Jamiyat
fuqarolar Uchtepa City’ning 16 qavat bo‘lishiga qarshi
Uchtepa tumanidagi salkam 1 gektar joy avvaliga avtoturargoh qurish uchun ajratilgan edi. Lekin keyin, loyiha bir yumalab 5 qavatli, yana bir dumalab 16 qavatli “dom” loyihasiga aylandi. 5 qavatgacha uy qurishga ruxsat olinganiga qaramay, undan yuqoridagi qavatlar uchun ham xonadonlar sotuvi olib borilgan. Kun.uz gaplashgan fuqarolarga ko‘ra, mahalla infratuzilmasi bunday yuklamani ko‘tara olmaydi.
{Yii::t(}
O’tkazib yuborish 6s
O’tkazib yuborish
Kun.uz’ga Toshkent shahri Uchtepa tumani Bog‘obod mahallasidan murojaat kelib tushdi: mahalla ahli 5 qavatli turar joy deb ruxsatnoma berilgan joyga 16 qavatli uy qurish harakatlaridan norozi.
Surishtiruvimizga ko‘ra, 2018 yilda Uchtepa tumanining sobiq hokimi Shavkatbek Ergashev 96 sotix yer maydonini “Elegant Avto Servis” MJChga ajratib bergan. Qarorda faoliyat turini o‘zgartirmaslik sharti bilan, ko‘p qavatli avtoturargoh qurish belgilangan. Keyinchalik, yer maydoni “Great Vertex” MChJga o‘tgan va jamiyat 2019 yilda obektni ixtisoslashtirish va rekonstruksiya qilishga ruxsatnoma olgan. 2023 yil 23 iyun kuni 5 qavatli turar joy majmuasi uchun Toshkent shahar qurilish bosh boshqarmasidan ijobiy xulosa taqdim etilgan.
1 yil o‘tar-o‘tmas u yerda qurilish ishlari boshlangan. Bir muddat o‘tib, Great Vertex majmuani balandroq qilib qurishga qaror qilgan: 2 ta 16 qavatli va 3 ta 8 qavatli binolar loyihasi ishlab chiqilgan. 2025 yil fevralida Qurilish vazirligi bu yangi loyiha poytaxt bosh rejasiga zid va avtoturargohlar hisobga olinmagan deb, uni rad etgan. Shunday bo‘lsa-da, qurilish ishlarining dastlabki bosqichi faol olib borilgan.
Qurilish inspeksiyasi obektda ko‘p marta o‘rganishlar o‘tkazib, qurilish-montaj jarayonlarida belgilangan tartib-qoidalarga rioya qilinmaganini aniqlagan. Ayrim ishlarda tasdiqlangan loyiha yechimlariga zid harakatlar kuzatilgan: yerostiga qarab 1,5 metr kovlash belgilangan bo‘lsa, 2,5 metrgacha qazilgan. Inspeksiya jami 13 marta nazorat tadbiri o‘tkazgan va 12 ta yozma ko‘rsatma bergan. Talablar bajarilmagach, buyurtmachi “Great Vertex” MChJning mansabdori MJtKning 99-moddasi 1-qismi bilan ma’muriy javobgarlikka tortilgan.
“Agar loyihadan chetga chiqilsa, sudga da’vo arizalari kiritiladi. Hozirda qurilish ishlari vaqtincha to‘xtatilgan. Jarayon ustidan qat’iy nazorat o‘rnatilgan”, – deyiladi inspeksiya Kun.uz’ga taqdim etgan axborotda.
Shunga qaramay, aholi vakillari 16 qavatli uy qurilishidan xavotirda.
“Mahallamizda loyiha bo‘yicha 5 qavatli imorat qurilishi kerak edi. Lekin 16 qavat imorat qurilyapti. Mahallamiz bunga qarshi. Ertaga gaz, elektr energiyasi ta’minotiga salbiy ta’sir ko‘rsatadi. Qolaversa, mana bu yerda maktabimiz bor, o‘quvchilarga salbiy ta’sir qilishi mumkin”, – deydi Elmurod Yo‘ldoshev.
“16 qavat bo‘lgan taqdirda kamida 3000-4000 aholi kelishi mumkin. 1500-2000 ta avtoulovi bo‘ladi. Mana shu kranning toshi yaqinda tushib ketdi. Tushib ketgandan beri bolalarimni ko‘chaga chiqarmayman”, – deydi Laziz Qudratov.
Yana bir fuqaro Avaz Abduvahobovga ko‘ra, mahalladan bir guruh fuqarolar Uchtepa Sity’ning sotuv ofisiga borishganida, 16-qavatlik loyihaning yuqori qavatlari uchun sotuv ketayotgani ma’lum bo‘lgan.
