Avstriya va O‘zbekiston 7-may kuni deportatsiya tartiblarini soddalashtirish bo‘yicha shartnomani imzolaydilar, deb xabar berdi The European Conservative. 

Kelishuv ikki mamlakat o‘rtasida noqonuniy migratsiya, migrantlarni kontrabanda qilish va odam savdosiga qarshi kurashda hamkorlikni rivojlantirishga qaratilgan. Shuningdek, deportatsiya qilinganlarni o‘z mamlakatlariga deportatsiya qilish va tranzit qilish bo‘yicha qo‘shma sa’y-harakatlarni ham ko‘zda tutadi. 

«O‘zbekiston bilan mobillik shartnomasi orqali biz keyingi qadamni qo‘ymoqdamiz va qat’iy va adolatli boshpana siyosatining bir qismi sifatida deportatsiyalarni izchil amalga oshirish uchun sharoit yaratmoqdamiz», dedi Avstriya vaziri Gerxard Karner. 

The European Conservative nashrining xabar berishicha, kelishuv Vena shahriga afg‘onistonliklarni O‘zbekiston orqali o‘z vatanlariga qaytarish imkonini beradi. O‘tgan yili Avstriya Bashar Asad hukumati ag‘darilgandan so‘ng bir nechta afg‘on fuqarolarini, shuningdek, suriyaliklarni deportatsiya qildi. 

Toshkent va Vena shuningdek, chegara xavfsizligi va qalbaki hujjatlarga qarshi kurashda hamkorlikni kuchaytirishni rejalashtirmoqda. 

Yevropa Ittifoqi inson huquqlari faollari va BMT Qochqinlar agentligining ogohlantirishlariga qaramay, noqonuniy migrantlarni o‘z vatanlariga deportatsiya qilish sonini ko‘paytirishni rejalashtirmoqda. 

Avvalroq, Avstriya hukumati mamlakatdagi noqonuniy migrantlar sonini kamaytirish bo‘yicha bir qator choralarni ma’qullagan edi. Qabul qilingan tashabbuslar orasida oilalarni birlashtirishni to‘xtatib turish va chegara xavfsizligi mexanizmini ishlab chiqish bor edi.

Source link

Sirdaryoning Shirin shaharchasida 29 yoshli ayol va uning 5 yashar qizi erkakning norasmiy xotini tomonidan pichoqlanish oqibatida vafot etdi. Marhumaning yaqinlari ayolning uzoq yillar davomida oilada ruhiy va jismoniy bosimga uchraganini bildirib, erkakka ham jazo talab qilishmoqda.

Marhuma Bekoboddan Sirdaryoga turmushga chiqqan va to‘rt farzandi bo‘lgan. Uning yaqinlariga ko‘ra, ayol turmush o‘rtog‘i bilan 9 yil birga yashagan davrida oilasi notinch bo‘lganini, qaynona va turmush o‘rtog‘i tomonidan muntazam xo‘rlanganini aytgan.

Singlimni xo‘rlashgan…

Malika Jumaboyeva, marhumaning opasi:

 “Oxirgi paytlar qattiq yig‘lardi, “yaxshi bo‘larmikan, chidolmayapman” derdi. U ayol bemalol uyiga borib yurgan, qarindoshlari buni bilgan, uni hurmat qilishgan – singlimni esa xo‘rlashgan. Shuncha farzandlarni tug‘ib katta qilsayam hurmat topmadi u. Qaynonasi namoz o‘qib o‘tirgandim deyapti, uch kishini pichoqlaguncha qanday bilmasligi mumkin? Uyida katta ovsinining bolasiyam bo‘lgan.

O‘sha kuni o‘sha qiz bilan ular kafeda o‘tirib ichishgan ekan, janjal bo‘lgan. O‘zi oldindan tahdid bo‘lgan singlimga “oilangni qachondir yo‘q qilaman” degan. Buni bizga aytmadi, keyin eshitdik”.

