Sport
«Chelsi»ning yangi hujumchisi ishonchni oqlashni boshladi, Di Mariya va Otamendi «Benfika»ni qutqardi. Kun o‘yinlari
Klublar o‘rtasidagi jahon chempionatida guruh bahslari davom etmoqda.
Jiru «Los-Anjyeles»ni qutqarolmadi
D guruhi
«Chelsi» – «Los-Anjyeles» 2:0
Gollar: Pedru Netu 34, Fernandes 79
«Chelsi»: Sanches, Adarabioyo, Kolvill, Kukurelya, Jyeyms (Gyusto 46), Kaysedo (Essugu 84), Lavia (Fernandes 46), Palmer (Nkunku 84), Madueke (Delap 64), Pedru Netu, Jyekson (Jorj 64).
«Los-Anjyeles»: Lioris, Segura, Long, Hollingshed, Palensiya, Igor Jyezus (Amayya 81), Delgado (Marlon 87), Tillmann (Yyeboa 87), Buanga, Ordaz (Martines 38), Ebobiss (Jiru 46).
Ogohlantirishlar: Jyeyms 36, Adarabioyo 45, Kukurelya 75 – Martines 58, Palensiya 90.
«Chelsi» klublar o‘rtasidagi jahon chempionatidagi niyatlari jiddiy ekani mavsum startidayoq ma’lum bo‘lgandi — o‘shanda Konferensiyalar ligasi uchun qaydnomaga Palmer kiritilmagandi. Angliya nashrlari London klubi bu bilan asosiy yulduziga katta yuklama tushirmaslikni va bu orqali u AQShdagi turnir startiga yaxshi formada yetib borishini maqsad qilgani haqida yozgandi.
E’tiborli jihati, «Chelsi» o‘zining turnirdagi ilk raqibini faqat 1 iyun kuniga kelib bildi. Avvaliga bu «Leon» bo‘lishi kerak edi, ammo FIFA Meksika jamoasini turnirdan chetlatdi, chunki ushbu klub va klublar o‘rtasidagi jahon chempionatining boshqa bir ishtirokchisi «Pachuka»ning egasi bir shaxs ekani oydinlashdi. Bo‘sh qolgan o‘rin uchun «Amerika» va «Los-Anjyeles» o‘rtasida o‘tish o‘yini bo‘lib o‘tdi, ulardan biri KONKAKAFning reytingi eng yuqori klubi, ikkinchisi 2023 yilgi mintaqaviy YeChL finalida «Leon»ga yutqazgan jamoa sifatida yo‘llanma uchun kurashdi.
Mexikodan bo‘lgan «Amerika» klubi bir hafta ichida ikkita kuchli zarbani qabul qilib oldi, avvaliga Meksika kubogi finalida «Toluka»ga yutqazdi, keyin esa Los-Anjyelesdagi dramatik bahsda o‘yinning asosiy vaqti tugayotganida minimal hisobdagi ustunlik boy berildi. Ikkinchi qo‘shimcha bo‘lim so‘nggida esa amerikaliklar o‘zining eng yaxshi to‘purari Buanga va unga assistentlik qilgan Jiruning harakatlari evaziga g‘alabani ilib ketdi. Fransuz faxriysi MLSning ko‘p o‘yinlarida bo‘lgani kabi zaxiradan tushirilgandi.
«Chelsi» bilan YeChL, Yevropa ligasi va Angliya kubogida g‘olib bo‘lgan Jiru sobiq jamoasiga qarshi o‘yinda ham ikkinchi bo‘limda maydonga tushdi. Birinchi bo‘limda esa Pedru Netu «Los-Anjyeles» safidagi boshqa bir fransuz futbolchisi Lioris qo‘riqlayotgan darvozani ishg‘ol etishga ulgurgandi.
