Qizil va sariq kartochkalar joriy etilishiga sabab bo‘lgan voqea, «Asr o‘g‘riligi», Maradonaning qo‘lda urilgan goli, yuz yillikning eng yaxshi goli, Folklend urushi uchun qasos va Bekhemning karerasini barbod qilishi mumkin bo‘lgan chetlatish. Bularning barchasi Angliya – Argentina o‘yinlarida sodir bo‘lgan. O‘yinlardagi yuqori harorat tufayli futbolchilar bir-biriga og‘ir jarohat yetkazmasligi va tribunalarda qonli to‘qnashuvlar ro‘y berishidan qochish uchun bu jamoalar o‘rtasida o‘rtoqlik uchrashuvlari o‘tkazilmaydi. Ammo bugun ular JCh yarimfinalida bir-biriga qarshi maydonga chiqishiga to‘g‘ri keladi.

Foto: Mirrorpix via Getty Images

15 iyul kuni kechqurun jahon chempionatida ikkinchi yarimfinal o‘yini o‘tkaziladi: Amaldagi chempion Argentina Angliyaga qarshi. FQB ushbu o‘yinni «eng xavfli o‘yinlar» toifasiga kiritgan – stadion atrofida va jamoalar joylashgan mehmonxonalar atrofida xavfsizlik choralari kuchaytirilgan. Buning sababi shundaki, bu futbol olamidagi milliy jamoalar darajasidagi eng mashhur va eng prinsipial qarama-qarshilik hisoblanadi: bu jamoalarning jahon chempionatlaridagi beshta uchrashuvidan uchtasi sport doirasidan tashqariga chiqib ketgan mojarolar bilan yakunlangan.

Argentina – Angliya

Jahon chempionati. 1/2 final

16 iyulga o‘tar kechasi, 00:00. Mercedes-Benz Stadium (Atlanta)

JCh-1966: «toj uchun o‘g‘rilik» va kartochkalar paydo bo‘lishi

Asosiy faktlar. Angliya – Argentina 1:0. 1966 yil 23 iyul, London, Angliya. Jahon chempionati 1/4 finali

Hozirgacha eslanadigan mojaro. O‘zaro dushmanlik tarixi 60 yil muqaddam Angliyada bo‘lib o‘tgan jahon chempionatiga borib taqaladi. O‘shanda mezbonlar chorakfinalda Argentinaga qarshi o‘ynagan, o‘yinning 35-daqiqasida uchrashuv bosh hakami, germaniyalik Rudolf Kreytlyayn janubiy amerikaliklar jamoasi sardori Antonio Rattinni maydondan chetlatgandi. Hakam ispanchani bilmagan, lekin argentinalik futbolchini o‘ziga nisbatan «haqoratli so‘zlar» ishlatishda ayblagan – u bu qarorini futbolchining yuz ifodasi hamda ovozi ohangi bilan izohlagan.

1966 yilda hali futbolda sariq va qizil kartochkalar mavjud emasdi, shu tufayli hakam Rattinga shunchaki qo‘l ishorasi bilan tribunalar tomonni ko‘rsatadi. Futbolchi esa maydonni tark etishni istamaydi va keyingi 9 daqiqa mobaynida qarshilik ko‘rsatadi.

Afsonaviy Antonio Rattin 2026 yil 11 iyul kuni 89 yoshda vafot etdi

Antonio arbitrga o‘z e’tirozini rasmiy tarzda bildirish uchun tarjimon taqdim etishni talab qiladi. Vaziyatni hal qilish uchun «Uembli»ga nafaqat murabbiylar, balki FIFAning yuqori martabali mulozimlari, shuningdek, otliq politsiyachilar ham tushib kelishadi. Argentinaliklarning g‘azablangan sardori baribir kuch bilan tribunalar ostiga olib ketiladi, lekin u yo‘l-yo‘lakay futbol tarixiga abadiy muhrlanib qolgan bir necha namoyishkorona norozilik aksiyalarini uyushtiradi.

Rasmiylar Rattindan maydonni tark etishni so‘rashmoqda

Foto: Mirrorpix via Getty Images

Britaniya ramzlari tasvirlangan burchakdagi bayroqcha yonidan o‘tayotib, futbolchi bayroqchani qo‘llari bilan namoyishkorona g‘ijimlaydi, kiyim almashtirish xonasiga ketayotganida esa stadionda qirolicha Yelizaveta II o‘tishi uchun maxsus to‘shalgan hashamatli qizil gilamga o‘tirib oladi. Oyoq tirab olgan futbolchini tribunalardan uloqtirilayotgan pivo bankalari va boshqa turli buyumlar yomg‘iri ostida kuch bilan olib ketishga to‘g‘ri keladi.

Ikkinchi bo‘limda ko‘pchilik bo‘lib o‘ynagan inglizlar Jyeffri Hyorstning yagona goli evaziga g‘alaba qozonadi – argentinaliklar bu golni yaqqol ofsayddan urilgan deb hisoblashadi.

O‘yin yakunlanishi bilan argentinaliklar hakamga tashlanadi: himoyachi Roberto Ferreyro uni qattiq turtib yuboradi, yarimhimoyachi Ermindo Onega FIFA vitse-prezidenti Garri Kavananing yuziga tupurib yuboradi (keyinroq futbolchilar uchtadan o‘yinga diskvalifikatsiya qilinadi).

Inglizlar bosh murabbiyi Alf Ramsey o‘z futbolchilariga argentinaliklar bilan liboslarni almashishni taqiqlaydi, matbuot anjumanida esa raqib futbolchilarini «hayvonlar» deb ataydi.

«Podkatlar – bu normal holat. Ammo razil xatti-harakatlar ham bo‘lgan, – deb eslaydi inglizlar himoyachi Jorj Koen o‘sha o‘yinni. – Argentinaliklar yuzga tupurar, sochni yulishar, quloqdan tortardi. Ular bizni qo‘rqitishga harakat qilardi. Ular o‘z maqsadiga erisha olmasligini bilib, men ko‘rgan eng qabih ishlarga qo‘l urishdi. Sharmandalik, ular o‘z o‘yinini ko‘rsatmadi. Agar ular shunchaki chiqib, nimaga qodir ekanliklarini ko‘rsatishganida, biz yutqazishimiz mumkin edi».

Argentinadagilar esa bu o‘yinni va butun turnirni – «toj uchun o‘g‘rilik» deb eslashadi: ko‘pchilik arbitrlar turnir mezbonlari bo‘lgan Angliya milliy jamoasini qo‘llagan, deb hisoblaydi.

Futboldagi ahamiyati. Rattin hakamning og‘zaki talabi bo‘yicha maydonni tark etishdan bosh tortishi futbolchilar va tomoshabinlar uchun yanada tushunarli va ko‘rgazmali jazo tizimini joriy etish zaruratini yuzaga chiqaradi. O‘sha kuni o‘yinni tribunadan tomosha qilgan, sudyalar komissiyasi boshlig‘i Ken Aston uyga qaytishda svetoforda to‘xtab turganida Rattin bilan bo‘lgan epizodni o‘ylayotgandi. U ogohlantirish uchun sariq, maydondan chetlatish uchun qizil kartochka ko‘rsatishni taklif qiladi. FIFA bu g‘oyani qo‘llab-quvvatlaydi. Shu tariqa, futbolda kartochkalar paydo bo‘ladi.