Pichoqlangan qizaloqlarning kattasi 5, kichigi 3 yoshda bo‘lgan. Ona va 5 yashar qiz voqea joyida vafot etgan. 3 yoshli qizaloq ayni paytda shifoxonaning jonlantirish bo‘limida.

Kuyovni otalik huquqidan mahrum qilish kerak

Mavluda Abdunazarova, marhumaning ammasi:

“Eng avvalo kuyovda ayb. Nima uchun u tashqarida yuribdi? Nima uchun unga jazo qo‘llanmayapti? Bolalarning qotili, eng avvalo shu o‘ldirgan ayol bo‘ladigan bo‘lsa, kuyov o‘shaning ishonchiga kirgan, va’dalarni berganki shu ayol shu darajagacha borgan? Darvozadanmas, orqa tarafdan kirib jiyanim uy ishlarini qilib o‘tirgan joyida uni urgan. Qizchalari dod solganda ularni majag‘lab tashlagan, ichaklarini chiqarib. Chaqaloq uyda uxlab yotgan, qaynonasi uyda namoz o‘qiyotgan edim dedi. Nahotki shu baqir-chaqirlarni eshitmagan? Hammasi bilar ekan, bordi-keldi qilar ekan.

Jiyanimni bu yerga olib kelib tashlab, hammasi bilan apoq-chapoq bo‘lib yurishgan. Shunaqa ekan, Maftunani javobini berib, o‘shanga uylantirib qo‘ymaydimi? 20 kunlik chaqaloq qoldi, shifoxonada 3 yashar bolaning ichagini 3 soat yuvib joyiga joylashtiribdi vrachlar. Agar bunga odilona chora ko‘rilmasa, bunaqalar ko‘payadi. Kuyovni otalik huquqidan mahrum qilish kerak. O‘z oilasini, xotinini, o‘z bolalarini o‘ldirgan otaning haqqi yo‘q bolalarga ota bo‘lishga”.

Ichim tugab bo‘ldi mening…

G‘ofur Jumaboyev, marhumaning otasi:

 “Qizimning dardi ichida ketdi. Oxirgi paytlar kelardi, dadamga aytmanglar der ekan. Kuyov kelib tashlab ketardi, ketishi cho‘zilib ketardi, hayron bo‘lib “uying tinchmi?” desam, o‘ziyam xijolat bo‘lardi. Men rangidan bilardim. Ota-onam o‘ylanmasin deb, qo‘ni-qo‘shni gapirmasin deb boshqacha o‘tirardi erini kutib. Dardini o‘qib turardim qizimni. Ichim tugab bo‘ldi mening.

Bir-ikki marta kuyovni alohida chaqirib o‘tirg‘izib aytganman, qiliqlarini bilardim. Lekin unga gapirsangiz sizni eshitmasdan, xayoli boshqa joyda o‘tirardi. Sababini bilmayman, biror narsa iste’mol qiladimi deb o‘ylardim”.

Oliy sud axborot xizmati holat yuzasidan qotillikda gumonlanayotgan ayol Jinoyat kodeksining 97-moddasi bilan qamoqqa olinganini ma’lum qildi. Ayni paytda ayol tergov hibsxonasida saqlanmoqda. 

Source link

Prezident Shavkat Mirziyoyev sog‘liqni saqlash tizimini yanada rivojlantirish, tibbiy xizmatlar sifatini oshirish va xususiy sektor ishtirokini kengaytirishga qaratilgan taqdimot bilan tanishdi.

So‘nggi yillarda mamlakatda xususiy tibbiyot jadal rivojlandi. 2016-yilda 3,2 mingta bo‘lgan xususiy klinikalar soni 2026-yilga kelib 8,7 mingtaga yetishi kutilmoqda. Xususiy sektordagi yo‘nalishlar 39 tadan 116 tagacha, koyka o‘rinlari esa 16 mingdan 57 mingtagacha oshdi. Natijada umumiy koyka fondida xususiy sektor ulushi 12 foizdan 31 foizgacha o‘sishi prognoz qilinmoqda.

