Sport
JCh-26. Ochilish o‘yinida uchta qizil ko‘rsatildi
Turnir mezbonlaridan biri bo‘lgan Meksika JAR ustidan oson g‘alabaga erishdi. O‘yinda uch futbolchiga qizil kartochka ko‘rsatildi – bunaqasi JCh ochilish o‘yinlarida hali kuzatilmagan.
2026 yilgi jahon chempionati rasman start oldi. Meksika turnirning birinchi o‘yinida JAR ustidan ishonchli g‘alabaga erishdi (2:0).
Meksika – JAR 2:0
Gollar: Kiniones, 9 (1:0). Himenes, 67 (2:0)
Meksika: Ranhel, Montes, Vaskes, Galyardo, Reyyes, Lira (Alvares, 76), Fidalgo (Mora, 66), Guterres (Chaves, 66), Kiniones (Vega, 79), Alvarado, Himenes (Gonsales, 76)
JAR: Uilyams, Mbokazi, Sibisi, Okon, Modiba (Appollis, 77), Mudau, Sitole, Adams (Zvane, 61), Mokoena, Foster (Mbata, 56), Rayners (Makgopa, 77)
Ogohlantirishlar: Guterres, 23 – Mokoena, 17. Sibisi, 74
Chetlatish: Sitole, 49. Zvane, 84. Montes, 90
Afrikaliklar ikkinchi bo‘lim boshida, hisob 0:1 ekanida son jihatdan ozchilik bo‘lib qolishdi. Yaya Sitole 49-daqiqada JChdagi debyut o‘yinida to‘g‘ridan to‘g‘ri qizil kartochka oldi – birinchi gol urilgan vaziyatda ham aynan u xatoga yo‘l qo‘ygandi. Qizil ko‘rsatilgan vaziyatda esa u Brayan Guterresni jarima maydoniga kirishda qo‘pollik ishlatib to‘xtatdi – hakam buni so‘nggi umid foli deb baholadi.
O‘yin oxirlashganida, hisob 2:0 ko‘rinishiga kelib bo‘lganida esa VAR aralashuvi JAR jamoasida ikkinchi qizil kartochkaga olib keldi. O‘yinga zaxiradan qo‘shilgan Temba Zvane hujum vaqtida Alvaradoning boshiga qo‘li bilan zarba berdi. O‘yin bosh hakami Vilton Sampayo monitorga borib vaziyatni ko‘rib chiqdi va cho‘ntagidan qizil kartochkasini chiqardi.
Va bu hali hammasi emasdi. O‘yinga qo‘shib berilgan daqiqalarda Meksika ham o‘n kishi bo‘lib qoldi. Jamoa sardori Sesar Montes darvozabon bilan yakkama-yakka vaziyatga chiqib borayotgan Kxuliso Mudauni yiqitdi.
Ochilish o‘yinidagi uchta qizil kartochka – JCh tarixida ilk bor kuzatilmoqda.
Yana nimalar bo‘ldi: Himenesning JChdagi ilk goli, 17 yoshli meksikalik debyuti
Meksika tarkiblar teng holatda ham, ko‘pchilik bo‘lib olganida ham kuchli o‘yin namoyish etdi.
● Mezbonlar ilk daqiqalardan bosim uyushtirdi. Jamoaning tajribali hujumchisi Raul Himenes 5-daqiqadayoq ajoyib imkoniyatga ega bo‘lgandi, ammo JAR darvozaboni Ronuen Uilyams uning kuchli zarbasini qaytardi.
● Lekin Uilyams 9-daqiqada to‘pni oyoqlari orasidan o‘tkazib yubordi – meksikaliklar vingeri Hulian Andres Kiniones o‘z imkoniyatidan foydalandi. Bu vaziyatda Yaya Sitole pressing ostida to‘p yo‘qotdi va raqibga gol sovg‘a qildi. Meksikaliklar yarimhimoyachisi Erik Lira to‘pni egallab, darhol Kinionesga tashlab berdi, u esa markazga ko‘chdi va to‘pni darvozabon oyoqlari orasidan o‘tkazdi.
● Kiniones – KONKAKAF mamlakatlarining JChdagi ilk golni urgan ilk futbolchisiga aylandi. Qolaversa, bu meksikaliklar 2006 yildan buyon JCh o‘yinlarida urgan eng tezkor gol bo‘ldi – o‘shanda jamoa himoyachisi Rafael Markes Argentina darvozasini ishg‘ol etgandi.
