Iqtisodiyot
Eron urushi ta’siri va naqdsiz to‘lov mantiqsizliklari
“Yirik summalardagi oldi-sotdilarni naqdsiz shaklga o‘tkazishni tushunish mumkindir, lekin ayrim maishiy tovarlarni naqd pulga sotib olib bo‘lmasligi mantig‘ini tushuna olmadim. Bu cheklov – iqtisodiyot uchun ulkan xarajat degani, bu xarajat evaziga jamiyat nima oladi?”
Eron urushi fonidagi iqtisodiy beqarorlik va narxlarning tebranishi, O‘zbekistonda naqdsiz to‘lov tizimiga o‘tilishi va aholi daromadlari.
Kun.uz muxbiri ushbu iqtisodiy mavzularni Abu Dabidagi Nyu York universiteti professori Behzod Hoshimov bilan muhokama qildi.
Suhbatni to‘liq shaklda video orqali tomosha qilishingiz mumkin. Quyida iqtisodchining 1 apreldan kuchga kirgan naqdsiz to‘lov talablari yuzasidan bildirgan oid fikrlari keltirib o‘tiladi.
“Evaziga nima olamiz?”
— Men bu choraning mantig‘ini tushunmayapman. Odamlar yoqilg‘i sotib olish uchun naqd pulini majburan bank hisoblariga qo‘yishi kerak bo‘lyapti. Bu – vaqt oladigan narsa. Ya’ni siz naqd pulingizni kartaga tushirish uchun nafaqat komissiya to‘lash orqali, balki vaqt sarflash orqali ham xarajat qilasiz.
Naqd pulni bankomatga solgani uchun pul olish – menimcha, unikal, o‘zbekcha eksperiment bo‘lsa kerak. Men kamdan kam ko‘rganman bu narsani. Besh-oltita mamlakatda bankomatga naqd pul kiritganman, lekin O‘zbekistondan boshqa joyda buning uchun komissiya olishganini ko‘rmaganman.
Asosiy masala shundaki, biz bu xarajat evaziga nima olamiz, foydasi nimada degan savolga men javob topa olmayapman. Millionlab odam yoqilg‘i shoxobchasiga borishdan oldin qo‘lidagi pulini kartaga tushirib olishi kerak bo‘lyapti. Bu – jamiyat uchun ham, insonlar uchun ham, iqtisodiyot uchun ham vaqt nuqtayi nazaridan katta xarajat. Ya’ni odamning qimmatli vaqti ketadi, bu vaqtning ham narxi mavjud. Bu – juda katta iqtisodiy shikast. Lekin shunga yarasha biror foyda bo‘lsa, buni tushunish mumkin. Biz jamiyat sifatida ko‘plab qoidalar kiritishimiz, natijada iqtisodiy shikast bo‘lishi mumkin, lekin o‘sha qoidadan keladigan foyda va yo‘qotish tarosiga qo‘yilsa, foyda ancha ustun keladi. Ayrim maishiy tovarlarga nisbatan naqdsiz to‘lov qoidasiga kelganda esa, biz shuncha yo‘qotishlar evaziga nima olishimizga tushuna olmayapman.
Davlat kartaga pul kiritishdagi komissiyaga aralasha olmasligi, banklarni nol komissiya o‘rnatishga majburlamasligi to‘g‘ri bo‘lishi mumkin, chunki bu – bozor. Lekin insonlarning imkoniyatlarini cheklashda mantiq qanaqa? Inson qo‘lidagi naqd puliga maishiy narsalar sotib ololmaydigan qilib qo‘yildi.
Jinoiy manbalardan topilgan pulni legallashtirishga qarshi chora degan argument mavjud. Masalan, qaysidir byurokrat 50 ming dollar pora oldi. Endi u o‘sha pulga borib uy sotib olish imkoni bo‘lmasligi to‘g‘ridir. U olgan porasini legallashtirishini qiyinlashtirish kerak, to‘g‘ri. Lekin maishiy, masalan benzin sotib olishda naqd to‘lovni cheklashga mantiqni ko‘rmayapman.
