Sport
Gvardiola «Siti»dan ketmoqda
Uning o‘rnini kim egallashi ham ma’lum.
Foto: Gettyimages/Stu Forster
Ispaniyalik mutaxassis Xosep Gvardiola mavsum yakunida «Manchester Siti»ni tark etadi. APLning 38-turida «Aston Villa»ga qarshi kechadigan uchrashuv uning Manchesterdagi so‘nggi o‘yini bo‘lib qoladi.
Hammasi hal bo‘lgan
«Manchester Siti» muxlislarini karaxt holatga tushirgan dastlabki xabarni Daily Mail tarqatdi. Nashrning sport bo‘limi muharriri Oliver Holt Gvardiola mavsum yakunida «Siti»ni tark etishi va yakshanba kuniga xayrlashuv marosimi rejalashtirilganini xabar qildi.
Ko‘p o‘tmay ushbu ma’lumot BBC nashrida paydo bo‘ldi. Shunda ham ko‘pchilik bunga ishonmayotgandi – keyin futbol xabarlari bo‘yicha eng ishonchlisi hisoblangan The Athletic nashri jurnalisti Devid Ornshteyn ham bu ma’lumotni tasdiqladi. Hozircha klub yoki Gvardiolaning o‘zi tomonidan rasman e’lon qilinmagan bo‘lsa-da, endi uning ketishiga hech kimda shubha qolmadi.
Insayderlarga ko‘ra, klubdagilar allaqachon Gvardiolaning ketishini muqarrar voqea sifatida qabul qilib bo‘lishgan. Go‘yoki «Siti» rahbariyati homiylar va hamkorlarni Pep yaqin vaqtlar ichida klubdan ketishini rasman e’lon qilishi haqida xabardor qilgan.
Ayrim manbalar Gvardiolaning o‘zi bu ma’lumotni shu vaqtgacha futbolchilardan ham sir saqlab kelgani, dushanba kuni xabar tarqalib ketganidan keyin jamoani yig‘ib, ulardan buni oldinroq aytmagani uchun uzr so‘ragani va ketishini tasdiqlaganini xabar qilmoqda.
«Shaharliklar» bugun tunda APLning 37-turi doirasida safarda «Bornmut»ga qarshi maydonga tushadi. Agar ushbu uchrashuvdan g‘alaba bilan qaytadigan bo‘lsa, jamoada chempionlik uchun imkoniyat saqlanib qoladi. Durang natija ham ayni vaqtda turnir jadvalida 5 ochkolik farq bilan peshqadamlik qilayotgan «Arsenal»ni muddatidan oldin chempionga aylantiradi.
38-tur doirasida «Aston Villa»ga qarshi o‘yin esa «Etihad»da bo‘lib o‘tadi va bu uchrashuv ispaniyalik mutaxassisning jamoa boshqaruvidagi so‘nggi o‘yini bo‘lib qoladi. Agar oxirgi turda «Arsenal» ochko yo‘qotsa va «Siti» bugun va oxirgi turda g‘alaba qozonsa, Gvardiola ketayotganida ham yana bir bor chempionlikka erishishi mumkin bo‘ladi.
Bu ro‘y bermagan taqdirda ham Gvardiola mavsumni sovrinsiz yakunlamayapti. Jamoa bu mavsumda allaqachon Angliya ligasi kubogi va Angliya kubogini qo‘lga kiritgan.
Umuman olganda, Pep jamoadagi 10 yili mobaynida ko‘plab sovrinlarga ega chiqqan.
Mashaqqatli yo‘l
Gvardiola jamoaga 2016 yilda, «Bavariya»dagi bahsli tajribadan keyin kelgandi. Birinchi mavsumini u APLga moslashishga va himoya chizig‘idagi muammolarni bartaraf etishga sarfladi. Ikkinchi mavsumida esa barchasi o‘xshadi – «Siti» Gvardiola bilan «sovrinlarni supurib olish»ga kirishdi. 10 yil ichida Pep 6 bor Angliya chempioniga aylandi, shundan to‘rttasi qatorasiga chempionlik bo‘ldi (shu vaqtgacha faqat uch marta chempionlikni raqiblarga boy berdi – birinchi mavsumda «Chelsi» chempion bo‘lgandi, keyin «Liverpul» Klopp va Arne Slot boshqaruvida bir martadan birinchi bo‘ldi. Bu mavsumda esa oltin medallar «Arsenal»ga ketishi mumkin).