So‘nggi to‘qqiz o‘yinida mag‘lubiyatga uchramagan «Los-Anjyeles» ikkinchi bo‘lim davomida faollashdi va «Chelsi» mudofaasi bosim ostida ushlab turdi. Vaziyatlardan birida Sanches Buanganing zarbasini oyoqlari bilan qaytarib oldi, keyin esa ko‘klar safida jamoaning yozgi transferlardagi ilk xaridi Delap maydonga tushdi. U tavqi la’natga uchragan deb hisoblanuvchi to‘qqizinchi raqamni olishdan cho‘chimadi. Kejman, Krespo, Fernando Torres, Falkao, Morata, Iguain, Abraham, Lukaku — ularning barchasi «Stemford Brij»da yoki muvaffaqiyatsizlikka uchragan, yoki o‘z darajasidan pastroq o‘yin ko‘rsatgan. Delap esa debyutini yorqin o‘tkazib, qisqa vaqt ichida Enso Fernandesga ikkita vaziyat yaratib berdi va bu vaziyatlardan biri gol bilan yakunlandi. Bu gol Jiru o‘z imkoniyatidan foydalana olmaganidan keyin uyushtirilgan hujumda urildi. Endi keyingi turni «Chelsi» «Flamengo»ga qarshi o‘tkazadi, «Los-Anjyeles» guruh autsayderi, Tunisning «Esperans» jamoasi bilan o‘yinda vaziyatni o‘nglashga harakat qiladi.
Yevropa Janubiy Amerikaga qarshi
C guruhi
«Boka Huniors» – «Benfika» 2:2
Gollar: Merentiel 21, Battalya 27 – Di Mariya 45 (penalti), Otamendi 84.
«Boka Huniors»: Marchesin, Figal, Kosta, Blanko, Advinkula, Battalya, Palasios (Alarkon 66), Errera (Belmonte 20), Velasko (Ximenes 58), Senon, Merentiel (Sebalos 65).
«Benfika»: Trubin, Silva, Otamendi, Karreras, Dal (Belotti 46), Florentinu (Barreyru 90), Renatu Sanchesh (O‘rxon Ko‘kchu 61), Eursnes, Bruma (Karim Oqturko‘g‘li,61), Di Mariya (Prestianni 77), Pavlidis.
Ogohlantirishlar: Palasios 66, Kosta 85 – Karreras 67, Pavlidis 83.
Chetlatishlar: Belotti 72 – Figal 88
Qatorasiga ikkini kun Yevropa va Janubiy Amerika vakillari qarama-qarshiligi kuzatildi, birinchi kungi bahslar doirasida «Portu» va «Palmeyras» o‘zaro golsiz durang qayd etib, muxlislarning hafsalasini pir qilgandi.
Ikkinchi derbida esa stadionni to‘ldirib o‘tirgan muxlislar zerikib qolishmadi. Mayamida «Boka Xuniors» o‘zini uyidagidek his qildi. Bu o‘yin oldidan «Boka» tarkib borasida muammolarga uchragandi. Kavani guruh bosqichi oxirigacha safdan chiqqan. O‘z vaqtida «MYu» safida o‘ynagan Roxo ham jamoaga yordam bera olmaydi, 20-daqiqada esa 36 yoshli Ander Errerani almashtirishga to‘g‘ri keldi. «Atletik», «MYu» va «PSJ»da eng yaxshi davrlarini o‘tkazgan futbolchi zaxira o‘rindig‘ida o‘tirib hakam bilan bahslashgani tufayli qizil kartochka ham oldi, birinchi bo‘lim so‘ngida arbitr VAR bilan maslahatlashib, janubiy amerikaliklar darvozasiga penalti belgilagandi. E’tiborli jihati, Yevropa jamoasi safidagi ikki argentinalik vatandoshlarini ranjitishdi — Otamendi 11 metrlik jarima zarbasi ishladi, turnirdan keyin qadrdon jamoasi «Rosario Sentral»ga qaytishi ma’lum bo‘lib ulgurgan Di Mariya esa zarbani benuqson ijro etdi.
Lekin bu gol bilan «Benfika» faqat hisobni qisqartirdi, «Boka» «burgutlar»ning o‘yin boshidagi hujumlariga dosh bergach, olti daqiqa ichida ikki gol urishga erishgandi. Avvaliga Blanko qanotda raqibni chiroyli tarzda aldab o‘tib, to‘pni darvozabon hududiga yetkazib berdi va urugvaylik to‘purar Merentiel Otamendidan ildamroq harakat qilib, darvozani ishg‘ol etdi. Argentinaliklar ijro etgan ilk burchak zarbasi esa Kosta to‘pni ustun yonida turgan Battalyaga tashlab berishi bilan yakunlandi.
