Ulardan yozda yorqin o‘yinlar kutilmoqda.

Rayan, Braziliya

Yoshi: 19
Ampluasi: vinger
Klubi: «Bornmut»
2025/26 yillar mavsumidagi statistikasi: 15 o‘yin, 5 gol, 2 uzatma

Pentakampeonlar safida «Uembli» o‘yingohida inglizlarga qarshi o‘yinda terma jamoadagi ilk golini urgan Endrik ham bor. Ammo u ancha oldinroq tanilib bo‘lgandi, jamoadagi kutilmagan qahramon roliga esa uning 19 yoshli tengdoshi Rayan da’vogarlik qilmoqda. Shu yil qishida Yevropaga kelgan vinger terma jamoada hozircha faqat bir marta, aprel oyida Xorvatiyaga qarshi o‘rtoqlik uchrashuvida maydonga tushdi.

Rayan barcha futbolchilarga xos skillaridan tashqari dadilligi bilan maqtana oladi. Tezkor, keskin harakatlanadigan, yaxshi dribling va kuchli zarbaga ega bo‘lgan bu yosh futbolchi o‘yinda tashabbusni o‘z zimmasiga olishdan tortinmaydi. U yanvarda «Bornmut»ga kelib qo‘shilgach, «Vulverhempton» bilan o‘yinda debyut qildi va o‘sha o‘yindayoq Skottga golli uzatma berdi. Keyingi turda Andoni Iraola ushbu yangi futbolchini boshlang‘ich tarkibga kiritdi va u «Aston Villa» bilan o‘yinda ilk golini urdi. Bir hafta o‘tib «Everton» darvozasini ham ishg‘ol etdi. Mavsum yakunida esa u qatorasiga uchta o‘yinni golsiz tark etmadi.

Viktor Munyos, Ispaniya

Yoshi: 22
Ampluasi: yarimhimoyachi
Klubi: «Osasuna»
Statistikasi: 36 o‘yin, 7 gol, 5 uzatma

Katta klublar tarbiyalanuvchilari taqdiri –  ko‘p hollarda murakkab va og‘riqli mavzu. Bunday futbolchilarga hech kim ko‘p vaqt taqdim etmaydi va darhol natija ko‘rsatish talab etiladi. Ayniqsa barcha pozitsiyalari uchun katta transferlar amalga oshiriladigan «Real»dek klubda. Shuning uchun klubning ko‘pchilik tarbiyalanuvchilari baxtini boshqa joylardan izlashiga to‘g‘ri keladi. Vinisius Junior bilan bitta pozitsiyada o‘ynovchi 22 yoshli Munyos ham o‘tgan yil yozida 5 million yevro evaziga «Osasuna»ga sotilgandi va u o‘zi uchun to‘langan mablag‘ni to‘liq oqladi.

Ikkala qanotda yorqin va dadil o‘yin ko‘rsatib, mavsum davomida jamoa to‘purari Budimirni golli uzatmalar bilan ta’minlab kelgan ushbu yosh vinger Ispaniya milliy jamoasi bosh murabbiyi Luis de la Fuentening nazariga tushmasligi mumkin emasdi. Uning milliy jamoadagi debyuti ham ajoyib chiqdi: u mart oyida Serbiyaga qarshi o‘rtoqlik o‘yinida zaxiradan tushib, Ferran Torresning pasini golga aylantirdi, Misrga qarshi o‘yinda esa u tanaffusda Yamalni almashtirdi.

Bunday debyutdan keyin unga «Barselona»dan qiziqish mavjudligi haqida xabarlar tarqaldi, «Real»dagilar esa uni ortga qaytarish haqida o‘ylay boshlashdi. Madriddagilar ushbu iste’dodli tarbiyalanuvchisini azaliy raqibga berib yubormaslik uchun, kelishuvdagi tegishli bandni ishga tushirsa, transfer 8 million yevro evaziga amalga oshadi. Ushbu futbolchini o‘z safida ko‘rishni istayotgan «Aston Villa» va Gordon uchun o‘rinbosar qidirayotgan «Nyukasl»ga esa 40 million yevrolik narx belgilangan.

