni istaydi, faqat bu uchun sharoit kerak.
Albatta, futbolga pul tikkanlar birdaniga boyib ketmaydi, bu ishda tavakkal katta. Lekin omadi kelib klubdan yaxshi futbolchi chiqib qolsa, jamoaga foyda kela boshlaydi. «Manchester Siti» 45 million yevroga sotib olgan, hozir 100 millionga ham sotmaydigan Abduqodir Husanov ham «Bunyodkor»dan chiqqan (keyinchalik asosiy jamoaga olinmagan bo‘lsa ham).
Bundan tashqari, jamoa chiroyli futbol o‘ynab tursa, chiptadan, stadion atrofidagi fan-shop, oziq-ovqat do‘konlari, oshxonalardan ham pul ishlash mumkin. Ko‘p emas, albatta, lekin qachon hokim pul berarkin deb qarab o‘tirgandan yaxshiroq.
Davlat korxonalari pul berishni to‘xtatgach, futbolimiz, albatta, qiynaladi, 2-3 yil murakkab davrni boshdan kechiradi. Lekin keyinchalik futbol xususiy qo‘llarga o‘tgach, barchasi hozirgidan ham yaxshi bo‘lishiga ishonaman. Xususiy futbol foyda keltiradigan bo‘ladi, maoshlar kechikmaydi, klublar mashg‘ulot uchun maktablarning stadioniga sarson bo‘lib bormaydi. O‘shanda futbol davlatga foyda keltira boshlaydi. Menimcha, davlat futbolni xususiylashtirish yo‘lida muhim qadam tashladi.
Jahon chempionatidagi mojaroga qaramay, 200 dan ortiq mamlakat FIFA prezidenti Infantinoning qayta saylanishini qo‘llab-quvvatlashga tayyorligi ta’kidlanmoqda.
Foto: Theo Wargo/Getty Images
200 dan ortiq milliy futbol assotsiatsiyasi Janni Infantinoning Xalqaro futbol federatsiyasi (FIFA) prezidenti lavozimiga qayta saylanishini qo‘llab-quvvatlamoqda. Bu haqda The Guardian gazetasi xabar berdi.
Infantino ushbu lavozimni 2016 yildan beri egallab kelmoqda. U ikki marta muqobilsiz asosda qayta saylangan. Aprel oyida FIFA rahbari to‘rtinchi muddatga o‘z nomzodini qo‘yishni rejalashtirayotganini ma’lum qilgan edi. Saylov 2027 yil 18 mart kuni Marokashda bo‘lib o‘tadi. Nomzodlar 18 noyabrgacha ko‘rsatilishi kerak.
FIFAga a’zo assotsiatsiyalar yaqinda yuz bergan mojaroga qaramay, Janni Infantinoni qo‘llab-quvvatlashini bildirdilar. AQSh va Belgiya milliy jamoalari o‘rtasidagi jahon chempionati 1/8 final o‘yini oldidan FIFA intizom qo‘mitasi Donald Trampning qo‘ng‘irog‘idan so‘ng, amerikalik hujumchi Folarin Balogunning diskvalifikatsiyasini to‘xtatib turgan.
Hodisadan so‘ng jurnalist Romen Molina Yevropa futbol assotsiatsiyalari ittifoqi (UYeFA) Janni Infantinoga qarshi nomzod ko‘rsatish ustida ishlayotganini yozdi. The Guardian ma’lumotlariga ko‘ra, FIFA 211 a’zosidan faqat bir nechtasi, jumladan, Germaniya futbol ittifoqi amaldagi prezidentni qo‘llab-quvvatlash uchun xat yubormagan. Gazeta materialida ta’kidlanishicha, «Infantino aksariyat ovozlarni qo‘lga kiritish uchun Yevropaning qo‘llab-quvvatlashiga muhtoj emas va har qanday holatda ham qit’aning katta qismi uning qayta saylanishini tasdiqlagan».
Sloveniyalik arbitr Slavko Vinchich futbol bo‘yicha Jahon chempionati final o‘yini bosh hakami etib tayinlandi. Bu haqda Xalqaro futbol federatsiyasi (FIFA) matbuot xizmati xabar berdi.
