Jamiyat
“Farg‘onada u zo‘r ekanini ko‘rsatib qo‘ymoqchi bo‘lgan” – tanishini mashinada qasddan urib o‘ldirgan shaxs ishida hukm o‘qildi
Farg‘onada Lacetti mashinasida tanishini urib ketib, o‘ldirgan shaxs jinoiy jazoga tortildi. Sud uni qasddan odam o‘ldirish jinoyatini sodir qilganlikda aybli deb topib, 14 yil 1 oyga ozodlikdan mahrum qildi. Marhumning yaqinlari yetim qolgan 4 bola uchun 4 mlrd so‘m moddiy va ma’naviy zarar so‘radi. Sudlanuvchi esa marhumni qasddan urib ketmaganini bildirdi.
Farg‘ona shahrida Lacetti mashinasi bilan tanishini urib ketib, o‘ldirgan shaxs ishi sudda ko‘rib chiqilib, hukm o‘qildi. Kun.uz sud hujjati bilan tanishdi.
Ko‘chadagi oshkora qotillik
Hukmda keltirilishicha, ushbu jinoyat 1993 yilda tug‘ilgan F.Z. tomonidan sodir etilgan.
U 2025 yil 10 iyul kuni marhum M.A. ukasi haqida noo‘rin gaplarni tarqatib yurganini vaj qilib, uni qasddan o‘ldirish rejasini tuzgan. F.Z. Lacetti mashinasini Farg‘ona shahri O‘zbekiston ovozi ko‘chasi bo‘ylab boshqarib borib, yo‘lning qarama-qarshi tomonida to‘xtagan. So‘ngra Lixiang L9 mashinasida o‘tirgan M.A. oldiga borib, avtomobil eshigini ochmoqchi bo‘lgan. Biroq mashina eshigi ichkaridan qulflangani sabab ocholmagan.
Shundan so‘ng F.Z. o‘zi bilan olib kelgan pichoq yordamida mashinaning haydovchi tomon oynasini sindirgan. M.A. uning tajovuzidan himoyalanish maqsadida yon o‘rindiqqa o‘tib, mashina eshigini ochgan va undan tushib qochgan. F.Z. uning ortidan quvib yetolmagan. Keyin o‘z mashinasiga qaytib, Lacetti’da M.A. ortidan quvgan va uni qasddan katta tezlikda urib ketgan. Oqibatda og‘ir tan jarohati olgan M.A. vafot etgan.
“Qasddan urib ketmadim”
F.Z. sudda aybiga iqror bo‘lmagan va M.A.ni qasddan urib ketmaganini, aslida ular o‘rtoq bo‘lishganini aytgan.
“M.A.ni 2000 yildan buyon taniyman. 2009 yili Olimpiya zaxiralari sport kollejida birga o‘qiganmiz. Aslida, o‘rtoq bo‘lganmiz. Hatto o‘zimga tegishli xonadonda birga yashaganmiz. Har xil gaplar sababli munosabatlarimiz biroz buzilib qolgandi. Voqeadan 20 kun avval kafeda u bilan qo‘l tashlashib, o‘rtamizdagi masala yopilgan. Shundan keyin yana kimdir noo‘rin gap-co‘z tarqatib, o‘rtamizni buzishga harakat qildi.
M.A.ning mashinasini yo‘lda ko‘rib qolib, u bilan so‘rashib olmoqchi bo‘ldim. Yo‘lning qarama-qarshi tomonida to‘xtab, yo‘ldan o‘tdim va M.A.ning mashinasini ochmoqchi bo‘ldim, lekin ichidan qulflangan ekan. M.A. mashina ichida o‘tirib, so‘kinib yubordi. Shunda jahlim chiqib, mashina oynasini bir necha marotaba qo‘lim bilan urdim. Oqibatda qo‘li sindi. M.A. mashinaning narigi eshigidan tushib, qochib ketdi. Uni biroz quvladim, ammo yetolmadim.
So‘ng mashinamga keldim va orqaga qayrilib, ketmoqchi bo‘ldim. Bir mashina yo‘limni qisdi. Shunda birinchi darajali yo‘ldan ikkinchi darajali yo‘lga o‘tishga majbur bo‘ldim. Qonagan qo‘limga qaragan paytimda kimnidir urib yubordim. Darhol to‘xtadim. Keyin M.A.ni urib yuborganimni bildim. U yerdan o‘sha yerda bo‘lgan tanish yigitlar ketkazib yuborishdi. M.A.da qasdim va uni o‘ldirish maqsadim bo‘lmagan”, degan F.Z. suddagi ko‘rsatmasida.