Uyog‘iga nima bo‘lgan. Angliya finalgacha yetib boradi va GFRga qarshi hal qiluvchi bahsning qo‘shimcha vaqtida g‘alaba qozonib, jahon chempioniga aylanadi. Hyorst finalda het-trik qayd etadi. Bu Angliya uchun hozirgacha yirik turnirlardagi yagona chempionlik bo‘lib qolmoqda.

Oradan ikki yil o‘tib, 1968 yilgi Qit’alararo kubok uchun kurashda «Estudiantes» va «Manchester Yunayted» to‘qnash kelganida, o‘zaro nafrat darajasi yanada ortadi. Buenos-Ayresdagi o‘yinda argentinaliklar inglizlarga nisbatan shafqatsiz munosabatda bo‘lishadi: tunnelda futbolchilarga tupurishadi, maydonda esa «Yunayted» yetakchisi Bobbi Charlton uchun haqiqiy ov uyushtirishdi (oxir-oqibat uning boshini tikishga to‘g‘ri keladi).

Mezbonlar birinchi o‘yinda 1:0 hisobida g‘alaba qozonadi, javob o‘yinida esa qo‘rqitish va provokatsiyaga asoslangan taktikasini davom ettiradi. Bu Jorj Best va Xose Medina maydonda mushtlashib ketishi bilan yakunlanadi, hakam ularning ikkisini ham maydondan chetlatadi. O‘yin 1:1 hisobida tugaydi va «Estudiantes» sovringa ega chiqadi. Ammo argentinaliklar «Old Trafford»da bayram qila olishmaydi, mahalliy fanatlar ularga qarata tangalar, shisha idishlar tosh va pomidorlar otib, haydab yuborishadi.

JCh-1986: «Xudoning qo‘li» va asr goli

Asosiy faktlar. Argentina – Angliya 2:1. 1986 yil 22 iyun, Mexiko, Meksika. Jahon chempionati 1/4 finali

Hozirgacha eslanadigan mojaro. Bu o‘yin avvalboshdan prinsipial xarakterga ega edi: 1982 yil aprel oyida Argentinaning o‘sha vaqtdagi prezidenti, general Leopoldo Galteri Folklend orollariga bostirib kiradi. U Buyuk Britaniya hukumati olisdagi orollardan shunchaki voz kechishini kutgandi, ammo bosh vazir Margaret Tetcher britan armiyasiga orolni qaytarish vazifasini qo‘yadi. 74 kun davom etgan urush argentinaliklar to‘liq tor-mor qilinishi bilan yakunlanadi va 649 nafar argentinalik askarni hayotdan olib ketadi (britanlarda ham 255 harbiy xizmatchi halok bo‘lgan). Galteri esa iste’foga chiqqan, bir yil o‘tib qamoqqa olingan, Argentina zamonaviy tarixidagi prezidentlar ro‘yxatidan o‘chirilgan.

«Tottenhem»ning argentinalik legionerlari Osvaldo Ardiles va Rikardo Vilega ayniqsa qiyin bo‘ladi. Urushning dastlabki kunlarida Osvaldoning amakivachchasi, harbiy uchuvchi Xose Ardiles halok bo‘lgan, uning boshqaruvidagi Mirage qiruvchi samolyoti britanlar tomonidan urib tushirilgan. Ruhiy bosim va tribunalardagi hushtakbozliklar tufayli ikki legioner ham Angliya chempionatini tark etishga majbur bo‘ladi. Margaret Tetcher esa 1982 yil yozida Ispaniyada bo‘lib o‘tgan jahon chempionatidan Argentinani chetlatishni talab qiladi, ammo London bilan Gibraltar masalasida bahslashib turgan Madriddagilar bu tashabbusni rad etadi.

1986 yil yozida Meksikada bo‘lib o‘tgan jahon chempionatigaga Angliya va Argentina shunday kayfiyatda yetib boradi, ularning chorakfinaldagi to‘qnashuvi esa haqiqiy trillerga aylanadi. Britaniyadagi tabloidlarda «Argentina, biz sizni yana tubga cho‘ktiramiz!» qabilidagi sarlavhalar chiqariladi, Argentina mediasi esa inglizlarni «qaroqchilar» va «bosqinchilar» deb atab, Malvin orollarida (Folklendning argentinacha atalishi) halok bo‘lgan askarning fotosuratini o‘yin anonsi bilan birga e’lon qiladi. O‘yin boshlanishiga bir necha soat qolganida «Atsteka» stadioni atrofida ikki jamoa muxlislari o‘rtasida ommaviy mushtlashuv bo‘lib o‘tadi, Argentina milliy jamoasi futbolchilari ham maydonga kuchli motivatsiya bilan tushishadi. Diyego Maradona keyinro avtobiografiyasida shunga iqror bo‘ladi: «Intervyularda biz siyosatni sport bilan aralashtirmaslik kerak, deganmiz. Ammo bu yolg‘on edi. Biz faqat Malvinda halok bo‘lgan yigitlar haqida o‘ylardik».

Inglizlar o‘sha kuni Maradonaga qarshi qo‘pol o‘ynagandi, ammo uni to‘xtata olmagandi

Foto: Allsport/Getty Images

O‘yinning 51-daqiqasida o‘sha mashhur voqea ro‘y beradi: Diyego Maradona jarima maydonida baland sakrab, to‘pni qo‘li bilan darvozaga kiritib yuboradi. Ingliz futbolchilarining keskin e’tiroz bildirishiga qaramay, gol inobatga olinadi – hakam argentinalik mushti bilan emas, boshda zarba bergan deb topadi. O‘yindan keyin Maradona gol «qisman Maradonaning boshi, qisman Xudoning qo‘li» bilan urilganini aytadi.

Futboldagi ahamiyati. Hisob ochilganidan to‘rt daqiqa o‘tib Maradona ikkinchi golni ham uradi, bu safar u maydonning ikkinchi qismidan yurish amalga oshirib, yo‘l-yo‘lakay inglizlarning besh futbolchisini va darvozabonni ortda qoldirib, bo‘sh darvozani ishg‘ol etadi. Bu golni hozirgacha jahon futboli tarixidagi eng chiroyli gollardan biri deb hisoblashadi. 2002 yilda esa FIFA uni rasman «yuz yillikning eng yaxshi goli» deb e’lon qilgan.

O‘sha o‘yinda inglizlar darvozasini qo‘riqlagan Piter Shilton esa shu kunlarda ushbu gollarni esladi: «Agar o‘shanda VAR mavjud bo‘lganida, Maradonaning ikki goli ham hisobga olinmagan bo‘lardi: birinchisi – qo‘l bilan o‘ynalgani uchun, ikkinchisi – hujumning boshlanish fazasida Glenn Hoddlga ishlatilgan fol tufayli».

