Soliq qo‘mitasi ma’lumotiga ko‘ra, o‘zbekistonlik foydalanuvchilar sun’iy intellekt modellari orasida ChatGPTdan ko‘ra Claudega ko‘p pul sarflashmoqda.

2026-yilning dastlabki olti oyida yurtdoshlarimiz Claude (Antrophic)ga 53 mlrd so‘m, ChatGPT (Open AI)ga esa salkam 47 mlrd so‘m to‘lov qilishgan.

Texnologiya kompaniyalari orasida O‘zbekistondan eng ko‘p daromad olayotganlari — Apple, Google va Meta (infografikaga qarang).

O‘tgan yarim yillikda Netflix va Amazon soliq to‘lovchilar o‘ntaligiga kirmadi.

Onlayn videoo‘yinlar servislari QQS to‘lovlari bo‘yicha yaxshigina ulush qo‘shishni boshlagani e’tiborli holatlardan biri.

Umuman olganda, xorijiy kompaniyalar 6 oyda 1,2 trln so‘mlik onlayn xizmat ko‘rsatib, qariyb 144 mlrd so‘mlik QQS to‘lagan. Ma’lumot uchun: 2025-yilda 1 trln 482 mlrd so‘mlik xizmat ko‘rsatilgan, to‘langan QQS miqdori 181,3 mlrd so‘m bo‘lgandi.

97 ta xorijiy kompaniya O‘zbekistonda QQS to‘lovchilar ro‘yxatidan joy olgan.

Source link

Milliy statistika qo‘mitasi ma’lumotlariga ko‘ra, 2026-yilning yanvar–iyun oylarida O‘zbekistonda ko‘rsatilgan bozor xizmatlari hajmi 664,9 trln so‘mni tashkil etdi. Bu ko‘rsatkich o‘tgan yilning mos davriga nisbatan 16,9 foizga oshgan.

Hisobot davrida xizmatlar tarkibida eng katta ulush savdo xizmatlari hissasiga to‘g‘ri keldi. Ushbu yo‘nalishda ko‘rsatilgan xizmatlar hajmi 170 trln so‘mga yetdi.

Shuningdek, yashash va ovqatlanish xizmatlari 115,2 trln so‘m, moliyaviy xizmatlar 104,2 trln so‘m, transport xizmatlari esa 103,9 trln so‘mni tashkil qildi.

Hisobotga ko‘ra, aloqa va axborotlashtirish xizmatlari hajmi 51,9 trln so‘mga, ta’lim sohasidagi xizmatlar 23,8 trln so‘mga yetgan.

Shuningdek, ko‘chmas mulk bilan bog‘liq xizmatlar 16,2 trln so‘m, shaxsiy xizmatlar 11,9 trln so‘m, sog‘liqni saqlash xizmatlari esa 11,3 trln so‘mni tashkil etgan.

Bundan tashqari, me’morchilik, muhandislik izlanishlari, texnik sinovlar va tahlil xizmatlari 8,9 trln so‘m, kompyuterlar va maishiy tovarlarni ta’mirlash xizmatlari 7,8 trln so‘m, ijara xizmatlari 7,6 trln so‘mni tashkil etgan.

Source link

2026-yil yanvar–iyun oylarida O‘zbekistonning jami eksporti 15,86 mlrd AQSh dollarini tashkil etdi. Bu o‘tgan yilning mos davriga nisbatan 8,8 foizga kamaygan.

Ma’lumotlarga ko‘ra, nonometar oltin eksporti 2025-yilning birinchi yarmidagi 6,49 mlrd dollardan 2026-yilning shu davrida 1,50 mlrd dollarga tushgan. Ya’ni oltin eksporti hajmi qariyb 5 mlrd AQSh dollariga qisqargan.

Shu bilan birga, oltin hisobga olinmagan holda tovarlar eksporti ijobiy o‘sishni namoyon qildi. Uning hajmi o‘tgan yilning mos davriga nisbatan 28,7 foizga oshib, 8,2 mlrd AQSh dollariga yetdi.

Yarim yillik yakunlariga ko‘ra, xizmatlar eksporti 6,20 mlrd dollarga yetib, umumiy eksportning 39,1 foizini tashkil qildi. Bu o‘tgan yilgi 26,3 foizlik ulushdan ancha yuqori ko‘rsatkichdir.