Slavko Vinchich Foto: Erin Chang/ISI Photos / Contributor / ISI Photos
Turnirning hal qiluvchi bahsi 19 iyul kuni Argentina va Ispaniya milliy jamoalari o‘rtasida bo‘lib o‘tadi. O‘yin Toshkent vaqti bilan 20 iyul kuni soat 00:00 da boshlanadi. Vinchichga maydonda uning hamyurtlari Tomaj Klanchnik va Andraj Kovachich yordam beradi. Iordaniyalik Adham Mahadma o‘yinning zaxira hakami, uning yordamchisi etib esa shu mamlakat vakili Muhammad al-Kalaf tayinlandi.
Vinchich 46 yoshda, u 2010 yildan beri FIFA toifasidagi hakam hisoblanadi. 2024 yilda sloveniyalik arbitr Chempionlar Ligasi finalini boshqargan, joriy Jahon chempionatida esa uchta o‘yinda ishladi (Braziliya – Marokash 1:1, Iordaniya – Jazoir 1:2, Meksika – Ekvador 2:0).
Meksika va Ekvador milliy jamoalari o‘rtasidagi 1/16 final o‘yinida Vinchich ekvadorlik himoyachi Pero Inkapieni maydondan chetlatdi — futbolchi raqibi bilan gaplashayotganda og‘zini qo‘li bilan to‘sib olgan edi. Yangi qoidalarga ko‘ra, bu taqiqlangan.
Braziliya futboli afsonasi Pele 1958 yilgi jahon chempionati finalida kiygan mashhur futbolka Nyu-Yorkda o‘tkazilgan Sothebyʼs auksionida 4,88 million dollar (taxminan 4,3 million yevro)ga sotildi. Bu futbolka auksionlar tarixida eng qimmat narxda sotilgan sport liboslari orasida ikkinchi o‘rinni egalladi.
Sothebyʼs auksion uyi ma’lumotiga ko‘ra, gap 1958 yil Shvetsiyada bo‘lib o‘tgan Jahon chempionati finalida Pele kiygan Braziliya terma jamoasining ko‘k rangli, orqa qismida 10-raqam tushirilgan futbolkasi haqida ketmoqda.
O‘sha paytda atigi 17 yoshda bo‘lgan Pele (Edson Arantis du Nasimentu) o‘zining ilk jahon chempionatida ishtirok etgan va aynan shu musobaqada Braziliyani tarixidagi ilk jahon chempionligiga olib chiqqan.
Auksion uyining ta’kidlashicha, musobaqadan keyin Pele mazkur futbolkani jamoadoshi Dida (Edvaldo Alves de Santa Roza)ga sovg‘a qilgan. Dida chempionatning dastlabki o‘yinlarida 10-raqamli futbolkani o‘zi kiyib maydonga tushgan. Biroq guruh bosqichining uchinchi turida SSSR terma jamoasiga qarshi bahsda Pele gol urgach va asosiy tarkibdan mustahkam o‘rin olgach, texnik xatolik tufayli aynan shu raqamli futbolka unga berib yuborilgan. Keyingi barcha uchrashuvlarda Pele shu libosda maydonga tushgan.
Ma’lum qilinishicha, Pele va Dida jahon chempionati davomida bir xonada yashagan. Musobaqadan keyin Dida futbolkani oilasiga topshirgan. Keyinchalik, 1993 yilda u tug‘ilgan shahri Maseyodagi Sport muzeyiga berilgan. Muzey esa 2004 yilda ushbu futbolkani Christieʼs auksioni orqali sotgan. Shundan beri u xususiy kolleksiyada saqlanib kelgan. Yangi xaridorning shaxsi esa oshkor etilmagan.
1958 yilgi jahon chempionatida Braziliyaning ko‘k rangli formada o‘ynashi ham qiziq voqealardan biri hisoblanadi. Musobaqa mezboni Shvetsiya terma jamoasi ham sariq rangli libosda maydonga tushgani uchun tashkilotchilar braziliyaliklardan an’anaviy sariq formasidan voz kechishni talab qilgan. Shu bois Braziliya futbolchilari ko‘k futbolkada o‘ynashga qaror qilgan.
Qolaversa, o‘sha davrda forma tayyorlash jarayoni ham bugungidan ancha farq qilgan. Futbolchilar Braziliya futbol konfederatsiyasi emblemasi va raqamlarni futbolkalarga o‘zlari tikkan. Raqamlar uchun ishlatilgan sariq mato esa sport anjomlari tashilgan qoplardan kesib olingan.
