Sport
Amorimning kutilmagan iste’fosi. «MYu» rahbariyatining qarori qanchalik to‘g‘ri?
Uning iste’fosi «Lids» bilan o‘yingacha hal qilingan bo‘lishi mumkin.
«Qaytaraman, men menejer bo‘lishni xohlayman, bosh murabbiy emas. Tuxel, Konte yoki Mourino emas ismim, lekin “Manchester Yunayted” menejeriman va hech qayerga ketmoqchi emasman. Shartnomaga ko‘ra yana bir yarim yil shu ishni qilaman, keyin hamma o‘z yo‘liga ketaveradi. Sport direktori ham, skauting bo‘limi ham, men ham o‘z ishimizni qilcak kifoya. Agar Gari Nevillning tanqidlari kimnidir xavotirga solsa, klubni almashtirishi kerak» – bu Ruben Amorimning so‘nggi matbuot anjumanidan qisqacha.
«Bugungi davrda futbol realligi shunda – sen «Manchester Yunayted»dek klub bilan mavsumni 15-o‘rinda yakunlashing, «Grimbsi Taun» degan jamoadan mag‘lub bo‘lishing, qator antirekordlarni yangilashing mumkin, senga hech narsa bo‘lmaydi, aksincha, Retklif chiqib yana uch yil ishlashing mumkinligini aytadi. Ammo klub rahbariyatiga qarshi gapirib qo‘ysang, tamom, uch kun ham berishmaydi, jamoaning holati, qandaydir tahliliy ko‘rsatkichlar, aslida APL va jahon chempioni bo‘lgan klublar bilan bir qatorda, kuchli to‘rtlikdan atigi uch ochkolik farqda ketayotganing ham qiziqtirmaydi. Jyeymi Karrager to‘g‘ri aytadi – «Ruben Amorim ayni paytda klubga o‘z shartlarini qo‘ya oladigan darajada kuchli pozitsiyada emasdi».
«Lids»ga qarshi o‘yindagi durangdan so‘ng Ruben Amorim matbuot anjumanida «portladi». Anchadan beri davom etib kelayotgan tanqidlarga dosh bera olmay, tanqidlar o‘qini boshqa tomonga, klub rahbariyati tomon yo‘naltirdi. Tabiiyki, bundan ham badtar shartlarda iste’foga chiqarilgan, ammo g‘ing deya olmaygan avvalgi murabbiylar oldida Ruben bunday yo‘l bilan nimagadir erishishiga ishonish qiyin edi.
Albatta, Rubenning iste’fosi kechagi yoki avvalgi kungi duranglar bilangina bog‘liq emas. Bu iste’foga qadamlar ancha ilgari, hatto Amorim hali klubga kelmasidan ham oldin boshlangan. Keling, voqealar xronlogiyasini ko‘rib chiqamiz.
Voqealar rivoji
2024 yil, iyun. Avvalgi rahbariyat tomonidan tayinlangan Erik ten Hag mavsumdagi 8-o‘rindan so‘ng, iste’fo yoqasida turganida, may oyida Angliya kubogi finalida g‘alaba qozondi. INEOS («Manchester Yunayted»ning yangi rahbariyati) tashqi bosim ostida niderlandiyalik mutaxassisga yana bir imkoniyat berishga qaror qiladi. Yozgi transfer oynasi aynan Erik ten Hag uchun tashkil qilinadi – Nussayr Mazraviy, Matteys de Liht, Joshua Zirkze va Manuel Ugarte kabi futbolchilar sotib olinadi.
2024 yil, noyabr. Qator muvaffaqiyatsizliklardan so‘ng jamoa turnir jadvalining ikkinchi yarmiga tushib ketadi va Erik ten Hag iste’foga chiqariladi. Ser Jim Retkliff (INEOS) «MYu»dagi eng ishongan shaxs – klub bosh direktori Omar Berrada «Sporting»da muvaffaqiyatli ishlayotgan Ruben Amorim variantini ilgari suradi va u bilan kelishadi. Ma’lum bo‘lishicha, klubning o‘sha paytdagi sport direktori, hali ish boshlaganiga ko‘p bo‘lmagan Den Eshfort bu nomzodga qarshi bo‘lgan va aynan shu tufayli ishdan bo‘shatilgan. Asosiy ziddiyat Ruben Amorimning doim 3-4-3 sxemasida o‘ynashi va bu «MYu» tarkibidagi futbolchilarga mos kelmasligi xavfi bilan bog‘liq edi.
Ruben Amorim uch yillik shartnomaga imzo chekadi. Shu bilan birga, Angliyaga kelishi bilanoq jamoa uning sxemasida harakat qilishini, barchasi shu yo‘nalishda bo‘lishini aytadi. Klub ham bu haqida xabardor bo‘lgani va Amorim to‘liq qo‘llovga ega bo‘lishiga kafolat berilgani tayin. Shu bilan birga, (bu muhim), Ruben Amorim rasman «bosh murabbiy» deb e’lon qilinadi, «menejer» deb emas.
Farq shundaki, Angliyada «menejer» jarayon yuzasidan to‘liq nazorat o‘rnatadi va transferlarda hal qiluvchi ovoz egasi bo‘ladi. Erik ten Hag aynan «menejer» sifatida qayd etilgan va uning davridagi bir qator muvaffaqiyatsiz transferlardan so‘ng klub strukturasi o‘zgarib, barchasi bir necha shaxslar tomonidan olib boriladigan bo‘lgan.