YeChLda esa barchasi qiyin kechdi. Ispaniyalik murabbiy jamoasi asosiy yevrokubokni yettinchi urinishda zabt etdi. 2022/23 yillar mavsumi finalida Pep shogirdlari «Inter»ni mag‘lub etdi (1:0).
Undan ikki yil oldin ham jamoa finalga chiqqandi, ammo o‘shanda «shaharliklar» «Chelsi»ga yutqazishgandi (0:1).
Shuningdek, uning hisobida 5 ta Angliya ligasi kubogi, 3 tadan Angliya Kubogi va Angliya Superkubogi bor. Bundan tashqari, «Siti» Gvardiola rahbarligida UYeFA Superkubogi va klublar o‘rtasidagi jahon chempionatida g‘olib chiqqan. Gvardiola tufayli «Siti» ikki marta treblga (biri milliy miqyosda) erishgan.
● Pep – Angliya chempioni unvonini qatorasiga to‘rt bor qo‘lga kiritgan yagona murabbiy (2020-21 – 2023-24).
● Faqat u APLda jamoasi bilan bir mavsumda (2017/18) 100 ochko qo‘lga kiritgan.
● 2017/18 yillar mavsumida uning boshqaruvida «Siti» APL uchun rekord darajadagi 106 ta gol urgan.
● Gvardiola APLda 29 ta o‘yinda kamida 5 ta to‘p farqi bilan g‘alaba qozongan, bunday ko‘rsatkich faqat Aleks Fergyusonda bor.
● Gvardiola har o‘yinda qo‘lga kiritilgan o‘rtacha ochko (2,29) va o‘yinlarining eng ko‘p qismini g‘alaba bilan yakunlash (71,2 foiz) bo‘yicha APL tarixidagi eng yaxshi ko‘rsatkichga ega.
Uning o‘rniga keladigan murabbiylarga endi shu planka bo‘yicha baho beriladi. Uning natijalarini takrorlash esa endi deyarli imkonsiz.
Keyingisi kim?
Italiyalik jurnalist Alfredo Pedulla birinchi bo‘lib Enso Mareska Pepning o‘rnini egallashi haqida xabar tarqatdi. Mavsum yarmida «Chelsi» bosh murabbiyligidan iste’foga chiqarilgan ushbu mutaxassis shu kunlarda yangi bosh murabbiy qidirayotgan «Napoli»ning taklifini rad etgandi.
Keyinroq The Athletic aynan Mareska «Siti»ning keyingi bosh murabbiyi bo‘lishini e’lon qildi. Tomonlar allaqachon uch yillik shartnoma bo‘yicha kelishib olgani aytilmoqda.
Enso o‘z vaqtida Pep shtabida ishlagandi va undan ko‘p narsa o‘rgangani tayin. Ayrim xabarlarda Pepning o‘zi o‘rniga aynan uni tavsiya qilgani aytilmqoda.
Daily Mail nashri Pepning boshqa bir shogirdi, hozirda «Bavariya»ni boshqarayotgan Vensan Kompani ham nomzodlar qatorida ekanini xabar qilgan. Ammo belgiyalik mutaxassisning nemislar klubi bilan shartnomasi bor va uning Angliyaga qaytishi ehtimoli juda kam.
Bu ro‘y berishi kerak edi.
Yigirma ikki yillik kutish, olti yillik tayyorgarlik: nihoyat Premiyer-liga g‘olibligi yana «Arsenal»ga qaytdi. «Sport-Ekspress» jurnalisti Ruslan Nepushkin «Arsenal» bosh murabbiyi Mikel Arteta nihoyat chempionlikka erishish uchun nimalarga e’tibor qaratgani haqida yozdi.
