2025 yil 14 avgust. Ota ishlab pul topish maqsadida Rossiyaga ketgan 23 yoshli o‘g‘lidan uni aldab urushga olib ketishgani haqida xabar oldi. O‘g‘il o‘zi bo‘lib turgan hudud lokatsiyani jo‘natib, otasidan uni olib ketishni so‘ragandi. Rus tilini yaxshi bilmagan ota qo‘shnisi bilan birga Moskva shahriga qarab yo‘l oldi. Uning maqsadi o‘g‘lini izlab topish va O‘zbekistonga qaytarib olib kelish edi. Ammo…

Samarqandda Rossiya armiyasiga yollangan yigitga sud hukmi o‘qildi. Yigit suddagi ko‘rsatmasida boshidan kechirganlarni aytib berdi. Uning hikoyasi shu turdagi ishlardan biroz farq qiladi.

Rossiya sari yo‘l

2003 yilda tug‘ilgan Doston (maqoladagi barcha ismlar o‘zgartirilgan) Urgut tumanida ulg‘aygan. Oiladagi iqtisodiy yetishmovchilik sababli u va akasi ishlab pul topish maqsadida Rossiyaga qatnab yurgan. 

2025 yil mart oyida akasi, 9 iyul kuni esa Doston ishlash maqsadida Moskvaga jo‘nab ketgan. U o‘shanda oradan ko‘p o‘tmay boshiga qanday kunlar tushishini tasavvur ham qilmagandi.

Doston Moskvaga yetib borib, kunlik 3 300 rubl haq evaziga plita zavodida ishlay boshlaydi. Oradan bir oy o‘tib, 13 avgust kuni uning hayotini o‘zgartirib yuborgan voqea sodir bo‘ladi.

“Patent tayyorlab beradi”

Doston o‘sha kuni taksida ishdan qaytayotgandi. Yo‘lda migratsiya xodimlari mashinani to‘xtatib, patent so‘rashadi. Doston ularga fuqarolik pasporti va vaqtinchalik ro‘yxatga qo‘yilgani haqidagi hujjatlarni taqdim qiladi. So‘ngra rus tilini bilmagani sababli kirakashning yordami bilan puli bo‘lmagani uchun patent olishga ulgurmaganini, lekin tez kunlarda rasmiylashtirib olishini tushuntiradi.

Shundan so‘ng migratsiya xodimlari Dostonning telefonini olib, kimgadir qo‘ng‘iroq qilishadi. So‘ngra Dostonga “Shu joyga borasan, patent tayyorlab beradi”, deya manzil aytishadi.

Doston ijarada yashayotgan uyiga kelib, patent to‘lovi uchun to‘plab qo‘ygan 35 ming rubl pulni oladi va aytilgan manzilga boradi. Uni rus millatiga mansub ikki ayol kutib oladi. Doston ular bilan “google perevodchik” orqali gaplashadi. Ayollar unga rus tilida yozilgan hujjatni berib, bo‘sh joylarga ismini yozishni hamda imzo qo‘yib berishni so‘rashadi.

“O‘sha vaqtda bu hujjatlar Rossiya qurolli kuchlari safiga harbiy xizmatga kirish haqidagi shartnoma ekanini bilmagandim. Ular bo‘sh qog‘ozga yozib bergan jumlalarni bir amallab ko‘chirib, imzo qo‘ydim. Keyin meni bankka olib borishdi va nomimga plastik karta ochishdi. So‘ngra ichki ishlar idorasiga olib borib, tibbiy ko‘rikdan o‘tkazishdi. U yerdagi shaxslarning barchasi rus millatiga mansub bo‘lgani uchun nima bo‘layotganini anglab yetmasdan, shu ayollarga ergashib yuraverdim”, degan Doston o‘z ko‘rsatmasida.

Lokatsiya

2025 yil 14 avgust kuni u bilan yana 24 kishini avtobusga mindirib, Voronej shahrida atrofi tikanli sim-to‘siq bilan o‘ralgan joyga olib borishadi. Doston shunda aslida nima bo‘lganini tushunib yetadi. Uni taxminan 100 nafarga yaqin turli mamlakatlardan kelgan askarlarga qo‘shib qo‘yishadi. Ular orasida O‘zbekiston fuqarolari ham bo‘lgan.