Yan Diomande, Kot-d’Ivuar

Yoshi: 19
Ampluasi: vinger
Klubi: «Leypsig»
Statistikasi: 34 o‘yin, 13 gol, 9 uzatma

Futbol bilan dastlab AQShda shug‘ullana boshlagan yosh afrikalikning karerasi tezlik bilan o‘sib bordi. 2025 yil qishida u La ligadan tushib ketgan «Leganes» bilan shartnoma imzolagandi va Ispaniyadagi o‘nta o‘yin «Leypsig» iste’dodli vinger uchun 20 million yevro to‘lab berishi uchun yetarli bo‘ldi. Hozirda «buqlar» jamoasi Diomande uchun 130 million yevro so‘ramoqda. Unga «Liverpul» va «PSJ» kabi badavlat klublar da’vogar.

Futbolchining o‘zi esa Germaniyada yana bir mavsum qolishni istamoqda – u yangi mavsumda jamoasi bilan Chempionlar ligasida ishtirok etadi. Ammo jahon chempionatidagi o‘yinlariga qarab, unga talabgorlar otni qamchilashi mumkin – hozirdanoq Diomande chempionatning eng yaxshi yosh futbolchisi bo‘lish uchun asosiy da’vogarlardan biri bo‘lib turibdi. Kuchli driblingga ega, ikkala qanotda ham o‘ynay oladigan va istalgan nuqtadan darvozani ishg‘ol etishi mumkin bo‘lgan yosh vingerdan katta narsa kutilmoqda. Qolaversa, u terma jamoasi bilan qishda bo‘lib o‘tgan Afrika kubogida tajriba orttirgan, o‘shana ivuarliklardan chempionlik titulini himoya qilish talab etilgandi, ammo jamoa dramatik kechgan chorakfinal o‘yinida Misrga yutqazib qo‘ygandi (2:3). Diomande qit’a birinchiligi pley-offining birinchi o‘yinida burkino-fasoliklar darvozasini ishg‘ol etdi, umuman, terma jamoadagi ilk golini esa o‘tgan yilda, JCh saralash o‘yinlari vaqtida urgandi.

Yoan Manzambi, Shveytsariya

Yoshi: 20
Ampluasi: yarimhimoyachi
Klubi: «Frayburg»
Statistikasi: 47 o‘yin, 7 gol, 6 uzatma

Shveytsariyalik yarimhimoyachi – «Frayburg» akademiyasi mahsuli va yozgi transferlar vaqtida talash bo‘lishi kutilayotgan futbolchilardan biri. «Arsenal», «Real», «Chelsi», «PSJ», «MYu» va «Bavariya» kabi jamoalar ushbu havbekka da’vogar sifatida ko‘rilmoqda. Bunday jamoalarning barchasiga butun maydon bo‘ylab mehnat qiladigan, uzoqdan kuchli va aniq zarba bera oladigan futbolchi kerak. Ammo yaqinda yosh futbolchi bilan shartnomani 2030 yilga qadar uzaytirgan nemislar klubi o‘z tarbiyalanuvchisi uchun 50 million yevrolik narx belgilab qo‘ygan, ammo muzokaralar jahon chempionatidan keyingina o‘tkaziladi. U vaqtga borib futbolchining bahosi yanada ko‘tarilishi mumkin.

Manzambi mavsum davomida kuchli raqiblarga qarshi o‘yinlarda o‘zini yo‘qotib qo‘ymasligini va muhim o‘yinlarda yo‘qolib qolmasligini namoyish etdi («Bavariya»ga 2 gol urgan). Yoan «Frayburg» Yevropa Ligasi finaliga chiqishida asosiy rollardan birini o‘ynadi (yarimfinalda «Braga» darvozasiga g‘alaba golini urdi). Terma jamoasida esa asosiy tarkib futbolchisi emasligiga qaramay, foydali harakatlar koeffitsiyenti bo‘yicha yuqori ko‘rsatkich qayd etdi. U saralash bosqichida Shvetsiyaga qarshi ikki o‘yinda so‘nggi daqiqalarda maydonga tushib (mos ravishda 7 va 6 daqiqa o‘ynagan), bittadan gol urishga ulgurdi. Germaniya chempionati yakunlariga ko‘ra Manzambi uzoq masofadan gol urish bo‘yicha (3 ta) yarimhimoyachilar orasida eng yaxshi natijani qayd etdi, u shunday gollaridan birini aprel oyida Noyyer qo‘riqlayotgan darvoza to‘qqizligiga 25 metr masofadan zarba berish orqali urgandi.