2025 yil, yoz. Jamoa tarkibi Ruben Amorim tizimi uchun ham, talab qilinadigan mehnat etikasi uchun ham umuman mos emasligi oydinlashadi. Aytish mumkinki, klub ma’lum vaqt to‘liq Ruben Amorim tomonida turdi va Reshford, Sancho va Garnacho kabi futbolchilar tarkibdan chetlashtirilishida ham murabbiyni quvvatladi. Yozda hujum chizig‘idagi uch nafar futbolchi uchun jami 200 million funtdan ortiqroq pul sarflandi. Ammo may oyidan beri Ruben ko‘p bor talab qilgan intensiv markaziy yarimhimoyachi varianti amalga oshmadi. Transferlar oynasining so‘nggi kunlarida «Brayton» yarimhimoyachisi Karlos Baleba uchun harakat qilingan bo‘lsa-da, urinishlar besamar yakunlandi. Insayder Ben Jyeykobsning aytishicha, Ruben Amorim oldingi chiziqdagi uch futbolchini tanlarkan, markaziy yarimhimoyachi olinmasligiga ham rozi bo‘lgan.
Xullas, o‘tgan ikki tranfer oynasida jami 270 million funtga yaqin pul sarflanib, Patrik Dorgu (qishki transferlar oynasida), Benjamin Sheshko, Brayan Mbeumo, Mateus Kunya va darvozabon Senne Lammens olib kelindi. Murabbiyga to‘g‘ri kelmagan Markus Reshford, Alexandro Garnacho, Rasmus Hoylund, Andre Onana kabi futbolchilar jamoani tark etishdi.
2025 yil, oktyabr. Jamoa mavsumni juda yomon boshladi. Dastlabki 6 turda 2 g‘alaba, bir durang va uch mag‘lubiyat qayd etildi. Eng yomoni, jamoa Liga kubogida quyi liga vakili «Grimsbi Taun»dan penaltilar seriyasida mag‘lubiyatga uchradi. Bosim oshib, murabbiyning iste’fosi uchun kun sanalayotgan bir paytda Jim Retkliff chiqib, Rubenga to‘liq ishonishini, u yana uch yil «MYu» bosh murabbiyi sifatida qolishini ta’kidladi.
Bu bayonotdan so‘ng jamoadagi mavhumliklar barham topdi va bu jamoa o‘yinida ham namyoon bo‘ldi. «MYu» «Sanderlend», «Liverpul» va «Brayton» kabi jamoalarni mag‘lub etib, safarda «Nottinghem» va «Tottenhem» bilan durang o‘ynadi. Go‘yoki hammasi o‘z o‘rniga tushgan, progress aniq ko‘rilayotgan, jamoa yo‘lga tushib olgandek edi.
Ammo keyingi o‘yinlarda o‘yinda yana pasayish boshlandi va jamoa bir yerda depsinib turgandek tasavvur uyg‘otdi. «Brayton»ga qarshi bahsdan keyingi 11 o‘yinda atigi 3 g‘alabaga erishildi. Ayniqsa, turnir jadvalining quyi qismida borayotgan «Everton», «Vest Hem», «Bormunt» va «Vulverhepton»ga qarshi «Old Trafford»dagi duranglarni qabul qilish juda qiyin edi. Tasavvur qiling, mana shu o‘yinlarda g‘alaba qozonilganida, ayni paytda jamoa ishonch bilan kuchli to‘rtlikda borayotgan bo‘lardi. Bu yo‘qotishlarga aniq sababni keltirish ham qiyin, go‘yoki, jamoa yomon o‘ynamayotgandek, tarkib ham yomon emas, lekin mazkur o‘yinlardagi muammolarni hatto murabbiy bilmaganki, keyingi o‘yinlarda xatolar tuzatilmadi, ayni shu muammolar davom etaverdi.
2025 yil, dekabr. «Bornmut» futbolchisi Antuan Semenyoni 65 million funtga qo‘lga kiritish varianti paydo bo‘lganida «MYu» ham xaridorga aylangani ijobiy voqea edi – demak, kerak bo‘lganda yanvar oyida transferlar uchun pul bor. Ruben Amorim ham ko‘p matbuot anjumanlarida yanvardan foydalanish mumkinligiga ishora qila boshladi. Zero, aslida yaxshi harakat qilinsa, yanvar ham kuchayish uchun yaxshi imkoniyat – o‘tgan mavsumda inqirozga tushgan «Manchester Siti» to‘rt nafar futbolchi uchun 250 million yevro pul sarflagandi. «MYu»ning o‘zi o‘z vaqtida Bruno Fernandeshni aynan yanvar oyida sotib olganini va bu jamoa mavsumni kuchli to‘rtlikda yakunlashiga katta hissa qo‘shganini eslash mumkin.
Ammo Semenyo «Manchester Siti»ni tanlagach, klub asosiy transferlarni yozga qoldirdi va yanvarda faol bo‘lmaslikni tanladi. Birinchi sabab, asosiy nishonlar bo‘lmish Karlos Baleba, Elliot Anderson kabi futbolchilarni qo‘lga kiritish yozda osonroq bo‘lishi. Ikkinchi sabab, ayni paytda ishonchsiz ko‘rinayotgan jamoaga, aniqrog‘i, murabbiyga qo‘shimcha investitsiya qilmaslik va mavsum qanday davom etishiga qarab xulosa qilish.
