Krishtianu 20 yil ichida ilk bor jahon chempionati pley-off bosqichlarida gol urdi, ammo Portugaliya shu kuni turnirni tark etishi ham mumkin edi. O‘yinga qo‘shib berilgan daqiqalarda avvaliga portugallar g‘alaba golini urishdi, bunga xorvatlar tezda javob qaytarishdi, faqat bahsli ofsayd holati o‘yin overtaymda davom etishiga to‘sqinlik qildi.

Jahon chempionatida 1/16 final bahslari yakunlanib bormoqda. Bu oqshomda ham yorqin o‘yinlar bo‘lib o‘tdi: Portugaliya dramatik kechgan bahsda Xorvatiyani so‘nggi daqiqalarda mag‘lub etdi (2:1), Shveytsariya Jazoirdan kuchliroq chiqdi (2:0), Ispaniya esa Avstriyaga hech qanday imkon qoldirmadi (3:0).

Maydonlar tashqarisida ham qiziqarli voqealar bo‘lib o‘tmoqda. Fransiya milliy jamoasi yarimhimoyachisi Rayan Sherki ruhiy qiyinchilikka uchramoqda, Germaniya futbol federatsiyasi Yulian Nagelsmanndan iste’foga chiqishni so‘radi, Lionel Messi va Argentina milliy jamoasi futbolchilari esa Mayamidagi aeroport uchish-qo‘nish yo‘lagida tintuv qilindi.

Ronaldu JCh pley-offidagi ilk golini urdi

Portugaliya – Xorvatiya 2:1

Gollar: Perishich, 53 (0:1). Krishtianu Ronaldu, 68 – penalti (1:1). Ramush, 90+4 (2:1)

Portugaliya: Koshta, Ruben Diash, Veyga, Nunu Mendesh, Joau Kanselu (Semedu, 63), Joau Nevesh, Vitinya (Bernardu Silva, 62), Brunu Fernandesh (Ramush, 63), Leau, Pedru Netu (Konseysau, 63), Krishtianu Ronaldu (Ruben Nevesh, 81)

Xorvatiya: Livakovich, Pongrachich, Shutalo, Perishich, Stanishich, Kovachich (Kramarich, 90+6), Modrich, Suchich, Baturina (Pashalich, 68), Vlashich (Gvardiol, 90+2), Budimir (Matanovich, 46)

Ogohlantirishlar: Ruben Diash, 17 – Modrich, 59. Perishich, 90

Bu 40 yoshli Luka Modrich uchun so‘nggi jahon chempionati ekani oldindan ma’lum edi. O‘yin arafasida Krishtianu Ronaldu ham ushbu turnirdan keyin Portugaliya milliy jamoasidagi faoliyatini yakunlashi haqida xabar tarqaldi va ushbu o‘yinga bo‘lgan qiziqishni yanada oshirdi – bu kim uchun «so‘nggi raqs» bo‘lib qoladi?

Portugallar ilk daqiqalardan kuchli bosim uyushtirishdi va tezkor gol bilan hisob ochilishi mumkin edi, ammo Brunu Fernandesh bir hujum davomida ikki bor zarba berdi – uning birinchi urinishini darvozabon bartaraf etdi, ikkinchi zarbadan keyin to‘p yo‘lini imoyachi to‘sib chiqdi. Ko‘p o‘tmay Krishtianu jarima zarbasi tepish huquqiga ega bo‘ldi, ammo to‘p jonli devordan o‘tmadi. Keyinroq u

 Netuning darvozabon hududiga oshirib bergan to‘pni darvozaga to‘g‘rilab yuborishga ulgurmadi. 

Krish va jamoasi birinchi bo‘limda 9 bor zarba yo‘llashdi, ammo hisob ochilmay qoldi. Ikkinchi bo‘limda esa xorvatlar o‘yinni kuchaytirishdi va xavfli vaziyatlar yarata boshlashdi. Shunday hujumlardan birida Ivan Perishich jarima maydonida yolg‘iz qoldirildi va u buni kechirmadi. U to‘pni qabul qilish va o‘ziga bo‘ysundirish uchun yetarlicha vaqt bo‘ldi va uchinchi teginishda to‘p darvozabonning oyoqlaridan o‘tkazildi.

Shundan keyin o‘yin qizib ketdi: xorvatlarning yana bir goli Vlashichdagi ofsayd holati tufayli inobatga olinmadi. Bunga javoban uyushtirilgan hujumda Leau kuchli zarbasi bilan darvoza to‘sinini titratdi. Keyin esa Krishtianu Netuning himoyachilar ortiga havolatib yetkazgan to‘pga yetib bordi va bir harakat bilan darvozabonni dog‘da qoldirdi. Portugaliyalik hujumchi golni o‘z uslubida nishonlashga ulgurmadi va hakam yana ofsayd holatini qayd etdi.

Ammo shu kuni muxlislar baribir uning gol nishonlashiga guvoh bo‘lishdi. Portugaliya bosh murabbiyi Roberto Martines Vitinya, Netu, Kanselu va Brunu kabi futbolchilarni zaxiraga oldi, ammo Ronalduni qoldirdi. U esa himoyachi Renatu Veyga tomonidan ishlangan penaltini to‘pni markazga kuch bilan tepish orqali aniq ijro etdi. Bu uning jahon chempionatlari pley-off bosqichlarida urgan ilk goli bo‘ldi. Bu gol uchun 20 yil va 9 o‘yin kerak bo‘ldi.

O‘yinning qolgan qismida o‘yin shiddati yanada oshdi va Martines Ronalduni ham maydondan olishga qaror qildi.

Futbolchiga almashtirilishi yoqmagan bo‘lsa-da, u murabbiy qarorini qabul qildi va maydondan chiqishda unga qo‘l berdi.