Sanoat tovarlari eksporti 2,41 mlrd dollarga yetib, umumiy eksportdagi ulushi 15,2 foizga chiqdi. Kimyoviy mahsulotlar eksporti 1,28 mlrd dollar, turli tayyor buyumlar eksporti esa 1,36 mlrd dollarni tashkil qildi.

Oziq-ovqat mahsulotlari va tirik hayvonlar eksporti 1,32 mlrd dollarga yetdi. Mashina va transport uskunalari eksporti ham o‘sib, 632,9 million dollarni tashkil etdi.

Source link

«Kelajak o‘yinlari» xalqaro musobaqasining ochilish kunida «Arda Xiva» turistik majmuasi hamda FlyArystan aviakompaniyasi ikki mamlakat o‘rtasidagi hamkorlikni yanada mustahkamlash yo‘lida muhim qadam tashladi. Shu munosabat bilan Olmaota shahrida O‘zbekiston va Qozog‘iston turoperatorlari ishtirokida yangi xalqaro Olmaota – Urganch – Olmaota aviaqatnovining ochilishiga bag‘ishlangan uchrashuv bo‘lib o‘tdi.

Uchrashuv davomida «Arda Xiva» majmuasi vakillari ishtirokchilarni Xorazm viloyatining boy turistik salohiyati hamda FlyArystan yo‘lovchilari uchun ishlab chiqilgan maxsus turistik paketlar bilan tanishtirdi. FlyArystan aviakompaniyasi esa yangi aviaqatnovning imkoniyatlari haqida ma’lumot berdi. Turistik paketlar mehmonxonada joylashish va ekskursiya dasturlarini o‘z ichiga oladi.

Urganch shahri qadimiy Xiva shahridan atigi 30 kilometr masofada joylashgan bo‘lib, uning tarixiy markazi — Ichan-Qal’a YuNESKOning Butunjahon merosi ro‘yxatiga kiritilgan.

Tomonlar, shuningdek, Qozog‘istonning yetakchi turoperatorlari va blogerlari uchun 7–10 avgust kunlari tanishuv infoturini tashkil etishga kelishib oldi. Ushbu infotur Xorazmda o‘tkaziladigan «Oltin qovun» festivali doirasida tashkil etiladi.

Infotur dasturidan Xivaning tarixiy markazi — Ichan-Qal’aga ekskursiya, «Arda Xiva» majmuasi infratuzilmasi bilan tanishish, festival tadbirlarida ishtirok etish hamda mintaqa turizm sohasi vakillari bilan B2B uchrashuvlari o‘rin olgan. Ishtirokchilar Xorazmning turistik imkoniyatlarini shaxsan baholash va qozog‘istonlik sayyohlar uchun yangi jozibador turistik takliflarni shakllantirish imkoniga ega bo‘ladi.

Eslatib o‘tamiz, joriy oy boshida «Arda Xiva» va FlyArystan o‘rtasida hamkorlik to‘g‘risida memorandum imzolangan edi. Olmaotada bo‘lib o‘tgan mazkur uchrashuv ushbu memorandumni amalga oshirish yo‘lidagi navbatdagi muhim qadam bo‘ldi.

Olmaota – Urganch – Olmaota yo‘nalishi bo‘yicha muntazam to‘g‘ridan-to‘g‘ri aviaqatnovlar 3 sentyabrdan boshlanadi va haftasiga ikki marta — payshanba hamda yakshanba kunlari amalga oshiriladi. Aviachiptalar FlyArystan mobil ilovasi, aviakompaniyaning rasmiy sayti va boshqa sotuv kanallari orqali xarid qilish uchun allaqachon mavjud.

«Arda Xiva» majmuasi haqida

«Arda Xiva» turistik majmuasi O‘zbekiston Respublikasi Prezidenti tashabbusi bilan barpo etilgan. Ko‘p tarmoqli turistik klaster G‘ovuko‘l sohilidagi 25 gektar maydonda joylashgan bo‘lib, O‘zbekiston Respublikasi Turizm qo‘mitasi va Xorazm viloyati hokimligi ko‘magida madaniy-tarixiy, sport hamda ko‘ngilochar tadbirlarni keng ko‘lamda tashkil etib kelmoqda.

