12 mart kuni O‘zbekistonning ko‘p hududlarida havo sifati vaqtincha yomonlashishi kutilmoqda. Ayni paytda havoda mayda dispers zarrachalar — PM2.5 va PM10 miqdori oshishi mumkin. Bu haqda Gidrometeorologiya xizmati agentligi xabar berdi.

Ma’lum qilinishicha, bugun respublika hududining katta qismida, jumladan, Toshkent shahrida ham g‘ubor va tuman kuzatilishi ehtimol qilinmoqda.

Bunday meteorologik holat shamolning sustligi, havo namligining yuqoriligi va tungi haroratning pasayishi ta’sirida yuzaga keladi. Shu sharoitda atmosferaning yerga yaqin qatlamida harorat inversiyasi paydo bo‘lishi mumkin.

Natijada havoning vertikal aralashuvi susayadi va ifloslantiruvchi moddalar, jumladan, chang hamda PM2.5 va PM10 kabi mayda zarrachalarning to‘planishi uchun sharoit yuzaga keladi. Oqibatda ularning havodagi konsentratsiyasi vaqtincha ortishi mumkin.

Mutaxassislarga ko‘ra, shamol kuchayishi yoki yog‘ingarchilik kuzatilishi bilan havo sifati yaxshilanadi. Chunki bunday sharoit atmosferaning tabiiy tozalanishiga yordam beradi.

Ma’lumotlarga ko‘ra, bugun kunduzi respublika bo‘yicha yog‘ingarchilik kutilmaydi, ayrim joylarda tuman tushishi mumkin. Shamol 7–12 m/s tezlikda esadi, havo harorati 3–8 daraja iliq bo‘ladi. Toshkent shahrida ham yog‘ingarchilik kutilmaydi, shamol 3–8 m/s tezlikda esadi, harorat esa 6–8 daraja iliq atrofida bo‘ladi.

Source link

Xorijdan olib kelingan sintetik narkotik va kuchli ta’sir qiluvchi dori vositalari to‘xtatib qolindi.

Davlat xavfsizlik xizmati xodimlari tomonidan o‘tkazilgan tezkor tadbirda oldindan kuzatuvga olingan 21 yoshli fuqaro boshqaruvidagi «Nexia-3» avtomobili poytaxtning Chilonzor tumanidagi «Erkin» YPX maskanida to‘xtatilib, ko‘zdan kechirildi. Natijada mashina salonida sof og‘irligi 4 kg 811 gr bo‘lgan «Alfa-PVP» sintetik narkotik moddasi borligi aniqlanib, ashyoviy dalil sifatida rasmiylashtirildi.

DXX tergov boshqarmasi tomonidan ushbu shaxsga nisbatan JK 246 va 273-moddalari tegishli bandlari bilan jinoyat ishi qo‘zg‘atilib, «qamoq» ehtiyot chorasi qo‘llanildi.

Boshqa bir holatda esa, DXX chegara qo‘shinlari harbiy xizmatchilari tomonidan Andijon viloyatining Marhamat tumanida tezkor tadbir o‘tkazildi. Tumanning Boboxuroson MFY hududida qirg‘izistonlik shaxs chegara to‘siqlari ustidan uloqtirgan qutini qabul qilib olgan ikki nafar mahalliy fuqaro qo‘lga olindi.

Quti ichida 9 988 dona «Zardeks» nomli kuchli ta’sir qiluvchi dori vositasi borligi ma’lum bo‘ldi.

Mazkur holat yuzasidan DXX Andijon viloyati bo‘yicha boshqarmasi Tergov bo‘limi tomonidan Jinoyat kodeksining 246-moddasi 1-qismi bilan jinoyat ishi qo‘zg‘atilgan. «Qamoq» ehtiyot chorasi qo‘llanilib, tergov harakatlari olib borilmoqda.

Source link

Toshkent shahrining Mirobod tumanida avtobuslar uchun ajratilgan maxsus yo‘lakda King Long rusumli avtobus va yengil avtomobil ishtirokida yo‘l-transport hodisasi sodir bo‘ldi. Hodisa oqibatida jabrlanganlar bo‘lmagan, avtobus texnik shikastlangan.

Rasmiy ma’lumotga ko‘ra, voqea 2026 yil 11 mart kuni soat 19:17 da Mirobod tumani Shahrisabz ko‘chasida yuz bergan. «4-Avtobus saroyi» filiali tasarrufida bo‘lgan King Long rusumli avtobus avtobuslar uchun tashkil etilgan maxsus yo‘lak — BRT bo‘ylab Oybek metro bekati tomon harakatlanib kelayotgan bo‘lgan.