Uyog‘iga nima bo‘lgan: Yarimfinalda argentinaliklar Belgiyani mag‘lub etadi (Maradona yana ikki gol uradi), finalda esa GFR ustidan g‘alaba qozonib, ikki karra jahon chempionlariga aylanishadi. Maradonani turnirning eng yaxshi futbolchisi deb topishadi. Ko‘p yillar o‘tib u golni qo‘li bilan urganini aytadi va buni Folklend urushidagi mag‘lubiyat uchun «ramziy qasos» deb ataydi.

JCh-1998: Bekhemning qizil kartochkasi va Ouenning debyuti

Foto: Bob Thomas Spors Photography / Getty Images

Asosiy faktlar. Argentina – Angliya 2:2 (penaltilar seriyasida 4:3). 1998 yil 30 iyun, Sent-Eten, Fransiya. Jahon chempionati 1/8 finali

Hozirgacha eslanadigan mojaro. O‘yinning ikkinchi bo‘limida 23 yoshli Devid Bekhem, argentinaliklar safidagi Diyego Simeonening provokatsiyasiga uchadi. Raqib uni oyog‘iga zarba berib yiqitgan, keyin tepasiga borib nimadir degandi, ingliz futbolchisi esa yotgan holatida uning oyog‘iga zarba beradi va maydondan chetlatiladi. Angliya ozchilik holatida 2:2 hisobini saqlab qoladi, ammo penaltilar seriyasida yutqazadi, ingliz matbuoti esa mag‘lubiyatda aynan Bekhemni ayblaydi (masalan, Daily Mirror muqovasida shunday sarlavha chiqqandi: «O‘nta qahramon sher va bitta ahmoq bolakay»). Bu epizod futbolchining karerasini barbod qilishiga sal qoladi: Bekhem vatanida nafrat to‘lqiniga duch keladi, uning o‘zi va oilasi doimiy tahdidlar ostida yashaydi, APLdagi har o‘yinda muxlislar unga hushtakbozlik qilishadi.

Futboldagi ahamiyati. Aynan o‘sha o‘yin Maykl Ouenni dunyoga tanitgandi. Jahon chempionatidan oldin faqat APL ixlosmandlari uchun tanish bo‘lgan (u vaqtlarda Angliya Premer-ligasi hozirgidek mashhur emasdi) 18 yoshli futbolchi o‘sha kuni ilk bor milliy jamoa safida boshlang‘ich tarkibda tushgandi va Bekhemning uzatmasidan foydalanib, o‘sha jahon chempionatining eng chiroyli gollaridan biriga mualliflik qilgandi (hozirgacha Angliya milliy jamoasi tarixidagi eng chiroyli gol deb hisoblanadi).

Uyog‘iga nima bo‘lgan: Argentina keyingi bosqichda turnirni tark etadi. Bekhem esa muxlislar bosimidan chiqib keta oladi va katta yulduzga aylanadi. To‘rt yil o‘tib u Osiyodagi mundialga Angliya milliy jamoasini sardor sifatida boshlab keladi. Inglizlar guruh bosqichida Argentinaga qarshi o‘ynaydi va bu o‘yinda inglizlar 1:0 hisobida g‘alaba qozonadi, o‘yindagi yagona golni Bekhem penaltidan uradi. Bu o‘yin Argentina va Angliya milliy jamoalari o‘rtasida katta turnirlardagi so‘nggi o‘yin bo‘lib qolmoqda.

Keyingi davrda jamoalar faqat bir marta, 2005 yil Jyenevada o‘rtoqlik uchrashuvida maydonga tushgan. Bu o‘yinda inglizlar 3:2 hisobida g‘alaba qozongan, tribunalarda kichik to‘qnashuvlar bo‘lib o‘tgan, ammo maydonda jiddiy voqealar kuzatilmagan. Shunga qaramay, ushbu jamoalar shundan buyon o‘zaro o‘rtoqlik uchrashuvlari o‘tkazishdan qochib kelishadi.

Source link

Birinchi yarimfinal kutilmalarni oqladi.

JCh-2026 yarimfinali doirasidagi birinchi uchrashuvda Ispaniya  Fransiya ustidan ishonchli g‘alabaga erishdi (2:0). Luis de la Fuente shogirdlari birinchi bo‘limda penalti orqali hisobni ochishdi va raqibga deyarli hech qanday imkon berishmadi, tanaffusdan keyin esa hisobdagi ustunlikni mustahkamlashdi.

Maydon tashqarisida ham qiziqarli voqealar davom etmoqda: afsonaviy fransuz futbolchisi Zinedin Zidan milliy jamoa boshqaruvida Dide Deshamning o‘rnini egallash uchun asosiy nomzod sifatida ko‘rilmoqda, Braziliya prezidenti milliy jamoa futbolchilarini turnirdan keyin vatanga qaytmagani uchun tanqid qildi, Norvegiya milliy jamoasi forvardi Erling Holand esa Amerikada shoping qildi.

Jamoaviy g‘alaba

Fransiya – Ispaniya 0:2

Gollar: Oyyarsabal, 22 – penalti (0:1). Porro, 58 (0:2)

Fransiya: Menyan, Upamekano, Saliba (Lakrua, 30), Din (Ernandez, 72), Kunde, Tchuameni, Rabio (Kone, 46), Olise (Sherki, 72), Barkolya (Due, 57), Dembele, Mbappe

Ispaniya: Simon, Lyaport, Kubarsi, Kukurelya, Porro (Liorente, 84), Ruis (Merino, 78), Rodri, Olmo (Pedri, 78), Baena (Uilyams, 84), Yamal, Oyyarsabal (Torres, 74)

Ogohlantirishlar: Rabio, 9. Mbappe, 86 – Kukurelya, 31

Fransiya jahon chempionatlarida qatorasiga uchinchi bor finalga chiqish vazifasini uddalay olmadi. «Qizil furiya» turnirning asosiy favoritlaridan birini ilojsiz ahvolda qoldirdi va finalga chiqdi.

De la Fuente shogirdlari ilk daqiqalardanoq birinchi raqam ostida harakat qildi. Ispanlar ketma-ket hujumlar uyushtirmadi, ammo maydon markazida to‘pni ishonch bilan nazorat qilishdi va fransuz himoyasidagi zaif nuqtalarni qidirish bilan mashg‘ul bo‘lishdi. 20-daqiqada bu natija berdi: himoyachi Lyuka Din o‘z jamoasi jarima maydonida ehtiyotsizlik qildi va to‘p o‘rniga Lamin Yamalni tepib yubordi. O‘yin bosh hakami darhol 11 metrlik nuqtani ko‘rsatdi, Mikel Oyyarsabal esa penaltini ishonch bilan ijro etdi.

«Uchranglilar»ning muammolari shu bilan tugamadi. Ko‘p o‘tmay markaziy himoyachi Vilyam Saliba belida kuchli og‘riq his qilib, maydonni tark etishga majbur bo‘ldi. Ispanlar esa hisobni ochganidan keyin ham himoyalanish haqida o‘ylamadi va vaziyatlar yaratishda davom etib, ikkinchi bo‘limda o‘z maqsadiga yetishdi: Pedro Porro Dani Olmo bilan «devor» uslubida o‘ynab, jarima maydoniga kirib bordi va darvozabonni dog‘da qoldirdi.

