Sport
«Barselona» Ispaniya chempionatida ilk bor mag‘lub bo‘ldi
Kataloniya klubi «Sevilya»ga yirik hisobda yutqazdi.
Ispaniya chempionatining 8-turida «Barselona» safarda «Sevilya»ga 1:4 hisobida imkoniyatni boy berdi.
O‘yinning 13-daqiqasida «Sevilya» hisobni ochdi – 36 yoshli Aleksis Sanches penaltidan gol urdi. U «Levante»ning 38 yoshli futbolchisi Xose Luis Moralesdan (23 avgust) keyin «Barselona» darvozasiga penaltidan gol urgan XXI asrdagi ikkinchi eng keksa futbolchiga aylandi.
36-daqiqada Isaak Romero mezbonlarning ikkinchi goliga mualliflik qildi. U 2004 yildan beri chempionatning bir o‘yinida «Barselona» darvozasiga penalti ishlab olgan va gol urgan birinchi futbolchi bo‘ldi.
Birinchi bo‘limga qo‘shib berilgan daqiqalarda mehmonlar «gol+pas» tizimi bo‘yicha bu mavsumda klubda peshqadamlik qilayotgan Markus Reshford (3+4) goli evaziga hisobni qisqartirdi.
76-daqiqada Robert Levandovski penaltini golga aylantira olmadi (chempionatdagi o‘nta urinishda uchinchi marta).
90-daqiqada Xose Manuel Karmona mezbonlarga ikki to‘p farqni qaytargan bo‘lsa, Akor Adams 96-daqiqada hisobni yirik ko‘rinishga olib keldi.
«Barselona» uchun bu La Liga joriy mavsumidagi ilk mag‘lubiyat (avvalgi yetti o‘yinda jamoa oltita g‘alaba, bitta durang qayd etgan) va Chempionlar Ligasi bilan hisoblaganda ketma-ket ikkinchi mag‘lubiyatdir (1 oktyabr kuni PSJ klubiga qarshi o‘yinda 1:2).
Kataloniya klubi peshqadam «Real»dan ikki ochko ortda qolgan holda jadvalda ikkinchi o‘rinda bormoqda, «Sevilya» to‘rtinchi o‘ringa ko‘tarildi.