Sport
«Da Lush»dagi mojaro: Vinisiusni «maymun» deb kamsitishdi
Yevropa Chempionlar Ligasi pley-offi doirasidagi «Benfika» — «Real» o‘yinini futbol muxlislari qiziqish bilan tomosha qildi. Chunki Mourinio boshchiligidagi «Benfika» oldingi bosqichda «Real»ni sensatsion tarzda mag‘lub etgandi. Lekin ikki katta klub o‘rtasidagi bu galgi to‘qnashuv oldingisi kabi darvozabon gol urgani bilan emas, yoqimsiz voqea bilan yodda qoldi.
«Benfika»ning argentinalik futbolchisi Janluka Prestiani «Real»ning qora tanli futbolchisi Vinisius Juniorni «maymun» deb atab haqorat qildi. Bu juda yomon voqea bo‘ldi. Shunchalik yomonki, sobiq «Barselona» o‘yinchilari Vinisiusni qo‘llab chiqdi.
Nima bo‘ldi o‘zi?
Voqea 18 fevral kuni Lissabondagi «Estadio da Lush» stadionida sodir bo‘ldi. Madridning «Real» klubi Chempionlar Ligasi oldingi bosqichida kuchli sakkizlikka kira olmagani uchun pley-offda o‘ynashga majbur bo‘ldi. Alvaro Arbeloa murabbiyligida o‘ynayotgan «Real» shu kuni Joze Mourinio qo‘l ostidagi «Benfika» mehmoni bo‘ldi. Uchrashuv 1:0 hisobida «Real»ning g‘alabasi bilan tugadi. 50-daqiqada Vinisius Junior juda chiroyli gol urib, Madridga g‘alaba keltirdi. Barchasi ana shu goldan keyin boshlandi…
Vini chiroyli gol urganidan zavqlanib, qanotdagi bayroqcha oldiga borib, brazilchasiga raqsga tushdi. Mezbon muxlislar o‘zlariga qarab raqsga tushgan futbolchiga hushtakbozlik qilishdi. Keyinroq Vinisius hakamning oldiga yugurib borib, «Benfika» futbolchilaridan biri uni haqorat qilganini aytdi.
Bu epizoddan oldinroq mezbonlarning argentinalik futbolchisi Janluka Prestiani qo‘lini og‘ziga qo‘yib Viniga nimadir deganini ko‘rish mumkin. «Real» yetakchisining aytishicha, Prestiani uni kamida besh marta «maymun» deb haqorat qilgan. Madridliklar hujumchisi Mbappe ham buni tasdiqladi. Kilian odatda futboldan tashqari mavzular haqida gapirmaydi, lekin bu o‘yindan keyin chiqish qilib, Presitani Vinisiusni irqchilik kayfiyatida haqorat qilganini aytdi.
Futbol oilasi ikkiga bo‘lindi
Chempionlar Ligasi pley-offining barcha o‘yinlari mana shu epizod soyasida qolib ketdi, chunki Vini bilan bog‘liq holatda dunyo futbolidagi og‘ir mavzu yana o‘rtaga chiqdi. Muxlislar, futbol oilasi ikkiga bo‘lindi. Aksar futbolchilar, muxlislar, murabbiylar bunaqa futbolda irqchilikka o‘rin yo‘qligi haqida gapirdi, hatto sobiq «Barselona» futbolchisi Tiyeri Anri bu holatda «Men madridistman», deb chiqdi.
Biroq bir guruh futbol odamlari Vinisiusni ayblab chiqdi. Ular nega doim Vini bilan shunaqa voqealar sodir bo‘ladi, degan mantiqqa asoslanib, braziliyalik futbolchini tanqid qilyapti. Xususan, «provokatsiyalar qiroli» Joze Mourinio ham shunday fikr bildirdi. Aytgancha, Vini super gol urgan o‘yin oxirida Mourinio qizil kartochka oldi va Madriddagi javob o‘yinini o‘tkazib yuboradigan bo‘ldi.
