Mbappe Messi kabi birinchi bo‘limda penaltini ura olmadi, ikkinchi bo‘limda esa u kabi o‘yin taqdirini hal qildi va to‘purarlar poygasida unga yetib oldi. Ammo o‘yin oxirlarida jarohat tufayli almashtirildi.

Fransuzlarda kayfiyat bo‘yicha hammasi joyida

Fransiya – Marokash 2:0

Gollar: Mbappe, 60 (1:0). Dembele, 66 (2:0)

Aniq ijro etilmagan penalti: Mbappe, 28’

Fransiya: Menyan, Upamekano, Saliba, Din, Kunde (Gyusto, 87), Kone (Zair-Emeri, 71), Rabio, Olise, Due (Barkolya, 77), Dembele, Mbappe (Mateta, 77)

Marokash: Bunu, Mazraviy, Diop, Salohiddin (Ouadi, 74), Hakimi, Buaddi (Amrabat, 62), Al-Aynaviy, Unai, Talbi (Sbai, 85), Dias (Yasin, 74), Al-Hannus (Rahimi, 62)

Ogohlantirish: Diop, 63

Kilian Mbappe jahon chempionatida Fransiya milliy jamoasini o‘z ortidan ergashtirishda davom etmoqda. Chorakfinalda Marokashga qarshi o‘yinda 27 yoshli hujumchi birinchi bo‘limda penaltidan foydalana olmagandi, lekin ikkinchi bo‘limda ajoyib gol urib hisobni, keyin esa Dembelening goliga assistentlik qildi.

Fransuzlar ikkinchi bo‘limning birinchi yarmida 11 metrlik jarima zarbasi ishladi – Nussayr Mazraviy jarima maydoni ichida Kilianni yiqitdi va bosh hakam Fakundo Telio darhol «nuqta»ni ko‘rsatdi. Jabrlanuvchining o‘zi zarba berish uchun yo‘l oldi.

Ammo u darhol zarba bera olmadi – vaziyatga VAR aralashib, epizodni sinchiklab ko‘rib chiqish boshlandi. Mbappe 3 daqiqadan ortiq vaqt davomida kutib turishga majbur bo‘ldi, hakamning qarori to‘g‘riligi tasdiqlanganidan keyin esa u juda ishonchsiz zarba yo‘lladi – pastdan va kuchsiz kelgan to‘pni darvozabon Yosin Bunu osonlik bilan qaytardi.

Aftidan, penaltini ko‘rib chiqish jarayoni haddan tashqari cho‘zilishi hujumchiga ta’sir ko‘rsatgan va u aniq zarba bera olmagach, hakamning oldiga kelib, e’tiroz bildirdi.

Mbappe uchun bu holat yoqimsiz zarba bo‘ldi. U Fransiya milliy jamoasining jahon chempionatlarida penaltidan gol ura olmagan ikkinchi futbolchiga aylandi, birinchisi 2014 yilgi mundialda muvaffaqiyatsizlikka uchragan Karim Benzema bo‘lgandi.

Bunu esa o‘z seyvi bilan penaltilar bo‘yicha haqiqiy mutaxassis sifatida tarixga kirdi. Opta xabariga ko‘ra, 35 yoshli marokashlik JChda o‘yindan keyingi seriya ham hisoblanganda, jami to‘rt bor penalti qaytargan. Bunday natija bilan shu vaqtgacha faqat Iker Kasilyas, Dominik Livakovich, Daniyel Subashich, Serxio Goykochea va Harald Shumaxer kabi darvozabonlar maqtana olardi. Bunuda bu boradagi umumiy statistika ham yuqori – u 9 ta penaltidan atigi ikkitasini o‘tkazgan (4 tasini qaytargan, yana 3 zarba xato ketgan).

Ammo penaltilar bo‘yicha kuchli statistikasi Bunuga yordam bera olmadi. 60-daqiqada Mbappe baribir o‘z maqsadiga erishdi va jarima maydoni tashqarisidan yo‘llagan chiroyli zarbasi bilan hisobni ochdi. Bu Kilianning joriy mundialdagi sakkizinchi goliga aylandi va u to‘purarlar poygasida Lionel Messiga yetib oldi. Bundan tashqari, u jahon chempionatlarida urilgan jami gollar soni bo‘yicha (20) argentinalik hujumchiga (21) maksimal darajada yaqinlashib oldi.

Biroz o‘tib u Usmon Dembelening goliga ham assistentlik qildi va o‘yin taqdiri amalda hal bo‘ldi. Marokash butun o‘yin davomida oldingi chiziqda jiddiy vaziyatga ega bo‘lmadi. Fransuzlar zarbalar soni bo‘yicha ham (22:5, darvoza sohasiga to‘g‘ri borgan zarbalar – 8:1), xG ko‘rsatkichi (3,05 ga qarshi 0,14) bo‘yicha ham yaqqol ustunlik qilishdi. 

Kilian endi ikkita jahon chempionatida «gol+pas» bo‘yicha 10+ ko‘rsatkich qayd etgan ilk futbolchiga aylandi. O‘tgan turnirda u 8+2 natijasiga erishgandi, bunisida allaqachon 8+3.

Ammo u shu kuni o‘yinni oxirigacha davom ettira olmadi. 77-daqiqada u og‘riq his qilib, gazonga yotib oldi va o‘z o‘rnini Matetaga bo‘shatib berdi.

Unga aynan nima bo‘lgani aniq emas. O‘yin davomida ikki epizodda unga nisbatan qo‘pollik ishlatilgandi. Birinchisi, penalti ishlangan vaziyat. Lekin shundan keyin u yarim soatdan ortiq vaqt mobaynida o‘ynashda davom etgani hisobga olinsa, muammoga bu sabab bo‘lmagani aniq.

Ikkinchi epizod esa 63-daqiqada ro‘y berdi: Issa Diop qanotda Mbappening oyog‘iga tepdi va o‘yindagi yagona sariq kartochkani qabul qilib oldi. Hujumchi o‘shanda oyog‘ini ushlab, gazonda yotgan, ammo o‘rnidan turib, o‘yinni davom ettirgandi. 14 daqiqa o‘tib baribir o‘zini almashtirishni so‘radi.

Zaxira o‘rindig‘ida esa o‘ng oyog‘i to‘piq qismiga muz bog‘langan holda o‘tirdi.

O‘yindan keyingi intervyusida Kilian muxlislarni tinchlantirdi: «Barchasi joyida! – deya qayd etdi u. – To‘pig‘imga zarba qabul qilib oldim, ammo barchasi normal. Mateta so‘nggi 15 daqiqalik uchun mendan yaxshiroq holatda edi».

Agar jamoa sardorining gapi to‘g‘ri bo‘lsa, bu kichik jarohat unga yarimfinalda o‘ynashga to‘sqinlik qilmaydi. Yarimfinal o‘yini 14 iyul kuni bo‘lib o‘tadi, undagi raqib esa Ispaniya va Belgiya juftligida aniqlanadi.