Sotilgan aynan shu futbolkada Pele Shvetsiyaga qarshi final bahsini to‘liq o‘tkazgan va ikki gol muallifiga aylangan. O‘sha uchrashuvda Braziliya 5:2 hisobida g‘alaba qozonib, o‘z tarixida ilk bor jahon chempioni bo‘lgan.
Auksion uyi ma’lum qilishicha, mazkur futbolkaning haqiqiyligi Didadan tashqari o‘sha chempion jamoaning yana uch nafar a’zosi — Nilton Santos, Orlando Pekanya va Mario Zagallo tomonidan ham tasdiqlangan.
Ayni paytda Pelening mazkur futbolkasi auksionlar tarixida eng qimmat narxda sotilgan ikkinchi futbolka hisoblanadi. Birinchi o‘rin esa Argentina afsonasi Diyego Maradonaning 1986 yilgi jahon chempionati chorak finalida Angliya darvozasiga mashhur golini urgan o‘yinda kiygan futbolkasiga tegishli. U 2022 yilda Sothebyʼs auksionida 8,1 million yevrodan ortiq mablag‘ga sotilgan.
Futbol — bu shunchaki raqamlar o‘yini emas, balki intellektual kurash maydoni. Yevropa chempionati doirasida Ispaniya va Fransiya terma jamoalari o‘rtasidagi to‘qnashuv aynan shu haqiqatni yana bir bor isbotladi. Luis de la Fuente shogirdlari o‘z uslubiga sodiq qolgan holda, Fransiya terma jamoasiga chinakam futbol sabog‘ini berib qo‘ydi.
Ispaniya terma jamoasi ushbu uchrashuvda o‘zining klassik tizimini namoyish etdi. Ular har qanday ortiqcha harakatlardan tiyilib, «tejamkor rejim»da harakatlanishdi. Ammo bu tejamkorlik sustlik emas, balki yuqori darajadagi nazorat edi. 2:0 hisobi o‘yin davomida kuzatilgan ustunlikning mantiqiy natijasi bo‘ldi.
Fransiya uchun eng alamlisi shunda bo‘ldiki, bosh murabbiy Dide Deshamda o‘yinni qutqarib qolish uchun birorta ham muqobil ssenariy — «B» rejasi mavjud emas edi. Ispanlar Fransiyaning barcha taktik yurishlarini xuddi ochiq kitob kabi o‘qib, ularni oldindan sezishdi. Natijada, fransiyaliklarning har bir hujumga urinishi ispan himoya chizig‘ining tizimli qarshiligiga duch keldi va yo‘qqa chiqarildi. Deshamning bugungi qotib qolgan taktikasi raqiblarning ishini haddan tashqari osonlashtirib yubordi.
Hozirgi holatda butun dunyo futbol jamoatchiligining nigohi endi Janubiy Amerika vakillariga qaratilgan, ular juda puxta tayyorgarlik ko‘rishlariga to‘g‘ri keladi. Chunki Ispaniya nafaqat natija, balki futbolning kelajagi qay tomonga qarab ketayotganini ko‘rsatib qo‘ydi.
Sizningcha, hozirgi Ispaniya terma jamoasining o‘yin uslubini sindirish uchun raqib jamoalar qanday taktikalarni qo‘llashi kerak?
Sport
«Nima desa, deyaverishsin». Messi heyterlarga javob qaytardi va g‘alabani Maradonaga bag‘ishladi
G‘alaba golini urgan Lautaro Martines esa yig‘lab yubordi.
JCh-2026 yarimfinalida Argentina va Angliya o‘rtasida kechgan uchrashuv (2:1) kutilganidek kechdi: hissiyotli, keskin, ziddiyatlarga boy va dramatik yakun. Jamoalar birinchi bo‘limda haqiqiy qirg‘inbarot uyushtirishdi, ikkinchi bo‘limga kelibgina futbol o‘ynay boshlashdi. Va unda «Albiselesta»ning qo‘li baland keldi: janubiy amerikaliklar birinchi bo‘lib gol o‘tkazib yuborganiga qaramay, o‘yin oxirida qo‘shimcha kuch topa olishdi va britaniyaliklar «o‘rnatgan avtobus»ni buzib o‘tishdi.