100 ming dollardan oshiq tranzaksiyalar hammasi bank orqali bo‘lsin, xavfsizlik uchun, o‘sha noqonuniy topilgan pullarni legallashtirish masalasi borligi uchun, bu to‘g‘ri. Lekin 55 ming so‘mga benzin quyayotgan amakini borib, bankka borib pulini soldirish bilan nima yutamiz?
O‘zi aslida, naqdsiz to‘lov naqd to‘lashdan ko‘ra qulayroq: uni ko‘tarib yurish, har safar sanash, sotuvchidan qaytim olish kabi noqulayliklari yo‘q. Lekin millionlab odam ana shu noqulayliklarga qaramay naqd pulda to‘lov qilayotgan ekan, buning obektiv sabablari bor.
Masalan, O‘zbekistonda hozir daromad solig‘i to‘laydigan insonlarning jami mehnat resurslariga nisbatini olsangiz, 30 foiz ham emas-da. Taxminan 70 foiz mehnatga layoqatli insonning daromadlari rasmiy emas. Ko‘pchilik naqdga ishlaydi: kimdir kunbay nimadir ishlaydi, kimdir repetitorlik qilib naqd pul oladi va hokazo.
Yoki ikkinchi narsa: unutmaslik kerak, O‘zbekiston chet eldan kelayotgan pullarga juda ham bog‘liq mamlakat. 2025 yilda xorijdagi vatandoshlar O‘zbekistonga 19 milliard dollar pul yuborishdi. Buni budjetimiz yoki yalpi ichki mahsulotimiz taqqoslaganda ham, juda katta raqam. 19 milliard dollarning asosiy qismi – naqd shaklda kelgan. Masalan, o‘g‘li Rossiyada yoki Koreyada ishlaydigan ota: u jo‘natilgan pulni olib, dollarni so‘mga almashtirib, mashinasiga benzin quymoqchi… Ya’ni bunday odamlar ko‘pligi uchun bizda hali ham keng miqyosda naqd pul ishlatilyapti.
Lekin deylik, O‘zbekistonda oylik oladigan inson, oyligi kartasiga tushadi, u shundoq ham bundan oldin naqdsiz to‘lov qilardi. Ya’ni unga naqdsiz to‘lov o‘zi qulay edi. Uni unga da’vat qilish kerak emasdi naqdsiz to‘lovga o‘tgin deb. Masalan, men ko‘pincha naqdsiz to‘lovni yaxshi ko‘raman. Kamdan kam o‘zimda naqd pul olib yuraman. Lekin boshqa ko‘pchilik ham mavjud.
Davlat ishida ishlaydiganlar o‘zidan boshqacha hayot kechirayotgan millionlab insonlar mavjudligi haqida ham fikrlashlari kerak deb o‘ylayman-da shu narsada. Ya’ni ular o‘ylashadiki: “ha, hamma bizga o‘xshagan, oyligi tushadi kartaga, nimasi noqulay, shunday QR-kodni qilib to‘laysiz”, deb o‘ylashadi-da. Lekin qarashsa, AYoQShlarda ko‘p naqd tranzaksiyalar bo‘lyapti. Va ular aytishyaptiki, nimaga unaqa, kelinglar, majburan ularni naqdsiz tizimga o‘tkazamiz, deb.
Qarang, mana biz bilamiz: QR-kod orqali naqdsiz to‘lov qulayroq, to‘g‘rimi? Sanab o‘tirmaysiz, ko‘tarib yurmaysiz, qaytim degan narsa yo‘q va hokazo… Ammo bizda juda ko‘p tranzaksiyalar naqd bo‘lyaptimi, bu qo‘ng‘iroq bo‘lishi kerak: nima bo‘lyaptiki, odamlar naqd pul ishlatyapti? Ya’ni nimaga noqulay instrumentni ishlatishyapti? Buning ildiziga qarash o‘rniga biz chopib tashlayapmiz-da, o‘shani ko‘rmaylik ham, kuymaylik ham deb…
O‘zbekistondagi katta foiz insonlarda bu qulayliklar borligiga qaramasdan, qo‘lida naqd pul bor. Nima qilsak bo‘ladi, degan savolning o‘rniga, kelinglar, ularga naqd pulni ishlatishni taqiqlab qo‘yamiz, deyishyapti. Va yana qaytaraman, men yaqqol foydasini ko‘rmayapman. Zarari ko‘p – bu tushunarli, foydasi nima degan savolga men hali ham javob topa olmadim.