Source link

Desham shogirdlari Qatardagi mundial marokashliklarni final ostonasida mag‘lub etgandi.

Bugun tunda Fransiya va Marokash o‘rtasidagi bahs bilan 2026 yilgi jahon chempionatida chorakfinal bahslari start oladi.

Fransiya va Marokash juftligida qator intrigalar bor. Birinchidan, Marokash milliy jamoasi tarkibidagi futbolchilarning bir qismi – fransuzlar futbol tizimi mevalari hisoblanadi. Ikkinchidan, Marokash uzoq vaqt mobaynida Fransiya mustamlakasi hisoblangan va tarixiy aloqalarga ega. Uchinchidan, 2022 yilgi jahon chempionati yarimfinalida ushbu jamoalar o‘zaro o‘ynagan va o‘sha o‘yin hakamlik mojarosi bilan yodda qolgan, finalga esa Yevropa vakillari yo‘l olishgandi. Endi marokashliklar o‘sha mag‘lubiyat uchun qasos olishga harakat qilishadi.

Fransiya – Marokash

10 iyulga o‘tar kechasi, 01:00. Gillette Stadium (Foksboro)

Jamoalarning turnirdagi yo‘li

Dide Desham shogirdlari bu turnirda hali biror marta yutqazmadi: guruh bosqichida Senegal (3:1), Iroq (3:0) va Norvegiya (4:1) taslim etildi. Uchranglilar pley-offning dastlabki haftasini ham benuqson o‘tkazishdi: 1/16 finalda Shvetsiyaga hech qanday imkoniyat qoldirilmadi (3:0), 1/8 finalda Paragvay to‘sig‘idan o‘tildi (1:0).

Janubiy Amerika vakillari nomdor raqibga qarshi turli yo‘llarni, jumladan, qoidalardan tashqari usullarni ham ishga solishga harakat qildi, ammo shunday qo‘polliklardan biridan keyin belgilangan penalti tufayli mag‘lub bo‘lishdi. Paragvayliklar deyarli hujum qilishmadi va vaziyatlarga ega bo‘lishmadi.

Aynan shu tufayli Fransiya himoyasi aslida qanchalik yaxshi holatda ekanini tekshirishning imkoni bo‘lmadi. Turnir boshidan buyon ushbu jamoaga tengma-teng o‘yin va kurash ko‘rsatgan raqibning o‘zi duch kelmadi.

Shunday ekan, Marokash – turnir favoritligi uchun asosiy da’vogar sifatida ko‘rilayotgan ushbu jamoa uchun ilk jiddiy sinov bo‘ladi. 1/8 final o‘yinlaridan keyin Opta superkompyuteri jamoalarning turnir g‘olibligi uchun imkoniyatlarini qayta baholadi, unga ko‘ra, Fransiyaning jahon chempionligi uchun imkoniyati 27,32 foizga baholangan, ikkinchi va uchinchi o‘rinlarda esa Ispaniya (21,33 foiz) va Argentina (17,28 foiz) qayd etilgan.

Marokashliklar 4 yil oldin Qatardagi mundialda tarixiy natija qayd etgan: Afrikaning jahon chempionati yarimfinal bosqichida o‘ynagan ilk jamoasiga aylangandi. Endi esa bu natijani takrorlab, qit’aning turnir 1/2 finalida qatorasiga ikki marta o‘ynagan ilk jamoasiga aylanishi mumkin.

«Atlas sherlari» joriy turnirda hali yutqazgani yo‘q: guruhda Braziliya bilan durang o‘ynadi (1:1), Shotlandiya (1:0) va Haitini (4:2) mag‘lub etdi. 1/16 finalda Niderlandiya to‘sig‘idan o‘tildi: 91-daqiqada hisob tenglashtirildi (1:1), penaltilar seriyasida Bunu qahramonlik ko‘rsatdi (3:2). 1/8 finalda esa Kanada yirik hisobda tor-mor etildi (3:0).

Lekin aynan turnir mezbonlariga qarshi o‘yinda marokashliklar o‘yinida muammolar ko‘zga tashlangandi: jamoa birinchi bo‘limni juda nursiz o‘tkazdi, qolaversa, jamoaning turnirdagi asosiy to‘purari Ismoil Saybari o‘yin startidayoq jarohat olib safdan chiqdi, faqat ikkinchi bo‘limda qarshi hujumlarda raqib jazolandi.

O‘zaro uchrashuvlar tarixi

Ushbu jamoalarning ilk uchrashuvi 1988 yil Fransiyada o‘tkazilgan o‘rtoqlik maqomidagi turnirda kuzatilgan. O‘shanda «Atlas sherlari» himoyachisi Abdulmajid Lamriss birinchi bo‘limda avval o‘z jamoasi darvozasini, keyin raqib darvozasini ishg‘ol etgan, o‘yin taqdirini ikkinchi bo‘lim boshida fransuzlar futbolchisi Yannik Stopira urgan gol hal qilgandi.

1998 yil mayidan 2007 yil noyabriga qadar bo‘lgan vaqt oralig‘ida ushbu jamoalar yana to‘rt marta o‘rtoqlik uchrashuvida maydonga tushgan: ikkitasi fransuzlar foydasiga hal bo‘lgan (1:0 i 5:1), yana ikki o‘yinda bir xil hisoblardagi durang natijalar (2:2, 2:2) qayd etilgan. Ammo o‘sha o‘yinlardan bittasida penaltilar seriyasi tashkil etilgan va unda marokashliklarning qo‘li baland kelgan (6:5).

Jamoalarning yagona rasmiy uchrashuvi 2022 yilgi jahon chempionati yarimfinaliga to‘g‘ri keladi: o‘shanda Dide Desham jamoasi Teo Ernandes va Randal Kolo-Muanining beshinchi va 79-daqiqada urgan gollari evaziga finalga chiqqan.

Marokash nima taklif qilishi mumkin?

Marokashga Qatardagi jahon chempionati prizmasi orqali qarash kerak emas. O‘shanda Valid Regragiy boshchiligidagi jamoa o‘z o‘yinini yaxshi shakllantirgan anderdog sifatida taassurot qoldirgandi. Jamoa quyi blokda himoyalanib, to‘pni raqibga topshirgan holda vaqti-vaqti bilan qarshi hujumlarga o‘tadigan jamoa edi. To‘rt yil ichida ko‘p narsa o‘zgardi. Marokashliklar hamon yaxshi himoyalanadi, ammo endi ko‘p hollarda o‘yinni boshqarishga ham qarshi emas. Ular to‘pga egalik qilishdan tortinmaydi, himoyadan markaziy himoyachilar va tayanch yarimhimoyachilari orqali asta-sekinlik bilan chiqib, pozitsion hujumlar uyushtiriladi, raqibdan to‘p olib qo‘yilishi bilan vertikal uzatmalar berishga shoshilishmaydi.