Zerikarli, quruq, avtobus, haramfutbol – «Arsenal» o‘yinlari haqida boshqa klub muxlislari shunday so‘zlar aytib kelishdi. Ha, Mikel Arteta oltin medallar uchun chiroyli o‘yindan voz kechdi. U romantik futbolni bir chetga surib, surbetlik, hisob-kitob va shafqatsizlikni targ‘ib qildi. Chunki Mikel shuni tushunib yetgandi: luzer qolipini buzish va doimo kulgi bo‘ladigan jamoa bilan muvaffaqiyatga erishish uchun hammaga yoqishni bas qilish va mayda detallarga e’tibor qaratish kerak.
Temir intizom
Hissiy beqarorlik ancha vaqt davomida «Arsenal»ning tashrif qog‘ozi bo‘lib kelgandi. Ahmoqona chetlatilishlar, hakamlar bilan bahslashuvlar, tajovuzkor harakatlar – bularning barchasi o‘tgan yillarda jamoani muhim ochkolardan quruq qoldirgan. Bu mavsumda esa muxlislar o‘ta tartibli jamoaga guvoh bo‘lishdi: hech kim jahl qilib to‘pni tepib yubormadi, futbolchilar maydonda raqiblarning provokatsiyalariga uchmadi va qo‘pol podkatlardan o‘zini tiydi. Buni raqamlarda ham ko‘rish mumkin – futbolchilarga 37 tur davomida birorta qizil kartochka ko‘rsatilmadi, jamoa sariq kartochkalar soni kamligi bo‘yicha ham eng yaxshi ko‘rsatkichlardan birini qayd etgan. O‘ta shafqatsiz bosim ostida futbolchilar o‘zini o‘zi nazorat qilish bo‘yicha namuna ko‘rsatdi. Atrofdagi hamma o‘yin uslubini qattiq tanqid ostiga olib, nafratini sochayotganida ular his-tuyg‘ularini jilovlay olish orqali yetuklikka erishganini namoyish etishdi.
Standartlar inqilobi
Arteta Angliya futbolida standart vaziyatlar inqilobi boshlanayotganini o‘z vaqtida his qildi va shu bo‘yicha ixtisoslashgan murabbiyni klubiga taklif etdi – Nikolya Jover Mikelning g‘oyalariga ishondi va «Manchester Siti»dan ashaddiy raqib safiga ko‘chib o‘tdi. Jover standart vaziyatlar bo‘yicha ishlashda to‘liq erkinlikka ega bo‘ldi va bu mavsumda jamoa bu borada ideal holatga keldi. «Arsenal» Yevropada burchak zarbalaridan eng ko‘p gol urgan jamoaga aylandi, raqiblar bu uslubga moslashganida esa standart vaziyatlarni yangicha ijro etishga o‘tdi. Va bu ham natija keltirdi. Artetaning murabbiylar shtabi ishni shunday bajardiki, raqiblar burchak zarbalaridan xuddi penaltidan qo‘rqqandek qo‘rqib qolishdi. Ko‘pchilik futbol muxlislariga bunday o‘yin yoqmasligi mumkin, ammo yodda tutish kerakki, «Arsenal» APLda o‘ynaydi, bu yerda esa klassik inglizcha uslubda kerakli natijaga ega bo‘lish hech qanday ayb emas.
