Sport
YChLda pley-off juftliklari. Kimda qanday imkoniyat?
Bugun Yevropa Chempionlar Ligasida nimchorak final uchrashuvlari start oladi. Qur’a yana «Real» va «Manchester Siti»ni pley-offda to‘qnashtirgan, «PSJ»da «Chelsi»dan o‘tgan yozdagi mag‘lubiyat uchun qasos olish imkoni yuzaga kelgan. Bundan tashqari, «Liverpul» yana Istanbulga, «Barsa» yana Nyukaslga safar qiladi.
10 mart kuni Chempionlar ligasi 1/8 finalida dastlabki uchrashuvlar bo‘lib o‘tadi. Turnirning yangi formatida ham bu bosqichdan oldingi tartib saqlanib qolgan: 16 jamoa, har bir bosqichda ikkitadan o‘yin, hech qanday safardagi gol qoidasi yo‘q. Quyida sakkizta juftlikning keyingi bosqichga chiqish imkoniyatlari chamalab ko‘riladi.
«Galatasaroy» – «LIVeRPUL» (10 mart, 22:45. Zo‘r TV)
Imkoniyatlar: 35 foizga – 65 foiz
Stadionlardagi muhit, aura bo‘yicha eng zo‘r juftlik deb atash mumkin. «Rams Park» ham, «Enfild» ham muxlislarning performansi bo‘yicha Yevropada eng yaxshilaridan sanaladi. Mersisaydliklar uchun qur’adan oldingi ehtimoliy raqiblar orasida aynan «Galatasaroy» nisbatan osonroq raqib sifatida ko‘rilgan bo‘lishi mumkin, ammo aynan Istanbulda odatda mezbonlarni yengish juda qiyin. Dastlabki o‘yin Turkiyada bo‘lishi e’tiborga olinsa, Okan Buruk shogirdlari birinchi o‘yinda kerakli natijaga erishib, javob o‘yinida shu ustunlikni saqlashga harakat qilib o‘ynashi mumkin. Zero «Galatasaroy» tarkibidagi futbolchilarni «Enfild» bilan qo‘rqitib bo‘lmaydi – Sanches, Gundo‘g‘an, Torreyra, Lamina, Sane kabi futbolchilar APL futbolida yetarlicha tajriba to‘plab ulgurishgan.
Jamoalar Chempionlar Ligasining joriy mavsumida guruh bosqichida ham to‘qnash kelgandi. «Galatasaroy» o‘z maydonida 1:0 hisobida ustun kelgan, yagona golni Viktor Osimhen penaltidan urgandi. Ammo bu o‘yin Slot jamoasidagi inqiroz davriga to‘g‘ri kelgandi, bugungi «Liverpul» esa nisbatan ancha tartibga kelib qoldi. Shu bilan birga, «Liverpul» hali «Galatasaroy»ga qarshi safar o‘yinlarida g‘alaba qozonmagan. 2001/02 yillar mavsumida Istanbulda 1:1 hisobi qayd etilgan va faqat safardagi gol qoidasi bo‘yicha inglizlar keyingi bosqichga chiqishgandi. 2006/07 yillar mavsumida esa jamoalar guruhda duch kelib, har ikki o‘yin 3:2 hisobida mezbon jamoa foydasiga hal bo‘lgan.
«Nyukasl» – «BARSeLONA» (11 martga o‘tar kechasi, 01:00. Zo‘r TV)
Imkoniyatlar: 45 ga – 55
Ushbu jamoalar ham kuzda, guruh bosqichi doirasida uchrashgandi. Angliyada bo‘lib o‘tgan o‘yinni Eddi Hau shogirdlari o‘ta faol boshlashgan, bir qator vaziyatlar yaratib, raqibni qiyin ahvolga solib qo‘yishgandi. Keyin esa Frenki de Yong – Pedri juftligi ishga tushdi – bu ikki futbolchi maydon markazini qo‘lga olib, o‘yinni «Barselona» uchun qulayroq, xotirjamroq ko‘rinishga olib kelishdi. Keyin esa Markus Reshford kerakli gollarni urib, ispanlarga g‘alaba keltirgandi.
Lekin Frenki de Yong fevral oyida jarohat oldi va «Nyukasl»ga qarshi ikki o‘yinni ham o‘tkazib yuboradi. Pedri esa endigina tiklandi va qisqa vaqtda optimal formaga kira olishi so‘roq ostida. «Barselona» oxirgi o‘yinlarda aynan markazni nazorat qilishga qiynalmoqda.
APL bahslarida kuchli beshlikdan 9 ochkoga ortda qolib ketgan va yagona umidi aynan Chempionlar Ligasi o‘yinlari bo‘lgan «Nyukasl» bu safar «Barselona»ga yetarlicha boshog‘riq bo‘lishi turgan gap. Gordon, Elanga, Vissa, Myorfi kabi tezkor futbolchilarga ega bo‘lgan inglizlar «Barselona»ning yuqori himoya uslubidan foydalanib qolishi mumkin.
Umuman, tarkib bo‘yicha albatta «Barselona» kuchliroq – qo‘pol xatolar, kutilmagan ssenariylar yuzaga kelmasa, kataloniyaliklar keyingi bosqichga o‘tishi mumkin.
«Atalanta» – «BAVARIYa» (11 martga o‘tar kechasi, 01:00)
Imkoniyatlar: 25 ga – 75
Italiya klublari ichida faqat «Atalanta» turnir pley-off bosqichiga chiqa oldi. Bergamoliklar o‘tish bosqichida Bundesliganing boshqa jamoasi – «Borussiya»ga qarshi birinchi o‘yinda 0:2 hisobida yutqazganiga qaramay, o‘z maydonida kambek amalga oshirib, ko‘pchilikning yoqimtoyiga aylanib ulgurishdi. Umuman, jamoa nemislarga qarshi ancha muvaffaqiyatli o‘ynay olishini avval ham isbotlagan. Ikki yil oldin butun mavsumni mag‘lubiyatsiz o‘tkazgan «Bayyer» ham Yevropa Ligasi finalida shu jamoaga qarshi o‘yinda seriyasini to‘xtatgandi.