Bu ko‘p jihatdan Hakimining roli o‘zgargani bilan bog‘liq. U klassik qanot himoyachisi kabi o‘ynamaydi, balki doim hujum tashkil etish uchun markazga ko‘chib harakatlanadi va raqib jarima maydoniga kirib boradi. Shu sababli raqib himoyachilari uchun aynan kimga erkinlik berilishini taxmin qilish qiyinlashadi: Ashrafning o‘zimi, ushbu zonaga o‘tib turadigan Braim Diasmi yoki boshqa futbolchimi? Sodda qilib aytganda, Marokash – har qanday raqib hisoblashishi kerak bo‘lgan yorqin va nima kutishni bilib bo‘lmaydigan jamoadir.

Marokash uchun bu o‘yinda ochiq futbol namoyish qimmatga tushishi mumkin – Fransiya tarkibida himoya chizig‘i ortida yuzaga keladigan bo‘shliqlardan unumli foydalana oladigan tezkor va yuqori saviyali hujumchilar jamlangan. Shundan kelib chiqib, Marokash bu o‘yinda himoya chizig‘ini orqaroqqa qaytarishini taxmin qilish mumkin, bu holda ko‘p narsa qanotlarda hal bo‘ladi, ammo birinchi navbatda, Muhammad Vahbi o‘yin uchun qanday rejani tanlashiga qarash kerak bo‘ladi. Agar u tavakkalchilikka qo‘l ursa va o‘z futbolchilarining hujum salohiyatini cheklamaslikka qaror qilsa, muxlislarni bu mundialdagi eng yorqin o‘yin kutayotgan bo‘lishi mumkin.

Marokash turli xil modellarni navbati bilan qo‘llab ko‘rishi mumkin: o‘yinning qaysidir vaqtida bosim o‘tkazadi, qaysidir pallada fransuzlarni ancha oldinroqda qarshi oladi, qaysidir oraliqda to‘pi raqibga topshirib, chuqur himoyalanadi, keyin esa raqib hujumchilari qolganlardan uzilib qoladigan paytni kutib, bir necha uzatma orqali raqib himoyasini yorib o‘tishga harakat qiladi. Shuning uchun Kilian, Usmon va Olise bu turnirda ilk bor pressingda ishlashi talab etiladi.

Fransuzlar jahon chempionatlarida qatorasiga to‘rtinchi bor chorakfinalga chiqishgan. Jamoa so‘nggi sakkiz turnirda faqat ikki marta – 2002 va 2010 yillarda bu bosqichga yetib kela olmagan. Shu bilan birga, 1998 va 2018 yillarda bosh sovrinni qo‘lga kiritgan, 2006 va 2022 yillarda esa kumush medallar bilan kifoyalangan.

Agar Marokash to‘sig‘idan o‘ta olsa Fransiya keyingi bosqichda Ispaniya – Belgiya juftligi g‘olibi bilan yana bir bor final yo‘llanmasi uchun maydonga chiqadi.

Source link

Turnirning bu bosqichi ham hissiyotlarga boy kechdi.

Futbol bo‘yicha 2026 yilgi jahon chempionati ham nihoyasiga yaqinlashmoqda. 48 jamoadan 40 tasi allaqachon turnirni tark etdi, qolgan bir yarim hafta ichida sakkiz jamoa bosh sovrin uchun kurash olib boradi. Quyida chorakfinal o‘yinlari oldidan nimchorakfinaldagi eng yodda qolarli holatlar eslab o‘tiladi.

Marokash o‘z rekordini takrorlashi mumkin

Afrikaliklar Kanadaga qarshi birinchi bo‘limni nursiz o‘tkazishgan va raqib darvozasiga deyarli tahdid solishmagandi (xG bo‘yicha 0,02). Marokashliklar pley-offning dastlabki o‘yinida Niderlandiyaga qarshi 120 daqiqa davom etgan o‘yindan tiklana olmagandek tasavvur uyg‘ongandi. Ammo tanaffusdan keyin Afrika jamoasi saviya borasidagi farqni ko‘rsatib qo‘ydi va turnir mezbonlarini qarshi hujumlarda jazolab, yirik hisobda g‘alaba qozondi (3:0). Endi Muhammad Vahbi shogirdlari to‘rt yil oldingi turnirda qayd etilgan tarixiy natijani (yarimfinal) takrorlash uchun yana bir o‘yinda g‘alaba qozonishi kerak bo‘ladi, ammo bu o‘yin turnir g‘olibligi uchun asosiy favorit sifatida ko‘rilayotgan Fransiyaga qarshi kechadi.

Turnirning eng xunuk o‘yini

Paragvaylik futbolchilar o‘yindan oldin Fransiyaga qarshi deyarli imkoniyati yo‘qligini tushunib turgandi, shuning uchun jamoa bosh murabbiyi ularga raqib hujumchilariga istalgan usulni qo‘llab bo‘lsa-da o‘yin bermaslikka ko‘rsatma berdi. Jamoa faqat durang hisobni saqlab qolish va o‘yinni penaltilar seriyasiga olib borish, u yerda esa darvozabon Orlando Gilning mahoratiga tayanishni ko‘zladi (ushbu posbon oldingi bosqichda Germaniyaga qarshi penaltilar seriyasi qahramoni bo‘lgandi). O‘yinning katta qismi aynan ular xohlagan ssenariyda kechdi – janubiy amerikaliklar istalgan nuqtada fol ishlatishdi, bir necha bor raqibni hakamning ko‘z o‘ngida urishdi. Ammo foydasi bo‘lmadi – fransuzlar Kilian Mbappe penaltidan urgan gol evaziga minimal hisobda g‘alaba qozonishdi (1:0). O‘yindan keyin o‘zbekistonlik hakam Ilgiz Tantashev muhokamalar markazida qoldi – u haddan tashqari qo‘pol o‘yin namoyish etgan paragvayliklarni biror marta ogohlantirmadi, jabrlanuvchi rolidagi fransuzlarga esa uch marta sariq kartochka ko‘rsatdi. Bunday qarorlari tufayli u kesin tanqidga uchradi – L’Equipe nashri uning ishini bir ballga baholadi.

Ushbu o‘yin atrofida bahslar hamon davom etmoqda: avvaliga paragvaylik senator o‘yindagi harakatlari uchun Kilian Mbappe manziliga zaharli so‘zlar aytib, irqchilik ruhidagi post yozdi, futbolchi uni «jirkanch xotin» deb atab, javob qaytargach, o‘zini jabrdiyda qilib ko‘rsatmoqda va uni sudga berish bilan tahdid qilmoqda.

