G‘alaba golini urgan Lautaro Martines esa yig‘lab yubordi.

JCh-2026 yarimfinalida Argentina va Angliya o‘rtasida kechgan uchrashuv (2:1) kutilganidek kechdi: hissiyotli, keskin, ziddiyatlarga boy va dramatik yakun. Jamoalar birinchi bo‘limda haqiqiy qirg‘inbarot uyushtirishdi, ikkinchi bo‘limga kelibgina futbol o‘ynay boshlashdi. Va unda «Albiselesta»ning qo‘li baland keldi: janubiy amerikaliklar birinchi bo‘lib gol o‘tkazib yuborganiga qaramay, o‘yin oxirida qo‘shimcha kuch topa olishdi va britaniyaliklar «o‘rnatgan avtobus»ni buzib o‘tishdi.

O‘yin hakam hushtagi chalinganidan keyin ham «yondi»: Janubiy Amerika vakillari bu g‘alabani Folklend urushini yodga soluvchi provokatsion plakat bilan nishonlashdi, Angliya milliy jamoasi yarimhimoyachisi Jud Bellinghem esa hissiyotlarini jilovlay olmadi va raqib futbolchisi Valentin Barkoning boshiga urib qoldi, g‘alaba goli muallifi Lautaro Martines intervyu vaqtida yig‘lab yubordi, himoyachi Kristian Romero esa sobiq ingliz futbolchisi Gari Nevillning tanqidiga javob qaytardi.

«Chinakam telbalik»

Ikki golli uzatmasi bilan Argentinaning navbatdagi kambekining asosiy ijodkori bo‘lgan Lionel Messi o‘yindan keyin jurnalistlar bilan gaplashdi va o‘z manziliga bildirilayotgan nafratli so‘zlarga javob qaytardi.

«Kim nima desa deyaversin. Biz kurashamiz, raqobatlashamiz va futbol o‘ynashni bilamiz. Bugun hisobda ortda qolayotgan bo‘lsak ham, Angliyaga qarshi o‘yinni to‘liq nazorat qildik. Biz bu maqomga o‘z mehnatimiz bilan erishdik. Hech kim bizga hech narsani shunchaki berib qo‘ymaydi», – deya argentinaliklar sardorining so‘zlarini keltiradi insayder Fabritsio Romano.

Messi ushbu o‘yin argentinaliklar uchun prinsipial ahamiyatga ega bo‘lganini tan olgan.

«Madhiya ijro etilayotgan vaqtdayoq bizda o‘zgacha tuyg‘ular bor edi. Birortamiz mag‘lubiyatga rozi bo‘la olmasdik, Argentina xalqi ham bu g‘alabani qattiq kutayotgandi – barcha Angliyani mag‘lub etish orzusida edi.

Finalga chiqishmi? Bunday o‘yinlarning har biri alohida o‘zgacha. Bu hissiyotlarni yana bir bor boshdan kechirish – aql bovar qilmas hodisa. O‘ylaymanki, bizning jamoa erishgan narsa – chinakam telbalik: qatorasiga ikki jahon chempionati finali.

Ochig‘ini aytsam, jahon chempionati boshlanishidan oldin biz kuchli to‘rtlikka kirishimiz, chempionlik uchun kurashishimizga ishonchim komil edi. Bu natija meni ajablantirmaydi, chunki nimalarga qodirligimizni bilaman. Muammolarimiz bor edi, lekin jamoamiz yig‘ilib, birlashsa, har qanday qiyin vaziyatdan chiqib keta oladi. Biz bir-birimizni qo‘llab-quvvatlaymiz», – deya forvardning so‘zlarini keltiradi TyC Spors.

U Angliya ustidan qozonilgan g‘alabani argentinalik boshqa bir afsonaviy futbolchi – Diyego Maradonaga bag‘ishlagan.

«Ishonchim komilki, u hozir yuqorida bu lahzadan zavqlanyapti. Bu uning ham g‘alabasi. Unga quvonch hadya eta olganimizdan baxtiyorman va umid qilamanki, u o‘sha yerda buni o‘zi xohlagandek nishonlaydi va bundan zavq oladi», – deya Messidan iqtibos keltiradi Romano.

Endi Argentinani mundialning hal qiluvchi o‘yini kutmoqda. Leo finaldagi bo‘lajak raqib – Ispaniya milliy jamoasi haqida ham fikr bildirgan.

«Bu ajoyib futbolchilar va o‘z o‘yin uslubiga ega ajoyib jamoa. Ispanlarning ko‘pchiligini yaxshi bilaman, ularni diqqat bilan kuzatib boraman. Bizni juda keskin va o‘ziga xos o‘yin kutmoqda», – deya qayd etgan futbolchi.

Bellinghem – Messi bilan bahsi haqida

O‘yin vaqtida Leo va Jud Bellinghem o‘zaro bahslashib ketdi – ularning tortishuvi translatsiyaga tushib qolgan. Ammo o‘yindan keyin «Uch sherlar» futbolchisi haroratni pasaytirdi.

«Messi bilan hech qanday muammo yo‘q. Biz u bilan rikoshetni muhokama qildik, aslida u yerda hech qanday yomon ish bo‘lgani yo‘q. Kimdir pashshadan fil yasamasligi kerak, u yerda hech nima bo‘lmadi. Men uchun Leoga qarshi o‘ynash jozibali», – deya Bellinhemning so‘zlarini keltirgan Romano.

Shu bilan birga Jud o‘zi ishtirokidagi boshqa bir epizod yuzasidan izoh bermagan – u o‘yindan keyin raqiblar o‘z oldida g‘alabani nishonlayotganida ulardan biri Valentin Barkoning boshiga urgandi. Hozircha futbolchidan rasmiy izoh yo‘q, OAV esa bu borada o‘z versiyasini taqdim etmoqda.

Kadrdan ko‘rish mumkinki, katta ehtimol bilan, ingliz futbolchisi janubiy amerikaliklardan o‘ziga yoqmaydigan so‘z eshitgan va shundan keyin o‘zini tiya olmagan: u Barkoga ortdan yaqinlashadi va uning boshiga ortdan shapaloq tushiradi. Bungacha Valentinning yo‘li Bellinghem bilan tutashmagan – u butun o‘yin davomida zaxira o‘rindig‘ida qolgandi.

Angliya milliy jamoasi sobiq darvozaboni Pol Robinson esa BBC efirida Barko Enso Fernandesning golini inglizlar zaxira o‘rindig‘i qarshisiga kelib nishonlagan holda provokatsiya qilganini aytib o‘tdi.

