Iqtisodiyot
Kichik biznesga keng ko‘lamli soliq erkinliklari e’lon qilindi (batafsil)
AOSdan QQSga o‘tish chegarasi qariyb 5 mlrd so‘m deb belgilandi va bu miqdor BHMga bog‘lab qo‘yildi. Savdo va xizmat ko‘rsatish hamda umumiy ovqatlanish sohalari uchun 6 foizlik QQSni nazarda tutuvchi soddalashtirilgan soliq rejimi joriy etilmoqda. QQS masalasida tadbirkorlarni qiynab kelgan qator muammolarga yechim berildi.
“Kichik biznes subektlarining o‘sishi uchun yanada qulay iqtisodiy va ma’muriy shart-sharoitlar yaratish to‘g‘risida” prezident farmoni e’lon qilindi.
QQSga o‘tish chegarasi oshirildi
2026 yil 1 iyundan boshlab umumiy soliq rejimiga o‘tish uchun belgilangan chegaraviy miqdor bazaviy hisoblash miqdori (BHM)ning 12 000 baravari etib belgilanadi. Bu summa hozirda 4 mlrd 944 mln so‘mga teng.
2020 yil 1 yanvardan buyon umumiy soliq rejimiga o‘tish chegarasi 1 mlrd so‘m edi.
6 foizlik QQS
2026 yil 1 iyundan 2030 yil 1 yanvarga qadar asosiy faoliyat turi umumiy ovqatlanish, savdo yoki xizmat ko‘rsatish sohasi bo‘lgan tadbirkorlik sub’yektlariga (davlat ulushi 50 foiz va undan yuqori bo‘lgan korxonalar hamda yirik soliq to‘lovchilar bundan mustasno) ixtiyoriy ravishda qo‘shilgan qiymat solig‘ini hisoblab chiqarish va to‘lashning soddalashtirilgan tartibini tanlash huquqi beriladi.
Soddalashtirilgan tartibda:
QQS stavkasi tovarlarni (xizmatlarni) realizatsiya qilish bo‘yicha barcha aylanmalarga nisbatan 6 foiz etib belgilanadi;
foyda solig‘i stavkasi 0 foiz etib belgilanadi va soliq hisobotini taqdim etish majburiyati bekor qilinadi;
sotib olingan tovarlar (xizmatlar) bo‘yicha to‘langan qo‘shilgan qiymat solig‘i summasini hisobga olish huquqi berilmaydi;
soliq solishning umumbelgilangan tartibida nazarda tutilgan QQS bo‘yicha mavjud imtiyozlar, preferensiyalar va to‘langan soliqning bir qismini qaytarib berish tartibi qo‘llanmaydi; QQSning mavjud salbiy farq summasi hisobdan chiqariladi;
Soddalashtirilgan tartibdagi tadbirkorlik sub’yektlaridan tovarlar va xizmatlarni sotib olgan xaridorlarda QQS summasini hisobga olish huquqi saqlanib qoladi.
QQS bo‘yicha soddalashtirilgan tartibga o‘tish yoki uni qo‘llashdan voz kechish tadbirkorlik sub’yektlari tomonidan xabarnoma yuborilgan oydan keyingi oyning birinchi sanasidan amalga oshiriladi.
Soddalashtirilgan tartibdan umumbelgilangan tartibga o‘tilganda, soliq to‘lovchi bunday o‘tish sanasida o‘z balansida mavjud bo‘lgan tovar-moddiy zaxiralar va uzoq muddatli aktivlar qoldiqlarining balans qiymatida hisobga olingan QQS summalarini belgilangan tartibda hisobga olish huquqiga ega bo‘ladi.
Soliq qo‘mitasi elektron hisobvaraq-fakturalar va xarid cheklarida QQSni 6 foizlik stavka bo‘yicha hisoblash hamda uning alohida hisobini yuritish tizimini bir oy muddatda joriy etishi kerak.
QQS ma’murchiligini yaxshilash
Qo‘shilgan qiymat solig‘i to‘lovchisi guvohnomasini vaqtincha to‘xtatib turish tartibi bekor qilindi.
Importni amalga oshiruvchi yuridik shaxslar, yakka tartibdagi tadbirkorlar va o‘zini o‘zi band qilgan shaxslarni majburiy tartibda qo‘shilgan qiymat solig‘i to‘lovchisi deb e’tirof etish tartibi ham tugatildi.