Janubiy amerikaliklar g‘alabaga yaqin edi. Qolaversa, ikkinchi bo‘limda lissabonliklar hujumini kuchaytirish uchun tushirilgan Belotti hujumdagi qo‘pollik uchun maydondan chetlatildi. Ammo ikkinchi bo‘limda o‘yindan vaziyat yarata olmagan yevropaliklar Otamendi burchak zarbasidan urgan gol evaziga mag‘lubiyatdan qutulib qoldi, bu argentinalik himoyachi uchun mavsumdagi sakkizinchi gol bo‘ldi. Hisob 2:2 holatida esa Figal maydondan chetlatib, tarkiblar son jihatdan tenglashdi.
Gollarga boy kechgan o‘yin guruhda so‘nggi turgacha intriga saqlanib qolishini ta’minladi. Endi «Benfika» va «Boka» birinchi turda «Oklend» darvozasiga 10 ta javobsiz to‘p kiritgan «Bavariya»ga qarshi munosib o‘ynashi talab etiladi.
«Manchester Siti» va O‘zbekiston milliy terma jamoasi himoyachisi Abduqodir Xusanov birinchi marta ota bo‘ldi. Uning oilasida o‘g‘il tug‘ildi, deb xabar beradi mahalliy OAVlar.
Bu 20 yoshli himoyachining ilk farzandi sanaladi.
Abduqodir Xusanov «Manchester Siti» va O‘zbekiston milliy terma jamoasida o‘ynaydi. U o‘z avlodining eng istiqbolli himoyachilaridan biri hisoblanadi va Yevropa futbolida raqobatlashishda davom etmoqda.
Eslatib o‘tamiz, futbolchi 2025-yil 27-mayda — Angliya Premer-ligasi mavsumi tugaganidan so‘ng darhol turmush qurgandi.
«Arsenal» so‘nggi daqiqalarda muhim g‘alabaga erishdi, qatorasiga ikkinchi o‘yinda durang o‘ynagan «Siti» endi 9 ochkoga ortda qolmoqda. «Chelsi» yana yutqazdi, «Real»da yirik g‘alaba.
«Arsenal» – «Everton» 2:0
Gollar: Yokeresh, 89 (1:0). Douman, 90+7 (2:0)
«Arsenal»: Rayya, Saliba, Gabriel Magalyayns, Kalafiori (Inkapiye, 74), Timber (Moskera, 38), Subimendi (Douman, 74), Rays, Eze, Madueke (Martinelli, 61), Saka, Havers (Yokeresh, 61)
«Everton»: Pikford, Kin, O`Brayyen, Mikolenko, Garner, Gana Guyye (Jorj, 90+5), Iroegbunam (Rel, 86), Dyusberi-Holl, Ndiay, Makneyl (Armstrong, 86), Betu (Barri, 69)
«Arsenal» o‘z maydonida kechgan o‘yinda to‘pga egalik qildi, ammo dastlabki 20 daqiqa ichida qarshi hujumlardan ikki bor gol o‘tkazib yuborishi mumkin edi. Birinchi holatda Rayyaning xatosidan keyin Maknilning zarbasidan keyin darvozaga kirib ketayotgan to‘pni yotgan holatda oyog‘ini ko‘tarib qolish orqali to‘xtatib qoldi.
Maknilning uzoq masofadan yo‘llagan zarbasi ustundan qaytdi, qaytgan to‘pga birinchi bo‘lib yetib kelgan Ndiay esa vaziyatdan foydalana olmadi. Keyinroq Maknilning bir necha metr masofadan yo‘llagan zarbasini darvozabon qaytardi.
«Kanonirlar» esa tinimsiz hujum uyushtirganiga qaramay (birinchi bo‘limning o‘zida 13 zarba berildi), hisobni ocha olmadi. Birinchi bo‘limdagi eng yodda qolgan vaziyat Havers jarima maydoni ichida yiqilishi bo‘ldi. Bu epizodda Kin avvaliga raqib hujumchisining oyog‘ini bosib oldi, keyin esa qo‘llari bilan turtib yiqitdi, ammo bosh hakam va VAR xonasidagilar kontakt penalti uchun yetarli emas deb topdi.