«Umid qilamanki, men bunday ahmoq bo‘lib qolmayman»

O‘yinda boshqa bahsli vaziyatlar ham bo‘ldi. Argentinaliklar g‘alabani nishonlash chog‘ida Malvin orollari (Argentina va Angliya o‘rtasidagi hududiy bahs predmeti bo‘lgan Folklend orollarining mahalliy nomlanishi) haqidagi banner bilan e’tiborni o‘ziga qaratishdi. O‘yindan keyin janubiy amerikaliklar inglizlarga «zarba berish»da davom etishdi. Masalan, Leandro Paredes jurnalistlar bilan muloqot chog‘ida shunday degan: «Orollar doim Argentinaniki bo‘ladi».

Himoyachi Kristian Romero esa Angliya milliy jamoasi sobiq futbolchisi, teleekspert Gari Nevillga javob qaytardi: o‘yindan oldin u argentinaliklar mudofaa chizig‘ini tanqid qilgandi.

«Umid qilamanki, kareramni yakunlaganimda, faqat o‘yinchilarning harakatlaridan kamchilik qidiradigan ahmoq odamga aylanib qolmayman. Biz tarix yaratmoqdamiz va milliy jamoa a’zosi ekanimizdan faxrlanamiz», – degan «Tottenhem» himoyachisi.

«Bu jamoa qiyinchilikka uchraganda yaxshiroq o‘ynaydi»

O‘yindan keyingi eng hissiyotli pallalar g‘alaba goli muallifi Lautaro Martinesning intervyusi bo‘ldi. U ko‘z yoshlarini tiyib tura olmadi.

«Otam menga birinchi butsani olib berganidan beri bu golni orzu qilardim. Bu onam uchun atalgan gol. U uydan ketgan kunimdan beri har doim yotog‘imni tayyorlardi va meni kutishda davom etardi. Bu gol men uchun finalga chiqishdan ham muhimroq», – degan forvard.

Argentina milliy jamoasi bosh murabbiyi Lionel Skaloni yana bir bor o‘z shogirdlaridagi xarakterni e’tirof etdi.

«Bizda ajoyib jamoa bor. Bugun zaxira o‘rindig‘idan maydonga tushganlar, muhim rol o‘ynashdi. Futbolda, hayotda bo‘lgani kabi, oxirigacha boringni berishing kerak. Bu jamoa qiyinchilikka duch kelganida, yaxshiroq o‘ynaydi.

Agar Enso Fernandes to‘g‘ri zarba bera olmaganida, biz yettita golli vaziyat yaratib ham 0:1 hisobida yutqazgan bo‘lardik. Biz oxirigacha taslim bo‘lmadik. Biz g‘alaba qozonganimiz uchungina emas, turli vaziyatlardan chiqib keta olganimiz uchun muvaffaqiyatlimiz. O‘ylaymanki, haqli ravishda g‘alaba qozondik. Biz keyingi sinovga tayyormiz», – degan Skaloni Argentina futbol assotsiatsiyasi saytiga.

«Argentina bejiz amaldagi chempion emasligini isbotladi»

Angliya lageridagilar, tabiiyki, butunlay boshqacha kayfiyatda. Jamoa hujumchisi va sardori Harri Keyn g‘alaba qo‘ldan boy berilganidan qattiq ranjigan.

«Yigitlar uchun, butun jamoa uchun juda og‘ir va alamli. Uchrashuvning katta qismida biz yaxshiroq harakat qildik. Ustunlikni saqlab qolishga urindik, ammo jahon chempionati yarimfinalida bu yetarli emas. Hujum ketidan hujum qilishdi va biz o‘yindagi nazoratni qaytarib ololmadik. Ozgina yetishmay qolganida, bu juda og‘riqli bo‘ladi», – degan inglizlar jamoasi sardori BBC uchun intervyusida.

Jamoa himoyachisi Den Byorn ham shunga o‘xshash fikr bildirgan.

«Jahon chempionati finaliga atigi 10-15 daqiqa qolganda, keyin yetib bora olmay qolsang, bu juda og‘riqli. Hamjihatligimiz bizni uzoqqa olib keldi va to‘g‘risini aytsam, biz buni uddalaymiz deb o‘ylagandim. Vaqtimiz kelgandek tuyulgandi. Ammo Argentina bejiz amaldagi jahon chempioni emasligini ko‘rsatib qo‘ydi», – degan Byorn Sky Spors telekanaliga.

Angliya milliy jamoasi bosh murabbiyi Tomas Tuxelning intervyusi esa eng shov-shuvlisi bo‘ldi. Ushbu germaniyalik mutaxassisga o‘yindan so‘ng muxlislar va ekspertlarda ko‘plab savollar to‘plangandi, u esa o‘z xatolarini tan olishdan bosh tortdi va mag‘lubiyat bilan yakunlangan yarimfinal o‘yinini Angliyaning ushbu jahon chempionatidagi eng yaxshi o‘yinlaridan biri deb atadi.

«Bizda afsuslanish yo‘q. Muammo tarkibda emasdi. O‘yinning borishi butunlay o‘zgardi, lekin nima uchun buni muhokama qilishayotganini tushunaman. Mendan yaxshiroq bilaman deb o‘ylaydigan millionlab murabbiylar bor. Men ular bilan hamma narsani muhokama qilishim mumkin edi, lekin qarorni o‘zim qabul qilishim kerak», – deya qayd etgan mutaxassis.

Source link

Messi yana bir performans namoyish etdi, argentinaliklar o‘yindan keyin siyosiy banner ko‘tarishdi; Mbappe himoyaga yordam berishda turnirning eng yomon futbolchisiga aylandi – u yetti o‘yinda atigi bir marta himoyaga qaytgan; FIFA esa yana bir bor o‘z qoidalarini buzmoqda.

Argentina – jahon chempionati finalida. Lionel Skaloni shogirdlari Angliyaga qarshi o‘yinning so‘nggi daqiqalarida iroda ko‘rsatib, g‘alaba qozondi (2:1). Endi «Albiselesta» finalda Ispaniyaga qarshi maydonga chiqadi.

Futbol maydonlaridan tashqarida ham qiziqarli voqealar bo‘lib o‘tmoqda: fransuzlar himoyachisi Lyuka Din nafrat to‘lqiniga duch keldi, Kilian Mbappe esa himoyaga yordam berishda eng yomon futbolchi deb topildi.

Buyuk kambek

Angliya – Argentina 1:2

Gollar: Gordon, 55 (1:0). Fernandes, 85 (1:1). L. Martines, 90+2 (1:2)

Angliya: Pikford, Stouns (Reshford, 90+6), Geyi, Spens (Toni, 90+6), Jyeyms (O`Rayli, 82), Rays (Byorn, 82), Anderson, Bellinghem, Gordon (Konsa, 72), Rodjyers, Keyn

Argentina: E. Martines, L. Martines (Montiel, 72), Romero, Molina (Otamendi, 72), Talyafiko (L. Martines, 81), Paredes (Gonsales, 64), Makallister, Fernandes, Simeone (de Paul, 72), Alvares, Messi

Ogohlantirishlar: Anderson, 37 – L. Martines, 42. Romero, 51. de Paul, 90

«Biz uni yuz foizga zararsizlantira olmasligimizni juda yaxshi tushunib turibmiz… ammo biz bir yo‘lini qilamiz», – degandi o‘yindan oldin Angliya milliy jamoasi bosh murabbiyi Tomas Tuxel Lionel Messi haqida.