Norveglar hammayoqni zabt etmoqda

Skandinavlar va jahonning besh karra chempionlari o‘rtasidagi o‘yinda statistik anomaliya davom etdi – brazillar bungacha Norvegiyani biror marta yenga olmagandi va o‘zaro beshinchi to‘qnashuvda ham buni uddalay olmadi. Bunga skandinavlar anchadan buyon jahon birinchiliklariga kelmagani ham sabab (oxirgi ishtirok 1998 yilda kuzatilgandi) bo‘lgan, ammo ushbu jamoaning hozirgi tarkibi amalda ham raqibdan kuchlilik qildi. Erling Holand Braziliya darvozasiga dubl qayd etib, ilk mundialidayoq yetti gol urishga ulgurdi va jamoasini o‘z tarixida ilk bor jahon chempionati chorakfinaliga olib chiqdi. Vikinglar eshkak eshishda va muxlislar qalbini zabt etishda davom etdi.

Braziliya va shaxsan Karlo Anchelotti uchun turnir muvaffaqiyatsizlik bilan tugadi, eng yaxshi davrlari o‘tib ketgan Neymarning o‘ynatilishi esa ushbu muvaffaqiyatsizlik ramziga aylandi. 34 yoshli futbolchi bu o‘yindan keyin ko‘zda yosh bilan Braziliya milliy jamoasidagi faoliyatini yakunladi.

Jangdan omon chiqqan Angliya

Tomas Tuxel shogirdlari 1/8 finalda Meksikaning kuchli qarshiligiga duch keldi. Dengiz sathidan 2200 metr balandlikda joylashgan «Atsteka» o‘yingohi esa qo‘shimcha qiyinchiliklar tug‘dirdi. Angliya o‘yinning 54-daqiqasida Kuansa chetlatilgani tufayli qolgan vaqt mobaynida o‘n kishi bo‘lib, himoyalanishiga to‘g‘ri keldi. Lekin jahon chempionati o‘yinlarida Mexikodagi ushbu o‘yinda biror marta yutqazmagan Meksika shu kuni raqibning tig‘iz himoyasini yorib o‘ta olmadi (2:3). O‘yinda katta kuch yo‘qotgan inglizlar hakam hushtagi chalinishi bilan gazonga quladi, jamoa sardori va to‘purari Harri Keyn esa o‘yindan keyin ovozi bo‘g‘ilib qolgani uchun intervyu ham bera olmadi. Lekin bunday og‘ir jangdan omon chiqqan inglizlarni endi hech qanday raqib qo‘rqita olmasligi aniq.

Ronalduning quyoshi botdi

Krishtianu o‘zining oltinchi jahon chempionatini ham ko‘z yoshlar bilan yakunladi Turnirni shusiz ham juda bo‘sh o‘tkazgan Portugaliya bu bosqichda ispanlar armadasining kuchli bosimi ostida qoldi va deyarli hech narsa bilan javob qaytara olmadi – barcha overtaymni kutayotganida esa zaxiradan tushgan Mikel Merino 90+1-daqiqada g‘alaba golini urdi. Mag‘lubiyatdan keyin bosh murabbiy Roberto Martines iste’foga chiqdi. U so‘nggi uch yil mobaynida kuchli tarkib bilan kutilgan natija ko‘rsata olmadi, OAVda esa u numerologiyaga mukkasidan ketgani va 2026 yildagi 6 raqami jamoa uchun omad keltirishini (2016 yilda Portugaliya Yevropa chempioni bo‘lganini dalil sifatida keltirgan) tinmay ta’kidlagani, o‘yin borasida esa hech qanday g‘oya taklif eta olmagani haqida yozishdi. Amalda uning jamoasi 6 iyul kuni turnirni tark etdi, bunga raqibning «6» raqamli futbolchisi urgan gol sabab bo‘ldi. 

Ronaldu jamoa uchun muammoga aylangani haqida ham turli bahslar yuzaga keldi, ammo amalda jamoaning eng yaxshi to‘purari aynan u bo‘ldi. Navbatdagi muvaffaqiyatsizlikdan keyin ushbu futbolchi bu faoliyatidagi so‘nggi jahon chempionati bo‘lib qolishini ma’lum qildi. «Bizga biroz omad yetishmadi, chunki ular so‘nggi daqiqalarda gol urishdi. Bu juda keskin, teng o‘yin bo‘ldi. Biz ham, ular ham yutishimiz mumkin edi. Ko‘z yoshi? Chempionatni shunday tark etayotganda odam xafa bo‘lishi tabiiy hol. Ammo yana bir bor ta’kidlayman: men qo‘limdan kelgan hamma narsani qildim va vijdonim pok bo‘lib ketyapman», – degan hujumchi.

U jamoa uchun qo‘lidan kelgani, Portugaliya o‘z tarixidagi uchta sovrinni (2016 yilgi Yevropa chempionligi, 2019 va 2025 yillarda Millatlar ligasi) aynan u bilan qo‘lga kiritilganini ta’kidladi.

Belgiya jazolovchi rolida

AQSh va Belgiya o‘rtasidagi o‘yin arafasida futbol maydonida faqat bir mavzu – Folarin Balogunning majburiy diskvalifikatsiyasi shartli jazoga almashtirilgani haqidagi xabar muhokama qilindi. Ushbu hujumchi 1/16 finalda Bosniya bilan o‘yinda qizil kartochka olgandi va keyingi o‘yinni o‘tkazib yuborishi kerak edi. Ma’lum bo‘lishicha, vaziyatga Donald Tramp aralashgan, AQSh prezidenti shaxsan Janni Infantinoga qo‘ng‘iroq qilib, jamoaning asosiy hujumchisi Belgiya bilan o‘yinda ishtirok etishiga imkon berishni so‘ragan. Shundan keyin butun dunyo Belgiyaga muxlislik qila boshladi, AQSh futbolchilari esa kuchli bosim ostida qolishdi. Pochettino shogirdlari shu kuni turnirdagi eng yomon o‘yinini o‘tkazdi va yirik hisobda mag‘lub bo‘ldi, Balogun esa hech narsa qila olmadi (1:4). Romelu Lukaku tomonidan urilgan to‘rtinchi golni esa Belgiya futbolchilari AQSh prezidentini masxara qilgan holda nishonlashdi: Lukaku Trampning maxsus raqsini ijro etdi, qolganlar unga qo‘shilishdi.

Minglab muxlislarning nafratiga uchragan Balogunning o‘zi bu vaziyatni xotirjamlik bilan qabul qildi va qaror qabul qilinishida ishtirok etmaganini aytib chiqdi: «Qizil kartochka borasidagi qarorga rozi bo‘lgandim. O‘ynashga ruxsat berishganida yana rozi bo‘ldim. Jarayonda hech qanday ishtirokim yo‘q. Bu menga bog‘liq emasdi».