Ikkinchi bo‘limda esa mezbonlar uzoq masofadan zarba berishga e’tibor qarata boshladi, xususan, Ezening aylantirib yo‘llagan zarbasiga Pikford yetib bora olmadi, ammo to‘p darvoza ustuni yonidan o‘tib ketdi. Keyin esa Arteta katta tavakkalchilikka qo‘l urdi va tayanch yarimhimoyachisi Martin Subimendi o‘rniga o‘ng qanot vingeri Doumanni maydonga tashladi. Aynan shu o‘zgarish o‘yinni hal qildi. Avvaliga ushbu yosh yarimhimoyachining o‘ng qanotdan uzatmasidan keyin Pikford to‘pga chiqishda xatoga yo‘l qo‘ydi, Inkapiye esa to‘pni bo‘sh darvoza qarshisiga yetib kelgan Yokereshning oyoqlari ostiga tashlab berdi.
So‘nggi daqiqalarda mehmonlar hisobni tenglashtirish umidida to‘liq tarkib bilan oldinga tashlandi, Douman esa burchak zarbasidan keyin uyushtirilgan qarshi hujumda bo‘sh darvozani ishg‘ol etib, APL tarixiga kirdi. Maks 16 yosh-u 73 kunligida liga tarixida gol urgan eng yosh futbolchiga aylandi. Bu orqali u Jyeyms Von tomonidan 2005 yilda o‘rnatilgan rekordni (16 yosh-u 270 kun) yangiladi.
Shu tariqada, bu mavsumda zaxiradan tushgan futbolchilari 11 bor gol urgan Mikel Arteta jamoasi qiyinchilik bilan bo‘lsa-da muhim g‘alabaga erishdi.
«Chelsi» – «Nyukasl Yunayted» 0:1
Gol: Gordon, 18 (0:1)
«Chelsi»: Sanches, Chaloba, Fofana (Xato, 82), Kukurelya, Gyusto (Delap, 46), Jyeyms, Kaysedo (Lavia, 61), Fernandes, Garnacho, Palmer, Joao Pedro
«Nyukasl Yunayted»: Ramsdeyl, Botman, Tiau, Holl, Livramento, Uillok (Byorn, 77), Remsi, Voltemade (Joelinton, 67), Barns, Myorfi (Elanga, 78), Gordon
Ogohlantirishlar: Fofana, 23. Kaysedo, 25 – Ramsdeyl, 84. Holl, 89
«Chelsi» «qarg‘alar»ga qarshi Londonda o‘tgan oldingi 12 o‘yindan 11 tasida g‘alaba qozongandi va shanba oqshomidagi o‘yinni ushbu seriyani davom ettirish maqsadida hujumkorlik bilan boshladi. Ammo mezbonlar o‘z imkoniyatlaridan foydalana olishmadi. 18-daqiqada Palmer qulay vaziyatni yo‘qqa chiqarganidan keyin «Nyukasl» muvaffaqiyatli qarshi hujum uyushtirdi va Uillok Gordonni bo‘sh darvoza qarshisiga chiqarib yubordi.
Tanaffusdan keyin Entoni dublga erishishi mumkin edi, ammo darvozaga qaytgan Sanches jamoasini qutqardi. U Liam Rosenior jamoasini o‘yinda qoldirdi, ammo jamoa mag‘lubiyatdan qutulib qolishni uddalay olmadi. «Chelsi» yana ochko yo‘qotib, raqobatchilarga imkon berdi: bugun «MYu» va «Aston Villa» o‘yinida g‘olib bo‘lgan jamoa ilgarilab ketadi, «Liverpul» esa «Chelsi»ni quvib o‘tib, beshinchi o‘ringa ko‘tarilishi mumkin.