Germaniyalik mutaxassisning rejasi avvaliga chindan ham ish berdi – inglizlar birinchi bo‘limda taktik follar va ehtiyotkorona o‘yin bilan Messini ham, butun Argentinani ham tiyib turdi. Va o‘zini ham

– yarimfinalning birinchi bo‘limi xavfli vaziyatlar bilan emas, xavfli harakatlar bilan yodda qoldi. Buni yaqqol ifodalaydigan oddiy fakt: dastlabki yarim soat mobaynida jamoalar biror marta ham darvoza tomon zarba berishmadi. Opta ma’lumotiga ko‘ra, bu jahon chempionati tarixida ilk bor shunday bo‘lishi.

Ammo ikkinchi bo‘limda vaziyat o‘zgardi. Inglizlarning 55-daqiqada uyushtirgan golli hujumi o‘yinni ochib yubordi – Entoni Gordon Morgan Rodjyers qanotdan uzatgan to‘pni yaqin masofadan darvoza to‘riga kiritib yubordi.

O‘tkazib yuborilgan gol argentinaliklarni oldinga chiqishga majbur qildi – ular raqib darvozasi tomon tez-tez yaqin borishdi va Jordan Pikfordni bir necha bor qahramonlik ko‘rsatishga majbur qildi.

Skaloni futbolchilarni almashtirish orqali hujum chizig‘ini kuchaytirdi, Tuxel esa oldingi chiziq vakillari o‘rniga himoyachilarni tushirdi. 

Pikford oxirigacha turib bera olmadi. 85-daqiqada Lionel Messidan to‘pni qabul qilib olgan Enso Fernandes jarima maydoni tashqarisidan qaytarib bo‘lmas zarba yo‘lladi – tayanch zonasida uni hech kim qarshi olmadi, bu pozitsiyani yopishi kerak bo‘lgan Deklan Rays ikki daqiqa oldin zaxiraga olingandi.

90+2-daqiqada esa 39 yoshli argentinalik g‘alaba goliga ham uzatma berdi – uning o‘ng qanotdan uzatmasi darvoza chizig‘i oldida bo‘sh qoldirilgan Lautaro Martinesning boshiga yetib bordi.

Angliya qolgan daqiqalarda vaziyatni o‘zgartira olmadi, argentinaliklar so‘nggi daqiqalarda ham kuchli bosim uyushtirishdi va g‘alabali hisobni ushlab qolishdi. «Albiseleste» bu safargi turnir pley-offida har safar so‘nggi daqiqalargacha muxlislarini hayajonda o‘tirishga majbur qilmoqda: Kabo-Verde, Misr va Shveytsariyaga qarshi o‘yinlarda ham barchasi o‘yin oxiridagi gollar evaziga hal bo‘lgandi. Ispaniya ham finalda hakam hushtagi chalinmagunicha bo‘shashmasligi talab etiladi.

Finalda 30 daqiqalik tanaffus bo‘ladi

JCh-2026 allaqachon tarixdagi eng noodatiy turnirga aylandi – 48 ishtirokchi jamoadan tortib kuling breklar orqali o‘yin to‘rt bo‘limga bo‘lib tashlanganigacha. Turnir finali ham noodatiy ko‘rinishda bo‘ladi – birinchi bo‘limdan keyin standart 15 daqiqalik tanaffus o‘rniga yarim soatlik konsert uyushtirilishi rejalashtirilmoqda.

Bu konsertda Jastin Biber, Madonna, Shakira va janubiy koreyaliklarning Bs pop-guruhi chiqish qilishi kutilmoqda. Marosim tashkilotchisi Coldplay guruhi solisti Koul Martin bo‘ladi.

Bir qarashda amerikacha uslubdagi shou (AQShda tanaffuslarda konsert berishni yaxshi ko‘rishadi) qiziqarli ko‘rinsa-da, u rasman FIFA qoidalarini buzadi.

«Agar chindan ham shunday yo‘l tutilsa, o‘yin qoidalari buziladi. Qoidada «futbolchilar ikki bo‘lim o‘rtasida 15 daqiqadan oshmaydigan tanaffus qilish huquqiga ega»ligi haqida yozilgan. Musobaqa reglamentida bo‘limlar orasidagi tanaffus davomiyligi ko‘rsatilishi shart va u faqat hakam ruxsati bilan o‘zgartirilishi mumkin. JCh-2026ni tartibga soluvchi hujjatda ham faqat 15 daqiqalik tanaffus haqida so‘z ketgan», – deya yozadi «SE» nashrining hakamlik bo‘yicha eksperti Aleksandr Bobrov.

Boshqa tomondan, bu jahon chempionatida o‘z qoidalarini buzish – allaqachon FIFA uchun an’anaga aylangan.

«Uzurpator qaroqchilar»

Navbatdagi siyosiy mojaro ham ro‘y berdi. Angliyaga qarshi yarimfinal o‘yini arafasida Argentina vitse-prezidenti Viktoriya Vilyarruel estafeta tayoqchasini qabul qilib oldi. U yevropaliklarni «uzurpator qaroqchilar» deb atagan.

«Bu oddiy o‘yin emas. Ertaga qaroqchilarga qarshi o‘ynaymiz. Men tolerantlik qilmayman va vazmin bo‘lmayman: inglizlarga qarshi o‘yin – har doim kattaroq bo‘ladi. Malvin orollari, Diyego Maradona, Leoning so‘nggi turniri va bosqinchilarni to‘xtatish imkoniyati. Olg‘a, Argentina! Chunki oxirgi nafasimizgacha o‘zimiznikini talab qilamiz!» – deya yozgan Vilyarruel ijtimoiy tarmoqda.

Ma’lumot uchun, Argentina va Buyuk Britaniya munosabatlari 1982 yilda Folklend urushi tufayli yomonlashgandi – shu nomli orol uchun ikki oydan ortiq vaqt davomida harbiy harakatlar olib borilgan va bu ikki tomondan yuzlab harbiylarning o‘limiga sabab bo‘lgan. Mojaro yakunida Folklend oroli (Argentinada – Malvin oroli deb nomlanadi) Buyuk Britaniya tarkibida qolgan va hozirgacha mamlakatlar o‘rtasida, asosan futbol maydonlarida, keskin qarama-qarshilik davom etmoqda. Bu galgi to‘qnashuvni «Albiseleste» o‘z foydasiga hal qildi va o‘yindan keyin futbolchilar argentinalik muxlislar olib kelgan, «Malvin oroli – Argentinaniki» deb yozilgan bannerni stadionga olib tushishdi va uning fonida suratga tushishdi.

