Toshkent viloyatida xorijdan olib kelingan sintetik narkotik moddalar olindi. 

Toshkent shahrida yashovchi, 1993 y.t., muqaddam sudlangan, hozirda probatsiya hisobida turgan shaxs va uning 1995-y.t. sherigi Toshkent viloyatining Yuqorichirchiq tumanida joylashgan dala maydonidagi xufiya joydan 2 kg 381 gr «Alfa-PVP» sintetik giyohvandlik vositasini olib, ortga qaytayotgan vaqtlarida Davlat xavfsizlik xizmatining Toshkent viloyati bo‘yicha boshqarmasi hamda Bojxona organlari xodimlari tomonidan qo‘lga olindi.

Aniqlanishicha, ushbu sintetik narkotik modda «Telegram» messenjeridagi internet narkodo‘kon a’zolari tomonidan Rossiya Federatsiyasidan mamlakatimizga olib kelingan. 

Boshqa holatda esa Yangiyo‘l shahrida faoliyat yurituvchi tijorat banklaridan birining 2 nafar mutaxassisi muqaddam narkokur’yerlar Yangiyo‘l tumanidagi dala maydoniga yashirib ketgan 485 gr «Alfa-PVP» sintetik giyohvandlik vositasini qabul qilib olib, o‘zlarining 1998-y.t. tanishini xonadonida saqlayotganliklari aniqlandi. 

Ko‘rilgan chora-tadbirlar natijasida ulardan ushbu giyohvandlik vositasi ashyoviy dalil sifatida olindi.

Hozirda har ikki holat bo‘yicha jinoyat ishlari qo‘zg‘atilib, mazkur shaxslarga nisbatan «qamoq» ehtiyot chorasi qo‘llanildi.

Tergov harakatlari olib borilmoqda.

Source link

Tasodifan kaustik soda ishqorini yeb yuborib, mutlaqo ovqatlana olmaydigan holatga tushgan bolaning oshqozoni qayta joylashtirildi, yo‘g‘on ichakdan yangi qizilo‘ngach shakllantirildi.

Foto: Sog‘liqni saqlash vazirligi

Shifokorlar tomonidan noyob va o‘ta murakkab operatsiya amalga oshirilib, og‘ir ahvoldagi 5 yoshli bolaning hayoti saqlab qolindi. Bu haqda Sog‘liqni saqlash vazirligi xabar berdi.

Ma’lum qilinishicha, u tasodifan kaustik soda ishqorini yeb yuborgan, oqibatda qizilo‘ngachning chandiqli torayishi yuzaga kelib, vaqt o‘tishi bilan mutlaqo ovqatlana olmaydigan holatga tushgan. Ota-ona farzandini xorijda davolatishga qaror qilgan. Ammo xorijdagi amaliyot vaqtida qizilo‘ngach oshqozon hisobidan qayta shakllantirilib, oshqozon yuqoriga ko‘tarilgan holda qizilo‘ngach qoldig‘iga ulangan. Bu esa yangi transplantantning yurakka bosim o‘tkazishiga va uni siqib qo‘yishiga olib kelgan.

Shundan so‘ng, Respublika shoshilinch tibbiy yordam ilmiy markazi jarrohlari murakkab operatsiyani amalga oshirib, oshqozonni qayta joylashtirib, yo‘g‘on ichakdan yangi qizilo‘ngach shakllantirilgan.

«Tibbiyot fanlari doktori, professor Habibulla Oqilov boshchiligidagi mutaxassislar tomonidan o‘tkazilgan operatsiya qariyb 5 soat davom etdi. Yurtimizda ilk bor bajarilgan ushbu o‘ta murakkab amaliyotda oshqozon qayta joylashtirilib, yo‘g‘on ichakdan yangi qizilo‘ngach shakllantirildi. Hozir bolaning ahvoli yaxshi. Shu kunlarda oilasi bag‘riga qaytadi», deyiladi xabarda.

Source link

2026-yil 1-aprel holatiga ko‘ra, O‘zbekistonda soliq qarzi 100 mln so‘mdan yuqori bo‘lgan ishlab chiqarish korxonalari soni 996 tani tashkil etdi. Ularning umumiy qarzi 1 trln 583,3 mlrd so‘mga yetgan.

Ma’lumotlarga ko‘ra, mazkur qarzning katta qismi ayrim yirik korxonalar hissasiga to‘g‘ri keladi. Xususan, jami qarzning 569,8 mlrd so‘mi, ya’ni 36 foizi eng katta qarzdor hisoblangan 10 ta korxonaga to‘g‘ri kelgan.

Eng yirik qarzdorlar ro‘yxatida «Shaffof Metan Sanoat» MChJ 191,1 mlrd so‘m bilan birinchi o‘rinda qayd etilgan. Undan keyin «Silikon Color» MChJ — 74,4 mlrd so‘m va «Navoiyazot» aksiyadorlik jamiyati — 68,4 mlrd so‘m qarz bilan joy olgan.

Shuningdek, yirik qarzdorlar orasida yana «Granula Plast Sifat» MChJ — 68,2 mlrd so‘m va «Fargona neftni qayta ishlash zavodi» — 45,6 mlrd so‘m qarz bilan yuqori o‘rinlarda turibdi.