Fernandesh, Maunt, Maynu, de Liht, Maguayr kabi futbolchilarning jarohati, yana uch futbolchining (Mbeumo, Amad, Mazraviy) Afrika kubogiga ketishi munosabati bilan deyarli asosiy tarkib futbolchilarisiz qolgan Ruben Amorim uchun esa ko‘proq ikkinchi sabab ishonchlidek ko‘rindi va klub uni deyarli himoya qilmayotgandek tuyula boshladi. So‘nggi turlardagi qoniqarsiz natijalar, matbuotdagi tanqidlar klub rahbariyatiga ta’sir qilayotganini taxmin qilgan Ruben Amorim omma oldida, matbuot anjumanida maqola boshida keltirilgan so‘zlarni aytdi va rasman klub oldiga ultimatum qo‘ydi – yo meni to‘liq quvvatlaysiz yoki iste’foga chiqaring. Quvvatlash deganda, aynan yuqoridagi «menejer» va «bosh murabbiy» atrofidagi mulohazalar tushuniladi, ya’ni Ruben Amorim klub doirasida kengroq hokimlikni o‘z qo‘liga olmoqchi, kimni va qachon sotib olinishiga ko‘proq ta’sir qilmoqchi edi.
Albatta, bunday talablar ichkarida avvalroq kuzatilganiga shubha yo‘q, murabbiyning klub sport direktori Jyeyson Uilkoks bilan ziddiyati haqidagi xabarlar bekorga chiqmagandi. Ammo kurashning ochiq maydonga ko‘chishi – klub rahbariyatida boshqa yo‘l qoldirmadi va ushbu matbuot anjumanidan bir kun o‘tib, portugaliyalik mutaxassis iste’foga chiqarildi.
The Telegraph nashri yozishicha, Ruben Amorimning iste’fosi aslida «Lids»ga qarshi o‘yinidan oldin, ya’ni olovli matbuot anjumanidan oldinroq ham ko‘rib chiqilgandi. Manbaning aytishicha, Uilkoks Amorim bilan jarayonni ijobiy ruhda muhokama qilishga uringan, ammo gap 3-4-3 sxemasi haqida borganda, portugaliyalik murabbiy qattiq ziddiyatga borib, o‘zini tuta olmagan.
Ruben Amorim qanday ishladi?
Ruben Amorim o‘z uslubiga ega bo‘lgan, o‘ziga yarasha xarizmaga ega iqtidorli murabbiy. Ammo aytish mumkinki, Manchesterdagi bir yillik faoliyati davomida asosan umid berdi. Yetarlicha vaqt va ba’zi transferlardan keyin ham o‘yindagi ba’zi muammolar hal qilinmadi.
2025 yil yanvarida «Manchester Yunayted» «Enfild»da peshqadam «Liverpul» bilan durang (2:2) o‘ynagan, o‘sha o‘yin nihoyat Amorim tizimi ishlashni boshlaganidan darak bo‘lgandi. Lekin oradan bir yil o‘tdi hamki, jamoa hali ham o‘sha nuqtada turgandek taassurot uyg‘otmoqda. Ba’zi alohida o‘yinlarda jamoa juda yaxshi o‘yin ko‘rsatsa-da, bu ishlanmalar saqlangan holda bir necha o‘yinda muvaffaqiyat qozonish, natijalarni barqarorlashtirish imkoni bo‘lmadi. «Manchester Yunayted» Amorim qo‘l ostida faqat bir marta ketma-ket uch g‘alabaga erishgani, hali biror marta qatorasiga ikki o‘yinni gol o‘tkazmay yakunlashni uddalay olmagani mana shu beqarorlikni isbotlaydi.
Ruben Amorim tarkib to‘liq shakllanmagani, yana bir qator transferlar qilish lozimligini har qancha aytishi mumkin, ammo ayni paytdagi mavjud tarkib bilan «Vulverhempton», «Vest Hem» va «Everton» kabi jamoalar «Old Trafford»da mag‘lub etilishi shart edi. Yevrokuboklarsiz, haftada bir o‘yin rejimida aslida Ruben Amorim uchun yetarlicha tarkib va ijrochilar bor ekanini tan olish kerak.
Har qanday dogmatik, o‘z uslubiga ega bo‘lgan murabbiylar ham o‘z qo‘lida mavjud tarkib bilan, har bir futbolchining eng yaxshi xususiyatlari o‘rtaga chiqadigan, kamchiliklari yopiladigan tizim yaratishga urinishi kerak. «Manchester Yunayted»da esa aksincha, futbolchilarning ustun jihatlari namoyon bo‘lish o‘rniga, doim kamchiliklari yuzaga chiqa boshladi. Tabiiyki, o‘zi uchun noqulay shartlarda futbolchi baxtsiz bo‘ladi, bor imkoniyatini ishga solish, vaziyatlardan foydalanishda sovuqqonlik yo‘qoladi. Ruben Amorim qog‘ozda juda yaxshi, yakunda ishlashi mumkin bo‘lgan tizimga ega bo‘lishi mumkin, lekin o‘tgan bir yil davomida futbolchilar o‘yindan zavq olmagani, o‘zini berilgan vazifalar uchun mos emas deb hisoblamagani ham fakt.
Iste’fo o‘rinli edimi?
Amorim turmush o‘rtog‘i bilan klub bazasini tark etmoqda. Shartnoma bir tomonlama bekor qilingani uchun unga 9 mln funt miqdorida tovon puli to‘lanadi
Odatda bosh murabbiyning iste’fosi uchun sabablar turlicha bo‘ladi. Birinchi variant, jamoa natijalari mutlaqo yomonlashib, murabbiy boshqaruvni butunlay yo‘qotib qo‘yishi. O‘tgan mavsumning har qanday davrida, ushbu mavsum boshida ham ushbu sabab bilan iste’fo ro‘y berishi mumkin bo‘lgan paytlar bo‘ldi, ammo klub hech birida bunday qarorga kelmagandi. Hozirda jamoa juda ko‘p yo‘qotishlar va muammolar bilan ham kuchli to‘rtlikdan atigi 3 ochko ortda bormoqda va Chempionlar Ligasi yo‘llanmasi uchun kurashishda davom etyapti. Mavsum boshida klub asosiy maqsad – kuchli oltilikka kirish va kamida Yevropa Ligasiga yo‘llanma olish ekanini ma’lum qilganidan kelib chiqilsa, ayni paytda bu grafik buzilgani yo‘q.
