Qabriston nazoratchisining xatti-harakati uchun aybdorga chiqarilgan obodonlashtirish bo‘limi mutaxassisining ishi kassatsiya instansiyasida ko‘rib chiqilib, sud hukmi o‘zgartirildi. Ikki bolani yolg‘iz voyaga yetkazayotgan, oilaning yagona boquvchisi bo‘lgan ayol o‘ziga nisbatan adolatsiz hukm chiqarilganini aytib, tergov va suddan norozi bo‘lgandi.

Uzun tumani obodonlashtirish boshqarmasi kadrlar bo‘limi mutaxassisi Iroda Sharipovaga nisbatan chiqarilgan sud hukmi kassatsiya instansiyasi ajrimi bilan o‘zgartirildi. Kun.uz sud hujjati bilan tanishdi.

Sud ajrimiga ko‘ra, Iroda Sharipovaga tayinlangan 1 yil mansabdorlik va moddiy javobgarlik bilan bog‘liq lavozimlarda ishlash huquqidan mahrum qilgan holda ish haqining 20 foizini davlat daromadi hisobiga ushlab qolib, 1 yil axloq tuzatish ishlari jazosi bekor qilindi. Kassatsiya sudi Iroda Sharipovaning qilmishi ijtimoiy xavflilik xususiyatini yo‘qotgan, deb hisoblab, uni jazodan ozod qildi. 

Shu bilan birga, sud hukmining qolgan qismi o‘zgarishsiz qoldirildi, oqlov hukmi chiqarishni so‘rab qilingan kassatsiya shikoyati esa qanoatlantirilmadi.

Nima bo‘lgandi?

Uzun tumani qabriston nazoratchisi vazifasida ishlab kelgan Abubakr Hotamov ismli xodim 2022 yil sentabrdan 2025 yil apreligacha o‘z xizmat faoliyatida ishlab turgan holda qo‘shimcha ravishda Termiz shahridagi Imom Termiziy nomli o‘rta maxsus kasb-hunar diniy maktabida ta’lim olib kelgan, bundan rahbariyatni xabardor qilmagan.

Iroda Sharipova Abubakr Hotamov ish joyida bo‘lmagani holatida tabellarga soxta ma’lumotlar kiritib, unga ish haqi sifatida to‘langan 44,7 mln so‘m budjet mablag‘larini rastrata yo‘li bilan talon-toroj qilganlikda ayblangan.

Abubakr Hotamovning faoliyatini nazorat qilish Iroda Sharipovaning vakolatiga kirmagan. Qolaversa, aynan Hotamov ishlagan hudud Irodadan 35-40 km uzoqda, uni har kuni nazorat qilishga imkon yo‘q va u bo‘lim boshliqlari bergan hisobotga ko‘ra ish haqi yozgan. Ishga guvoh sifatida jalb etilgan Abubakr Hotamov ham Sharipovaning aybi yo‘qligini aytgan.

JIB Qiziriq tuman sudining 2025 yil 25 oktyabrdagi hukmi bilan Iroda Sharipova o‘zlashtirish yoki rastrata yo‘li bilan talon-toroj qilish hamda hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish jinoyatlarida aybli deb topilgan. Unga 1 yil muddatga mansabdorlik va moddiy javobgarlik lavozimlarida ishlashdan mahrum qilib, ish haqining 20 foizini davlat daromadi hisobiga ushlab qolgan holda 9 oy axloq tuzatish ishlari jazosi tayinlangan.

Ikki farzandni ulg‘aytirayotgan yolg‘iz ayol sud tayinlagan jazodan so‘ng og‘ir ahvolga tushib qolgan. U kassatsiya tartibida shikoyat bergach, ish kassatsiya sudida ko‘rib chiqilishi belgilangandi. 

Source link

“Do‘stlik” chegara bojxona posti orqali Qirg‘izistonga 819 mln so‘mlik oltin quymalarni yashirincha olib chiqmoqchi bo‘lgan ayol va uning qizi to‘xtatib qolindi.

Davlat xavfsizlik xizmatining Andijon viloyati bo‘yicha boshqarmasi hamda bojxona idoralari xodimlari hamkorligida tovar-moddiy boyliklarning mamlakat hududidan noqonuniy olib chiqilishining oldini olishga qaratilgan tezkor tadbir o‘tkazildi.

Ma’lum bo‘lishicha, Baliqchi tumanida yashovchi 1985 yilda tug‘ilgan ayol hamda uning 2006 yilda tug‘ilgan qizi nostandart shakldagi 7 dona, jami 473 gramm oltin quymalarni kiyimlari ostiga yashirgan holda Xo‘jaobod tumanidagi “Do‘stlik” chegara bojxona posti orqali olib o‘tishga uringan vaqtida ushlangan.