Shu bilan birga, sohadagi ayrim muammolar ham qayd etildi. Xususan, tibbiy xizmatlar sifati ustidan nazorat yetarli emasligi, litsenziyalash talablari zamon talablariga mos kelmasligi, xususiy klinikalar haqida yagona elektron ma’lumot bazasi shakllanmagani va investitsiya loyihalari bilan ishlash tizimi yetarli emasligi ta’kidlandi.

Yangi yondashuvlarga ko‘ra, tibbiy faoliyatni litsenziyalash jarayonlari markazlashtirilib, 2026-yil 1-iyuldan boshlab talablar kuchaytiriladi. 48 ta litsenziya talabidan 14 tasi qayta ko‘rib chiqiladi. Bunda qoidabuzarlik aniqlangan taqdirda butun klinika faoliyatini to‘xtatish o‘rniga, faqat tegishli yo‘nalish bo‘yicha cheklov qo‘llash amaliyoti joriy etiladi.

Shuningdek, tibbiyot muassasalari faoliyati ustidan nazorat elektron tizim orqali masofadan turib amalga oshiriladi. Akkreditatsiyadan o‘tgan xususiy klinikalarga transplantatsiya amaliyotlarini o‘tkazishga ruxsat berilishi, budjet mablag‘lari hisobidan tibbiy xizmat ko‘rsatish imkoniyati yaratilishi rejalashtirilmoqda.

2028-yildan boshlab akkreditatsiyadan o‘tmagan muassasalar bilan tibbiy xizmatlar bo‘yicha shartnomalar tuzilmaydi. 2030-yilga qadar esa barcha davlat tibbiyot muassasalari bosqichma-bosqich majburiy litsenziyadan o‘tkaziladi.

Xususiy tibbiyotni qo‘llab-quvvatlash maqsadida 200 million dollarlik imtiyozli kredit resurslari ajratish, olis hududlarda klinikalar tashkil etish uchun moliyaviy yordam ko‘rsatish, xorijiy mutaxassislar uchun soliq imtiyozlari joriy etish taklif qilindi.

Investitsiyalarni jalb qilishni kuchaytirish maqsadida Tibbiyot va farmatsevtika tarmog‘ini rivojlantirish agentligini tashkil etish, “yagona darcha” tamoyili asosida investorlar bilan ishlash hamda “Health Invest” kompaniyasini tashkil qilish rejalashtirilmoqda.

Davlat rahbari ushbu takliflarni ma’qullab, mutasaddilarga tizimni yanada takomillashtirish bo‘yicha aniq topshiriqlar berdi.

Source link

Rossiya tomonida Ukrainaga qarshi urishayotgan o‘zbekistonliklar soni 5 mingga yaqinlashib qoldi. Rossiyada migrantlarni urushga yollash bo‘yicha har xil sxemalar, tuzoqlardan foydalanilayotgani aytiladi. Urushga yollovchi bunday shaxslar O‘zbekiston ichida ham paydo bo‘lmoqda. Maqolada shunday shaxslardan biri haqida hikoya qilinadi.

Telegram’dagi tuzoq

Internetdagi ayrim manbalarga ko‘ra, Rossiyadan 2023 yilda qariyb 45 ming, 2024 yilda 90 mingga yaqin va 2025 yilda 70 ming nafardan ortiq xorij fuqarolari deportatsiya qilingan. Albatta, bular orasida O‘zbekiston fuqarolari ham bor.

Rossiyadan deportatsiya qilinganlar orasida noqonuniy yo‘llar bilan ushbu davlatga qaytib borishni istaydiganlar ham topiladi. Andijonlik 32 yoshli Nursulton Tavakalov Rossiya huquqni muhofaza qiluvchi organ xodimlari buyurtmasiga asosan ma’lum bir haq evaziga ana shunday O‘zbekiston fuqarolarini urushga yollashga harakat qilgan.

Nursulton Telegram’dagi guruhlardan birida Rossiyadan deportatsiya qilinganlarni ushbu davlatga olib kirish haqida e’lon bergan.