“O‘zi infrastruktura yetarli emas. 700 ga yaqin xonadon turgan bo‘lsa, mashina chiqib ketadigan joy yo‘q bu yerda. Mana shu yerdan yo‘l olinishi kerak edi, yo‘l qurilmadi. Hozirgi yo‘l tor, mashinalar o‘tishi uchun bir-birini kutib turadi. Biror joyga borishda mahalladan chiqib olishimizning o‘ziga ancha vaqt ketib qoladi”, – deydi u.
Uchtepa tumani Bog‘obod mahallasi ko‘chasi, 228-maktabning old qismi
Avaz Abduvahobov qurilish uchun mahalliy aholini chalg‘itgan holda ruxsat olinganini da’vo qildi.
“Roziligi haqida qo‘l qo‘ygan fuqarolarning bittasi ham yo‘q. Bittasining Rossiyaga ketganiga 2 yil bo‘lgan ekan. Bir kichik informatsiya bor, bular rozilik olish uchun qaysidir maskanda 100 kishilik osh berishgan ekan. Keyin kam ta’minlanganlarga 1-1,5 kilodan go‘sht tarqatishgan ekan. Shundan keyin, ularga “go‘sht oldingmi, qo‘l qo‘y” deyishgan. Ular go‘sht olganimga qo‘l qo‘yyapman deb o‘ylashgan”, – deydi fuqaro.
Kun.uz’ga taqdim etilgan bir shartnomada, quruvchi mijozga 12-qavatdan xonadon sotgani ko‘rinadi. 5-qavatdan yuqori qavatlarda joylashishi reja qilingan, lekin ruxsat olinmagan xonadonlarning nechtasi sotilgani ma’lum emas.
Boshqa bir fuqaro ulushdor sifatida 8-qavatdan 2 xonali uyga 17 mln 860 ming so‘m to‘lagan. Biroq bahsli masalalardan keyin, pulini qaytarib olgan.
Qurilish vazirligi loyihani tasdiqlamagan bo‘lsa, nega 16 qavatli uylar ijtimoiy tarmoqlarda reklama qilindi? Hozirgacha 5 dan yuqori qavatlarga nechta odam shartnoma tuzdi, ularning pullari qaytariladimi? Biz shu kabi savollar bilan Uchtepa City’ning sotuv ofisiga borib, ofis yopiq ekaniga guvoh bo‘ldik. Ko‘rsatilgan raqamga qo‘ng‘iroq qilganimizda, operator hozir faqat 5-qavatgacha shartnoma borligini, sotuv ofisi elektr yo‘qligi tufayli onlayn ishlayotganini aytdi.
Ko‘p o‘tmay, firma rahbari Zafar Asadov biz bilan suhbatda Qurilish vazirligi fevral oyidagi loyihani rad etganini, hozirda loyiha tasdiqlanishini kutayotganini aytdi, tafsilotlarni ochiqlamadi. “Hali 1-qavat ham ko‘tarilmagan, nima muammo?” – deydi u.
Avvalroq, xuddi shu joyda bir nechta zarang daraxtlari kesib tashlangani haqida reportaj tayyorlagan edik.
Shahzod O‘roqboyev,
Kun.uz
Bu yil yozda dunyoning aksariyat mintaqalarida g‘ayrioddiy jazirama hukm surmoqda. Biroq, konditsionerdan foydalanish imkoniyati hammada ham mavjud emas.
Jaziramadan saqlanish bo‘yicha Hindistonning NPR nashri jamlagan maslahatlarning har biri alohida olinganda arzimasdek tuyulishi mumkin, ammo ular birgalikda tananing sovishiga haqiqatan ham yordam beradi.
Alohida ta’kidlanishicha, issiq urish belgilariga quyidagilar kiradi: tana haroratining ko‘tarilishi, bosh og‘rig‘i, ko‘ngil aynishi, ongning chalkashishi yoki holsizlik. Ushbu alomatlar paydo bo‘lganda, darhol tez yordam chaqirish va tibbiy yordamga murojaat qilish kerak.
Jazirama bilan kurashishga yordam beradigan maslahatlar:
1. Ko‘p suyuqlik iching
Tana gidratatsiyasi darajasini doimo kuzatib borish kerak. Har qanday jismoniy faoliyatni boshlash bilan suvni kichik qultumlarda ichish lozim. Ko‘chaga chiqqanda suv olib yurish – jaziramada hayot-mamot masalasidir.
