38 yoshli argentinalik futbolchining boyligi 1 milliard dollardan oshdi.

Foto: Scott McIntyre/Bloomberg via Getty Images

Lionel Messi rasman milliarderlar klubiga qo‘shildi. Bloomberg Billionaires Index ma’lumotlariga ko‘ra, 38 yoshli argentinalikning boyligi 1 milliard dollardan oshdi. Shu tariqa, Messi Krishtianu Ronaldudan keyin tarixdagi ikkinchi milliarder futbolchiga aylandi.

«Barselona», «PSJ» va «Inter Mayami» klublaridagi faoliyati davomida argentinalik futbolchi faqat maosh va bonuslar ko‘rinishida 700 million dollardan ortiq daromad olgan. Shuningdek, Adidas bilan uzoq muddatli shartnoma, «Inter Mayami» klubidagi ulush, Apple, Pepsi va boshqa global brendlar bilan shartnomalar daromadining 1 milliarddan oshishini ta’minladi.

Shuni ta’kidlash kerakki, Messi Saudiya Arabistonidan juda foydali takliflarga murojaat qilmasdan bu marraga erishdi. 2023 yilda u MLS va «Inter Mayami»ni tanlagan edi.

Avvalroq, Krishtianu Ronaldu «An-Nasr» bilan tuzilgan shartnoma tufayli birinchi milliarder futbolchiga aylandi. Shuningdek, Devid Bekhem ham milliarder hisoblanadi, ammo u futbolchilik faoliyatini yakunlaganidan so‘ng shu marraga yetdi.

Source link

O‘zbekistonlik himoyachi JCh-2026ni o‘tkazib yuboradi



Source link

«Shaharliklar» uning boshqaruvidagi 10 yil davomida jami 20 ta sovrinni qo‘lga kiritishdi, bular orasida YeChL kubogi va APLdagi olti g‘oliblik ham bor.

«Manchester Siti» bosh murabbiyi Xosep Gvardiola mavsum yakunida klubni tark etadi. Bu ma’lumot «shaharliklar» klubi matbuot xizmati tomonidan rasman tasdiqlandi.

Pep klub bosh murabbiyi lavozimini tark etganiga qaramay, City Football Group bilan hamkorlikni davom ettiradi va global elchi lavozimini egallaydi.

«Bu vazifada u guruh tarkibidagi klublarga texnik maslahatlar berib, aniq loyihalar va hamkorlik ustida ishlaydi», – deyiladi klub xabarida.

Ma’lumot uchun, 55 yoshli mutaxassis «Manchester Siti»da 2016 yildan buyon ishlab kelayotgandi. Uning rahbarligida jamoa jami 20 sovrin, jumladan bitta YeChL kubogi va olti marta APL g‘olibligini qo‘lga kiritdi.

2025/26 yillar mavsumini esa «shaharliklar» ikkinchi o‘rinda yakunlamoqda.

19 may kuni Gvardiola o‘rnini italiyalik Enso Mareska egallashi haqida xabar qilingandi.

“What a time we have had together.” 🩵 pic.twitter.com/WpkFecBYT4

— Manchester City (@ManCity) May 22, 2026

Klub matbuot xizmati murabbiyning klub muxlislari bilan xayrlashuv videosini ham e’lon qilgan. Quyida uning matn shakli keltiriladi:

«Men kelganimda, ilk intervyuim Noel Gallaher (Oasis guruhi solisti) bilan bo‘lgandi. O‘shanda suhbatdan chiqib: “Xo‘sh… Noel shu yerda ekanda? Demak, juda qiziq bo‘ladi”, deb o‘ylaganman.

Biz birga qanday go‘zal davrni boshdan kechirdik. Ketishim sabablari haqida so‘ramang. Hech qanday sabab yo‘q. Lekin qalbimning tubida bilaman: ketadigan vaqtim keldi. Hech narsa abadiy emas. Agar abadiy bo‘lganida, men bu yerda qolgan bo‘lardim. Abadiy qoladigan narsa – bu hissiyotlar, odamlar, xotiralar va mening «Manchester Siti»ga bo‘lgan muhabbatimdir.

Bu shahar mehnat bilan qurilgan. Og‘ir mehnat bilan. Buni g‘ishtlarning rangida ham ko‘rish mumkin. Erta tongda ishga kelib, kechgacha qolgan odamlarda ko‘rish mumkin. Zavodlar. Pankhyorstlar oilasi (Manchesterdagi siyosiy faollar). Kasaba uyushmalari. Musiqa. Sanoat inqilobining o‘zi va uning dunyoni qanday o‘zgartirgani. Menimcha, men buni tushundim. Mening jamoam ham tushundi.