Nursulton Tavakalov ushbu tuzog‘i Rossiyaga kirishiga taqiq qo‘yilgan vatandoshlar e’tiborini tortishini bilardi. Shunday ham bo‘ldi. Uning tuzog‘iga Nodir Olimov va Erali Ro‘ziqulov ismli shaxslar ilindi.

Sog‘ligidagi muammo qutqardi

Nodir Olimov ancha yillardan buyon Rossiyaga qatnab, qurilish ishlarida ishlab kelardi. 2023 yil oxirida u ushbu davlatda bo‘lish qoidalarini buzgan. Shu sababli, deportatsiya qilinib, 10 yil muddatga Rossiyaga kirishiga taqiq qo‘yilgan.

Nodir Olimov taqiqqa qaramay ushbu davlatga qaytib borish harakatiga tushgan. O‘sha kunlarda u Nursultonning e’lonini ko‘rib qolgan. So‘ngra darhol e’londagi telefon raqamiga qo‘ng‘iroq qilgan.

Nursulton Nodir Olimovga o‘z tanishlari orqali Rossiyaga kiritib qo‘yish va’dasini bergan. Xizmat haqi sifatida 250 ming rub to‘lashi kerakligini aytgan. Nodir Olimov bu taklifga rozi bo‘lib, WhatsArr orqali pasport nusxasini jo‘natgan.

Shu tariqa, ular ko‘rishgan. Nursulton Rossiyaning barcha aeroportlarida tanishlarini borligini aytib, Nodir Olimovdan kelishilgan pulning yarmini avvaldan berishni so‘ragan. Nodir Olimov esa hozircha 400 dollar berishini, qolganini Rossiyaga kiritib qo‘yganidan so‘ng to‘lashini bildirgan. Biroz savdolashuvdan so‘ng tomonlar o‘zaro kelishgan.

2025 yil iyun oyi oxirlarida Nursulton Nodir Olimovga qo‘ng‘iroq qilib, taksi jo‘natayotganini aytgan.

“Ushbu taksida “Do‘stlik” chegara punktigacha borasiz. U yerdan Qirg‘izistonning O‘sh shahriga o‘tasiz. Keyin Bishkekka borib, Moskvaga uchasiz. Samolyot “Domodedova” aeroportiga qo‘nadi. U yerda sizni tanishlarim kutib oladi hamda Rossiyaga kiritib yuboradi”, degan u.

Nodir Olimov 2025 yil 29 iyun kuni aytilgan yo‘nalish bo‘yicha harakatlanib, “Domodedova” aeroportiga yetib borgan. So‘ngra o‘sha yerdan Nursultonga qo‘ng‘iroq qilgan. U esa aeroportdagi bir oynaga borishni aytgan. Aytilgan joyga borganida esa u yerdagi shaxs Nodir Olimovdan pasportini so‘ragan. Ko‘p o‘tmay ikki militsiya kelib, Nodir Olimovning qo‘lidan ushlagan holda uni alohida xonaga olib kirishgan.

Nodir Olimov sudda o‘sha holat haqida shunday ko‘rsatma bergan:

“Xonada dastlab menga Rossiyaga kirishim mumkin emasligini aytib, chiqib ketishdi. Keyin 2 nafar harbiy kelib, mening Ukrainaga qarshi urushda qatnashishga tayyor ekanim bilan qiziqdi. So‘ngra oldimga Rossiya Mudofaa vazirligi tarkibida harbiy xizmatni o‘tish to‘g‘risidagi shartnomani qo‘yishdi. Unda mening ismim va boshqa ma’lumotlar bor edi. Harbiylarga shartnomaga imzo qo‘ymasligimni, boshqa davlat uchun jang qilish niyatim yo‘qligini ma’lum qildim.

Ularning jahli chiqib, meni Markaziy Osiyodan kelgan 15-20 nafar migrantlar joylashtirilgan alohida sovuq xonaga olib kirib qo‘yishdi. Xonadagilarning barchasi Ukrainadagi urushga borishga majburlanayotgandi. Norozilik bildirgan shaxslarga nisbatan kuch va zo‘ravonlik ishlatildi.