Intrigani o‘ldirish
«Arsenal» bu mavsumda 19 ta o‘yinda darvozasi daxlsizligini saqlab qoldi. O‘tgan mavsumlarda jamoa ko‘p o‘yinlarda hisobda ortda bora turib, natijani qo‘ldan boy bergandi. Bu mavsumda esa londonliklar aksar o‘yinlarda hisobni ochib olganidan keyin amalda o‘yin taqdiri hal bo‘ldi. «Arsenal» APLning bu mavsumida sakkiz marta 1:0 hisobida g‘alaba qozondi. Fanatlar minimal farq tufayli xavotirda o‘tirgan bo‘lishsa-da, maydonda barchasi nazorat ostida edi. Jamoa maksimal xavfsiz rejimni yoqdi: tempni bir maromda ushlash uchun to‘pga egalik qilish, raqib qarshi hujum boshlayotganida kichik taktik follar ishlatish, autlar ijro etish vaqtida tanaffuslar bilan nafas rostlash. «Arsenal» o‘yinni qismlarga ajratib, so‘nggi daqiqalarni zerikarli, ammo maksimal darajada foydali tomoshaga aylantirdi. Shu bilan birga, jamoa avtobus qo‘yib o‘ynamadi: ha, jamoa o‘yinni «o‘ldirish» bilan shug‘ullandi, lekin o‘z jarima maydoniga qamalib olgani yo‘q.
Tarkib kengligi
Arteta bir necha yildan buyon APLda birinchi o‘rin uchun kurashib kelayotgandi. Jamoaning oldingi mavsumlardagi muvaffaqiyatsizliklari ko‘p jihatdan zaxira o‘rindig‘i qisqaligi bilan bog‘lanardi – bir-ikki asosiy ijrochi safdan chiqsa, o‘yin sifati tushib ketardi. Ketma-ket muvaffaqiyatsizliklardan keyin Mikel bunday tig‘iz taqvimda ikkita teng kuchli tarkibsiz titul uchun kurashib bo‘lmasligini tushunib yetdi. Mavsumlar oralig‘ida jamoada yangi sport direktori paydo bo‘ldi – Andrea Berta Londonda chempionlik jamoasini qurishni yakunlash uchun «Atletiko»ni tashlab keldi. «Arsenal» katta pul sarfladi, ammo kerakli bo‘shliqlarni yopa oldi. Natijada mavsum davomidagi muntazam jarohatlar jamoa o‘yiniga jiddiy ta’sir ko‘rsatmadi, Artetaning ixtiyorida amalda ham ikkita teng kuchli tarkib hosil bo‘lgandi.
Chempion «Arsenal» safida yagona asosiy qahramonni ajratib ko‘rsatib bo‘lmaydi. Subimendi mavsumning birinchi yarmida yuqori saviyadagi o‘yin ko‘rsatdi, ammo mavsum oxiriga kelib toliqib qoldi va uning o‘rnini Lyuis-Skelli yopa oldi. Saka vaqti-vaqti bilan yorqin o‘yin ko‘rsatdi, u formada emasligida Madueke uning o‘rnini bilintirmadi. Inkapiye Kalafiori jarohat olib safdan chiqqanida xuddi uning darajasida o‘ynab berdi. Yokeresh alohida o‘yinlarda o‘zini ko‘rsatdi va kerakli ochkolar to‘planishini ta’minladi, Havers esa deyarli butun mavsumni jarohat tufayli o‘tkazib yuborganiga qaramay, mavsum oxirida hal qiluvchi gollarni urdi. Butun mavsum davomida barqaror o‘ynaganlar ham bor: Rays, Rayya, Saliba va Gabriel bog‘lami. Bu futbolchilar jiddiy jarohatlardan qutulib qolishdi va butun chempionatni yuqori darajada o‘tkazishdi. «Arsenal» chempionlik poygasida individual shaxsiyatlar hisobiga emas, balki jamoaviy ish orqali g‘olib chiqdi.
Artetaga endi «Emireyts» atrofida haykal qo‘ysa ham bo‘ladi. U «cho‘kayotgan» klubga kelgandi. Ilk mavsumlarini jamoa kiyim almashtirish xonasini toksik va «quloqsiz» futbolchilardan tozalashga sarfladi, keyin esa o‘z orzusidagi jamoani qurishga kirishdi. So‘nggi yillarda «Arsenal» kuchli oltilik jamoalariga qarshi mag‘lubiyatsiz seriya qayd etdi, jami to‘plangan ochkolar soni bo‘yicha birinchi edi, ammo buyuklikni isbotlash uchun oxirgi qadam qolayotgandi. Endi bu qadam tashlandi va boshqa jamoalar muxlislari uni e’tirof etishi qiyin bo‘lsa-da, Shimoliy Londondagi muxlislar undan norozi emasligi aniq. Ko‘pchilikda shunday hissiyot borki, uzoq kutilgan tituldan keyin «Arsenal» yelkasidan tog‘ ag‘darildi va endi keyingi mavsumda biz butunlay boshqa jamoani ko‘ramiz.
