Jamiyat
G‘ijduvon hokimidan MSK raisigacha – kiberfiribgarlar kimlarni qanday chuv tushirgan?
2025 yil 3 dekabr. G‘ijduvon tumani hokimi Farhod Umarov Telegram orqali tanishlariga qarz so‘rab “yoza boshladi”. Xabar shaxsiy profildan kelmaganmi, ko‘plab tashkilot rahbarlari hokimbuvaga yordamga shoshildi: taqdim etilgan bank kartasiga bir necha soatda 80 mln so‘mdan ortiq pul o‘tkazmalari kelib tushdi.
“Maxfiy topshiriq”
So‘nggi vaqtlarda turli vazirlik va qo‘mita matbuot xizmatlari rahbar nomidan tizimda faoliyat yuritayotgan mas’ul xodimlarga maxfiy topshiriq borayotgani, bunga ishonmaslik haqida ogohlantirish bilan chiqa boshladi.
Masalan, Bojxona qo‘mitasi raisi nomidan tizimda faoliyat yuritayotgan mas’ul xodimlarga Telegram orqali “yaqin vaqt ichida Korrupsiyaga qarshi kurashish agentligi tergovchisi Dilnoza Yo‘ldosheva bog‘lanib, bir qator savollar berishi va muammoning mohiyatini batafsil tushuntirishi” haqida topshiriq borgan.
Qo‘mita matbuot xizmati ogohlantirish bilan chiqib, qo‘mita raisi nomidan ochilgan soxta akkauntlardan murojaat bo‘lganida ishonib qolmaslikni so‘ragan.
Sport vazirligi, Fanlar akademiyasi va boshqa tashkilotlar matbuot xizmatlari ham shunday ogohlantirish bilan chiqqan.
“Hududiy elektr tarmoqlari” AJ boshqaruvi raisi Asrorjon Asqarov nomidan ham tizimida faoliyat yuritayotgan mas’ul xodimlarga maxfiy topshiriq borgan. Unda “yaqin vaqt ichida DXX xodimi Belbekov Jandos bog‘lanib, bir qator savollar berishi” aytilgan.
Sxema qanday ishlaydi?
“Jandos Belbekov” va boshqa shu kabi navbatchi ismlar bilan bog‘liq kiberfiribgarlikka ko‘plar chuv tushgan. Bu sxema qanday ishlashini bir holat misolida keltiramiz.
2025 yil 1 dekabr kuni Telegram orqali O‘zbekiston Markaziy saylov komissiyasi raisi Zayniddin Nizomxo‘jayev nomidan Buxoro viloyati hududiy saylov komissiyasi raisi o‘rinbosari lavozimida ishlovchi Rohilaxon Otayevaga maxfiy topshiriq borgan.
Topshiriqda shunday deyilgan:
“Rohilaxon Mavlonovna, hozirda tashkilotimizda xodimlarning shaxsiy ma’lumotlari noqonuniy tarqatilishi bilan bog‘liq ichki tekshiruv o‘tkazilmoqda. Yaqin vaqt ichida siz bilan DXX xodimi Tolganoy Erjanova bog‘lanib, jamoa haqida bir qator savollar beradi va muammo mohiyatini batafsil tushuntiradi.
Ushbu ma’lumot qat’iy maxfiy hisoblanadi. Iltimos, tekshiruv jarayoni va mazkur xabar mazmunini hech kimga, jumladan, hamkasblaringizga ham oshkor etmang. Hamkorligingiz va professionalligingiz uchun rahmat. Hurmat bilan Zayniddin Nizomxo‘jayev”.
Rohilaxon Otayeva hayron qolgan. Chunki Markaziy saylov komissiyasi raisi hududiy saylov komissiyalari xodimlariga bu shaklda to‘g‘ridan to‘g‘ri topshiriq bermasdi. Otayeva holatga ishonish yoki ishonmaslik masalasida ikkilanib turgan bir vaqtda unga notanish raqamdan qo‘ng‘iroq bo‘lgan. Raqam egasi o‘zini DXX xodimasi mayor Erjanova deb tanishtirgan. U Markaziy saylov komissiyasi raisi bilan bog‘lanib, ayrim savollariga javob berish bo‘yicha ruxsat olganini aytgan. So‘ngra Telegram orqali qo‘ng‘iroq qilishini aytib, go‘shakni qo‘ygan.