Bundan buyon QQS to‘lovchisi guvohnomasi faqat ushbu soliq to‘lovchilar hisobini yuritish maqsadida beriladi va ta’sir choralarini belgilashga asos bo‘lib hisoblanmaydi.
2027 yil 1 yanvardan boshlab soliq xavfi darajasi past bo‘lgan hollarda QQSning salbiy farq summasini qaytarishda (qoplashda) inson omili ishtirokidagi joriy amaliyotdan voz kechiladi.
Soliq qo‘mitasi hamda Iqtisodiyot va moliya vazirligi 2026 yil 1 oktyabrga qadar elektron hisobvaraq-fakturalar va soliq hisobotining xavf darajasini real vaqt rejimida baholash natijasida qo‘shilgan qiymat solig‘ining salbiy farq summasini avtomatik tarzda qaytarish (qoplash) amaliyotini joriy etishi kerak.
Soliq to‘lovchilarda mazkur farmon kuchga kirgunga qadar hosil bo‘lgan hamda kelishda hosil bo‘ladigan 10 mln so‘mgacha QQS bo‘yicha salbiy farq summalari ularning arizasi talab etilmagan holda, avtomatik tartibda qaytarib beriladi. Ushbu summani qoplab berish bilan bog‘liq soliq tekshiruvlari o‘tkazilmaydi.
Kichik biznes sub’yektlariga ma’muriy yukni kamaytirish
2028 yil 1 yanvarga qadar kichik biznes sub’yektlariga soliq organlarining “Soliq xavfini aniqlash, tahlil qilish va baholash” avtomatlashtirilgan dasturi orqali aniqlanadigan soliqqa oid huquqbuzarlik alomatlarini mustaqil tuzatish imkoniyati berilib, quyidagi soliq tekshiruvlari o‘tkazilmaydi:
soliq xavfi summasi besh yuz million so‘mgacha bo‘lganda — soliq auditi;
soliq xavfi summasi yuz million so‘mgacha bo‘lganda — sayyor soliq tekshiruvi.
2026 yil 1 iyuldan boshlab kameral soliq tekshiruvi talabnomasiga tushuntirishlar va (yoki) tuzatishlar taqdim etilganda, soliq to‘lovchilarning banklardagi hisobvaraqlari bo‘yicha operatsiyalarni faollashtirish jarayoni to‘liq avtomatlashtirilishi kerak.
2027 yil 1 yanvardan boshlab, kichik biznes sub’yektlariga buxgalteriya hisobini yurituvchi tashkilotlar va soliq maslahatchilarini jalb qilish xarajatlarini ikki baravar oshirgan holda chegirishga ruxsat beriladi.
Mehmonxona va umumiy ovqatlanish sohalari
2026 yil 1 iyundan boshlab, mehmonxona va umumiy ovqatlanish xizmatlarini ko‘rsatuvchi tadbirkorlik sub’yektlari tomonidan:
alkogol va tamaki mahsulotlarini sotishda naqd pul to‘lovlarini qabul qilishga ruxsat beriladi;
alkogol mahsulotlari xarid qilinganda raqamli markirovka kodlari ushbu sub’yektlarda yakuniy iste’molga realizatsiya qilingan deb e’tirof etiladi.
2026 yil 1 iyundan boshlab, umumiy ovqatlanish xizmatlarini ko‘rsatuvchi tadbirkorlik sub’yektlari uchun:
ayrim toifadagi xodimlarni mehnat organlarining mobil ilovasi orqali soddalashtirilgan tartibda shu kunning o‘zida va muayyan muddatga rasmiylashtirish va ish haqini to‘lash tartibi joriy etiladi;
to‘langan qo‘shilgan qiymat solig‘ining bir qismini qaytarish, tushumning naqd pulsiz shaklda tushgan ulushidan qat’i nazar, to‘langan soliq summasining 40 foizi miqdorida amalga oshiriladi.
2027 yil 1 yanvardan boshlab, alkogol mahsulotlarini chakana sotish huquqi uchun hamda umumiy ovqatlanish korxonalari tomonidan alkogol mahsulotlarini realizatsiya qilish huquqi uchun yig‘imlar birlashtiriladi va uning stavkasi BHMning 10 foizi miqdorida belgilanadi.