Ikkinchi sabab, aksariyat futbolchilar bilan kelishmovchiliklar. Har qanday klub baribir futbolchilar uchun ko‘proq pul to‘laydi, ular asosiy aktiv hisoblanadi. Shunday ekan, ba’zida yetakchi futbolchilar bilan ziddiyatlarda bosh murabbiydan voz kechiladi. Ruben Amorimning tarkibdagi ba’zi futbolchilar bilan ziddiyati bo‘lsa-da, klub doim murabbiyning yonida bo‘lgan va bugungi tarkib to‘lig‘icha Amorimga qarshi emasligi shubhasiz.
Uchinchi sabab esa albatta, rahbariyat bilan ziddiyatlar. Avvalroq «Nottinghem Forest»da, yaqinda «Chelsi»da bo‘lganidek, bosh murabbiyning klub iyerarxiyasi bilan ziddiyati aksariyat holatlarda kechirilmaydi. Shu bilan birga, biz «Manchester Siti» Pep Gvardiolani qaysidir so‘zi uchun bo‘shatib yuboradigan vaziyatda emasmiz. Hatto o‘tgan mavsumdagi ikki sovrindan keyin «Chelsi» Mareskani bo‘shatib yuborgani ko‘proq tushunarsiz edi. Ya’ni «Manchester Yunayted» Ruben Amorimni bo‘shatib yuborishida asosli sabablar ham, mantiq ham ko‘proq topiladi.
Eng yomoni iste’fo mana shunday asosli sabablar ortidan emas, matbuot anjumanidagi fikrlar sababli bo‘layotganidir. Bu vaziyatda tabiiyki, qandaydir tahliliy ko‘rsatkichlar, asosli xulosalar emas, Retkliffning jahli chiqqani ko‘proq ahamiyat kasb etmoqda. Mavjud muammo hal qilinishi o‘rniga kimdir jazolandi, xolos.
Jamoani mavsum oxirigacha Darren Fletcher boshqarishi, nomzodlar esa yozgacha ko‘rib chiqilishi aytilmoqda. Nimanidir eslatmayaptimi? Bundan yetti yil oldin boshqa bir portugaliyalik mutaxassis ishdan bo‘shatilgan, o‘rniga esa klub sobiq afsonasi vaqtincha kelib, shu bilan uch yil qolib ketgandi. Fletcher agar mavsumning qolgan yarmida yaxshi ishlasa, unda ham Sulshernikidaqa imkoniyat bo‘larmikin?
Qahramon Aslanov
O‘zbekiston milliy terma jamoasi 22-martdan Toshkentda o‘quv-mashg‘ulot yig‘inlarini boshlaydi.
Fabio Kannavaro FIFA Series uchun jalb etilgan futbolchilar ro‘yxatini e’lon qildi.
Kengaytirilgan ro‘yxatdan o‘rin olgan futbolchilarimiz — Jaloliddin Masharipov, Husniddin Aliqulov, Abbosbek Fayzullayev, Dilshod Komilov, Ibrohimhalil Yo‘ldoshev, Abdulla Abdullayev, Alibek Davronov va Husayn Norchayev jarohati tufayli yig‘inni o‘tkazib yuborishi ma’lum bo‘ldi.
Eslatib o‘tamiz, milliy jamoa FIFA Series doirasida 27 mart kuni Gabon, 30 mart kuni esa Venesuyealaga qarshi maydonga tushadi. O‘yinlar «Bunyodkor» stadionida soat 19:00 da start oladi.
Sport
FIFA Nigeriya e’tirozini rad etdi – Kongo DR O‘zbekiston bilan bir guruhdan joy olish uchun kurashadi
Afrika futbolida katta mojaro: JCh-2026 yo‘llanmalaridan biri uchun kurash maydondan tashqarida kechmoqda. FIFA Nigeriyaning Kongo Demokratik Respublikasi milliy jamoasi tarkibidagi ehtimoliy qoidabuzarliklar bo‘yicha shikoyatini rad qildi. Endi nigeriyaliklar xalqaro Sport arbitraj sudida (CAS) «adolat izlashga» urinib ko‘radi. Holat O‘zbekiston milliy jamoasining JCh-2026 guruh bosqichidagi ehtimoliy raqibini o‘zgartirishi mumkin.
FIFA tartib-intizom qo‘mitasi Nigeriya futbol federatsiyasining Kongo Demokratik Respublikasi milliy jamoasi ustidan bergan shikoyatini rad qildi. Bu haqda ESPN Nigeriya futbol federatsiyasiga (NFF) tayanib xabar berdi. NFF zudlik bilan apellyatsiya jarayonini boshlaganini ma’lum qildi.
Avvalroq, NFF kongoliklar tarkibidagi bir necha futbolchi fuqarolik haqidagi FIFA talablarini buzgani bo‘yicha e’tiroz bildirib, ushbu milliy jamoaga texnik mag‘lubiyat yozgan holda JCh-2026 saralash o‘yinlaridan chetlatishni talab qilgan edi.