Lekin «Bavariya»ga qarshi o‘yinda bunday muvaffaqiyatni takrorlash juda qiyin kechishi turgan gap. «Atalanta» o‘zinining eng yaxshi o‘yinlarini o‘tkazgan taqdirda ham ayni damda natijalar borasida Yevropaning eng yaxshi jamoasi bo‘lib turgan Vensani Kompani shogirdlari bir bosh yuqori. Buning ustiga myunxenliklar Bundesligada yetarlicha farq bilan peshqadamlik qilishmoqda va kerakli rotatsiyalarni amalga oshirib, bor e’tiborini aynan Chempionlar Ligasiga qaratish imkoniga ega.
«ATLeTIKO» – «Tottenhem» (11 martga o‘tar kechasi, 01:00)
Imkoniyatlar: 55 ga – 45
Har ikki jamoa ham futbol o‘ynashdan ko‘ra raqibga o‘yin bermaslik, uning ustun jihatlarini yo‘qqa chiqarishga usta, jismoniy kurashlarda o‘zini juda yaxshi his qiladi. So‘nggi yillarda «Atletiko» biroz tashabbuskor futbolga yuzlangan, «Tottenhem» esa muammolar girdobida qolayotgan bo‘lsa-da, bu juftlikdan har narsani kutish mumkin. Angliya chempionatida autsayderlar qatorida yurib ham, Chempionlar Ligasida kuchli sakkizlikka kirgani, umuman, o‘tgan yili ham xuddi shu rejimda Yevropa Ligasini yutgani e’tiborga olinsa, YeChLda umuman boshqacha «Tottenhem»ni ko‘rishimiz mumkin. Shu bilan birga, alohida o‘yinlarda «Atletiko»ning ham plankasi ancha yuqori bo‘lishiga ko‘p marta guvohi bo‘lganmiz.
Igor Tyudor va Diyego Simeone dueli – chiroyli kombinatsiyalar va hujumkor o‘yindan ko‘ra, qanday qilib raqibga xalaqit berilishi, o‘zini ham ayamasdan kurashni jonli tomosha qilishni xohlaydigan ixlosmandlar uchun ajoyib shou.
«Bayyer» – «ARSeNAL» (11 mart, 22:45. Zo‘r TV)
Imkoniyatlar: 30 ga – 70
Yengilmas jamoalar to‘qnashuvi. Bugungi tarkiblarga unchalik aloqador bo‘lmasa-da, har ikki jamoa milliy chempionatda mavsumni mag‘lubiyatsiz yakunlay olganlar klubiga a’zo hisoblanadi. «Arsenal» 2003/04 yillar mavsumida, «Bayyer» esa 2023/24 yillarda chempionatda biror marta ham yutqazmasdan chempion bo‘lishni uddalagan.
Ushbu juftlikda «Arsenal» yaqqol favorit. Taqvim ham Mikel Arteta nemislarga qarshi o‘yinlarga nisbatan qulay sharoitda tayyorgarlik ko‘rish uchun sharoit yaratdi. Birinchidan, «Arsenal» «Bayyer»ga qarshi ilk o‘yin oldidan APLda qiyin o‘yin o‘tkazishiga to‘g‘ri kelmadi, londonliklar shanba kuni uchinchi liga vakili «Mansfild Taun»ga qarshi oson o‘yin o‘tkazdi va murabbiy katta rotatsiya qilish imkoniga ega bo‘ldi. Endi Leverkuzenga jamoa jismonan tayyor holatda borishi mumkin. Javob o‘yini borasida esa APL londonliklarga yon bosdi – «Everton»ga qarshi uchrashuv avvaliga yakshanba kuniga belgilangan edi, ammo «Bayyer»ga qarshi o‘yin seshanba kunga to‘g‘ri kelgani sababli, APL rahbariyati o‘yinni shanbaga ko‘chirib berdi.
«Arsenal» so‘nggi o‘yinlarda unchalik barqaror emasligi haqida mulohazalar ko‘p bo‘lsa-da, «Bayyer»da muammolar yanada ko‘proq deyish mumkin. Londonlik keyingi bosqichga o‘tishda jiddiy muammoga duch kelishi dargumon.
«Real» – «Manchester Siti» (12 martga o‘tar kechasi, 01:00. Zo‘r TV)
Imkoniyatlar: 50 ga – 50
Chempionlar Ligasi klassikasiga aylanib bo‘lgan to‘qnashuv. So‘nggi yetti mavsumning oltitasida jamoalar turli bosqichlarda o‘zaro kuch sinashishiga to‘g‘ri kelgan. Faqat 2020/21 yillar mavsumida muxlislar ushbu jamoalar to‘qnashuviga guvoh bo‘lmagan. Ammo buni joriy mavsumda guruh bosqichidagi o‘zaro o‘yin kompensatsiya qilgandi, deyish mumkin. O‘shanda Pep Gvardiola shogirdlari Madriddan 2:1 hisobidagi g‘alaba bilan qaytgandi.