15 avgust kuni uni harbiy kiyimda majburan poligonga olib borishadi va askarlar bilan birga mashq qilishni talab etishadi. Biroq Doston bu talabni bajarmaydi. Shunda uni kaltaklab, qamab qo‘yishadi. Bir necha soatdan so‘ng esa olib chiqib, hammomni tozalashga majburlashadi.

“Ertasi kuni taxminan 200 nafardan ortiq turli millatga mansub shaxslar olib kelindi. Ular orasida 5-10 nafar O‘zbekiston fuqarolari ham bor edi. Qoida bo‘yicha kuniga nechta yangi odam kelsa, shuncha askar Luhanskga 7 kunlik harbiy tayyorgarlikka jo‘natilar va so‘ngra u yerdan urushga yuborilardi. Urushda qatnashishni xohlamasdan, qochishni reja qildim. Lekin qurollangan harbiy xizmatchilar qattiq qo‘riqlagani uchun rejam amalga oshmadi”, degan Doston.

U nima qilishini bilmasdan Telegram orqali opasiga shartnoma va o‘zi bo‘lib turgan joyning lokatsiyasini jo‘natadi. U otasi borib, uni olib ketishini so‘ragandi.

Otaning besamar harakati

O‘g‘lining urushga borib qolgani xabarini olgan ota nima qilarini bilmay, uni qaytarib olish kelish maqsadida yo‘lga chiqadi. Rus tilini bilmagani sababli iltimos qilib, qo‘shnisini o‘zi bilan birga olib ketadi.

Sudda guvoh sifatida so‘ralgan ota o‘z ko‘rsatmasida shunday degan:

“Moskva shahriga borib, o‘g‘lim yuborgan manzilni va u ilgari ishlagan joyni topolmadim. Keyin u izlab topib, O‘zbekistonga qaytarishga yordam berishlari uchun O‘zbekiston elchixonasiga ariza bilan murojaat qildim. Lekin elchixona xodimlaridan o‘zimga kerakli yordamni ololmadim”.

Chorasiz qolgan ota ne qilarini bilmasdan ming bir iztirobda uyiga qaytib kelgan.

“O‘g‘lim bilan gaplashganimda u Luhanskda ekanini bildirdi. Uni izlab O‘zbekiston elchixonasiga murojaat qilganimdan so‘ng harbiy qism komandirlari turli xil qiynoqlarga solib, jarohat yetkazishibdi. O‘g‘lim bu kabi holat yana bo‘lmasligi uchun hech qayerga murojaat qilmasligimni, o‘zi bir amallab qochib kelishini aytdi”, degan ota.

“Sendaylarni ko‘p ko‘rdim”

Dostonni Luhanskka olib ketishgandi. U yerda harbiy mashg‘ulotlarda qatnashmasligini aytgani uchun yana urib, yerto‘laga qamab qo‘yishadi. Yo mashg‘ulotga chiqasan, yo qamoqda yotaverasan, deyishadi. U qamoqda yotishni tanlaydi.

“Harbiylar telefonimni, pasport va plastik kartamni olib qo‘yib, 3 sutka qamoqda saqlashdi. 2025 yil 28 avgust kuni 12-tank polkiga o‘tkazishdi. U yerda ham harbiy mashg‘ulotda ishtirok etishdan bosh tortdim. Bo‘linma boshlig‘iga meni aldab imzo qo‘ydirib olib kelishganini aytdim.

Shundan so‘ng polk boshlig‘i bo‘lgan polkovnik meni chaqirib, tarjimon yordamida nima uchun urushga kelganimni so‘radi. Aldab olib kelishganini, menga pul ham, fuqarolik ham kerak emasligini, imkoni bo‘lishi bilan vatanimga qaytmoqchi ekanimni bildirdim. Shunda polkovnik davlat tomonidan berilgan 2,1 mln rubl pulni nima qilganimni so‘radi. Plastik kartada turganini aytdim. Tekshirib ko‘rishdi. So‘ngra polkovnik qo‘l ostidagilarga “buni poligonga chiqarmanglar, ishini ko‘rib chiqamiz” deya buyruq berdi”, degan Doston sudda.