Mbappe – JChning himoyalanishda eng yomon futbolchisi

Fransiya milliy jamoasi sardori Kilian Mbappega jahon chempionati yarimfinalida Ispaniyaga qarshi kechgan o‘yindagi mag‘lubiyatdan (0:2) keyin ilk tanqid toshlari kela boshladi. FotMob portaliga ko‘ra, ushbu forvard turnirning himoyaviy harakatlarda ishtirok etish bo‘yicha eng yomon futbolchisi bo‘lgan. Agar statistikaga ishonilsa, 27 yoshli fransuz yetti uchrashuv mobaynida faqat bir marta jamoadoshlariga himoyada yordam bergan va bu borada so‘nggi 602-o‘rinni egallagan.

Kilianni dangasa deb bo‘lmaydi – nima bo‘lganda ham u turnir davomida sakkizta gol urdi. Shu bilan birga, murabbiylar bu statistik ko‘rsatkichni inobatga olishi tayin.

Din vatan xoiniga chiqarildi

Chempionlik uchun kurashdan chiqilgach, boshqa bir fransuz futbolchisi – himoyachi Lyuka Din ham tanqidlar yomg‘iri ostida qoldi. Aniqrog‘i, uni shunchaki tanqid qilishmayapti, balki chinakamiga ta’qibga olishgan – ushbu futbolchi Ispaniyaga qarshi o‘yin taqdirini hal qilgan penaltiga sababchi bo‘lgandi. Natijada Dinning ijtimoiy tarmoqlardagi sahifalari irqchilik ruhidagi izohlar bilan to‘lib ketdi, uni «oq axlat» deb atashmoqda.

«Sen jamoadagi yagona oq tanli eding va biz sen tufayli yutqazdik», – deya yozgan heyterlardan biri.

Dinning ta’qib qilinishini global miqyosda qoralash hali kuzatilmayapti. Bu allaqachon ba’zi siyosatchilarning g‘ashiga tegmoqda – Fransiya Milliy majlisi a’zosi Jyulen Odul matbuotni ikki tomonlama standartlarda aybladi.

«Agar xuddi shu jirkanch izohlar shartli Usmon Dembelaga qaratilganida, irqchilikka qarshi jamoatchilik hayqiriq va faryod bilan shovqin ko‘targan bo‘lardi. Ammo gap Din haqida borar ekan, mutlaqo sukut saqlanadi, chunki oq tanlilarga nisbatan irqchilik ularni qiziqtirmaydi. Sharmandalik», – deya yozgan Odul ijtimoiy tarmoqda.

Keyingi o‘yinlar

Jahon chempionatida ikkita o‘yin qoldi – ikkisi ham medallar uchun

20 iyulga o‘tar kechasi, 02.00. Fransiya – Angliya, 3-o‘rin uchun o‘yin

21 iyulga o‘tar kechasi, 00.00. Ispaniya – Argentina, final

Source link

2026 yilgi futbol bo‘yicha jahon chempionatining ikkinchi yarimfinalida Angliya va Argentina terma jamoalari o‘zaro to‘qnash keldi. 

Bahsning birinchi goli 55-daqiqada Angliya hujumchisi Entoni Gordon tomonidan kiritildi. Argentina 85-daqiqada Enso Fernandesning aniq zarbasi evaziga muvozanatni tikladi. O‘yinning 90+2-daqiqasida maydonga zaxiradan tushgan Lautaro Martines g‘alaba golini urib, argentinaliklarga 2:1 hisobidagi irodali g‘alabani taqdim etdi. 

Shu tariqa, Argentina ketma-ket ikkinchi bor jahon chempionati finaliga yo‘l oldi. Hal qiluvchi bahsda Janubiy Amerika vakillari Ispaniyaga qarshi maydonga tushadi. Angliya esa 3-o‘rin uchun Fransiya bilan bahs olib boradi. 

Jahon chempionati–2026, yarimfinal

Angliya – Argentina 1:2

Gollar: Gordon (55) — Fernandes (86), Lautaro Martines (90+2).

Angliya: Pikford — Jyeyms (83, Bern), Stounz (90+6, Tauni), Gehi, Spens (90+6, Reshford) — Rays (83, O‘Raylli), Anderson — Rojyers, Bellinhem, Gordon (72, Konsa) — Keyn.

Argentina: Martines — Molina (73, Montel), Romero, Martines (73, Otamendi), Talyafiko (81, Lautaro Martines) — Paredes (64, Gonsales) — Simeone (73, De Paul), Fernandes, Mak-Allister, Alvares — Messi.

Ogohlantirishlar: Anderson (37) — Martines (42), Romero (51), De Paul (90+4).

Source link

Qizil va sariq kartochkalar joriy etilishiga sabab bo‘lgan voqea, «Asr o‘g‘riligi», Maradonaning qo‘lda urilgan goli, yuz yillikning eng yaxshi goli, Folklend urushi uchun qasos va Bekhemning karerasini barbod qilishi mumkin bo‘lgan chetlatish. Bularning barchasi Angliya – Argentina o‘yinlarida sodir bo‘lgan. O‘yinlardagi yuqori harorat tufayli futbolchilar bir-biriga og‘ir jarohat yetkazmasligi va tribunalarda qonli to‘qnashuvlar ro‘y berishidan qochish uchun bu jamoalar o‘rtasida o‘rtoqlik uchrashuvlari o‘tkazilmaydi. Ammo bugun ular JCh yarimfinalida bir-biriga qarshi maydonga chiqishiga to‘g‘ri keladi.

Foto: Mirrorpix via Getty Images

15 iyul kuni kechqurun jahon chempionatida ikkinchi yarimfinal o‘yini o‘tkaziladi: Amaldagi chempion Argentina Angliyaga qarshi. FQB ushbu o‘yinni «eng xavfli o‘yinlar» toifasiga kiritgan – stadion atrofida va jamoalar joylashgan mehmonxonalar atrofida xavfsizlik choralari kuchaytirilgan. Buning sababi shundaki, bu futbol olamidagi milliy jamoalar darajasidagi eng mashhur va eng prinsipial qarama-qarshilik hisoblanadi: bu jamoalarning jahon chempionatlaridagi beshta uchrashuvidan uchtasi sport doirasidan tashqariga chiqib ketgan mojarolar bilan yakunlangan.