Ijara to‘lovlari
2026 yil 1 iyundan boshlab, umumiy ovqatlanish, savdo va xizmat ko‘rsatish faoliyati bilan shug‘ullanuvchi tadbirkorlik sub’yektlariga tegishli bino va inshootlarga hamda yer uchastkalariga tutash hududlardan foydalanishda to‘lanadigan ijara to‘lovi miqdori Soliq kodeksida belgilangan tartibda aniqlanadigan yer solig‘ining bir baravari miqdorida belgilanadi.
2027 yil 1 yanvardan boshlab, jismoniy va yuridik shaxslar tomonidan tadbirkorlik sub’yektlariga umumiy maydoni 1 000 metr kvadratdan ko‘p bo‘lgan mol-mulk ijaraga berilganda, soliq solish maqsadida ijara to‘lovining eng kam stavkalari qo‘llanmaydi; Toshkent shahri bundan mustasno.
Farmon kuchga kirdi
Mazkur farmon norma va qoidalari, agar ularning o‘zida kechroq muddat ko‘rsatilmagan bo‘lsa, darhol kuchga kirishi belgilangan.
Qonunchilik hujjatlariga ushbu farmondan kelib chiqadigan o‘zgartirish va qo‘shimchalar to‘g‘risidagi takliflar bir oy muddatga Vazirlar Mahkamasiga kiritilishi kerak.
Toshkentda 4 kishilik oilaning bir oy farovon yashashi uchun 23,5 mln so‘m, bir kishi uchun esa qariyb 6,5 mln so‘m mablag‘ kerak bo‘ladi. Poytaxtda arzon restoranda ovqatlanish 70 ming so‘mni tashkil etadi. O‘rta darajadagi restoranda bu narx 2 kishi uchun 400 ming so‘mga baholangan. Mobil aloqa kompaniyalar kesimida o‘rtacha oylik to‘lov 49 ming so‘m, kabelli internetning o‘rtacha bahosi – 150 ming so‘m.
Dunyoning eng yirik onlayn ma’lumotlar bazasidan biri – Numbeo Toshkentda qancha mablag‘ evaziga farovon yashash mumkinligini ma’lum qildi.
Onlayn bazaning taxminiy hisoblashlariga ko‘ra, poytaxtda 4 kishi bo‘lib yashaydigan oilalar ijara to‘lamasdan oyiga 23 mln 512 ming so‘m sarflab yaxshi yashashi mumkin. Bir kishi uchun bu narx 6 mln 343 ming so‘mni tashkil etadi.
Qayd etilishicha, Toshkentda 1 kishi uchun arzon restoranda ovqatlanish 70 ming so‘mni tashkil etadi. O‘rta darajadagi restoranda bu narx 2 kishi uchun 400 ming so‘mga baholangan. Fast Food tarmoqlarida ovqatlanish esa 55 ming so‘m. O‘rtacha narxlari olinganda, 1 litr sut – 14,7 ming so‘m, 1 kg guruch – 21,9 ming so‘m, 12 dona tuxum – 22,4 ming so‘m, 1 kg mol go‘shti – 137,9 ming so‘m, 1 kg tovuq filesi – 48,2 ming so‘m, 1 kg olma – 16,7 ming so‘m, 1 kg banan – 22,1 ming so‘m, 1 kg pomidor – 19,1 ming so‘m, 1 kg kartoshka – 7 ming so‘m, 1 kg piyoz – 4,7 ming so‘m.
Shuningdek, statistikada maishiy xizmatlar hamda kiyim-kechaklarga qancha ishlatilishi ham keltirilgan. Unga ko‘ra, o‘zbekistonliklar suv, gaz, elektr toki va chiqindilar uchun 85 kvadrat metrli kvartira uchun 340 ming so‘mdan 1 mln 200 ming so‘mgacha pul to‘laydi. Mobil aloqa kompaniyalar kesimida o‘rtacha oylik to‘lov 49 ming so‘m, kabelli internetning o‘rtacha bahosi – 150 ming so‘m.
Xususiy bog‘chalar 3 mln so‘mdan 7,1 mln so‘mgacha bo‘lsa, xalqaro darajadagi xususiy maktabda 1 nafar bolani o‘qitishning yillik o‘rtacha narxi 129 mln so‘mdan oshadi.