Oradan ko‘p o‘tmay Rohilaxon Otayevaga Telegram orqali “Erjanova” nomli profildan dumaloq video kelib tushgan. Videoda xizmat kiyimidagi ayol xizmat guvohnomasini ochib ko‘rsatgani aks etgandi. “Erjanova” Otayeva bilan rus tilida gaplashgan. Buni “Moskva davlat xavfsizligi xizmati bilan hamkorlikda ish olib borayotgani sababli rus tilida gapirishga majbur bo‘layotgani” bilan izohlagan. Biroq Otayeva unga ishonmasdan, qo‘ng‘iroqni o‘chirgan.
Oradan 15 daqiqa o‘tib, “Ahmedov” nomli profildan qo‘ng‘iroq bo‘lgan. Otayeva unga ham javob bermagan. Shundan so‘ng “Zayniddin Nizomxo‘jayev” nomli profildan DXX tomonidan yuborilgani haqidagi xabarnomaning PDF formati kelgan. Unga “DXX xodimlari gaplashmoqchi ekani, ularning qo‘ng‘iroqlariga javob berishi kerakligi” haqidagi topshiriq ham qo‘shimcha qilingandi.
Shundan so‘ng “Ahmedov” nomli profil yana aloqaga chiqqan. Avvaliga o‘zbek, keyin rus tilida gapirgan erkak o‘zini Markaziy bank yuristi Dmitriy Axmedov deb tanishtirgan.
“Sizning nomingizga 6 ta bankdan 400 mln so‘mdan ortiq kredit olingan. Shu pullar Rossiya davlatiga chiqib ketgan. Bu mablag‘lar terroristik tashkilotlarni moliyalashtirishga yo‘naltirilgan bo‘lishi mumkin. Holatga aniqlik kiritish uchun siz bilan bog‘landim. Shuning uchun siz ularning savoliga javob berishingiz kerak”, degan “Ahmedov”.
Otayeva bu harakatlar kiberfiribgarlar nayrangi ekanini tushunib yetgan va telefonni o‘chirgan. Qayta qilingan qo‘ng‘iroqlarga esa javob bermagan. Oradan ma’lum vaqt o‘tib, unga Telegram’ida “Markaziy bank” boti paydo bo‘lgan. Botdan uning nomiga ajratilgan 6 ta kredit rekvizitlari PDF shaklda jo‘natilgan.
Oradan bir kun o‘tib, bosimlar to‘xtagan hamda yozishmalar o‘chib ketgan. Shu payt Rohilaxon Otayevaning telefoni bir muddat go‘yo bloklangan kabi qotib qolgan.
Agar katta miqdorda onlayn kredit rasmiylashtirsa, kimlardir nomiga kredit olmoqchi bo‘lganda berilmasligini o‘ylagan Otayeva banklardan birining ilovasini yuklab olgan. So‘ngra o‘z nomiga 98,2 mln so‘m onlayn kredit rasmiylashtirgan. Bu orada telefoni yana yaxshi ishlamay qolgan. Ma’lum muddatdan so‘ng olgan krediti Farhod Hamidov nomidagi bank kartasiga o‘tkazib olingan.
Kiberfiribgarlar PDF shaklda hujjat jo‘natganda Rohilaxon Otayevaning telefon boshqaruvini qo‘lga kiritishgandi.
“Puli qolmagan” hokim
2025 yil 3 dekabr kuni ayni shu kiberfiribgarlar Buxoro viloyati G‘ijduvon tumani hokimi Farhod Umarovning Telegram profilini egallab olishgan. Buni hokimga “Samaya luchshaya mama” nomli maxsus virus dasturini jo‘natish orqali amalga oshirishgan. Dasturdagi havolaga kirib ko‘rgan Farhod Umarov o‘zi bilmagan holda profil boshqaruvini kiberfiribgarlar qo‘liga tutqazgan.
Shundan so‘ng hokim nomidan uning tanishlariga “Assalomu alaykum, 7 mln so‘m berib turasanmi, ertaga soat 10:00 gacha qaytarib beraman” mazmunida qarz so‘ralgan xabar jo‘natilgan. Ushbu xabarga o‘ndan ortiq odam aldangan.