«Biz FIFA Tartib-intizom qo‘mitasining arizamiz bo‘yicha qarorini oldik, biroq arizamiz rad etilgan qaror bizni qoniqtirmaydi», dedi NFF bosh kotibi Muhammad Sanusi. «Nigeriyaliklarni ishontirib aytamanki, NFF zudlik bilan qaror ustidan shikoyat qilish jarayonini boshladi».
Endi shikoyat Sport arbitraj sudiga (CAS) yuborilishi kutilmoqda, ammo apellyatsiya jarayoni 26 mart kuni – qit’alararo pley-off boshlangunga qadar yakunlanishi dargumon.
Kongo DR futbol federatsiyasi bu xabarga munosabat bildirmadi.
Mojaro mazmuni
2025 yil noyabr oyida Kongo DR milliy jamoasi Afrika pley-offida Nigeriyani mag‘lub etdi (asosiy vaqtda 1:1 va penaltilar seriyasida 4:3). Bu kongoliklarga JCh-2026 yo‘llanmasi uchun qit’alararo pley-off o‘yinlariga yo‘llanmani taqdim etdi. Nigeriya esa JCh-2026 yo‘llanmasidan mahrum bo‘ldi.
Dekabrda AQSh poytaxti Vashingtonda JCh-2026 guruh bosqichiga qur’a tashlandi. O‘zbekiston milliy jamoasi K guruhida Portugaliya, Kolumbiya va saralashdan o‘tadigan yana bir jamoaga (Kongo DR/Yamayka/Yangi Kaledoniya) qarshi o‘ynashi ma’lum bo‘ldi.
Nigeriya futbol federatsiyasi (NFF) Kongo DR fuqarolik va milliy mansublikni o‘zgartirish talablariga javob bermaydigan o‘yinchilardan foydalangani haqida FIFAga rasmiy shikoyat bilan chiqdi.
Shikoyat nimaga asoslangan
Nigeriya futbol federatsiyasi (NFF) Kongo DR tarkibidagi 9 nafargacha futbolchi fuqarolikni o‘zgartirish tartibini buzgan deb hisoblamoqda – ularda Yevropa pasporti bor, ammo Kongo DR qonunlariga ko‘ra ikki fuqarolikka ruxsat berilmaydi.
Nigeriyaliklarning ta’kidlashicha, bu futbolchilar Yevropa pasportidan voz kechmagan va Kongo DR futbol federatsiyasi FIFAni milliy fuqarolik hujjatlari bilan «chalg‘itgan».
FIFA futbol qoidalariga ko‘ra, futbolchidan faqat mamlakatning amaldagi pasporti talab qilinadi. Ammo Kongo DR fuqarolik qonunchiligi bo‘yicha ikki fuqarolik taqiqlangan. Ushbu holat shikoyatga sabab bo‘lgan.
Kongo DR futbol federatsiyasi barcha o‘yinchilar FIFA tomonidan ma’qullanganini va maydonga tushish huquqiga ega ekanini ta’kidlamoqda va Nigeriyani maydondagi mag‘lubiyatdan so‘ng «orqa eshikdan bostirib kirishga» urinishda ayblamoqda.
Dastlab FIFA 2025 yil dekabr oyida futbol qoidalari uchun futbolchi vakil bo‘lgan mamlakatning amaldagi pasporti bo‘lishi yetarli ekanini aytib, shikoyatni rad qilgan edi. Ammo fevral oyi o‘rtalarida bir qator ommaviy axborot vositalarida (jumladan, The African Mirror va Eye Witness News) FIFA Tartib-intizom qo‘mitasi o‘yin paytida futbol fuqaroligini o‘zgartirish jarayoni tugallanmagan «X futbolchi» uchun ishni qayta ko‘rib chiqayotgani haqida xabarlar paydo bo‘ldi.
FIFA qaroridan keyin, endi NFF xalqaro Sport arbitraj sudida (CAS) «adolat izlashga» urinib ko‘radi.
Osiyo futbol konfederatsiyasi (OFK) 2031 va 2035 yilgi Osiyo Kubogi mezbonlarini tanlash jarayonlarini bekor qildi. Musobaqalar FIFA talabiga ko‘ra juft yillarga ko‘chirildi. Endi mezbon tanlash jarayoni qaytadan boshlanadi. Avvalroq, 2031 yilgi turnir mezbonligiga O‘zbekiston, Tojikiston va Qirg‘iziston qo‘shma ariza topshirgan edi.
Foto: REUTERS/Ibraheem Al Omari
Osiyo futbol konfederatsiyasi (OFK) 2031 va 2035 yilgi Osiyo Kubogi mezbonlarini tanlash jarayonlari bekor qilingani haqida milliy federatsiyalarni rasman xabardor etdi, deb yozdi Reuters.
Turnir mezbonligiga O‘zbekiston, Tojikiston va Qirg‘izistonning qo‘shma arizasi ham da’vogarlik qilayotgan edi.
Bekor qilinishiga sabab FIFA tashabbusi bo‘lib, u qit’a turnirlari jadvalini o‘zgartirish va ularni juft yillarga ko‘chirishni taklif qilgan. Muhokamalardan so‘ng OFK bu taklifga rozi bo‘ldi.
Nima o‘zgaradi?
Asosiy oqibat – turnirlarning to‘liq ko‘chirilishi: Osiyo kubogi-2031 endi 2032 yilga rejalashtirilgan, Osiyo kubogi-2035 esa 2036 yilga ko‘chirilgan. Shunday qilib, turnirni o‘tkazishning an’anaviy tizimi buziladi va musobaqalar boshqa vaqt oralig‘ida o‘tkaziladi. Shu bilan birga, Osiyo Kubogi-2027 reja bo‘yicha o‘z muddatida bo‘lib o‘tadi.