Chindan Vinisius Junior mojaro markazida bo‘lishni yaxshi ko‘radigan futbolchi. Ispaniyaning ko‘p stadionlarida, ayniqsa Valensiyada uni juda yomon kutib olishadi, hushtakbozlik qilishadi. Lekin bu Vinisius provokator degani emas. U kuchli o‘yinchi, himoyachilarni ko‘rdim demay aldab ketadi, chiroyli gollar uradi. Yagona aybi qanotda o‘ynagani uchun muxlislar uni haqorat qilganini eshitib chidab turolmaydi va javob beradi. Keyin gol urib ularga qarab nishonlaydi. Futbolchi kar bo‘lishi kerak, degan oltin qoidaga amal qilmaydi.
Lekin uning o‘rnida bo‘lishni tasavvur qilish uchun qora tanli odam bo‘lish kerak, menimcha. Sizni Xudo qora qilib yaratgan bo‘lsa-yu, odamlar xuddi bu kamchilikdek masxara qilsa, «maymun» desa, maymunning ovozini chiqarsa, banan uloqtirsa, bunga chidash qiyin. E’tibor bergan bo‘lsangiz, irqchilik bilan bog‘liq mojarolarga tezda qora tanli futbolchilar munosabat bildirib chiqadi, chunki ular buni o‘z tanasida his qilgan.
Shu o‘rinda bir narsani unutmaslik kerak, argentinalik futbolchilar orasida millatchilik kayfiyati juda kuchli. «Da Lush»dagi o‘yin davomida Prestianidan tashqari yana bir argentinalik futbolchi, «Benfika» sardori Nikolas Otamendi Vinisiusni provokatsiya qildi. U «Real» futbolchisiga qornidagi jahon kubogi va Amerika kuboklarining tatuirovkasini ko‘rsatdi, xuddi senda bunaqa mukofot yo‘q, deganday.
Enso Fernandes degan irqchi o‘z sahifasida jonli efir qilayotganda argentinalik futbolchilar jamoa bo‘lib fransiyalik qora tanli futbolchilarni kamsitgandi. Aytmoqchi bo‘lganim, o‘sha epizodda Vinisiusni emas, provokatorlar Prestiani va Otamendini jazolash kerak.
Va ko‘pchilik Vinisiusni ayblayotganlar bir jihatga e’tibor bermayapti. U o‘sha kuni Chempionlar Ligasida gol urdi, futbol tarixidagi eng zo‘r musobaqa pley-offida. Bu ajoyib turnir musiqasini eshitiboq millionlab muxlislar yuragi junbishga keladi. Endi Chempionlar Ligasida musobaqa tarixidagi eng sovrindor jamoa safida 70 ming raqib muxlislari ko‘z o‘ngida super gol urgandagi hissiyotni tasavvur qilavering.
Bunaqa vaqtda erkak odam hissiyotlarini jilovlashi qiyin bo‘ladi. Vini o‘z golidan zavqlanib, uni raqs bilan nishonladi, bu hech qanaqasiga haqorat emas. Agar Vinining gol nishonlashi haqorat bo‘lsa, Ronaldu va Simeonening gol nishonlashlari nima deyiladi? Bir narsa aniq, Vinisius ajoyib futbolchi va yosh yigitlar aynan unga o‘xshagan chiroyli o‘yin ko‘rsatadigan atletlarga qarab futbolga mehr qo‘yadi, Prestianiga o‘xshagan irqchi rasistlarga qarab emas…
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
Shavkat Mirziyoyev Shinjon usulida yetishtirilgan paxta dalasini ko‘zdan kechirdi
O‘zbekiston do‘konlarida 73 turdagi mahsulot sifatsiz deb topildi
Tadbirkorlar jarimaning 50 foizini to‘lab, qolgan qismidan ozod etilishi mumkin
-
Jamiyat5 days ago
Toshkentda xalqaro moda akademiyasi tashkil etiladi
-
Iqtisodiyot2 days ago
O‘zbekiston «Wabtec» kompaniyasi bilan lokomotivlar parkini yangilashni muhokama qildi
-
Iqtisodiyot18 hours ago
Shavkat Mirziyoyev Shinjon usulida yetishtirilgan paxta dalasini ko‘zdan kechirdi
-
Jamiyat2 days ago
Tadbirkorlar jarimaning 50 foizini to‘lab, qolgan qismidan ozod etilishi mumkin
-
Jamiyat2 days ago
O‘zbekiston do‘konlarida 73 turdagi mahsulot sifatsiz deb topildi