Biz mehnat qildik. Qiynaldik. Kurashdik. Hammasini o‘z yo‘limiz bilan amalga oshirdik. O‘zimizga xos tarzda.

Og‘ir mehnat turli ko‘rinishlarda bo‘ladi. Bornmutga safarda, APLni boy berganimizda – siz o‘sha yerda edingiz. Istanbulga safar (2023 yilgi YeChL finali) – siz u yerda ham bor edingiz.

«Manchester Arena»dagi teraktni (2017 yil 22 may kuni Manchesterda amerikalik qo‘shiqchi Ariana Grandening konserti vaqtida portlash ro‘y berib, 23 kishi halok bo‘lgan va 120 dan ortqi kishi yaralangandi) eslaysizmi? O‘shanda bu shahar butun dunyoga haqiqiy kuch nimaligini ko‘rsatgandi. G‘azab emas. Qo‘rquv emas. Faqat muhabbat. Hamjamiyat. Birlik. Birlashgan shahar.

COVID pandemiyasi vaqtida onamdan ayrilganimni va bu klub o‘sha og‘ir damlarda meni qanday qo‘llab-quvvatlaganini eslaysizmi? Muxlislar, xodimlar, manchesterliklar – sizlar menga eng kerak paytda kuch berdingiz. Kris, farzandlarim, butun oilam – sizlar har doimgidek yonimda bo‘ldingiz. Haldun, sen ham yonimda eding.

Futbolchilar unutmaydi – har bir soniyani, har bir lahzani, meni, shtabimni, bu klubni, hammasini. Biz qilgan har bir ishni sizlar uchun qildik. Sizlar esa shunchaki beqiyos edingiz. Hali buni o‘zingiz ham bilmaysiz, lekin sizlar ortingizdan meros qoldiryapsiz.

Shunday ekan, mening vaqtim yakuniga yetayotganida, xursand bo‘ling. Oasis yana biz bilan.

Xonimlar va janoblar, ishonchingiz uchun rahmat. Meni ruhlantirganingiz uchun rahmat. Meni yaxshi ko‘rganingiz uchun rahmat.

Toni Uolsh (mahalliy shoir) o‘zining unutilmas she’rida: «Bu joy», degandi. Kechir, Toni kechir, ammo bu – mening joyim edi.

Noel… men haq edim. Bu juda ham ajoyib sarguzasht bo‘ldi. Barchangizni yaxshi ko‘raman».

Source link

Portugaliyalik yulduz to‘rtinchi urinishda maqsadiga erishdi. U «oltin o‘yin»da dubl muallifi bo‘ldi va muxlislar qarshisiga chiqib, baraban chaldi. Taqdirlash marosimiga esa «Ritsar Ronaldu» yozuvli futbolkada chiqib keldi.

Krishtianu Ronaldu 41 yoshida Saudiya Arabistonidagi ilk rasmiy sovrinini qo‘lga kiritdi. «An-Nasr» Saudiya Pro-Ligasi so‘nggi turida autsayder «Damaq» ustidan 4:1 hisobida g‘alaba qozondi va chempionlikni rasmiylashtirdi.

«An-Nasr» – «Damaq» 2:1

Gollar: Mane, 34 (1:0). Koman, 52 (2:0). Silla, 58 – penalti (2:1). Krishtianu Ronaldu, 63 (3:1). Krishtianu Ronaldu, 81 (4:1)

«An-Nasr»: Bentu, Al-Amri, Inigo Martines, Simakan, Al-Bushal (Al-Sharariy, 90+2), Al-Haybariy, Krishtianu Ronaldu (Al-Hamdan, 87), Mane (G‘arib, 87), Koman, Yahyo (Anjyelu Gabriel, 85), Joau Feliks

«Damaq»: Kevin, Silla, Bedran, Rabei (David Kaiki, 61), Abdulla, Al-Havsaviy (Al-Haybre, 81), Al-Ubayd, Harkass, Al-Anaziy (Meyte, 61), Okita (Al-Sumayriy, 85), Arielson (Nadji, 61)

Ogohlantirishlar: Krishtianu Ronaldu, 54. Mane, 60 – Al-Havsaviy, 25. Al-Anaziy, 26. Harkass, 62. Abdulla, 71

Barchasi so‘nggi turda hal bo‘ldi

Portugaliyalik forvard «An-Nasr» safiga 2022/23 yillar mavsumida kelib qo‘shilgan va haligacha jiddi natijaga erisha olmagandi: bu vaqt oralig‘ida 14 bor sovrindan quruq qolgan. Bu mavsumda ham Ronaldu sovrinsiz qoladigandek ko‘rinayotgandi – chempionat yarmida u mamlakatdagi asosiy klublarni boshqaruvchi Suveren fond ustidan shikoyat qilib, «An-Nasr»ga yetarlicha e’tibor qaratilmasligidan nolidi hamda boykot e’lon qilib, maydonga tushishdan bosh tortdi.