Kiniones – Meksika milliy jamoasi safida o‘ynayotgan ilk kolumbiyalikdir. U Kolumbiyada dunyoga kelgan, ammo faoliyatining katta qismini Meksikada o‘tkazgan. Hozirda Saudiya Arabistonining «Al-Qodisiya» jamoasi safida to‘p suradi, u yakunlangan mavsumda Krishtianu Ronaldudan ko‘proq gol urgan: 33 gol va to‘rt assist.
● Ko‘pchilik bo‘lib qolganidan keyin meksikaliklar g‘alabali hisobni mustahkamlashdi. Himenes ikkinchi bo‘lim o‘rtalarida urgan goldan keyin amalda o‘yinda intriga qolmadi: tajribali hujumchi Roberto Alvaradoning uzatmasidan unumli foydalandi. E’tiborli tomoni, bu uning JChdagi ilk goli bo‘ldi, holbuki u bungacha 2014 yildan buyon uchta jahon chempionatida ishtirok etgandi. Lekin oldingi turnirlarda unda o‘yin amaliyoti ko‘p bo‘lmagan va asosan zaxiradan maydonga tushgandi.
● O‘yinning oxirgi 25 daqiqasida Meksika safida 17 yoshli Hilberto Mora harakat qildi – u JCh-2026 ning eng yosh futbolchisidir. U maydonga tushayotganida tribunalarda yig‘ilgan muxlislar uning nomini aytib, olqishlashdi. Mora allaqachon Lamin Yamalning rekordlarini buzishga kirishgan. U xalqaro turnir o‘yinida g‘alabaga erishgan eng yosh futbolchidir: 16 yosh-u 265 kunligida KONKAKAF-2025 Oltin kubogini qo‘lga kiritgandi. Mahalliy «Tixuana» klubida o‘ynovchi ushbu yosh futbolchining natijasi Ginness rekordlar kitobidan o‘rin olgan.
● Meksikaliklar o‘yinda mutlaq ustunlikka erishdi: zarbalar bo‘yicha ko‘rsatkich 16:3 ko‘rinishini oldi. JAR juda bo‘sh ko‘rindi – amalda xavfli vaziyatlar yarata olishmadi.
Meksika keyingi turda Janubiy Koreyaga qarshi, JAR – Chexiya bilan o‘ynaydi.
«Paxtakor», «Neftchi» va «Nasaf» klublari 2026/2027-yilgi mavsumda Osiyo klublar musobaqalarida yurtimiz sharafini himoya qilmoqda. «Paxtakor» va «Neftchi» OFK Chempionlar ligasi Elit (Elite) turnirida, «Nasaf» OFK Chempionlar ligasi 2 musobaqasida ishtirok etmoqda.
Jamoalarga turnirdagi ishtiroki, har bir g‘alabasi hamda keyingi bosqichlarga yo‘l olgani uchun OFK tomonidan yirik miqdorda mukofot pullari ajratiladi.
«Paxtakor» va «Neftchi» nufuzli Elit turnirning asosiy (liga) bosqichida qatnashgani uchun kafolatlangan 800 ming AQSh dollaridan qo‘lga kiritadi. Bundan tashqari, ushbu musobaqada jamoalar har bir g‘alaba uchun qo‘shimcha 100 ming dollar bonus ishlab olishlari mumkin. Klublarning umumiy daromadi ular qayd etadigan natijalar va g‘alabalar soniga qarab oshib boradi.
Musobaqaning pley-off bosqichida ham mukofot pullari sezilarli darajada yuqori. OFK Chempionlar ligasi Elit turnirida 1/8 finalga yo‘l olgan klubga 200 ming dollar, chorak final ishtirokchisiga 400 ming dollar, yarim finalga chiqqan jamoaga esa 600 ming dollar mukofot puli taqdim etiladi.
Musobaqa g‘olibi — turnir chempioni 10 million dollarlik bosh sovrinni qo‘lga kiritadi. Finalda mag‘lub bo‘lgan jamoaga 4 million dollar mukofot puli to‘lanadi. Bir so‘z bilan aytganda, «Paxtakor» va «Neftchi» musobaqada qancha uzoqqa borsa, shuncha ko‘p daromad oladi — bu mablag‘ bir necha million dollarga yetishi mumkin.
«Nasaf» OFK Chempionlar ligasi 2 turnirini guruh bosqichidan boshlaydi. Ushbu bosqichda qatnashgani uchun qarshiliklarga kafolatlangan 300 ming dollar mukofot puli ajratiladi. Bundan tashqari, guruhdagi har bir g‘alaba uchun 50 ming dollardan qo‘shimcha bonus to‘lanishi ko‘zda tutilgan.