Fransuzlar esa shu kuni turnirdagi eng yomon o‘yinini o‘tkazayotgandi: tezkor hujumchilarning hujum qilishga urinishlari samara bermadi, Kilian Mbappe muntazam ravishda ofsayd qopqoniga tushib qoldi, Deshamning futbolchi almashtirishlari ham yordam bermadi. Fransuzlar o‘yinning so‘nggi o‘n daqiqaligida shturm uyushtirishga harakat qildi va ilk bor (bu oraliqda jami uch marta) to‘p darvoza sohasiga to‘g‘ri bordi, ammo bu hujumlar hisobni hech bo‘lmaganda qisqartirish uchun ham yetarli bo‘lmadi.

Ispaniya ikki to‘p farqini saqlab qoldi va o‘z tarixida ikkinchi bor JCh finaliga yo‘l oldi, birinchi urinishda, 2010 yilda pireneyliklar sovrinni qo‘lga kiritishgandi.

Zinedin Zidan Deshamni almashtiradimi?

Dide Desham Fransiya milliy jamoasi boshqaruvini tark etishi o‘tgan yiliyoq ma’lum edi – uning o‘zi jurnalistlar qarshisida mundialdan keyin ketmoqchi ekanini e’lon qilgandi. «Uchranglilar» Ispaniyaga yutqazib, turnirni tark etganidan keyin taniqli insayder Fabritsio Romano uning o‘rnini kim egallashi haqidagi ma’lumotni tarqatdi.

«Fransiya milliy jamoasida Dide Desham boshqaruvi davri poyoniga yetmoqda. Uchinchi o‘rin uchun o‘yin uning milliy jamoadagi so‘nggi o‘yini bo‘lib qoladi. Ushbu uchrashuvdan keyin Desham jamoa bilan xayrlashadi, keyin esa Zinedin Zidanning boshqaruvi davri boshlanadi», – deya yozgan Romano ijtimoiy tarmoqda.

Desham Fransiya milliy jamoasini 14 yil mobaynida boshqarib, 186 o‘yin o‘tkazdi, shundan 122 tasida g‘alabaga erishdi. 2018 yilda u jamoa bilan jahon chempioni bo‘ldi, 2021 yilda UYeFA Millatlar ligasi g‘olibligini qo‘lga kiritdi, 2022 yilda Qatardagi JCh kumush medallariga ega chiqdi.

Zidan murabbiylik faoliyatida ikki bor «Real»ni boshqargan (2016-2018, 2019-2021) va Madrid klubi bilan uch marta Chempionlar ligasida zafar quchgan, shuningdek, ikki bor Ispaniya chempioniga aylangan. U futbolchiligida jahon chempioni (1998) va Yevropa chempioni (2000) bo‘lgan.

Holand Hollandni ignor qildi

Norvegiyalik forvard Erling Holand Hollivud yulduzlarini tan olmaydi. Britaniyalik aktyor, O‘rgimchak odam roli orqali tanilgan Tom Holland futbolchini Monakodagi «Formula-1» Gran-prisida ko‘rganidan keyin, unga yozib, kechki ovqatni birgalikda qilish taklifini bildirgani haqida aytib berdi. Ammo unga javob qaytarilmagan.

«Unga yozdim va kechki ovqatga taklif qildim. Undan javob sifatida loaqal bitta so‘z ham kelmadi, sababini aytmadi, «men bandman, futbol o‘ynashim kerak» demadi. U taklifni rad etgani ham yo‘q, shunchaki mening kimligimni bilmadi. O‘ylaymanki, bu muhim tajriba bo‘ldi: u menga aktyor sifatida kamtar bo‘lib qolishni o‘rgatdi», – deya xotiralari bilan bo‘lishgan Tom Jimmi Fellonning shousida.

Shu bilan birga, Holland undan xafa bo‘lmagan. U Holandni «aql bovar qilmas» futbolchi va «haqiqiy afsona» deb hisoblaydi, shuningdek, Norvegiya JCh chorakfinalida Angliyaga yutqazib (1:2), turnirni tark etganidan keyin u bilan kechki ovqatdan butkul umid uzganini aytib, hazil qilgan.

«Bu voqeadan keyin u men bilan uchrashishi dargumon», – deya qo‘shimcha qiladi aktyor.

Holand Texasdan sovg‘alar bilan qaytdi

Bir narsa aniq. Norvegiyalik hujumchining yulduz aktyorlar bilan birga ovqatlanishga vaqti yo‘q edi – u shoping bilan mashg‘ul bo‘lgan. TMZ ma’lumotiga ko‘ra, hujumchi Norvegiyaga qaytishdan oldin ayrim jamoadoshlari bilan Dallasdagi Yovvoyi g‘arb uslubidagi do‘konga borgan.

Manba ma’lumotiga ko‘ra, besh nafar futbolchi bu yerda 10 ming dollar sarflagan, barcha xaridlar uchun to‘lovni Holand amalga oshirgan.

Futbolchilar kovboylar shlyapalari, etiklar, vestern-ko‘ylaklar hamda va qayish to‘qalar (pryajka) olishgan. Hujumchining asosiy xaridi esa alkogol ichimlikka biriktirilgan yenot tulumi bo‘lgan (750 dollar).

Holand Norvegiyaga qo‘ngan samolyot trapidan tushayotganida aynan shu tulumni ko‘targan holda ko‘rinish berdi va bu surat ijtimoiy tarmoqlarda virusdek tarqaldi.

Braziliyalik futbolchilar vatanga qaytmadi, prezident norozi

Braziliya 2026 yilgi jahon chempionatida nimchorakfinalda Norvegiyaga yutqazdi (1:2) va 1990 yildan buyon ilk bor chorakfinalga chiqa olmadi. Ma’lum bo‘lishicha, jamoa turnirni erta tark etganidan keyin futbolchilarning ko‘pchiligi vataniga qaytib o‘tirmagan va o‘sha yerdan ta’tilga yo‘l olishgan.

Mamlakat prezidenti Luis Inasiu Lula da Silvaga AQShdan charter reys deyarli bo‘sh qaytgani haqida axborot berishgan. Shundan keyin siyosatchi futbolchilarni tanqid qildi.

«Delegatsiya katta tarkibda uchib ketgandi, juda ozchilik bo‘lib qaytib keldi. Milliy jamoa samolyotida deyarli hech kim yo‘q edi. Qanday sharmandalik! Faqat birgina futbolchi qaytgan. Agar ular g‘alaba qozonganida, bu yerda hamma raqsga tushgan bo‘lardi», – deya mamlakat rahbarining so‘zlarini keltiradi UOL nashri.

Nashr ma’lumotiga ko‘ra, delegatsiya bilan vatanga faqat «Flamengo» himoyachisi Danilo qaytgan, o‘z vaqtida «Portu», «Real», «Manchester Siti» va «Yuventus» kabi klublarda ham to‘p surgan ushbu futbolchi turnirdagi barcha o‘yinlarda qatnashgandi.