Argentina – Angliya

Jahon chempionati. 1/2 final

16 iyulga o‘tar kechasi, 00:00. Mercedes-Benz Stadium (Atlanta)

JCh-1966: «toj uchun o‘g‘rilik» va kartochkalar paydo bo‘lishi

Asosiy faktlar. Angliya – Argentina 1:0. 1966 yil 23 iyul, London, Angliya. Jahon chempionati 1/4 finali

Hozirgacha eslanadigan mojaro. O‘zaro dushmanlik tarixi 60 yil muqaddam Angliyada bo‘lib o‘tgan jahon chempionatiga borib taqaladi. O‘shanda mezbonlar chorakfinalda Argentinaga qarshi o‘ynagan, o‘yinning 35-daqiqasida uchrashuv bosh hakami, germaniyalik Rudolf Kreytlyayn janubiy amerikaliklar jamoasi sardori Antonio Rattinni maydondan chetlatgandi. Hakam ispanchani bilmagan, lekin argentinalik futbolchini o‘ziga nisbatan «haqoratli so‘zlar» ishlatishda ayblagan – u bu qarorini futbolchining yuz ifodasi hamda ovozi ohangi bilan izohlagan.

1966 yilda hali futbolda sariq va qizil kartochkalar mavjud emasdi, shu tufayli hakam Rattinga shunchaki qo‘l ishorasi bilan tribunalar tomonni ko‘rsatadi. Futbolchi esa maydonni tark etishni istamaydi va keyingi 9 daqiqa mobaynida qarshilik ko‘rsatadi.

Afsonaviy Antonio Rattin 2026 yil 11 iyul kuni 89 yoshda vafot etdi

Antonio arbitrga o‘z e’tirozini rasmiy tarzda bildirish uchun tarjimon taqdim etishni talab qiladi. Vaziyatni hal qilish uchun «Uembli»ga nafaqat murabbiylar, balki FIFAning yuqori martabali mulozimlari, shuningdek, otliq politsiyachilar ham tushib kelishadi. Argentinaliklarning g‘azablangan sardori baribir kuch bilan tribunalar ostiga olib ketiladi, lekin u yo‘l-yo‘lakay futbol tarixiga abadiy muhrlanib qolgan bir necha namoyishkorona norozilik aksiyalarini uyushtiradi.

Rasmiylar Rattindan maydonni tark etishni so‘rashmoqda

Foto: Mirrorpix via Getty Images

Britaniya ramzlari tasvirlangan burchakdagi bayroqcha yonidan o‘tayotib, futbolchi bayroqchani qo‘llari bilan namoyishkorona g‘ijimlaydi, kiyim almashtirish xonasiga ketayotganida esa stadionda qirolicha Yelizaveta II o‘tishi uchun maxsus to‘shalgan hashamatli qizil gilamga o‘tirib oladi. Oyoq tirab olgan futbolchini tribunalardan uloqtirilayotgan pivo bankalari va boshqa turli buyumlar yomg‘iri ostida kuch bilan olib ketishga to‘g‘ri keladi.

Ikkinchi bo‘limda ko‘pchilik bo‘lib o‘ynagan inglizlar Jyeffri Hyorstning yagona goli evaziga g‘alaba qozonadi – argentinaliklar bu golni yaqqol ofsayddan urilgan deb hisoblashadi.

O‘yin yakunlanishi bilan argentinaliklar hakamga tashlanadi: himoyachi Roberto Ferreyro uni qattiq turtib yuboradi, yarimhimoyachi Ermindo Onega FIFA vitse-prezidenti Garri Kavananing yuziga tupurib yuboradi (keyinroq futbolchilar uchtadan o‘yinga diskvalifikatsiya qilinadi).

Inglizlar bosh murabbiyi Alf Ramsey o‘z futbolchilariga argentinaliklar bilan liboslarni almashishni taqiqlaydi, matbuot anjumanida esa raqib futbolchilarini «hayvonlar» deb ataydi.

«Podkatlar – bu normal holat. Ammo razil xatti-harakatlar ham bo‘lgan, – deb eslaydi inglizlar himoyachi Jorj Koen o‘sha o‘yinni. – Argentinaliklar yuzga tupurar, sochni yulishar, quloqdan tortardi. Ular bizni qo‘rqitishga harakat qilardi. Ular o‘z maqsadiga erisha olmasligini bilib, men ko‘rgan eng qabih ishlarga qo‘l urishdi. Sharmandalik, ular o‘z o‘yinini ko‘rsatmadi. Agar ular shunchaki chiqib, nimaga qodir ekanliklarini ko‘rsatishganida, biz yutqazishimiz mumkin edi».

Argentinadagilar esa bu o‘yinni va butun turnirni – «toj uchun o‘g‘rilik» deb eslashadi: ko‘pchilik arbitrlar turnir mezbonlari bo‘lgan Angliya milliy jamoasini qo‘llagan, deb hisoblaydi.

Futboldagi ahamiyati. Rattin hakamning og‘zaki talabi bo‘yicha maydonni tark etishdan bosh tortishi futbolchilar va tomoshabinlar uchun yanada tushunarli va ko‘rgazmali jazo tizimini joriy etish zaruratini yuzaga chiqaradi. O‘sha kuni o‘yinni tribunadan tomosha qilgan, sudyalar komissiyasi boshlig‘i Ken Aston uyga qaytishda svetoforda to‘xtab turganida Rattin bilan bo‘lgan epizodni o‘ylayotgandi. U ogohlantirish uchun sariq, maydondan chetlatish uchun qizil kartochka ko‘rsatishni taklif qiladi. FIFA bu g‘oyani qo‘llab-quvvatlaydi. Shu tariqa, futbolda kartochkalar paydo bo‘ladi.

Uyog‘iga nima bo‘lgan. Angliya finalgacha yetib boradi va GFRga qarshi hal qiluvchi bahsning qo‘shimcha vaqtida g‘alaba qozonib, jahon chempioniga aylanadi. Hyorst finalda het-trik qayd etadi. Bu Angliya uchun hozirgacha yirik turnirlardagi yagona chempionlik bo‘lib qolmoqda.

Oradan ikki yil o‘tib, 1968 yilgi Qit’alararo kubok uchun kurashda «Estudiantes» va «Manchester Yunayted» to‘qnash kelganida, o‘zaro nafrat darajasi yanada ortadi. Buenos-Ayresdagi o‘yinda argentinaliklar inglizlarga nisbatan shafqatsiz munosabatda bo‘lishadi: tunnelda futbolchilarga tupurishadi, maydonda esa «Yunayted» yetakchisi Bobbi Charlton uchun haqiqiy ov uyushtirishdi (oxir-oqibat uning boshini tikishga to‘g‘ri keladi).

Mezbonlar birinchi o‘yinda 1:0 hisobida g‘alaba qozonadi, javob o‘yinida esa qo‘rqitish va provokatsiyaga asoslangan taktikasini davom ettiradi. Bu Jorj Best va Xose Medina maydonda mushtlashib ketishi bilan yakunlanadi, hakam ularning ikkisini ham maydondan chetlatadi. O‘yin 1:1 hisobida tugaydi va «Estudiantes» sovringa ega chiqadi. Ammo argentinaliklar «Old Trafford»da bayram qila olishmaydi, mahalliy fanatlar ularga qarata tangalar, shisha idishlar tosh va pomidorlar otib, haydab yuborishadi.

