Tergovchi va advokatga nisbatan jinoyat ishi qo‘zg‘atildi. 

Namangan viloyati IIB Tergov boshqarmasi tergovchisi o‘zining ish yurituvida bo‘lgan, Chust tumanida yashovchi, 2006-y.t. fuqaroga nisbatan qo‘zg‘atilgan jinoyat ishini uning foydasiga ijobiy hal qilib, tugatib yuborish evaziga ishga aloqador bo‘lmagan advokat orqali 40 ming AQSh dollari talab qilgan. 

Davlat xavfsizlik xizmati xodimlari tomonidan Chust tumanida o‘tkazilgan tezkor tadbirda advokatlar hay’ati advokati gumonlanuvchining otasidan 40 ming AQSh dollarini olgan vaqtida ashyoviy dalillar bilan ushlandi. 

So‘ngra tezkor tadbir davom ettirilib, advokatdan 30 ming AQSh dollarini olgan vaqtida tergovchining noqonuniy harakatiga chek qo‘yildi. 

Hozirda tergovchiga nisbatan Jinoyat Kodeksining 210-moddasi (pora olish) bilan, advokatga esa JKning 212-moddasi (pora olish-berishda vositachilik qilish) bilan jinoyat ishi qo‘zg‘atilib,«qamoq» ehtiyot chorasi qo‘llanildi.

Source link

O‘zbekistonda shahar avtobuslari yo‘lkirasini avtobusga chiqayotgan paytda to‘lash qoidasi o‘rnatilmoqda. 1 sentabrdan boshlab, avtobusga chiqayotgan paytda yo‘l haqini to‘lamagan yo‘lovchilar chiptasiz yurgan deb hisoblanadi va bu jarimaga sabab bo‘lishi mumkin. Bu yangi qoida brutto-shartnoma asosidagi shahar avtobus yo‘nalishlariga taalluqli.

2026 yil 1 sentabrdan boshlab shahar avtobuslarida yo‘lkirani avtobusga chiqish paytida to‘lash majbur bo‘ladi.

Transport vazirligining xabar berishicha, bunday tartib 3 iyun kuni imzolangan hukumat qarorida ko‘zda tutilgan.

Yangi qoidaga ko‘ra, yo‘lovchi yo‘lkira haqini validatorlar bilan jihozlangan avtobusga chiqish vaqtida, quyidagi usullar orqali to‘lashi kerak:

transport kartasini validatorga tekkizgan holda uni validatsiya qilish;

bank kartasi, smartfon va boshqa kontaksiz elektron to‘lov turlaridan foydalanish (NFC, QR, Biometric, BLE, UWB va boshqa texnologiyalar yordamida to‘lash);

ijtimoiy/transport kartasini validatorga tekkizgan holda imtiyozli yoki bepul yurish huquqini tasdiqlash.

Yo‘lkira yuqorida sanab o‘tilgan usullar orqali avtobusga chiqish vaqtida to‘lanmagan (tasdiqlanmagan) taqdirda, yo‘lovchi avtobusda chiptasiz yurgan deb hisoblanadi.

Mazkur qoida 2026 yil 1 sentabrdan e’tiboran, brutto-shartnoma asosidagi shahar avtobuslarida amal qila boshlaydi.

Source link

Jizzax shahridagi savdo nuqtalaridan birida o‘tkazilgan tekshiruvlar davomida Xitoyda ishlab chiqarilgan ayrim bolalar o‘yinchoqlari xavfsizlik talablariga javob bermasligi aniqlandi. Shu munosabat bilan mahsulotlarni savdodan chiqarish va realizatsiyasini to‘xtatish choralari ko‘rildi.

Foto: Nazorat inspeksiyasi

Texnik jihatdan tartibga solish sohasida nazorat inspeksiyasining Jizzax hududiy bo‘limi hamda Sanitariya-epidemiologik osoyishtalik va jamoat salomatligi boshqarmasi mutaxassislari tomonidan o‘tkazilgan tekshiruvlarda bir qator bolalar o‘yinchoqlaridan namunalar olinib, laboratoriya sinovlari o‘tkazildi.

Tekshiruv natijalariga ko‘ra, ayrim mahsulotlarda o‘tkir hid mavjudligi, himoya qoplamasining namlikka chidamsizligi, mayda detallarning mustahkam biriktirilmagani, mexanik ta’sirga bardosh bermasligi hamda formaldegid miqdori belgilangan me’yorlardan yuqori ekani aniqlangan.

Mutaxassislar formaldegid bolalarning nafas yo‘llari, ko‘z va teriga salbiy ta’sir ko‘rsatishi, allergik reaksiyalarni kuchaytirishi mumkinligini ta’kidlamoqda. Shuningdek, o‘yinchoqlardagi mayda qismlarning oson ajralishi bolalarning ularni yutib yuborishi yoki jarohat olishiga sabab bo‘lishi mumkin.

Shu asosda savdo sub’yektlariga ogohlantirish xatlari yuborilib, mazkur mahsulotlarni sotuvdan chiqarish bo‘yicha tegishli choralar ko‘rildi.

Source link

Milliy statistika qo‘mitasi ma’lumotlariga ko‘ra, 2026 yil 1 yanvar holatiga yurtimizda 0–14 yoshdagi jami bolalar soni 11 630 879 nafarni tashkil etadi.

Shundan:

O‘g‘il bolalar – 6 030 736 nafar
Qiz bolalar 0-14 yosh oralig‘idagi O‘g‘il bolalar– 5 600 143 nafar 

Eslatib o‘tamiz, ayni paytda O‘zbekistonning doimiy aholisi soni 38 485 250 nafarni tashkil etmoqda. Shundan 19,3 mln erkaklar, 19,1 mln ayollardir.

Source link

Toshkent viloyatida davlat zaxirasidagi 1,5 gektar yer maydonini mansabdor tanishlari orqali rasmiylashtirib berishni va’da qilgan shaxs 750 ming dollar talab qilib, oldindan 20 ming dollar olgan vaqtida qo‘lga olindi.

Davlat xavfsizlik xizmati Toshkent viloyati bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari tomonidan yer maydonini noqonuniy rasmiylashtirib berish bilan bog‘liq holat fosh etildi.

Aniqlanishicha, Toshkent shahrida yashovchi, 1979 yilda tug‘ilgan shaxs tadbirkorlik faoliyati bilan shug‘ullanmoqchi bo‘lgan fuqaroning ishonchiga kirib, Yangiyo‘l tumanida joylashgan va davlat zaxirasida bo‘lgan 1,5 gektar yer maydonini arxitektura hamda kadastr tizimlarida ishlovchi mansabdor tanishlari orqali uning nomiga rasmiylashtirib berishini aytgan.

Evaziga u 750 ming AQSh dollari talab qilgan.

O‘tkazilgan tezkor tadbir davomida gumonlanuvchi so‘ralgan mablag‘ning bir qismi sifatida oldindan 20 ming AQSh dollarini olgan vaqtida ashyoviy dalillar bilan ushlandi.

Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.

DXX fuqarolarni shu kabi qonunbuzilish holatlariga duch kelgan taqdirda idoraning 1520 qisqa raqami orqali murojaat qilishga chaqirdi. Ma’lum qilinishicha, murojaat etuvchilarning shaxsi sir saqlanishi kafolatlanadi.

Source link