OFK Chempionlar ligasi 2 turnirining pley-off bosqichida sovrinlar quyidagicha taqsimlanadi: 1/8 finalga chiqqan klub 80 ming dollar, chorak finalga yo‘l olgan jamoa 160 ming dollar, yarim final ishtirokchisi esa 240 ming dollar mukofot oladi.
Turnir g‘olibiga 2,5 million dollar, finalchiga 1 million dollar mukofot puli beriladi. Shunday qilib, «Nasaf» ham musobaqadagi muvaffaqiyatli natijalari evaziga boshlang‘ich 300 ming dollarni (bir necha) million dollargacha ko‘paytirish imkoniyatiga ega.
«Paxtakor» klubi Elit Osiyo chempionlar ligasi asosiy bosqichini durang bilan boshladi.
Jiddada turnirning amaldagi g‘olibi «Al-Ahli» klubiga qarshi o‘ynagan paxtakorchilar 86-daqiqada hisobni ochishdi. Ammo asosiy vaqtga qo‘shib berilgan daqiqalarda javob goli o‘tkazib yuborildi.
«Paxtakor» keyingi o‘yinni 12-oktyabrda Toshkentda Saudiya Arabistonining «Al-Qodisiya» klubiga qarshi o‘tkazadi.
Elit OChL. G‘arb mintaqasi. 1-tur
14-sentyabr, Jidda, «King Abdullah Sports City» stadioni
Al-Ahli – Paxtakor 1:1
Gollar: Firas al-Buraykan (90+3) — Flamarion (86)
Bosh hakam: Abdulla Jamaliy (Kuvayt)
Al-Ahli: Eduard Mendi, Ibrahima Diabi (Valentin Atangana 62), Galeno (Meshal Al-Mutayriy 53), Said Baattia, Ivan Toni (Firas Al-Buraykan 68), Mateus Martins, Merix Demiral (Muhammad Sulaymon 68), Saad Balobaid, Rayan Hamid, Solih Abu Alshamat, Naif Masud (Eduard Spersyan 46)
Paxtakor: Vladimir Nazarov, Zaid Tahsin (Murtazo Puraliganji 46), Dilshod Saitov, Ibrohim Ibragimov, Akmal Mozgovoy (Muhammadali Dilshodbekov 88), Dostonbek Hamdamov (Flamarion 68), Bashar Resan, Abdurauf Bo‘riyev, Ayman Husayn (Stiven Chinedu 69), Sherzod Nasrullayev (Hojiakbar Alijonov 78), Muhammadrasul Abdumajidov
Ogohlantirishlar: Ibrohim Ibragimov (63), Solih Abu Alshamat (64)
Eslatib o‘tamiz, kecha Elit Osiyo chempionlar ligasi 1-turida Farg‘onaning «Neftchi» klubi o‘z maydonida «Eyr Fors» ustidan 1:0 hisobida ustun kelgandi.
Hindistonda 46-Butunjahon shaxmat olimpiadasi oldidan an’anaviy Mash’ala estafetasi marosimi bo‘lib o‘tdi.
Marosimda FIDE prezidenti vazifasini bajaruvchi Vishvanatan Anand va Hindiston shaxmat federatsiyasi prezidenti Nitin Narang olimpiada mash’alasini o‘zbekistonlik grossmeyster Javohir Sindarovga tantanali ravishda topshirdi.
Endilikda ramziy olov Samarqandda bo‘lib o‘tadigan 46-Butunjahon shaxmat olimpiadasiga yetkaziladi.
Eslatib o‘tamiz, 46-Butunjahon shaxmat olimpiadasining boshlanishiga 2 kun qoldi.
FIDE 2026-yilgi jahon chempionligi uchun match reglamentini e’lon qildi. Unga ko‘ra, amaldagi jahon chempioni Gukesh Dommaraju o‘zbekistonlik grossmeyster Javohir Sindarovga qarshi shaxmat tojini himoya qiladi.
Match 22-noyabrdan 12-dekabrgacha Shveysariyaning Jeneva shahridagi Fondation Martin Bodmer majmuasida bo‘lib o‘tadi. Birinchi klassik partiya 24 noyabrda, so‘nggisi esa 11-dekabrda o‘ynaladi. Agar 14 partiyadan keyin hisob teng bo‘lsa, 12-dekabr kuni tay-breyk o‘tkaziladi.
Jahon chempionligi bahsi ko‘pi bilan 14 ta klassik partiyadan iborat bo‘ladi. Birinchi bo‘lib 7,5 ochko to‘plagan shaxmatchi chempionlikni qo‘lga kiritadi.