Ammo o‘tgan qisqa vaqt ichida ham ko‘p narsa o‘zgarib ketdi. «Real» Habi Alonsoni iste’foga chiqarib, Alvaro Arbeloani yangi bosh murabbiy etib tayinladi, «Manchester Siti» esa yanvarning o‘zida ikkita katta transferga qo‘l urdi: Semenyo va Geyi bilan jamoa yanada kuchaydi. Semenyo guruh bosqichi uchun qaydnomaga kiritilmagani tufayli, jamoa a’zosi bo‘lsa-da, Chempionlar Ligasi o‘yinlarida qatnasha olmagandi. U aynan «Real»ga qarshi o‘yinda debyut qilishi kutilmoqda.
O‘zbekistonlik himoyachi Abduqodir Husanov ham aynan «Real»ga qarshi ushbu turnirdagi ilk o‘yinini o‘tkazgan va katta taassurot qoldirgandi, Gvardiola bu safar ham unga ishonch bildirishi mumkin.
Shu paytgacha jamoalar ko‘p marta to‘qnash kelgan bo‘lishsa-da, bu safar ilk bor o‘yinlar kartinasini taxmin qilish qiyin. Avvallari, Gvardiola jamoasi o‘z uslubiga muvofiq tarzda to‘pni nazorat qilishga urinar, «Real» esa individual mahorat va tezkor qarshi hujumlarga tayanar edi. Ammo yangilangan «Manchester Siti» biroz boshqacha, raqibga moslashib ham o‘ynashni o‘rganib olgan. O‘z navbatida, Arbeloa boshqaruvi davridagi «Real»ning ham aniq uslubini tasavvur qilish qiyin. Xullas, muxlislarni hakam hushtagi chalingandan keyingina jamoalarning rejasi namoyon bo‘ladigan, shuningdek, o‘yin davomida bir necha marta muvozanat o‘zgarishi mumkin bo‘lgan bahslar kutib turibdi.
«PSJ» – «Chelsi» (12 martga o‘tar kechasi, 01:00)
Imkoniyatlar: 50 ga –50
O‘n yillar oldin ushbu jamoalar to‘qnashuvi ham Chempionlar Ligasining doimiy tomoshasiga aylanib ketgandi. Demba Baning so‘nggi daqiqalardagi golidan so‘ng maydon bo‘ylab yugurgani, 2015 yildagi olovli qo‘shimcha bo‘limlar ko‘pchilikning yodida bo‘lsa kerak. Oxirgi marta esa raqiblar o‘tgan yozda klublar o‘rtasidagi jahon chempionati finalida to‘qnash kelishgandi. O‘yin kutilmaganda «Chelsi»ning 3:0 hisobidagi g‘alabasi bilan yakunlangandi. Demak, parijliklarda qasos olish imkoni tug‘ildi.
Umuman, londonliklarning sobiq ustozi Enso Mareska katta o‘yinlarga xos tayyorlanish borasida ko‘p bor o‘zini ko‘rsatgan, agar hozir ham ushbu mutaxassis ishlayotgan bo‘lganida «Chelsi»ning imkoniyatlari biroz yuqoriroq baholanishi ham mumkin edi. Liam Rosenior kelganidan buyon London klubi top-raqiblardan faqat «Arsenal»ga qarshi uchta o‘yin o‘tkazdi va uchalasida ham yutqazdi. Qolgan raqiblar bilan o‘yinlarda esa asosan birinchi raqamda o‘ynadi va yutqazmadi. «PSJ» Rosenior uchun yana bir jiddiy sinov bo‘ladi.
Albatta, o‘tgan yilning oktyabrida «PSJ» – «Strasbur» bahsini ham unutmaslik kerak – o‘shanda «Strasbur» ustozi bo‘lgan Rosenior Enrike uchun yaxshigina syurpriz tayyorlagan va 3:3 hisobida durang o‘ynab ketgandi. Mehmonlar atigi o‘yinning 29 foiz vaqtida to‘pga egalik qilib ham vaziyatlar borasida raqibga bo‘sh kelmagan, 3:1 hisobida oldinda borgandi ham. Demak, Roseniordan bu safar ham nimadir kutish mumkin.
O‘z navbatida, «PSJ»ning holati ham biroz mavhum. O‘tgan mavsumda jamoa guruh bosqichi masalasini faqat so‘nggi turlardagi qiyin g‘alabalar orqali hal qilgan va shundan keyin asta-sekinlik bilan kuchayib borgandi. Fransiya chempionati ancha yengil ekanidan kelib chiqilsa, aynan shunday tonus jamoa uchun juda kerak. Ammo bu safar «PSJ» guruh bosqichini nisbatan oson o‘tkazdi, hatto o‘tish bosqichida ham ichki chempionatdagi tanishi «Monako» raqib bo‘ldi. Enrikening bu mavsum uchun tajribalari hali davom etayotgani, guruhning hal qiluvchi o‘yinida «Nyukasl»ni mag‘lub eta olmagani, «Monako»ga qarshi ikki o‘yinda ham qiynalgani, ichki chempionatda ham ishlar joyida emasligidan kelib chiqilsa, «PSJ» va «Chelsi»ning imkoniyatlarini teng baholash mumkin.
«Budyo/Glimt» – «Sporting» (12 martga o‘tar kechasi, 01:00)
Imkoniyatlar: 50 ga – 50
Qur’a Chempionlar Ligasi ushbu mavsumining ikkita eng yorqin sensatsiyasi jamoalarini o‘zaro raqib qildi. «Budyo/Glimt» guruh bosqichida «Manchester Siti» va «Atletiko»ni, o‘tish bosqichida esa «Inter»ni mag‘lubiyatga uchratib, barchaning e’tiborini o‘ziga qaratgandi. «Sporting» esa umumiy guruh bosqichida kuchli sakkizlikka kira oldi. Portugaliyaliklar so‘nggi turda Bilbaoda kechgan o‘yinda mezbonlar darvozasiga 90+4-daqiqada gol urib, «Real»ni kuchli sakkizlikdan tushirib yuborgandi. Undan oldingi turda turda esa «PSJ» ustidan g‘alaba qozonilgan.