Osiyo Kubogining juft yillarga ko‘chirilishi yana bir muammoni keltirib chiqarmoqda – boshqa konfederatsiyalarning eng yirik turnirlari bilan bir vaqtga to‘g‘ri kelmoqda. Endi bir yil davomida quyidagi musobaqalar o‘tkazilishi mumkin: Yevropa chempionati (UYeFA Yevro), Amerika Kubogi (Copa America), Osiyo Kubogi.
FIFA nega tizimni o‘zgartirmoqda?
O‘zgarishlar xalqaro taqvimni markazlashgan holda boshqarish bilan bog‘liq. FIFA allaqachon 2030 yilgacha bo‘lgan global musobaqalar rejasini tasdiqlagan bo‘lib, unda milliy jamoalar o‘yinlari uchun oynalar, saralash turnirlari, final bosqichlari va o‘rtoqlik o‘yinlari aniq ko‘rsatilgan. Ushbu tizimda har bir konfederatsiya umumiy jadvalga moslashishi kerak. Osiyo Kubogi qarori – mana shu katta islohotning bir qismi.
Mezbonlikka nomzodlar bilan vaziyat qanday?
Turnirlar sanasining o‘zgarishi mezbonlikka da’vogarlarning barcha arizalarini avtomatik ravishda bekor qiladi. Bu shuni anglatadiki, mezbonlarni tanlash jarayoni qaytadan boshlanadi, hamma yangi tartibni kutishiga to‘g‘ri keladi. OFK amalda ikki turnirga tayyorgarlik siklini qaytadan boshlaydi.
2031 yilgi Osiyo Kubogi mezbonligiga Avstraliya, Hindiston, Indoneziya, Kuvayt, Janubiy Koreya, shuningdek, O‘zbekiston, Qirg‘iziston va Tojikiston qo‘shma ariza topshirgan edi. Endi O‘zbekistonning yangi turnirlar mezbonligi uchun ariza topshirishi masalasi noma’lum. Hozircha, O‘zbekiston futbol assotsiatsiyasi (O‘FA) vaziyatga munosabat bildirmadi.
Fudbol bo‘yicha O‘zbekiston milliy jamoasi Toshkentda bo‘lib o‘tadigan FIFA Series xalqaro o‘rtoqlik turnirida qatnashadi. Musobaqa 27–30 mart kunlari tashkil etiladi va unda Gabon, Trinidad va Tobago hamda Venesuela jamoalari ishtirok etadi.
Mart oyining oxirida Toshkent shahri FIFA Series xalqaro o‘rtoqlik turniriga mezbonlik qiladi. Milliy terma jamoa bosh murabbiyi Fabio Kannavaro maskur yig‘in uchun jalb etilgan futbolchilar ro‘yxatini e’lon qildi.
Darvozabonlar: O‘tkir Yusupov («Navbahor»), Abduvohid Ne’matov («Nasaf»), Botirali Ergashev («Neftchi»).
Himoyachilar: Rustamjon Ashurmatov («Istiqlol», Eron), Umarbek Eshmurodov («Nasaf»), Abduqodir Husanov («Manchester Siti», Angliya), Muhammadrasul Abdumajidov, Hojiakbar Alijonov, Sherzod Nasrullayev, Muhammadqodir Hamraliyev («Paxtakor»), Behruz Karimov («Surxon»), Jahongir O‘rozov («Dinamo»), Farruh Sayfiyev («Neftchi»).
Yarim himoyachilar: Umarali Rahmonaliyev («Sabah», Ozarbayjon), Ibrohim Ibragimov, Dostonbek Hamdamov, Akmal Mozgovoy («Paxtakor»), Alisher Odilov, Jamshid Iskanderov («Neftchi»), Otabek Shukurov («Baniyas», BAA), Azizjon G‘aniyev («Al Bataeh», BAA), Oston O‘runov («Persepolis», Eron).
Hujumchilar: Eldor Shomurodov («Istanbul Bashakshehir»), Igor Sergeyev («Persepolis», Eron), Sherzod Temirov («Erbil», Iroq).
Musobaqa 27-30 mart kunlari o‘tkaziladi.
27 mart
15:00 Venesuela – Trinidad va Tobago («Paxtakor» stadioni);
19:00 O‘zbekiston – Gabon («Bunyodkor» stadioni).
30 mart
15:00 Gabon – Trinidad va Tobago («Paxtakor» stadioni);
19:00 O‘zbekiston – Venesuela («Bunyodkor» stadioni).
Ma’lumot uchun, FIFA Series 2026 turnirlari o‘rtoqlik o‘yinlari o‘rnini bosishi nazarda tutilgan va butun dunyo bo‘ylab o‘tkaziladi. Erkaklar o‘rtasidagi bahslarga Avstraliya, Ozarboyjon, Indoneziya, Qozog‘iston, Yangi Zelandiya, Puerto-Riko, Ruanda va O‘zbekiston mezbonlik qiladi. Ayollar o‘rtasidagi musobaqalar Braziliya, Kot-d’Ivuar va Tailandda bo‘lib o‘tadi.
Turnirda ishtirok etayotgan beshta erkaklar milliy jamoasi – Avstraliya, Kabo-Verde, Kyurasao, Yangi Zelandiya va O‘zbekiston 2026 yilgi jahon chempionati ishtirokchisi sanaladi.