Majmua infratuzilmasi quyidagilarni o‘z ichiga oladi:

– 1000 o‘rinli 6 ta mehmonxona;
– ochiq akvapark va yopiq suzish havzasi;
– 3000 o‘rinli amfiteatr;
– 11 ta hunarmandchilik uyi, «Qadimiy Urganch» muzeyi, rassomlik galereyasi va zargarlik markazi;
– umumiy uzunligi 2 kilometr bo‘lgan gondolalar uchun suv kanallari;
– 10 dan ortiq kafe va restoranlar, sharqona bozor;
– mintaqadagi eng yirik bolalar markazi, sport inshootlari hamda SPA majmuasi.

Majmuani boshqarish O‘zbekistonning HotelPro va Rossiyaning Kronwell kompaniyalari xalqaro konsorsiumi tomonidan amalga oshiriladi.

FlyArystan haqida:

FlyArystan — Qozog‘istonning loukost aviakompaniyasi bo‘lib, Air Astana kompaniyalar guruhining 100% sho‘’ba korxonasi hisoblanadi. U o‘z faoliyatini 2019 yil may oyida boshlagan. Aviakompaniya keng yo‘nalishlar tarmog‘i bo‘yicha parvozlarni amalga oshiradi va zamonaviy Airbus A320 samolyotlari parkiga ega.

Uning asosiy bazalari Olmaota, Ostona va Aqtau shaharlarida joylashgan. FlyArystan marshrutlar tarmog‘i ichki va xalqaro muntazam reyslar, shuningdek charter yo‘nalishlarini ham qamrab oladi.

Source link

O‘zbekistonning Quvaytdagi elchixonasi milliy mahsulotlarni Quvayt va Suriya bozorlariga barqaror hamda tezkor yetkazib berish maqsadida yangi transport-logistika yo‘laklarini shakllantirish ustida ish olib bormoqda. Bu haqda «Dunyo» axborot agentligi xabar berdi.

Ma’lum qilinishicha, Samarqand viloyatida ishlab chiqarilgan gilam mahsulotlari Quvaytning «Montreal House Wholesale Co» kompaniyasi bilan tuzilgan shartnoma doirasida yangi xalqaro logistika yo‘nalishi orqali muvaffaqiyatli yetkazib berilgan.

Qayd etilishicha, eksport jarayonida avval foydalanib kelingan Eronning Bandar Abbos porti ishlatilmagan. Logistika operatori bo‘lgan Turkiyaning «Gulf Cargo» kompaniyasi yangi yo‘nalishni xavfsiz va istiqbolli deb baholab, kelgusida yuklarni 15–20 kun ichida yetkazib berish mumkinligini ma’lum qilgan.

Shuningdek, O‘zbekistonning Quvaytdagi elchixonasi Iroq orqali Quvaytga mahsulot yetkazib berish imkoniyatlarini ham o‘rganmoqda. Shu maqsadda Iroq Savdo vazirligi, Savdo-sanoat palatalari federatsiyasi hamda Kurdiston mintaqasi Savdo-sanoat palatalari federatsiyasi bilan muzokaralar o‘tkazilgan.

Bundan tashqari, Fors ko‘rfazidagi geosiyosiy vaziyatdan kelib chiqib, Eron hududi orqali muqobil logistika yo‘nalishlaridan foydalanish imkoniyatlari ham tahlil qilinmoqda.

Suriya yo‘nalishida ham ilk natijalar qayd etilgan. Joriy yil may oyida Halab shahrida O‘zbekiston savdo uyi va distribyutorlik markazi ish boshlagach, mahalliy ishlab chiqaruvchilar bilan yangi eksport shartnomalari imzolangan.

Natijada O‘zbekistondan Suriyaga ilk bor o‘simlik yog‘i, kir yuvish vositalari hamda maishiy elektr jihozlarining dastlabki partiyalari eksport qilindi. Importyorlar ma’lumotiga ko‘ra, mahsulotlarni Turkiya orqali Suriyaga yetkazib berish muddati 10–15 kunni tashkil etmoqda.

Mutasaddilar ta’kidlashicha, yangi transport-logistika yo‘laklari milliy mahsulotlarni Yaqin Sharq mamlakatlari bozorlariga uzluksiz va raqobatbardosh sharoitlarda yetkazib berishga xizmat qiladi.

Source link