Hozirda ushbu holat yuzasidan qonunbuzarlarga nisbatan Jinoyat kodeksining 182-moddasi (bojxona to‘g‘risidagi qonunchilikni buzish) 2-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.

Bu kabi qonunbuzilish holatlariga duch kelinsa, Davlat xavfsizlik xizmatining 1520 qisqa raqamiga qo‘ng‘iroq qilish mumkin. Shaxsning sir saqlanishi kafolatlanadi.

Source link

Isroil Davlatida istiqomat qilayotgan O‘zbekiston fuqarolari ogohlantirildi.

Isroildagi elchixona, jumladan, «mamlakatdagi hozirgi vaziyatni inobatga olgan holda, O‘zbekiston Respublikasining Isroil Davlatidagi Elchixonasi barcha fuqarolarni shaxsiy xavfsizlik choralariga jiddiy e’tibor qaratishga» chaqirmoqda.

Elchixona bayonotida mintaqada xavfsizlik holati tez o‘zgarishi mumkinligi sababli, quyidagilar tavsiya etildi:

Isroil rasmiy idoralari va mahalliy hokimiyat organlarining xabar va ko‘rsatmalariga amal qilish.
Ommaviy tadbirlar o‘tkazilayotgan joylarga borishdan va odamlar gavjum hududlarda uzoq vaqt qolishdan saqlanish.
Sayohat va harakatlanishni rejalashtirishda ehtiyotkorlikka rioya qilish, ayrim hududlarga safarni vaqtincha kechiktirishni ko‘rib chiqish.
Shaxsni tasdiqlovchi hujjatlarni doimo o‘zi bilan olib yurish hamda yaqinlari bilan doimiy aloqada bo‘lish.

Elchixona bilan bog‘lanish uchun:

03-672-2466
03-672-2371
03-758-5075
03-758-5076

Favqulodda va shoshilinch xabarlar uchun:

Elektron pochta: il.uzembassy@mfa.uz

«Iltimos, vaziyatga jiddiy yondashing va xavfsizlik qoidalariga qat’iy rioya qiling», – deyiladi bayonotda. 

Source link

Poytaxtda giyohvand moddalarni “zakladka” usulida tarqatib kelgan shaxs qo‘lga olinib, uning yashash manzilida narkolaboratoriya aniqlandi. Shuningdek, Sirdaryo viloyatida katta miqdorda prekursorlar musodara qilindi.

Davlat xavfsizlik xizmatining Toshkent shahar bo‘yicha boshqarmasi hamda ichki ishlar organlari xodimlari hamkorligida o‘tkazilgan tezkor tadbir natijasida sintetik giyohvand moddalar tayyorlash va tarqatish bilan bog‘liq jinoiy faoliyatga chek qo‘yildi.

Tezkor tadbir davomida 1979 yilda tug‘ilgan shaxs Toshkent shahri hududidagi ko‘p qavatli uylar yo‘laklari va boshqa joylarga xorijdan olib kelingan giyohvandlik vositalarini berkitib ketayotgan vaqtida ushlandi.

Xolislar ishtirokida uning yoni va avtotransport vositasi ko‘zdan kechirilganda, 15 dona kichik bo‘laklarda “Al’fa PVP” va 24 dona bo‘laklarda “Mefedron” giyohvandlik vositalari borligi aniqlandi.

Shuningdek, uning yashash xonadoni ko‘zdan kechirilib, uyning yerto‘la qismida narkolaboratoriya tashkil etilgani ma’lum bo‘ldi. Tezkor tadbirlar natijasida jami 2,8 kg giyohvand moddalar, 11,5 litr prekursorlar hamda narkolaboratoriya uchun zarur anjomlar ashyoviy dalil sifatida rasmiylashtirib olindi.

Bundan tashqari, gumonlanuvchining telefonidagi geolokatsiya ma’lumotlari asosida Sirdaryo viloyati Xovos tumani hududida xufiya joyga yashirib qo‘yilgan, sintetik narkotiklar tayyorlashda foydalaniladigan 49,9 kg va 48 litr prekursorlar ham topilib, musodara qilindi.

Hozirda mazkur shaxsga nisbatan Jinoyat kodeksining 28, 246-moddasi 2-qismi va 273-moddasi 5-qismi bilan jinoyat ishi qo‘zg‘atilib, “qamoq” ehtiyot chorasi qo‘llangan. Tergov harakatlari olib borilmoqda.