Keyin uni blindajga olib borishgan. U yerda 27 kun yashagach dog‘istonlik “Kila” ismli komandir ko‘liga topshirishgan. “Kila” uni majburlab mashq qildirmoqchi bo‘lgan. Ammo Doston unga ham bo‘ysunmagan. Shunda komandir “sen men uchun birinchi ham, oxirgisi ham emassan” deya uni kaltaklagan.

2025 yil 24 sentabr kuni Dostonni harbiy xizmatdan bosh tortganlar saqlanadigan qamoqxonaga olib borishgan. Qamoqxona boshlig‘i u bilan muloqot qilib, yoshini hisobga olgan holda yaxshiroq joyga qo‘yishini aytgan. Shu tariqa, Dostonni oziq-ovqat tarqatiladigan omborda oshpaz bo‘lib ishlovchi samarqandlik oshpazga yordamchi qilib qo‘yishgan.

“2026 yil 28 fevral kuni meni Voronej viloyatining Rossosh shahriga 11 nafar askarga oshpazlik qilish uchun yuborishdi. U yerga borgach, qochib ketishni rejalashtirib, atrofni kuzatib yurdim. Yo‘lda boshqa chegara postlari yo‘qligiga ishonch hosil qilgach, 13 mart kuni tunda o‘zim bilan taxminan 3 kg yegulik va 1 litr suv olib, u yerdan qochib ketdim. O‘rmonda, ko‘p qavatli uylarning yerto‘lalarida uxlab, 27 mart kuni O‘zbekistonning Moskva shahridagi elchixonasiga yetib bordim”, degan o‘z ko‘rsatmasida Doston.

Uyga qaytish va qamoq

Shu tariqa, Doston elchixona tomonidan tayyorlab berilgan vatanga qaytish guvohnomasi bilan 2026 yil 5 aprel kuni O‘zbekistonga qaytib kelgan.

Bu yerda unga nisbatan jinoyat ishi qo‘zg‘atilgan hamda 2025 yil 30 dekabrda sirtdan qamoqqa olish tarzidagi ehtiyot chorasi qo‘llangandi. Doston qaytgach, uni qo‘lga olishadi. 

Jazo

Jinoyat ishi JIB Urgut tuman sudida ko‘rib chiqildi. Doston sudda haqiqatdan o‘zi bilmagan holda Rossiya armiyasiga yollanganini, ammo biron-bir jangovar harakatda qatnashmaganini, oilaviy ahvoli og‘ir bo‘lgani uchun ishlab pul topish maqsadida Rossiyaga borib qolganini aytgan hamda suddan yengillik so‘ragan.

Sudning 2026 yil 2 iyuldagi hukmi bilan Doston Jinoyat kodeksining 154-1-moddasi (chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirish, yollanish) 2-qismida nazarda tutilgan jinoyatni sodir etganlikda aybli deb topildi. Unga 3,6 yil muddatga ozodlikni cheklash jazosi tayinlandi. 

Avvalroq Rossiya armiyasiga yollangan qashqadaryolik yigit jinoiy jazoga tortilgandi.

Tahririyat: maqolani tayyorlash jarayonida Kun.uz ushbu ota-o‘g‘ilni izlab topdi va intervyu oldi. Lavha yaqin kunlarda e’lon qilinadi.

Source link

Tadbirkor Azamat Xoliqov juda ko‘p miqdorda firibgarlik va boshqa iqtisodiy jinoyatlarda gumonlanib, 2024 yil 20 aprelda qamoqqa olingan hamda 6 kundan so‘ng tergov izolyatorida vafot etgandi. Birinchi instansiya sudi marhum tadbirkorni juda ko‘p miqdorda firibgarlik, soliqdan bo‘yin tovlash, savdo qoidalarini buzish va boshqa jinoyatlarda aybli deb topgan. Apellyatsiya sudi uni firibgarlik jinoyati bo‘yicha aybsiz deb topib, oqladi.

Navoiylik marhum tadbirkor Azamat Xoliqov juda ko‘p miqdorda firibgarlik aybi bo‘yicha oqlandi. Kun.uz apellyatsiya sudi ajrimi bilan tanishdi.