Messi ishtirokidagi mo‘jiza

Misr amaldagi chempionlarga qarshi o‘yinda bir bosh baland sakradi va shov-shuvli sensatsiyaga yaqin keldi. Argentinaliklar esa o‘yinning 79-daqiqasida ham 0:2 hisobida ortda borayotgandi va turnirni tark etishga yaqin edi. Messi bu o‘yin boshida jahon chempionati tarixidagi eng yomon penaltichi maqomini o‘ziniki qilgandi – bungacha mundialda hech bir futbolchi bir turnirda ikkita penaltini yo‘qqa chiqarmagandi (Leo guruh bosqichida Avstriyaga qarshi o‘yinda ham 11 metrdan aniq zarba berolmagandi). Ammo o‘yinning oxirgi qismida Leo eng yuqori rejimini yoqdi va o‘yin taqdirini hal qildi. U dastlab Romeroga golli uzatma berdi va jahon chempionati tarixidagi eng yaxshi assistentga aylandi (9). Keyin esa turnirdagi gollari sonini 8 taga yetkazib (jami 21), hisobni tenglashtirdi.

O‘yinga qo‘shib berilgan daqiqalarda esa qarshi hujumda Enso Fernandes Lautaro Martinesning uzatmasidan foydalanib, g‘alaba golini urdi. Shu tariqa, misrliklar tarixiy g‘alabani rasmiylashtirish o‘rniga tarixiy kambekka guvoh bo‘lishdi. Shu bilan birga, afrikaliklar jamoasi vakillari mag‘lubiyatni tan olishmadi va o‘yindan keyin hakamlarni ham, FIFAni ham korrupsiyada ayblab, chiqishlar qilishdi.

Shveytsariyaning sabri

Turnirdagi oldingi to‘rt o‘yinida Kolumbiya hech bir raqibga o‘yin bermagandi va kerakli natijalarni qo‘lga kiritgandi. Janubiy Amerika vakillariga turnir setkasining o‘ng qismidagi sirli toychoq maqomi ham berilayotgandi, ammo Shveytsariya barchasini bekor qildi – Murat Yakin jamoasi 120 daqiqa davomida raqibni zararsizlantirishni uddaladi. O‘yin tomoshabop kechmadi, ammo yevropaliklar natija uchun barchasini qurbon qilishga tayyor edi va yakunda jamoa penaltilar seriyasida ustun kelib, 1954 yilda o‘z uyida o‘tgan jahon chempionatidan buyon ilk bor chorakfinalga chiqdi. Endi bu jamoa keyingi bosqichda Argentinaga ham jiddiy muammo tug‘dirishiga ko‘pchilikda shubha yo‘q.

Source link

Misr vakillari o‘z mag‘lubiyatida «Messini yana chempion qilishni xohlayotgan FIFA»ni ayblashdi.

Misr milliy jamoasi 1/8 finalda Argentinaga yutqazib, jahon chempionatini tark etdi. Mag‘lubiyat juda alamli bo‘ldi – afrikaliklar jamoasi ikkinchi bo‘lim davomida 2:0 hisobida oldinda borib, o‘yin oxirida 13 daqiqa ichida uchta gol o‘tkazib yubordi. O‘yindan keyin jamoa vakillari hakamlikni keskin tanqid qilishdi.

«Hakam millat orzusini barbod qildi»

O‘yindan keyin Misr milliy jamoasi bosh murabbiyi Hussam Hassan hamda jamoa hujumchisi Mustafo Ziko o‘z intervyularida FIFAni soxtakorlikda ayblab, jahon chempionatida hamma narsa Lionel Messining foydasini ko‘zlab qilinganini aytishdi.

Murabbiy Argentinani muddatidan oldin «chempionlik» bilan tabriklagan va bu jamoa «o‘ynamasdan ham chempion bo‘lishi»ni aytgan:

«Biz bugun yaxshiroq o‘ynadik, ammo futbolda adolat yo‘q. FIFA feyr-pley tarafdori bo‘lsa ham, bo‘lib o‘tgan voqealar adolatsizlik edi. Hakam arzirli sababsiz golni inobatga olmadi. Keyin bizga penalti berilmadi. Hisob 3:1 bo‘lishi mumkin edi, ammo amalda 2:2 bo‘ldi.

Penalti bilan bog‘liq epizodda Hamdi Fathini jarima maydonida ochiqchasiga futbolkasidan tortib yiqitishgandi.

Balki gap marketingdadir. Balki kimdir jahon chempionatida muayyan jamoa yoki muayyan yulduz yana g‘olib bo‘lishini xohlar. Bu yana Argentina va yana Messi bo‘lishini.

Men futbolchilarga minnatdorchilik bildiraman, ular so‘ralgan ishni qilishdi, biz ajoyib daraja namoyish etdik, Misr, arab dunyosi va Afrika futbolini biz bilan faxrlanishga majbur qildik. Ammo vazifani murakkablashtiradigan tashqi omillar bor. Albatta, iloji boricha uzoqroqqa borib, muxlislarga yanada ko‘proq quvonch bag‘ishlashni istardik, men yutqazishni yomon ko‘raman. Mag‘lubiyat bunday adolatsizlik bilan kelganda esa juda ham og‘ir. Shuning uchun meni kechiring va mendan xafa bo‘lmang.

Men faqat bir narsani – adolatni so‘rayman. FIFA adolatli o‘yin tamoyili haqida gapiradi, ammo menimcha, bizni jiddiy xafa qilishdi. Belgiya bilan birinchi o‘yinda ham bizga aniq penalti belgilanmagan edi. Hozir ham shunday bo‘ldi. Hakamlarning xatolari hal qildi».

Ikkinchi bo‘lim o‘rtalarida birinchi goli bekor qilingan hujumchi Mustafo Ziko ham fransiyalik hakam Fransua Leteksening ishini juda past baholagan.

«Hakam bizni mag‘lub qilish uchun maydonga tushgandi. Biz Misr xalqini xursand qilishga umid qilgandik, ammo oxir-oqibat Argentinani jahon chempionatidagi g‘alabasi bilan tabriklaymiz. Bu soxta turnir va endi ular qolgan o‘yinlarni o‘ynashlari ham shart emas. Hakam butun bir millatning orzusini barbod qildi va u bizni nishonga oldi, chunki biz Argentinani mag‘lub etmasligimiz kerak edi. Endi xudo oldida javob bersin», – dedi Ziko.

Saloh esa nisbatan mulohazakorlik qilgan.

«Avvalo, bu Xudoning irodasi edi. O‘yin taqdiri va uning natijasi shunday bo‘lishi yozilgandi. Birinchi bo‘limni ajoyib o‘tkazdik va ikkinchi bo‘limning katta qismida ham yaxshi ko‘rindik. Ammo bir necha kichik xatolarga yo‘l qo‘ydik. Hakamlikka kelsak, izoh bermaslikni ma’qul ko‘raman. Nima bo‘lganini hamma ko‘rdi. Boshqa aytadigan gapim yo‘q.