Qayd etilishicha, shu yo‘nalish bo‘ylab ketib borayotgan Polestar 2 Long Range rusumli yengil avtomobil haydovchisi yo‘l harakati qoidalarining 4.1.1-bandi, ya’ni “Harakatlanish to‘g‘riga” buyuruvchi yo‘l belgisi talabiga amal qilmasdan chapga, Mirobod ko‘chasi tomon burilgan. Oqibatda u avtobus bilan to‘qnashgan.

Ma’lum qilinishicha, mazkur yo‘l-transport hodisasida tan jarohati olganlar yo‘q. Biroq avtobus texnik shikastlangan. Dastlabki ma’lumotlarga ko‘ra, hodisa yengil avtomobil haydovchisi aybi bilan sodir bo‘lgan.

Ushbu holat belgilangan tartibda IIBB YPX inspektorlari tomonidan rasmiylashtirilgan. Mas’ullar haydovchilardan yo‘llarda harakatlanish chog‘ida yo‘l harakati qoidalariga qat’iy rioya qilish, doim hushyor va e’tiborli bo‘lishni so‘ramoqda.

Source link

Respublika bo‘ylab yo‘l bezoriligi va qo‘pol qoidabuzarliklarni bartaraf etish maqsadida o‘tkazilayotgan kuchaytirilgan reydlar davomida yuzlab haydovchilarga nisbatan ma’muriy choralar ko‘rildi. Ichki ishlar vazirligi Jamoat xavfsizligi departamentining maxsus guruhlari tomonidan 10 kun davomida olib borilgan monitoring natijalari ma’lum qilindi.

Ma’lum qilinishicha, 26 fevraldan boshlab respublika hududlarida yo‘l bezoriligi va yo‘l harakati qoidalarining qo‘pol buzilishlarini oldini olishga qaratilgan kuchaytirilgan reyd tadbirlari o‘tkazilmoqda.

Monitoring guruhlari tomonidan xavfli va agressiv tarzda avtomobil boshqarayotgan 31 nafar haydovchi aniqlangan, shuningdek ular to‘planadigan 33 ta ko‘cha va joy belgilangan. Internet tarmoqlarida esa yo‘l bezoriligi holatlarini aks ettiruvchi 391 ta videorolik aniqlangan.

Tahlillar natijasida 338 nafar haydovchiga nisbatan ma’muriy bayonnoma rasmiylashtirilgan, 296 ta avtomobil esa jarima maydonchasiga joylashtirilgan. Shuningdek, xavfli haydovchilik va noqonuniy poygalarni targ‘ib qiluvchi 19 ta akkaunt faoliyati to‘xtatilgan.

Reyd tadbirlari davomida jami 16 845 ta qo‘pol qoidabuzarlik aniqlangan. Qoidabuzarlar orasida 101 ta holatda voyaga yetmagan shaxslar ishtirok etgani qayd etilgan.

Bundan tashqari, avtomobillarga tyuning ishlarini amalga oshiruvchi avtoservis va ustaxonalar rahbarlari bilan profilaktik suhbatlar o‘tkazilgan.

Kechasi o‘tkazilgan nazorat tadbirlari davomida 75 ta holatda narkotik va psixotrop moddalar bilan bog‘liq holatlar, shuningdek 1 024 ta holatda o‘tkir kesuvchi buyumlarni noqonuniy olib yurish holatlari aniqlangan.

Ma’lum qilinishicha, yo‘llarda xavfli harakatlarning oldini olish va tartibni ta’minlashga qaratilgan bunday tadbirlar izchil davom ettiriladi.

Source link

Toshkent shahrining Sergeli tumanida ijara haqi bo‘yicha kelishmovchilik ortidan talabalar va ular bilan birga yashovchi fuqaro o‘rtasida janjal kelib chiqdi. Holat yuzasidan ishtirokchilarning shaxsi aniqlanib, tegishli hujjatlar rasmiylashtirilgan.

Ma’lum qilinishicha, joriy yilning 10 mart kuni Toshkent shahar Sergeli tumani IIO FMB navbatchilik qismiga Sergeli-7 mavzesida joylashgan ko‘p qavatli uylardan birida ijarada yashab kelayotgan Toshkent davlat yuridik institutining bir necha talabasi hamda ular bilan birga yashovchi fuqaro o‘rtasida janjal kelib chiqqanligi haqida xabar kelib tushgan.

Dastlabki ma’lumotlarga ko‘ra, mojaroga ijara haqini to‘lash masalasidagi kelishmovchilik sabab bo‘lgan. Huquq-tartibot idoralari xodimlari tomonidan voqea ishtirokchilarining barchasi aniqlanib, holat yuzasidan tuman ichki ishlar bo‘limida tegishli hujjatlar rasmiylashtirilgan.

Shuningdek, ishtirokchilar bilan profilaktik suhbat o‘tkazilib, ularga javob berilgan. Ayni paytda to‘plangan materiallarni qonuniy chora ko‘rish uchun tuman sudiga yuborish masalasi ko‘rib chiqilmoqda.

Source link