Murabbiyning qarorini to‘g‘ri tushunish mumkin edi: Ronaldu hisobni tenglashtirganidan almashtirilguniga qadar o‘tgan 13 daqiqalikda xorvatlar uch marta qulay vaziyatga ega bo‘lishdi, ammo darvozabon Diogu Koshta Kovachich va Matanovichga gol urishga imkon bermadi, Suchich baribir darvozani ishg‘ol etganida esa, ofsayd holati qayd etildi.

O‘yinga qo‘shib berilgan 9 daqiqaning to‘rtinchisi o‘tib borayotganida esa Gonsalu Ramush qoida bo‘yicha gol urdi: u Leauning uzatmasiga barchadan baland sakradi va bosh bilan to‘pni darvoza to‘riga joyladi.

Ammo bu hali hammasi emasdi. Xorvatiya oxirigacha kurashdi va 90+13-daqiqada darvozani ishg‘ol etdi. Ivan Perishich chap qanotdan to‘pni jarima maydoniga oshirdi, xorvatlar hujumchisi Igor Matanovich to‘pga yetish uchun baland sakradi, ammo zarba bera olmadi.

To‘p yo‘l-yo‘lakay portugallar himoyachisi Renatu Veyganing boshiga tegib Mario Pashalichga bordi, uning teginishidan keyin esa to‘p darvozabon hududiga qaytdi va u yerga yetib kelgan Gvardiol Diashdan ildamroq harakat qilib, darvozani ishg‘ol etdi.

Xorvatlar golni nishonlashni boshladi, ammo bu quvonch uzoqqa cho‘zilmadi. Maydondagi ekranda gol tekshirilayotgani haqida yozuv chiqdi. Stop-kadrda Matanovich to‘pga sakragan vaqtda Pashalich ofsaydda ekani ko‘rsatildi.

To‘p Matanovichga tegib o‘tgani esa to‘pga o‘rnatilgan datchik orqali qayd etildi.

Shundan keyin to‘p Veygaga ham tegib o‘tgani o‘z ahamiyatini yo‘qotdi.

Ko‘p o‘tmay hakamning o‘yin yakunlangani haqidagi hushtagi chalindi. Portugaliya keyingi bosqichga chiqdi va Ispaniya bilan o‘ynaydigan bo‘ldi, Modrichning milliy jamoadagi so‘nggi o‘yini esa alamli yakunlandi, unga taskin berish uchun portugaliyalik futbolchilar ham yetib kelishdi.

Ispanlar o‘yindan o‘yinga kuchaymoqda

Ispaniya – Avstriya 3:0

Gollar: Oyyarsabal, 36 (1:0). Porro, 66 (2:0). Oyyarsabal, 89 (3:0)

Ispaniya: Simon, Lyaport (Pubil, 90+3), Kubarsi, Kukurelya, Porro, Rodri, Pedri (Ruis, 90+3), Olmo (Merino, 71), Baena (Torres, 71), Yamal (Gavi, 85), Oyyarsabal

Avstriya: A. Shlager, Danso, Alaba, Laymer, Posh (Prass, 85), K. Shlager (Chukvuemeka, 46), Zayvald (Grillich, 46), Vanner, Zabitser, Shmid (Arnautovich, 60), Gregorich (Kalayjich, 60)

Ogohlantirish: Posh, 83

Avstriyaliklar guruh bosqichining so‘nggi turida Jazoir bilan o‘yinda (3:3) qahramonlik ko‘rsatib, 1/16 finalga chiqishgandi. Ralf Rangnik shogirdlaridan navbatdagi o‘yinda shu ruhda davom etib, ispanlarga kurash taklif etishi kutilgandi.

Ammo o‘yinda jamoalar saviyasidagi farq yaqqol sezilib qoldi. «Qizil furiya» ilk daqiqalardan to‘pni nazorat qildi va raqibga deyarli imkon bermadi. Uzoq davom etgan bosim nihoyat bo‘lim oxirlariga borib, Mikel Oyyarsabal hisobni ochishiga olib keldi.

Rangnik tanaffusdayoq ikki o‘zgarishga qo‘l urib, maydon markazidagi futbolchilarni almashtirdi, ammo bu o‘yinda hech narsani o‘zgartirmadi. Ikkinchi bo‘limda Pedro Porro va yana Oyyarsabal bittadan gol urib, hisobni yirik ko‘rinishga keltirishdi.

Shveytsariya yurishini davom ettirdi

Shveytsariya – Jazoir 2:0

Gollar: Embolo, 10 (1:0). Ndoy, 46 (2:0)

Shveytsariya: Kobel, Elvedi, Akanji, Rodriges, Zakariyo (Vidmer, 87), Froyler, Jaka, Manzambi (Okafor, 71), Vargas (Rider, 71), Ndoy (Ebisher, 87), Embolo (Amduni, 83)

Jazoir: Zidan, Mandi, Bensebayni, Ayt Nuri, Belgali (Bulbina, 82), Bintolib (Budaviy, 71), Shaybiy, Zerruqiy (Hajam, 58), Auar (Guiri, 58), Mahrez (Hoji-Mussa, 71), Maza

Ogohlantirishlar: Shaybiy, 36. Budaviy, 72

Jazoir bu o‘yinda kutilmaganda to‘pga egalik qildi. Ammo bu shveysarlarning o‘ziga xos hiylasi bo‘lib chiqdi va Murat Yakin shogirdlari ikki bor qarshi hujumdan unumli foydalanishdi. Yevropa vakillarining ilk hujumiyoq gol bilan yakunlandi: 10-daqiqada Bril Embolo darvozabon hududiga yetib bordi va qanotdan oshirilgan to‘pga oyoq qo‘yib, hisobni ochdi. Shundan keyin ham afrikaliklar birinchi raqam ostida harakatlanishda davom etishdi, ammo chinakamiga xavfli vaziyatlar yarata olishmadi.

Ikkinchi bo‘lim boshida shveysarlar amalda o‘yin taqdirini hal qilishdi – Dan Ndoy jarima maydonida o‘ziga kelib qolgan to‘pni yerlatib, olis burchakka aniq yo‘naltirdi.