Bizning gol bekor qilindi, shuningdek, foydamizga penalti ham qo‘yilmadi. Shundan so‘ng raqib darhol qarshi hujumga o‘tdi va gol urdi. Murabbiy bizni turnirdagi ishtirokimiz uchun tabrikladi. Biz turnirda erishganlarimiz asosida kelajak quramiz va Xudo xohlasa, oldinda bizni yanada muvaffaqiyatli kelajak kutmoqda», – deya uning so‘zlarini keltiradi Globo.

Misr futbol assotsiatsiyasi Argentinaga qarshi uchrashuvdagi hakamlik bo‘yicha FIFAga rasmiy shikoyat yubordi. Assotsiatsiya prezidenti Hani Abu Rida uchrashuvdagi bahsli vaziyatlar yuzasidan tekshiruv o‘tkazishni, shuningdek o‘yinda ishlagan Fransua Letekse boshchilik hakamlar brigadasini turnirdan chetlatishni talab qilgan.

O‘yindagi qaysi vaziyatlar misrliklarni norozi qildi?

Quyida Misr vakillari nazarda tutgan uchta epizod haqida.

58’ – Ziko qarshi hujumda gol urdi, ammo bu gol VAR aralashuvi bilan bekor qilindi: videotakrorda hujum boshlanishida Marvon Attia to‘pni Lisandro Martinesga nisbatan qo‘pollik ishlatib, olib qo‘ygani ma’lum bo‘ldi.

Qoida bo‘yicha hakamning qarori to‘g‘ri, ammo bu turnirda bir necha marta bu kabi holatlar boshqacha talqin etilgandi.

91:13’ – misrliklar bir hujumdagi ikki holat uchun penalti so‘rashdi: avvaliga Hamdi Fathi raqib jarima maydonida Aleksis Mak Allister bilan to‘p uchun kurashda yiqildi.

Bir qarashda bu holat uchun penaltiga asos ko‘rinmaydi, kontakt keskin emasdi. Mak Allister raqibning qo‘lidan ushlagani rost, ammo misrlik futbolchi ham aktyorlik mahoratini ishga solgandek tasavvur uyg‘ondi.

91:38’ – Saloh jarima maydoni ichida yiqildi, bu vaziyatda Hulian Alvares himoyaga yordamga qaytgan va undan to‘pni olib qo‘yib, qarshi hujum boshlagan – Argentina g‘alaba golini urgandi.

Videotakror esa Alvares to‘pga o‘ynagani, keyin esa Saloh muvozanatni yo‘qotib, inersiya bo‘yicha uning oyog‘iga urilganini ko‘rsatdi.

So‘nggi daqiqalardagi to‘qnashuvlar

Argentinaning uchinchi golidan keyin deyarli barcha misrliklar Fransua Leteksega tashlanishdi: ular golni bekor qilib, Argentina darvozasiga penalti qo‘yishni talab qila boshlashdi.

Ammo VAR xonasidagi hakamlar uni monitoring qarshisiga chaqirishmagandi. 

Letekse esa Misr murabbiylar shtabi vakillaridan biriga qizil kartochka ko‘rsatganidan keyingina vaziyat tinchlandi va o‘yin davom ettirildi.

Bu vaqtda taymer 95:21 raqamlarini ko‘rsatayotgandi. Goldan keyin yuzaga kelgan uch daqiqalik to‘xtalishni hakam kompensatsiya qilishi kerak edi (u qo‘shimcha daqiqalarga vaqt qo‘shib berdi ham).

Keyin esa janubiy amerikaliklar, birinchi navbatda darvozabon Emiliano Martines ochiqchasiga vaqt cho‘zishga kirishdi.

Misr to‘pni markazdan o‘yinga kiritdi, jarima maydoniga uzatma berildi, u yerda to‘pga ega chiqqan darvozabon yerga yotib oldi va to‘pni 8 soniya (qoida bo‘yicha 6 soniyagacha mumkin) qo‘lida ushlab turdi.

Biroz o‘tib Martines yana vaqt cho‘zdi: bu safar to‘pni 10 soniyadan ko‘proq o‘zida ushlab qoldi. 6:12-daqiqada to‘pni olgandi, o‘yinga 6:25-daqiqada kiritdi. Bu qoidabuzarlik edi, ammo hakam buni e’tiborsiz qoldirdi.

7:30’ – Marvan Attia maydon markazida Enso Fernandesga nisbatan fol ishlatdi.

7:55’ – argentinaliklar hali ham to‘pni o‘yinga kiritmagandi, Saloh hakamdan bunga e’tibor qaratishni so‘radi. Murabbiylar shtabi esa shovqin ko‘tarib, e’tiroz qildirishni boshladi. 

Hassan qo‘llari bilan X shaklini namoyish etgani uchun sariq kartochka oldi (FIFAning yangi protokoliga ko‘ra, bunday harakat hakamga irqchilik haqida signal berishni anglatadi. Hassan aynan kim tomonidan kimga irqchilikni nazarda tutgani noma’lum).

Hassan qo‘llari jyest qilishda davom etdi va bosh hakam uni oxirgi marta ogohlantirish uchun chopib keldi.

Jamoa boshlig‘i Ibrohim Hassan akasini tinchlantirdi, shu bilan birga, hakamga qarata soatni anglatuvchi harakat qildi.

Ammo vaqt baribir yetmadi – Argentina g‘alabali hisobni saqlab qoldi. Fransua Letekse final hushtagini chalganida 12-qo‘shimcha daqiqa o‘tib borayotgandi, holbuki avvaliga yetti daqiqa qo‘shgandi. Misrliklarning vaqt qo‘shib berish bo‘yicha so‘rovlari bajarildi, ammo ularning o‘zi bundan foydalana olmadi.

Shundan keyin misrliklar turnirdagi soxtakorliklar haqida shov-shuvli chiqishlar qila boshlashdi.

Source link

Leo yana to‘purarlar poygasida ilgarilab ketdi va quvonchdan yig‘ladi, turnirda bittagina gol (Abbos Fayzullayevdan) o‘tkazgan Kolumbiya esa uyga qaytdi.

Jahon chempionatida 1/8 final bosqichi yakuniga yetdi. Argentina Misr bilan o‘yinda telbavor kambek amalga oshirdi (3:2), Shveytsariya esa Kolumbiya bilan o‘yinni penaltilar seriyasida hal qilib (0:0, 4:3) keyingi bosqichga yo‘l oldi. Endi ushbu g‘olib jamoalar chorakfinalda o‘zaro kuch sinashadi.

Maydondan tashqarida ham e’tiborga molik voqealar ro‘y bermoqda: Portugaliya milliy jamoasi bosh murabbiyi Roberto Martines iste’foga chiqdi, Paragvayda Kilian Mbappeni tanqid qilishda davom etishmoqda, norvegiyalik futbolchilar esa shamollab qoldi.