Numbeo ma’lumotlariga ko‘ra, xarajatlarning 30,4 foizi do‘konlardan turli mahsulotlarni sotib olish, 26,9 foizi har oylik ijara, 15,2 foizi restoranlarda ovqatlanish, 9,5 foizi transport, 8,1 foizi esa sport va bo‘sh vaqtdagi mashg‘ulotlar uchun sarflanadi.
Joriy yilning dastlabki 4 oyida Rossiya Markaziy Osiyo mamlakatlariga 537 ming tonna suyultirilgan gaz eksport qildi. Shundan 231 ming tonnasi O‘zbekiston hissasiga to‘g‘ri keladi. Bu o‘tgan yilning mos davriga nisbatan 3,5 barobarga ko‘p.
Foto: ITAR-TASS/Georgiy Shpikalov
2026 yil yanvar–aprel oylarida Rossiyaning umumiy suyultirilgan gaz eksporti 27 foizga o‘sib, 1,43 mln tonnaga yetdi, deya xabar berdi «Kommersant’» nashri Kept konsalting kompaniyasi ma’lumotlariga tayanib.
Qayd etilishicha, umumiy eksportning 537 ming tonnasi Markaziy Osiyo mamlakatlari hissasiga to‘g‘ri kelib, bu yo‘nalishda o‘sish 71 foizni tashkil etgan. Xususan, 2026 yilning 4 oyida O‘zbekistonga Rossiyadan 231 ming tonna propan va butan import qilingan. Bu o‘tgan yilning shu davriga nisbatan 3,5 barobarga ko‘p.
Shuningdek, Rossiyadan Xitoyga suyultirilgan gaz yetkazib berish 498 ming tonnagacha ko‘paygan va 2025 yilning mos davriga nisbatan 2,5 barobarga oshgan. Bu Yaqin Sharqdagi vaziyatning keskinlashuvi tufayli dengiz orqali yetkazib berishning qisqarishi fonida narxlarning oshishi bilan bog‘lanyapti.
O‘zbekiston Statistika qo‘mitasining ma’lumotlariga ko‘ra, 2026 yilning yanvar-aprel oylarida 580 mln dollarlik gaz sotib olingan, bu o‘tgan yilgi ko‘rsatkichdan 53,6 foizga ko‘p.
Prezident administratsiyasi rahbari Saida Mirziyoyevaning ta’kidlashicha, so‘nggi kunlarda kichik biznes uchun sharoitlar yengillashtirilishi haqidagi yangiliklar ishbilarmon doiralar tomonidan iliq kutib olinmoqda.
«Bu masala anchadan buyon tadbirkorlar uchun og‘riqli bo‘lib kelayotgan edi. Hududlarga safarlar chog‘ida ular QQS to‘lashga o‘tish bo‘yicha 1 milliard so‘mlik chegara juda pastligi, soliq ma’muriyatchiligi murakkabligi, tekshiruv va hisobotlar esa haddan tashqari ko‘pligini ta’kidlab kelishardi. Natijada biznes xotirjam rivojlanish o‘rniga sun’iy ravishda bo‘linishga majbur bo‘layotgan edi.
Prezidentimiz imzolagan farmonga muvofiq, ushbu chegara 5 milliard so‘mgacha oshirildi. Buning samarasini, eng avvalo, oilaviy korxonalar, kafelar, do‘konlar, xizmat ko‘rsatuvchilar — bir so‘z bilan aytganda, o‘zining kundalik mehnati bilan mamlakatimiz iqtisodiyotini harakatga keltirayotgan minglab insonlar his qiladi», — dedi Saida Mirziyoyeva.
Hujjatda kichik biznesni qo‘llab-quvvatlashga qaratilgan yana bir qator muhim chora-tadbirlar nazarda tutilgan. Ular bilan ushbu havola orqali batafsil tanishish mumkin.