Shuningdek, u bu ishda aybi yo‘qligini, aslida yo‘l-transport hodisasi sodir bo‘lganini bildirib, suddan adolatli hukm chiqarishni so‘ragan.
“So‘xliklarni juda qiynab kelgan”
Sudda marhumning yaqinlari F.Z. “go‘yoki Farg‘onada u zo‘r ekanini ko‘rsatib qo‘yish uchun shunday qilganini” aytgan.
“F.Z. so‘xliklarni juda qiynab kelgan. Tovlamachilik yo‘li bilan bolalardan pul undirib kelgani haqida eshitganman, lekin jinoyatlariga o‘zim guvoh bo‘lmaganman. F.Z.ning jiyanimda adovati bo‘lgan. U jiyanimga go‘yoki Farg‘onada zo‘ri ekanini ko‘rsatib qo‘yish uchun shunday qilgan”, degan marhumning vakili.
Shuningdek, M.A.ning turmush o‘rtog‘i ham F.Z.ning adovati bo‘lganini bildirgan.
“Turmush o‘rtog‘imda adovati bo‘lgan. Uni o‘ldirish uchun qidirib yurganini ham eshitganman. Dastlab turmush o‘rtog‘im va sudlanuvchining munosabati yaxshi edi. F.Z. qamoqdan chiqqanidan keyin ularning orasi yomonlashdi”, degan u o‘z ko‘rsatmasida.
Ayol 4 nafar farzandi yetim qolganini aytib, suddan ularning har biri uchun 1 mlrd so‘mdan jami 4 mlrd so‘m moddiy va ma’naviy zarar undirib berishni so‘ragan.
Jazo
JIB Yozyovon tuman sudining 2025 yil 4 dekabrdagi hukmi bilan F.Z. Jinoyat kodeksining 97-moddasi (qasddan odam o‘ldirish) 1-qismida nazarda tutilgan jinoyatni sodir qilishda aybli deb topilgan. Unga 14 yil 1 oy muddatga ozodlikdan mahrum qilish jazosi tayinlangan.
F.Z. turli jinoyatlarni sodir qilib, bungacha 4 marta sudlangan. Xususan, JIB Farg‘ona shahar sudining 2018 yil 3 iyuldagi hukmi bilan Jinoyat kodeksining 267-moddasi (transport vositasini olib qochish) 2-qismining “b,v” bandlarida nazarda tutilgan jinoyatni sodir qilgani uchun 8 yil 1 oyga qamalgan. JIB Ohangaron tuman sudining 2022 yil 19 apreldagi ajrimiga ko‘ra, o‘talmagan 4 yil 14 kun jazosi axloq tuzatish ishlari jazosiga almashtirilgan. JIB Farg‘ona tuman sudining 2025 yil 14 yanvardagi ajrimi bilan esa o‘talmagan 1 yil 4 oy 5 kun jazosini o‘tashdan muddatidan ilgari shartli ravishda ozod qilingan.
Shu sababli sud hukmi bilan F.Z. o‘ta xavfli retsidivist deb topildi. Tayinlangan jazoni maxsus tartibli koloniyalarda o‘tashi belgilandi. Marhumning qonuniy vakili foydasiga 250 mln so‘m ma’naviy zarar undirish belgilandi.
F.Z. tanishini mashinasida urib ketgani avvalroq xabar qilingan edi. Prokuratura tomonidan nazorat tartibida o‘rganilganda uning xatti-harakatlarida qasddan odam o‘ldirish jinoyati alomatlari mavjudligi sababli, jinoyat ishi Jinoyat kodeksining 97-moddasiga qayta malakalangandi.
Buxoro viloyati hokimiga birinchi o‘rinbosar tayinlandi.
Jamshid Sharopov Buxoro viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari – viloyat iqtisodiyot va moliya boshqarmasi boshlig‘i lavozimiga tayinlandi.
Jamshid Sharopov 1984-yil 27-yanvarda G‘ijduvon tumanida tug‘ilgan. 2005-yilda Buxoro davlat universiteti, 2009 yilda Toshkent davlat iqtisodiyot universitetini tamomlagan. Ma’lumoti bo‘yicha mutaxassisligi-iqtisodchi.