Shu yergacha yetib kelishning o‘zi katta g‘alaba, chorakfinal esa har ikki jamoa uchun ertakning davomi, ajoyib mukofot bo‘ladi. Demak, nimchorak finalning eng ochiq, hujumkor va erkin o‘yinlari aynan shu juftlik ishtirokida bo‘lib o‘tishi kutilmoqda.
Ikkinchi tur start oldi: pley-offning ilk ishtirokchisi ma’lum.
2026 yilgi jahon chempionatida guruh bosqichining ikkinchi tur uchrashuvlari boshlandi: dastlabki o‘yinda Chexiya va JAR ochkolarni bo‘lishib olishdi (1:1), Shveytsariyaning zaxiradan tushirilgan yosh futbolchisi Bosniya va Hersegovinaga qarshi o‘yinni hal qildi (4:1), Kanada Qatar darvozasiga istagancha gol urdi (6:0), Meksika esa Janubiy Koreyani mag‘lub etib (1:0), pley-off masalasini hal qilgan ilk jamoaga aylandi.
Maydondan tashqarida ham shov-shuvli voqealar davom etmoqda – 40 yoshli darvozabon Manuel Noyyer Germaniya milliy jamoasidagi faoliyatini yakunlashi haqida e’lon qildi, Neymar hali Braziliya tarkibiga qayta olmapyati, Angliya milliy jamoasi ustozi Tomas Tuhel esa fotomuxbirlar ustidan shikoyat qildi.
Meksika hal qildi
Meksika – Janubiy Koreya 1:0
Gol: Romo, 50 (1:0)
Meksika: Ranhel, Alvares, Vaskes, Galyardo, Sanches, Lira, Romo (Pineda, 71), Guterres (Vargas, 71), Kiniones (Uerta, 84), Alvarado (Reyyes, 80), R. Himenes (S. Himenes, 80)
Janubiy Koreya: Kim Sin Gyu, Kim Min Je, Li Gi Hek, Li Hang Bem, Hvang In Bom, Pek Sin Ho (Guye Son Cho, 77), Sol Yen U (Yem Ji Sun, 71), Kim Mun Hvang (Hyun Jun Yan, 71), Li Je Son (Hvang Hi Chhang, 57), Li Kan In, Son Heung Min (Hon Gu O, 57)
Ogohlantirishlar: Li Kan In, 4. Pek Sin Ho, 58
Janubiy Koreya va Meksika turnirni g‘alaba bilan boshlagandi, ammo ularning o‘zaro uchrashuvini yorqin kechdi deyish qiyin. Birinchi bo‘lim davomida darvoza sohasiga to‘g‘ri borgan bittagina zarba bo‘ldi.
Ikkinchi bo‘lim boshida osiyoliklar darvozaboni o‘z jamoasi himoyachisi bilan to‘qnashib ketib, to‘pni qo‘ldan chiqarib yubordi va Romo bo‘sh darvozani osonlik bilan hisobni ochdi.
O‘yinning qolgan qismini janubiy koreyaliklar faolroq o‘tkazishdi va qator vaziyatlarga ega bo‘lishdi, o‘yin oxirlarida meksikaliklar darvozaboni Jo Gu Sonning yaqin masofadan yo‘llagan zarbasini qaytardi.
Yana bir vaziyatda esa Edson Alvares darvoza to‘riga kirib ketayotgan to‘pni to‘xtatib qoldi. Yakunda Romoning goli yagonaligini saqlab qoldi.
Bu natija evaziga turnir mezbonlari 2026 yilgi jahon chempionatining pley-off masalasini hal qilgan ilk jamoasiga aylandi: ikki turdan keyin Meksika A guruhida 6 ochko bilan peshqadam bo‘lib olgan.
Og‘ir jarohat kanadaliklar shousini buzib qo‘ydi
Kanada – Qatar 6:0
Gollar: Larin, 16 (1:0). Devid, 29 (2:0). Devid, 45+3 (3:0). Saliba, 64 (4:0). Al-Mannai, 75 – avtogol (5:0). Devid, 90+2 (6:0)
Kanada: Krepo, De Fujyerol (Oluvaseyi, 71), Kornelius (Bombito, 46), Lareya, Jonston, Eushtakiu, Kone (Saliba, 56), A. Ahmad (Shaffelberg, 71), Byukenen (Sigur, 83), Larin, Devid
Qatar: Abunada, Pedru Migel, Huhi, X. Ahmad, Al-Oui, Madibo, Layye, Abdulsalom (Fati, 46, Mendes, 87), Afif (Al-Husayn, 59), Edmilson Junior (Al-Mannai, 46), Abdurisoq (Al-Brake, 40)
Ogohlantirishlar: Kornelius, 9 – Fati, 62
Chetlatish: X. Ahmad, 33. Madibo, 51
Birinchi turda Shveytsariya bilan o‘yinda durangga erishgan (1:1) Qatar darvozasiga bu safar tepilgan to‘pning barchasi kirib ketaverdi. Dastlab Kayl Larin va Jonatan Devid 29-daqiqaga kelib hisobni qulay ko‘rinishga keltirdi, ko‘p o‘tmay Hulen Lopetegi shogirdlari Homam Ahmadning jarima maydoni yaqinidagi qo‘polligi tufayli o‘n kishi bo‘lib qolishdi, birinchi bo‘limga qo‘shib berilgan daqiqalarda Devid yana bir goli bilan hisobni yiriklashtirdi – 3:0.