Jazoir yana o‘yinni o‘z nazoratiga oldi, ammo Gregor Kobel darvozasi qarshisida deyali hech narsa qila olmadi. O‘yinning qolgan qismida yevropaliklar hisobdan kelib chiqib o‘ynashdi va uchinchi gol uchun harakat qilishmadi, raqib esa ularning himoyasidan o‘ta olmadi. Yakunda Shveytsariya ishonchli hisobdagi g‘alabani saqlab qoldi va keyingi bosqichda Kolumbiya – Gana juftligiga qarshi o‘ynaydigan bo‘ldi.

Sherkining muammolari

Fransiya milliy jamoasi bu safargi jahon chempionatida boshqalardan bir bosh yuqori ko‘rinmoqda. «Uchranglilar» Senegal (3:1), Iroq (3:0), Norvegiya (4:1) va Shvetsiya (3:0) kabi raqiblarga hech qanday imkon qoldirmadi. Bunday natijalardan keyin jamoa ichkarisidagi muhit a’lo darajada ekani haqida tasavvur paydo bo‘lgandi. Ammo bunday bo‘lib chiqmadi.

L’Equipe ma’lumotiga ko‘ra, «Manchester Siti» yarimhimoyachisi Rayan Sherki turnir mobaynida ruhiy muammolarni boshdan kechirmoqda. Futbolchiga yaqin kishilar jurnalistlarga u shaxsiy hayotidagi muammolar tufayli uyqusizlikdan aziyat chekayotganini xabar qilishgan. O‘yinlarga tushirilmayotgani esa muammoni yanada og‘irlashtirgan: u bu turnir davomida to‘rt o‘yinda jami 60 daqiqa ham maydonda bo‘lmadi.

Shu bilan birga, murabbiylar shtabi Sherkini tushunishga harakat qilmoqda. Shuning uchun Dide Desham shvedlar bilan o‘yindan keyin Rayan o‘ziga ochiqchasiga jahl qilganiga e’tibor qaratmagan.

Germaniyada ham iste’fo

Jahon chempionatini tark etgan jamoalar birin-ketin bosh murabbiylarini iste’foga chiqarmoqda. Paragvaydan uchralgan mag‘lubiyatdan keyin (1:1, penaltilar bo‘yicha 3:4) Germaniya futbol federatsiyasi vakillari bosh murabbiy Yulian Nagelsmann bilan uchrashuv o‘tkazishgan va undan o‘z ixtiyori bilan iste’fo berishni so‘rashgan.

Yakunda 38 yoshli mutaxassis ham bunga rozi bo‘lgan. Yulian bo‘sh qo‘l bilan ketmaydi, unga 7 million yevro miqdorida tovon puli to‘lab berilishi kerak.

Uning o‘rniga esa Yurgen Klopp Germaniya milliy jamoasi bosh murabbiyi bo‘lishi kutilmoqda.

Bu jahon chempionatida qatnashgan jamoalarda yettinchi iste’fo bo‘ldi: Tunis guruh bosqichining birinchi turidan keyinoq Sabri Lyamushiga javob bergandi. Guruh bosqichi yakunlanganidan keyin Hen Men Bo (Janubiy Koreya), Stiv Klark (Shotlandiya) va Miroslav Koubek (Chexiya) iste’foga chiqdi. Pley-offdagi natijalardan keyin Ronald Kuman (Niderlandiya) va Sebastyan Bekkasese (Ekvador) ham lavozimini tark etgandi.

Messini ham tintuv qilishdi

Butun turnir mobaynida qaysidir jamoa diqqat bilan tekshirilgani haqidagi xabarlar chiqib turdi. Bu jarayondan Argentina milliy jamoasi ham chetda qolmadi.

Lionel Messi va uning jamoadoshlarini Mayamida metall detektorlar bilan kutib olishdi. Bu holatni jamoa sardori kinoya bilan qabul qildi: ijtimoiy tarmoqda tarqalgan videoda Leo tintuv vaqtida tinimsiz kulib turganini ko‘rish mumkin.

Katta ehtimol bilan, uning bunday reaksiyasiga u doim «Inter Mayami» jamoasi safida ushbu terminaldan foydalanishi, ammo bu kabi xavfsizlik choralariga ilk marta duch kelgani sabab bo‘lgan.

Navbatdagi o‘yinlar

3 iyul kuni kechqurun va 4 iyulga o‘tar kechasi 1/16 finalning so‘nggi o‘yinlari bo‘lib o‘tadi:

3 iyul. 23.00. Avstraliya — Misr

4 iyul. 03.30. Argentina — Kabo-Verde

4 iyul. 06.30. Kolumbiya — Gana

Source link

Bu oqshom o‘z faoliyatida 222 ta o‘yinni bir jamoada o‘tkazgan 41 yoshli Krishtianu Ronaldu va 40 yoshli Luka Modrich bir-biriga qarshi o‘ynaydi.

2 iyul kuni kechqurun va 3 iyulga o‘tar kechasi jahon chempionati 1/16 bosqichi doirasida Ispaniya – Avstriya, Portugaliya – Xorvatiya hamda Shveytsariya – Jazoir juftliklari ishtirokidagi o‘yinlar bo‘lib o‘tadi.

Ispaniya – Avstriya

2 iyul, 00:00. SoFi Stadium, Los-Anjyeles

Ispanlar guruh bosqichida kutilgan darajada kuchli o‘yin namoyish eta olmadi. Jamoa uchta o‘yinda o‘z darvozasi daxlsizligini saqlab qoldi, Saudiya Arabistonini yirik hisobda mag‘lub etdi, ammo Kabo-Verde va Urugvayga qarshi ikki o‘yinda atigi bir gol bilan cheklandi. Avstriya esa kuchli pressing bilan o‘ynaydigan jamoa bo‘lib, asosiy ustunligi to‘pga egalik qilish hisoblangan Ispaniya uchun bu jiddiy noqulaylik tug‘diradi. Qolaversa, «qizil furiya» safida bu o‘yinda jarohatlar tufayli Niko Uilyams va Yeremi Pino ishtirok eta olmaydi, bu esa jamoaning hujum chizig‘i uchun jiddiy zarbadir.