JCh-1986: «Xudoning qo‘li» va asr goli

Asosiy faktlar. Argentina – Angliya 2:1. 1986 yil 22 iyun, Mexiko, Meksika. Jahon chempionati 1/4 finali

Hozirgacha eslanadigan mojaro. Bu o‘yin avvalboshdan prinsipial xarakterga ega edi: 1982 yil aprel oyida Argentinaning o‘sha vaqtdagi prezidenti, general Leopoldo Galteri Folklend orollariga bostirib kiradi. U Buyuk Britaniya hukumati olisdagi orollardan shunchaki voz kechishini kutgandi, ammo bosh vazir Margaret Tetcher britan armiyasiga orolni qaytarish vazifasini qo‘yadi. 74 kun davom etgan urush argentinaliklar to‘liq tor-mor qilinishi bilan yakunlanadi va 649 nafar argentinalik askarni hayotdan olib ketadi (britanlarda ham 255 harbiy xizmatchi halok bo‘lgan). Galteri esa iste’foga chiqqan, bir yil o‘tib qamoqqa olingan, Argentina zamonaviy tarixidagi prezidentlar ro‘yxatidan o‘chirilgan.

«Tottenhem»ning argentinalik legionerlari Osvaldo Ardiles va Rikardo Vilega ayniqsa qiyin bo‘ladi. Urushning dastlabki kunlarida Osvaldoning amakivachchasi, harbiy uchuvchi Xose Ardiles halok bo‘lgan, uning boshqaruvidagi Mirage qiruvchi samolyoti britanlar tomonidan urib tushirilgan. Ruhiy bosim va tribunalardagi hushtakbozliklar tufayli ikki legioner ham Angliya chempionatini tark etishga majbur bo‘ladi. Margaret Tetcher esa 1982 yil yozida Ispaniyada bo‘lib o‘tgan jahon chempionatidan Argentinani chetlatishni talab qiladi, ammo London bilan Gibraltar masalasida bahslashib turgan Madriddagilar bu tashabbusni rad etadi.

1986 yil yozida Meksikada bo‘lib o‘tgan jahon chempionatigaga Angliya va Argentina shunday kayfiyatda yetib boradi, ularning chorakfinaldagi to‘qnashuvi esa haqiqiy trillerga aylanadi. Britaniyadagi tabloidlarda «Argentina, biz sizni yana tubga cho‘ktiramiz!» qabilidagi sarlavhalar chiqariladi, Argentina mediasi esa inglizlarni «qaroqchilar» va «bosqinchilar» deb atab, Malvin orollarida (Folklendning argentinacha atalishi) halok bo‘lgan askarning fotosuratini o‘yin anonsi bilan birga e’lon qiladi. O‘yin boshlanishiga bir necha soat qolganida «Atsteka» stadioni atrofida ikki jamoa muxlislari o‘rtasida ommaviy mushtlashuv bo‘lib o‘tadi, Argentina milliy jamoasi futbolchilari ham maydonga kuchli motivatsiya bilan tushishadi. Diyego Maradona keyinro avtobiografiyasida shunga iqror bo‘ladi: «Intervyularda biz siyosatni sport bilan aralashtirmaslik kerak, deganmiz. Ammo bu yolg‘on edi. Biz faqat Malvinda halok bo‘lgan yigitlar haqida o‘ylardik».

Inglizlar o‘sha kuni Maradonaga qarshi qo‘pol o‘ynagandi, ammo uni to‘xtata olmagandi

Foto: Allsport/Getty Images

O‘yinning 51-daqiqasida o‘sha mashhur voqea ro‘y beradi: Diyego Maradona jarima maydonida baland sakrab, to‘pni qo‘li bilan darvozaga kiritib yuboradi. Ingliz futbolchilarining keskin e’tiroz bildirishiga qaramay, gol inobatga olinadi – hakam argentinalik mushti bilan emas, boshda zarba bergan deb topadi. O‘yindan keyin Maradona gol «qisman Maradonaning boshi, qisman Xudoning qo‘li» bilan urilganini aytadi.

Futboldagi ahamiyati. Hisob ochilganidan to‘rt daqiqa o‘tib Maradona ikkinchi golni ham uradi, bu safar u maydonning ikkinchi qismidan yurish amalga oshirib, yo‘l-yo‘lakay inglizlarning besh futbolchisini va darvozabonni ortda qoldirib, bo‘sh darvozani ishg‘ol etadi. Bu golni hozirgacha jahon futboli tarixidagi eng chiroyli gollardan biri deb hisoblashadi. 2002 yilda esa FIFA uni rasman «yuz yillikning eng yaxshi goli» deb e’lon qilgan.

O‘sha o‘yinda inglizlar darvozasini qo‘riqlagan Piter Shilton esa shu kunlarda ushbu gollarni esladi: «Agar o‘shanda VAR mavjud bo‘lganida, Maradonaning ikki goli ham hisobga olinmagan bo‘lardi: birinchisi – qo‘l bilan o‘ynalgani uchun, ikkinchisi – hujumning boshlanish fazasida Glenn Hoddlga ishlatilgan fol tufayli».

Uyog‘iga nima bo‘lgan: Yarimfinalda argentinaliklar Belgiyani mag‘lub etadi (Maradona yana ikki gol uradi), finalda esa GFR ustidan g‘alaba qozonib, ikki karra jahon chempionlariga aylanishadi. Maradonani turnirning eng yaxshi futbolchisi deb topishadi. Ko‘p yillar o‘tib u golni qo‘li bilan urganini aytadi va buni Folklend urushidagi mag‘lubiyat uchun «ramziy qasos» deb ataydi.

JCh-1998: Bekhemning qizil kartochkasi va Ouenning debyuti

Foto: Bob Thomas Spors Photography / Getty Images

Asosiy faktlar. Argentina – Angliya 2:2 (penaltilar seriyasida 4:3). 1998 yil 30 iyun, Sent-Eten, Fransiya. Jahon chempionati 1/8 finali

Hozirgacha eslanadigan mojaro. O‘yinning ikkinchi bo‘limida 23 yoshli Devid Bekhem, argentinaliklar safidagi Diyego Simeonening provokatsiyasiga uchadi. Raqib uni oyog‘iga zarba berib yiqitgan, keyin tepasiga borib nimadir degandi, ingliz futbolchisi esa yotgan holatida uning oyog‘iga zarba beradi va maydondan chetlatiladi. Angliya ozchilik holatida 2:2 hisobini saqlab qoladi, ammo penaltilar seriyasida yutqazadi, ingliz matbuoti esa mag‘lubiyatda aynan Bekhemni ayblaydi (masalan, Daily Mirror muqovasida shunday sarlavha chiqqandi: «O‘nta qahramon sher va bitta ahmoq bolakay»). Bu epizod futbolchining karerasini barbod qilishiga sal qoladi: Bekhem vatanida nafrat to‘lqiniga duch keladi, uning o‘zi va oilasi doimiy tahdidlar ostida yashaydi, APLdagi har o‘yinda muxlislar unga hushtakbozlik qilishadi.