«Vest Hem» – «Manchester Siti» 1:1
Gollar: Bernardu Silva, 31 (0:1). Mavropanos, 35 (1:1)
«Vest Hem»: Hermansen, Mavropanos, Disasi, Todibo, Fernandesh, Souchek, Diuf, Van-Bissaka, Pablo (Magassa, 64), Bouen (Kante, 90+6), Kastelyanos (Traore, 75)
«Manchester Siti»: Donnarumma, Geyi, Husanov, Ayt Nuri (Sherki, 60), Mateus Nunes, Rodri, Bernardu Silva (Reynders, 75), O`Rayli, Semenyo (Foden, 75), Marmush (Doku, 60), Holand
Ogohlantirishlar: Magassa, 76. Fernandesh, 89 – Marmush, 11. Bernardu Silva, 37
Birinchi bo‘lim o‘rtalaridan o‘tganida Bernardu Silvaning Holandga uzatmasi to‘g‘ridan to‘g‘ri zarbaga aylanib, hisob ochilganida ko‘pchilik bu o‘yin taqdiri hal bo‘lgani haqida o‘ylay boshlagandi. Ammo «Siti» bu mavsumda ishonchli o‘ynay olmayapti. Biroz o‘tib «Vest Hem» muvozanatni tikladi. Burchak zarbasidan keyin Donnarumma to‘pga chiqishda xatoga yo‘l qo‘ydi va «Arsenal»ning sobiq futbolchisi Mavropanos muvozanatni tikladi.
Bu mezbonlar uchun o‘yindagi ilk zarba edi va bu zarba chempionlik poygasida ishtirok etayotgan jamoaning oyog‘idan chalib qolish uchun yetarli bo‘ldi. Qolgan vaqt davomida «shaharliklar»ning hech qaysisi mezbonlar himoya devorida o‘tmadi, to‘p darvoza sohasiga yetib borganida esa darvozabon Hermansen ishonchli harakat qildi. Endilikda shu kuni o‘yinni diskvalifikatsiya tufayli tribunada o‘tirib kuzatishga majbur bo‘lgan Gvardiola jamoasi «Arsenal»dan 9 ochkoga ortda qolmoqda. «Siti»da bitta zaxira o‘yini borligiga qaramay, deyarli hech kim endi jamoa bu farqni yo‘qqa chiqara olishiga ishonmayapti.
Ispaniya: Molinaning zambarak zarbasi va tinim bilmas Valverde
«Atletiko» – «Xetafe» 1:0
Gol: Molina, 8 (1:0)
«Atletiko»: Musso, Ximenes, Langle, Pubil (Alvares, 66), Koke, Almada (Simeone, 66), Vargas (Liorente, 73), Gonsales, Molina, Baena (Grizmann, 73), Syorlot (Lukman, 66)
«Xetafe»: Soriya, Abkar, Duarte (Riko, 83), Romero, Iglesias, Kiko Femeniya (Birmanchevich, 46), Dakonam, Arambarri (Martin, 74), Milya (Munos, 90+2), Satriano, Vaskes (Liso, 74)
Ogohlantirishlar: Syorlot, 55. Vargas, 68. Molina, 90 –Romero, 60. Liso, 77. Satriano, 90
Chetlatish: Abkar, 55
Yaqinda «Real»ni mag‘lub eta olgan «Xetafe» «Atletiko»ga ham jiddiy muammolar tug‘dirdi. Shu kuni Oblak o‘rniga darvozaga turgan Musso olti seyv ijro etishiga to‘g‘ri keldi. Ammo mezbonlarning qariyb ikki yildan buyon gol urmayotgan himoyachisi Molina o‘yin startidayoq o‘yin taqdirini hal qildi. Argentinalik futbolchining jarima maydoni tashqarisidan yo‘llagan kuchli zarbasidan keyin to‘p olis «to‘qqizlik»ka borib tushdi.
Mehmonlar esa ancha osonroq vaziyatlardan gol ura olmadi. «Matraschilar»ni goh Musso qutqardi, goh «Xetafe» futbolchilari to‘g‘ri zarba bera olmadi. Ikkinchi bo‘lim boshlarida Abkar qizil kartochka olib maydonni tark etganidan keyin esa amalda o‘yin taqdiri hal bo‘ldi. Diyego Simeone jamoasi uchinchi o‘rinni yanada mustahkamladi.
