Namanganning Davlatobod va Mingbuloq tumanlarida hamda Farg‘ona shahrida transformator punktida bolalarni tok urishi ularning o‘limiga yoki nogiron bo‘lib qolishiga olib keldi. Bolalar ombudsmani vakolatli organga ta’sir hujjati kiritib, respublikaning barcha hududlarida bunday holatlarning oldini olish uchun choralar ko‘rishni talab qildi.

Davlatobod tumanidagi hodisa haqidagi “Millar” dasturi reportajidan kadr

So‘nggi paytlarda elektr transformatordan tok urishi natijasida bolalar halok bo‘lishi yoki nogiron bo‘lib qolishi holatlari kuzatilmoqda. Bolalar ombudsmani Surayyo Rahmonova Namangandagi ana shunday holatdan keyin, tegishli idoraga ta’sir hujjati kiritdi.

5 may kuni Davlatobod tumanida 13 yoshli bola atrofi ochiq holatda turgan transformator ustiga chiqishi oqibatida bola tok urib vafot etgan edi. Hozirda holat yuzasidan prokuratura tomonidan tergovga qadar tekshiruv o‘tkazilmoqda.

“Yuqori kuchlanishdagi tokda ishlaydigan elektr qurilmalarini o‘rnatish va ulardan foydalanish aholi uchun, ayniqsa bolalar uchun doimiy xavfsiz bo‘lishi choralari mutasaddilar tomonidan ta’minlanishi shart.

Respublikaning barcha hududlarida yuqoridagi fojiali holatlarni oldini olish maqsadida bola xavfsizligini ta’minlashga oid belgilangan standartlarga rioya etishni nazorat qilish va zarur choralarni ko‘rish yuzasidan Bolalar ombudsmani tomonidan vakolatli davlat organiga tegishli ta’sir hujjati kiritildi”, – deyiladi Oliy Majlisning bola huquqlari bo‘yicha vakili bayonotida.

Eslatib o‘tamiz, avvalroq Namanganning boshqa bir tumani – Mingbuloqda ham 4 yoshli bola hojatxona izlab, ochiq qoldirilgan transformator ichiga kirib, ikki qo‘lidan ayrilgan edi. Tergov va sud organlari bu jinoyat oqibati bo‘lganini tasdiqlab, mas’ul xodimni javobgarlikka tortgan.

Bundan tashqari, fevral oyida Farg‘ona shahridagi xususiy bog‘chalardan birida transformator ochiq qoldirilishi oqibatida 6 yashar bolaning tana a’zolari kuyib ketdi. Bu holat bo‘yicha ham jinoyat ishi ochilgan.

Source link

Namangan viloyatining Uychi tumanida bir yoshli bolakay hovlidagi hojatxona chuquriga tushib ketdi. Voqea joyiga yetib kelgan FVV qutqaruvchilari tezkor harakat qilib, bolaning hayotini saqlab qolishga muvaffaq bo‘ldi.

Kecha, 22 may kuni soat 18:47 da Namangan viloyati, Uychi tumani «Muborak» mahalla fuqarolar yig‘ini hududida joylashgan uylarning birida favqulodda holat sodir bo‘ldi. Uy egasining 2025 yilda tug‘ilgan o‘g‘il farzandi ehtiyotsizlik va nazoratdan chetda qolgani sababli hovlidagi hojatxonaga tushib ketgan.

Hodisa haqida xabar kelib tushgach, FVV qutqaruvchilari zudlik bilan manzilga yetib borgan va qutqaruv ishlarini boshlagan. Qutqaruvchilardan biri hojatxona chuquriga tushib, bolakayni olib chiqqan.

Shifokorlar tomonidan bolaga birinchi tibbiy yordam ko‘rsatilganidan so‘ng u yaqinlariga topshirildi. Hozirda bolaning ahvoli yaxshi ekani ma’lum qilinmoqda.

Mutaxassislar ota-onalarni farzandlarini nazoratsiz qoldirmaslikka chaqirmoqda.

Source link

Andijon viloyatida yer maydonlarini noqonuniy ajratish va rasmiylashtirib berish bilan bog‘liq korrupsion holatlar fosh etildi. Davlat xavfsizlik xizmati tezkor tadbirlari davomida bir nechta mansabdor shaxslar katta miqdorda pora olayotgan vaqtida qo‘lga olindi.

Ma’lum bo‘lishicha, Farg‘ona vodiysi magistral kanallardan foydalanish boshqarmasi 2-Shahrixon bo‘limi 3-gidrouchastkasi boshlig‘i chorvachilik bilan shug‘ullanishni rejalashtirgan fuqaroga katta Farg‘ona kanali himoya hududidagi 30 sotix yer maydonini ijaraga rasmiylashtirib berish evaziga 40,5 ming AQSh dollari talab qilgan. U oldindan 20 ming dollar olgan vaqtida DXX va Bosh prokuratura huzuridagi Departament xodimlari tomonidan ushlangan.