Jumladan, Vobkent tumani hokimi yordamchisi, Buxoro viloyati G‘aznachilik xizmati boshqarmasi bosh mutaxassisi, G‘ijduvon tuman Erkin iqtisodiy zona direktori, hududdagi MChJlardan birining rahbari, G‘ijduvon tuman Yoshlar ishlari bo‘limi, Kadastr agentligi G‘ijduvon tuman bo‘limi boshliqlari va boshqalar taqdim qilingan bank kartalariga jami 80 mln so‘mdan ortiq pul mablag‘larini o‘tkazib berishgan.
Farhod Umarov Telegram akkaunti qanday qilib o‘zlashtirilganidan xabari yo‘qligini aytgan.
“Xabarni o‘qiganimda u haqiqatan ham Farhod Umarovdan kelgan deb ishondim. Chunki menga aynan Umarovning profilidan yozildi. O‘rtamizda ishonchli munosabatlar borligi sababli unga 7 mln so‘m o‘tkazib berdim. Oradan ko‘p vaqt o‘tmay Farhod Umarovning profilidan yana bank kartasi tashlab berildi va “Bu yerga yana 7 mln so‘m yuborishingiz mumkinmi?” mazmunida xabar keldi. Buni ko‘rib shubhalandim. Sababi, birinchi xabar kirill, ikkinchisi esa lotin alifbosida edi”, degan jabrlanuvchilardan biri.
Farhod Umarov nomidan so‘ralgan pullar xorazmlik Elyor Otaboyev, Hamdam Qadamov, Samarqand shahrida yashovchi Dildora Qurbonova, Maftuna Vohidova, Mirjalol Ahmedov va boshqalar nomidagi bank kartalariga o‘tkazilgan.
“Drop” karta
Kiberfiribgarlar birovlarning nomidagi bank kartalarini qanday qo‘lga kiritishgan? Albatta, pul evaziga ularning o‘zlariga ochtirib olishgan. Bunday bank kartalari “Drop” kartalar deb ataladi.
Masalan, yuqoridagi holatda Dildora Qurbonova, Maftuna Vohidova, Iroda Tolipova, Amir Murodov, Farhod Hamidov va boshqalar o‘zlari bankka borib, nomlariga 10 tadan karta ochishgan. So‘ngra ularni kiberfiribgarlar qo‘liga tutqazishgan. Rossiya fuqarosi Ivan Kornilov ularning har biriga bu “xizmati” uchun 300 dollardan to‘lab bergan. So‘ngra ushbu bank kartalari pul o‘tkazmalarni amalga oshirish uchun turli ilovalarga ulangan.
Fuqarolar o‘z nomlariga ochilgan bank kartalari orqali jinoiy yo‘l bilan topilgan pul mablag‘lari aylanishidan bexabar bo‘lgan. Ularga ushbu bank kartalari totalizator sayti orqali pul yechishga kerakligi, tushadigan pul miqdori juda ko‘pligi sababli o‘zlarining nomidagi karta limiti tugab, blokka tushib qolgani aytilgan.
Ivan Kornilov kim?
Kun.uz ushbu holatlarga aloqador jinoyat ishi hujjatlari bilan tanishdi. Unda sxema tashkilotchilari sifatida Ivan Kornilov va Yegor Kuznetsov ismlari keltirilgan. Ular Rossiya fuqarosi bo‘lgan.
Samarqandlik 26 yoshli A.I. 2025 yil 18 avgustda Moskva shahridan Samarqandga qaytayotganida samolyotda Ivan Kornilov ismli shaxs bilan tanishib qolgan. Ivan Kornilov 1 oy davomida Samarqand shahrida bo‘lgan. Bu vaqtda A.I. uni shaharning turistik hududlari bilan tanishtirib turgan.
“Bir oydan so‘ng Kornilov Rossiyaga qaytib ketdi. Ketishidan avval keyinchalik xabarlashib turishimiz uchun telefon raqam almashdik.
Oradan taxminan ikki haftacha o‘tgach, Kornilov menga kriptovaluta ayirboshlash faoliyati bilan shug‘ullanadigan shaxs kerak ekani haqida yozib qoldi. Shu payt yonimda bo‘lgan do‘stim suhbatga qo‘shilib, shunday tanishlari borligini ma’lum qildi.
Shundan so‘ng Ivan Kornilov Yegor Kuznetsov ismli shaxs bilan birga Samarqand shahriga uchib keldi. Ikki o‘rtog‘im bilan ularni kutib oldik. Ular ikki hafta Samarqandda bo‘lishdi Bu vaqtda menga ish taklif qilishdi. Ular onlayn qimor saytlariga pul o‘tkazish bilan shug‘ullanishini, buning uchun “Drop” karta ochish kerakligini aytishdi”, degan A.I. suddagi ko‘rsatmasida.