«Real» – «Elche» 4:1
Gollar: Ryudiger, 39 (1:0). Valverde, 44 (2:0). Hausen, 66 (3:0). Manuel Anxel, 85 – avtogol (3:1). Arda Guler, 89 (4:1)
«Real»: Kurtua, Ryudiger (D. Aguado, 61), Hausen, F. Garsiya, Karvahal, Tshuameni (Arda Guler, 58), Pitarch (Palasios, 64), Kamavinga, Valverde (G. Garsiya, 58), Vinisius Junior (Yanez, 58), Dias (Manuel Anxel, 63)
«Elche»: Dituro, Petro (M. Aguado, 64), Affengryuber (Bigas, 74), Chust, Valera, Sangare (Pedrosa, 23), Redondo (Mir, 64), Febas, Sepeda (Xosan, 64), Andre Silva, Neto (Diangana, 74)
Ogohlantirishlar: Kamavinga, 55 – Valera, 62. Affengryuber, 66. Mir, 88
Hafta o‘rtasida YeChL o‘yinida katta kuch sarflagan «Real» futbolchilari ancha vaqtgacha autsayder darvozasi tomon yo‘l topa olmadi. Ammo yarimhimoyaga qaytganidan keyin yayrab o‘ynayotgan Valverdeda bu o‘yinga ham yetarli kuch qolgandi. «Selta» darvozasiga g‘alaba goli, «Siti»ga qarshi o‘yinda het-trik, shanba kuni esa uning seriyasi darvom etdi. Avvaliga Fedening zarbasidan keyin darvozabon to‘pni amallab qaytardi, qaytgan to‘pga esa Ryudiger birinchi bo‘lib yetib keldi va hisob ochildi. Bir necha daqiqa o‘tib esa barchasini Valverdening o‘zi bajardi. U jarima maydoniga yaqinlashib kelib, bir harakat bilan himoyachini yo‘lidan oldi va to‘pni to‘sin ortidan darvoza to‘riga kiritdi.
Alvaro Arbeloa 58-daqiqadayoq Vinisius Junior, Valverde va Tshuameni kabi yetakchi futolchilarini, biroz o‘tib Ryudigerni ham zaxiraga oldi, ular keyingi hafta o‘rtasida «Siti»ga qarshi javob o‘yinida kerak bo‘ladi. Ularning o‘rniga o‘yinni davom ettirgan futbolchilar ham ikkita gol urishdi. Avvaliga 18 yoshli Yanesning uzatmasidan keyin Hausen hisobdagi farqni oshirdi. O‘yin oxirlarida esa Guler maydonning ikkinchi qismidan turib fantastik gol muallifiga aylandi. U zarba bergan nuqtadan darvoza chizig‘igacha bo‘lgan masofa 68 metr chiqadi.
Yirik g‘alabadan keyin madridliklar turnir jadvalida yana «Barselona»ga bir ochkolik masofada yaqinlashib oldi, lekin kataloniyaliklar yakshanba kuni «Sevilya»ga qarshi o‘yin natijasiga ko‘ra yana to‘rt ochkolik farqni tiklashi mumkin.
Bugun, Turkiya Superligasining 26-turi doirasida peshqadam «Galatasaroy» o‘z maydonida «Bashakshehir»ni qabul qiladi.
Uchrashuv Toshkent vaqti bilan soat 22:00 da Istanbuldagi «RAMS Park» stadionida boshlanadi.
«Galatasaroy» 25 o‘yindan so‘ng 61 ochko bilan jadvalda 1-o‘rinda bormoqda. «Bashakshehir» esa 42 ochko bilan 5-pog‘onani egallab turibdi va yevrokuboklar uchun kurashmoqda.
«Istanbul Bashakshehir» bugungi o‘yin uchun asosiy tarkibni e’lon qildi. Eldor Shomurodov — asosiyda, Abbosbek Fayzullayev qaydnomaga ham kiritilmagan.
2026-yilgi Osiyo Kubogi chorak finalida O‘zbekiston ayollar terma jamoasi Janubiy Koreya ayollar terma jamoasidan mag‘lubiyatga uchradi. 6:0 hisobida g‘alaba qozongan koreyslar yarim final yo‘llanmasini qo‘lga kiritdi.
Shunga qaramasdan, milliy jamoamiz Jahon chempionati yo‘llanmasi uchun kurashni davom ettiradi. Bo‘lg‘usi raqib Yaponiya – Filippin uchrashuvida aniqlanadi — ushbu uchrashuvda yengilgan jamoa ustidan g‘alaba qozonsa, O‘zbekiston terma jamoasi 2027-yilda Braziliyada o‘tkaziladigan ayollar o‘rtasidagi JChga yo‘llanma oladi.