Amerikada mamlakat tashkil topganining 250 yilligi munosabati bilan amaldagi prezident Donald Tramp tasviri tushirilgan 250 dollarlik yangi banknota chiqarish g‘oyasi muhokama qilinyapti. Agar bu amalga oshsa, Qo‘shma Shtatlar tarixida so‘nggi 160 yil ichida ilk bor tirik insonning surati milliy valutada paydo bo‘ladi. Gravirovka va bosma ishlar byurosi yangi kupyura ishlab chiqishni boshlash uchun bir necha yil kerakligi, jarayon murakkab huquqiy ekspertiza va texnik xavfsizlik talablarini o‘z ichiga olishini ta’kidlagan.
Tramp ma’muriyati vakillari mamlakatda pullarni chop etishga mas’ul idoraga prezident portreti tushirilgan 250 dollarlik banknota dizaynini ishlab chiqishni talab qilib bosim o‘tkazyapti. Bu haqda idoraning hozirgi va sobiq to‘rt nafar xodimi ma’lum qildi, deya yozadi The Washington Post.
Agar bu amalga oshsa, AQSh tarixida so‘nggi 150 yildan ortiq vaqt ichida ilk bor tirik insonning surati milliy valutada paydo bo‘ladi.
WP manbalariga ko‘ra, o‘tgan yildan boshlab G‘aznachilik departamentining ikki amaldori: g‘aznachi Brendon Bich va uning maslahatchisi Mayk Braun Gravirovka va bosma ishlar byurosi xodimlarini yangi kupyura prototiplarini tayyorlashga bir necha bor undagan. Bu esa xavotir uyg‘otadi, chunki amaldagi federal qonunchilik bo‘yicha banknotlarda faqat vafot etgan shaxslarning surati bo‘lishi mumkin.
O‘tgan yilning avgust va sentabr oylarida Brendon Bich byuro xodimlariga banknotaning bir nechta maket dizaynlarini yuborgan. Ulardan birida prezident Donald Trumpning yuzi 250 dollarlik kupyuraning markazida, prezident va G‘aznachilik kotibi Skott Bessent imzolari orasida tasvirlanadi.
Loyiha muallifi, britaniyalik rassom Ian Aleksander ushbu maket mavjudligini tasdiqladi. Uning so‘zlariga ko‘ra, Tramp bilan dizaynga Amerika bayrog‘i ranglari va maxsus logotip qo‘shish masalasi ham muhokama qilingan.
“U meni o‘zining eng sevimli britaniyalik rassomi deb ataydi”, — degan Aleksandr. U avval professional suzuvchi va DJ bo‘lganini, keyinchalik esa qirolicha Yelizaveta II va boshqa mashhur shaxslarning portretlarini chizganini aytgan.
AQSh valutasida 1866 yildan beri hech bir tirik shaxs tasviri tushirilmagan. O‘sha paytda 5 sentlik banknotaga G‘aznachilikdagi o‘rta bo‘g‘in amaldorining rasmi chiqib ketgach, bu amaliyot qonun bilan taqiqlanadi.
O‘tgan yili Kongresga Tramp surati tushirilgan 250 dollarlik banknotani chiqarishga ruxsat beruvchi qonun loyihasi kiritilgan. Bu mustaqillikning 250 yilligini nishonlash maqsadi bilan izohlangan. Biroq, loyiha hanuz harakatsiz holatda qolyapti.
G‘aznachilik departamenti vakili bayonotida chop etish idorasi “taklif etilgan qonunchilikka javoban tegishli rejalashtirish va huquqiy tekshiruvlarni amalga oshirayotgani” aytilgan.
“Agar bu qonun tasdiqlanib kuchga kirsa, byuro mamlakatimizning 250 yilligi munosabati bilan 250 dollarlik maxsus esdalik banknotani chiqarishga tayyorgarlik ko‘radi”, — deyiladi bayonotda.
Gravirovka va bosma ishlari byurosi direktori Patrisiya Solimen va boshqa xodimlar Bich va Braunga bunday banknotani chiqarishda huquqiy va texnik to‘siqlar mavjudligi, jarayon ular o‘ylagandan ancha ko‘proq — yillar talab qilishini bir necha bor tushuntirgan.
Ushbu vaziyat fonida Patrisiya Solimen 27 aprel kuni ishdan olingan. The Washington Post qo‘lga kiritgan xat nusxasida u G‘aznachilik departamentidagi boshqa ishga o‘tkazilgani va bu qaror “uning tanlovi bo‘lmaganini” yozgan. Idora Solimenening boshqa lavozimga o‘tkazilishi yuzasidan izoh berishni rad etgan. Oq uy ham savollarga javob qaytarmagan.