Tergov davomida ushbu noqonuniy sxemaga Farg‘ona vodiysi magistral kanallardan foydalanish boshqarmasi bo‘lim boshlig‘i ham aloqador ekani aniqlangan. U 20 ming dollardan 3 ming dollarini olgan vaqtida qo‘lga tushgan. Shuningdek, mazkur yer maydonidan ijara asosida foydalanib kelgan gidrouchastka xodimi ham yerni berish uchun 19 ming dollar talab qilgani ma’lum bo‘lgan.

Yana bir holatda esa Oltinko‘l tumanidagi ta’lim muassasasi direktori muassasa hududidagi 1,1 gektar yer maydoni bo‘yicha kelishuvni tasdiqlab berish evaziga 15 ming dollar so‘ragan. U oldindan 10 ming dollar olgan vaqtida ushlangan.

Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.

Source link

Toshkent shahrining Mirzo Ulug‘bek tumanida 23–24 may kunlari o‘tkaziladigan Pizza Day gastronomik festivali munosabati bilan ayrim ko‘chalarda avtoulovlar harakati vaqtincha cheklanadi. Cheklovlar tadbirga tayyorgarlik ko‘rish va fuqarolar xavfsizligini ta’minlash maqsadida joriy etilmoqda.

Ma’lum qilinishicha, O‘zbekiston ovozi 24/7 turizm ko‘chasida bo‘lib o‘tadigan festival sabab bir nechta yo‘nalishlarda harakat qisman to‘xtatiladi.

Jumladan, O‘zbekiston ovozi ko‘chasining Shahrisabz ko‘chasi bilan kesishmasidan Yahyo G‘ulomov ko‘chasigacha bo‘lgan qismi 23–24 may kunlari qisman yopiladi. Shuningdek, ushbu ko‘chaning Shastri ko‘chasi bilan kesishmasidan Shahrisabz ko‘chasigacha bo‘lgan qismi hamda Yahyo G‘ulomov ko‘chasi bilan kesishma hududida ham vaqtincha cheklovlar amal qiladi.

Bundan tashqari, O‘zbekiston ovozi ko‘chasining Shastri va Sodiq Azimov ko‘chalari bilan kesishmalari hamda mazkur yo‘nalishning Shahrisabz ko‘chasigacha bo‘lgan qismida avtoulovlar harakati vaqtincha to‘xtatiladi.

Mas’ullar haydovchilardan ushbu kunlari muqobil yo‘nalishlardan foydalanishni so‘rab, yuzaga kelishi mumkin bo‘lgan noqulayliklar uchun uzr so‘radi.

Source link

Gidrometeorologiya xizmati tezkor axborot bilan chiqdi. 

Joriy yilning 23-25-may kunlari kutilayotgan yomg‘irlar yog‘ishi sababli, respublikaning tog‘ oldi va tog‘li hududlarida, jumladan:

– Qashqadaryo viloyati: Yakkabog‘, Dehqonobod, Chiroqchi, Kitob, Shahrisabz, Qamashi, G‘uzor tumanlarida;

– Surxondaryo viloyati: Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on, Muzrobot tumanlarida;

– Samarqand viloyati: Urgut, Samarqand, Bulung‘ur, Nurobod, Qo‘shrabot, Kattaqo‘rg‘on, Payariq, Jomboy, Ishtixon tumanlarida;

– Navoiy viloyati: Xatirchi, Navbahor, Nurota, Konimex, Karmana tumanlarida;

– Jizzax viloyati: Zomin, Baxmal, G‘allaorol, Sharof Rashidov, Forish, Yangiobod tumanlarida;

-Toshkent viloyati: Ohangaron, Bo‘stonliq, Parkent, Piskent, O‘rtachirchiq, Yuqorichirchiq tumanlarida va Angren, Olmaliq shaharlarida;

– Namangan viloyati: Pop, Kosonsoy, Chortoq, Chust, Namangan, Yangiqo‘rg‘on tumanlarida;

– Farg‘ona viloyati: So‘x, Shohimardon, Farg‘ona, Beshariq tumanlarida;

– Andijon viloyati: Andijon, Asaka, Jalaquduq, Qo‘rg‘ontepa, Paxtaobod, Izboskan, Xo‘jaobod, Marhamat tumanlarida va Xonabod shahrida sel-suv toshqin hodisalari yuzaga kelishi mumkin.

Tog‘ oldi va tog‘li hududlarda istiqomat qiluvchi fuqarolarni, dam oluvchilarni hamda tog‘li hududlarda harakatlanuvchi haydovchilarni ehtiyotkorlik choralarini ko‘rishlarini so‘ralgan. 

Respublikaning ayrim hududlarida yomg‘ir suvlari to‘planishi ehtimoli bor, bu esa hududlarni suv bosishiga olib kelishi mumkin.

Source link