O‘zbekiston Superligasida 4-tur o‘yinlari o‘tkazildi. «Neftchi» mavsumda birinchi marta gol o‘tkazdi, ammo g‘alabali qadamini davom ettirdi. «Navbahor» va «Nasaf» so‘nggi daqiqalarda gol o‘tkazib, mag‘lubiyatga uchradi. Jizzaxda 6 ta gol urilgan o‘yinda «Paxtakor» uch ochkoni qo‘lga kiritdi. OKMK birinchi marta g‘alaba qozondi, bosh murabbiy Mirjalol Qosimov mobil o‘yinlar tufayli futbolchilarda ishtiyoq pasayib ketganini aytdi.
18-20 mart kunlari futbol bo‘yicha O‘zbekiston Superligasida 4-tur o‘yinlari o‘tkazildi.
QIZILQUM 0:1 OKMK
Gol: Abror Karimov, 34 (0:1)
OKMK mavsumdagi birinchi g‘alabasini Navoiyda qo‘lga kiritdi. Yagona gol «Qizilqum»ni mag‘lub etish uchun yetarli bo‘ldi. Olmaliqliklar ushbu g‘alabadan keyin musobaqa jadvalida 10-o‘ringa ko‘tarilib oldi.
«Qizilqum» bosh murabbiyi Akmal Rustamov jamoa yagona xato tufayli yutqazganini aytdi. OKMK ustozi Mirjalol Qosimov futbolchilarning ishtiyoqini telefondagi o‘yinlar olib qo‘yayotganidan shikoyat qildi. «Hozir telefon chiqib ko‘plarning xayolini olyapti, telefondagi o‘yinlar maydondagi futboldan ko‘proq azart beryapti. Qaniydi maydonda ham shunday kurash kechsa. Telefondagi o‘yinlar yoshlarning miyasini buzyapti», dedi u.
QO‘QON-1912 2:1 NAVBAHOR
Gollar: Anri Chichinadze, 14 (0:1), Javohir Husanov, pen 28 (1:1), Muhammadanas Hasanov, 90+4 (2:1)
Qo‘qonda kutilmagan natija qayd etildi. G‘alaba nimaligini bilmay kelayotgan mezbonlar «Navbahor»ni irodali tarzda mag‘lub etishga erishdi. G‘alaba keltiruvchi gol so‘nggi daqiqalarda urildi.
«Qo‘qon-1912» ustozi Andrey Shipilov bugun omad kulib boqqanini tan oldi. «Navbahor» bosh murabbiyi Temur Kapadze mag‘lubiyatni boshqa narsalar qatori maydon holati bilan ham bog‘ladi. «Maydon ham og‘ir, o‘t baland ekan, bu esa raqibga qo‘l keldi. Maydonda to‘p sekin yurdi, bizga og‘irlik qildi, maydon holati bilan kurash olib bordik», dedi u.
XORAZM 1:2 BUNYoDKOR
Gollar: Nosirjon Abdusalomov, 16 (0:1), Matiya Krivokapich, 43 pen (0:2), Temur Ismailov, 54 (1:2)
Chetlatish: Sardor Rahmonov, 62 (Bunyodkor)
«Bunyodkor» Urganchdagi qiyin o‘yinda 3 ochkoni qo‘lga kiritdi. Toshkentliklar so‘nggi yarim soatni raqibga nisbatan kamchilikda o‘tkazdi, ammo g‘alabani ushlab qolishga erishdi.
«Xorazm» bosh murabbiyi Sergey Tokov ikkita gol o‘tkazib yuborilgan birinchi bo‘lim haqida «uyalishimiz kerak» dedi. «Bunyodkor» ustozi Ilyos Zeytullayev g‘alabadan xursandligini yashirmadi va o‘zini «o‘zbek Spalettisi» deb atalishiga xotirjam munosabatda ekanini ta’kidladi. «Men o‘zimni o‘zbek spagettisi deyman (kulib). Menga Spaletti murabbiy sifatida yoqadi, lekin men angrenlikman», dedi u.
BUXORO 3:1 DINAMO
Gollar: Ravshan Xayrullayev, 45, avtogol (0:1), Temur Mamasidiqov, 48 (1:1), Shahzodbek Ubaydullayev, 54 (2:1), Ravshan Xayrullayev, 63 (3:1)
Yana bir kutilmagan natija Buxoroda qayd etildi. Aleksandr Xomyakov qo‘l ostidagi «Buxoro» Samarqandning «Dinamo» klubini irodali tarzda mag‘lub etdi. Bu natijadan so‘ng, buxoroliklar musobaqa jadvalida ikkinchi o‘ringa ko‘tarilib oldi va chempionat startidagi asosiy kashfiyot bo‘lib turibdi.
«Buxoro» bosh murabbiyi o‘yindan keyin «dastlab uyatli gol o‘tkazdik va tezkor gol urdik. Ikkinchi golda omadimiz keldi, uchinchi golimiz esa o‘yinga yakun yasab berdi», dedi. «Dinamo» ustozi Vadim Abramov maydon sifatiga e’tiroz bildirdi. «O‘ylashimcha, bu maydonda futbol o‘ynashga boshqa ruxsat berishmasa kerak», dedi u.
ANDIJON 2:0 MASh’AL
Gollar: Martin Boake, 18 (1:0), Doniyor Abdumannopov, 76 (2:0)
Chetlatish: Ibrohim G‘anixonov, 12 (Mash’al)
«Andijon» autsayder ustidan ishonchli tarzda g‘alaba qozondi. «Mash’al» o‘yin boshidayoq bir futbolchi kam bo‘lib qoldi. Ibrohim G‘anixonov «Andijon» himoyachisi Igor Golbanga tirsagi bilan zarba bergan deb topildi va maydondan chetlatildi. Vaziyat ijtimoiy tarmoqlarda faol muhokama qilindi, qoidabuzarlik yaqqol emasdek ko‘rindi. O‘yindan keyin Futbol hakamlari markazi Igor Golbanning yorilgan qoshi fotosuratini e’lon qildi. Mezbonlar tarkibdagi ustunlikni g‘alabaga aylantira oldi. «Mash’al» hali birorta gol urmadi va jadval tubiga «o‘rnashib» qoldi.