O‘yin hakam hushtagi chalinganidan keyin ham «yondi»: Janubiy Amerika vakillari bu g‘alabani Folklend urushini yodga soluvchi provokatsion plakat bilan nishonlashdi, Angliya milliy jamoasi yarimhimoyachisi Jud Bellinghem esa hissiyotlarini jilovlay olmadi va raqib futbolchisi Valentin Barkoning boshiga urib qoldi, g‘alaba goli muallifi Lautaro Martines intervyu vaqtida yig‘lab yubordi, himoyachi Kristian Romero esa sobiq ingliz futbolchisi Gari Nevillning tanqidiga javob qaytardi.
«Chinakam telbalik»
Ikki golli uzatmasi bilan Argentinaning navbatdagi kambekining asosiy ijodkori bo‘lgan Lionel Messi o‘yindan keyin jurnalistlar bilan gaplashdi va o‘z manziliga bildirilayotgan nafratli so‘zlarga javob qaytardi.
«Kim nima desa deyaversin. Biz kurashamiz, raqobatlashamiz va futbol o‘ynashni bilamiz. Bugun hisobda ortda qolayotgan bo‘lsak ham, Angliyaga qarshi o‘yinni to‘liq nazorat qildik. Biz bu maqomga o‘z mehnatimiz bilan erishdik. Hech kim bizga hech narsani shunchaki berib qo‘ymaydi», – deya argentinaliklar sardorining so‘zlarini keltiradi insayder Fabritsio Romano.
Messi ushbu o‘yin argentinaliklar uchun prinsipial ahamiyatga ega bo‘lganini tan olgan.
«Madhiya ijro etilayotgan vaqtdayoq bizda o‘zgacha tuyg‘ular bor edi. Birortamiz mag‘lubiyatga rozi bo‘la olmasdik, Argentina xalqi ham bu g‘alabani qattiq kutayotgandi – barcha Angliyani mag‘lub etish orzusida edi.
Finalga chiqishmi? Bunday o‘yinlarning har biri alohida o‘zgacha. Bu hissiyotlarni yana bir bor boshdan kechirish – aql bovar qilmas hodisa. O‘ylaymanki, bizning jamoa erishgan narsa – chinakam telbalik: qatorasiga ikki jahon chempionati finali.
Ochig‘ini aytsam, jahon chempionati boshlanishidan oldin biz kuchli to‘rtlikka kirishimiz, chempionlik uchun kurashishimizga ishonchim komil edi. Bu natija meni ajablantirmaydi, chunki nimalarga qodirligimizni bilaman. Muammolarimiz bor edi, lekin jamoamiz yig‘ilib, birlashsa, har qanday qiyin vaziyatdan chiqib keta oladi. Biz bir-birimizni qo‘llab-quvvatlaymiz», – deya forvardning so‘zlarini keltiradi TyC Spors.
U Angliya ustidan qozonilgan g‘alabani argentinalik boshqa bir afsonaviy futbolchi – Diyego Maradonaga bag‘ishlagan.
«Ishonchim komilki, u hozir yuqorida bu lahzadan zavqlanyapti. Bu uning ham g‘alabasi. Unga quvonch hadya eta olganimizdan baxtiyorman va umid qilamanki, u o‘sha yerda buni o‘zi xohlagandek nishonlaydi va bundan zavq oladi», – deya Messidan iqtibos keltiradi Romano.
Endi Argentinani mundialning hal qiluvchi o‘yini kutmoqda. Leo finaldagi bo‘lajak raqib – Ispaniya milliy jamoasi haqida ham fikr bildirgan.
«Bu ajoyib futbolchilar va o‘z o‘yin uslubiga ega ajoyib jamoa. Ispanlarning ko‘pchiligini yaxshi bilaman, ularni diqqat bilan kuzatib boraman. Bizni juda keskin va o‘ziga xos o‘yin kutmoqda», – deya qayd etgan futbolchi.
Bellinghem – Messi bilan bahsi haqida
O‘yin vaqtida Leo va Jud Bellinghem o‘zaro bahslashib ketdi – ularning tortishuvi translatsiyaga tushib qolgan. Ammo o‘yindan keyin «Uch sherlar» futbolchisi haroratni pasaytirdi.