Taklif etilgan ish shunday bo‘lgan: birov “Drop” kartalarga tushgan pullarni bankomat orqali naqdlashtirib, ikkinchi odamga topshiradi. Ikkinchi odam naqdlashtirilgan pullarni kriptovalutaga ayirboshlab, Ivan Kornilov va Yegor Kuznetsovga o‘tkazib beradi.
Amaldorlar nomidan qarz so‘rab o‘marilgan yoki “Jandos Belbekov” nomi bilan onlayn kredit oldirish orqali o‘zlashtirilgan pullar ana shu “Drop” kartalarga kelib tushgan. Amaldorlarning Telegram profillarini buzib kirish yoki SIP raqamlar orqali qo‘ng‘iroq qilib, o‘zini DXX xodimi sifatida tanishtirish ishlarini Yegor Kuznetsov amalga oshirgan.
Jazo
Ushbu holatlar huquqni muhofaza qiluvchi organlar xodimlari tomonidan aniqlanib, gumondorlar ushlangan. Ularga nisbatan alohida ish yurituviga ajratilgan holda bir nechta jinoyat ishi qo‘zg‘atilgan.
Ishning A.I.ga oid qismi sudda ko‘rib chiqilib, 15 iyun kuni hukm o‘qildi. U 17 ta epizod (jumladan, G‘ijduvon tumani hokimi hamda Buxoro viloyati hududiy saylov komissiyasi raisi o‘rinbosari bilan bog‘liq epizodlar) bo‘yicha ayblangan.
Sud hukmi bilan A.I. Jinoyat kodeksining 168-moddasi (firibgarlik) 3-qismi “b, g” bandlari, 141-2-moddasi (shaxsga doir ma’lumotlar to‘g‘risidagi qonunchilikni buzish) 2-qismi “a, b, v” bandlari, 278-6-moddasi (zarar keltiruvchi dasturlarni yaratish, ishlatish yoki tarqatish) 2-qismi “b, v” bandlarida nazarda tutilgan jinoyatlarni sodir etishda aybli deb topilgan. Unga 2 yil 1 oy muddatga ozodlikni cheklash jazosi tayinlangan.
Jabrlanuvchilarga yetkazilgan zarar to‘liq qoplangan.
O‘zbekistonda moda va dizayn sohasi uchun malakali mutaxassislar tayyorlashga ixtisoslashgan yangi davlat oliy ta’lim muassasasi tashkil etiladi.
Prezidentning 2026-yil 16-oktyabrdagi PQ–378-son qaroriga muvofiq, Toshkent xalqaro moda akademiyasi tashkil etiladi. Akademiya Yengil sanoatni rivojlantirish agentligi tizimida faoliyat yuritadi.
Yangi oliygoh Toshkent to‘qimachilik va yengil sanoat instituti hamda Parij xalqaro moda akademiyasining qo‘shma ta’lim dasturi negizida tashkil etiladi.
Mazkur dasturda tahsil olayotgan barcha talabalar o‘qishini yangi akademiyada davom ettiradi. Bitiruvchilarga Toshkent xalqaro moda akademiyasining diplomi beriladi.
O‘quv jarayoni 2026/2027 o‘quv yilidan boshlanadi. Akademiyada xalqaro qo‘shma dasturlar bilan bir qatorda, mustaqil ta’lim dasturlari asosida bakalavr va magistrlar tayyorlashga ham ruxsat etiladi.
2027/2028 o‘quv yilidan boshlab to‘qimachilik, tikuvchilik, trikotaj va charm-poyabzal sohalarida korxonalar buyurtmasi asosida dual ta’lim joriy qilinadi. Bunda talabalar nazariy bilim olish bilan birga ishlab chiqarish jarayonlarida ham ishtirok etadi.
Shuningdek, yengil sanoat yo‘nalishidagi texnikumlarni muvaffaqiyatli tamomlagan, o‘rtacha bahosi akademiya belgilagan talabga javob beradigan bitiruvchilarga bakalavriatning uchinchi bosqichidan to‘lov-kontrakt asosida o‘qishni davom ettirish imkoniyati yaratiladi.
Akademiya bazasida davlat buyurtmasi asosida turli tashkilotlar uchun kiyim-bosh dizaynini ishlab chiqish va milliy brendlarni shakllantirish ham yo‘lga qo‘yiladi.