Jurnalistlar futbolchilar ta’tilni qanday o‘tkazayotgani to‘g‘risida ham ma’lumotlarni aniqlashdi. Masalan, Neymar turnirdan keyin darhol o‘zining ikkinchi sevimli o‘yini bo‘lgan poker o‘ynashga kirishib ketgan: 34 yoshli futbolchini Las-Vegasdagi turnirda uchratishgan. Bu turnirda qatnashish uchun 10 ming dollarlik badal to‘lash kerak bo‘ladi.

Vinisius Junior ham ta’tilni maroqli o‘tkazmoqda. Uning sevgilisi Virjiniya Fonseka instagramdagi sahifasida Italiyada birga dam olishayotgani aks etgan suratlarni joylashtirgan.

Muvaffaqiyatsiz natijaga qaramay, Braziliya futbola konfederatsiyasi va bosh murabbiy Karlo Anchelotti amaldagi shartnoma bo‘yicha hamkorlikni davom ettirishga kelishishgan. Braziliyani keyingi jahon chempionati uchun ham italiyalik mutaxassis tayyorlaydi.

Source link

Ispaniya milliy jamoasi JCh-2026 yarimfinal uchrashuvida Fransiyaga qarshi maydonga tushib, ishonchli g‘alabani qo‘lga kiritdi – 2:0. 

Uchrashuvning 22-daqiqasida Oyarzabal penaltini aniq amalga oshirib, hisobni ochdi. Ikkinchi bo‘lim boshida Porro fransiyalik himoyachilarning xatosidan unumli foydalanib, yakuniy hisobni o‘rnatdi. 

Ispaniya finalda Argentina va Angliya juftligi g‘olibiga qarshi o‘ynaydi. Fransiya esa bronza medal uchun kurash olib boradi. 

JCh–2026, yarimfinal

Fransiya – Ispaniya 0:2

Gollar: Oyarzabal (22, penalti), Porro (58).

Fransiya: Menyan — Din (72, Akliush), Saliba (30, Lakrua), Upamekano, Kunde — Rabyo (46, Kone), Chuameni — Barkola (57, Duye), Olise (72, Sherki), Dembele — Mbappe.

Ispaniya: Simon — Kukurelya, Lyaport, Kubarsi, Porro (84, Lyorente) — Ruis (78, Pedri), Rodri — Bayena (84, Uilyams), Olmo (78, Merino), Yamal — Oyarzabal (74, Torres).

Ogohlantirishlar: Rabyo (9), Mbappe (86) — Kukurelya (31).

Source link

Bellinghemda Maradonaning natijasini yaxshilash imkoni bor.

14 va 15 iyul kunlari 2026 yilgi jahon chempionatida yarimfinal uchrashuvlari bo‘lib o‘tadi. FIFA reytingida yuqori to‘rt o‘rinni egallab turgan jamoalar ushbu bosqichdagi juftliklarni hosil qilishdi: Fransiya (uchinchi o‘rin) – Ispaniya (ikkinchi) va Angliya (to‘rtinchi) – Argentina (birinchi). 2025 yil noyabrida kiritilgan yangilik buni ta’minladi. O‘shanda FIFA o‘z reytingidagi eng yuqori to‘rt o‘rinni egallab turgan jamoalar o‘z guruhlarida birinchi o‘rinlarni olib chiqadigan bo‘lsa, pley-offning turli setkalarida joylashishini ma’lum qilgandi. Amalda ham shunday bo‘ldi va bu to‘rt jamoa yarimfinalga qadar o‘zaro uchrashmadi. Endi muxlislarni intrigaga boy o‘yinlar kutmoqda. Bu jamoalar qanday syujyetlar tayyorlab qo‘ygan bo‘lishi mumkin?

Fransiya Yevro-2024 yarimfinali uchun revansh oladimi?

Ispanlar va fransuzlar Yevro-2024 yarimfinalida ham to‘qnashgandi. O‘shanda Luis de la Fuente shogirdlari g‘alaba qozongan (2:1), finalda ham Angliyani mag‘lub etib, qit’a chempioniga aylangandi. E’tiborli jihati, o‘sha o‘yindagi uchta gol ham 25-daqiqaga qadar urib bo‘lingandi. Avvaliga Randal Kolo Muani fransuzlarni hisobda oldinga olib chiqqan, bunga raqib Lamin Yamal va Dani Olmoning gollari bilan javob qaytargandi. Ispanlar kambek amalga oshirishi uchun to‘rt daqiqa yetarli bo‘lgandi. Bu safar fransuzlar revansh olmoqchi va buning uchun yaxshi imkoniyatga ega.

Mbappe JChdagi gollar soni bo‘yicha Messiga yetib oladimi?

Lionel Messi jahon chempionatlarida eng ko‘p gol urgan futbolchi bo‘lib turibdi. Argentinalik hujumchi oltita turnirda jami 21 gol urgan, ammo ertami kechmi uni Kilian Mbappe ortda qoldirishi aniq. Fransuz futbolchisi undan 12 yoshga kichikroq va yana kamida bitta jahon chempionatiga boradi. Agar jarohat olib, formasini yo‘qotmaydigan bo‘lsa, bu raqam ikkitaga oshishi ham mumkin. Shu bilan birga, Mbappeda hozirning o‘zida Leoga yetib olish imkoni bor. Ispaniyaga qarshi o‘yinda gol uradigan bo‘lsa, uning gollari soni ham 21 taga yetadi. Mbappe Ispaniyaga qarshi to‘rt marta o‘ynagan va ikki gol urgan.

Fransiya qatorasiga uchinchi finalga chiqadimi? Yoki Ispaniyada tarixdagi ikkinchi final bo‘ladimi?

Bunga ishonish qiyin, ammo Ispaniya jahon chempionatlarida atigi bir marta finalda o‘ynagan. 2010 yilda JARda bo‘lib o‘tgan turnirda ispanlar oltin medallarni qo‘lga kiritgandi. Fransiyaning JCh finallariga chiqishi esa, odatiy holatga aylanib bormoqda. Dide Desham shogirdlari Rossiyadagi mundialda ham, Qatardagisida ham bosh sovrin uchun hal qiluvchi o‘yinda maydonga tushgandi. Fransuzlar «Lujniki»da oltin medallarni o‘ziniki qilgan, ammo arablar diyorida kumush bilan kifoyalangan. Muhim nyuans: faqat ikki jamoa JChda qatorasiga uch finalda o‘ynagan. GFR 1982, 1986 va 1990 yillarda, brazillar esa – 1994, 1998 va 2002 yillarda shu bosqichgacha yetib kelgan.

De la Fuente pley-offlardagi seriyasini davom ettiradimi? (u JCh va Yevroda jami 13 ta mag‘lubiyatsiz seriyaga ega)

Luis de la Fuente Ispaniya milliy jamoasini 2023 yil boshida qabul qilib olgandi. O‘shandan buyon «Qizil furiya» muhim turnirlarda biror marta mag‘lub bo‘lmadi. 2024 yilgi Yevropa chempionatida ispanlar guruhda uch, pley-offda to‘rt o‘yinda g‘alaba qozongandi. Shimoliy Amerikada o‘tayotgan jahon chempionatida faqat Kabo-Verde guruh bosqichida Ispaniyadan ochko ololdi (0:0). Pley-offda de la Fuente shogirdlari uchta o‘yinda ham asosiy vaqtda g‘alaba qozondi. Yakun: YeCh va JChda 13 o‘yin, 12 g‘alaba, bitta durang. Fransuzlar raqibning ajoyib seriyasiga yakun yasay oladimi?