Lekin kanadaliklarga jahon chempionatidagi ilk g‘alaba (shimoliy amerikaliklar oldingi ikki turnirdagi olti o‘yinda ham yutqazgandi) unchalik tatimadi: ikkinchi bo‘lim boshlarida Qatar himoyachisi Assim Madibo to‘pni olib qo‘yishga urinib, Ismoil Konening oyog‘iga ortdan zarba berdi va unga ham qizil kartochka ko‘rsatildi. O‘yin olti daqiqadan vaqt mobaynida to‘xtab qoldi, bu vaqtda tibbiyot xodimlari jabrlangan futbolchiga yordam ko‘rsatishdi, ikki jamoa futbolchilari va murabbiylar shtabi vakillari esa dahanaki jangga kirishishdi.
O‘yindan keyin jurnalist Fabritsio Romano ma’lumot berishicha, Konega «chap oyog‘ning kichik va katta boldir suyaklarining sinishi» tashxisi qo‘yilgan.
Mezbonlar bu epizoddan keyin raqibga umuman shafqat qilishmadi va yana uchta gol urishdi – 6:0. Devid het-trik rasmiylashtirdi, Natan Saliba jarima zarbasini golga aylantirdi va bu golini Konening familiyasi yozilgan futbolkani ko‘tarib nishonladi.
Shveytsarlar kutilmaganda yirik g‘alabaga erishdi
Shveytsariya – Bosniya va Hersegovina 4:1
Gollar: Manzambi, 74 (1:0). Vargas, 84 (2:0). Manzambi, 90 (3:0). Mahmich, 90+3 (3:1). Jaka, 90+7 – penalti (4:1)
Shveytsariya: Kobel, Elvedi, Akanji, Rodriges, Vidmer (Hakes, 86), Jaka, Froyler, Ebisher (Manzambi, 72), Ndoy (Sou, 72), Embolo (Itten, 89), Rider (Vargas, 72)
Bosniya va Hersegovina: Vasil, Muharemovich, Katich, Kolashinats, Dedich, Tahirovich (Bashich, 63), Shunich (Hojiahmetovich, 85), Alaybegovich (Mahmich, 90+1), Memich, Demirovich (Lukich, 85), Jyeko (Bayraktarevich, 63)
Ogohlantirishlar: Elvedi, 65 – Dedich, 59. Jyeko, 61
Chetlatish: Muharemovich, 80
Birinchi turda shveysarlar barcha jabhalarda katta ustunlikka erishgan (Xg bo‘yicha 3,25), ammo vaziyatlardan foydalana olmagan va so‘nggi daqiqalarda gol o‘tkazib yuborib, ochko yo‘qotgandi (1:1). Ikkinchi turda esa bu omadsizlik uchun jamoa o‘ziga xos tarzda kompensatsiya oldi.
Bosniya va Hersegovina bilan o‘yin maksimal darajada zerikarli kechdi. 74-daqiqagacha tabloda nollar yonib turdi. Keyin esa barchasi tezlashib ketdi: «Frayburg»ning 20 yoshli yarimhimoyachisi Joan Manzambi zaxiradan o‘yinga qo‘shilganidan ikki daqiqa o‘tib hisobni ochdi, bosniyaliklar esa biroz o‘tib son jihatdan ozchilik bo‘lib qolishdi va o‘yin oxirigacha yana uchta gol o‘tkazib yuborishdi. Jumladan, jamoa sardori, 33 yoshli Granit Jaka qo‘shimcha daqiqalarda penaltidan yakuniy hisobni o‘rnatdi va goldan keyin tribunalar qarshisiga borib, jamoani tanqid qilganlarga qarata jim bo‘lish ishorasini ko‘rsatdi.
Bosniya va Hersegovina esa bu oraliqda to‘rtta golga bittagina gol bilan javob qaytardi. Lekin bu o‘yindagi eng chiroyli gol bo‘ldi – zaxiradan o‘yinga qo‘shilgan Ermin Mahmich havodagi to‘pni to‘xtatmasdan zarba yo‘lladi. Faqat bu golning chiroyidan naf yo‘q: bolqonliklar yirik mag‘lubiyatdan keyin amalda guruhdan chiqish imkoniyatini yo‘qotdi.
Chexiya va JAR o‘yinida g‘olib aniqlanmadi
Chexiya – JAR 1:1
Gollar: Sadilek, 6 (1:0). Mokoena, 83 – penalti (1:1)
Chexiya: Kovarj, Granach, Kreychi, Xolesh, Darida (Zeleni, 55), Cherv (Zima, 78), Sadilek (Provod, 67), Soyka (Shuls, 55), Tsoufal, Glojyek (Souchek, 67), Shik
JAR: Uilyams, Mbokazi, Okon, Modiba, Mudau, Mokoena, Adams (Mofokeng, 46), Mbata, Appollis, Maseko (Sebelebele, 84), Rayners (Makgopa, 66)
Ogohlantirishlar: Kreychi, 75 – Mokoena, 33. Mbata, 40
Chexlar va janubiy afrikaliklar o‘yini qaysidir ma’noda «omadsizlar dueli»ga aylandi – ikki jamoa ham birinchi turda yutqazgandi va amalda bu ikki jamoa o‘yinida turnirni birinchi bo‘lib tark etadigan jamoa aniqlanishi kerak edi.
Shu bilan birga, Chexiyada imkoniyat yaxshiroq edi – bu jamoa Janubiy Koreyaga qarshi o‘yinda (1:2) yaxshiroq ko‘ringan va ancha vaqt hisobda oldinda borgan edi. Afrikaliklar esa, yumshoq qilib aytganda, Meksikaga qarshi o‘yinda (0:2) juda ojiz ko‘rinishgan, shu tufayli ular Yevropa jamoasiga qarshi yaxshiroq o‘ynashini tasavvur qilish qiyin edi.