2. Albatta, biror narsa yeb oling
Hech qachon uydan och qoringa chiqmaslik kerak, doim nimadir yeb olish lozim. Masalan, tarkibida erigan elektrolitlar bo‘lgan bodring yoki bir bo‘lak ananas buning uchun ayni muddao.
3. Ruh tetikligi
Agar isib ketayotgan bo‘lsangiz, sovuq dush qabul qiling yoki hech bo‘lmaganda yuzingiz va qo‘llaringizni, shuningdek, boshingizni vaqti-vaqti bilan suv bilan ho‘llab turing – bu tana haroratini pasaytirishga yordam beradi.
4. Dam olish uchun salqin joy toping
Shuni bilish kerakki, issiq havo yuqoriga ko‘tarilgani uchun ko‘p qavatli uylarning pastki qavatlari salqinroq bo‘ladi. Kunduzi quyosh nurini qalin pardalar bilan to‘sing. Qo‘lingiz ostidagi barcha ventilyatorlarni ishga tushiring.
Va salqinlik izlab mebellarni qayta joylashtirishdan qo‘rqmang. Masalan, karavotni deraza yoniga qo‘ysangiz, uxlayotganda yengil shabadani his qilishingiz mumkin.
Agar xona ichida nafas olish qiyinlashib, dim bo‘lib ketsa, tashqariga chiqing va gamakda yoting. Tebranish paytida hosil bo‘ladigan havo oqimi tanani sovutishga yordam beradi.
5. Me’morchilikdan ilhomlaning
Ko‘plab me’moriy yangiliklar orasida «jaali» deb nomlangan me’moriy uslub bor, u hind va urdu tillaridan tarjima qilinganda shunchaki «to‘r» degan ma’noni anglatadi. Aslini olganda, bu tosh devorni yaxlit qoldirish o‘rniga, bir qator kichik teshiklari bor geometrik naqshlarni o‘yib, uni naqshinkor panjaraga aylantirish usulidir.
6. Bug‘lantiruvchi sovutgich
Ushbu elektr qurilma, shuningdek, bug‘lantiruvchi sovutgich sifatida ham tanilgan bo‘lib, xonadagi havoni suvga botirilgan filtrlar orqali o‘tkazadi, bu filtrlar havoni sovutadi va keyin uni xonaga qaytaradi. Bu qurilmalar konditsionerlardan arzonroq va kamroq energiya sarflaydi. Bunday qurilmani hatto o‘zingiz ham yasashingiz mumkin.
7. Oq rangli kiyimlar kiying
Paxta va zig‘ir matolaridan tikilgan kiyimdan foydalaning, oq rang issiqlikni samarali qaytaruvchi hisoblanadi.
8. Bosh va bo‘yningizni yopib yuring
Yozda boshni yopib yurish qadimiy va samarali an’anadir.
9. Tushki quyoshdan saqlaning
Kunning eng issiq vaqtida ko‘chaga chiqish, sport bilan shug‘ullanish yoki ochiq havoda bo‘lish orqali o‘zingizni charchatmaslikka va quvvatingizni behuda sarflamaslikka harakat qiling, chunki jazirama quyosh nuri va issiq havo tana haroratini yanada oshirib yuboradi.
10. Soyadan foydalaning
Ochiq havoda ishlayapsizmi yoki ko‘chada ketyapsizmi, daraxtlar soyasida yurishga harakat qiling. U yerdagi havo harorati aslida quyosh ostidagidek bo‘lsa-da, teringiz quyosh nurlarini yutmaydi va bu tanangizning qizib ketishiga yo‘l qo‘ymaydi.
Jazirama issiq sabab ayrim yo‘nalishlarda poyezdlar harakat tezligiga vaqtinchalik cheklov joriy etiladi.
Foto: Temiryo‘lekspress
“Temiryo‘lekspress” AJ xabariga ko‘ra, mazkur choralar yo‘lovchilar va poyezdlar harakati xavfsizligini ta’minlash, shuningdek, temir yo‘l infratuzilmasining barqaror va ishonchli ishlashini saqlash maqsadida ko‘rilmoqda. Shu sababli ayrim poyezdlar harakat jadvalida belgilangan vaqtdan kechroq manzilga yetib borishi mumkin.
Xabarda qaysi yo‘nalishlarda cheklov joriy qilinishiga aniqlik kiritilmagan.
Eslatib o‘tamiz, 13 iyuldan boshlab O‘zbekiston hududida g‘ayritabiiy o‘ta issiq ob-havo sharoiti kuzatilmoqda, u 20 iyulgacha davom etishi mumkin. Havo harorati 43-45 darajagacha, janubda va cho‘l hududlarda 46-48 darajagacha ko‘tarilishi kutilmoqda.