Ispaniya darvozasida kim turadi?

Ispanlarda darvozabonlar bilan g‘aroyib holat kuzatilmoqda. David Rayya va Joan Garsiya – klublar miqyosida top darajadagi darvozabonlar hisoblanadi. Ammo ularning ikkisi ham Ispaniya milliy jamoasi o‘yinlarida zaxirada o‘tiribdi. De la Fuente «Atletik» bilan o‘rtacha mavsum o‘tkazgan Unai Simonga ishonch bildirmoqda. Ushbu darvozabon bu turnirda atigi bitta gol o‘tkazdi va quruq seriya bo‘yicha rekord o‘rnatdi. Lekin o‘tgan o‘yinlarda uning darvozasiga jiddiy xavf ham bo‘lmadi (jami 6 o‘yinda u atigi 5 ta seyv ijro etishiga to‘g‘ri kelgan), qolaversa, u ba’zida (ayniqsa, Belgiya bilan o‘yinda) o‘zini ishonchsiz tutib, ispaniyalik muxlislarni hayajonga solmoqda. Endi muxlislar undan kuchliroq raqiblarga qarshi boshqa darvozabonni tushirishini xohlashmoqda. Murabbiy ularga quloq soladimi yoki o‘z tanlovida qoladimi?

Ispaniyaning elita mudofaasi Mbappe, Dembele va Oliseni to‘xtata oladimi?

Fransuzlar hujum chizig‘ida elita guruhga ega. Mbappe jahon chempionatining eng yaxshi to‘purari bo‘lishga da’vogar, Maykl Olise turnirning eng yaxshi assistentlari ro‘yxatini boshqarmoqda (beshta golli uzatma), Usmon Dembele esa «gol+pas» uchinchi o‘rinda (7 ochko). Ispaniya milliy jamoasi qarshisida o‘ta qiyin vazifa turibdi – ushbu top futbolchilarni to‘xtatish. De la Fuente shogirdlari butun turnir davomida atigi bitta gol o‘tkazib yuborgan, ammo fransuzlar deyarli har o‘yinda kamida ikkita gol urmoqda. Faqat Paragvayga qarshi o‘yin bundan mustasno (1:0).

Angliya 60 yil ichida ilk bor JCh finaliga chiqadimi? Yoki Argentina qatorasiga ikki chempionlik uchun yaqinlashadimi?

Angliya milliy jamoasi 1966 yildan buyon jahon chempioni bo‘lmagan. Bundan tashqari, futbol vatani jamoasi 60 yildan buyon finalda ham o‘ynamagan. 1990 va 2018 yillarda inglizlar final ostonasida to‘xtagandi. Jamoa bu turnirda omadsiz seriyasiga barham bera oladimi? E’tiborli jihati, Angliya bu safar ilk bor Yevropadan tashqaridagi turnirda yarimfinalgacha yetib kela oldi. Bungacha jamoa faqat Angliya, Italiya va Rossiyada o‘tgan turnirlarda oxirgi to‘rtlikka kira olgan. Argentinaliklar esa, o‘z navbatida jahon chempioni maqomini saqlab qolishga harakat qilmoqda. 1962 yildan buyon hech bir jamoaga jahon chempionatida qatorasiga ikki bor g‘olib bo‘lish nasib etmagan. O‘shanda bu ishni brazillar uddalashgandi. Endi Janubiy Amerikaning boshqa bir jamoasida bu tryukni takrorlash imkoniyati bor.

Skaloni Yevropa jamoalariga qarshi seriyasini davom ettiradimi? (mag‘lubiyatsiz 10 o‘yin)

Argentina milliy jamoasi Lionel Skaloni boshqaruvida Yevropa jamoalariga mag‘lub bo‘lmagan. Bu hayratlanarli seriya yetti yildan buyon davom etmoqda. Qatardagi mandialda argentinaliklar Polsha, Niderlandiya, Xorvatiya va Fransiyani, bu safargisida – Avstriya va Shveytsariyani mag‘lub etdi. O‘rtoqlik uchrashuvlarida estonlar va islandlar, Finalissimada Italiya ham mag‘lub etilgan. Va faqat 2019 yil oktyabrida nemislar o‘rtoqlik uchrashuvida Argentina bilan durang o‘ynagan. Inglizlarni xavotirga solishi mumkin bo‘lgan statistika. Lekin Angliyada Skaloni shogirdlarining seriyasiga barham berish uchun imkoniyat yetarli.

Bellinghem Maradonaning rekordini yo‘qqa chiqaradimi? (ularning ikkisi ham JCh pley-offlarida qatorasiga ikki o‘yinda 2+ gol urishgan)

Jud Bellinghem buyuk Diyego Maradona bilan bir qatorda. 1986 yilda argentinalik ushbu futbolchi jahon chempionati pley-offida qatorasiga ikki o‘yinda ikkitadan gol urgandi. Angliyalik yarimhimoyachi 40 yil o‘tib bu natijani takrorladi. Agar Bellinghem argentinaliklar darvozasiga ham ikki gol uradigan bo‘lsa, eksklyuziv rekord sohibiga aylanadi. Lekin bunga erishish oson emas. Boshqa tomondan, Jud hozirda juda ajoyib formada. Unda Maradonaning rekordini Argentina bilan o‘yinda ortda qoldirish imkoni yuzaga kelgan.

Messi Angliyaga qarshi ilk o‘yinida gol uradimi?

Bu fakt ko‘pchilikni ajablantirishi mumkin, lekin Lionel Messi bunga qadar biror marta Angliya milliy jamoasiga qarshi o‘ynamagan. Bu jamoalar 2002 yildan buyon jahon chempionatlarida bir-biriga ro‘baru kelmagan. Bundan tashqari, Messi hech qachon JCh «Oltin butsa»sini qo‘lga kiritmagan, ammo hozir Mbappe bilan turnirning eng yaxshi to‘purari maqomi uchun shiddatli kurash olib bormoqda. Leo chorakfinalda to‘xtadi va JCh-2026 o‘yinida ilk bor gol urolmadi. Uni inglizlar ham zararsizlantiradimi? Yoki u yana gollari sonini oshirib oladimi?

Qaysi final takrorlanadi: JCh-2022 yoki Yevro-2024?

Asosiy intriga: finalchilar juftligi qanday ko‘rinishda bo‘ladi? Bunda to‘rt variant bor. Agar finalga Fransiya va Argentina yo‘l olsa, muxlislarni JCh-2022 finali remeyki kutadi. Yarimfinallarda Ispaniya va Angliya g‘alaba qozonadigan bo‘lsa, Yevro-2024 finali takrorlanadi. Shuningdek, Ispaniya va Argentina juftligi ham amalga oshmagan Finalissimani taqdim etishi mumkin – o‘tgan yili Yevropa va Janubiy Amerika chempionlari uchrashishi kerak edi, ammo bu o‘yin Yaqin Sharqdagi mojaro tufayli bekor qilingandi (o‘yinni Saudiyada o‘tkazish mo‘ljallangandi). Endi bu jamoalar jahon chempionati finalida o‘sha o‘yin uchun ham o‘ynab qo‘yishi mumkin.