Sovuq xonada mening ahvolim og‘irlashdi. Shu sababli, tibbiyot xodimi va harbiylar kelib, meni xonadan olib chiqishdi hamda ukol qilishdi. Biroz o‘zimni yaxshi his qildim. So‘ngra sog‘ligim to‘g‘ri kelmagani sababli meni aeroportning o‘zidan Qirg‘izistonga qaytarib yuborishdi”.

Nodir Olimov ortga qaytib kelgach, Nursulton bilan bog‘langan. U ikkinchi bor yana aldashga uringan. Ammo uning so‘zlariga ishonmagan jabrlanuvchi tegishli organlarga murojaat qilgan.

Chegarachining yaxshiligi

Erali Ro‘ziqulov ham tegishli hujjatlarni rasmiylashtirmasdan ishlagani uchun 2023 yil iyun oyida Rossiyadan 5 yilga deportatsiya qilingandi. U ortga qaytib borish uchun Nursultonning “xizmati”dan foydalanmoqchi bo‘lgan. Nursultonni esa o‘sha e’lon orqali topgan.

Erali Ro‘ziqulov Nursultonga qo‘ng‘iroq qilib, rostdan ham Rossiyaga kirishga qo‘yilgan taqiqni yechib bera olishini so‘ragan. Nursulton esa faoliyati qonuniy va rasmiy ekanini, natija uchun javob bera olishini ma’lum qilgan.

Shu tariqa, Erali xizmat haqi 45 mln so‘m bo‘lishi, uning 30 mln so‘mi oldindan, 15 mln so‘mi Rossiyaga kirib olgandan so‘ng berilishi haqidagi taklifga ko‘ngan.

Ular 2025 yil 14 iyun kuni “G‘ishtko‘prik” bojxona-chegara posti yonida ko‘rishgan. Erali 30 mln so‘mni bergan. Nursulton esa hammasi yaxshi bo‘lishini, uning suratini Rossiya politsiyasiga berib qo‘yishini, ular muammosiz mamlakatga kiritib yuborishlarini aytgan.

Erali Ro‘ziqulov “G‘ishtko‘prik” bojxona-chegara posti orqali Qozog‘istonga o‘tib, avtobusda Rossiyaga yo‘l olgan. Ammo Rossiya chegarasiga yetib borganida chegara xodimlari uni ushlab, taqiq borligini, agar Ukrainaga qarshi urushga borishga rozi bo‘lsa o‘tkazishlarini, yo‘qsa ortga qaytarib yuborishlarini aytgan. Erali urushga bormasligini ma’lum qilganida unga nisbatan jismoniy va ruhiy tazyiq o‘tkazishga xarakat qilib ko‘rishgan. 2 soatlardan so‘ng esa uni Qozog‘istonga qaytarib yuborishgan.

Erali Ro‘ziqulov Nursultonga qo‘ng‘iroq qilib, bo‘lgan voqeani aytgan. Shunda Nursulton endi Qirg‘iziston orqali jo‘natishini, bu safar aniq taqiqini yechganini bildirgan.

Nursulton Erali Ro‘ziqulovga Bishkek shahridan Rossiyaning Novosibirsk viloyatiga aviachipta olib bergan. Erali uning ko‘rsatmasi asosida O‘sh shahriga o‘tgan, so‘ngra Bishkekka borgan. Biroq aeroportda pasport nazoratidan o‘tayotganda bu safar uni Qirg‘iziston chegara xodimlari to‘xtatib qolgan. Ular Rossiyaga kirishga taqiq borligini, sarson bo‘lgan holda qaytib kelishi mumkinligini aytib, bormaslik maslahatini bergan.

Shu tariqa, o‘zi sezmagan holda omadi yurishib, Erali Ro‘ziqulov ikkinchi marta ham Rossiyaga ketolmagan.