Solimen va uning jamoasi ma’muriyatning Tramp imzosi tushirilgan 100 dollarlik kupyuralarni chop etish talabiga rozilik bildirgani aytilyapti. Bu banknotalar AQSh tarixida ilk bor amaldagi prezident imzosi tushirilgan pul bo‘ladi va hozirda Vashington markazidagi bosmaxonada chop etilyapti.
“AQSh g‘aznachisi Brendon Bich tavsiyasiga binoan, kotib Bessent prezident Trampning tarixiy yutuqlarini uning imzosini valutaga qo‘shish orqali e’tirof etadi”, — deyiladi bayonotda.
AQSh dollarida kimlarning tasviri bor?
1 dollar: Jorj Vashington
Eng ko‘p tarqalgan bir dollarlik banknotda AQShning birinchi prezidenti va mustaqillik urushi qahramoni Jorj Vashington tasvirlangan. Uning surati 1869 yildan beri ushbu kupyuraning ajralmas qismi hisoblanadi.
2 dollar: Tomas Jyefferson
Kamdan-kam uchraydigan 2 dollarlik qog‘oz pulda AQSh Mustaqillik deklaratsiyasining asosiy muallifi va mamlakatning 3-prezidenti Tomas Jyefferson aks etgan. Banknotning orqa tomonida esa Mustaqillik deklaratsiyasining imzolanish jarayoni tasvirlangan.
5 dollar: Avraam Linkoln
Fuqarolar urushi davrida mamlakat birligini saqlab qolgan va qullikni bekor qilgan 16-prezident Avraam Linkoln 5 dollarlik kupyurada joy olgan. Banknotning orqa tomonida Vashington shahridagi Linkoln memoriali tasvirlangan.
10 dollar: Aleksandr Hamilton
Hamilton AQSh asoschilaridan biri va mamlakatning birinchi Moliya vaziri bo‘lgan. U Amerikaning zamonaviy iqtisodiy va bank tizimiga asos solganligi sababli 10 dollarlik kupyurada tasvirlanishga loyiq ko‘rilgan.
20 dollar: Endryu Jyekson
20 dollarlik banknotada AQShning 7-prezidenti, harbiy general Endryu Jyekson surati bor. Qizig‘i shundaki, Jyekson o‘z davrida qog‘oz pullarga qarshi bo‘lgan, biroq bugun uning tasviri eng ommabop kupyuralardan birini bezab turibdi.
50 dollar: Ulis Grant
Fuqarolar urushida shimolliklar armiyasiga qo‘mondonlik qilgan va keyinchalik AQShning 18-prezidenti etib saylangan general Ulis Grant sur’ati 50 dollarlik pulda aks ettirilgan.
100 dollar: Benjamin Franklin
Dunyodagi eng mashhur yuz dollarlik kupyurada atoqli olim, ixtirochi, diplomat Benjamin Franklin tasviri bor. U AQShning shakllanishiga asos bo‘lgan uchta muhim hujjat (Mustaqillik deklaratsiyasi, Konstitutsiya va Parij tinchlik shartnomasi)ga imzo chekkan yagona insondir.
Toshkent-Samarqand pulli yo‘lining uzunligi 282 kmni tashkil etadi. Loyiha qiymati – 2 mlrd 185 mln dollar. Ushbu mablag‘ning 85 foizi yoki 1 mlrd 857 mlrd dollari xorijiy kreditlar hisobidan, qolgan 15 foizi yoki 328 mln dollari O‘zbekiston budjetidan moliyalashtirilishi rejalashtirilgan. Qurilishni Xitoy kompaniyasi amalga oshiradi. «Yangi loyiha tirbandliklarni kamaytirib, odamlarga Samarqandga yoki belgilangan manzilga 2−2,5 baravar tezroq yetib borishga sharoit yaratadi», – dedi transport vaziri Ilhom Mahkamov.
Toshkent-Samarqand pulli yo‘li loyihasi bo‘yicha tenderda Xitoy qurilish kompaniyasi g‘olib chiqdi. Bu haqda transport vaziri Ilhom Mahkamov O‘zbekiston 24 telekanaliga bergan intervyusida ma’lum qildi.