Qarorda xorijiy mutaxassislar va talabalarni jalb qilish uchun ko‘p martalik vizalar rasmiylashtirish tartibi ham nazarda tutilgan.
Bundan tashqari, 2028-yil yakuniga qadar davlat-xususiy sheriklik asosida 400 o‘rinli talabalar turar joyi quriladi. Ungacha akademiyaga o‘tkazilgan talabalar Toshkent to‘qimachilik va yengil sanoat instituti yotoqxonasidan belgilangan tartibda foydalanishi mumkin.
Xorijda o‘zbek milliy taomlariga ixtisoslashgan restoran yoki oshxona tashkil etgan mahalliy tadbirkorlar ayrim xarajatlarining 50 foizigacha bo‘lgan qismini subsidiya sifatida qaytarib olishi mumkin.
Ushbu xizmat Turizm qo‘mitasi tomonidan my.gov.uz Yagona interaktiv davlat xizmatlari portali orqali bepul ko‘rsatiladi.
Subsidiya O‘zbekistonda davlat ro‘yxatidan o‘tgan va xorijda milliy restoran tashkil etgan tadbirkorlik subyektlariga ajratiladi.
Ariza topshirishda restoranning xorijiy davlatda ro‘yxatdan o‘tganini va binodan foydalanish huquqini tasdiqlovchi hujjatlar, sanitariya va yong‘in xavfsizligi talablariga muvofiqlik bo‘yicha ma’lumotlar taqdim etilishi kerak.
Shuningdek, restoranni tashkil etish bilan bog‘liq amalga oshirilgan xarajatlarni tasdiqlovchi hujjatlar, zaruratga qarab O‘zbekistondan mahsulot yetkazib berilganini tasdiqlovchi ma’lumotlar va ularning rasmiy tarjimasi so‘ralishi mumkin.
Restoranning ichki va tashqi ko‘rinishini aks ettiruvchi fotosuratlar ham arizaga ilova qilinadi.
Ariza my.gov.uz portali orqali elektron shaklda yuboriladi va 18 ish kuni ichida ko‘rib chiqiladi. Ijobiy qaror qabul qilinsa, subsidiya mablag‘lari 7 ish kuni ichida tadbirkorning bank hisobvarag‘iga o‘tkaziladi.
Arizada kamchiliklar aniqlangan taqdirda, tadbirkorga ularni bartaraf etib, hujjatlarni qayta taqdim qilish imkoniyati beriladi.
Qoraqalpog‘iston Respublikasidagi Ekologiya va iqlim o‘zgarishi milliy qo‘mitasi huzuridagi «Sayg‘ochiy» kompleks landshaft buyurtma qo‘riqxonasida yovvoyi hayvonlarni suv bilan ta’minlash maqsadida beshta avtonom suv ichish tizimi o‘rnatildi.
Tashabbus Ekologiya qo‘mitasi tomonidan BMT Taraqqiyot dasturi (BMTTD) va Global ekologik jamg‘arma (GEF) bilan hamkorlikda «Aral Sea Wetlands» loyihasi doirasida amalga oshirildi.
Suv resurslari cheklangan Ustyurt cho‘li sharoitida qo‘shimcha suv manbalarining mavjudligi sayg‘oqlar va mahalliy faunaning boshqa vakillarini saqlab qolishda muhim ahamiyatga ega.
Avtonom tizimlar quyosh energiyasida ishlaydi va to‘liq avtomatlashtirilgan. Ularning har biri 3 kub metr sig‘imga ega suv havzalari, nasoslar, datchiklar va hisoblagichlar bilan jihozlangan. Bu markazlashgan elektr energiyasi va suv ta’minoti manbalariga doimiy ulanish zaruratisiz suvni barqaror yetkazib berish imkonini beradi.
Suv ichish tizimlari bilan bir qatorda hududga 10 ta kamera va 10 ta fototuzoq ham o‘rnatildi. Ular hayvonlarni sutka davomida kuzatish, harakatlanishi va suv ichish joylaridan foydalanishini qayd etish, shuningdek, populyasiyalar holatini keyingi monitoring qilish uchun ma’lumot to‘plash imkonini beradi.