Agar yashirin iqtisodiyotni qisqartirish maqsad bo‘lsa, bu – yashirin iqtisodiyotni kamroq ko‘raylik, degan narsa. Bilasizmi, mana, kambag‘allik haqida ham O‘zbekistonda shunaqa-da. Misol uchun, O‘zbekistonda kambag‘allik ko‘p, lekin u bizga ko‘rinmaydi, masalan Toshkentda. Mana, bizdan ancha boyroq mamlakatlarga borsangiz, ko‘chada tilanchilar ko‘p, uysizlar ko‘p… Toshkentda esa, misol uchun, sal odamning kiyimi yaxshi bo‘lmasa, militsiya olib ketib qoladi. Lekin dunyoning yetakchi mamlakatlari poytaxtlarida uysiz qolgan odam o‘sha shahar hokimiyati tagida palatkada yashayveradi.
Biz ko‘rmaslikka harakat qilamiz. Bizda muammo bor: kambag‘al odamlar mavjud. Lekin uni ko‘rmaymiz biz. Qanaqa ko‘rmaymiz? Ularni o‘sha ko‘zimizdan yo‘qotamiz. Masalan, bizdan 50 barobar boy mamlakatlarda ham ko‘chada qanaqadir kambag‘al odamlarni ko‘rasiz. Toshkentda ko‘rmaysiz. Ko‘zimizdan yiroq qilamiz. Bu muammo yo‘q degani emas.
Aytaylik, uyingizda muammo bor: uyni yig‘ishtirish kerak, supurish kerak. Lekin agar gilamni ko‘tarib, supurindini uning tagiga supurib, gilamni yopib qo‘ysangiz, o‘sha narsa ko‘rinmaydi. Ha, ko‘rinmaydi, aslida esa muammo yo‘qolgani yo‘q: supurindi gilamning tagida chirib ketadi… Lekin to‘g‘ri, masalan, kimdir uyga kirganida qarasa, ko‘rinmasligi mumkin, chunki muammoni gilamning tagiga supurib, ko‘zga ko‘rinmaydigan qilib qo‘yganmiz.
Men ko‘p narsada shunaqa deb o‘ylayman. Rus tilida bir gap bor: “S glaz doloy – iz serdsa von” (ko‘zdan nari – ko‘ngildan nari) degan. Ya’ni ko‘zimga ko‘rinmasa, yuragimga ham ta’sir qilmaydi, degan bir xato fikr-da bu. “Ko‘rmay ham, kuymay ham”, deydi-yu o‘zbekchada. Shunaqaroq narsa qilyapmiz. Benzinda bo‘layotgan o‘sha naqd tranzaksiyalarni ko‘rmasak, go‘yoki shu bilan bizda yashirin iqtisodiyot masalasi hal bo‘lgandek…
Axir yashirin iqtisodiyotda manbasi bor odam bu choradan endi aytmaydi-ku: “Ha bo‘ldi, endi benzinda kartadan to‘lashim kerak, endi men borib hozir soliqni to‘layman”, demaydi-ku. Unaqa ishlamaydi-ku bu instrument. Yoki naqd shaklda repetitorlik qiladigan o‘qituvchi: “Bo‘ldi endi, kartada pulim bo‘lmasa, benzin quyolmas ekanman, shuning uchun 1 apreldan firma ochib rasman ishlayman, odamlar menga naqdsiz to‘lasin” demaydi-ku.
Biz “ko‘zdan nari – ko‘ngildan nari” deya, yashirin iqtisodiyotni o‘lchash vositalaridan birini yo‘qotib qo‘yamiz. Yashirin iqtisodiyot qanaqa o‘lchaydi? Mana, misol uchun benzin xaridida tranzaksiyalarning necha foizi naqd bo‘lyapti. Demak, odamlarning qo‘lida hali ham naqd bor. O‘sha AYoQShlardagi tranzaksiyalar qanaqadir ma’noda sizga barometr edi, qancha foiz odamlarning daromadi naqdligi borasida.