Bu kabi qonunbuzilish holatlariga duch kelinsa, Davlat xavfsizlik xizmatining 1520 qisqa raqamiga qo‘ng‘iroq qilish mumkin. Shaxsning sir saqlanishi kafolatlanadi.

Source link

27-fevral kuni Toshkent davlat tibbiyot universitetida bolalar saratoniga qarshi kurash masalalariga bag‘ishlangan matbuot anjumani bo‘lib o‘tdi. Unda Jahon sog‘liqni saqlash tashkiloti, O‘zbekiston Sog‘liqni saqlash vazirligi hamda Avliyo Jud bolalar tadqiqot shifoxonasi vakillari ishtirok etdi.

So‘nggi yillarda bolalar onkologiyasi, gematologiyasi va immunologiyasi yo‘nalishida amalga oshirilayotgan islohotlar xususida ma’lumot berildi. Davlat rahbari tashabbusi bilan bolalar gematologiyasi va onkologiyasi kattalar yo‘nalishidan ajratilib, alohida tizim sifatida shakllantirildi. Natijada yagona bolalar onkologiyasi, gematologiyasi va immunologiyasi xizmati tashkil etilib, tibbiy yordam sifati yangi bosqichga ko‘tarildi.

2024-yil 21-maydagi Prezident qarori asosida bolalarga ixtisoslashtirilgan tibbiy yordam ko‘rsatish tizimi tubdan takomillashtirildi. Referens laboratoriya ishga tushirildi, yuqori dozali kimyoterapiya hamda zamonaviy diagnostika usullari amaliyotga joriy etildi. Yevropa klinik protokollari asosida davolash yo‘lga qo‘yilib, erta tashxis, reabilitatsiya va palliativ yordam dasturlari ishlab chiqildi.

Bugungi kunda Bolalar onkologiyasi, gematologiyasi va immunologiyasi ilmiy-amaliy tibbiyot markazi hamda hududiy bolalar shifoxonalarida 180 o‘rinli ixtisoslashtirilgan xizmat faoliyat yuritmoqda. Markaz quvvati 200 o‘ringa yetkazilib, Onkojarrohlik bo‘limi tashkil etildi va yuqori texnologik operatsiyalar yo‘lga qo‘yildi. Uzoq muddat davolanuvchi bemorlar uchun 112 o‘rinli mehmon uyi hamda yangilangan kunduzgi statsionar ish boshladi.

O‘zbekiston Jahon sog‘liqni saqlash tashkilotining Bolalar saratoniga qarshi kurashish bo‘yicha Global tashabbusi doirasida tanlangan o‘nta davlatdan biri hisoblanadi. Ushbu tashabbus bolalar yashovchanligini 60 foizga yetkazishni ko‘zda tutadi. 2024-yilda mamlakatimiz bolalar saratoniga qarshi dori vositalarini yetkazib berish bo‘yicha Global platformaga qo‘shildi. Mazkur platforma Jahon sog‘liqni saqlash tashkiloti va Avliyo Jud bolalar tadqiqot shifoxonasi hamkorligida amalga oshirilib, bolalarni xavfsiz va sifatli dori vositalari bilan uzluksiz ta’minlashga qaratilgan.

Ayni paytda platforma doirasida 14 ta hududdagi tibbiyot muassasalari hamda markazda davolanayotgan 2000 nafar bolalar uchun zamonaviy kimyopreparatlar yetkazib berilmoqda. Ushbu dori vositalari bilan 2028 yilgacha uzluksiz ta’minlash rejalashtirilgan.

Hududlarda filiallar ochilib, 14 ta davolash bo‘limi birlamchi tashxis va hamrohlik terapiyasiga ixtisoslashtirildi. Suyak, jigar hamda ko‘krak qafasi o‘smalarini olib tashlash kabi murakkab jarrohlik amaliyotlari hududlarda ham bajarilmoqda.

Kadrlar malakasini oshirish maqsadida xalqaro hamkorlik kengaytirilgan. Jumladan, Vena tibbiyot universiteti hamda Germaniyadagi Avliyo Anna klinikasi bilan hamkorlik yo‘lga qo‘yilgan. Shuningdek, “Mehrli maktab” loyihasi doirasida uzoq muddat davolanayotgan bolalarning ta’lim olishi ta’minlanmoqda. “Taskin” bolalar onkologik xospisi faoliyati yo‘lga qo‘yilib, palliativ yordam tizimi izchil rivojlantirilmoqda.

O‘zbekiston Sog‘liqni saqlash vazirligi va avliyo Jud bolalar tadqiqot shifoxonasi o‘rtasida imzolangan memorandum esa bolalar onkologiyasi va gematologiyasi yo‘nalishida uzoq muddatli hamkorlikni mustahkamladi.

Source link