Source link

Fransiya – Ispaniya

Jahon chempionati. 1/2 final

15 iyulga o‘tar kechasi, 00:00. AT&T Stadium (Arlington)

Bugun tunda jahon chempionatida finalning ilk ishtirokchisi aniqlanadi. Himoyasi kuchli Ispaniya hujumga urg‘u qaratgan Fransiyaga qarshi. «Chempionat» kolumnisti Dmitriy Bajanov JCh-2026 yarimfinalidagi birinchi juftlik o‘yini uchun prevyu tayyorladi.

Fransiya va Ispaniya qatorasiga ikkinchi yirik turnirda to‘qnashmoqda. Va bu safar ham – yarimfinalda. 2024 yilgi Yevropa chempionatida ispanlarning yosh avlodi haqiqiy kashfiyotga aylangan, qanotlardagi Lamin Yamal va Niko Uilyamsning harakatlari jamoa o‘yinidagi yorqinlik, dadillik va shijoatni ta’minlagandi. Fransuzlar esa aksincha, ortiqcha pragmatizm bilan hafsalani pir qilgandi. Dide Desham tanlagan o‘yin uslubi uchun turnir davomida kuchli tanqidga uchragan. Faqat natija ko‘rsatish orqaligina bu tanqidlardan himoyalanish mumkin edi.

Yakunda Lamin Yamal o‘zining mo‘jizaviy golini urgan o‘yinda Ispaniya g‘olib chiqadi (2:1). O‘shanda Dani Karvahal yo‘qligi (u chorakfinalda qizil kartochka olgani uchun diskvalifikatsiyaga uchragandi) ham ispanlar g‘alabasiga xalal bermagandi. O‘ng qanot himoyasiga uning o‘rniga faoliyatini yakunlash arafasida turgan faxriy futbolchi Xesus Navas tushirilgandi. Ikkinchi bo‘limda esa Navasning o‘rnini nominal markaziy himoyachi Dani Vivyan egallagandi. Mbappe boshchiligidagi hujum chizig‘ini to‘xtatish qiyin bo‘lgandi, ammo ular uddalashgandi.

Keyinroq, 2025 yilda, Fransiya va Ispaniya o‘rtasida yana bir yarimfinal o‘yini bo‘lib o‘tadi – bu safar Millatlar Ligasida. Bu uchrashuvda ispanlar haqiqiy karnaval uyushtirib, 5:4 hisobida g‘alaba qozongandi. Hisobga qarab, fransuzlar tengma-teng o‘yin ko‘rsatganini aytish mumkin. Ammo amalda Luis de la Fuente shogirdlari bu safar ham yorqin o‘yin ko‘rsatib, ikkinchi bo‘lim boshlaridayoq 4:0 hisobida oldinga chiqib olishgan, 80-daqiqagacha 5:1 hisobida oldinda borishgandi. O‘yin oxirida haddan tashqari xotirjamlikka berilib, fransuzlar oradagi farqni minimal darajada qisqartirishiga imkon berishadi, ammo g‘alabani saqlab qolishadi.

Hozir, jahon chempionatida jamoalar o‘yin uslubi borasida rollarni almashib olishgan. Ispaniya Yevro-2024 yoki Millatlar Ligasidagi kabi hujumkor o‘ynamayapti. Fransiya esa, aksincha, Desham boshqaruvi davridagi eng yorqin futbolini namoyish etmoqda.

Millatlar Ligasidagi so‘nggi o‘yinda Maykl Olise safda edi. Ammo asosiy jamoaga chaqirilganiga ko‘p vaqt bo‘lmagandi. Bu vaqtga kelib u «Bavariya»da bir mavsum o‘tkazgan va endigina katta yulduz rolini o‘zlashtirayotgandi.

Hozir esa Oliseni fransuzlar Messisi deyish mumkin. 1-turda Senegalga qarshi kechgan o‘yinning birinchi bo‘limida fransuzlar hech narsa qila olishmadi, tanaffusda Desham uni o‘ng qanotdan markazga ko‘chirdi va ishlar yurishib ketdi. Shundan keyin jamoa shu sxemani saqlab qolmoqda: Mbappe – oldinda, Usmon Dembele hujumning o‘ng qanotida, chap qanotda Dezire Due yoki Bredli Barkolya, «o‘nlik» pozitsiyasi esa Olisega topshirilgan.

Aytish mumkinki, Fransiyada nolinchi yillardan buyon bu qadar kuchli jamoa (ham tarkib, ham o‘yin uslubi borasida) bo‘lmagandi. Tarkib borasida esa ushbu jamoa tarixdagi eng kuchlisi ham bo‘lishi mumkin. O‘yinga keladigan bo‘lsa, endi fransuzlar yo‘lidan chiqqan raqibni shunchaki olib tashlash bilan cheklanmayapti, ular buni juda chiroyli tarzda amalga oshirmoqda.

Hatto hozirgi Fransiya – futbol tarixidagi eng kuchli jamoa ekani haqidagi fikrlar ham yangramoqda. Gap fransuz futboli tarixidagi emas, butun futbol tarixidagi eng kuchli jamoa bo‘lish haqida ketmoqda. Bunday xulosaga kelishga hali erta. Buni tasdiqlash uchun avvalo titul qo‘lga kiritish talab etiladi. Ammo hozirgi Fransiyada ulug‘vorlik da’vosi uchun tituldan boshqa hamma narsa bor. Va sovrin ham paydo bo‘lishi mumkin. Buning uchun atigi ikki qadam qolgan.

Yarimfinalda fransuzlarni Ispaniya kutmoqda, lekin bu jamoa 2024 yilgi Yevropa chempionati va 2025 yilgi Millatlar ligasidagi jamoa bilan solishtirganda biroz kuchsizlashgan. Ikki yil oldin bu jamoa oltindek yaraqlayotgandi, hozir esa biroz xiralashgan. Niko Uilyams jahon chempionatiga jarohat bilan keldi, qolaversa, u «Atletik»da ham kuchli mavsum o‘tkaza olmadi. U Yevropa chempionatidagi kabi o‘yin ko‘rsatish holatida emasdi. De la Fuenteda esa bu pozitsiya uchun shu darajadagi futbolchi yo‘q. Hujumning o‘ng qanoti egasi bo‘lgan Yamal ham JCh arafasida jarohat oldi va formasini turnir davomida tiklashiga to‘g‘ri keldi.

Aynan qanotlar Ispaniyaning Yevrodagi yorqin o‘yinlarining asosiy manbayi bo‘lgandi. O‘yin maydon markazidan qurilgan, qanotlar esa tezkorlik qo‘shgan, o‘yinni shiddat va dinamika bilan to‘ldirgan. Yamal eng yaxshi formasida bo‘lmasa-da, hozir ham shularning barchasini berishga harakat qilmoqda. Uilyamsning o‘rnida esa Aleks Baena o‘ynamoqda. U himoyachilar ortida o‘zini taklif etadigan, driblinglari bilan raqiblarni shoshirib qo‘yadigan futbolchi emas. Baena – paslar bilan xotirjam o‘ynaydigan futbolchidir. U to‘pni o‘yinga kiritishda faol ishtirok etadi, ammo raqib himoya chizig‘ida yong‘in keltirib chiqara olmaydi.