To‘dako‘l ishi

Azamat Xoliqov va boshqalarga nisbatan qo‘zg‘atilgan jinoyat ishi Navoiy viloyatida joylashgan To‘dako‘l ko‘li bilan bog‘liq.

To‘dako‘ldan 2004 yildan 2018 yilga qadar “Aqua-Tudakul” O‘zbekiston–Amerika qo‘shma korxonasi ijara asosida foydalanib, baliqchilik bilan shug‘ullanib kelgan. Ushbu qo‘shma korxonaning ijara muddati 2022 yilda tugashi kerak bo‘lgan.

2017 yilda tashkil etilgan “O‘zbekbaliqsanoat” uyushmasi 2018 yil yanvarida ko‘lni ijaraga berish bo‘yicha qayta tender o‘tkazgan. Ushbu tenderda “Aqua-Tudakul” g‘olib deb topilib, uyushma bilan 10 yillik shartnoma imzolagan.

“O‘zbekbaliqsanoat” uyushmasi 2018 yil aprel oyiga kelib, ushbu shartnomani bekor qilgan va may oyida qayta tender o‘tkazgan. Bu safar tender o‘tkazilishidan 20 kun avval davlat ro‘yxatidan o‘tkazilgan “Golden Lake Fish” MChJ g‘olib deb topilgan. Azamat Xoliqov ushbu MChJ ta’sischisi edi.

Shu tariqa, “O‘zbekbaliqsanoat” uyushmasining noqonuniy tenderi orqali To‘dako‘l “Aqua-Tudakul” O‘zbekiston–Amerika qo‘shma korxonasidan “Golden Lake Fish” MChJga o‘tgan. JIB Navoiy shahar sudining 2022 yil 15 avgustdagi hukmiga ko‘ra, “Golden Lake Fish” MChJ rahbari Panjiqul Ro‘ziqulov tenderga qalbaki hujjatlar tayyorlab taqdim qilgan.

“Aqua-Tudakul” qo‘shma korxonasi rahbari Shavqitdin Jamolov ko‘lda 30 mlrd so‘mdan ortiq yetishtirilgan baliq zaxirasi bo‘lganini, ushbu zaxira “Golden Lake Fish” MChJga o‘tib ketganini da’vo qilib keladi. Ko‘lda qolib ketgan baliq zaxirasiga oid sudlarda uning “qo‘li baland kelgan”.

Marhum Azamat Xoliqovga qo‘yilgan juda ko‘p miqdorda firibgarlik aybi ana shu summa bilan bog‘liq.

Dastlabki sud hukmi

Marhum Azamat Xoliqov va boshqalarga nisbatan qo‘zg‘atilgan jinoyat ishi Navoiy shahar sudida ko‘rib chiqilgan.

Ushbu sudning 2026 yil 6 fevraldagi hukmi bilan marhum tadbirkor Jinoyat kodeksining 168-moddasi (firibgarlik) 4-qismi “a” bandi, 184-moddasi (soliqlar yoki yig‘imlarni to‘lashdan bo‘yin tovlash) 3-qismi, 189-moddasi (savdo yoki xizmat ko‘rsatish qoidalarini buzish) 1-qismi, 181-1-moddasi (qasddan to‘lovga qobiliyatsizlikka olib kelish) 1-qismi, 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) 2-qismi “a” bandi, 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi “a, b” bandlarida nazarda tutilgan jinoyatlarni sodir qilishda aybli deb topilgan. Marhum A.Holiqovga jinoyat-protsessual qonunchiligiga ko‘ra jazo tayinlanmagan.

Shuningdek, yana bir sudlanuvchi – “Golden Lake Fish” MChJ ta’sischisi Panjiqul Ro‘ziqulov ham firibgarlik jinoyatida aybli deb topilib, unga 6 yil muddatga ozodlikdan mahrum qilish jazosi tayinlangan.

Panjiqul Ro‘ziqulovdan “Aqua-Tudakul” foydasiga 32,6 mlrd so‘m miqdorda yetkazilgan moddiy zarar undirilishi belgilangan.

Apellyatsiya ajrimi

Jinoyat ishi Navoiy viloyati sudi jinoyat ishlari bo‘yicha sudlov hay’ati apellyatsiya instansiyasida ko‘rib chiqilgan.