Gukesh va Sindarov match boshlangan paytda 20 yoshda bo‘ladi. Shu tariqa, bu jahon chempionati tarixidagi eng yosh ikki shaxmatchi o‘rtasidagi chempionlik bahsi bo‘ladi.
Javohir Sindarov jahon chempionligi uchun matchda ishtirok etish huquqini 2026-yilgi FIDE Nomzodlar turnirida g‘olib chiqib qo‘lga kiritdi. U musobaqada 14 imkoniyatdan 10 ochko to‘plab, birorta ham partiyada mag‘lub bo‘lmadi va turnir g‘olibligiga bir tur qolgandayoq erishdi.
Bundan oldin Sindarov 2025-yilgi FIDE Jahon kubogida ham g‘olib chiqqan edi. U mutlaq jahon chempioni unvoni uchun matchda ishtirok etadigan O‘zbekiston tarixidagi birinchi shaxmatchi bo‘ladi.
Gukesh esa 2024-yilda Singapurda Din Lijenni 7,5:6,5 hisobida mag‘lub etib, jahon chempioni bo‘lgan. U o‘shanda 18 yoshida shaxmat tarixidagi eng yosh mutlaq jahon chempioniga aylangan.
Matchning umumiy mukofot jamg‘armasi 2,5 million dollarni tashkil etadi. Reglamentga ko‘ra, har bir g‘alaba uchun shaxmatchiga 200 ming dollardan beriladi, qolgan mablag‘ esa ikki ishtirokchi o‘rtasida taqsimlanadi.
Jahon chempionligi uchun bahs Fondation Martin Bodmer — jahon adabiyoti va insoniyat tarixiga oid noyob qo‘lyozmalar hamda hujjatlar saqlanadigan mashhur kutubxona-muzeyda o‘tkaziladi.
15-sentyabr kuni Samarqand shahrida 46-FIDE Butunjahon shaxmat olimpiadasiga start beriladi. O‘zbekiston nufuzli musobaqaga ilk bor mezbonlik qilmoqda.
Olimpiada 15–27 sentyabr kunlari Silk Road Samarkand xalqaro ko‘rgazma markazida o‘tkaziladi. Ilk tur bahslari 16 sentyabrda boshlanadi. Jamoalar ochiq va ayollar toifasida 11 tur davomida g‘oliblik uchun kurashadi.
Musobaqada qariyb 400 ta terma jamoa, 4 mingdan ortiq shaxmatchi, murabbiy va delegatsiya a’zosi ishtirok etishi kutilmoqda.
Olimpiada bilan bir vaqtda Samarqandda FIDE Kongressi ham o‘tkaziladi. 24-sentyabrda shaxmatni ta’limga integratsiya qilishga bag‘ishlangan FIDE ta’lim sammiti, 25-sentyabrda esa hududiy saylovlar bo‘lib o‘tadi.
26–27 sentyabr kunlari FIDE Bosh assambleyasi o‘tkaziladi. 26-sentyabrda tashkilotning keyingi to‘rt yillik rahbariyati saylanadi. Shuningdek, Bosh assambleyada 2030-yilgi Butunjahon shaxmat olimpiadasi mezboni ham aniqlanadi.
Olimpiadaning so‘nggi turi va yopilish marosimi 27-sentyabrga belgilangan.
Samarqand Markaziy Osiyo fuqarolik jamiyati institutlarini birlashtirgan muloqot maydoniga aylandi
Bugun O‘zbekistonda harorat 34 darajagacha isiydi
Dollar tinimsiz qimmatlab bormoqda
-
Jamiyat5 days ago
Qichqiriq mahallasidagi o‘zgarishlar ko‘zdan kechirildi
-
Siyosat3 days ago
Shavkat Mirziyoyev Seuldagi Milliy yodgorlik majmuasiga bordi
-
Jamiyat4 days ago
Prezident O‘zbekiston Milliy muzeyi qurilishini ko‘zdan kechirdi (foto)
-
Jamiyat3 days ago
Murojaatlar bilan ishlashdagi kamchiliklar uchun 151 nafar xodim lavozimidan ozod etildi
-
Mahalliy3 days ago
Toshkentda xorijiy tillarga ixtisoslashtirilgan maktab-internati ochildi
-
Sport3 days agoButunjahon shaxmat olimpiadasi mash’alasi O‘zbekistonga keltiriladi
-
Siyosat3 days ago
Shavkat Mirziyoyevning O‘zbekiston va Koreya hamkorligiga bag‘ishlangan maqolasi e’lon qilindi
-
Siyosat3 days ago
Shavkat Mirziyoyevning O‘zbekiston — Koreya biznes forumidagi asosiy fikrlari