Boshqa tomondan, avstriyaliklar guruh bosqichining so‘nggi turida Jazoirga qarshi kechgan o‘yinda juda katta kuch sarfladi (3:3), hayot-mamot o‘yinida jamoa so‘nggi daqiqalarda gol urib, pley-offga ilinib qoldi. Ralf Rangnik jamoasida superyulduzlar yo‘q, ammo uning ixtiyoridagi futbolchilarda o‘zaro o‘ynash ko‘nikmasi yaxshi shakllangan va bu tarkib har qanday grandga muammolar tug‘dira oladi. Bu futolchilar oldidagi asosiy vazifa – asta-sekinlik bilan formaga kirib borayotgan Yamalni to‘xtatish hisoblanadi. Qolgan raqiblarni zararsizlantirish nisbatan osonroq.

Yevropaning amaldagi chempionlari 1/8 finalga chiqadigan bo‘lsa, Portugaliya bilan o‘ynashi mumkin, bu esa futbol muxlislari uchun haqiqiy klassika bo‘lardi. Jamoalar oxirgi marta Millatlar ligasi finalida to‘qnashgan va o‘shanda kutilmaganda portugallar g‘alaba qozongandi, endi ehtimoliy o‘yin ispanlar uchun revansh olish imkoniyatiga aylanishi mumkin.

Portugaliya – Xorvatiya

3 iyul, 04:00. BMO Field, Toronto

Bu o‘yinga ko‘pchilik «Real»dagi sobiq jamoadoshlar – faoliyatidagi 222 ta o‘yinni bir jamoa safida o‘tkazgan, birgalikda to‘rt bor Chempionlar ligasi kubogini qo‘lga kiritgan Krishtianu Ronaldu va Luka Modrich dueli sifatida qaramoqda. Katta ehtimol bilan, bu safargi mundial yoshi 40 dan oshgan ushbu tajribali futbolchilar faoliyatidagi so‘nggi yirik turnir bo‘ladi va agar Xorvatiya yutqazadigan bo‘lsa, bu uning milliy jamoa safidagi oxirgi o‘yiniga aylanadi.

Ammo bu juftlikda boshqa intrigalar ham bor. Xorvatiya guruh bosqichini qiyin o‘tkazdi – Angliyadan to‘rtta gol o‘kazib yubordi (2:4), keyin esa Panama (1:0) va Gana (2:1) bilan o‘yinlarda qiynaldi. Ammo asosiysi – avlodlar almashinuviga qaramay, «shashkachilar» o‘ziga xos xarakterini saqlab qolganini namoyish etdi. Bu jamoa top-raqiblarga qarshi ikkinchi raqamda harakatlanishni, sabr qilish va sovuqqonlik bilan jazolashni biladi.

Portugaliya esa bu turnirda o‘z imkoniyatlari darajasida o‘ynay olmayapti – Roberto Martines shogirdlari guruhda faqat O‘zbekistonni mag‘lub etdi va 5 ochko bilan ikkinchi o‘rinni egalladi. Kolumbiyaga qarshi o‘yinda jamoa mag‘lubiyatga uchrashi ham mumkin edi. Ko‘ramiz, portugallar murabbiylar shtabi Ronalduni zaxira o‘rindig‘ida qoldirishga jur’at qila olarmikin yoki jamoaviy o‘yin zarariga tarkib tanlashda davom etarmikin. Nima bo‘lganda ham, asosiy mas’uliyat yarimhimoyachilar zimmasida bo‘ladi, yulduzli futbolchilar xorvatlar bilan o‘yinda maydon markazida ustunlik qilishi talab etiladi.

Krishtianuning o‘z kumiri faoliyati so‘nggida jahon chempionatida g‘olib chiqishiga umid qilgan fanatlari murakkab setkadan nolishi mumkin. Portugaliya xorvatlar to‘sig‘idan o‘tgan taqdirda ham, oldinda yanada kuchliroq raqiblar kutadi – 1/8 finalda Ispaniya, chorakfinalda Belgiya yoki AQSh, yarimfinalda Fransiya va Marokash kabi jamoalardan biri. Argentinaning yo‘li bilan solishtirib bo‘lmas darajada murakkab setka.

Shveytsariya – Jazoir

3 iyul, 08:00. BC Place, Vankuver

Taqdir Vladimir Petkovichni o‘zi ko‘p yillar boshqargan va 2020 yilgi Yevropa chempionati chorakfinaliga olib chiqqan sobiq jamoasiga ro‘baru qildi. Jazoir ushbu mutaxassis boshchiligida guruh bosqichini yomon boshlagandi – afrikaliklar birinchi turda Argentina qarshisida butkul ojiz qolishgandi (0:3), zatem keyin esa Iordaniya ustidan irodali g‘alabaga erishildi (2:1), so‘nggi turda esa Avstriya bilan o‘yinda gollar shousi uyushtirildi (3:3). Bu nima kutishni bilib bo‘lmaydigan beqaror jamoadir.

Murat Yakin boshqaruvidagi Shveytsariyada esa barchasi aniq ko‘rinib turadi – jamoa asosiy urg‘uni to‘pni nazorat qilishga, qanotlardan hujumlar uyushtirishga va tartibli himoyalanishga qaratgan. Qolaversa, jamoa safida ushbu turnir kashfiyotlaridan biriga aylangan 20 yoshli Joan Manzambi bor (u turnirda allaqachon 3 gol va bir golli assist muallifiga aylangan).

Petkovich Shveytsariyani ushbu turnirdagi istalgan boshqa murabbiydan yaxshiroq biladi, ammo yevropaliklar baribir ushbu juftlikda favorit hisoblanadi. Ushbu jamoa uzoqqa borishi mumkin – agar 1/8 finalga chiqsa, Kolumbiya – Gana juftligi g‘olibi bilan o‘ynaydi, faqat chorakfinalda chinakamiga top darajadagi raqib – Argentina duch kelishi mumkin.