Toshkent-Samarqand pulli yo‘lining uzunligi 282 kmni tashkil etadi. Shundan 108 km Jizzax viloyati, 47 km Samarqand viloyati hududidan o‘tadi.
«Yangi loyiha tirbandliklarni kamaytirib, odamlarga Samarqandga yoki belgilangan manzilga 2−2,5 baravar tezroq yetib borishga sharoit yaratadi», — dedi Mahkamov.
Vazirning qo‘shimcha qilishicha, uzoq vaqt davom etgan tenderdan keyin Xitoy kompaniyasi tanlab olingan. Hozirda shartnoma tuzish va qurilish ishlarini boshlash bo‘yicha muzokaralar olib borilyapti.
O‘zbekiston Milliy banki boshqaruvi raisi Alisher Mirsoatovning ma’lum qilishicha, loyiha qiymati taxminan 2 mlrd 185 mln dollarga baholanmoqda. Loyihani to‘rt bosqichda amalga oshirish rejalashtirilgan bo‘lib, bankka zarur hollarda qurilishni moliyalashtirish bo‘yicha topshiriq berilgan.
«Loyihani moliyalashtirishga Xitoyning bir nechta banki jalb etiladi. Bular — Xitoy davlat taraqqiyot banki, Xitoy Eksport-import banki va Xitoy Kommunikatsiyalar banki», — dedi Mirsoatov.
Prezident administratsiyasining Transport va logistikani rivojlantirish bo‘yicha loyiha ofisi rahbari Otabek Ungboyevning aniqlik kiritishicha, Toshkent-Samarqand pulli avtomobil yo‘li loyihasi uchun mo‘ljallangan 2 mlrd 185 mln dollarlik mablag‘ning 85 foizi – 1 mlrd 857 mlrd dollar xorijiy kreditlar hisobidan, qolgan 15 foizi – 328 mln dollar O‘zbekiston budjet mablag‘lari hisobidan moliyalashtirilishi rejalashtirilgan.
Avvalroq, Toshkent–Samarqand pulli avtomobil yo‘li Sergeli tumanidagi Toshkent halqa yo‘lidan boshlanadi va mavjud trassaga parallel tarzda o‘tishi ma’lum qilingandi.
Avtomagistralda 12 ta kirib-chiqish terminali bo‘lishi, haydovchilarga yo‘lning turli nuqtalarida magistralga kirish va chiqish imkoniyati yaratilishi rejalashtirilgan.
Yo‘lning texnik xususiyatlari quyidagicha: harakat tasmalari 6 ta, loyihaviy tezlik 150 km/soat, kutilayotgan avtomobil jadalligi sutkasiga 50 mingtagacha, tasmalar kengligi 3,75 metr, qurilish muddati esa 5 yil. Pulli yo‘ldan foydalanish tarifi hozircha belgilanmagan.
Kichik biznesga keng ko‘lamli soliq erkinliklari e’lon qilindi (batafsil)
O‘zbekiston va Qozog‘iston hamkorlik bo‘yicha «yo‘l xaritasi»ni imzoladi
Turkiyaning Sakaryo shahridagi feyerverk zavodida portlash yuz berdi, ko‘plar jarohatlandi, bir necha kishi halok bo‘ldi
-
Iqtisodiyot3 days ago1 dollar ≠ 1 so‘m ≠ 1 rubl. Valutalar qiymati nega har xil?
-
Dunyodan5 days agoPokistonda mikroavtobusda 11 kishi halok bo’ldi
-
Jamiyat4 days agoToshkentda uy savdosi bilan bog‘liq mojaro tergov qilinmoqda
-
Jamiyat4 days agoBugun O‘zbekiston bo‘ylab qisqa muddatli yomg‘ir yog‘ishi kutilmoqda
-
Jamiyat5 days agoBuxoro shahar IIB sobiq tergovchisi qidiruvga berildi: Kalavaning uchi qayerda?
-
Mahalliy4 days ago
Oliy attestatsiya komissiyasi rahbari ishdan olindi
-
Sport3 days agoForbes dunyoning eng serdaromad sportchilari reytingini e’lon qildi
-
Iqtisodiyot4 days agoO‘zbekistonga Qozog‘iston nefti yetkazib berilishi mumkin