2026-yilning yanvar–aprel oylarida O‘zbekistondagi yirik korxonalar tomonidan 2,5 trln so‘mlik mebel mahsulotlari ishlab chiqarildi.
Milliy statistika qo‘mitasi ma’lumotlariga ko‘ra, bu ko‘rsatkich 2025-yilning mos davriga nisbatan 28,7 foizga oshgan.
Ishlab chiqarish hajmi bo‘yicha Toshkent shahri yetakchilikni saqlab qoldi. Poytaxtda to‘rt oy davomida 472,5 milliard so‘mlik mebel mahsulotlari ishlab chiqarilgan.
Keyingi o‘rinlarni Farg‘ona viloyati (298,2 milliard so‘m) va Andijon viloyati (280,6 milliard so‘m) egalladi. Toshkent viloyatida esa 248,3 milliard so‘mlik mahsulot tayyorlangan.
Statistikaga ko‘ra, Namangan viloyatida 217,3 milliard so‘mlik, Samarqand viloyatida esa 203,6 milliard so‘mlik mebel mahsulotlari ishlab chiqarilgan.
Xorazm viloyati 163,5 milliard so‘mlik ko‘rsatkich bilan yuqori o‘rinlardan joy olgan. Buxoro viloyatida bu raqam 137,8 milliard so‘mni tashkil etgan.
Qoraqalpog‘iston Respublikasida 123 milliard so‘mlik, Surxondaryo viloyatida esa 100,3 milliard so‘mlik mebel mahsulotlari ishlab chiqarilgan.
Qashqadaryo viloyati 88,7 milliard so‘m, Jizzax viloyati 80,7 milliard so‘m va Navoiy viloyati 62,7 milliard so‘mlik natija qayd etgan.
Eng past ko‘rsatkich Sirdaryo viloyati hissasiga to‘g‘ri kelib, hududda 33 milliard so‘mlik mebel mahsulotlari ishlab chiqarilgan.
17 iyun kuni beshinchi Toshkent xalqaro investitsiya forumining ochilish marosimi o‘tkazildi. Unda prezident Shavkat Mirziyoyev nutq so‘zladi. Bundan qashqari, yalpi sessiyada Albaniya prezidenti, bosh vazir va vazirlar, xalqaro tashkilotlar rahbarlari va siyosatchilar qatnashdi. Investorlarni “siz” deyishga tayyormiz, dedi Mirziyoyev o‘z chiqishida.
Forumda bu yili 4 mingdan ortiq delegatlar qatnashmoqda. Prezidentga ko‘ra, so‘nggi yillarda O‘zbekistonga 150 mlrd dollardan ortiq investitsiya jalb qilingan, shundan 123 milliardi oxirgi 5 yilga to‘g‘ri kelmoqda.
Yalpi sessiyada shuningdek, forum uchun kelgan xorijiy davlat prezident va hukumat rahbarlari ham chiqish qildi. Masalan, so‘zga chiqqan Albaniya prezidenti O‘zbekistondan ko‘proq turistlarni davlatiga taklif etdi.
“So‘nggi 10 yilda Albaniya iqtisodi rivojlandi, infratuzilma va aholi hayoti yaxshi tomonga o‘zgardi. Shu o‘rinda aytmoqchiman, Albaniya bugun xorijiy investorlarga o‘z investitsiyasiga 100% egalik huquqini beruvchi huquqiy asoslarga ega davlat. Jiddiy transformatsion bir davrda investitsiyaviy sheriklikni kengaytirish kerak, deb bilaman”, deydi Albaniya prezidenti.
Rossiya bosh vaziriga ko‘ra, oxirgi yillarda O‘zbekiston bilan Rossiyaning tovar aylanmasi 12,5 foizga o‘sgan.
“Bugungi kunda O‘zbekiston bozorida 3 mingdan ortiq rus kompaniyalari faoliyat ko‘rsatmoqda. 150 ga yaqin investitsiya loyihalariga egamiz, bu kamida 4 trln dollar degani. Istiqbolli yo‘nalishlarimiz ancha, masalan Samarqanddan Sankt-Peterburggacha bo‘lgan turistik yo‘nalishni ishlab chiqdik. Rossiya ishbilarmonlarini yanayam O‘zbekistonda faol bo‘lishga chaqiraman”, dedi Mixail Mishustin.