Agar jamoa ushbu o‘tish bahsida ham yengilsa, KXDR/Xitoy Taypeyi o‘rtasidagi o‘yinda mag‘lub bo‘lgan jamoa bilan to‘qnash keladi. Bu uchrashuv g‘olibi xalqaro pley-off o‘yinlari orqali mundial yo‘llanmasi uchun kurashni davom ettiradi, mag‘lub musobaqani tark etadi.
2026-yilgi ayollar o‘rtasidagi Osiyo Kubogida 12 ta terma jamoa ishtirok etmoqda. Ular uchta guruhga bo‘lingan holda bahs olib bordi. Guruhlarda dastlabki ikki o‘rinni egallagan jamoalar hamda eng yaxshi ko‘rsatkich qayd etgan ikki nafar uchinchi o‘rin sohibi chorak final bosqichiga yo‘l oldi.
Chorak final g‘oliblari to‘g‘ridan-to‘g‘ri Jahon chempionati yo‘llanmasiga ega bo‘ladi. Mag‘lub jamoalar esa oldindan aniqlangan setka asosida pley-off bosqichida ishtirok etadi. Pley-offda g‘alaba qozongan jamoalar Osiyoning 5 va 6-vakili sifatida mundial yo‘llanmasini qo‘lga kiritadi.
JCh-2027 yo‘llanmasi uchun pley-off o‘yinlari:
O‘zbekiston — Yaponiya/Filippin
KXDR — Xitoy Taypeyi
Yarim finalga yo‘l olgan Avstraliya, Xitoy va Janubiy Koreya terma jamoalari allaqachon Jahon chempionati ishtirokchisiga aylanishga ulgurdi. So‘nggi yarim finalchi nomi Yaponiya – Filippin uchrashuvidan keyin ma’lum bo‘ladi.
Ma’lumot uchun: 2029-yilgi ayollar o‘rtasidagi Osiyo Kubogi O‘zbekistonda o‘tkaziladi.
Sport
Futbol bo‘yicha O‘zbekiston ayollar terma jamoasi Osiyo kubogi chorak finalida yirik hisobda mag‘lub bo‘ldi
Endi ular jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Avstraliyada bo‘lib o‘tayotgan ayollar o‘rtasida Osiyo kubogi chorak finalida O‘zbekiston terma jamoasi futbolchilari Janubiy koreyalik raqibalariga qarshi maydonga tushdi.
Bahs 6:0 hisobida Janubiy Koreya ayollar terma jamoasi g‘alabasi bilan yakunlandi.
O‘zbekistonlik ayol futbolchilar bangladeshlik raqibalarini 4:0 hisobida yengib chorak finalga chiqishgandi.
Endi ular 19 mart kuni jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Osiyo kubogida eng yaxshi natijaga erishgan olti jamoa 2027 yilgi ayollar o‘rtasidagi Jahon chempionatiga to‘g‘ridan-to‘g‘ri yo‘llanmani qo‘lga kiritadi.
Abduqodir Husanov oilasida o‘g‘il farzand dunyoga keldi
Prezidentning yangi qarori e’lon qilindi
«Siti» deyarli kurashdan chiqdi, Gulerdan shedevr gol. Kun o‘yinlari
-
Jamiyat4 days agoNogironlar uchun onlayn platforma tenderida shubhali holatlar aniqlandi
-
Siyosat2 days agoPrezident Mirziyoyev fuqarolardan murojaatlar ko‘payib borayotgan bir paytda militsiya xodimlarining qo‘pol xatti-harakatlarini tanqid qildi
-
Jamiyat4 days agoRulda kamar taqmagan Sardor Mamadaliyev jarimaga tortildi
-
Dunyodan4 days ago
Ali Xomanaiyning o‘g‘li Eronning yangi oliy rahbari etib saylandi
-
Siyosat3 days agoIkki nafar O‘zbekiston fuqarosi firibgarlik va o‘g‘irlik hodisasidan so‘ng Bahrayn va AQShdan qaytib keldi
-
Sport4 days agoAvstraliyadan boshpana so‘ragan eronlik futbolchilardan biri fikrini o‘zgartirdi
-
Iqtisodiyot3 days ago
13-mart kuni ham dollar kursi pastlaydi
-
Jamiyat1 day ago
Raqamli texnologiyalar vazirining birinchi o‘rinbosari Olimjon Umarov lavozimidan ozod etildi