Source link

Meksikada futbol bayrami fojiaga aylandi.

Futbol bo‘yicha Meksika milliy jamoasining jahon chempionati 1/16 finalida Ekvador ustidan qozongan g‘alabasini (2:0) nishonlash chog‘ida bir milliondan ortiq kishi Mexiko shahri ko‘chalariga chiqqan. Yuzaga kelgan tiqilinch oqibatida to‘rt kishi halok bo‘lgan: 19 yoshli qiz, 48 yoshli ayol, 44 yoshli erkak va yana katta yoshli erkak.

Mexiko sog‘liqni saqlash boshqarmasi ma’lumotiga ko‘ra, uch kishi tiqilinchda bo‘g‘ilib qolgan, yana bir kishining yuragi xuruj qilgan.

Shahar rasmiylariga ko‘ra, eng ko‘p odam Mexiko shahri markazida, Mustaqillik ustunlari maydonida yig‘ilgan. Bu qadar ko‘p odam to‘planishining sababi Ekvador bilan o‘yindagi g‘alaba Meksika milliy jamoasi 1986 yildan buyon jahon chempionati pley-off bosqichlarida ilk bor g‘alaba qozonishi edi.

Mexiko shahri meri Klara Brugada qurbonlarning oila a’zolariga ta’ziya izhor etib, ularga imkon qadar yordam ko‘rsatilishini va’da qilgan. U shuningdek muxlislarni g‘alabani «har doim mas’uliyat bilan, boshqalarni hurmat qilgan holda nishonlash»ga chaqirgan.

Sog‘liqni saqlash departamentiga ko‘ra, favqulodda xizmatlar shaharning turli hududlarida, Paseo-de-la-Reforma shohko‘chasi bo‘yida hushini yo‘qotgan uch kishiga tibbiy yordam ko‘rsatganini ma’lum qilgan.

«Birinchi tibbiy yordam va yurak-o‘pka reanimatsiyasi o‘tkazilgandan so‘ng, jabrlanganlar ixtisoslashtirilgan davolash uchun tibbiyot muassasalariga o‘tkazildi», – deyiladi poytaxt sog‘liqni saqlash departamenti xabarida.

Lekin ularning uchalasi ham shifoxonada jon bergan, o‘lim sifatida nafas yetmay qolishi ko‘rsatilgan. Ularning shaxsi qarindoshlari tomonidan tasdiqlangan.

O‘yin boshlanishidan oldinroq Mexiko meri Klara Brugada shahar markazidagi Mustaqillik ustunlari maydoniga kelishni rejalashtirgan muxlislardan boshqa joyni tanlashni so‘ragandi, chunki bu vaqtga kelib maydon allaqachon odamlar bilan to‘lib-toshgandi.

Xabar qilishlaricha, tiqilinch vaqtida nafasi qisib qolgan yana o‘nlab kishilarga tibbiy yordam ko‘rsatilgan.

Ijtimoiy tarmoqlarda tarqalgan kadrlarda boshqalar bayram qilayotgani fonida tibbiyot xodimlari ahvoli og‘irlashib qolgan odamlar hayotini saqlab qolish uchun kurashayotganini ko‘rish mumkin.

Mexiko aglomeratsiyasida 20 milliondan ortiq kishi istiqomat qiladi, bu uni dunyoning aholi eng tig‘iz joylashgan shaharlaridan biriga aylantirgan.

Meksika milliy jamoasi Ekvador ustidan qozonilgan g‘alabadan keyin 1/8 finalga chiqdi. Bu bosqichda turnir mezbonlariga Angliya milliy jamoasi raqib bo‘ladi.

Source link

Favoritlar uchun asabiy kun: kongoliklar darvozaboni inglizlarni qiynadi; hisob 0:2 ekanida Belgiya futbolchilari o‘zaro urishib ketdi, lekin yakunda Senegal turnirdan chiqarib yuborildi. AQSh ozchilik bo‘lib o‘ynaganiga qaramay, g‘alaba qozondi. Meksikada fojia, Germaniyada aybdorlar izlanmoqda, turnirni tark etgan yana bir jamoada bosh murabbiy iste’foga chiqdi, Turkiyada esa futolchilarga villalar sovg‘a qilindi.

Jahon chempionatida pley-off bosqichi davom etmoqda. 1 iyul kuni kechqurun va 2 iyulga o‘tar kechasi 1/16 final doirasida yana uchta uchrashuv bo‘lib o‘tdi. Va bu o‘yinlarda favoritlarga oson bo‘lmadi – Belgiya Senegal bilan o‘yinning so‘nggi daqiqalarida hisobni tenglashtirdi va overtaymda g‘alabani ilib ketdi (3:2), Angliya esa Kongo DR bilan o‘yinda ancha vaqt hisobda ortda bordi (2:1). AQSh ham Bosniya va Hersegovinaga qarshi o‘yinda xotirjam o‘ynay olmadi – ikkinchi bo‘limda bir kishi kam bo‘lib o‘ynadi va faqat o‘yin oxirida urilgan gol evaziga hisobni ishonchli ko‘rinishga keltirdi (2:0).

Maydon tashqarisida ham voqealar ko‘p bo‘lmoqda: Meksikaga yutqazib, turnirni tark etgan Ekvador bosh murabbiyi Sebastyan Bekkasese iste’foga chiqdi, Germaniyada muvaffaqiyatsizlik uchun aybdorlar izlanmoqda, Turkiya futbolchilariga muvaffaqiyatsizlikka qaramay, villalar sovg‘a qilinmoqda, Meksikada esa g‘alabani nishonlash chog‘ida to‘rt nafar muxlis halok bo‘ldi.