Futboldagi ahamiyati. Aynan o‘sha o‘yin Maykl Ouenni dunyoga tanitgandi. Jahon chempionatidan oldin faqat APL ixlosmandlari uchun tanish bo‘lgan (u vaqtlarda Angliya Premer-ligasi hozirgidek mashhur emasdi) 18 yoshli futbolchi o‘sha kuni ilk bor milliy jamoa safida boshlang‘ich tarkibda tushgandi va Bekhemning uzatmasidan foydalanib, o‘sha jahon chempionatining eng chiroyli gollaridan biriga mualliflik qilgandi (hozirgacha Angliya milliy jamoasi tarixidagi eng chiroyli gol deb hisoblanadi).

Uyog‘iga nima bo‘lgan: Argentina keyingi bosqichda turnirni tark etadi. Bekhem esa muxlislar bosimidan chiqib keta oladi va katta yulduzga aylanadi. To‘rt yil o‘tib u Osiyodagi mundialga Angliya milliy jamoasini sardor sifatida boshlab keladi. Inglizlar guruh bosqichida Argentinaga qarshi o‘ynaydi va bu o‘yinda inglizlar 1:0 hisobida g‘alaba qozonadi, o‘yindagi yagona golni Bekhem penaltidan uradi. Bu o‘yin Argentina va Angliya milliy jamoalari o‘rtasida katta turnirlardagi so‘nggi o‘yin bo‘lib qolmoqda.

Keyingi davrda jamoalar faqat bir marta, 2005 yil Jyenevada o‘rtoqlik uchrashuvida maydonga tushgan. Bu o‘yinda inglizlar 3:2 hisobida g‘alaba qozongan, tribunalarda kichik to‘qnashuvlar bo‘lib o‘tgan, ammo maydonda jiddiy voqealar kuzatilmagan. Shunga qaramay, ushbu jamoalar shundan buyon o‘zaro o‘rtoqlik uchrashuvlari o‘tkazishdan qochib kelishadi.

Source link

Birinchi yarimfinal kutilmalarni oqladi.

JCh-2026 yarimfinali doirasidagi birinchi uchrashuvda Ispaniya  Fransiya ustidan ishonchli g‘alabaga erishdi (2:0). Luis de la Fuente shogirdlari birinchi bo‘limda penalti orqali hisobni ochishdi va raqibga deyarli hech qanday imkon berishmadi, tanaffusdan keyin esa hisobdagi ustunlikni mustahkamlashdi.

Maydon tashqarisida ham qiziqarli voqealar davom etmoqda: afsonaviy fransuz futbolchisi Zinedin Zidan milliy jamoa boshqaruvida Dide Deshamning o‘rnini egallash uchun asosiy nomzod sifatida ko‘rilmoqda, Braziliya prezidenti milliy jamoa futbolchilarini turnirdan keyin vatanga qaytmagani uchun tanqid qildi, Norvegiya milliy jamoasi forvardi Erling Holand esa Amerikada shoping qildi.

Jamoaviy g‘alaba

Fransiya – Ispaniya 0:2

Gollar: Oyyarsabal, 22 – penalti (0:1). Porro, 58 (0:2)

Fransiya: Menyan, Upamekano, Saliba (Lakrua, 30), Din (Ernandez, 72), Kunde, Tchuameni, Rabio (Kone, 46), Olise (Sherki, 72), Barkolya (Due, 57), Dembele, Mbappe

Ispaniya: Simon, Lyaport, Kubarsi, Kukurelya, Porro (Liorente, 84), Ruis (Merino, 78), Rodri, Olmo (Pedri, 78), Baena (Uilyams, 84), Yamal, Oyyarsabal (Torres, 74)

Ogohlantirishlar: Rabio, 9. Mbappe, 86 – Kukurelya, 31

Fransiya jahon chempionatlarida qatorasiga uchinchi bor finalga chiqish vazifasini uddalay olmadi. «Qizil furiya» turnirning asosiy favoritlaridan birini ilojsiz ahvolda qoldirdi va finalga chiqdi.

De la Fuente shogirdlari ilk daqiqalardanoq birinchi raqam ostida harakat qildi. Ispanlar ketma-ket hujumlar uyushtirmadi, ammo maydon markazida to‘pni ishonch bilan nazorat qilishdi va fransuz himoyasidagi zaif nuqtalarni qidirish bilan mashg‘ul bo‘lishdi. 20-daqiqada bu natija berdi: himoyachi Lyuka Din o‘z jamoasi jarima maydonida ehtiyotsizlik qildi va to‘p o‘rniga Lamin Yamalni tepib yubordi. O‘yin bosh hakami darhol 11 metrlik nuqtani ko‘rsatdi, Mikel Oyyarsabal esa penaltini ishonch bilan ijro etdi.

«Uchranglilar»ning muammolari shu bilan tugamadi. Ko‘p o‘tmay markaziy himoyachi Vilyam Saliba belida kuchli og‘riq his qilib, maydonni tark etishga majbur bo‘ldi. Ispanlar esa hisobni ochganidan keyin ham himoyalanish haqida o‘ylamadi va vaziyatlar yaratishda davom etib, ikkinchi bo‘limda o‘z maqsadiga yetishdi: Pedro Porro Dani Olmo bilan «devor» uslubida o‘ynab, jarima maydoniga kirib bordi va darvozabonni dog‘da qoldirdi.

Fransuzlar esa shu kuni turnirdagi eng yomon o‘yinini o‘tkazayotgandi: tezkor hujumchilarning hujum qilishga urinishlari samara bermadi, Kilian Mbappe muntazam ravishda ofsayd qopqoniga tushib qoldi, Deshamning futbolchi almashtirishlari ham yordam bermadi. Fransuzlar o‘yinning so‘nggi o‘n daqiqaligida shturm uyushtirishga harakat qildi va ilk bor (bu oraliqda jami uch marta) to‘p darvoza sohasiga to‘g‘ri bordi, ammo bu hujumlar hisobni hech bo‘lmaganda qisqartirish uchun ham yetarli bo‘lmadi.

Ispaniya ikki to‘p farqini saqlab qoldi va o‘z tarixida ikkinchi bor JCh finaliga yo‘l oldi, birinchi urinishda, 2010 yilda pireneyliklar sovrinni qo‘lga kiritishgandi.

Zinedin Zidan Deshamni almashtiradimi?