Mehnat faoliyatini 2002-yilda AT “Paxta Bank”ning Buxoro viloyati boshqarmasi bank jarayonlari bo‘limi iqtisodiy bo‘linmasi mutaxassisi sifatida boshlab, ATB “Agrobank” Buxoro viloyati boshqarmasi boshlig‘i (2014-2020), O‘zbekiston Respublikasi Markaziy banki Buxoro viloyati bosh boshqarmasi boshlig‘i (2020-2021), Shofirkon tumani hokimi (2021-2023), ATB “Agrobank” agrosanoat majmuasi korxonalarini moliyalashtirish departamenti direktori o‘rinbosari (2023-2026) lavozimlarida faoliyat yuritgan.
Ayni paytga qadar u ATB “Agrobank” muammoli kreditlar bilan ishlash departamenti direktori vazifasida ishlab kelayotgan edi.
«O‘zbekiston Respublikasi mustaqilligining o‘ttiz besh yilligi munosabati bilan chet el fuqarolari va xorijda istiqomat qilayotgan vatandoshlarimizni mukofotlash to‘g‘risida»gi Prezident farmoni e’lon qilindi.
Mukofotlanganlar ro‘yxati:
“Do‘stlik” ordeni bilan
Ivan Sao – “BYD Auto” kompaniyasining Yevropa sotuv bo‘limi bosh direktori o‘rinbosari
Klod Imoven – Fransiyaning “MEDEF International” harakatining O‘zbekiston-Fransiya ishbilarmonlar kengashi raisi
Masayoshi Fujimoto – “Sojitz” kompaniyasi direktori
Sabine Maxl – BMTning O‘zbekistondagi doimiy koordinatori
Turaman Sinan – Shayxontohur tumanidagi “Outdoor Factory Toshkent” mas’uliyati cheklangan jamiyati kuzatuv kengashi raisi, Toshkent shahri
II darajali “Salomatlik” ordeni bilan
Qahorova Nilufar Hamroyevna – AQShning Garvard universiteti huzuridagi Boston bolalar shifoxonasi loyiha menejeri
Yuldasheva Nodira Muxamedovna – Kanadaning Toronto shahridagi Kanadadagi o‘zbekistonliklar uyushmasi asoschisi, “Sog‘lom yo‘l” tibbiy va diagnostik markazi rahbari
“Shuhrat” medali bilan
Abdullayeva Shahlo Abdirashidovna – Koreya Respublikasining Kvangju shahridagi Migrant ayollar huquqlarini himoya qilish va ta’lim berish markazi rahbari.
Podpolkovnik Baxtiyor Inoqov Surxondaryo viloyati ichki ishlar boshqarmasi boshlig‘i etib tayinlandi. U bunga qadar Ichki ishlar vazirligi Akademiyasi magistratura bosqichida tahsil olgan.
Tayinlov Xalq deputatlari Surxondaryo viloyati Kengashining jamoat xavfsizligi va kriminogen vaziyatga bag‘ishlangan navbatdan tashqari sessiyasida ma’lum qilindi.
Sessiyada viloyatdagi jinoyatchilik holati ham tahlil qilindi. Joriy yilning hisobot davrida hududdagi 723 ta mahallaning 528 tasida (73 foiz) bironta ham jinoyat sodir etilmagan. Ichki ishlar xodimlarining tashabbusi bilan aniqlanadigan jinoyatlar soni 40 foizga yaxshilangan.
Shu bilan birga, 28 ta mahalla «qizil» toifada qolayotgani qayd etildi.
Yangi IIB boshlig‘iga jinoyatchilikka qarshi kurashish samaradorligini oshirish, har bir mahallada xavfsizlikni ta’minlash, aholi bilan yaqin muloqotni yo‘lga qo‘yish va fuqarolarning ichki ishlar organlariga ishonchini mustahkamlash vazifalari yuklatildi.
Yangi o‘quv yili arafasida O‘zbekiston hududidagi umumta’lim maktablari, dehqon bozorlari va savdo majmualarida mavsumiy «Maktab bozorlari» tashkil etilmoqda.
Raqobat qo‘mitasi mavsumiy savdo jarayonlarida iste’molchilarning huquq va manfaatlarini himoya qilish, raqobat muhitini ta’minlash hamda aholini sifatli va hamyonbop mahsulotlar bilan ta’minlash muhimligini ta’kidladi.
Qo‘mita ota-onalar va o‘quvchilarga xarid vaqtida mahsulotning sifati, ishlab chiqaruvchisi, narxi va boshqa muhim ma’lumotlarga e’tibor qaratishni tavsiya qildi.