Hollivudcha ssenariy

Argentina – Misr 3:2

Gollar: Yosir Ibrohim, 15 (0:1). Ziko, 67 (0:2). Romero, 79 (1:2). Messi, 83 (2:2). Fernandes, 90+2 (3:2)

Aniq ijro etilmagan penalti: Messi, 21’

Argentina: E. Martines, L. Martines, Romero (Otamendi, 90+5), Talyafiko (Gonsales, 66), Molina (Montiel, 73), Paredes, Makallister, Fernandes, de Paul (L. Martines, 66), Alvares (Medina, 90+5), Messi

Misr: Shubayr, Yosir Ibrohim, Robiya, Hafiz, Hani, Lashin (Sayid, 90+5), Ateya, Ashur (Fati, 46), Hassan (Trezege, 73), Saloh, Ziko (Marmush, 80)

Ogohlantirishlar: Shubayr, 90. Fati, 90. Ateya, 90

Argentinaliklar o‘tgan bosqichdayoq dramatik o‘yinlar o‘tkaza olishini isbotlagandi. Ammo 1/8 finalda Misrga qarshi o‘yinda jamoa darajani yana bir bosqichga ko‘tardi va jahon chempionatlari tarixidagi eng yorqin kambeklardan birini amalga oshirdi.

Uchrashuv «Albiseleste» uchun tezkor gol o‘tkazib yuborish bilan boshlandi, keyin esa Lionel Messi penaltini ura olmadi (va jahon chempionati davomida ikki bor penaltidan gol ura olmasdan, antirekord qayd etdi). Ikkinchi bo‘limda argentinaliklar Mustafo Zikodan ikkinchi golni ham o‘tkazib yuborishdi.

Ish sensatsiyaga qarab ketayotganida Lionel Skaloni shogirdlari maksimal hujumkor rejimni yoqishdi. 79-daqiqada Messi to‘pni jarima maydoniga kirib borgan himoyachi Kristian Romeroning boshiga yetkazib berdi va hisob qisqardi. Bir necha daqiqa o‘tib Leoning o‘zi misrlik himoyachilar xatosidan foydalanib, hisobni qisqartirdi, o‘yinga qo‘shib berilgan daqiqalarda esa Enso Fernandes qarshi hujumni g‘alaba goli bilan yakunladi. Argentinaliklar kambek uchun 13 daqiqa sarflashdi – bu ham jahon chempionati tarixiga rekord sifatida kirdi.

Messining o‘zi gollari sonini sakkiztaga yetkzadi va turnir to‘purarlari ro‘yxatida birinchilikni o‘ziga qaytardi, Kilian Mbappe, Erling Holand (ikkisida ham 7 tadan) va Harri Keyn (6) uni ta’qib qilishda davom etadi. Buning o‘zi ham alohida poygaga aylandi: turnirda ilk bor birdaniga uch nafar futbolchida 7 va undan ortiq gol bor.

Messi shu kuni jahon chempionatidagi eng yaxshi to‘purar (21) sifatida ko‘rsatkichini yaxshilab oldi (eng yaqin ta’qibchisi Mbappeda 19), shuningdek, o‘z vatandoshi Maradonani ortda qoldirgan holda jahon chempionatidagi eng yaxshi assistentga (9) aylandi. Bundan tashqari, u jahon chempionatlarida eng ko‘p o‘yin o‘tkazgan (31) futbolchi, jahon chempionatlarida qatorasiga 9 o‘yinda gol urgan ilk futbolchi (hech kimda 7 ta gollik seriya ham yo‘q) va jahon chempionati pley-off bosqichlarida qatorasiga 6 o‘yinda gol urgan ilk futbolchi hisoblanadi.

Tabiiyki, o‘yin hakamlik mojarosisiz kechmadi. Fransiyalik bosh hakam Fransua Letekse hujum boshlanishidagi fol tufayli misrliklarning 60-daqiqadagi golini bekor qildi, 90+2-daqiqada esa argentinaliklar jarima maydoni ichidagi folni inobatga olmadi.

Natijada Afrika vakillari turnirni tark etishda FIFA va hakamlarni keskin ohangda tanqid qilishdi.

«Hakam bizni mag‘lub qilish uchun maydonga tushgandi. Biz Misr xalqini xursand qilishga umid qilgandik, ammo oxir-oqibat Argentinani jahon chempionatidagi g‘alabasi bilan tabriklaymiz. Bu soxta turnir va endi ular qolgan o‘yinlarni o‘ynashlari ham shart emas. Hakam butun bir millatning orzusini barbod qildi va u bizni nishonga oldi, chunki biz Argentinani mag‘lub etmasligimiz kerak edi. Endi xudo oldida javob bersin», – dedi Ziko.

Argentinada esa hakamlikka hech qanday e’tiroz yo‘q. Quvonch ko‘z yoshlarini to‘kkan Messi o‘z jamoadoshlari xarakter ko‘rsatganini e’tirof etdi.

«To‘g‘risini aytsam, biz yurishimizni davom ettirishimiz, buni qanday uddalaganimizni hisobga olsak, bu katta baxt. Hisob 0:2 bo‘lgach, vaziyat ancha murakkablashgandi. O‘yinni o‘zgartira olganimizdan aql bovar qilmas his-tuyg‘ularni his qilyapmiz. Bizga yana juda qiyin bo‘ldi, lekin bu jahon chempionati. Barcha o‘yinlar aynan shunday kechadi. Bu yerda barcha jamoalar teng. Men juda baxtiyorman», – deya tan oldi Messi jurnalistlar bilan muloqotda.

Kolumbiya uyga qaytdi

Shveytsariya – Kolumbiya 0:0

Penaltilar seriyasi: Kintero – (0:1). Jaka – (1:1). Sanches – (1:1)(to‘sin). Amduni – (2:1). Kampas – (2:2). Akanji – (2:2)(xato). Ernandes – (2:2)(darvozabon). Itten – (3:2). Dias – (3:3). Ruben Vargas – (4:3)

Shveytsariya: Kobel, Elvedi, Akanji, Rodriges (Muhaym, 71), Zakariyo (Vidmer, 87), Froyler, Jaka, Yashari (Sou, 46), Ndoy (Ruben Vargas, 90+2), Rider (Amduni, 103), Embolo (Itten, 87)

Kolumbiya: K. Vargas, Lukumi (Mina, 119), Sanches, Mohika, Munos, Puerta, Lerma (Rios, 82), Dias, Arias (Kintero, 66), Xames Rodriges (Kampas, 66), Suares (Ernandes, 82)

Ogohlantirishlar: Jaka, 51. Zakariyo, 59. Muhaym, 105 – Suares, 60. Sanches, 95

Argentina va Misr o‘rtasidagi adrenalinli o‘yindan keyin Shveytsariya va Kolumbiya o‘rtasidagi o‘yinni tomosha qilish muxlislar uchun azobga aylandi. Birinchi bo‘limda jamoalar deyarli hujum qilishmadi va shunchaki vaqt o‘ldirish bilan mashg‘ul bo‘lishdi.