Dide Desham Fransiya milliy jamoasi boshqaruvini tark etishi o‘tgan yiliyoq ma’lum edi – uning o‘zi jurnalistlar qarshisida mundialdan keyin ketmoqchi ekanini e’lon qilgandi. «Uchranglilar» Ispaniyaga yutqazib, turnirni tark etganidan keyin taniqli insayder Fabritsio Romano uning o‘rnini kim egallashi haqidagi ma’lumotni tarqatdi.

«Fransiya milliy jamoasida Dide Desham boshqaruvi davri poyoniga yetmoqda. Uchinchi o‘rin uchun o‘yin uning milliy jamoadagi so‘nggi o‘yini bo‘lib qoladi. Ushbu uchrashuvdan keyin Desham jamoa bilan xayrlashadi, keyin esa Zinedin Zidanning boshqaruvi davri boshlanadi», – deya yozgan Romano ijtimoiy tarmoqda.

Desham Fransiya milliy jamoasini 14 yil mobaynida boshqarib, 186 o‘yin o‘tkazdi, shundan 122 tasida g‘alabaga erishdi. 2018 yilda u jamoa bilan jahon chempioni bo‘ldi, 2021 yilda UYeFA Millatlar ligasi g‘olibligini qo‘lga kiritdi, 2022 yilda Qatardagi JCh kumush medallariga ega chiqdi.

Zidan murabbiylik faoliyatida ikki bor «Real»ni boshqargan (2016-2018, 2019-2021) va Madrid klubi bilan uch marta Chempionlar ligasida zafar quchgan, shuningdek, ikki bor Ispaniya chempioniga aylangan. U futbolchiligida jahon chempioni (1998) va Yevropa chempioni (2000) bo‘lgan.

Holand Hollandni ignor qildi

Norvegiyalik forvard Erling Holand Hollivud yulduzlarini tan olmaydi. Britaniyalik aktyor, O‘rgimchak odam roli orqali tanilgan Tom Holland futbolchini Monakodagi «Formula-1» Gran-prisida ko‘rganidan keyin, unga yozib, kechki ovqatni birgalikda qilish taklifini bildirgani haqida aytib berdi. Ammo unga javob qaytarilmagan.

«Unga yozdim va kechki ovqatga taklif qildim. Undan javob sifatida loaqal bitta so‘z ham kelmadi, sababini aytmadi, «men bandman, futbol o‘ynashim kerak» demadi. U taklifni rad etgani ham yo‘q, shunchaki mening kimligimni bilmadi. O‘ylaymanki, bu muhim tajriba bo‘ldi: u menga aktyor sifatida kamtar bo‘lib qolishni o‘rgatdi», – deya xotiralari bilan bo‘lishgan Tom Jimmi Fellonning shousida.

Shu bilan birga, Holland undan xafa bo‘lmagan. U Holandni «aql bovar qilmas» futbolchi va «haqiqiy afsona» deb hisoblaydi, shuningdek, Norvegiya JCh chorakfinalida Angliyaga yutqazib (1:2), turnirni tark etganidan keyin u bilan kechki ovqatdan butkul umid uzganini aytib, hazil qilgan.

«Bu voqeadan keyin u men bilan uchrashishi dargumon», – deya qo‘shimcha qiladi aktyor.

Holand Texasdan sovg‘alar bilan qaytdi

Bir narsa aniq. Norvegiyalik hujumchining yulduz aktyorlar bilan birga ovqatlanishga vaqti yo‘q edi – u shoping bilan mashg‘ul bo‘lgan. TMZ ma’lumotiga ko‘ra, hujumchi Norvegiyaga qaytishdan oldin ayrim jamoadoshlari bilan Dallasdagi Yovvoyi g‘arb uslubidagi do‘konga borgan.

Manba ma’lumotiga ko‘ra, besh nafar futbolchi bu yerda 10 ming dollar sarflagan, barcha xaridlar uchun to‘lovni Holand amalga oshirgan.

Futbolchilar kovboylar shlyapalari, etiklar, vestern-ko‘ylaklar hamda va qayish to‘qalar (pryajka) olishgan. Hujumchining asosiy xaridi esa alkogol ichimlikka biriktirilgan yenot tulumi bo‘lgan (750 dollar).

Holand Norvegiyaga qo‘ngan samolyot trapidan tushayotganida aynan shu tulumni ko‘targan holda ko‘rinish berdi va bu surat ijtimoiy tarmoqlarda virusdek tarqaldi.

Braziliyalik futbolchilar vatanga qaytmadi, prezident norozi

Braziliya 2026 yilgi jahon chempionatida nimchorakfinalda Norvegiyaga yutqazdi (1:2) va 1990 yildan buyon ilk bor chorakfinalga chiqa olmadi. Ma’lum bo‘lishicha, jamoa turnirni erta tark etganidan keyin futbolchilarning ko‘pchiligi vataniga qaytib o‘tirmagan va o‘sha yerdan ta’tilga yo‘l olishgan.

Mamlakat prezidenti Luis Inasiu Lula da Silvaga AQShdan charter reys deyarli bo‘sh qaytgani haqida axborot berishgan. Shundan keyin siyosatchi futbolchilarni tanqid qildi.

«Delegatsiya katta tarkibda uchib ketgandi, juda ozchilik bo‘lib qaytib keldi. Milliy jamoa samolyotida deyarli hech kim yo‘q edi. Qanday sharmandalik! Faqat birgina futbolchi qaytgan. Agar ular g‘alaba qozonganida, bu yerda hamma raqsga tushgan bo‘lardi», – deya mamlakat rahbarining so‘zlarini keltiradi UOL nashri.

Nashr ma’lumotiga ko‘ra, delegatsiya bilan vatanga faqat «Flamengo» himoyachisi Danilo qaytgan, o‘z vaqtida «Portu», «Real», «Manchester Siti» va «Yuventus» kabi klublarda ham to‘p surgan ushbu futbolchi turnirdagi barcha o‘yinlarda qatnashgandi.

Jurnalistlar futbolchilar ta’tilni qanday o‘tkazayotgani to‘g‘risida ham ma’lumotlarni aniqlashdi. Masalan, Neymar turnirdan keyin darhol o‘zining ikkinchi sevimli o‘yini bo‘lgan poker o‘ynashga kirishib ketgan: 34 yoshli futbolchini Las-Vegasdagi turnirda uchratishgan. Bu turnirda qatnashish uchun 10 ming dollarlik badal to‘lash kerak bo‘ladi.

Vinisius Junior ham ta’tilni maroqli o‘tkazmoqda. Uning sevgilisi Virjiniya Fonseka instagramdagi sahifasida Italiyada birga dam olishayotgani aks etgan suratlarni joylashtirgan.

Muvaffaqiyatsiz natijaga qaramay, Braziliya futbola konfederatsiyasi va bosh murabbiy Karlo Anchelotti amaldagi shartnoma bo‘yicha hamkorlikni davom ettirishga kelishishgan. Braziliyani keyingi jahon chempionati uchun ham italiyalik mutaxassis tayyorlaydi.

Source link