«Messi bilan hech qanday muammo yo‘q. Biz u bilan rikoshetni muhokama qildik, aslida u yerda hech qanday yomon ish bo‘lgani yo‘q. Kimdir pashshadan fil yasamasligi kerak, u yerda hech nima bo‘lmadi. Men uchun Leoga qarshi o‘ynash jozibali», – deya Bellinhemning so‘zlarini keltirgan Romano.
Shu bilan birga Jud o‘zi ishtirokidagi boshqa bir epizod yuzasidan izoh bermagan – u o‘yindan keyin raqiblar o‘z oldida g‘alabani nishonlayotganida ulardan biri Valentin Barkoning boshiga urgandi. Hozircha futbolchidan rasmiy izoh yo‘q, OAV esa bu borada o‘z versiyasini taqdim etmoqda.
Kadrdan ko‘rish mumkinki, katta ehtimol bilan, ingliz futbolchisi janubiy amerikaliklardan o‘ziga yoqmaydigan so‘z eshitgan va shundan keyin o‘zini tiya olmagan: u Barkoga ortdan yaqinlashadi va uning boshiga ortdan shapaloq tushiradi. Bungacha Valentinning yo‘li Bellinghem bilan tutashmagan – u butun o‘yin davomida zaxira o‘rindig‘ida qolgandi.
Angliya milliy jamoasi sobiq darvozaboni Pol Robinson esa BBC efirida Barko Enso Fernandesning golini inglizlar zaxira o‘rindig‘i qarshisiga kelib nishonlagan holda provokatsiya qilganini aytib o‘tdi.
«Umid qilamanki, men bunday ahmoq bo‘lib qolmayman»
O‘yinda boshqa bahsli vaziyatlar ham bo‘ldi. Argentinaliklar g‘alabani nishonlash chog‘ida Malvin orollari (Argentina va Angliya o‘rtasidagi hududiy bahs predmeti bo‘lgan Folklend orollarining mahalliy nomlanishi) haqidagi banner bilan e’tiborni o‘ziga qaratishdi. O‘yindan keyin janubiy amerikaliklar inglizlarga «zarba berish»da davom etishdi. Masalan, Leandro Paredes jurnalistlar bilan muloqot chog‘ida shunday degan: «Orollar doim Argentinaniki bo‘ladi».
Himoyachi Kristian Romero esa Angliya milliy jamoasi sobiq futbolchisi, teleekspert Gari Nevillga javob qaytardi: o‘yindan oldin u argentinaliklar mudofaa chizig‘ini tanqid qilgandi.
«Umid qilamanki, kareramni yakunlaganimda, faqat o‘yinchilarning harakatlaridan kamchilik qidiradigan ahmoq odamga aylanib qolmayman. Biz tarix yaratmoqdamiz va milliy jamoa a’zosi ekanimizdan faxrlanamiz», – degan «Tottenhem» himoyachisi.
«Bu jamoa qiyinchilikka uchraganda yaxshiroq o‘ynaydi»
O‘yindan keyingi eng hissiyotli pallalar g‘alaba goli muallifi Lautaro Martinesning intervyusi bo‘ldi. U ko‘z yoshlarini tiyib tura olmadi.
«Otam menga birinchi butsani olib berganidan beri bu golni orzu qilardim. Bu onam uchun atalgan gol. U uydan ketgan kunimdan beri har doim yotog‘imni tayyorlardi va meni kutishda davom etardi. Bu gol men uchun finalga chiqishdan ham muhimroq», – degan forvard.
Argentina milliy jamoasi bosh murabbiyi Lionel Skaloni yana bir bor o‘z shogirdlaridagi xarakterni e’tirof etdi.
«Bizda ajoyib jamoa bor. Bugun zaxira o‘rindig‘idan maydonga tushganlar, muhim rol o‘ynashdi. Futbolda, hayotda bo‘lgani kabi, oxirigacha boringni berishing kerak. Bu jamoa qiyinchilikka duch kelganida, yaxshiroq o‘ynaydi.