Avvaliga bunday prognoz amalga oshayotgandi: chexiyaliklar safida Mixal Sadilek 6-daqiqadayoq aut tashlash orqali boshlangan hujum yakunida hisobni ochdi. Ular turnir oldidan bunday ishlanmani juda ko‘p mashq qilishgani tayin – koreyaliklar darvozasi ham shunday uslubda ishg‘ol etilgandi.
Ammo shundan keyin Miroslav Koubek shogirdlari o‘yinni tashlab yuborishdi va qolgan vaqtni himoyada o‘tkazishdi. Afrikaliklar esa barcha pozitsiyalardan hujum uyushtirib, o‘yin oxiriga kelib penalti ishlashdi. Jamoa yetakchisi Teboxo Mokoena 11 metrdan aniq zarba berib, shundan keyin muxlislar boshqa gol ko‘rishmadi. Demak, A guruhida qolib ketadigan jamoa(lar) nomi faqat so‘nggi turda aniq bo‘ladi.
Husanov uzr so‘radi
O‘zbekiston terma jamoasi himoyachisi Abduqodir Husanov Kolumbiyaga qarshi Jahon chempionati o‘yinida jarohat olgan operatorga dastxati va «I am sorry» («Kechirasiz») degan yozuvi tushirilgan futbolkasini yubordi.
Hodisa payshanba kuni bo‘lib o‘tgan «K» guruhi o‘yinining birinchi bo‘limida sodir bo‘lgan. «Manchester Siti»ning 22 yoshli futbolchisi maydon chetida Kolumbiya terma jamoasi hujumchisi Luis Dias bilan to‘p uchun kurashishga urinayotib, translatsiya kamerasi operatori bilan to‘qnashib ketgan edi. Operatorga tibbiy yordam ko‘rsatilib, shifoxonaga olib borilgan.
🚨🇺🇿 Khusanov’s tackle obliterates Luis Diaz and the cameraman. 😱⚽ Camera worth thousands of dollars destroy with the operator needing medical attention🚑💥 pic.twitter.com/LxftcZkBIy
— City Exclusives (@city_exclusives) June 18, 2026
Keyinroq O‘zbekiston futbol assotsiatsiyasi vakillari jabrlanuvchini borib ko‘rdi va unga Husanovning dastxati tushirilgan futbolkani topshirdi. Futbolchi ham operatorga tezroq sog‘ayib ketishini tilagan.
Neymar davolanishda davom etmoqda
Neymarning muxlislari hali yana kutishiga to‘g‘ri keladi – Braziliya milliy jamoasi 34 yoshli forvard jarohatidan tiklanish jarayonini davom ettirayotgani tufayli Haitiga qarshi o‘yinda qatnasha olmasligini ma’lum qildi. Futbolchi jamoa bilan Filadelfiyaga yo‘l olmagan va Nyu Jyersidagi bazada qolgan.
Neymarning JCh uchun yakuniy tarkibga kiritilgani ko‘pchilikning e’tiroziga sabab bo‘lgandi – futbolchi so‘nggi oylarni ko‘proq maydonda emas, lazaretda o‘tkazgandi. U JCh birinchi turida Marokashga qarshi o‘yinni (1:1) ham o‘tkazib yuborgandi, shu tufayli uning o‘rniga boshqa futbolchini mundialga olib ketmagan Karlo Anchelottiga savollar ko‘paygandan ko‘paymoqda.
Noyyer milliy jamoadan ketadi
2026 yilgi jahon chempionati eng qayg‘uli mundiallardan biri sifatida tarixda qoladi: turnir ko‘pchilik buyuk futbolchilar uchun oxirgisi bo‘lib qolmoqda. Kimdir hozircha o‘z qarorini sir tutmoqda, kimdir esa bu haqda rasman e’lon qilmoqda – masalan, Germaniya milliy jamoasi posboni Manuel Noyyer.
«Bu mening Germaniya milliy jamoasidagi so‘nggi turnirim bo‘ladi, ikki yildan keyin Yevropa chempionatida ishtirok etishni rejalashtirmayapman. Xayrlashish va bu so‘nggi o‘yinim bo‘lishi haqida o‘ylamasdan, har bir o‘yinni intiqlik bilan kutishni xohlayman», – deya ma’lum qildi 40 yoshli darvozabon.
Tuhel fotograflardan norozi
Tomas Tuhel jahon chempionatini o‘ta kuchli boshladi – inglizlar Xorvatiyani 4:2 hisobida mag‘lub etishdi. Germaniyalik mutaxassis o‘yindan keyin o‘z futbolchilarini maqtovlarga ko‘mib tashladi. FIFAga esa e’tiroz bildirdi – o‘yindan oldin milliy madhiya ijro etilayotganida fotomuxbirlar uning qarshisida turib olib, ko‘rinishni to‘sib qo‘ygani unga umuman yoqmadi.
«FIFAdan ularni qayergadir ko‘chirishni iltimos qilaman. Madhiya ijro etilayotgan paytda futbolchilarni ko‘ra olmasdim… Garchi bu lahzani kutgan bo‘lsam-da. Bu o‘zgacha oqshom bo‘ldi, lekin men 50 nafar fotosuratchi tufayli yigitlarimni ko‘ra olmadim», – degan Tuhel.
Xalqaro futbol federatsiyasi hozircha uning so‘rovi bo‘yicha munosabat bildirmadi.
Superkompyuter taxmini
Opta tahlil portali versiyasiga ko‘ra, birinchi turdan keyin fransuzlar – 2026 yilgi jahon chempionligi uchun asosiy favoritlar bo‘lib turibdi. Superkompyuter Dide Desham jamoasi imkoniyatlarini 15,7 foizga baholagan – bu ikkinchi o‘rinni bo‘lishib turgan Angliya va Argentina (12,3 foiz)nikidan biroz yuqoriroq. Uchinchi o‘rinda Ispaniya (12,1 foiz) joylashgan.