D002 avtomobil yo‘lining 4-9 kilometri oralig‘i 21 iyulga qadar yopildi. Haydovchilarga aylanma yo‘llardan foydalanish bo‘yicha tavsiyalar berildi.
Toshkent va Nurafshon shaharlarini bog‘lovchi avtomobil yo‘lida joriy yilning 21 iyul kuniga qadar transport vositalarning harakati to‘liq cheklandi.
Toshkent viloyati YHXB xabariga ko‘ra, bunga yo‘ldagi inshootlarning qurilishi sabab bo‘lgan.
«Toshkent – Nurafshon (D002) avtomobil yo‘lining 4 kilometridan 9-kilometriga qadar transport vositalarining harakati to‘liq cheklanadi», deyiladi xabarda.
Shu sababli YHXB ushbu yo‘ldan harakatlanuvchi haydovchilarga aylanma yo‘llardan foydalanish bo‘yicha tavsiyalar berdi.
Prezident Shavkat Mirziyoyev mahalla bankirlari ish tizimi tubdan o‘zgarishini ma’lum qildi. Endi bir bankirga ko‘pi bilan uchta mahalla biriktirilib, biznes faolligi, yangi ish o‘rinlari va aholi daromadini oshirish bo‘yicha KPI belgilanadi. Shuningdek, banklarga har bir mahallaning “o‘sish nuqtasi”ni aniqlash va daromadli loyihalarni ko‘paytirishni buyurdi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Yig‘ilishda mahalla bankirlarining ish uslubi ham tubdan o‘zgarishi belgilandi. Ta’kidlanishicha, joylarda yaxshi tajribalar bor. Masalan, Angor tumani Yangiobod mahallasidagi 2 kilometr zovur usti yopilib, 110 ta servis obekti ishga tushirildi. Natijada mahalla atrofida yashaydigan 1 ming 225 nafar odam ishli va daromadli bo‘ldi.
Arnasoy tumanidagi Baxtli mahallasining bankiri 20 ta xonadonga 50 million so‘mdan kredit ajratib, mehmon uylarini ishga tushirdi. Har bir xonadon bir mavsumda 100 million so‘mgacha daromad olmoqda. Ish yurishib ketgani uchun yana 80 ta oila shunday mehmon uylari tashkil qilishga kirishdi.
Endi banklar har bir mahallaning “o‘sish nuqtasi”ni aniqlab, tashabbuskorlarni topishi va daromadli loyihalarni ko‘paytirishi zarur. Bundan buyon bitta mahalla bankiriga ko‘pi bilan uchta mahalla biriktiriladi.
Ikki haftada tashabbuskor, zamonaviy fikrlaydigan oliygoh bitiruvchilari va yosh mutaxassislar orasidan 400 nafar yangi mahalla bankiri tanlab olinadi. Ular bir oy davomida namunali mahallalarga olib borilib, tajriba o‘rganadi.
Joriy yil oilaviy tadbirkorlik loyihalari uchun qo‘shimcha 2 trillion so‘m imtiyozli resurs berildi. “Og‘ir” mahallalar uchun kredit stavkasi 17,5 foizdan 12 foizga tushirildi.
Endi mahalla bankirlari o‘zi topgan loyihasi uchun ushbu resursdan foydalanishi mumkin bo‘ladi. Bu tizimni 1 avgustdan amaliyotga joriy etish vazifasi qo‘yildi.
Mahalla bankirlariga biznes faollikni oshirish, tadbirkorlik, ish o‘rni va aholi daromadini ko‘paytirish bo‘yicha KPI belgilanadi. Tuman va shahar hokimlari mahalla raislari bilan birga har bir mahalla bankiriga yil yakunigacha aniq buyurtma shakllantirib beradi.
Davlat banklari bu yil 100 tadan mahallani ixtisoslashtirish tashabbusi bilan chiqqan. O‘tgan yili 9 ta davlat banki ishtirokida mahallalarda agrosanoatni rivojlantirish uchun “Agrostar” kompaniyalari tashkil qilingan edi.
Endi banklar mahallani ixtisoslashtirish bilan cheklanib qolmasdan, “Agrostar”larni jalb qilgan holda “yetishtirish – qayta ishlash – saqlash – qadoqlash – sotish” zanjirini yaratadi. Bir oyda dastur qilib, 1 mingta mahallada ish boshlash topshirildi.