Ustyurtning og‘ir tabiiy sharoitida yashaydigan sayg‘oqlar uchun qo‘shimcha suv manbalarining yaratilishi yovvoyi hayvonlar populyasiyalarini saqlash va tiklashda muhim ahamiyat kasb etadi.
Avtonom suv ichish tizimlarining o‘rnatilishi Ustyurtda bioxilma-xillikni asrash bo‘yicha amalga oshirilayotgan chora-tadbirlardan biri bo‘lib, zamonaviy kuzatuv vositalari orqali hayvonlar holatini monitoring qilish va zarur ma’lumotlarni to‘plash imkonini ham beradi.
Bir muddat oldin Raqobat qo‘mitasi SSV huzuridagi Xaridlar markazining boshlang‘ich narxi 14 mlrd so‘m bo‘lgan davlat xaridi «Raqobat to‘g‘risida»gi qonun talablariga nomuvofiq deb topilgani sababli bekor qilingani aytilgan edi.
Markaz ushbu holat yuzasidan bergan rasmiy tushuntirish berib, respublika tibbiyot muassasalari uchun 4 ta MSKT uskunasini xarid qilish bo‘yicha o‘tkazilgan tender natijalari bekor qilinganini tasdiqladi.
Markaz ma’lumotiga ko‘ra, maxsus axborot portalida 497870-sonli lot bo‘yicha o‘tkazilgan tender yakunlaridan so‘ng “SKYMED Technologies” MChJ tomonidan e’tiroz xati kelib tushgan.
Murojaat Xarid komissiyasi tomonidan o‘rganilganda, ishtirokchilarning texnik takliflarini baholash jarayonida tibbiyot muassasalari ekspert guruhi tomonidan ayrim texnik xatolarga yo‘l qo‘yilgani aniqlangan.
Xususan, servis xizmati ko‘rsatish bo‘yicha belgilangan mezon asosida g‘olib ishtirokchiga asossiz ravishda qo‘shimcha 1 ball berilgan.
Shundan so‘ng Xarid komissiyasining 2026-yil 18-sentyabrdagi qarori bilan mazkur lot bo‘yicha tender natijalari bekor qilingan.
Shuningdek, Raqobatni rivojlantirish va iste’molchilar huquqlarini himoya qilish qo‘mitasi 21-sentyabr kuni tender yuzasidan o‘rganish o‘tkazish maqsadida ishtirokchilar taqdim etgan hujjatlarni so‘ragan.
Xaridlar markazi 22-sentyabr kuni qo‘mitaga javob yo‘llab, tender natijalari bekor qilingani va bunga sabab bo‘lgan holatlar haqida ma’lumot bergan.
Markazning ta’kidlashicha, tender natijalarining bekor qilinishi texnik baholash jarayonida aniqlangan xatolar bilan bog‘liq bo‘lib, qaror Xarid komissiyasi tomonidan o‘rganish yakunlariga ko‘ra qabul qilingan.
O‘zbekistonda Maktabgacha va maktab ta’limi vazirligi hamda Oliy ta’lim, fan va innovatsiyalar vazirligi yagona Ta’lim va ilm-fan vazirligi sifatida qayta tashkil etildi.
Bu Prezident farmonida belgilandi.
Yangi vazirlik maktabgacha ta’limdan boshlab oliy ta’lim va ilmiy faoliyatgacha bo‘lgan yo‘nalishlarni yagona boshqaruv tizimiga birlashtiradi.
Islohotdan asosiy maqsad mamlakatda ta’lim, tarbiya va ilm-fanning yaxlit tizimini zamon talablari asosida tashkil etish, ta’lim sifati va samaradorligini oshirish hamda inson kapitalini rivojlantirish bo‘yicha ishlarni yangi bosqichga olib chiqishdan iborat.
Shuningdek, ta’limning barcha bosqichlari o‘rtasida uzviylik va davomiylikni ta’minlash ko‘zda tutilgan. Ya’ni maktabgacha ta’lim, maktab ta’limi, oliy ta’lim va ilmiy faoliyat yagona tizim doirasida muvofiqlashtiriladi.
Farmonda sohada samarali boshqaruv tizimini joriy qilish, turli ta’lim bosqichlari o‘rtasidagi hamkorlikni kuchaytirish va vazirlikning jamoatchilik oldidagi hisobdorligini oshirish ham nazarda tutilgan.
Yangi tuzilma orqali ta’lim va ilm-fan sohasida davlat siyosatini yagona yondashuv asosida amalga oshirish maqsad qilingan.