Angliyada irodali g‘alaba

Angliya – Kongo DR 2:1

Gollar: Sipenga, 7 (0:1). Keyn, 75 (1:1). Keyn, 86 (2:1)

Angliya: Pikford, Konsa, Geyi, O`Rayli, Spens (Eze, 70), Rays (Stouns, 90+1), Anderson, Bellinghem, Reshford (Saka, 60), Madueke (Gordon, 60), Keyn

Kongo DR: Mpasi-Nzau, Tuanzebe, Mbemba, Masuaku (J. Kayyembe, 89), Van-Bissaka, Mutussami (Mayyele, 89), Sadiki, Mukau (E. Kayyembe, 76), Sipenga (Bongonda, 76), Mbuku (Elia, 64), Vissa

Ogohlantirishlar: Bellinghem, 19 – Sadiki, 28

Kongoliklar sensatsiyaga yaqin edi. Afrika jamoasi yettinchi daqiqadayoq Brayan Sipengining sa’y-harakatlari bilan hisobni ochishdi va shundan keyin inglizlarning hujumlarini muvaffaqiyat bilan qaytarishdi.

Tomas Tuxel shogirdlari uzoq vaqt «Leopardlar»ga qarshi chora topa olishmadi – o‘yinning dastlabki 20 daqiqaligida to‘pga egalik qilish bo‘yicha ustunlik Afrika vakillarida bo‘ldi, golli vaziyatlar esa faqat suv ichish uchun qilingan tanaffusdan keyingina yuzaga keldi. Ammo bu vaziyatlarda Kongo DR darvozaboni Lionel Mpasi-Nzau qahramonlik ko‘rsatdi va bir necha superseyvlar amalga oshirdi. U ojiz qolganida esa himoyachi to‘pni darvoza chizig‘idan olib chiqdi.

Afrikaliklar ham vaqti-vaqti bilan hujumlarga chiqishdi va tanaffus arafasida hisobdagi ustunlikni oshirishi mumkin edi, ammo Vissa qulay vaziyatdan foydalana olmadi.

Ikkinchi bo‘lim davomida kongoliklar charchab qolishdi va raqib saviyadagi farqni namoyish etdi. Inglizlar sardori Harri Keyn dublni rasmiylashtirib, o‘yin taqdirini hal qildi. Zaxiradan o‘yinga qo‘shilgan Entoni Gordon o‘z hisobiga ikkita golli uzatma yozdirib qo‘ydi.

Angliya 1990 yilgi jahon chempionatidan buyon ilk bor irodali g‘alabaga erishdi. Ko‘p yillik muvaffaqiyatsizlikka barham bergan «Uch sherlar» keyingi bosqichda turnir mezbonlaridan biri bo‘lgan Meksikaga qarshi o‘ynaydi.

Belgiya 0:2 hisobini 3:2 ga aylantirdi

Belgiya – Senegal 3:2

Gollar: Diarra, 24 (0:1). I. Sarr, 51 (0:2). Lukaku, 86 (1:2). Tilemans, 89 (2:2). Tilemans, 120+5 – penalti (3:2)

Belgiya: Kurtua, Teat, Mehele, De Kyuyper (Mene, 78), Kastan, Tilemans, Vanaken (Moreyra, 63), De Bryuyne (Raskin, 56), Doku (Lukebakio, 56), Trossar (Onana, 109), De Ketelare (Lukaku, 46)

Senegal: Diav, Siss, Niakate, Yakobs (Diuf, 93), Diatta, Gana Guyye (Sapoko Ndiay, 95), Guyye (Kamara, 66), Diarra (P. Sarr, 73), Mane (Jyekson, 93), Ndiay (Mbay, 73), I. Sarr

Ogohlantirishlar: Mehele, 64 – Kamara, 67

Belgiya milliy jamoasi ham 1/8 finalga chiqishda katta qiyinchilikka uchradi. Kuchli guruhdan uchinchi o‘rin bilan pley-offga chiqqan Senegal Fransiya va Norvegiyaga qarshi ham munosib qarshilik ko‘rsatib, muxlislarning sevimli jamoasiga aylangandi – pley-offda ham Pap Tiav shogirdlari o‘zini yo‘qotib qo‘ymadi: afrikaliklar favoritga katta muammo tug‘dirishdi va sensatsiyaga juda yaqin keldi.

Birinchi bo‘lim senegalliklar ustunligida yakunlandi. O‘yin boshida Rudi Garsiya shogirdlari juda tarqoq ko‘rindi va faqat Habib Diarra hisobni ochganidan keyin o‘ziga kela boshladi. Ammo belgiyaliklarda chinakamiga xavfli vaziyatlar yuzaga kelmadi.

Ikkinchi bo‘limda esa afrikaliklar yana bir gol urishdi – Ismaila Sarr turnirdagi to‘rtinchi golini nishonladi. Jamoalar ikkinchi bo‘limdagi tanaffusga yo‘l olayotganida belgiyaliklar safida ixtilof yuzaga keldi: Leandro Trossar to‘pni o‘ziga oshirmagani uchun Yuri Tilemansga keskin ohangda e’tiroz bildirdi, ularni jamoadoshlari ajratib qoldi.

Bu manzara Belgiyaning turnirni tark etishi ramziga aylanishi kutilgandi, ammo bunday bo‘lmadi.

«Teranga sherlari» tarixiy g‘alabadan bir necha daqiqalik masofada turishgandi. Ammo 86-daqiqada Romelu Lukaku qanotdan jarima maydoniga uzatilgan to‘pga bir teginish bilan hisobni qisqartirdi. Bu gol yevropaliklarni ruhlantirib yubordi va qolgan daqiqalarda raqib jarima maydoni qamal qilindi. 89-daqiqada esa hisobni tenglashtiruvchi gol ham urildi: Trossar darvozabon hududiga havolatib to‘p uzatdi, darvozabon Mori Diav chiqishda xatoga yo‘l qo‘ydi, Yuri Tilemans esa bosh bilan to‘pni darvoza to‘riga to‘g‘rilab yubordi.

Shundan keyin jamoalar g‘olibni overtaymda aniqlaydigan bo‘ldi. Ish penaltilar seriyasiga qarab borayotgandi, ammo 117-daqiqada senegalliklar yarimhimoyachisi Lamin Kamara jarima maydoni ichida ehtiyotsizlikka yo‘l qo‘ydi.