Tadbirkorlarga esa «Maktab bozorlari»da sotilayotgan mahsulotlar sifati va narxlarining asosliligini ta’minlash, iste’molchilarga zarur axborotlarni taqdim etish hamda ularning huquqlariga rioya qilish majburiyati eslatildi.
Raqobat qo‘mitasi maktab bozorlarida faoliyat yuritayotgan tadbirkorlarni darsliklar, maktab formalari, o‘quv-yozuv qurollari va boshqa anjomlar narxlarini asossiz oshirmaslikka hamda qonunchilik talablariga qat’iy amal qilishga chaqirdi.
Fuqarolar «Maktab bozorlari»da narxlarni asossiz oshirish holatlariga duch kelsa, Raqobat qo‘mitasining 1159 ishonch telefoni orqali murojaat qilishi mumkin.
Qo‘mita tomonidan maktab bozorlarida narxlar barqarorligini ta’minlash maqsadida monitoring ishlari olib borilishi ma’lum qilindi.
Prezidentning 2026-yil 14-avgustdagi PQ–294-son qarori bilan 2027-yil 1-yanvardan muddatli to‘lov xizmati operatorlari faoliyati tartibga solinadi.
Ma’lum qilinishicha, muddatli to‘lov xizmatini ko‘rsatuvchi yuridik shaxslar operator hisoblanadi. Ular iste’molchiga tovar yoki xizmatni muddatli to‘lov asosida olish imkoniyatini vositachi sifatida taqdim etadi.
Qarorning 3-bandi «d» kichik bandiga ko‘ra, ko‘chmas mulk operator ko‘rsatadigan muddatli to‘lov xizmatining obyekti bo‘la olmaydi. Shu sababli vositachi operator orqali uy-joyni «rassrochka»ga olish imkoniyati nazarda tutilmagan.
Biroq bu qoida uy-joyni bo‘lib-bo‘lib to‘lash asosida sotishni umumiy tarzda taqiqlamaydi.
Qarorning 3-bandi «a» kichik bandida sotuvchi tomonidan iste’molchiga tovarni to‘g‘ridan-to‘g‘ri sotish holatlari muddatli to‘lov xizmati tushunchasidan mustasno qilingan.
Shunga ko‘ra, quruvchi o‘zining qurgan uy-joyini xaridorga bevosita bo‘lib-bo‘lib to‘lash sharti bilan sotishi mumkin. Ya’ni yangi tartib quruvchi va xaridor o‘rtasidagi to‘g‘ridan-to‘g‘ri savdoni taqiqlamayapti.
Demak, ijtimoiy tarmoqlarda tarqalayotgan «endi uyni rassrochkaga olib bo‘lmaydi» degan talqin to‘liq to‘g‘ri emas. Cheklov aynan muddatli to‘lov operatorlari orqali ko‘chmas mulkni moliyalashtirishga taalluqli.
Yangi tartibga ko‘ra, muddatli to‘lov operatorlari maxsus reyestrga kiritiladi va ularning faoliyati Markaziy bank nazorati ostida bo‘ladi. Shuningdek, operatorlar bilan tuziladigan shartnomalar, ustama va komissiyalarga nisbatan aniq talablar belgilanadi.
Shunday qilib, 2027-yildan operator orqali uy-joyni «rassrochka»ga olish cheklanadi, ammo quruvchining xaridorga uyni bevosita bo‘lib-bo‘lib to‘lash sharti bilan sotishi saqlanib qoladi.
EChL 2026/2027. Umumiy guruh bosqichi taqvimi e’lon qilindi
Prezidentning Mustaqillik bayrami tabrigidan o‘rin olgan asosiy fikrlari
Oziq-ovqat ishlab chiqarishda qaysi hududlar yetakchi?
-
Siyosat5 days ago
«Milliy manfaatlarni himoya qilish dunyodan yopilish degani emas» — Sherzod Asadov
-
Iqtisodiyot4 days ago
Oziq-ovqat ishlab chiqarishda qaysi hududlar yetakchi?
-
Iqtisodiyot4 days agoPrezident ishtirokida umumiy qiymati 50 trln so‘mlik loyihalar ishga tushirildi
-
Siyosat21 hours ago
Prezidentning Mustaqillik bayrami tabrigidan o‘rin olgan asosiy fikrlari
-
Sport6 hours ago
EChL 2026/2027. Umumiy guruh bosqichi taqvimi e’lon qilindi