“Sheriklarim yo‘q”

Nursulton Tavakalovga nisbatan jinoyat ishi qo‘zg‘atilgan hamda u 2025 yil 14 avgustda qamoqqa olingan.

Nursulton sudda aybiga qisman iqrorlik bildirgan va bu ishni qilishda sheriklari bo‘lmaganini aytgan.

“Ushbu fuqarolar Rossiyaga borishlari haqida Rossiya huquqni muhofaza qiluvchi organlari xodimlariga xabar bermaganman. Ular bilan aloqam ham yo‘q”, degan o‘z ko‘rsatmasida.

Ammo sud guvohlar va jabrlanuvchilarning ko‘rsatmalari, jinoyat ishi doirasida to‘plangan dalillar bilan Nursultonning jinoyati o‘z tasdig‘ini topgan, deb hisoblagan.

Jazo

JIB Mirzo Ulug‘bek tuman sudining 2026 yil 12 fevraldagi hukmi bilan Nursulton Tavakalov Jinoyat kodeksining 28,154-moddasi (yollanish) 2-qismi va 168-moddasi (firibgarlik) 3-qismi “b,g” bandlarida nazarda tutilgan jinoyatlarni sodir qilganlikda aybdor deb topilgan. Unga 7 yil 2 oy oy ozodlikdan mahrum qilish jazosi tayinlangan. Muqaddam boshqa jinoyat ishi doirasida tayinlangan jazoning o‘talmay qolgan qismi qo‘shilib, jazo muddati 7,5 yilga keltirilgan. Jazoni qattiq tartibli koloniyada o‘tash nazarda tutilgan.

Shuningdek, undan jabrlanuvchilar foydasiga yetkazilgan zararni undirish belgilangan.

Apellyatsiya sudi hukmni o‘zgarishsiz qoldirgan.

Source link

Toshkentda Yevropa Ittifoqi tomonidan moliyalashtirilgan «EU–Tabassum» loyihasining ikki yillik yakunlari sarhisob qilindi. Milliy konferensiya doirasida o‘tkazilgan «Media Ayvon–2026» forumi loyiha natijalarini tahlil qilish bilan birga, media makonidagi real o‘zgarishlarni namoyon etdi.

​Loyiha DW Akademie hamda Zamonaviy jurnalistikani rivojlantirish markazi hamkorligida amalga oshirilib, xotin-qizlar va yoshlar ovozini kuchaytirish, gender tengligini targ‘ib qilish va media ko‘nikmalarni rivojlantirishga qaratildi.

​Ikki yil davomida loyiha doirasida:

– ​8 ta treningda 150 ga yaqin jurnalist va blogerlar o‘qitildi;

​- 12 ta media-klub orqali 300 dan ortiq ishtirokchi birlashtirildi;

​- 10 ta tashkilot tomonidan 650 dan ortiq media mahsulot yaratilib, ularning qamrovi 180 mingdan oshdi.

​Shuningdek, EduSmile.uz ta’lim platformasi ishga tushirilib, jurnalistlar va kontent yaratuvchilar uchun professional muhit shakllandi. Platforma orqali turli soha ekspertlari bilan to‘g‘ridan-to‘g‘ri muloqot qilish imkoniyati yo‘lga qo‘yildi.

​«EU–Tabassum» — bu shunchaki loyiha emas, balki O‘zbekistonda ochiq, inklyuziv va mas’uliyatli media muhitini shakllantirishga xizmat qilayotgan muhim platformadir.

​Tadbir tashkilotchilari:

​- Zamonaviy jurnalistikani rivojlantirish markazi

​- OAV uchun kontent tayyorlash markazi

​- Milliy mass-mediani qo‘llab-quvvatlash va rivojlantirish jamoat fondi

​- DW Akademie

​- Yevropa Ittifoqi

​- Germaniya Iqtisodiy hamkorlik va taraqqiyot federal vazirligi

​- Shveysariya hamkorlik va taraqqiyot agentligi (SDC). 

Source link