U qanotdan yerlatib uzatilgan to‘pni qaytarishga urinib, ortdan yetib kelgan Tilemansning oyog‘iga zarba berib yubordi. Avvaliga bosh hakam Martines o‘yinni davom ettirishga ishora qilgandi, ammo VAR vaziyatga aralashdi va 11 metrlik jarima zarbasi belgilandi.

Tilemans esa sovuqqonlik bilan zarba berib, to‘pni «to‘qqizlik»ka mixladi.

Senegalliklar ikki to‘p ustunligini saqlashga harakat qilgani uchun jazolanishdi, iroda ko‘rsatgan Belgiya esa nimchorak finalda o‘ynaydi.

Amerikaliklar tarix yaratdi

AQSh – Bosniya va Hersegovina 2:0

Gollar: Balogun, 45 (1:0). Tillman, 82 (2:0)

AQSh: Friz, Richards, Rim, Robinson, Frimen, Adams, Tillman, Makkenni (Reyna, 90+5), Pulishich (Pepi, 88), Dest (Berhalter, 87), Balogun

Bosniya va Hersegovina: Vasil, Muxaremovich, Katich (Memich, 75), Radelich, Kolashinats (Tabakovich, 75), Dedich, Shunich (Taxirovich, 51), Alaybegovich, Gigovich (Maxmich, 51), Demirovich, Jyeko (Bayraktarevich, 51)

Ogohlantirish: Radelich, 80

Chetlatish: Balogun, 64

AQSh milliy jamoasi uchun Bosniya va Hersegovinaga qarshi pley-off o‘yini jiddiy va hayajonli sinov edi – chunki amerikaliklar azaldan yevropaliklar bilan juda yomon o‘ynagan. Statistika chindan ham xavotirli edi: so‘nggi 18 o‘yinda qatorasiga to‘qqiz mag‘lubiyat va bittagina g‘alaba. Amerikaliklar jahon chempionatlarida Yevropa vakillarini tarixda atigi ikki bor mag‘lub etishgan – 2002 va… 1950 yillarda. Shunday ekan, turnir mezbonlarida o‘yindan oldin asabiylashish uchun sabab yetarlicha edi.

Kutilganidek, o‘yin qiyin boshlandi – bosniyaliklar kuchli bosim uyushtirdi va hisobni ochishga ikki bor yaqin kelishdi. Maurisio Pochettino shogirdlari bu hujumlarni qaytardi va tanaffus arafasida hisobda oldinga chiqib olishdi – jamoa to‘purari Folarin Balogun o‘zini ko‘rsatdi. 24 yoshli forvard raqib jarima maydonida rikoshetlardan foydalanib, to‘pga ega chiqdi va kuchli zarba yo‘lladi.

Ammo Balogun bu oqshom antiqahramonga aylanishi ham mumkin edi – ikkinchi bo‘lim o‘rtalarida uning asablari dosh bermadi va qizil kartochka olib maydonni tark etdi. Ushbu hujumchi o‘zi istamagan holda raqib to‘pig‘iga zarba berib yubordi va videotakrordan keyin maydondan chetlatildi.

Shundan keyin AQShda jiddiy muammolar boshlanishi kutilgandi, ammo Bosniya sondagi ustunlikdan foydalana olmadi. Mezbonlar hisobdan kelib chiqib o‘ynashdi va o‘yin yakunlanishi arafasida Malik Tillman jarima zarbasini a’lo darajada ijro etib, o‘yinga so‘nggi nuqtani qo‘ydi.

Jyessi Marsh shogirdlari 1/8 finalga chiqdi va Mustaqillik kuni arafasida mamlakatga ajoyib sovg‘a taqdim etdi. Keyingi bosqichda mezbonlarni Belgiyaga qarshi o‘yin kutmoqda.

Mexikoda to‘rt muxlis halok bo‘ldi

Meksikada futbol bayrami fojiaga aylandi. Milliy jamoaning pley-offning ilk o‘yinida Ekvador ustidan g‘alaba qozonib, keyingi bosqichga chiqqanini nishonlash vaqtida to‘rt nafar muxlis – ikki ayol va ikki erkak vafot etgan.

Mexiko sog‘liqni saqlash boshqarmasi ma’lumotiga ko‘ra, ulardan uch nafari tiqilinchda bo‘g‘ilib qolgan, yana birining yuragi xuruj qilgan.

Shu kuni shahar ko‘chalariga bayram qilish uchun milliondan ortiq kishi chiqqandi. Shahar markazidagi Mustaqillik farishtasi monumenti atrofida esa tiqilinch yuzaga kelgan.

Tiqilinch oqibatida yana o‘nlab kishilar jabrlangan.

Ijtimoiy tarmoqlarda tarqalgan kadrlarda boshqalar bayram qilayotgani fonida tibbiyot xodimlari ahvoli og‘irlashib qolgan odamlar hayotini saqlab qolish uchun kurashayotganini ko‘rish mumkin.

Ekvador ustidan g‘alaba bu qadar keng nishonlanganining sababi bu Meksika milliy jamoasi 1986 yildan buyon jahon chempionati pley-off bosqichlarida ilk bor g‘alaba qozonishi bo‘lgandi. Endi jamoani keyingi bosqichda Angliyaga qarshi o‘yin kutmoqda.

Ekvador murabbiyi baribir iste’foga chiqdi

Jahon chempionati ishtirokchilari orasida yana bir iste’fo ro‘y berdi. Ekvador milliy jamoasi bosh murabbiyi Sebastyan Bekkasese pley-offning ilk o‘yinida Meksikadan uchralgan mag‘lubiyatdan keyin milliy jamoa boshqaruvini tark etishini e’lon qildi.

45 yoshli argentinalik bilan shartnoma JCh-2026 yakuniga qadar imzolangan bo‘lgan. Jamoa pley-offga chiqqaniga qaramay, tomonlar kelishuvni uzaytirmagan.