«Andijon» bosh murabbiyi Samvel Babayan o‘yindan keyin tanqidiy fikr bildirdi: «Jamoam o‘yinidan to‘liq qoniqmadim. Qoniqdim degan murabbiy faoliyatini tugatib qo‘yavergani yaxshi deb o‘ylayman», dedi. «Mash’al» ustozi Igor Surov «agar bir kishi kam bo‘lib qolmaganimizda, umuman boshqacha futbol namoyish etgan bo‘lardik», dedi.
SO‘G‘DIYoNA 2:4 PAXTAKOR
Gollar: Filip Ivanovich, 2 (1:0), Flamarion, 36 (1:1), Rustam Turdimurodov, 50 (1:2), Rustam Turdimurodov, 57 pen (1:3), Hojimat Erkinov, 74 pen (1:4), Feysal Mulich, 90+5 pen (2:4)
Turning eng «quvnoq» o‘yini Jizzaxda o‘tkazildi. 6 ta gol urilgan bahsda «Paxtakor» ishonchli g‘alabani qo‘lga kiritdi va uchinchi o‘ringa ko‘tarilib oldi. Mehmonlar tarkibida Rustam Turdimurodov ikkita gol urdi. «So‘g‘diyona» uchun mavsum starti muvaffaqiyatsiz kechdi – jamoa 1 ochko bilan so‘nggi o‘rinlardan birini egallab turibdi.
«So‘g‘diyona» bosh murabbiyi Ivan Boshkovich dastlabki to‘rtta o‘yinda atigi bir ochko to‘plangani haqida gapirar ekan, buni inqiroz ekanini qisman tan oldi, lekin jamoa yanada yaxshiroq harakat qilishiga ishontirdi. Moliyaviy muammolar haqidagi savolni esa javobsiz qoldirdi.
NASAF 0:1 SURXON
Gol: Tornike Dzebniauri, 90+2 (0:1)
Yana bir kutilmagan natija Samarqandda qayd etildi. «Nasaf» so‘nggi daqiqalarda gol o‘tkazib, «Surxon»ga yutqazdi. Termizliklar bundan oldin bosh murabbiy Stanislav Kudryashov bilan xayrlashib, o‘rniga Anvar G‘ofurovni tayinlagan edi. Uning debyuti muvaffaqiyatli chiqdi. «Nasaf» bosh murabbiyi Ro‘ziqul Berdiyev mag‘lubiyatni «hujumlarda yetarlicha faol bo‘lmagani» bilan izohladi. Anvar G‘ofurov g‘alabani omad bilan izohladi.
NeFTChI 3:1 LOKOMOTIV
Gollar: Ibrohimhalil Yo‘ldoshev, 11 (1:0), Temurxo‘ja Abduxoliqov, 36 pen (1:1), Stipe Peritsa, 65 (2:1), Alisher Odilov, 89 (3:1)
«Neftchi» navbatdagi g‘alabani qo‘lga kiritdi. Farg‘onaliklar 15 yilda ilk marotaba «Lokomotiv»ni o‘z maydonida yengishga muvaffaq bo‘ldi va chempionatda yo‘qotishsiz bormoqda. Bu o‘yinda ular mavsumdagi ilk golini o‘tkazdi (penaltidan), ammo yana uchta gol urishga muvaffaq bo‘ldi. «Neftchi» bosh murabbiyi Islombek Ismoilov dastlabki o‘tkazib yuborilgan goldan ranjiganini tan oldi: «gol o‘tkazmaslik seriyasini uzoq davom ettirishni maqsad qilgandik», dedi. «Lokomotiv» ustozi Mirko Yyelichich: «Hozircha darajamiz «Neftchi» bilan bir xil emas va buni to‘g‘ri tushunish kerak», dedi.
4-tur o‘yinlaridan keyin Superliga jadvali
Superliga to‘purarlari
AQSh tashqi yordamni keskin qisqartirmoqda
Bir guruh mahalla xodimlari mukofotlandi
Masharipov va Fayzullayev jarohat sabab xalqaro turnirda qatnashmaydi
-
Dunyodan3 days ago
Eron Hormuz boʻgʻozi orqali cheklangan oʻtishga ruxsat beradi
-
Jamiyat3 days ago
Tadbirkor boshpanasiz bo‘lgan 5 ta oilani uy-joy bilan ta’minladi
-
Iqtisodiyot3 days agopayme Tez QR orqali to‘lovni 3% keshbek bilan ishga tushirmoqda
-
Siyosat2 days agoSoʻnggi savdo maʼlumotlariga koʻra, Oʻzbekiston temir yoʻllari importi eksportdan 2,5 barobar koʻp
-
Iqtisodiyot4 days ago“Markaziy Osiyo umumiy investitsiya makonini yaratishi zarur” – Alisher Umirdinov
-
Jamiyat5 days ago
Ichki ishlar xodimlarining qo‘pol muomalasi va tergov sifatidan norozilik ko‘paygan – Prezident
-
Iqtisodiyot4 days agoMetandan go‘shtgacha. Narxi keskin oshgan mahsulot va xizmatlar
-
Iqtisodiyot3 days agoQashqadaryo viloyati ijtimoiy-iqtisodiy rivojlantiriladi