Luka Vushkovich, Xorvatiya

Yoshi: 19
Ampluasi: himoyachi
Klubi: «Hamburg»
Statistikasi: 30 o‘yin, 6 gol

Xorvatiya – 2018 yilgi jahon chempionati vitse-chempioni, Qatardagi turnirda esa bronza medallari sohibi. Bundan tashqari, bolqonliklar jamoasida muntazam ravishda iste’dodli futbolchilar paydo bo‘ladi. «Shashkachilar»ning so‘nggi mundiallarda natija ko‘rsatgan Modrich, Perishich, Kovachich, Kramarich va Livakovich kabi futbolchilari katta ehtimol bilan so‘nggi mundialiga kelgan va yuqori natijalarga da’vo qilmayapti. Shu bilan birga, bu turnir ularning yonidagi yosh futbolchilar uchun tajriba orttirish vazifasini o‘taydi. Shunday yoshlardan biri «Komo» safidagi Baturin, ammo yarimhimoya chizig‘idagi kuchli raqobat unga o‘zini ko‘rsatish uchun kam imkon qoldiradi.

Lekin himoya chizig‘idagi Vushkovichda buning uchun imkoniyat yetarli. Transfer huquqi «Tottenhem»ga tegishli bo‘lgan va o‘tgan mavsumni ijara asosida Bundesligada, «Hamburg» safida o‘tkazgan futbolchi terma jamoa asosiy tarkibiga loyiq ekanini ko‘rsatdi. U o‘z amluasiga qaramay, Germaniya chempionati o‘yinlarida 6 ta gol urdi. Natijada 193 santimetr bo‘yga ega bo‘lgan Luka saralash turniri o‘yinlari vaqtida yoshlar jamoasidan asosiy jamoaga jalb etildi.

Bahorda Braziliya va Kolumbiyaga qarshi kechgan o‘rtoqlik o‘yinlarida to‘liq 90 daqiqa harakat qildi. Zlatko Dalich bu o‘yinlarda uch nafar markaziy himoyachidan iborat sxemani sinovdan o‘tkazdi, Vushkovich kolumbiyaliklarga qarshi o‘yinda milliy jamoadagi ilk golini nishonladi.

Niko Pas, Argentina

Yoshi: 21
Ampluasi: yarimhimoyachi
Klubi: «Komo»
Statistikasi: 40 o‘yin, 13 gol, 7 uzatma

Bu mavsumda Pas Italiyani nafaqat yorqin o‘yinlari bilan larzaga keltirgan, balki sensatsion ravishda Chempionlar ligasiga yo‘llanma olgan «Komo»ning asosiy futbolchisiga aylandi. Sesk Fabregas yosh futbolchilar uchun ajoyib o‘qituvchi ekani, ularning har biriga individual yondashishini namoyish etib, Nikoning qirralarini ochdi. Yosh argentinalik o‘z kumirlaridan birining maslahatlariga diqqat bilan quloq qoldi, u esa shogirdini qat’iy qolipga solmadi va ijod uchun erkinlik taqdim etdi.

Natijada Pas chiziqlar orasida ajoyib harakatlana oladigan, nozik uzatmalar uchun imkoniyat topadigan va kerakli pallani his qilib, vaqti kelganda o‘zi ham zarba berish nuqtasiga chiqadigan futbolchi bo‘lib yetishdi. Uning saralash bosqichida Boliviyaga qarshi o‘yinga to‘g‘ri kelgan debyuti ertaknamo kechdi: Niko maydonga tushganidan 13 daqiqa o‘tib o‘z kumiri bo‘lgan Messiga golli uzatma berdi. Bahorda esa yana bir diqqatga sazovor voqea ro‘y berdi – Mavritaniya bilan o‘yinda «Albiseleste» safida ilk golini nishonladi. Argentina termasi ustozi Lionel Skaloni Nikoga jahon birinchiligida ham o‘zini ko‘rsatishga imkon berishiga shubha yo‘q.

Source link