Ozarboyjon bosh vaziri ham global bozorlardagi o‘zgarishlar sabab investitsiyaviy yaqinlikni kengaytirishni gapirdi.
Belarus bosh vaziriga ko‘ra esa, Minsk Toshkentga sanoat sherikligini taklif qilmoqda.
“Belarus O‘zbekistonga investitsiya kiritish bo‘yicha MDH regionida 2-o‘rinda turibdi. Biz bu davlatga o‘z takliflarimizni berganmiz, ulardan biri sanoat sherikligi. Bizning qishloq xo‘jaligi texnikalarimiz, ayniqsa traktorlar allaqachon O‘zbekistonda ishlab chiqarilmoqda”, dedi Belarus bosh vaziri.
Investitsiya forumi ikki kun davomida turli sessiyalarda ham davom etadi. Unda energetika sektori, siyosiy xatarlar va aralash moliyalashtirish, korporativ boshqaruvning kelajagi, mas’uliyatli biznes yuritish, islomiy moliya va sukuk bozorlari, maxsus iqtisodiy zonalar, suv-energiya-oziq-ovqat zanjiri, yengil sanoat loyihalari, elektrotexnika va mashinasozlik, iqlimga mos agro platforma va boshqa mavzular muhokama qilinadi.
O‘zbekiston investorlar uchun ochiqligini saqlab qolishi kerak, deydi Kun.uz bilan gaplashgan Germaniyadagi KfW IPEX Banking Group vakili.
“Prezidentning gaplari ta’sirli, biz allaqachon O‘zbekistonda 2 mlrd yevrodan ortiq portfelga egamiz. Xususan, metallurgiya, tog‘-kon sanoati, energetika va qayta tiklanuvchi energiya manbalari, bank sohalarida juda faolmiz”, deydi Yekaterina Galitsina.
– Kredit reytinglarini yanada yaxshilash uchun O‘zbekiston yana nimalar qilishi kerak?
“Bu ko‘p masalalarga bog‘liq, lekin menimcha, shunchaki islohotlarni davom ettirish, xalqaro sarmoyalar oqimiga ochiq bo‘lish juda muhim. Chunki ko‘rib turganingizdek, bu yerga butun dunyodan, barcha mamlakatlardan juda ko‘p sarmoyalar kirib kelmoqda, to‘g‘rimi? G‘arb kompaniyalaridan tortib, Ko‘rfaz mintaqalari, Shimoliy mamlakatlar, Janubiy Osiyogacha. Va har bir mamlakat, har bir sarmoya mamlakat uchun yangi tajriba va yangi ko‘mak olib kelishi mumkin”, deya qo‘shimcha qildi u.
AQShning FLS kompaniyasi vitse-prezidenti Peter Flanagan fikricha esa O‘zbekiston mis sanoati bo‘yicha jahondagi yetakchilardan biriga aylanishi mumkin.
“Kecha prezident bizni, amerikalik investorlarni o‘z saroyida qabul qildi. Biz tog‘-kon sanoatida ishlaymiz, ya’ni oltin, mis, litiy kabi strategik muhim xomashyolarni chiqarishga yordam beruvchi texnologiyalarni ishlab chiqaramiz. O‘zbekistonda strategik minerallarning anchasi mavjud. Ular allaqachon o‘zlashtirilmoqda, masalan Olmaliqdagi yirik mis loyihasida qatnashyapmiz. Prezident nimalar bo‘layotganiga shaxsan qiziqadi. 38 yildan beri shu sohada ishlayman, qaysi kanalni qo‘ysangiz hozir strategik xomashyolarni gapiradi. Bilasizmi, mis bo‘yicha O‘zbekiston jahondagi yetakchilarga aylanishi mumkin”, deydi amerikalik investor.
Dunyoga mashhur arxitektura kompaniya Zaha Hadid Architecs direktori ham forum qatnashchilari qatorida. Uning kompaniyasi Yangi Toshkentdagi Alisher Navoiy tadqiqot markazini loyihalayapti.