Prezident Shavkat Mirziyoyev mahalla raislariga yangi vakolatlar berilishini ma’lum qildi. Endi ular hududda xususiy bog‘cha, maktab, klinika va sport inshootlari qurish uchun yerlarni auksionga chiqarish, shuningdek, “mahalla yettiligi” ishini muvofiqlashtirish huquqiga ega bo‘ladi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Mahallalarda soliq tushumlari, jinoyatchilikni jilovlash va aholi muammolarini hal etish bo‘yicha mas’ullarga savollar qo‘yildi. Davlat rahbari mahalla odamlar uchun chinakam “ishonch, tayanch va imkoniyatlar markazi” bo‘lishi zarurligini ta’kidladi.
Yangi Quva mahallasi misolida aholini ish bilan ta’minlash va daromadini oshirish bo‘yicha yangi tartib ko‘rsatib o‘tildi. Ushbu mahallada 51 nafar ishsiz fuqaro bor, ularning 4 nafari agrotexnikumni bitirgan va xonadonida 10 sotixdan tomorqasi mavjud.
Mahalla raisi tomorqada gul ko‘chatiga ixtisoslashgan yengil konstruksiyali issiqxona qurish uchun mahalla bankiriga buyurtma beradi. Qolgan ishsiz aholi bo‘yicha ham mahalla raisi kim tadbirkor bo‘lmoqchi, qaysi oila daromadini oshirmoqchi, kimga kredit, uskuna yoki yer kerakligini aniqlab, bankirga aniq vazifa qo‘yadi.
Yangi Quva mahallasida bog‘cha yetishmasligi sabab 50 nafar bola qo‘shni mahallaga qatnayapti, hududda esa 70 sotix bo‘sh yer bor. Shu munosabat mahallalarda xususiy bog‘cha, maktab, klinika va sport inshootlari qurish uchun yerni auksionga chiqarish vakolati ham mahalla raisiga beriladi.
Davlat rahbari mahalla raisi ijtimoiy muammolarni hal qilish, tozalikni ta’minlash va daromadni ko‘paytirishga xizmat qiladigan loyihalarda tashabbuskor bo‘lishi zarurligini ta’kidladi.
Bunday loyihalar uchun “mahalla yettiligi”ga 10 million so‘mdan grant ajratiladi. Agar 8 ming 992 ta mahallaning har birida bittadan shunday loyiha amalga oshirilsa, hududlardagi muhit sezilarli o‘zgaradi. Ushbu maqsadlar uchun jami 240 milliard so‘m resurs shakllantiriladi.
Mahalla raisi o‘z hududining haqiqiy boshqaruvchisi bo‘lishi shart. Buning uchun u hokim yordamchisi, xotin-qizlar faoli, yoshlar yetakchisi, ijtimoiy xodim, profilaktika inspektori, soliqchi va mahalla bankirining haftalik hamda oylik ish rejasini tasdiqlab beradi. Rais “yettilik” a’zolariga aniq vazifa qo‘yib, ulardan so‘rov qilib boradi.
Shuningdek, “yettilik” faoliyatini metodik qo‘llab-quvvatlash va hududdagi muammolarga ilmiy yondashish uchun Mahallani rivojlantirish milliy instituti tashkil etiladi. U “yettilik”ni o‘qitadi, mahallalardagi dolzarb masalalarga ilmiy yechimlar ishlab chiqadi.
Ispaniya Fransiyaga qarshi o‘yinda nimani isbotladi?
Jaziramada konditsionersiz qanday yashash haqida 10 ta foydali maslahat
Jazirama sabab poyezdlar tezligiga cheklov qo‘yiladi
-
Siyosat3 days ago
Prezident Shavkat Mirziyoyev Qatar amiriga ta’ziya bildirdi
-
Sport5 days agoAngliya Norvegiyani turnirdan chiqarib yubordi
-
Jamiyat4 days agoToshkent metrosiga yana 3 ta zamonaviy poyezd qo‘shildi
-
Sport5 days agoJCh kundaligi. Yana fantastik o‘ynagan Jud, yana qiynalgan Argentina va Emboloda ahmoqona qizil
-
Sport4 days agoIspaniyada Fransiya milliy jamoasi haqidagi bayonot ortidan siyosiy mojaro avj oldi
-
Iqtisodiyot3 days ago
Andijonda Belarus texnologiyasi asosida qishloq xo‘jaligi texnikalari ishlab chiqariladi
-
Sport4 days agoInfantino yana JCh ishtirokchilari sonini oshirish g‘oyasi haqida gapirdi
-
Jamiyat4 days agoEnergetika tizimidagi ayrim rahbarlar ishdan olindi