Agar Enso Fernandes to‘g‘ri zarba bera olmaganida, biz yettita golli vaziyat yaratib ham 0:1 hisobida yutqazgan bo‘lardik. Biz oxirigacha taslim bo‘lmadik. Biz g‘alaba qozonganimiz uchungina emas, turli vaziyatlardan chiqib keta olganimiz uchun muvaffaqiyatlimiz. O‘ylaymanki, haqli ravishda g‘alaba qozondik. Biz keyingi sinovga tayyormiz», – degan Skaloni Argentina futbol assotsiatsiyasi saytiga.
«Argentina bejiz amaldagi chempion emasligini isbotladi»
Angliya lageridagilar, tabiiyki, butunlay boshqacha kayfiyatda. Jamoa hujumchisi va sardori Harri Keyn g‘alaba qo‘ldan boy berilganidan qattiq ranjigan.
«Yigitlar uchun, butun jamoa uchun juda og‘ir va alamli. Uchrashuvning katta qismida biz yaxshiroq harakat qildik. Ustunlikni saqlab qolishga urindik, ammo jahon chempionati yarimfinalida bu yetarli emas. Hujum ketidan hujum qilishdi va biz o‘yindagi nazoratni qaytarib ololmadik. Ozgina yetishmay qolganida, bu juda og‘riqli bo‘ladi», – degan inglizlar jamoasi sardori BBC uchun intervyusida.
Jamoa himoyachisi Den Byorn ham shunga o‘xshash fikr bildirgan.
«Jahon chempionati finaliga atigi 10-15 daqiqa qolganda, keyin yetib bora olmay qolsang, bu juda og‘riqli. Hamjihatligimiz bizni uzoqqa olib keldi va to‘g‘risini aytsam, biz buni uddalaymiz deb o‘ylagandim. Vaqtimiz kelgandek tuyulgandi. Ammo Argentina bejiz amaldagi jahon chempioni emasligini ko‘rsatib qo‘ydi», – degan Byorn Sky Spors telekanaliga.
Angliya milliy jamoasi bosh murabbiyi Tomas Tuxelning intervyusi esa eng shov-shuvlisi bo‘ldi. Ushbu germaniyalik mutaxassisga o‘yindan so‘ng muxlislar va ekspertlarda ko‘plab savollar to‘plangandi, u esa o‘z xatolarini tan olishdan bosh tortdi va mag‘lubiyat bilan yakunlangan yarimfinal o‘yinini Angliyaning ushbu jahon chempionatidagi eng yaxshi o‘yinlaridan biri deb atadi.
«Bizda afsuslanish yo‘q. Muammo tarkibda emasdi. O‘yinning borishi butunlay o‘zgardi, lekin nima uchun buni muhokama qilishayotganini tushunaman. Mendan yaxshiroq bilaman deb o‘ylaydigan millionlab murabbiylar bor. Men ular bilan hamma narsani muhokama qilishim mumkin edi, lekin qarorni o‘zim qabul qilishim kerak», – deya qayd etgan mutaxassis.
Prezident kuz-qish oldidan energetika muammolarini hal etishni topshirdi
O‘zbekistonda chetdan xomashyo olib keladigan yangi kompaniya tuzilib, unga 200 mln dollar ajratiladi
MyGov saytini soxtalashtirib, odamlardan 1 mlrd so‘m o‘g‘irlagan jinoiy guruh ushlandi
-
Siyosat4 days ago
Prezident Shavkat Mirziyoyev Qatar amiriga ta’ziya bildirdi
-
Jamiyat5 days agoToshkent metrosiga yana 3 ta zamonaviy poyezd qo‘shildi
-
Sport5 days agoIspaniyada Fransiya milliy jamoasi haqidagi bayonot ortidan siyosiy mojaro avj oldi
-
Iqtisodiyot4 days ago
Andijonda Belarus texnologiyasi asosida qishloq xo‘jaligi texnikalari ishlab chiqariladi
-
Dunyodan3 days agoMahmud Ahmadinejod atrofidagi sirli o’yin: “Mossad bilan hamkorlik”
-
Dunyodan4 days ago
Anqarada NATO sammiti boshlandi
-
Iqtisodiyot4 days agotadbirkor va davlat organlari o‘rtasida huquqiy bahs yuzaga keldi
-
Iqtisodiyot2 days agoMarkaziy bank huzurida Islomiy moliya kengashi tashkil etildi