O‘zbekiston milliy jamoasi 8 iyun kuni Niderlandiyaga qarshi o‘rtoqlik uchrashuvi o‘tkazadi. Ijtimoiy tarmoqlarda ushbu bellashuv uchun O‘zbekiston tomoni Niderlandiya futbol federatsiyasiga 300 ming dollar miqdorida mablag‘ to‘layotgani haqida xabarlar tarqaldi. O‘FA ushbu ma’lumot haqiqatga to‘g‘ri kelmasligini ma’lum qildi.
O‘zbekiston milliy jamoasi 8 iyun kuni AQShning Nyu-York shahrida Niderlandiyaga qarshi o‘rtoqlik uchrashuvida maydonga tushadi. Ijtimoiy tarmoqlarda ushbu bellashuv uchun O‘zbekiston futbol assotsiatsiyasi tomonidan Niderlandiya milliy jamoasiga 300 ming dollar miqdorida mablag‘ to‘lanishi haqida xabarlar tarqaldi. Xususan, O‘FAning terma jamoalar bo‘limi sobiq rahbari Sherzod Igamberdiyev Niderlandiyaga qarshi yopiq eshiklar ortida o‘tadigan nazorat bahsi uchun 300 ming dollar miqdorida mablag‘ sarflanayotgani haqida yozdi.
Ibragimov Kamerun, Kosta-Rika, Boliviya, Venesuela, Rossiya, AQSh, Meksika, Urugvay va Kanada terma jamoalariga qarshi tashkil etilgan uchrashuvlar uchun hech qanday mablag‘ to‘lanmagani, aksincha, mazkur o‘yinlar orqali 525 ming dollar pul ishlab topilganiga urg‘u berdi.
O‘FA tarqalgan xabar yuzasidan izoh berib, 300 ming dollarlik to‘lov haqiqatga to‘g‘ri kelmasligini ma’lum qildi.
«O‘zbekiston futbol assotsiatsiyasi ushbu ma’lumotlar haqiqatga to‘g‘ri kelmasligini ma’lum qiladi. Mazkur o‘rtoqlik uchrashuvi uchun Niderlandiya futbol federatsiyasiga hech qanday mablag‘ to‘lanmaydi.
Uchrashuvni tashkil etish bilan bog‘liq stadion ijarasi, xavfsizlik, translatsiya hamda boshqa tashkiliy xarajatlar esa tomonlar o‘rtasidagi kelishuvga muvofiq teng taqsimlanadi. Shuningdek, O‘zbekiston futbol assotsiatsiyasi xalqaro o‘rtoqlik o‘yinlarini tashkil etishda o‘zaro manfaatli hamkorlik va amaldagi xalqaro tartiblar asosida ish olib boradi.
Shu munosabat bilan muxlislar, ommaviy axborot vositalari hamda jamoatchilik vakillaridan yolg‘on axborotlarga ishonmasliklarini so‘raymiz», — deyiladi O‘FA xabarida.
Londonning «Arsenal» klubi muddatidan oldin futbol bo‘yicha Angliya Premer-ligasining 2025/2026 yilgi mavsumi g‘olibligini qo‘lga kiritdi.
Premer-liganing 37-turida «Manchester Siti» kutilmaganda «Bornmut» (1:1) bilan durang qayd etib, Mikel Arteta shogirdlarini muddatdan oldin chempion qildi.
37-tur yakuniga ko‘ra, «Arsenal» hisobida 82 ochko bor, «Manchester Siti» esa 78-ochko bilan mavsumni 2-o‘rinda yakunlaydigan bo‘ldi.