Shundan keyin uning ayrim talablari bajarildi va «An-Nasr» yanvar o‘rtalaridan boshlab 16 o‘yindan iborat g‘alabali seriya qayd etgan holda turnir jadvalida peshqadam bo‘lib oldi. Chempionlik muddatidan oldin rasmiylashtirilishi ham mumkin edi, ammo 32-turda asosiy raqobatchi bo‘lgan «Al-Hilol» bilan o‘yinda so‘nggi daqiqada darvozabon Bentuning qo‘pol xatosi tufayli g‘alaba qo‘ldan boy berildi (1:1) va barchasi so‘nggi turda hal qilinadigan bo‘ldi.

Turnir jadvalida ikki ochkolik farq bilan ta’qib qilib kelgan «Al-Hilol» so‘nggi turda o‘z o‘yinida «Al-Feyha» darvozasiga tezkor gol urdi va onlayn jadvalda birinchi o‘ringa chiqib oldi.

«An-Nasr» uchun esa o‘yin oson kechmadi. Turnir jadvalida 15-o‘rinda bo‘lgan «Damaq» quyi ligaga tushib ketmaslik uchun qattiq qarshilik ko‘rsatdi. Ronaldu va jamoadoshlari to‘pga egalik qilishdi, ammo vaziyatlar hadeganda golga aylanavermadi. «Damaq» futbolchilari chuqur himoyalanishdi va vaqt cho‘zish bilan band bo‘lishdi.

Faqat 35-daqiqaga kelib standart vaziyat mezbonlar joniga ora kirdi. Feliks burchakdan to‘p oshirdi, barcha Ronalduni qo‘riqlayotganidan foydalangan Mane bosh bilan darvozani ishg‘ol etdi. Ikkinchi bo‘lim boshida esa Koman jarima maydoni tashqarisidan aniq zarba yo‘llab, jamoasidan bosimni butunlay olib tashladi. Ammo bu bilan o‘yindagi intrigaga barham berilmadi.

Bir necha daqiqa o‘tib «An-Nasr» darvozasiga penalti qo‘yildi va hisob qisqardi. Shundan keyin Ronaldu katta sahnaga chiqdi. U qolgan daqiqalarda dubl rasmiylashtirdi. Uning ikkinchi goli jarima zarbasidan to‘pni to‘g‘ridan to‘g‘ri darvoza to‘riga yo‘llash orqali urildi. Bu goldan keyin uning ko‘zidan quvonch yoshlari to‘kildi.

U endi gollari sonini 972 taga yetkazib oldi va orzusidagi minglik dovon uchun yurishni davom ettirdi.

O‘yin tugashi arafasida faxriy futbolchi olqishlar ostida yuzida tabassum bilan maydonni tark etdi, zaxira o‘rindig‘ida yana bir bor ko‘z yoshlariga erk berdi.

Final hushtagi chalinganida esa undan baxtliroq odam yo‘q edi: portugaliyalik yulduz jamoadoshlari va tribunalardagi muxlislar qarshisida turgancha baraban chaldi, qarshisidagilar esa unga har zarbadan keyin «Siu» deya hayqirishdi.

Shundan keyin «An-Nasr» stadionida chempionlarni taqdirlash marosimi o‘tkazildi.

Ronaldu boshiga klub sharfi o‘ralgan, yelkasiga «Ritsar Ronaldu» yozuvi tushirilgan futbolka kiygan holda chiqib keldi va kubokni boshi uzra ko‘tardi.

Bu Ronalduga atalgan oqshom edi – u nihoyat to‘rtinchi urinishda Saudiya ligasida g‘olib chiqdi. Bu uning so‘nggi besh yil ichidagi ilk sovrini bo‘ldi.

Source link

Bugun Prezident Shavkat Mirziyoyev O‘zbekiston milliy terma jamoasini jahon chempionatiga kuzatishda ishtirok etadi. Bu haqda prezident matbuot xizmati xabar berdi. 

Shuningdek, Shavkat Mirziyoyev «Sifatli davlat boshqaruvi» dasturining g‘oliblarini mukofotlash hamda Milliy kitobxonlik harakatiga start berish marosimlarida qatnashadi. 

Birlashgan Arab Amirliklari Hukumat ishlari bo‘yicha vaziri Muhammad bin Abdulloh al-Gargaviy boshchiligidagi delegatsiya bilan uchrashuv bo‘lib o‘tadi. 

Kunning ikkinchi yarmida davlat rahbari futbol bo‘yicha O‘zbekiston milliy terma jamoasini jahon chempionatiga tantanali kuzatish marosimida ishtirok etadi.

Source link