Dastlabki 45 daqiqalikdagi asosiy haylayt esa tribunada o‘tirgan Yurgen Klopp kartoshka frisi tanovul qilayotgani ko‘rsatilgan kadr bo‘ldi. Bu holat ijtimoiy tarmoqlarda maydondagi voqealardan faolroq muhokama qilindi.

Ikkinchi bo‘limda ham vaziyat deyarli o‘zgarmadi – jamoalar bir-birini deyarli bezovta qilishmadi. Faqat qo‘shimcha bo‘limlarda kolumbiyaliklar tashabbusni qo‘lga olishdi, ammo o‘z imkoniyatlaridan foydalana olishmadi va baribir hisob ochilmay qoldi.

Penaltilar seriyasida ham shveysarlar va kolumbiyaliklar amalda bir xil harakat qilishdi. Sanchesning to‘singa borgan zarbasiga yevropaliklar Akanjining xatosi bilan javob qaytardi. Ammo abadiy bunday davom etishi mumkin emasdi va Shveytsariya posboni Gregor Kobel Kucho Ernandesning zarbasini qaytardi, Kolumbiya posboni Kamilo Vargas seyv qila olmadi.

Natijada Shveytsariya 1954 yildan buyon ilk bor mundial chorakfinaliga chiqdi va yarimfinal uchun Argentinaga qarshi o‘ynaydigan bo‘ldi, turnir davomida atigi bitta gol o‘tkazgan (O‘zbekiston bilan o‘yinda Abbosbek Fayzullayevdan) kolumbiyaliklar esa uyga qaytadi.

Martines Portugaliyani tark etdi

Jahon chempionatida iste’folar paradi davom etmoqda. Turnir 1/8 finalida Ispaniyadan uchralgan mag‘lubiyatdan keyin (0:1) Portugaliya bosh murabbiyi Roberto Martines ham jamoani tark etdi. U bunday bo‘lishini rejalashtirmagani, ammo endi boshqa yo‘l qolmaganini aytgan.

«Ushbu qaror jahon chempionatidan oldin qabul qilinganmidi? Yo‘q, u uzil-kesil tasdiqlangan deb o‘ylamayman. Men Portugaliyaga jahon chempionatida g‘alaba qozonish uchun kelgandim va o‘ylaymanki, g‘alabasiz davom ettirishning ma’nosi yo‘q. Endi direktorlar kengashi va prezident yangi murabbiyni tanlash imkoniyatiga ega. Prezident har doim meni qo‘llab-quvvatlagan, lekin shartnomam bugun tugaydi. Boshqa aytadigan gapim yo‘q», – deydi Martines.

Ispaniyalik ushbu mutaxassis Portugaliyani 2023 yilda qabul qilib olgandi, ammo jamoa bilan hech qanday sovrin yuta olmadi.

Bu jahon chempionatida qatnashgan jamoalarda sakkizinchi iste’fo bo‘ldi: Tunis guruh bosqichining birinchi turidan keyinoq Sabri Lyamushiga javob bergandi. Guruh bosqichi yakunlanganidan keyin Hen Men Bo (Janubiy Koreya), Stiv Klark (Shotlandiya) va Miroslav Koubek (Chexiya) iste’foga chiqdi. Pley-offdagi natijalardan keyin Ronald Kuman (Niderlandiya), Sebastyan Bekkasese (Ekvador) va Yulian Nagelsmann (Germaniya) ham lavozimini tark etgandi.

Mbappening senator bilan aytishuvi davom etmoqda

Selesta Amarilya Kilian Mbappega hamla qilishda davom etmoqda. Paragvaylik ushbu senator ayol o‘z mamlakati milliy jamoasi «Uchranglilar»ga yutqazib, turnirni tark etganidan keyin futbolchini «kalondimog‘ va badbashara», shuningdek «o‘zini fransuz qilib ko‘rsatadigan kamerunlik» deb atagandi. Uning postida irqchilik ruhidagi boshqa keskin so‘zlar ham bor edi. Bunga javoban Mbappe uni «jirkanch ayol» deb atadi va bu Amarilyaning navbatdagi zaharli so‘zlariga sabab bo‘ldi.

«Sening takabburliging va nafrating o‘yindan oldin ushbu so‘zlarni aytganingdayoq meni g‘azablantirgandi: «Agar qo‘limizni axlatga tiqishga to‘g‘ri kelsa, tiqamiz». Biz ahmoq emasmiz. Biz sen «axlat» deganda Paragvay milliy jamoasi va umuman barcha paragvayliklarni nazarda tutganing aniq. Keyin esa sen ular «makiyajini olib tashlashdi» deding. Buni ham tushundik, siz – makiyajli elegantlar, biz esa – makiyaj nimaligini ham bilmaydigan qashshoq, qo‘pol odamlarmiz. Butun Paragvay, jumladan, men ham buni shunday qabul qildik. Biz bu so‘zlarni ichimizga yutdik.

Endi men sen o‘z so‘zlaringni qaytarib olishing va mendan uzr so‘rashingni talab qilaman. Men ham sening zo‘ravonligingga toqat qilmoqchi emasman. Sen meni tanimaysan, mening kimligimni bilmaysan va meni o‘z lavozimiga noloyiq jirkanch ayol deb aytishga haqqing yo‘q… So‘zlaringni qaytarib ol, fransuz fuqaroliginga hurmat ko‘rsat va uzr so‘ra. Aks holda, men gender zo‘ravonligi bo‘yicha sud jarayonini boshlashim mumkin», – deya yozgan senator ijtimoiy tarmoqda.

Amarilyaning so‘zlari diplomatik mojaroga sabab bo‘lishiga bir baxya qoldi – Fransiya hukumati ushbu siyosatchini irqchilik uchun qoraladi, mahalliy futbol federatsiyasi esa prokuraturaga murojaat qilmoqchi. Hozircha oqibatlar kuzatilmadi – Paragvay hukumati ham senatorni qoraladi.

Vikinglar shamollab qoldi

Viking bo‘lish degani doim ham sog‘ bo‘lish degani emas. Norvegiya milliy jamoasi bosh murabbiyi Stole Solbakken bir necha futbolchisi shamollagani haqida xabar berdi.

«Bizda faqat Yyergen Larsenning tana harorati ko‘tarilgan, lekin boshqalarda ham yo‘tal va xirillash bor. Barchasiga konditsionerlar, parvozlar, kiyim almashtirish xonasidagi holatlar sabab. Bizda 50 dan ortiq odam bor, bunday holatda kimdir shamollab qolmasligi imkonsiz edi», – degan Solbakken.

Endi murabbiylar shtabi asosiy futbolchilarning sog‘ligi haqida qayg‘urishi kerak – 12 iyul kuni jamoani chorakfinalda Angliyaga qarshi o‘yin kutmoqda.

Source link