«Futbol shunaqa: natija muhim. Endi men go‘zal va ajoyib oilam bilan xayrlashishim kerak, lekin katta minnatdorchilik, xotirjamlik va ichki uyg‘unlik bilan, bor kuchimizni sarflaganimizni bilgan holda. Biz va’da qilingan natijaga erisha olmadik, tariximizdagi eng yaxshi jahon chempionatini o‘tkaza olmadik. Ammo o‘zimdan keyin juda ahil va oila bo‘lgan jamoa qoldiraman. Bo‘lib o‘tgan voqea… Chindan ham ajoyib», – degan ushbu mutaxassis o‘yindan keyingi matbuot anjumanida.

Ekvador milliy jamoasi E guruhida Kot-d’Ivuarga yutqazgan (0:1), Kyurasao bilan durang o‘ynagan (0:0), uchinchi turda Germaniya ustidan irodali g‘alabaga (2:1) erishib, 4 ochko bilan uchinchi o‘rinni egallagan va pley-off bosqichiga chiqqandi.

Germaniyaning muvaffaqiyatsizligi uchun kim aybdor?

Butun Germaniya pley-offda Paragvaydan uchralgan mag‘lubiyatdan keyin aybdorlarni qidirmoqda. Bunda asosiy nomzod – bosh murabbiy Yulian Nagelsman, uni birinchi navbatda jamoada kerakli muhit yarata olmaslikda ayblashmoqda. Yaqqol fakt: hal qiluvchi penaltini ura olmagan Jonatan Ta uchun bu faoliyatidagi ilk 11 metrlik zarba edi – u boshqa futbolchilar bunday mas’uliyatni o‘z zimmasiga olishni xohlamagani uchun nuqtaga yaqinlashgan. Ijtimoiy tarmoqlarda jamoa sardori Jozua Kimmih Goretska, Tiau, Braun, Anton kabi futbolchilardan zarba berishni so‘rab, ko‘ndira olmagani aks etgan video tarqalgan.

Mamlakat kansleri Fridrix Mers ham tanqidga uchradi. Jamoa mag‘lubiyatidan keyin u ijtimoiy tarmoqda «o‘z jonbozligi bilan mamlakatni ilhomlantirgani» uchun jamoaga minnatdorchilik bildirib post yozgan. Lekin muxlislar uning so‘zlarini qabul qila olishmadi va endi Mersning o‘zi kulgi nishoniga aylandi. Ijtimoiy tarmoq foydalanuvchilari u «boshqa jamoa bilan adashtirib yuborgani» va «doimgidek reallikdan yiroqdaligi»ni aytib, hazil qilishmoqda. Mers esa o‘z so‘zlaridan qaytmadi va keyingi postida shunday dedi: «G‘alabani birgalikda nishonlaymiz. Mag‘lubiyatda bir-birimizga yordam beramiz. Bu bizni yanada kuchliroq qiladi».

Bu vaqtda esa Yulian Nagelsmann o‘rniga Yurgen Klopp Germaniya milliy jamoasini boshqarishi mumkinligi haqida xabar tarqaldi. Taniqli insayder Fabritsio Romanoga ko‘ra, «Liverpul»ning sobiq ustozi milliy jamoani qabul qilib olishga qarshi emas.

Ushbu mutaxassis 2024 yilda ingliz klubi boshqaruvini tark etganidan keyin faoliyatida tanaffus olgandi, keyinroq Red Bull kompaniyasining futbol sohasiga direktor sifatida ishga o‘tgan. Agar Germaniya futbol ittifoqi (DFB) taklif bilan chiqadigan bo‘lsa, u murabbiylikka qaytishi mumkin.

Navbatdagi o‘yinlar

2026 yilgi jahon chempionatining pley-off o‘yinlari davom etadi — 2 iyul kuni kechqurun va 3 iyulga o‘tar kechasi muxlislarni yana qiziqarli o‘yinlar kutmoqda:

00.00. Ispaniya – Avstriya

04.00. Portugaliya – Xorvatiya

08.00. Shveytsariya – Jazoir

Source link

1 iyul kuni Toshkent xalqaro aeroportida jahon chempionatidan qaytgan O‘zbekiston milliy jamoasi futbolchilarini tantanali kutib olish tadbiri o‘tkazildi.

Marosimda bosh vazir Abdulla Aripov so‘zga chiqib, milliy jamoa nomdor raqiblarga qarshi «jasorat bilan kurashganini» aytdi va futbolchilarni «divan ekspertlari»ni kechirishga chaqirdi. Bosh vazir bunda milliy jamoani ijtimoiy tarmoqlarda tanqid qilganlarni nazarda tutgan edi.

«Sizlar FIFA reytingida 5-o‘rinda turgan Portugaliya, 13-o‘rinda turgan Kolumbiya va ko‘plab futbolchilari Yevropa va jahonning yetakchi klublarida to‘p suradigan Kongo milliy jamoalariga qarshi mardonavor kurashdingiz. Har bir hujum, har bir himoya, har bir zarba va har bir kurash lahzasi xalqimizga hayajon, umid va faxr bag‘ishladi», dedi u.

«Hurmatli futbolchilar, sizlarning mashhurligingiz orqali salbiy fikrlar bildirib, o‘ziga soxta obro‘ va layk olmoqchi bo‘lgan har xil omadsiz sportchilar, mutaxassis va divan ekspertlari ko‘p bo‘ladi. Ularni ham kechirib yuboringlar», deb qo‘shimcha qildi hukumat rahbari.

Eslatib o‘tamiz, O‘zbekiston milliy jamoasi jahon chempionatida Kolumbiyaga 1:3, Portugaliyaga 0:5, Kongo DR ga 1:3 hisobida yutqazdi va guruhda so‘nggi o‘rinni egalladi. O‘zbekistonning ikkala goli Abbosbek Fayzullayev va Eldor Shomurodov hisobiga yozildi. Milliy jamoa umumiy hisobda 48 ta terma jamoa ichida 46-o‘rinni egalladi.

Source link