E’tiborli tomoni, turnir startidan oldin Opta aynan ispanlarni asosiy favorit sifatida ko‘rayotgandi. Ammo ispanlar uchun birinchi tur muvaffaqiyatsiz kechdi va jamoa Kabo-Verdeni mag‘lub etolmadi (0:0). Fransiya, Angliya va Argentina esa turnirni muvaffaqiyatli boshlashdi.
19-20 iyun kungi o‘yinlar
20 iyunga o‘tar kechasi va tongda quyidagi qiziqarli uchrashuvlar bo‘lib o‘tadi:
00.00. D guruhi. AQSh — Avstraliya
03.00. C guruhi. Shotlandiya — Marokash
05.30. C guruhi. Braziliya — Haiti
08.00. D guruhi. Turkiya — Paragvay
Kanadaliklar futbolchisining oyog‘i sinib ketdi. Arablar jamoasi o‘yinni 9 kishi bo‘lib yakunladi va javobsiz 6 ta gol o‘tkazdi.
Foto: Alex Grimm/Getty Images
Dahshatli jarohat kanadaliklarning yorqin g‘alabasini xiralashtirdi
Kanada – Qatar 6:0
Gollar: Larin, 16 (1:0). Devid, 29 (2:0). Devid, 45+3 (3:0). Saliba, 64 (4:0). Al-Mannai, 75 – avtogol (5:0). Devid, 90+2 (6:0)
Kanada: Krepo, De Fujyerol (Oluvaseyi, 71), Kornelius (Bombito, 46), Lareya, Jonston, Eushtakiu, Kone (Saliba, 56), A. Ahmad (Shaffelberg, 71), Byukenen (Sigur, 83), Larin, Devid
Qatar: Abunada, Pedru Migel, Huhi, X. Ahmad, Al-Oui, Madibo, Layye, Abdulsalom (Fati, 46, Mendes, 87), Afif (Al-Husayn, 59), Edmilson Junior (Al-Mannai, 46), Abdurisoq (Al-Brake, 40)
Ogohlantirishlar: Kornelius, 9 – Fati, 62
Chetlatish: X. Ahmad, 33. Madibo, 51
Kanadaliklar jahon chempionati guruh bosqichining ikkinchi turida Qatarni osonlik bilan mag‘lub etdi – 6:0. O‘yin taqdiri birinchi bo‘limdayoq hal bo‘ldi: o‘tgan turda ham bosniyaliklar darvozasiga yagona golni urgan Kayl Larin gollari sonini oshirib oldi, Jonatan Devid dublni rasmiylashtirdi. Bundan tashqari, 33-daqiqada Qatar ozchilik bo‘lib qoldi: Homam Ahmad darvozabon bilan yakkama-yakka vaziyatga chiqib borayotgan Byukenenga so‘nggi umid folini ishlatgan deb topildi va maydonan chetlatildi.
Birinchi bo‘limdayoq hisob yirik ko‘rinish oldi, ammo kanadaliklar to‘plar nisbatini yaxshilab olish uchun faollik bilan hujum qilishda davom etishdi. 51-daqiqada esa o‘yinda dahshatli voqea ro‘y berdi: qatarliklar himoyachisi Assim Madibo to‘pni olib qo‘yishga urinib, Ismoil Konega og‘ir jarohat yetkazdi.
Kanadaliklar yarimhimoyachisi gazonda yotgan holda oyog‘iga qaradi va dahshatga tushib, qo‘llari bilan yuzini yopdi – uning chap oyog‘i sinib ketgan va notabiiy ko‘rinishga kelgandi.
O‘yin shu zahoti to‘xtatildi. Konening jamoadoshlari darhol Madiboni o‘rab olishdi va keskin ohangda e’tiroz bildira boshlashdi. Ammo himoyachining o‘zi qilib qo‘ygan ishidan karaxt holatga tushgandi. Uni tinchlantirish uchun jamoa darvozaboni Mahmud Abunada yetib keldi.
O‘yin bosh hakami Kristian Garay avvaliga qoidabuzarga sariq kartochka ko‘rsatgandi, ammo fol oqibatlarini ko‘rganidan keyin qarorini o‘zgartirib, futbolchini maydondan chetlatdi.
Maydonda ikki jamoa vakillari, jumladan, murabbiylar shtabi a’zolari o‘rtasida kichik to‘qnashuvlar ham bo‘lib o‘tdi.
O‘yinda olti daqiqadan ko‘proq to‘xtalish yuzaga keldi. Maydonga jonlantirish brigadasi tushib keldi. Tibbiy yordam ko‘rsatish chog‘ida kanalik futbolchilar Kone va shifokorlarni har tomondan o‘rab turishdi.
Kone hushini yo‘qotmagandi. U zambilda maydonni tark etish chog‘ida tribunadagilarga qo‘l silkitishga ham o‘zida kuch topa oldi.
Futbolchilar o‘ziga kelishi uchun ham vaqt talab etildi. Kanadaning ayrim futbolchilari ko‘z yoshlarini tiya olishmayotgandi.
Ammo pauzadan keyin o‘yin davom ettirildi va gol urishda davom etishdi.
Konening o‘rnini egallagan Saliba 64-daqiqada to‘rtinchi golni urdi va Konening futbolkasini ko‘targan holda golni unga bag‘ishladi.