Hududlar kesimida soliq qarzdorligi eng yuqori ko‘rsatkich Farg‘ona viloyatida kuzatildi. Bu yerda korxonalar qarzi 349,5 mlrd so‘mga yetgan.

Ikkinchi o‘rinda Toshkent viloyati — 299,5 mlrd so‘m, uchinchi o‘rinda esa Andijon viloyati — 182 mlrd so‘m bilan qayd etildi.

Source link

Ijtimoiy tarmoqlarda Toshkent shahri Yangihayot tumanidagi 566-sonli davlat maktabgacha ta’lim tashkilotida tarbiyachi 3 nafar bolani hojatxonaga qamab qo‘ygani haqida xabarlar tarqaldi. Tarbiyachilarning aytishicha, 3 nafar bola hojatxonaga qamab qo‘yilgan, ularning bittasi qo‘li bog‘lab qo‘yilgan. Holat huquqni muhofaza qiluvchi organlar va Toshkent shahar maktabgacha va maktab ta’limi boshqarmasi tomonidan o‘rganilmoqda.

Voqea haqida qamab qo‘yilgan bolalardan birining onasi Instagram’da video e’lon qilgan. Unda bola qo‘rqib yig‘lab chiqqani aytiladi. Shuningdek, ota-onalar Telegram guruhida boshqa ota-onalar ham farzandlarining gaplariga tayanib, shunga o‘xshash holat bo‘lganini bildirgan.

Videoda Samira ismli tarbiyalanuvchi quyidagilarni aytgan:

“Uchalamizni — meni, Laylo va Temurni hojatxonaga qamab qo‘ydi. Temurning qo‘lini ham bog‘lab qo‘ydi. Baqirdik ham, yig‘ladik ham, ochmadi. “Sichqonlarga olib boraman”, dedi”.

Ota-onalardan biri esa o‘g‘li ham shunga o‘xshash gaplarni aytganini bildirgan:

“Mening o‘g‘lim ham shu haqida gapirdi. Yangi enaga kelib, bolalarni podvalga qamab qo‘yishini, meni ham olib borib qamab qo‘yishini aytdi”.

Temur ismli bolaning onasi so‘zlariga ko‘ra, bolalar tarbiyachiga quloq solmagani uchun jazolangan bo‘lishi mumkin:

“Qamab qo‘ydi, yig‘ladim”, deydi. Nega qamab qo‘yadi, nima haqqi bor desam, quloq solmadik, deb javob berdi”.

Ota-onalar guruhida yuborilgan bir nechta ovozli xabarlarda ham boshqa bolalar shu kabi holat bo‘lganini aytgani qayd etilgan. Yana bir tarbiyalanuvchi esa bolalar hojatxonaga ruxsatsiz kirgani uchun jazolanganini bildirgan.

Samiraning onasi farzandi hodisadan keyin ham qo‘rquvdan yig‘layotganini ta’kidlagan:

“13 aprel kuni soat 00:25 da ham bola qo‘rquvdan yig‘lab chiqdi. Endi bolaning psixikasiga kim javob beradi?”

Toshkent shahar maktabgacha va maktab ta’limi boshqarmasi holat yuzasidan rasmiy munosabat bildirib, mazkur vaziyat huquqni muhofaza qiluvchi organlar hamda tuzilgan ishchi guruh tomonidan o‘rganilayotganini ma’lum qildi. Qo‘shimcha axborot berilishi kutilmoqda.

O‘zbekiston bog‘chalarida bolalar huquqlari buzilishiga oid bunday holat birinchisi emas. Bir necha kun oldin Navoiyda bolalarni urib qo‘pol munosabatda bo‘lgan tarbiyachi qamoqqa olindi.

Avvalroq Toshkent viloyatida bolani uxlamagani uxlab urib haqoratlagan tarbiyachi ishdan bo‘shatilgandi.

Joriy yil boshida esa Chirchiq shahridagi 30-sonli ixtisoslashtirilgan maktabgacha ta’lim tashkilotida imkoniyati cheklangan bolalarga nisbatan noo‘rin munosabatda bo‘lingani aks etgan videolavha tarqalgandi.

Source link

Termiz shahrida mansabdor shaxs fuqaroning ishonchiga kirib, undan katta miqdorda pul talab qilgan vaqtida ashyoviy dalillar bilan qo‘lga olindi.

Termiz shahar Veterinariya va chorvachilikni rivojlantirish bo‘limi mansabdor xodimi xizmat mavqeidan foydalangan holda fuqaroni aldashga uringan. U go‘yoki ushbu bo‘lim yaqin vaqt ichida boshqa joyga ko‘chirilishini aytib, bo‘shaydigan binoni yer maydoni bilan birgalikda tanishlari orqali auksiondan sotib olib berishni va’da qilgan.

Bu xizmat evaziga u fuqarodan 3 ming AQSh dollari talab qilgani aniqlangan.

Davlat xavfsizlik xizmati, Iqtisodiy jinoyatlarga qarshi kurashish departamenti va ichki ishlar organlari xodimlari hamkorligida o‘tkazilgan tezkor tadbir davomida mansabdor shaxs 2 ming AQSh dollari va 12 million so‘m olgan vaqtida ushlangan.

Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.

Fuqarolardan shu kabi qonunbuzilish holatlariga duch kelganda DXXning 1520 qisqa raqami orqali murojaat qilish so‘raldi. Shaxs sir saqlanishi kafolatlanadi.

Source link