Hozirgi Ispaniya qaysidir jihatdan 2010 va 2012 yillardagi jamoani eslatadi. Gap tarkiblar darajasi haqida emas, balki o‘yin uslublari haqida bormoqda. De la Fuente jamoasi ham Visente del Boskening «yengilmas armadasi» kabi to‘pni nazorat qilib raqibni qiynaydi va hech qayerga shoshilmaydi: raqib mudofaasini yorib o‘tib bo‘lmayaptimi? Hechqisi yo‘q, biz to‘pni ushlab turamiz va bo‘sh zona paydo bo‘lishini kutamiz.

Hozirgi Ispaniya yorqin o‘yin ko‘rsatmaydi. Saudiya Arabistoni 4:0, Avstriya 3:0 hisobida mag‘lub etilganini bu fikrning aksi sifatida misol qilish mumkin, ammo bu yerda raqiblar darajasini ham inobatga olish lozim. Avstriyaliklar, saudiyaliklarga qaraganda yaxshiroq, ammo Ispaniya bilan o‘yinda Ralf Rangnik shogirdlari umuman o‘ziga o‘xshamadi. De la Fuentening yigitlari esa, aksincha, o‘sha kuni turnirdagi eng kuchli o‘yinini o‘tkazdi.

Shu bilan birga, Kabo-Verdega qarshi o‘yinda ispanlar gol urolmagan (0:0), Urugvay, Portugaliya va Belgiyani esa minimal hisoblarda yenga olgandi. De la Fuente jamoasi raqibning chuqur va tig‘iz himoyasini yorib o‘tishda qiynaladi. Shu bilan birga, jamoa butun turnir davomida atigi bitta gol o‘tkazdi, Unai Simon JChda «quruq» daqiqalar bilan rekord o‘rnatdi. Bu esa Ispaniya himoya chizig‘i raqiblar qarshi hujumga chiqishga deyarli yo‘l qo‘ymaganini anglatadi.

Shu bilan birga, Belgiya bilan o‘yinning ikkinchi bo‘limi alohida olinsa – u yerda ispanlar himoyalanishga ham majbur bo‘ldi. Bunday pallalar ko‘p bo‘lmadi, ammo nima bo‘lganda ham de la Fuente jamoasi noqulaylik his qildi. Agar Belgiyaning omadi kelganida, qarshi hujumlardan birini gol bilan yakunlashi mumkin edi. Va u holda bugun tunda Fransiyaning yarimfinaldagi raqibi butunlay boshqa jamoa bo‘lardi.

Ispaniya qanday o‘ynashi – ma’lum. Jamoa faqat to‘p nazoratiga urg‘u qaratadi. Raqib kim bo‘lishining ispanlarga farqi yo‘q. Bu jamoaning o‘z falsafasi bor va undan ortga chekinmaydi. Fransiya qanday o‘ynashi esa savol ostida. Ular istalgan uslubda o‘ynashga qodir. Agar xohlashsa, Ispaniyaning o‘rniga to‘pni nazorat qilish bilan mashg‘ul bo‘lishi mumkin. Ammo baribir, ehtimoli yuqori variant, bu o‘yinda ham ispanlar to‘pga egalik qiladi, Mbappe, Olise, Dembele va Due/Barkolya esa imkon tug‘ilishi bilan o‘qdek oldinga uchishadi.

Ispaniya JChda hali bu darajadagi hujum chizig‘iga, xususan, bunday qarshi hujum salohiyatiga ega jamoa bilan to‘qnashmagandi. De la Fuente jamoasi to‘pga uzoq vaqt egalik qilishi mumkin, ammo qachondir to‘p raqibga o‘tadi va shundan keyin Fransiyaning vaqti boshlanadi. Bu jamoa oldingi chiziqda yuqori saviyali ijrochilarga ega, ularga esa o‘yin taqdirini hal qilish uchun bir necha vaziyatning o‘zi yetarli.

Shu bilan birga, Fransiyada ham bungacha o‘z o‘yinini juda yaxshi yo‘lga qo‘yib olgan va o‘z yo‘lidan umuman og‘ishmaydigan raqib bo‘lmagan. Ispanlar uchun raqib bo‘lishining ahamiyati yo‘q. Ular odatdagidek o‘ynashadi. Bir tomondan, bu Fransiya uchun afzallik. Nimani kutish kerakligi aniq bo‘ladi. Boshqa tomondan, ispanlar buni juda yaxshi uddalayotgani uchun ham o‘z uslubidan chekinmaydi. Ispaniya qanday o‘ynashini hamma biladi – lekin hali hech kim ularni mag‘lub eta olgani yo‘q. Nima bo‘lganda ham, olti o‘yinda atigi bitta gol o‘tkazib yuborish – bu juda yaxshi natija.

Fransuzlar ham ko‘p gol o‘tkazgani yo‘q. Turnir startida, hali turnirga moslashmagan holatida Senegal bilan o‘yinda bitta, guruh bosqichining uchinchi turida, natijasi ahamiyatsiz bo‘lgan Norvegiyaga qarshi o‘yinda yana bitta.

Fransiya va Ispaniya qarama-qarshiligida kim birinchi bo‘lib gol urishi muhim. Bu har qanday o‘yinda ham muhim masala. Ammo darajasiga ko‘ra bir-biriga juda yaqin bo‘lgan ikki jamoa jahon chempionati yarimfinalida o‘ynaganida, har bir detalning ahamiyati bir necha barobar ortadi. Bunday o‘yinlarda arzimas narsaning o‘zi bo‘lmaydi. Hammasi muhim.

Fransuzlarda hozircha faqat hujumchilar gol urishmoqda. Olise esa ularni golli uzatmalar bilan ta’minlamoqda. Ispanlarda esa har bir o‘yinda alohida bir futbolchi o‘zini ko‘rsatmoqda. Pley-offda zaxira futbolchisi Mikel Merino qahramonga aylandi. Asli pozitsiyasi tayanch yarimhimoyachisi bo‘lgan bu futbolchi Portugaliya va Ispaniyaga qarshi o‘yinlarda zaxiradan tushib, so‘nggi daqiqalarda o‘yinni hal qildi.

Merino bu ishni Yevro-2024 chorakfinalida Germaniya bilan o‘yinda boshlagandi. Ispanlar uning qo‘shimcha bo‘limlardagi goli evaziga g‘alaba qozongan, keyin esa yuqorida eslangan Fransiyaga qarshi yarimfinal o‘yinini o‘tkazgandi. Keyin esa finalda inglizlar mag‘lub etilib, Yevropa chempionati g‘olibligi qo‘lga kiritilgan.

Ammo hozir – boshqa tarix. Yana yarimfinal, ammo – boshqa turnir, boshqa Ispaniya va boshqa Fransiya.

Source link