Apellyatsiya sudining 2026 yil 30 iyundagi ajrimi bilan dastlabki sud hukmining marhum Azamat Xoliqov, Panjiqul Ro‘ziqulov hamda yana bir sudlanuvchiga oid qismi o‘zgartirilgan.

Sud ajrimiga ko‘ra, Azamat Xoliqov va Panjiqul Ro‘ziqulov juda ko‘p miqdorda firibgarlik (Jinoyat kodeksining 168-moddasi 4-qismi “a” bandi) jinoyati bo‘yicha aybsiz deb topilgan hamda oqlangan. Jinoyat ishining shu qismi tugatilgan. 

Shuningdek, hukmning Panjiqul Ro‘ziqulovdan “Aqua-Tudakul” foydasiga 32,6 mlrd so‘m miqdorda yetkazilgan moddiy zararni undirish hamda xatlangan mol-mulklarni yetkazilgan zararni qoplashga yo‘naltirish qismi bekor qilingan. Sud hukmining qolgan qismi o‘zgarishsiz qoldirilgan.

Ajrimdan norozi tomonlar belgilangan tartibda taftish shikoyati kiritish huquqiga ega ekani tushuntirilgan.

Eslatib o‘tamiz, 56 yoshli tadbirkor Azamat Xoliqovga ushbu ish doirasida 2024 yil 20 aprel kuni qamoq ehtiyot chorasi qo‘llangan va u 6 kun o‘tib tergov izolyatorida vafot etgandi.

Source link

Milliy gvardiya xodimlari Bo‘zsuv kanalida oqib ketayotgan ayolni ko‘rib qolgan. Xizmatchilardan biri uning hayotini saqlab qolish maqsadida suvga tushgan. Biroq kuchli oqim tufayli ayol ham, uni qutqarishga uringan 21 yoshli xodim ham halok bo‘lgan.

Toshkent shahrida cho‘kayotgan ayol hamda uni qutqarmoqchi bo‘lgan Milliy gvardiya xodimi halok bo‘ldi. Bu haqda Millar dasturida xabar berildi.

Ma’lum qilinishicha, bir ayol Xotira xiyoboni yaqinida Bo‘zsuv kanaliga o‘zini tashlagan. Uning suvda oqib ketayotganini Milliy gvardiyaning Toshkent shahar boshqarmasi harbiy xizmatchilari ko‘rib qolgan. Xizmatchilardan biri ayolning hayotini saqlab qolish maqsadida darhol suvga tushgan.

Biroq kanaldagi kuchli oqim tufayli ayol ham, Milliy gvardiya xodimi ham suvga cho‘kib, halok bo‘lgan. Xabarda halok bo‘lgan xodim 2005 yilda tug‘ilgani, yaqin kunlarda uning to‘yi o‘tkazilishi rejalashtirilgani aytilgan. 

Ayolning jasadi voqea sodir bo‘lgan kuni topilib, yaqinlariga topshirilgan. Harbiy xizmatchining jasadi ham qutqaruv xizmatlari tomonidan olib borilgan qidiruv ishlari natijasida topilgan. 

Avvalroq Chirchiqda Bo‘zsuv kanaliga tushib ketgan fuqaro qutqarib qolingandi.

Source link

Rossiyaning Vladivostok shahrida mablag‘siz va boshpanasiz og‘ir ahvolda qolgan o‘zbekistonlik ayol hamda uning voyaga yetmagan farzandi O‘zbekiston Bosh konsulxonasi ko‘magida vatanga qaytarildi. Oilaning yo‘l xarajatlari Migratsiya agentligi huzuridagi jamg‘arma mablag‘lari hisobidan qoplandi.

«Dunyo» axborot agentligi ma’lum qilishicha, Vladivostok shahridagi O‘zbekiston Bosh konsulxonasiga ushbu hududda vaqtincha yashab kelayotgan vatandosh M.R. murojaat qilib, 2023 yilda tug‘ilgan farzandi bilan birga og‘ir ijtimoiy va moliyaviy ahvolga tushib qolganini ma’lum qilgan.