«Arsenal» so‘nggi bor bundan 22 yil oldin, 2003/2004 yilgi mavsumda g‘olib bo‘lgan edi. O‘shanda jamoa mavsumni mag‘lubiyatsiz yakunlagan edi.
O‘zbekiston U-17 terma jamoasi Osiyo kubogi yarim finalida Yaponiyaga qarshi maydonga tushdi.
Teng kurashlar ostidan o‘tgan uchrashuvda har ikki tomon imkoniyatlarga ega bo‘ldi.
Uchrashuvning 25-daqiqasida yaponlar Ravshanbekovga qo‘pollik ishlatdi. Penaltini Asilbek Aliyev samarali ijro etdi.
Birinchi bo‘limning qolgan daqiqalarida gol kiritilmadi. Ikkinchi bo‘limga qo‘shib berilgan daqiqalarga Yaponiya hisobni tenglashtirdi.
Natijada g‘olib penaltilar seriyasida aniqlandi. Unda O‘zbekiston 2:3 hisobida mag‘lub bo‘ldi.
Bosh murabbiy Sergey Chigodayev shogirdlari yarimfinalda Yaponiya o‘smirlariga penaltilar seriyasida yutqazdi.
O‘zbekistonning 17 yoshgacha bo‘lgan futbolchilardan iborat terma jamoasi Osiyo Kubogi finaliga chiqolmadi.
19 may kuni Saudiya Arabistonining Jidda shahrida o‘tkazilgan Yaponiyaga qarshi yarimfinal o‘yini 28-daqiqasida Asilbek Aliyev penaltidan hisobni ochdi. Shundan so‘ng, o‘zbekistonliklar so‘nggi soniyalargacha hisobda oldinda bordi, biroq g‘alabani ushlab qololmadi: Chimezikay tomonidan urilgan gol bahsni penaltilar seriyasiga o‘tkazdi.
Penaltilar seriyasida raqibning qo‘li baland keldi – 3:2.
Endi Yaponiya o‘smirlari 22 may kuni finalda Xitoy – Avstraliya o‘yini g‘olibi bilan o‘ynaydi.
Eslatib o‘tamiz, guruh bosqichining 1-turida o‘zbekistonliklar Hindistonni 3:0 hisobida yengib, muddatidan oldin jahon chempionati va chorakfinal yo‘llanmasini qo‘lga kiritgan edi. Chunki guruhdagi yana bir raqib KXDR chempionatda ishtirok etishdan bosh tortdi. 2-turda Avstraliya 2:0 hisobida mag‘lub etildi. Chorakfinalda Janubiy Koreya ortda qoldirildi (2:2, pen. 5:3).
U17 Jahon chempionati shu yil noyabr – dekabr oylarida Qatarda bo‘lib o‘tadi.
“Rivojlangan kapital bozorisiz turmush darajasini yaxshilay olmaymiz”
JSST “koronavirus yoki Eboladan kuchliroq” pandemiya haqida ogohlantirdi.
Jazoir elchisi O‘zbekistondagi diplomatik missiyasini yakunladi
-
Jamiyat5 days ago
«Aviasozlar» bozori buziladimi? Poytaxt hokimligi bayonoti
-
Dunyodan5 days ago
Noyob olmosli uzuk rekord narxga sotildi
-
Dunyodan5 days ago
Boshqa davlatlar Eronga yashirincha hujum qiladi
-
Jamiyat5 days agoOlmaliqda mototsiklchi 14 yoshli piyodani urib yubordi
-
Siyosat5 days agoQonun chiqaruvchi yuan “Toshkent xalqaro moliya markazi toʻgʻrisida”gi qonun loyihasini birinchi oʻqishda maʼqulladi
-
Siyosat5 days ago
Shavkat Mirziyoyev Turkiy davlatlar sammitida aniq tashabbuslarni ilgari surdi
-
Jamiyat4 days ago“Meni zapretdan chiqaringlar, ijod qilmoqchiman, deya olmadim”
-
Jamiyat4 days agoSergelidagi qo‘lansa hid: muammo yechimi nimaga bog‘liq?