“Birinchi marta investitsiya forumidaman. Mintaqada ancha yillardan beri faoliyat olib boramiz, O‘zbekiston uchun sarmoyaviy imkoniyatlar va qiziqarli loyihalar ko‘payotganini ko‘rish yoqimli”, deydi Manuela Gatto.
– O‘zbekiston bilan bog‘liq loyihangiz haqida eshitdim. Bizning tomonimiz bilan ishlash qanchalik qulay yoki oson bo‘ldi?
– Biz uchun juda oson bo‘ldi. Biz Yangi Toshkent direksiyasi bilan, ya’ni hukumat tomoni bilan ishladik va biz uchun hamma narsa juda oddiy va tushunarli edi, shu bois hech qanday muammoga duch kelmadik.
– U qachon amalga oshiriladi?
– Xo‘sh, hozirda u qurilish bosqichida, poydevor qismini qurib bo‘lishdi va u keyingi bir necha yil ichida qad rostlaydi.
– Loyihangiz haqida ko‘proq ma’lumot bera olasizmi? Uni qanday tanladingiz va O‘zbekiston tomonidan moliyalash haqida nima deya olasiz?
-Xo‘sh, biz me’mormiz, shu sababli moliyaviy tomoni bilan bevosita shug‘ullanmadik. Bu Yangi Toshkentni, ya’ni shu yerda, Toshkent yonida quriladigan ikki million aholiga mo‘ljallangan yangi shaharni moliyalashtirishning bir qismi hisoblanadi. Demak, bu hukumat tomonidan moliyalashtiriladi va biz me’mor sifatida o‘z xizmatlarimizni taqdim etyapmiz, deya qo‘shimcha qildi ZHA direktori.
Eslatib o‘tamiz, prezident Mirziyoyev o‘z nutqida shuningdek, nufuzli iqtisodiy reytingda mamlakat 14 pog‘ona yuqorilagani, bu yili O‘zbekiston YaIM 180 mlrd dollardan oshishini ma’lum qildi. Forum 18 iyun kuni o‘z ishini yakunlaydi.
Iqtisodiy tadqiqotlar va islohotlar markazi ma’lumotlariga ko‘ra, 2026-yil may oyi yakunida O‘zbekiston hududlarida tadbirkorlik faolligining asosiy ko‘rsatkichlari bo‘yicha barqaror o‘sish qayd etildi.
Monitoring Soliq qo‘mitasi, Bojxona qo‘mitasi, Markaziy bank hamda Respublika tovar-xom ashyo birjasining tezkor ma’lumotlari asosida o‘tkazilgan. Natijalar iqtisodiyotning turli yo‘nalishlarida ijobiy dinamika saqlanayotganini ko‘rsatdi.
Xususan, soliq tushumlari o‘tgan yilning mos davriga nisbatan 39,8 foizga oshdi. Eng yuqori o‘sish Navoiy, Sirdaryo, Toshkent, Qashqadaryo va Samarqand viloyatlarida qayd etildi. Ushbu hududlarda o‘sish sur’atlari o‘rtacha 30 foizdan yuqori bo‘lgan.
Shu bilan birga, jismoniy shaxslardan olinadigan daromad solig‘i tushumlari 18,6 foizga, mol-mulk solig‘i 15,2 foizga va yer solig‘i 31,9 foizga ko‘paygan.
Tashqi iqtisodiy faoliyat ko‘rsatkichlari ham yuqori o‘sishni namoyon etdi. Tovarlar eksporti hajmi yillik hisobda 31,8 foizga oshgan.
Bu borada Navoiy viloyati 53,7 foizlik o‘sish bilan birinchi o‘rinni egalladi. Toshkent viloyatida eksport 52,8 foizga ko‘paygan. Andijon, Samarqand, Surxondaryo, Buxoro viloyatlari hamda Toshkent shahrida ham yuqori natijalar qayd etildi.
Bojxona to‘lovlari 20,1 foizga o‘sdi. Namangan viloyatida bu ko‘rsatkich 63,3 foizni, Navoiy viloyatida esa 52,8 foizni tashkil qildi. Farg‘ona, Samarqand va Qoraqalpog‘istonda ham barqaror o‘sish kuzatildi.