Aniqlanishicha, fuqaro 2025 yilda turmush o‘rtog‘ining yoniga Rossiyaning Primore o‘lkasiga kelgan. Biroq joriy yil iyun oyida uning turmush o‘rtog‘i noqonuniy mehnat faoliyati bilan shug‘ullangani uchun huquqni muhofaza qiluvchi organlar tomonidan ushlanib, sud qarori asosida O‘zbekistonga deportatsiya qilingan.

Shundan so‘ng, oila boshlig‘isiz qolgan ayolning topayotgan daromadi ijara uyi, oziq-ovqat va yosh farzandining kundalik ehtiyojlarini qoplashga yetmay qolgan. Natijada oila og‘ir moliyaviy ahvolga tushgan.

Vaziyatni o‘rgangan O‘zbekiston Bosh konsulxonasi xodimlari tezkor choralar ko‘rdi. Migratsiya agentligi huzuridagi jamg‘arma mablag‘lari hisobidan ona va farzandi uchun «Vladivostok–Toshkent» yo‘nalishi bo‘yicha bepul aviachiptalar rasmiylashtirildi.

Shundan so‘ng, vatandoshlar Bosh konsulxona xodimlari kuzatuvida Vladivostok xalqaro aeroportidan O‘zbekistonga sog‘-omon jo‘natildi.

Tashqi ishlar vazirligi tizimidagi diplomatik vakolatxonalar xorijda og‘ir vaziyatga tushib qolgan O‘zbekiston fuqarolariga huquqiy, tashkiliy va amaliy yordam ko‘rsatish ishlarini izchil davom ettirayotganini ta’kidladi.

Source link

Kun.uz 9 yoshli qiz yillar davomida o‘gay otasi tomonidan jinsiy zo‘ravonlikka uchragani haqida material e’lon qilgan edi. Jabrlanuvchining onasi tahririyatga murojaatida qiziga tergovda bosim bo‘lgani, «ukalaring ko‘chada qoladi» degan gaplar bilan qo‘rqitilganini aytgan. O‘gay ota «Inson» ijtimoiy xizmatlar markazi xodimi bo‘lgan.

Sud hukmiga ko‘ra, voqea sodir bo‘lgan paytda «Inson» ijtimoiy xizmatlar markazida ishlagan A.A. Jinoyat kodeksining 167-moddasi 2-qismi «v», «g» bandlari hamda 119-moddasi 4-qismi (jinsiy ehtiyojni zo‘rlik ishlatib g‘ayritabiiy usulda qondirish)da nazarda tutilgan jinoyatlarni sodir etganlikda aybli deb topildi. Unga 14 yil 5 oy muddatga ozodlikdan mahrum qilish jazosi tayinlandi.

Shuningdek, mahkum davlat idoralarida mansabdorlik va moddiy javobgarlik bilan bog‘liq lavozimlarda ishlash huquqidan ham mahrum etildi. U jazoni umumiy tartibli koloniyada o‘taydi.

Eslatib o‘tamiz, Kun.uz’ga murojaat qilgan jabrlanuvchining onasi qizi nafaqat yillar davomida jinsiy zo‘ravonlik qurboni bo‘lganini, balki tergov jarayonida ham unga ruhiy bosim o‘tkazilganini iddao qilgan edi. Tergovda qizaloqqa «ukalaring ko‘chada qoladi» degan mazmunda gaplar aytilgan. Ona bu holat bolaning ruhiy ahvoliga salbiy ta’sir ko‘rsatganini bildirgan va ish yuzasidan xolis tergov o‘tkazilishini so‘ragan edi.

Ishning jamoatchilik muhokamasiga sabab bo‘lgan jihatlardan biri – sudlangan shaxs «Inson» ijtimoiy xizmatlar markazida faoliyat yuritgan. «Inson» markazlari aholining ijtimoiy himoyaga muhtoj qatlamlari, jumladan, bolalar, ayollar, keksalar va nogironligi bo‘lgan shaxslarga ijtimoiy xizmatlar ko‘rsatuvchi davlat tashkiloti hisoblanadi.

Oliy sud axborot xizmatiga ko‘ra, birinchi instansiya sudi hukmi ustidan taraflar qonunda belgilangan tartib va muddatlarda Toshkent viloyati sudining jinoyat ishlari bo‘yicha sudlov hay’atiga apellyatsiya tartibida shikoyat berish huquqiga ega.

Source link