Kanadaliklar bu bilan to‘xtashmadi va Shveytsariyaga qarshi hal qiluvchi o‘yin oldidan gollar nisbatini yaxshilash bo‘yicha ishni davom ettirishdi. To‘qqiz kishi bo‘lib qolgan osiyoliklarda esa qarshilik ko‘rsatish imkoniyati yo‘q edi. 75-daqiqada Muhammad Al-Mannai to‘pni darvoza chizig‘i ustidan qaytarib yuborishga urinib, o‘z jamoasi darvozasini ishg‘ol etib qo‘ydi, o‘yinga qo‘shib berilgan daqiqalarda esa Devid het-trik amalga oshirib, turnir to‘purari Lionel Messiga yetib oldi.
6:0 – Kanada jahon chempionatlaridagi ilk g‘alabasini shunday hisobda qo‘lga kiritdi va amalda pley-off masalasini hal qildi: endi mezbonlarda ham Shveytsariyadagi kabi 4 ta ochko bor.
Endi ushbu jamoalar 24 iyun kuni 3-tur doirasida o‘zaro kuch sinashadi – amalda ikki jamoani ham durang hisob qoniqtiradi. Qatar hamda Bosniya va Hersegovinada bittadan ochko bor.
21:53
Debyutda mag‘lubiyat. Qayerda xato qildik?
Source link
17–21 iyun kunlari Xitoyning Gonkong shahrida FIDE World Rapid & Blitz Team Chess Championships 2026 xalqaro musobaqasi bo‘lib o‘tmoqda.
Dunyoning eng kuchli shaxmatchilari ishtirok etayotgan nufuzli turnirda 53 ta jamoa g‘oliblik uchun bahs olib bormoqda. O‘zbekiston terma jamoasi ham musobaqada 8 nafar yetakchi shaxmatchi bilan qatnashmoqda.
17-iyun kuni o‘tkazilgan dastlabki to‘rt tur natijalariga ko‘ra, O‘zbekiston jamoasi:
«Blue Bulldogs»ni 5:1
Indoneziya terma jamoasini 3,5:2,5
«Chess Thulir» jamoasini 4,5:1,5 hisobida mag‘lub etdi.
Shu bilan birga, jamoa Qozog‘istonning «KazChess» klubiga qarshi bahsda 2,5:3,5 hisobida mag‘lubiyatga uchradi.
To‘rt tur yakunlariga ko‘ra, O‘zbekiston terma jamoasi musobaqa jadvalida 6-o‘rinni egallab turibdi.
Turnir bahslari 21-iyunga qadar davom etadi. O‘zbekistonlik shaxmatchilar yuqori o‘rinlar uchun kurashni davom ettirmoqda.
Milliy jamoa bosh murabbiyi Kolumbiyaga qarshi mag‘lubiyatli o‘yinga izoh berdi.
O‘zbekiston milliy jamoasi bosh murabbiyi Fabio Kannavaro JCh-2026 guruh bosqichidan o‘rin olgan Kolumbiyaga (1:3) qarshi o‘yindan keyin o‘z fikrlarini aytdi.
— O‘yin qiziqarli o‘tdi. Ikkinchi bo‘limda biz o‘yinni o‘zgartirishga erishdik. Chap qanotdan imkoniyatlar yaratdik. O‘yin nazoratini o‘z qo‘limizga olishga harakat qildik.
Avvalambor biz O‘zbekistonni butun dunyoga ijobiy namoyish etish uchun bu yerga keldik. Men doim jamoamga o‘yin davomida faol harakat qilish kerakligini aytib kelaman. Kolumbiya singari jamoalarga qarshi o‘ynash, to‘psiz harakat qilish osonmas. Umuman olganda, ikkinchi bo‘limda yaxshi harakat qildik, biroq afsuski gol o‘tkazib yubordik.
Biz bu stadionda o‘tgan ushbu o‘yinni eslab qolamiz. Chunki bu tarixiy o‘yin. Biz Jahon chempionatidamiz. Bugungi o‘yin biz uchun yaxshi bo‘ldi, deb ayta olaman. Xatolar bo‘ldi, ular ustida ishlaymiz.
— Futbolchilarimdan g‘ururlanaman. Ular yaxshi o‘ynadi. Bugun qiyin o‘yin bo‘ldi. Bunday stadionda, muxlislar qarshisida o‘ynash oson emas. Lekin bu sizga ko‘proq motivatsiya berishi ham mumkin.
O‘zbekiston milliy jamoasi navbatdagi o‘yinni 23 iyun kuni Portugaliyaga qarshi o‘tkazadi.
Andijonda 2,5 kilogrammga yaqin gashish musodara qilindi
Chirchiqdagi kanalda hushsiz holatdagi fuqaro qutqarildi
Tezkor tadbirlarda ikki bank xodimi pora bilan qo‘lga tushdi
-
Siyosat5 days ago
«Ushbu masalani shaxsan nazoratimga oldim» — Saida Mirziyoyeva giyohvandlikka qarshi kurash haqida
-
Sport5 days agoEron Amerikaga bordi, Osiyo Yevropaning ta’zirini berayotir – JCh kundaligi
-
Iqtisodiyot2 days ago
Toshkentda YIBning mintaqaviy vakolatxonasi ochildi
-
Dunyodan3 days ago
Dunyo bo’ylab qochqinlar soni 10 yil ichida birinchi marta kamaydi.
-
Iqtisodiyot1 day agoUch karra yer solig‘ining bekor qilinishi: pullar qanday qaytariladi?
-
Iqtisodiyot4 days ago“Asosiy stavka ta’sirchanligini oshirish choralarini ko‘ramiz” – Ishmetov
-
Siyosat2 days ago
O‘zbekistonda AQSh bilan yirik investitsiya loyihalari amaliy bosqichga o‘tadi
-
Iqtisodiyot4 days ago2027 yilda 5 foizlik inflatsiya maqsadiga erishish yo‘lida jiddiy xatarlar ko‘rmayapmiz