Kreditlash sohasida eng yuqori o‘sish Samarqand viloyati hissasiga to‘g‘ri keldi. Hududda ajratilgan kreditlar hajmi 54,8 foizga oshgan.
Hisobot davrida mamlakat bo‘yicha 36 ming 957 ta yangi korxona ro‘yxatdan o‘tkazildi. Eng ko‘p yangi subyektlar Toshkent shahrida — 8 ming 29 ta qayd etildi.
Shuningdek, Toshkent viloyatida 3 ming 857 ta, Xorazm viloyatida 3 ming 151 ta, Samarqand viloyatida 2 ming 994 ta va Farg‘ona viloyatida 2 ming 662 ta yangi korxona tashkil etildi.
Respublika tovar-xom ashyo birjasidagi bitimlar hajmi esa 14,2 foizga oshdi. Birja faolligi bo‘yicha Navoiy viloyati 46,6 foizlik o‘sish bilan yetakchilik qildi. Buxoro, Surxondaryo, Sirdaryo va Xorazm viloyatlarida ham mazkur ko‘rsatkich o‘rtacha 30 foizdan yuqori o‘sgan.
Prezident administratsiyasi rahbari Saida Mirziyoyeva Toshkent xalqaro forumida ishtirok etish uchun kelgan Rossiya hukumati raisi Mixail Mishustin bilan uchrashdi.
Foto: Saida Mirziyoyeva / Telegram
Mirziyoyevaning so‘zlariga ko‘ra, suhbat chog‘ida ikki mamlakat o‘rtasidagi savdo-iqtisodiy hamkorlik masalalari muhokama qilingan.
“O‘zbekiston va Rossiya munosabatlari jadal rivojlanishda davom etmoqda. Bugungi kunda biznes, infratuzilma va madaniyat sohalarida ko‘plab qo‘shma loyihalar amalga oshirilmoqda. Yaqin kunlarda Hukumatlararo komissiya hamda Hududlar kengashining navbatdagi yig‘ilishlari bo‘lib o‘tadi.
Ushbu tadbirlar sheriklikdagi faoliyatimizning barcha yo‘nalishlariga qo‘shimcha turtki berishiga ishonaman”, – deya yozdi PA rahbari o‘z Telegram-kanalida.
Suratlar:
Markaziy bank 2026-yil 16-iyundan valyutalarning yangi kursini belgiladi.
AQSh dollari 1,98 so‘mga tushib, 11 979,83 so‘m etib belgilandi.
Yevro kursi 25,26 so‘mga oshdi va 13 904,99 so‘m bo‘ldi. Funt-sterling 16 085,32 so‘m bo‘ldi (+4,53).
Rossiya rubli 164,99 so‘m etib belgilandi (-0,14).
Prezident Ozarbayjon va Belarus bosh vazirlarini qabul qildi
Qidiruvdagi shaxsning uyidan katta miqdorda narkotik topildi
Prezident va AQSh moliyaviy gigantlari o‘rtasidagi yopiq muloqot tafsilotlari
-
Siyosat2 days ago
«Ushbu masalani shaxsan nazoratimga oldim» — Saida Mirziyoyeva giyohvandlikka qarshi kurash haqida
-
Jamiyat3 days agoFarg‘onada “Lasetti” qarama-qarshi yo‘nalishga chiqib ketishi oqibatida ikki kishi halok bo‘ldi
-
Mahalliy3 days ago
my.gov.uz — 35 yilda odamlarning vaqtini qaytarib berdi!
-
Jamiyat4 days ago16−18 iyun kunlari Toshkent shahriga yuk mashinalari kiritilmaydi
-
Sport2 days agoEron Amerikaga bordi, Osiyo Yevropaning ta’zirini berayotir – JCh kundaligi
-
Sport4 days agoJCh-2026. Osiyoning ikki jamoasi Yevropa vakillariga qarshi maydonga tushadi
-
Mahalliy3 days ago
Quyoshda turgan suvning ta’mi emas, tarkibi o‘zgaradi… bu esa juda xavfli
-
Jamiyat3 days agoO‘zbekistonda qaysi fintex ilovalardan ko‘p foydalanilmoqda?